mariam "

و عليكم السلام و رحمه اللّٰه و بركاته بالنسبه لإدمان السوشيال ميديا انا عن نفسي متخلصتش من الإدمان ده غير لما حطيت نفسي قدام الأمر الواقع و مسحت اي اكونت يخصني على السوشيال ميديا ، و مسحت البرامج نفسها ، أنت غصب عنك هتلاقي نفسك داخل لأي برنامج و بتتفرج على فيديوهات قصيره ، و دا متمثل في انستا و تيك توك و حاجات تانيه كتيره امسحهم مع الوقت هتتعود على عدم وجودهم ساعتها هتلاقي نفسك تلقائي مبتمسكش التليفون غير للضروره ، عشان تمتع نفسك و تستمتع ب ارض الواقع استغل اليوم من اولو ، بمعنى بلاش نوم كتير عشان بيصدع و بيبقا غلط ، نام نوم صحي و اصحى الفجر صليه و اقف في البلكونه مثلا تتنفس هواء نقي ، او حتى بعد صلاه الفجر في المسجد ،اتمشى و اشتري حاجه تاكلها و بتحبها او حاجه تقدر تعملها مع الفطار ، اشرب قهوه مثلا او مشروب بتحبو الصبح و طبعا قول الأذكار و بعدها اعمل برنامج لبليل على حسب مودك ، يعني لو حاسس انك عايز تقعد في البيت ف شوف فيلم كويس و بتحبو على التليفزيون مع أسرتك ، او لو عايز تخرج و تشوف صحابك ف اتفقو بليل تنزلو ،صدقني السوشيال ميديا مش صعب أبداً تتخلى عنها لإنها عمرها مكانت ولا هتكون شيئ اساسي في حياتنا ، الموضوع سهل و بسيط جدا و هيريحك بشكل مش عادي ، هتبعد نفسك عن مشاكل السوشيال و الحاجات الغريبه الي بتحصل فيها ، اشغل يومك ب سماع بودكاست او اقرأ قرآن كل ده هيريحك اكتر كمان ، خد كورسات ف مجال معين حابب تدرسوا دا هيفيدك جدا ، او روح جيم و العب رياضه ، المهم تشغل يومك عن السوشيال ميديا ، هتتعود بسرعه مجرد متحس بالهدوء و الراحه ف هتكره السوشيال أصلاً حضرتك بتقول ان ما شاء الله مصمم قصص اطفال ، جرب تقرأ روايات هتنفعك في مجالك بردو و هتفتح مخك على افكار جديده و هتستمتع بيها بردو و لتعلم الفقه ف يستحسن تنزل مكان على ارض الواقع بيعلم فقه عشان يكون في إلتزام اكتر و تشجيع اكتر و بمناسبه إن حضرتك في كليه صيدله ممكن تقرأ كتب تساعدك في مجالك كتب ليها علاقه ب صناعه الأدويه و غيرو ، او ابحث عن كورسات في مجال الكيمياء هتحسن من معلوماتك و تزيد من مهاراتك و اتمنى لك التوفيق

السلام عليكم و رحمه اللّٰه و بركاته أعمل الي عليك و مترهقش نفسك زياده الجمله دي كان نفسي حد يقولهالي و أنا ف تالته إعدادي حقيقي عشان أنا ارهقت نفسي نفسياً و جسدياً ف تالته و عرفت ان المجموع مش مهم و المهم اكتر صحتي النفسية الي فقدتها. ممكن تعمل شويه حاجات تخليك تلم الي فاتك بس بلاش توتر نفسك و تضغط نفسك و ترهق نفسيتك زياده فاضلك ٣ ايام كويسين عشان تلم فيهم العربي أسمع مستر محمد صلاح هو مستر ثانوي بس عامل فيديوهات نحو لكل المراحل حقيقي شاطر جداً و هيعجبك الجغرافيا كانت مشكلتي و انا في إعدادي بردو بس كل الي عليك الحل الكتير فيها عشان تتمكن منها أسمع مدرس يوتيوب شوف مستر عماد ممكن يعجبك، و كتاب الجغرافيا و التاريخ خد بالك جداا من المعلومات الي بتبقا بين الأسطر عشان هي دي الي بيجيبوها في الإمتحان ،و نصيحه بجد بلاش تنزل مراجعات سناتر قبل الإمتحانات غير في الرياضه ،، باقي المواد هتقدر تلمها و أنت ف البيت بشكل احسن بكتير بالنسبه للمسائل الصعبه الي بيحلها المدرسين كتير ف الرياضه ف هو ده الصح لما تحل سؤال صعب و تتعود على المسائل الصعبه في الرياضه وقتها اي سؤال سهل هتعرف تحلو و معدل المسائل الي هتقف معاك هيقل جداً في جمله مفهمتهاش و هي " لو عليا اذاكر ف البيت بس المدرسين هياخدو عني فكره وحشه" ليه هياخدو فكره وحشه عنك أنت عملت ايه غلط؟ انت بتحاول تشوف طريقه المذاكره المريحه بالنسبالك و ده الصح... اكبر غلط ممكن تاخدو ف حياتك هو اعتمادك على كلامهم عليك او رد فعلهم لما تسيب الدرس لازم تشوف ايه المريح بالنسبالك و تعملو ده مش هيكون مؤذي ليهم لكن لو عملت اللي ف دماغهم دا هيبقا مؤذي ليك أنتَ! بالعكس مذاكره البيت اونلاين احسن بمراحل من السناتر بتوفر وقت و مجهود كبير و كمان بتقدر تنظم وقتك من خلالها بشكل احسن بكتير بلاش تكرر الغلط في الترم التاني ، شوف المواد الي حاسس انك هتقدر تلمها و تذاكرها احسن في البيت ساعتها اعملها جدول مذاكره ينقسم لجزء شرح و جزء مراجعه و جزء حل بعد كل درس و قبل كل درس التزم على الجدول و في نفس الوقت حاول تعمل ايام اجازه عشان لو بعد الشر تعبت و مقدرتش تذاكر يكون ليك فرصه تانيه تلم فيها اللي فاتك صدقني تالته هتعدي بسهوله بس متضغطش نفسك اعمل الي عليك و توكل على اللّٰه و إن شاء اللّٰه هتنجح بتفوق

و عليكم السلام و رحمة اللّٰه و بركاته ممكن تعمل كذا حاجه تحل احتيارك بين التخصصين ابحث بشكل اعمق عن طبيعه شغل الإتنين و هل الشغل متوفر بشكل كبير ف المجال ده ولا لاء و طبعاً يستحسن قبل متاخد خطوه ناحيه اختيارك تصلي استخاره و ربنا هيقدملك اللي في الخير أنا مقدرش اساعدك من ناحيه الجامعه بس بالنسبه للإنجليزي ف أنتَ لو عايز تسافر برا لازم تطورو عشان متواجهش مشاكل تقدر تطورو عن طريق كذا حاجه ذي انك تتفرج على فيلم قصير او حتى برنامج امريكي مش مترجم بالعربي و بعد متتفرج شوف أنت فهمت ايه من كلامو بظبط او المحتوى بيتكلم عن ايه حاول تترجم و تسمع كتير للبرامج عشان النطق معاك يتحسن و تتعود على اللغه تقدر تاخد كورسات بشهادات معتمده من مواقع معروفه ، هتفيدك جداً في مجال شغلك لإن دلوقتي اغلب الدراسات معتمده على الإنجليزي و بردو هتزيد فرصه عملك عن طريق تحسينك للغه و لازم التواصل في اللغه تقدر تعمل كدا عن طريق الكورسات تحاول تنمي مهارات التواصل بالإنجليزي عشان ده مهم جداً ف اي انترڤيو للشغل جرب تقرأ روايات بالإنجليزي دا هيساعدك في تنميه اللغه و بردو انك تستخرج الكلمات الغريبه عليك و تحفظها دا هيبقا مفيد جداً لازم تاخد خطوه جاده في موضوع تعلم اللغه و يكون عندك شغف قوي عشان تقدر تتعلمها بإستمتاع سواء بودكاست او برامج انجليزيه تسمعها و أنتَ في المواصلات دا هيكون ممتع جدا و مفيد و جرب تكتب مثلاً عن يومك بس بالإنجليزي و تدخلو على لينك يصححلك الغلطات او حتى شات gpt تستعملو في تنميه اللغه و اتمنى لك التوفيق في مسيرتك الدراسيه

السلام عليكم و رحمة اللّٰه و بركاته حبيبتي ربنا يهون عليكي فراق الأب مش حاجه سهله اكيد ، الحل الوحيد الي هيشفي جرح قلبك هو التقرب من ربنا ادعي كتير ربنا يصبرك و صلي و سبحي ربنا يرحمه و يغفرله ، افتكري ان الدنيا مش دايمه و كلنا هنموت ، كلنا راجعين لربنا مش هقدر اقولك متعيطيش ، لاء عيطي عشان ترتاحي بس خلي عندك هدف هو انك تقربي من ربنا عشان تقابلي والدك في الجنه إن شاء اللّٰه و ممكن تكون سبب في الشفاعه لولدك و دخولو الجنه بتقربك من ربنا و طلعي صدقه على روحه ده هيريحك اكتر باباكي عمرو مهيكون فرحان لو انتي جبتي درجه مش كويسه في الإمتحان بسبب زعلك عليه ، ذاكري عشان تفرحيه و اجتهدي اكيد انا مش حاسه بنفس وجعك بس انا معاكي و جمبك و كلنا معاكي تقدري تحكي الي ف قلبك و هنجاوبك و نساعدك ربنا يصبرك و اللهمّ إن كان محسناً فزد من حسناته، وإن كان مسيئاً فتجاوز عن سيّئاته و اللهمّ أدخله الجنّة من غير مناقشة حساب، ولا سابقة عذاب يا رب العالمين

السلام عليكم و رحمه اللّٰه و بركاته أولاً كويس جداً إنك معترف بتقصيرك و بتجاهد للإنتظام أولاً توب توبه نصوحه لإن ترك الصلاه عواقبه صعبه جداً مشكلتك ان عندك تقصير تجاه دينك ف دا مش مخليك مقدر كويس قيمه الصلاه بعتذر لو كان اسلوبي مش احسن حاجه بس لازم افوقك لإن التهاون ف الصلاه مش حاجه سهله أبدا! فَوَيْلٌ لِلْمُصَلِّينَ * الَّذِينَ هُمْ عَنْ صَلَاتِهِمْ سَاهُونَ عارف ما هو الويل ؟ دا وادي في جهنم هسألك سؤال و جاوبوا لنفسك هل انت حابب تكون في وادي الويل ؟ هل حابب تكون من الناس الذي قال عليهم الرسول صلى الله عليه وسلم: العهد الذي بيننا وبينهم الصلاة، فمن تركها، فقد كفر حابب تكون من الكفار عشان ٥ دقايق مش قادر تسجد فيهم للي خلقك و خلق السماوات السبع! مش ملاحظ حاجه؟ الرسول مقالش ان الزاني كافر ولا قال القاتل كافر ولا السارق مع ان دول كلهم اسوء من بعض و لكن رسولنا الكريم قال ان تارك الصلاه كافر ! عايزاك تتخيل نفسك تعذب عذاب مَن كفرو و اشركو بالله كدا! الموضوع صعب بشكل مش عادي أبداً فكر ف نِعم ربنا عليك نعمه البصر و نعمه السمع و نعمه الصحه نعم لا تعد ولا تحصى ، ردك على النعم دي هي انك كسلان تصلي و مشغول؟ ايه الي شاغلك عن الي خلقك؟ ايه أهم من الصلاه يشغلك ؟ فكر كدا ، هتلاقي مفيش ، ليه ؟ لإن الشيطان بيلعب في عقلك و بيلاقيلك مبررات تبعدك عن الصلاه و يفهمك ان الموضوع متعب ف تكسل، متستسلمش للشيطان عشان هيضيعك! كل فرض مش هياخد منك ٥ دقائق يعني قول ربع ساعه او حتى ساعه ف اليوم كلو بتشكر فيها ربنا ، اليوم ٢٤ ساعه بظبط شايف ان ساعه هتشغلك و كسلان تسجد فيها لربك! عايزاك تفكر كويس ف الكلام الي بقولو و تراجع نفسك و تسأل نفسك ايه الي موقفني عن الصلاه ايه الي مانعني اعمل الحاجه الوحيده الي ممكن تدخلني الجنه بسم الله الرحمن الرحيم فَخَلَفَ مِنْ بَعْدِهِمْ خَلْفٌ أَضَاعُوا الصَّلاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا ۝ إِلَّا مَنْ تَابَ وَآمَنَ وَعَمِلَ صَالِحًا فَأُوْلَئِكَ يَدْخُلُونَ الْجَنَّةَ وَلا يُظْلَمُونَ شَيْئًا الحق نفسك و توب قبل فوات الأوان جاهد اكتر اظبط اكتر من منبه في موعد الصلاه عشان تفكرك بيها نزل برامج تفكرك بالصلاه في كذا طريقه تقدر تعملها عشان تفتكر و خلي عندك صُحبه صالحه تعينك تشجعوا بعض على الصلاه في المسجد فكر كويس و راجع نفسك و اعرف اهميه الصلاه و عواقب تركها اكتر و اتمنى لك الهدايه

السلام عليكم و رحمة اللّٰه و بركاته أنا و انا بقرأ حسيت إن ده انا الي كنت كاتبه ، مشكلتك كانت نفس مشكلتي بظبط بس مشكلتي اتحلت بالتقويم فك واحد شوفي دكتور كويس و هو يحدد ، للعلم التقويم متدفعيش المبلغ كلو ف مره واحده دا جلسه كل شهر بتدفعي فيها انا كنت عامله فك واحد ب ٦٠٠٠ كنت بدفع ٢٠٠ كل شهر و ساعات ادفع ١٠٠ و الباقي اكملو الجلسه الي بعدها و هكذا أهم حاجه اختيارك للدكتور الصح عشان في دكاتره بتعمل التقويم غالي جداً دا غير ان كل دكتور رأيو بيبقا مختلف عن التاني

السلام عليكم و رحمة اللّٰه و بركاته هدفك او طموحك بيتحدد من معرفتك بشكل أوسع لميولك و هواياتك و التعمق فيها يعني لو ميولك و هواياتك مثلاً لو هوايتك الرسم ف وقتها يبقا هدفك و طموحك انك تنمي الموهبه دي و لما تكبري تشتغلي ف حاجه تخص موهبتك عشان تبدعي ف شغلك أو لو مثلاً بتحبي جداً هندسه المباني و حابه تعرفي اكتر عن المجال ده ف وقتها بردو تقدري تحددي هدفك و هو مثلا انك تكوني مهندسه ف وقتها تشتغلي على ده لو سنك صغير ف تحديد هدف او طموح بيبقا في الأغلب مختلف عن طموحك و ميولك لما تكبري ف بيبقا الموضوع صعب شويه انك تتمسكي ب هدف لحد متكبري يعني مثلاً أنا من صغري كانت طموحي أدخل كليه طب جداً ، بس لما كبرت و بقيت في ثانوي لقيت إن ميولي اتغيرت تماماً و بقيت أحب جدا ان اعرف حاجات ليها علاقه بمجال الهندسه ف اتغيرت طموحي و بقيت عايزه ادخل كليه هندسه و دا حصل بسبب إن مكنتش اعرف بالظبط كليه طب نفسها بياخدو إيه و متعمقتش وقتها ف علم الإنسان و الحيوان لما تعمقت لقيت ان مش مستمتعه لو حابه تحددي هدف انك تنجحي في مجال معين اعرفي الأول المجالات كلها بتتكلم عن ايه و ساعتها شوفي راحتك فين و انتي شايفه نفسك فين مهم جداً يكون ليكي هدف تشتغلي عليه مش بس كليه او شغل بس هدف إنك تبقي انسانه معينه ، انسانه تكوني انتي راضيه عنها و فرحانه انك بقيتي الإنسانه دي اقعدي مع نفسك و فكري كويس و اعرفي المجالات الي حواليكي و مواهب الي حواليكي و اكتشفي مواهبك او اكتشفي الحاجات الي فعلاً نفسك تتعلميها و على اساسها هتقدري تحددي هدفك و طموحك و ممكن تخلي اهدافك حاجات صغيره في البدايه حاجات تقدري تحققيها بس مكنتيش عارفه انها هتفيدك و تفرحك لإن احساسك انك حققتي حاجه نفسِك فيها من بدري حتى لو كانت صغيره دا هيديكي طاقه عشان تحققي الأهداف الأكبر في نظرك و بالتوفيق

السلام عليكم و رحمة اللّٰه و بركاته اولا احنا ك طلاب بنعرف ان مستر اشطر من غيرو لما نلاقيه بيقول معلومات جديده و مفيده و متنوعه بس ف إطار الدرس بمعنى حضرتك تقول معلومه تربط بيها احداث درس التاريخ عشان نفهمو و نستوعبو و تشرح الدرس كأنك بتشرح قصه لإن التاريخ شبه القصص ف لما بيتشرح كدا الحاجه بتثبت اكتر و بتكون الحصه ممتعه بالنسبالنا و طبعا مش معنى ان حضرتك هتشرحها قصه يبقا متكتبش الفكر الرئيسيه او الخلاصه بمعنى اصح و مفاتيح الحل بنحتاجها جدا خصوصا ف ثانوي و بلاش المذكرات لإن بردو ف الأغلب مش بنذاكر منها و بنذاكر من الكتاب pdf عشان في اسئله بتكون بين السطور و المستر ممكن ميكونش واخد بالو منها و ميحطهاش في المذكره ظناً منو ان هو كدا بيلخص غير كدا ف الغالب المستر بينسى ينزل اجابات اسئله كل درس ف بنكون حاسين اننا بنحل ع الفاضي و مش عارفين الإجابات و بنحب المستر المتابع يعني كويز كل حصه امتحان شامل كل شهر و واجب يتشاف كل حصه و متابعه مع ولي الأمر رغم ان الموضوع بيبقا متعب بس الحقيقه ده بيفيدنا جدا انا عن نفسي مقدرش اخد مع مستر إلا لو كان كدا و بردو في فكره حضرتك ممكن تعملها هتبقا كويسه جدا و هي ان كل كويز ف كل حصه تجمع درجات كل طالب اخر الشهر و تعملها ف نسبه مئويه و تكرم الي جايب اعلى درجه و بردو في مدرسين بيعملو فكره ان الي جاب مثلا ف الكويز 10 من 10 بيروح ياخد ختم من المستر احمر و الي جايب اقل بدرجتين ياخد ختم ازرق و الي يجمع اكبر اختام لونها احمر يتكرم احنا ك طلاب بنحب يكون في عدل يعني من العدل يكون الشاطر على الأقل المستر عارف ان شاطر ف بيجازيه ب بختم احمر على الكويز و جملة كويسه و يكون في تشجيع ب حاجات بسيطه ذي الأول في الشامل هياخد شهاده او الأول هياخد درع و التاني شهاده الحاجات دي بتبسطنا جدا و بتبقا دافع اننا نذاكر و بلاش انشطه غريبه و برا إطار الحصه المدرسين ساعات بيعملو مثلا مسابقه و نقسم فرقه و كل واحد يجاوب عدد محدد الحاجات دي بنحسها ان هي تضييع للوقت يعني لو بدل مسابقات كل واحد حل امتحان اول الحصه على الحصص الي فاتت و بعدها دخلنا ف الشرح هيكون أفضل طبعاً انا بكلم حضرتك ع ثانوي لكن اعدادي و ابتدائي ف بتختلف في طلاب بتتفاعل جدا ف الحاجات دي و في لاء ، لكن ف ثانوي احنا عايزين الخلاصه و منضيعش وقت و ناخد الأفكار المهمه و نرجع بيوتنا أما مسابقات و كدا ف مبيبقاش ف نظرنا حاجه ممتعه بالنسبه للمراجعات ف دي لو المستر عامل مذكره صغيره بيلم فيها اهم الفكر بتبقا حاجه حلوه و كويسه بالنسبالنا و معسكر يلم الدنيا و المستر مثلا يشرح كل باب ف يوم بس ميكونش بيكروت و ف نفس الوقت متكونش الحصه كبيره يعني حصص 6 ساعات دي بتبقا اكبر تضييع وقت بالنسبالنا عشان المفروض احنا بنراجع مش بنشرح من الأول و حابه أقول لحضرتك حاجه بجد بجد مهمه جدا بالنسبالنا ك طلاب ثانوي و هي ان المستر يدينا طاقه إيجابية و كلام إيجابي مش سلبي يعني بلاش جمله انتو مش فالحين و غيرو ، و طبعاً بردو من المهم ان حضرتك تكون عارف ان مش معنى ان حصلك موقف مش احسن حاجه و مخليك زعلان طول اليوم او متعصب ان تطلع دا ف طلابك لإن احنا محتاجين الي يشجعنا و يكون كويس معانا مش يزعقلنا بلا سبب ، بس طبعاً مش معنى كدا ان حضرتك تهزر طول الحصه و تخرج برا إطار الدرس كتير لإن دا بردو بيخلينا حاسين ب تضييع وقت على كلام مش مفيد و بردو من المهم متفرقش بين بنت او ولد عشان في مدرسين بيبقا عندهم التفرقه العنصريه عاليه بيننا لدرجه التمييز ف الجوائز و يدوا للولاد جوائز و البنات لاء و يخلوا البنات تجاوب و الولاد لاء ده بيبقا مش حلو أبداً بالنسبالنا و بس اتمنى اكون افدت حضرتك و بالتوفيق

السلام عليكم و رحمة اللّٰه و بركاته يمكن دا بسبب ضغوطات الشغل مش اكتر يعني كلنا كدا حتى لو مش شغل بس لو واحد مشغول ف حاجه معينه و كان حد معاه في نفس المكان تلقائي بيتعصب عليه و لو حصل مشكله بيسببها فيه عشان مش لاقي حد يخرج عصبيتو عليه لما قرأت افتكرت ماما لما بقف معاها في المطبخ و لو حصل حاجه بتزعقلي رغم إن معملتش أي حاجه ، بس بعدين الموضوع قعد يتكرر إنها تسببني في أي حاجه و انا واقفه معاها و مليش أي ذنب ساعتها حست بزعلي و قالتلي إن هي بتخرج عصبيتها فيا عشان مش لاقيه غيري و إن المفروض أستحملها لإن أنا بنتها ف أنتَ كمان فكر بالطريقه دي و إنك ابنو عشان كدا بيخرج عصبيتو و زعلو عليك على امل إنك هتتفهم دا و تعذروا انتَ بتقول ان هو زعل لما انتَ فكرت إن هو ممكن يضربك طيب تفتكر زعل ليه؟ عشان هو بيحبك و متوقعش إنك تظن فيه كدا من مجرد موقف ، حاول تتكلم معاه بهدوء و تقولو إنك زعلت و حاول تتفهَّمو هو بيحبك و خايف عليك و عايزك تتعلم الشغل مش اكتر مش قصدو إن يتعصب عليك مهما حصل افتكر ان دا والدك الي رباك متزعلهوش و اتفاهم معاه و اتكلم معاه بصراحه و بهدوء و حتى وقت عصبيتو كون هادي و متردش عشان الموضوع ميكبرش و إن شاء اللّٰه كل حاجه هتتحسن مبينكوا

السلام عليكم و رحمة اللّٖه و بركاته هو اكيد كلنا ف حياتنا خسرنا شخص حبيناه سواء تخلى عننا او بعد بدون قصد بس الفكره هنا بيكون للشخص التاني احساس عدم راحه مش اكتر بمعنى مش شرط تكون عملت حاجه غلط او العيب فيك و لكن يمكن الي قدامك شايف ان العيب فيه هو و ان هو الي هيظلمك لو كمل معاك ف العلاقه دي او حاسس بعدم راحه حتى مهما عملت الإحساس دا لو جيه لإنسان مبيروحش هتتخطى مع الوقت بس متفضلش تفكر كتير ، انت محتاج تتقبل حاجه ذي كدا و تتعايش مع الوضع و تعمل حاجه تخلي عقلك مشغول ف حاجه تانيه تنسيك، ذي إنك تعمل حاجات بتحبها او تمارس حاجه جديده او تقرب من ربنا اكتر ساعتها مش هتدي فرصه للشيطان يلعب بعقلك و يفهمك ان خلاص كدا الدنيا قفلت على الشخص دا و انت مش هتقدر تحب تاني و الكلام دا كلو ، يمكن مكنش في خير ف انك تكمل ف العلاقه دي و ممكن حاجات كتيره بس الخُلاصه الغلط مش فيك أبدا و اه الدنيا كدا ناس بتروح و ناس بتيجي بس لازم تمسك مشاعرك و تحاول تنسى و كل حاجه هتعدي بإذن اللّٰه

السلام عليكم و رحمة اللّٰه و بركاته هكلمك كوني بنت و هقولك احساس اي بنت مكانها ، مجرد م البنت احس انها بتتقارن بحد تاني دا بيبقا احساس صعب و مش حلو أبداً حتى لو هي فيها صفات حلوه كتير بس مجرد متقارنها بحد هتحس انها انسانه عيوب بس مفهاش مميزات لازم تعرف ان حتى انت مش كامل ولا هي كامله و مفيش حد كامل أبداً ،كلنا فينا عيوب و مميزات طيب امتى تحس انك بتحب البنت فعلاً ، لما تكون متقبل عيوبها كلها و حابب شخصيتها و مميزاتها ، و يكون سواء مميزاتها او عيوبها اللي تقبلتها مخلياك شايف انها انسانه كامله و مش شايف غيرها الطبيعي ان شريك الحياه بيكمل نقص ف حياتك كبير ف لما تكون مع واحده و شايف إنك لاء دي مش مكفياك و في غيرها عاجبك اكتر دا معناه إنك مبتحبش البنت دي ف يستحسن متظلمهاش معاك خصوصاً إنها بتحبك و انت مكمل منغير متحبها بس تحت مسمى "صعبانه عليا" و دا عمرو مكان مبرر انك تكمل ف يستحسن متكملش عشان متكونش مؤذي بالنسبالها بس بردو الأفضل تصلي استخاره ف حاجه ذي كدا و إن شاء اللّٰه ربنا هيقدرلك الي فيه الخير و بالتوفيق

السلام عليكم و رحمة اللّٰه و بركاته قال الرسول صلى الله عليه وسلم : ( إن الله تجاوز عن أمتي الخطأ والنسيان وما استُكرهوا عليه ) يعني انتِ مش عليكي ذنب كونك مكنتيش عارفه و صلاتك مقبوله ب اذن اللّٰه ، متحاوليش تحطي ف بالك كلام ذي صلاتي مش مقبوله و ان ليه اصلي و اصلا كلها مش هتتقبل كل دي حاجات بيضحك عليكي الشيطان بيها عشان متصليش تاني ، و بالنسبه للإفتراش و التورك دي سُنه مش فرض يعني مش لازم تعمليها ، حاولي تبصي على الي حصل بطريقه تانيه و هي إنك لازم تتعلمي اساسيات دينك و احكام حاجات كتيره ، شوفي فيديوهات لعلماء الدين و هم بيصلوا و قلديهم ، نزلي برامج فيها فتاوى نساء انصحك ببرنامج "مكتبتي" وقتها هتعرفي معلومات كتيره كويسه و هتنفعك ، و في نقطه حبيت اكلمك فيها و هي جمله " اكيد مش هعرف اسيب الدرس الا بعد ميخلص و اروح اصلي " انتِ جربتي تحاولي؟ ، جربتي تستأذني من استاذك إن في وقت الصلاه تروحي تصلي؟ اعتقد الإجابه هتبقا لاء ، بس حابه اقولك إن الشهاده مش هتنفعك ف حاجه لو انتِ كنتي بتسيبي صلاتك عشانها ، يمكن تموتي قبل متاخدي الشهاده محدش ضامن عمرو ف لازم تجاهدي و تعملي لأخرتك كنت بقول زيك و ازاي هسيب الدرس و اروح اصلي و كمان كنت ساعتها بلبس بناطيل يعني مينفعش اصلي بيها و لكن ربنا هداني و بقيت البس جيب ، قولت اجرب اسأل مدرسيني بيني و بينهم كدا هل ف وقت الصلاه ينفع اروح اصلي ولا لاء و الحقيقه ان محدش فيهم كان بيرفض حتى المستر المسيحي منهم كان بيوافق و يقولي ادعيلي معاكي كمان ، المدرسين مش هيبقا عندهم اعتراض ف نقطه انك مثلا بعد الكويز تروحي تصلي ، طيب لو عندهم ، ساعتها حاولي تنظمي وقتك و تروحي مجموعه تانيه معادها مش متضارب مع معاد الصلاه ، طيب مثلا لبسك مش مناسب و هتصلي ازاي منغير سجاده صلاه ، عندي صحبتي لبسها مش مناسب بردو و لكن هي عكسك مستسلمتش لكدا بالعكس كانت بتجيب معاها اسدال خفيف ف الشنطه و تلبسو لما نصلي و بالنسبه للسجاده غالباً هتلاقي في السنتر و لو مش موجوده في سجاده اسمها سجاده جيب دي خفيفه جدا و صغيره مخصصه لإنك تاخديها برا البيت عشان تصلي برا لازم تجاهدي و الصلاه لازم تتصلى ف اوقاتها مينفعش تراكميها لأي سبب ف الدنيا إلا الي ربنا محللو ان يجمع صلوات ذي المسافر و المريض ، غير كدا مفيش اي حاجه تخليكي تراكمي صلوات بفكرك إنك جايه الدنيا عشان تعملي للأخره ف سواء شغل او دراسه كل دي حاجات مش هتنفعك لو أنت عاملاها و بعيده عن ربنا ، لازم تقربي من ربنا و بردو لازم تذاكري و تشتغلي ، وفقي بين الإتنين عشان هم الإتنين مهمين بس الصلاه ليها وقتها اللي مينفعش يتأخر ، توبي لربنا و حاولي تعملي اللي قولتلك عليه و اتمنى لكي التوفيق و الهدايه

السلام عليكم و رحمة اللّٰه و بركاته هقولك قصه عن الصحابي عبد اللّٰه بن مسعود و كان عندو نفس مشكلتك عن عبدالله بن مسعود رضي الله عنه أنه كان يجتني سواكاً من الأراك ( صعد النخل لجلب التمر )، وكان دقيق الساقين و نحيف و قصير القامه ، فجعلت الريح تكفؤه(اتت رياح فتعرت ساقيه امام القوم )، فضحك القوم منه لشده نحافتهما ، فقال رسول الله -صلى الله عليه وسلم-: (مم تضحكون؟) ، قالوا: يا نبي الله من دقة ساقيه، فقال: (لَرِجْلُ عبدالله أثقل في الميزان يوم القيامة مِن جبل أُحُد) حابه اعرفك إن الإنسان بيتقاس ب الي جواه بأخلاقو مش بشكلو نحيف او قصير او اي حاجه خلي عندك ثقه ف نفسك و مهما حصل متخليش الثقه دي تهتز أبدا https://youtu.be/33fD-zeb-go?si=y1aOLFBmpn7GexBb

السلام عليكم و رحمة اللّٰه و بركاته انا هتكلم معاكي بالمنطقيه و هسألك اسأله عايزاكي تجاوبيها مع نفسك ، أولاً مجرد الكلام ميثبتش ان شخص كويس ابداً بدليل إن لما بدأ تعارف بدأ من على السوشيال ، لو كان شخص كويس كان بدأ التعارف عن طريق معرفه اهلك بيه و معرفتك من خلالهم و في وجودهم لكن مش من وراهم طب هو ايه الي يثبتلك إن مش بيتسلى ؟ و إيه الي يثبت إن هو هييجي فعلا يتقدم بعد شهر؟ كلو مجرد كلام بيحاول يقولو عشان يتسلى مش اكتر ، و بيقولو عشان تصدقيه ان مش بيلعب و انتي فعلا صدقتيه ، بس حابه افكرك ان ديننا حرم الإختلاط بكل اشكالو و حرم ان البنت تتعرف على ولد في نطاق غير شرعي مسألتيش نفسك ليه؟ عشان ربنا هو الي خلقنا و عارف شهواتنا و عارف الي جوانا و احنا بنفكر ف إيه ف عشان كدا ربنا حرم تعارف الرجال على النساء و بذكرك في قوله تعالى ( فلا تخضعن بالقول فيطمع الذي في قلبه مرض ) و دا كان خطاب موجه من اللّٰه لنساء النبي صلى الله عليه وسلم ، و للمسلمات كافه معناه أن لا يكون كلام النساء بحضرة الرجال غير المحارم والزوج رقيقاً ليناً مرخماً، تظهر فيه أنوثة المرأة التي بها تميل قلوب الرجال وشهوتهم إليها، بل يكون كلامهن فصلاً غليظاً بغير رفع للصوت، ولا كثرة كلام، إنما يكون كلامها على قدر الحاجة يعني مينفعش تتعرفي عليه او تديلو فرصه إن يكلمك و بردو حابه افكرك ان مشاعرك غاليه احتفظي بيها للي يستاهلها و الي جاي البيت من بابو مش بيقول مجرد كلام عشان يتسلى و خلاص ، انتي جوهره مينفعش ياخدها غير الي يستاهلها ف خليكي مش سهل واحد يكلمك و مش سهل يتعرف عليكي او يضحك عليكي بالكلام ، تصدقي بالأفعال بس و هنا اقصد ان ياخد خطوه جد و يكلم اهلك أولاً توبي لربنا ، و اعمليلو بلوك هو او اي واحد بيفكر يتسلى و عززي نفسك و متقبليش بمحاوله واحد ان يتكلم معاكي ،، و اتمنى ليكي الهدايه و التوفيق

السلام عليكم و رحمه اللّٰه و بركاته التقويم محتاج اشعه على الفكين أولاً وقتها الدكتور هو الي هيحدد هل المشكله في الأسنان فعلا ولا لاء ساعتها لو المشكله في الأسنان يإما هتعمل تقويم ف الفكين او فك واحد على حسب الأشعه و وارد المشكله ف عضمه الفكين نفسها ساعتها هتحتاج تجميل وجه و فكين مش تقويم و يستحسن الأشعه توريها لكذا دكتور مش دكتور واحد عشان في دكاتره بيكونو عايزين يعملو فكين بغرض فلوس زياده مش اكتر رغم ان المشكله بتبقا ف فك واحد ، و يستحسن بردو تتابع مع دكتور عندو عياده خاصه لإن لو مش عياده خاصه ممكن الدكتور ينقل محافظه تانيه وقتها هتضطر تسافر عشان تتابع معاه كل شهر انا حصل معايا كدا ، و التقويم خطوه كويسه في بدايه اول اسبوع او اتنين هتحس ب ألم بسبب حركه الأسنان عن مكانها الطبيعي و مش هتكون عارف تاكل و لكن بعد كدا هتعتاد عليه جداً و الألم هيخف بالتدريج إن شاء اللّٰه

السلام عليكم و رحمة اللّٰه و بركاته ممكن الي بيحصل ده بسبب إنك بتعمل حاجه مش حاببها و إن المذاكره وقت ممل بالنسبالك بتحاول تهرب منو ب أي شكل ف بتبدأ تفكر في حاجات بعيده عن المذاكره بشكل كامل جرب تهيئ نفسك للمذاكره و تقعد و تكون مراقب نفسك بمعنى بعد متظبط مكان المذاكره تفتح درس و تقول انك هتخلصو النهارده مهما حصل اول متلاقي نفسك دماغك بدأت تسرح فوَّق نفسك حسيت انك محتاج تاخد استراحه متسبش نفسك لدماغك حتى في وقت الإستراحه ،وقتها تقوم تعمل قهوه مثلاً أو تنزل تتمشى أو حتى تقرأ كتاب اعمل اي حاجه تفصلك عن المذاكره و في نفس الوقت تخلي مفيش وقت ليك إنك تقعد تفكر ف حاجه و اكتر حاجه انصحك تعملها ف الوقت ده هو إنك تسمع قرآن لإنك لما تسمع قرآن هتركز في المعنى و دماغك وقتها مش هتقدر تسرح جرب تعمل كدا في وقت المذاكره نفسو يعني على سبيل المثال لو قدامك كلمات إنجليزي محتاج تحفظها أو بتنقل حاجات معينه ف شغل قرآن و ركز مع معانيه و أنت بتحفظ او بتنقل جرب Pomodoro technique يعني تظبط وقت مثلا ١٥ دقيقه و تشوف جزء معين او صفحتين من الدرس و تظبط الوقت و تحطو قدامك و تخلص في الوقت ده ، في أغلب الأحيان إنك تشوف الوقت بالدقايق و هو بيخلص هتحس ب توتر و إنك لازم تخلص ف الوقت ده و هتدي أهميه للموضوع حتى لو كان ملهوش اهميه دي نفس فكره الإمتحانات لو بتحل كويز و الوقت قدامك بتكون متوتر و بتحاول تخلص ف اسرع وقت. جرب الطرق دي و يمكن تنفع معاك و اتمنى اكون افدتك و السلام عليكم

السلام عليكم و رحمة اللّٰه و بركاته إحساس إنك تكون مش واثق انك هتقدر على حاجه معينه دا مش هيزيدك إلا توتر و إحباط لازم يكون عندك ثقه في ربنا أولاً إنك هتقدر و لازم تعمل الي عليك لإن مش هتنجح لو انت مش عامل الي عليك و شايف الي وراك اعمل الي عليك و سيب الباقي على ربنا ، ربنا مبيضيعش تعب حد و توكل على اللّٰه خلي عندك من جواك ثقه إن حتى لو مدخلتش الكليه الي عايزها ف ربنا هيحطك ف حاجه احسن من الكليه الي كنت هتدخلها و خلي الآيه دي في دماغك ( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ ) خليك دايما فاكر ان كل الي يجيبوا ربنا كويس اي كليه أياً كانت ، بس مش معنى كدا انك تُهمل الي وراك و تقول الي ربنا عايزو هيكون لاء لازم تحاول على قد متقدر و تجاهد عشان توصل لحاجه احسن من توقعاتك ثقتك ف نفسك دي مش هتيجي غير لما تثق ف ربنا الأول جرب تقرب من ربنا اكتر هترتاح هتحس انك فعلا وقت الحزن و الزعل مبتفكرش غير ف إنك تشكي لربنا ذي مبتقول نفسك حد يحضنك و يقولك كل حاجه هتبقا تمام دا الي هتحسو فعلاً لما تقرب من ربنا اكتر و تستشعر معاني القرآن كل ده هيريحك و هيخليك حاسس إن مهما حصل أنت راضي و واثق انك هتقدر و ان ربنا مش هيجازيك غير خير خلي دايماً على لسانك (بسم اللّٰه توكلت على اللّٰه ولا حول ولا قوة إلا باللّٰه ) توكل على ربنا ف كل امور دنيتك هتحس ب راحه و هتطمئن و هتحس ب ثقه اكتر و مفيش حاجه اسمها بضيع السنه مني لإن السنه لسه مضاعتش أنتَ لسه فيها ، اصحى من غفلتك دلوقتي احسن متضيع منك السنه فعلاً وقتها هتحس ب ندم ذاكر و لو حتى حبه صغيرين لحد مهتلاقي نفسك بتذاكر اكتر و اكتر مع الوقت اتمنى اكون افدتك و بالتوفيق

السلام عليكم و رحمة اللّٰه و بركاته انتي مش مضطره تتحملي قوانين عائلته العجيبه و لا يصح أبداً أنكم تتكلموا بدون وجود شيئ رسمي مبينكم أعتقد انتِ محتاجه تفكري و تراجعي نفسك في العلاقه دي ،و تفكري من ناحيه دينك اه بتحبيه و الموضوع صعب ، بس هل يستاهل تغضبي ربنا و تدخلي النار عشانو ؟؟ ميستاهلش ابداً تغضبي ربنا عشانو مهما كان هو مين ، لو استنيتي ٧ سنوات كدا بتضيعي وقت من عمرك على شخص اللّٰه أعلم هيتقدم فعلاً ولا واخدها تسليه نصيحه مني بلاش تدخلي نفسك في علاقه ذي دي أبدا نهايتها محدش عارفها و نهايتها دي هتكون مؤذيه ليكي بشكل كبير و افتكري إن الإرتباط حرام و الي عايزك فعلاً هيتقدم و مش هيرضى أبداً إنك تخوني ثقه أهلك أو تعملي حاجه غلط من وراهم ، فكري كويس لإن كل الي بتعمليه هينعكس عليكي في المستقبل بصوره سلبية ،و بالتوفيق

و عليكم السلام و رحمة اللّٰه و بركاته مفيش عمر ضاع ولا حاجه متشتتش نفسك بالأفكار السلبيه دي عشان نفسيتك متتعبش بالنسبه للشغل ف جرب تقعد مع نفسك و تفكر كويس ايه الشغلانه من بين الي اشتغلتهم الي انت حاببها و حاسس انك تقدر تحقق فيها حاجات كتيره و حاسس بردو انك هتثبت نفسك في الشغلانه دي وقتها اختار شغلانه مرتبها مناسب مش لازم تبص للمرتبات العاليه و تسيب بعد كدا الشغلانه ، اه معاك فعلاً إن كل حاجه غليت و الواحد محتاج فلوس اكتر بس تعالى نفكر بطريقه تانيه مثلاً عندك اتنين واحد مرتبو عالي و لكن هو مبيحبش شغلو ولا بيحب يروحو كدا مش هيثبت نفسو ف شغلو ده و مرتبو هيفضل على نفس الحال و التاني مرتبو بسيط بس بيحب شغلو و بيحب يروحو وقتها مع الوقت هيعلى مرتبو لإن هو هتلاقيه حقق حاجات كتير في الشغل ده و هو حابب جدا يحقق اكتر و اكتر و عندو قدره على ده أنت محتاج بس تفكر و تقعد مع نفسك و تستخير ربنا في الشغلانه الي هتنفعك طيب لازم بردو ب جانب الشغل يكون في حاجه تانيه بتخليك فرحان و أنت بتعملها و تخرجك من مود الخنقه فكر في رياضه معينه تمارسها او هوايه عندك تنميها سواء كانت سباحه او كوره او غيرو ممكن تروح جيم ده بردو هيخليك حاسس انك بتغير جو و بتعمل حاجات جديده وقتها مش هتحس بالخنقه بجانب كل ده بردو لازم تستثمر وقتك في حاجه مفيده تنفعك في شغلك ذي تعلم لغه جديده ذي الإيطالي و الصيني او حتى تاخد قورسات تقويه إنجليزي او ممكن تاخد قورسات برمجه كل دي افكار تقدر تعملها في سنك و هتخليك مبسوط و حاسس انك عملت إنجازات كتيره و كمان وقتها دا هينفعك في شغلك جداً و هتقدر تحقق اكتر في شغلك و تثبت فيه و حياتك وقتها هتتحسن إن شاء اللّٰه ،و اتمنى لك التوفيق

السلام عليكم و رحمة اللّٰه و بركاته ارجعي بيت جوزك ، متفضليش عند مامتك لإن جوزك ممكن يزعل و يدايق ، كويس إن واقف في صفك متزعلهوش منك بالنسبه لأهل جوزك ف قولي لجوزك انك عايزه حياتك الخاصه و متتعامليش معاهم بشكل مستمر انتي مش مُطالب منك تخدمي حد ولا حتى دينياً مجبوره على كدا ف اتعاملي معاهم بكل احترام و تجاهلي اي كلام بيقولوه عليكي ولا حتى تردي على الكلام ده خلي جوزك هو الي يتعامل و قوليلو كدا وقتها هو الي هيرد و يدافع عنك بطريقه متزعلش اهلو منو و تراضيكي ، و عادي اتصالحي معاهم عشان جوزك مش اكتر لإن هو مضطر يصالحك عليهم حطي نفسك مكانو كدا كأنك بتخيريه بينو و بين اهلو و دي حاجه صعبه ، و أخيراً اتمنى لكي التوفيق

السلام عليكم و رحمة اللّٰه و بركاته الحل هو التوبه ،و التقرب من اللّٰه عز و جل و حاول تنتظم في صلاتك و تصلي سنن و استمع للقرآن كل دا بيريح بشكل من طبيعي و هيساعدك انك تتخلص من ادمانك و افتكر لسه قدامك وقت تخلص المتراكم متوترش نفسك نظم وقتك خلي ساعات كتير للمذاكره في اليوم بس بشكل متقطع عشان متزهقش بمعنى انت لما تنتظم في صلاتك هتصحى تصلي الفجر وقتها صلي و ذاكر لحد الساعه سبعه او تسعه اعتقد مش هيكون عندك دروس في الوقت ده انصحك بالمذاكره في ،هتكون مركز جدا بعدها من الساعه تسعه نام لحد الضهر خلص دروسك و نام ساعه و نص كإستراحه من تعب الدروس بعدها ذاكر تاني و استمر على ده بس لازم يكون في ساعه لنفسك او ساعه و نص تظبطها انك تفك عن نفسك ب حاجه بتحبها ذي انك تكلم صحبك الي بتحبو او تنزل تتمشى شويه ف جو هادي تشتري اكله بتحبها كل دي حاجات بسيطه هتخليك فرحان و هتكون فصلت حبه عن المذاكره بس طبعا عمر ابداً م الحاجات دي هتحصل إلا لو قربت من ربنا عشان يوفقك في كل ده و لاااازم تتوب ،الموضوع في البدايه هيبقا صعب عليك و عايز ترجع تعمل الغلط تاني دا غير ربنا هيختبر توبتك ، اثبت على قد متقدر اول متحس انك هتعمل حاجه غلط اشغل نفسك ب حاجه تانيه أو ابعد عنك التليفون و اي حاجه بتخليك ترجع تتفرج على المواقع دي ، انصحك وقت متفكر بس في الغلط شغل قرآن و اقرأ وراه ، اسمع بودكاست هيغيرلك حياتك بشكل كبير ، شوف بودكاست وعي او قهوه بدون سكر ،كل دول هيحسنوا حياتك بس القرآن اكتر طبعاً و اسأل اللّٰه لك التوفيق و الهدايه.

السلام عليكم و رحمة اللّٰه و بركاته حبيت انبهك أو افكرك ان التواصل بينك و بينها حرام من البدايه ، و يمكن هي ادركت ده و شافت انك بتتسلى ف بعدت و حقها أنا لو مكانها اكيد هفتكر كدا لإنك مأخدتش خطوه جد بتحبها اتقدملها شوف هتوافق بيك ولا لاء وقتها بقا لو رفضتك تبقا فكر ف موضوع "مش عارف انساها" لكن دلوقتي أنت عندك فرصه ، هتنساها ليه و أنت لسه بتحبها و ب إيدك تبقا معاها طول العمر ؟ و حبيت اتكلم ف نقطه معينه و هي إن مش صح أبداً انك ترتبط ب بنات انت بتضيع مشاعر البنت الي قدامك كدا بتستغلها عشان تنسى بيها واحده تانيه ،ف البنات الي بتعمل معاها كدا ممكن يكونوا بيعانوا نفس معاناتك دي طب ليه تعمل كدا و دا أصلا غلط و حرام ،، لازم تتوب عن الغلط ده عشان ربنا يوفقك في حياتك ، انت كدا بتهدر مشاعر البنت الي قدامك و مشاعرك على الفاضي على بدايه غلط و ملهاش أخر و لازم تعرف قبل مترتبط ب اي بنت إن ذي م أنت ك راجل مش هتقبل تكون مع بنت ارتبطت ب كذا واحد ، البنت الي مرتبطتش ف حياتها او حتى تائبه عن الغلط ده عمرها مهتوافق ب واحد ارتبط ب بنات كتير و لسه متابش عن ده ، هتوافق تبقا مع واحد أهدر مشاعرو لبنات كتير غيرها ليه و اغضب ربنا و هي ب ايديها تبقا مع واحد مقدرها و محبش غيرها و مش عايز يغضب ربنا ؟ حاول تتوب عن غلط ذي دا ،و انصحك إنك تتواصل معاها تعرفها انك هتاخد خطوه جد ، لو فعلا قررت كدا ، لكن لو قررت تكمل في الطريق الي أنت فيه و مش حابب تاخد خطوه جد ، ف انت كدا بتحمل نفسك فوق طاقتك هتندم بعدين بسبب كدا لازم تقعد مع نفسك تفكر هتعمل ايه و مستعد لخطوه ذي دي ولا لاء ،و اتمنى لك التوفيق و الهدايه

السلام عليكم و رحمه اللّٰه و بركاته أولاً حبيبتي العلاقات المحرمه بتغضب ربنا لازم تكوني عارفه ده و عمرها مبتنجح أبداً سواء كنتي ١٩ سنه و دخلتي ف علاقه او حتى ١٢ لازم تحطي ف بالك إن اي حاجه مبترضيش ربنا عمرها مهتكمل حتى لو كملت ف هتبقا علاقه فاشله لأقصى درجه عشان هي اتبنت في البدايه على حاجه تغضب ربنا ، طيب عملتيها للأسف و عادي هوني على نفسك كلنا بنغلط بس لازم نتعلم من غلطنا بمعنى لازم تتوبي لربنا و تبعدي عن الشله دي خالص و تشوفي صُحبه صالحه تعينك و تجنبي التعامل مع شباب خالص حتى في نطاق صديق لإن ده كلو حرام و احب اطمنك عمر م حب ابتدائي بيفضل مكمل يعني أنتي بس محتاجه تخرجي من الي انتي فيه و متهيئيش لنفسك ان انا مدايقه و هكتئب و هو سابني و كل الكلام ده ، انتي محتاجه تروحي نادي تمارسي هوايه تعملي حاجه غير إنك تفكري هتنسيه بسرعه جداً لإن هو مش حُب حقيقي ولا عمرو هيكون حقيقي دا مجرد إعجاب بسيط انتي ترجمتيه على إنو حُب و هتعرفي الكلام ده فعلاً لما تكبري و افتكري دايماً إن انتي ك بنت جوهره مش اي واحد يتعامل معاها ولا اي واحد يتكلم معاها إبني عندك عزه النفس دي من صغرك هتلاقي نفسك فعلاً شايفه إنك جوهره في زمن ذي ده ،عمر مكان تكبر إنك تشوفي إن مش من مقامك انك تكلمي واحد او ان الواحد ده يقف معاكي أصلاً خليكي مش سهل اي حد يتعرف عليكي او يتعامل معاكي و يكون مش سهل أبدا اي حد يشغل بالك او قلبك حتى، خليكي عارفه ان مشاعرك كمان غاليه لازم تحافظي عليها للي يستحقها و تحافظي على الوقت الي بتضيعيه ف كل مره بتفكري ف واحد وفريه للي يستاهلك و الي جاي جد كل ده كلام هتفهمي معناه الحقيقي لما تكبري بس لازم تكوني عارفاه من دلوقتي و حاطاه ف بالك عشان ده الصح و الي لازم كل بنت تمشي بيه ، و افتكري دايماً إن عمر مواحد يستاهل ابداااا انك تغضبي ربنا عشانو ، مفيش واحد يستاهل ده نهائي أياً كان هو مين و افتكري إن ربنا حرم العلاقات دي في اي سن مهما كان لإن هي مضيعه للوقت و إهدار مشاعر على ناس غلط و أخيرا انصحك ب انك تتكلمي مع مامتك او اختك الكبيره و تفهميها مشاعرك و هي هتساعدك و هتنصحك. و اتمنى ليكي التوفيق و الهدايه يا حبيبتي 💗

السلام عليكم و رحمة اللّٰه و بركاته حاول متقولش لنفسك كتير ان عمري بيضيع و لسه محققتش الي نفسي في و الكلام السلبي بشكل عام عشان نفسيتك ، متيأسش أبدا من محاولات تحسين حياتك لإن ربنا هو العالم ب احوالنا ممكن السنه الجايه تلاقي نفسك حققت كل الي بتحلم بيه و ربنا رزقك ب الي انت عايزو بس لازم تتعب عشان توصل لمكانه احسن ، مش كفايه انك تشتغل شغلانه و مش مميز لازم تميز نفسك عن الي حولك انصحك بتعلم لغه جديده و تكون ضامن انك باللغه دي هتشتغل، ذي الصيني بياخدو ف الشركات و المصانع مرتبات كبيره عشان يترجموا المحادثات الي بتدور مبين الشركات المصريه و الصينيه مرتبهم يكاد يصل ٥٠ ألف ممكن تاخد قورسات في الكمبيوتر ، بردو بيحتاجوهم بشكل كبير و في اماكن كتيره خلي من مرتبك جزء لفلوس القورس و جزء لإحتياجاتك ، لو مكفاش اشتغل شغلانه اضافيه بشكل مؤقت لحد متخلص القورسات ، و النصيحه الأهم خد القورسات في اماكن مضمونه و اسأل اكيد هتلاقي في محافظتك ، لو ملقتش اتعلم اونلاين طبعاً الموضوع هياخد وقت و لكن النتيجه هتبقا مبهره إن شاء اللّٰه ، و نصيحه اسمع بودكاست يساعدك على تطوير ذاتك ، و طبعا أهم عامل هو إنك تقرب من ربنا سبحانه و تعالى و تحمده و تدعيه بما تحب و إن شاء اللّٰه هيستجيبلك ،و بالتوفيق

السلام عليكم و رحمة اللّٰه و بركاته جرب تقعد مع نفسك و تحاول تفهم السبب الي مخليك مضايق هل هو مثلا موقف حصل مش قادر تنساه او عاده ف يومك عايز تغيرها و ساعتها فكر ف حل كويس يرضيك و يريح نفسيتك و بالنسبه لكلام الأهل دا اكيد في اسباب يمكن طريقتك مش عجباهم او شايفين انك غلط ف حاجات كتيره مثلاً ، حاول تقعد و تتفاهم معاهم لو مقدرتش ف لو اساءوا ليك اقعد ساكت احسن عشان الموضوع ميكبرش و عشان دول أهلك مينفعش ترد عليهم بطريقه مش لطيفه و ف وقت عصبيتك. و فكره انك مش قادر تصلي ، ف دي مجرد وسوسه شيطان كل الي عليك لازم تجاهد و تدعي ربنا يثبتك و يبعد عنك الأفكار دي و مش شرط تقرأ قرآن دايماً جرب تستمع لي بصوت قارئ انت بتحبو في اوقات فراغك او لو انت في مواصلات مثلا حط هاند فري و اسمع و تعمق في معاني الآيات هترتاح نفسيتك بشكل كبير جدااا و هتبقا عايز تقرأ و هتردد ورا القارئ كمان، و جرب تسمع بودكاست لحد بيتكلم عن نفس مشكلتك و ايه حلها دا هيساعدك اوي و عن تجربه و المذاكره ، ف كلنا ملناش نفس نذاكر ولا نشتغل و الموضوع اكيد صعب علينا كلنا بس مضطرين نعملو عشان دي الحياه و دا الي لازم يتعمل فيها ان كل واحد يؤدي واجبو ، لو مشينا كلنا بمبدأ مش جايلي نفس اذاكر او اشتغل ف محدش هيذاكر ولا يشتغل ، بس ممكن تعمل حاجه تخليك تفصل عن المذاكره ب إنك تعمل حاجه بتفرحك خروجه ف مكان هادي مثلاً ، او تتمرن رياضه معينه او تنمي موهبه او تتعلم حاجه جديده دا كلو هيخليك فرحان و ب كدا هتكون فصلت حبه و ريحت دماغك من المذاكره وقتها لما تيجي تذاكر هيبقا شغفك رجع و هتكون مستني تخلص الي وراك عشان تمارس هوايتك المفضله او غيرو جرب تعمل جدول حدد هتعمل ايه ف اليوم جديد يخليك تفصل و يخليك فرحان و امتى هتذاكر و امتى هتخلص و هكذا ، و بالتوفيق.

السلام عليكم و رحمه اللّٰه و بركاته في الحاله دي لازم تستعملي أسلوب الحوار بينك و بين اهلك ذي تسأليهم بكل هدوء هو ليه بيحصل كدا ؟ انا عملت ايه غلط عشان المشاكل دي تحصل او تتخانقوا معايا ؟ ليه محدش منكوا قريب مني ؟ و طبعا لو عندك اخوات بردو اتفاهمي معاهم ب اسلوب كويس ، حاول تتقربي من اخواتك او مامتك ب حاجات ذي تعالي احكيلك حصل ايه النهارده ، او اي رأيكوا نخترع أكله النهارده ،، كل دي حاجات ممتعه هتخليكي تقربي اكتر من عيلتك ، جربي تشتري مثلا هديه بعد الدرس لوالدتك هتفرح جدا وقتها افتحي معاها موضوع و اتكلمي و قولي الي حساه لو مقدرتيش تعملي ده و فشلتي في ،ف احسن حل هو انك تتعاملي كأنك مش موجوده ، بمعنى اي خناقه و لو حد بيوجهلك كلام مترديش خلي الي قدامك يخلص كلامو و بعدها امشي، عشان لو اتكلمتي المشكله هتزيد اكتر جربي تروحي تشاركي موهبتك ف مكان مثلا ده هيخليكي تتعرفي اكتر على ناس و ممكن حد منهم تلاقيه شبهك ف تبقا صحبتك المقربه تتكلمي معاها وقت لما تكوني زعلانه و هكذا و بالنسبه لقعده البيت و انك بتروحي الدروس بس ف قاعده البيت عمرها مكانت وحشه بس هي محتاجه استغلال للوقت الي بتقضيه ف حاجه ممتعه يعني الصبح بدري ذاكري بعدها جربي تتعلمي هوايه جديده او لغه جديده اسمعي بودكاست عن تحسين الحياه ده هيساعدك جدا جربي تمارسي انشطه ذي القراءه هتدخلك ف عالم تاني و ذي الرسم بردو هيخليكي عارفه تعبري عن مشاعرك ب صوره احسن و احساسك بالضيق و الخنقه و التساؤلات الي بتجيلك اكيد جايه بسبب بعدك عن ربنا جربي تقربي من ربنا اكتر و تحفظي قرآن مثلا و تسمعي قارئ معين بتحبيه كل يوم ده هيحسنلك حياتك و هيخليكي راضيه من جوا على كل الي بيحصلك ، هتلاقي نفسك تلقائي كل متحسي ب خنقه بتصلي و بتعيطي ل ربك وقتها هترتاحي اكتر ،، و اتمنى لكي التوفيق

و عليكم السلام و رحمة اللّٰه و بركاته مفكرتش إن ممكن السبب ف ده بُعدك عن ربنا ؟ جرب تقرب من ربك اكتر و تقرأ قرآن و حاول تشغل نفسك ف رياضه مثلا او حفظ قرآن ممارسه حاجه تبعدك عن التفكير المفرط ، مقدرتش حاول تكون نفسك و تتزوج هيكون احسن ليك بالنسبه للديون و المشاكل أنتَ محتاج تقعد مع نفسك تفكر هتحل دة ازاي و تاخد قرار تجاه المشاكل دي هتتصرف معاها ازاي كلو عندو مشاكل بس لازم تواجهها عشان تقدر تنهيها و متهربش منها بالشرب او غيرو و بلاش فكره اشرب احسن من الإستمناء ، طب و ليه تبطل الفعل الحرام بفعل حرام غيرو طب متتوب أفضل و تجاهد ، خلي ف مخك انك عايز تبقا انسان احلى مش تتحول من انسان بيعمل حاجه غلط لحاجه غلط تانيه دا عمرو مهيساعدك أبداً و الشغل ف مش لازم يكون الشغل عاجبك في البدايه لو مشينا ب مبدأ ان بنختار الشغل الي ع مزاجنا مكنش حد اشتغل من الأساس اشتغل اي شغلانه حتى في الوقت الحالي و حاول تطور من نفسك عشان تسد ديونك ، و بعد وقت الشغل اعمل حاجه تشغلك تخليك مستمتع جرب تتعلم حاجات جديده كلنا بيجيلنا بردو فتره بنبقا فاقدين شغف تجاه اي حاجه ، نصيحه مني قرب اكتر من ربنا و ادعي و صلي و اقرأ القرآن و استشعر معانيه العظيمه كل ده هيخليك مش شاغلك المشاكل هيخليك مرتاح و قادر تاخد قرارات و تحل مشاكلك بس اهم حاجه لازم تواجه لإن المشاكل مش هتحل نفسها انت محتاج تتعب عشان تحلها و هترتاح اكترر فيما بعد ،، و اهلك مش مضطرين يصرفوا عليك اه ابنهم و لكن هم معتبرينك خلاص راجل لازم تعتمد ع نفسك و تصرف على نفسك عشان تقدر تشيل مسؤوليه ف متزعلش منهم و برهم مهما كان ،اتمنى لك التوفيق و الهدايه

و عليكم السلام و رحمة اللّٰه و بركاته ، حبيبتي حاولي تشغلي نفسك ب اي حاجه ذي انك تتعلمي حاجه جديده و تكتشفي مواهبك و تنميها حاولي تتواصلي مع مامتك او حد من اهلك و تحكيلو الي حساه انتي لسه في سن صغير لسه هتقابلي ناس و تتعرفي على ناس احسن من صحابك بكتيير قربي من ربنا و صلي و ادعي هتلاقي نفسك ارتحتي اكتر حبيبتي متزعليش هي الدنيا كدا ناس بتروح و بيجي غيرهم متخليش مشاكل او فراق ناس يأثر عليكي خليكي قويه ، اكيد هتزعلي حبه و لكن حاولي تاني و مارسي حاجات بتحبيها عشان تكوني فرحانه ، و لازم متاخديش اي مشكله على أعصابك كل مننا عندو مشاكل بس الفرق بيننا ف قدره التعامل مع المشاكل هوني على نفسك ، اعملي حاجات جديده ذي اختراع حاجات ونا ف سنك كان ده بيسليني جدا جربي تجيبي كراتين مثلا و تصنعي حاجات بيها او جربي تتعلمي رسم كل دي حاجات هتشغلك عن التفكير الكتير في المشاكل و حياتك هتتحسن إن شاء اللّٰه و هكون فرحانه لو شاركتينا تجربتك و لو عندك مشكله تاني متتردديش انك تقوليها ،اتمنى ليكي التوفيق في حياتك 💗

و عليكم السلام و رحمة اللّٰه و بركاته انتي صح براڤو إنك في البدايه تمسكتي ب إن حرام تكلمي شب و لسه مقتنعه ب كدا عشان ده الصح فعلاً كل الي اقدر اقولهولك ان ده شَب فاضي و حابب يتسلى ف عمل كل الحاجات دي و اتعامل ع إن مشاعر الي قدامو لعبه كان المفروض متكلمهوش و تعملي بلوك او حتى لو هو عمل تكبري دماغك ، بس خلاص مشي الحال و كلمتيه هو خلاص عمل بلوك لو حاول يدخل حياتك و يكلمك متتكلميش ولا تفتحي كلام حتى لو بعت كتير اعملي بلوك و قفلي كل حاجه من ناحيتو و لو عارفه تغيري الخط و تعملي اكونت جديد هيبقا الموضوع ده مريح اكتر و لاء طبعاً متسامحيش حد عشان انتي أصلا مش غلطانه هو الي غلطان و فاضي و بيتسلى اقطعي كل حاجه يقدر يكلمك منها بلوك من كل حته عشان ترتاحي اكتر و خلاص كملي حياتك عادي ،و افهمي إن مش هيقدر يعملك حاجه عشان هو غلطان اكتر منك متثقيش في شباب تاني ، الشَب الي بيحبك هييجي يطلب ايدك من أهلك ف بلاش تضيعي مشاعر مع حد ملهوش اي صفه ف حياتك اشغلي نفسك ب ممارسه هوايه أو تعلم حاجه جديده ده هيخليكي تنسي أسرع و حاولي تتواصلي مع أهلك تحكيلو الي حصل و الي انتي حساه مامتك او اختك دا هيريحك اكتر و اتمنى ليكي التوفيق.

السلام عليكم عشان تحسي ب بركه في الوقت حاولي تظبطي نومك إنك تنامي الساعه ٩ (بعد العشاء )و تصحي الفجر تصليه و تبدأي اليوم الأول لازم ترتبي انتي وراكي ايه و ايه الي المفروض تعمليه جربي تكتبيه على ورقه و تعلقيه او تظبطي منبه يفكرك ب الي وراكي حفظ القرآن قبل متحفظي اسمعي بمعنى و انتي رايحه الجامعه شغلي السوره الي هتحفظيها دي كذا مره و انتي بتلبسي مثلا او و انتي بتاكلي ف اي وقت شغليها بعدها ابدأي اقرأي السوره وقت الفجر بردو عشان يكون استيعابك أفضل و ساعتها هتلاقيها ثبتت منغير مجهود الموضوع ده عن تجربه بجد بجد الإستماع ده أفضل حاجه للحفظ و أهم حاجه تختاري و تحددي القارئ المناسب الي بترتاحي لصوتو بس قبل الحفظ و دروس البناء المنهجي هتصحي صلي و افطري عشان يكون عندك طاقه للشغل و الجامعه و بعدها راجعي حفظك و روحي الجامعه لما تخلصي على حسب بتخلصي امتى المهم ترجعي ارتاحي و اتغدي بعدها ابدأي في الشغل الأونلاين الي عندك خلصي و نامي ساعتها هتكوني ظبطتي يومك بشكل كويس و هتلاقي الوقت كبير معاكي و لو حسيتي مش قادره و محتاجه تنامي ف نامي ساعه و نص او ٣ ساعات ده هيخليكي تركزي جدااا اكتر من انك تنامي ساعتين و اكيد محتاجه حاجه تفصلي ب حاجه تعمليها في يومك يعني خصصي ساعه مثلا تمارسي موهبه او بلاش ساعه خصصي يوم الجمعه يكون اجازتك و راحتك تصحي بدري و تخلصي الي عليكي و بعدها تاخدي باقي اليوم راحه الروتين ده بمشي بيه و حقيقي حلو جداا و بلاقي الوقت كبير و كمان مفيش صلاه بتفوتيها و الوجبات بتبقا في معادها المظبوط و ده حلو للصحه اتمنى اكون افدتك و السلام عليكم

السلام عليكم و رحمة اللّٰه و بركاته هو المفروض لو خطيبك و فيما بعد هيبقا شريك حياتك يتقبلك ب عيوبك لإن اكيد عندو عيوب زيك و يمكن اكتر ، يستحسن تتفاهموا اكتر من الناحيه دي و بردو مينفعش مهما كان الموقف ازاي يهينك او يقلل من كرامتك حتى لو كان الموقف بيعصب بشكل كبير و هو متعصب جداً و عارف إن هيقول كلام جارح ف يسكت احسن او يبعد شويه وقتها عشان ميقولش ليكي كلام ذي دا ولا يقل منك أنا شايفه انتي مش محتاجه تغيري نفسك عشان حد الي يحبك يتقبلك ب عيوبك و يتحملها لو حابه تتغيري ف اتغيري عشان نفسك مش عشان حد تاني ، لو هو شايف إنك وحشه و انانيه و كل ده ليه مكمل طالما هو مش قادر يتقبلك؟ يا ريت تتفاهمي معاه و تعرفي ليه بيقول كدا و هل ده مجرد كلام وقت عصبيه ولا دي حقيقه هو شايفها و اتفاهموا من ناحيه الصوت العالي و غيرو عشان كدا فيما بعد بيتكم مش هيبقا مستقر و هيحصل مشاكل بسبب الزعيق و العصبيه المفرطه اتمنى اكون افدتك و السلام عليكم.

و عليكم السلام و رحمة اللّٰه و بركاته هو المفروض على حسب مقدار الأذى الي سببوا الشخص ده وقتها اقدر اعرف هل هسامحوا ولا لاء و لكن نفترض تمام سامحته و لكن غلطت و مسامحنيش وقتها مش هحب افرض نفسي عليه هو حر و أنا كمان حره ف الي اختارو ونا مش هختار حد سببلي اذى بشكل كبير او شخصيه من اسهل المواقف سبني و هددني ب بلوك و غيرو ف يُفضل تبعدي عن شخصيه مؤذيه ذي كدا ، حتى لو الشخص ده ف يوم اضطريتي تتعاملي معاه ف اتعاملي بحدود و على قد الشغل او ع قد السلام مش اكتر ، انتي اعتذرتي و عملتي الي عليكي الشخص الي قدامك مش قابل ده خلاص ابعدي يمكن انتي سببتي اذى للحد ده اكتر او يمكن العكس بس علاقه ذي دي شايفه إنها مؤذيه و كلها مشاكل و عدم تفاهم ف يستحسن متكملش و تبعدي و تحطي حدود كتير لو اضطريتي تتعاملي مع الحد ده ، شخص ذي كدا بيحاول يبين إنك محتاجاه اكتر مهو محتاجك و ده مش صح المفروض الإحتياج و الرغبه تكون من الطرفين و إلا كدا هيبقا صعب التعامل فيما بعد اتمنى اكون افدتك و السلام عليكم.

السلام عليكم و رحمة اللّٰه و بركاته أولاً حتى لو مذاكرتش ف المحاوله كويسه إنك على الأقل تعرف الأسئله ماشيه ازاي و النظام عامل ايه بظبط ثانياً هقولك طريقه مذاكره بتنفع بشكل كبييير جدا معايا و إن شاء اللّٰه تبقا مفيده ليك محتاج الأول تحدد هل انت حاسس انك هتلتزم بفكره الدروس مع مدرسين في سناتر ولا فهمك و انتظامك بيبقا مع نفسك في البيت أفضل لو للمدرسين ف امشي بطريقه إن كل متخلص درس معين تاني يوم تكون مذاكرو و تفضل تراجع عليه لحد يوم الدرس دي طريقه مبحبش اوي امشي بيها بس بتنفع مع كذا حد أنا طريقتي لإن أنا بنسى بسرعه و مبذاكرش غير لما بحس ب خطر و ان لازم اذاكر ف بذاكر يوم الدرس بس الصبح بدري وقت الفجر عشان بيبقا الإستيعاب أعلى بذاكر الدرس بمعنى اشوف فيديو من اول و كأني اول مره اشوف الدرس و بكتب المعلومات المهمه الي المدرسين بيقولوها في الفيديو و بكدا هكون لميت اهم النقط الي كل مره هراجع عليها قبل الدرس او قبل امتحان ، و بعدها و أهم حاجه هو الحل لإن نظام المرحله الثانويه كلوو بيعتمد على الحل مش هقولك حل من كل الكتب لإن دا مرهق جدا بس حل من كتاب واحد و نصيحه بلاش تمشي ب مذكرات المدرسين عشان غالباً بيكون فيها غلطات و التصحيح بتاعها مش مظبوط و طبعااا اختيارك لمدرس لازم يتوافر في شروط انو بيدي كويز كل حصه على الي فات و كل شهر يعمل شامل و بيعمل تسميع شفوي و بيطرد الي مبيذاكرش و كدا، عشان ده هيخليك تضطر تنتظم اكتر حتى لو مش قادر و الشروط دي غالباً بتتوفر مع المدرسين المشهورين و مجاميعهم كبيره عشان وقتها بيبقا في إمكانية لعمل كل الحاجات دي و غير الشوامل الي عليها فلوس دي بتخليك تتحمس ف تذاكر . يبقا كدا أنت عملت ٣ حاجات هو إنك مراكمتش عشان ماشي مع المدرس و ذاكرت الدرس مره استماع و مره كتابه و اكيد مع الكتابه بعد متخلص ورقه كامله من كتابه المعلومات و النقط المهمه سمعها لنفسك و لو غلطت ف كلمه واحده عيد من الأول و افتكر كل مبتعيد كل مبتثبت المعلومه اكتر و لو أنت شايف إنك فهمك في البيت و مع نفسك بيبقا أعلى ف خد منصات مع مدرسين نظامهم كويز كل حصه و متابعه مع الأهل و شوامل و كل الحاجات دي عشان بردو متراكمش ، و انت بتشوف فيديو المنصه بردو سجل المعلومات المهمه صدقني ده هيفييدك بشكل كبير جداااا و عن تجربه ،ليه لإنك قبل الإمتحان بتبقا مش قادر تلم كل الدروس من الأول ف كل الي بتعملو انك بتراجع ع النقط المهمه الي كتبتها و هقولك ع حاجه أنا عن نفسي براكم المنهج كلو قبل الإمتحانات ب اسبوعين كدا بس بمشي بالنظام إن اشوف فيديوهات يوتيوب و اسجل معلومات مهمه و احل اسأله كتير عشان بجد الأسئله هي الي بتثبت المعلومات و بطلع بدرجه حلوه جدا و نصيحه متعتمدش على إنك بتاخد درس ف متشوفش مستر يوتيوب لاء لازم يكون مدرس ف السنتر و مدرس يوتيوب عشان اوقات المدرس بتاع السنتر مبيلمش المعلومات كلها ف بتحتاج حد تاني معاه بس بلاش تاخد اتنين مدرسين سنتر ف ماده واحده عشان ده هيضيع وقت و مجهود ع الفاضي و نظام انك تقرأ المعلومه بعينك او تقولها بس ده مبينفعش خالص لإن مع الوقت بتنسى كل الي اخدتو . و طبعاً المذاكره محتاجه إنك تكون مديلها أهمية بمعنى لو عندك خروجه مع صحبك ف يوم بس انت مراكم ف لاء متخرجش و خلص الي مراكمو و لو شايف ان صاحبك ده مش بيساعدك هو بس بيشغلك عن المذاكره ف أبعد عنو. و اتقرب من ربنا اكتر و انتظم ف صلاتك عشان ربنا يوفقك ف حياتك و مذاكرتك هي سنه و هتعدي بس محتاج تتعب عشان تعرف تعديها و ربنا إن شاء اللّٰه مش هيضيع تعبك و اتمنى لك التوفيق.

السلام عليكم و رحمه اللّٰه و بركاته أولاً و أهم حاجه مهما وثقتي ف شخص معين متقوليش او تبيني إنك واثقه فيه و ملكيش غيرو و كل الحاجات دي لإن ممكن من مجرد إن الشخص يدايق منك و يكون عايز يكسرك ف هيكسرك ب إنو يسيبك لوحدك لإن هيبقا عارف وقتها إن مكنش ليكي غيرو. و مهما وثقتي لازم يكون في اسرار ليكي و لنفسك بس محدش يعرف عنها حاجه ، حاولي تاخدي بالك من اي حد بس مش معنى كدا انك تقطعي علاقتك بكل الناس لاء بالعكس اتعرفي ع ناس كتير بس متخليش حد يعرف عنك حاجه ممكن ف يوم لو اتقالت تدمرك او تكون مؤذيه ليكي ذي مثلا متتكلميش مع حد مهما كان على حد تاني غير إن حرام طبعاً بس ممكن الشخص دا ف يوم من الأيام وقت خناق يعملك مشكله بالكلام الي قولتيه و بردو نفس الكلام ف صورك متبعتيش صور لحد حتى لو بست فريند ممكن تعملك مشكله ف يوم بردو طيب دي حاجات لازم تعمليها و تحطيها ك حدود بينك و بين اي حد تعرفيه نفترض إن انتي فعلاً محتاجه تحكي مع حد و تعيطي حتى و كل الحاجات دي ف مش هتلاقي احسن من ربنا تعيطي و تحكيلو مشاكلك صدقيني مش لازم الحد الي هتحكيلو مشاكلك و اسرارك يبقا بست فريند او غيرو ، خليكي عندك يقين إن ربنا سبحانه و تعالى هو الوحيد الي هيسمعك و يساعدك ف كل اوقات ضعفك و انهيارك و لازم تكوني عارفه إن مش كل الناس وحشه في ناس كويسه بس بتيجي مع الصبر ف اصبري و ادعي ربنا يرزقك ب حد كويس تقدري تثقي فيه و تديلو الأمان. و حاولي تشاركي في انشطه اجتماعيه عشان تنسي الي فاتك و تحسن من حالتك النفسيه و تعرفك على ناس و حطي بينهم الحدود الي ذكرتها هتلاقي حياتك اتحسنت بكتير إن شاء اللّٰه و اتمنى لكي التوفيق.

السلام عليكم و رحمه اللّٰه و بركاته متبكيش هوني على نفسك كل منا عندو مشاكل و عارفه إنك بتعاني بسبب المشاكل الي عندكم مش هعرف اقولك حلول لمشاكل بيتكم بس أقدر أقولك حلول لراحتك النفسيه بعيداً عن البيت حاولي تقربي من ربك أكثر و تدعي إن تنتهي المشاكل و إذا ضاقت بيكي الدنيا أول أحد تفكري إن تحكيلو همومك هو اللّٰه عز و جل و صلي و ادعي كتير ربنا يزيل همك و اسمعي قرآن و اشغلي نفسك ب ذكر اللّٰه كتير طول م انتي قاعده ف البيت كتير نفسيتك هتتأثر اكتر حاولي تعملي حاجات أنت بتحبيها و بتخرجك من المود الي انتي فيه يعني مثلا أنا لما بحس إن عايزه اعيط برسم ف بلاقي نفسيتي بقت أحسن أو بنزل اتمشى حاولي أنت كمان تعملي ده هتتحسن نفسيتك مارسي حاجه بتحبيها او اتعلمي حاجه جديده تخليكي تفصلي عن الي بيحصل حولك بالنسبه للدراسه ف لو قدرتي تروحي مكان خارج البيت و تذاكري هيكون أفضل ذي مثلاً تذاكري ف كافيه أو في حديقه أو حتى مع واحده صحبتك في بيتها او برا بيتها أو وبيت حد من أقاربك ذي بتقولي اياً كان المهم تذاكري خارج البيت عشان يكون في تركيز اكتر أعرف واحده صحبتي مشكلتها مشابهه ليكي بشكل كبير هي عشان ترتاح كانت بتيجي تقعد عندي او تنزل هي تقعد ف كافيه حلو تذاكر كانت بتحاول تبعد نفسها عن المشاكل ب اي شكل من الأشكال لحد م بقا عندها برود تجاه اي مشكله بتحصل في البيت مبقتش بتتأثر بيها و ده حسن من نفسيتها بشكل كبير جربي تعملي كل ده و هكون فرحانه لو شاركتينا تجربتك اسأل اللّٰه أن يفرحك ب خبر يتعجب منه أهل السماوات و الأرض و أن يريح قلبك و يزيل همك و يفرج كربك 🩷

السلام عليكم و رحمه اللّٰه و بركاته أنا شايفه من وجهه نظري يعني إن دا شيئ عادي لإنك لسه مش جوزها عشان تصارحك ب مشاعرها و تقولك كلام حب بشكل عام و إن يمكن هي شخصيه مبتحبش الخروج او مستنيه منك إنك تقولها تعالي نخرج و يكون البدايه من عندك انت حتى من ناحيه المشاعر و من ناحيه انها بتقولك مفيش مشاعر من ناحيتها تجاهك كلمها و اسألها إن هل هي بتحبك و حابه تكمل ولا لاء يمكن تكون هي نفسها مش حابه تكمل بس بترضي اهلها مثلاً

السلام عليكم و رحمه اللّٰه و بركاته هو طبيعي جدا يكون كل واحد مننا عندو عالم خيالي بيحب يفصل عن الواقع ب انو يفكر في عشان العالم دا على هواه او على مزاجو هو بمعنى اصح ف دا شيئ عادي بالعكس بيخلي عندك خيال اوسع بالنسبه لأهلك ف ممكن تشوفي دا من وجهه نظرهم هم يعني هم عايزينك تكوني جمبهم و معاهم عشان شايفينك لوحدك عايزينك تشاركي معاهم عشان فاكرين إن دا هيخليكي مبسوطه اكتر لو هم بيرفضوا حاجات ف اتفاهمي معاهم اسباب رفضهم للي انتي عايزاه بكل هدوء عشان تكوني عارفه هم ايه بظبط الي رافضينو ب شكل تام و ليه بالنسبه لأصحابك ف انا شايفه إنك طول منتي قاعده لوحدك عمرك مهتنسي الي عملوه لكن لو شغلتي نفسك ب هوايه او مارستي رياضه دا هيخليكي تنسيهم خالص و تكوني صدقات اكتر و طبعاً اكتر عامل هيخليكي سعيده ف حياتك هو إنك تتعلقي ب ربنا لإن التعلق بغير اللّٰه مذله ،دا هيرجعلك ثقتك ف نفسك و هيخليكي عندك رضا داخلي عن الي بيحصل حواليكي و لو حابه تحكي همومك و مشاكلك اول حاجه هتيجي ف بالك انك تحكي لربك و تصلي و تدعي يفرج همك و مش هيبقا في بالك فكره الإنتحار او اي حاجه من دي طبيعي طول منتي ف البيت و قافله على نفسك هتحسي انك مش عايزه تشوفي حد ولا تكلمي حد لكن لما تنزلي و تتعاملي اكتر سواء ف جيم مثلا او نادي دا هيخليكي تخرجي من احساسك بكره الناس كلها و بردو حابه اعرفك ان مش شرط تنزلي من البيت عشان تغيري جو و تخرجي من الإكتئاب و تنسي كل الي بيحصلك ممكن تقعدي مع نفسك اكتر و تعملي حاجه بتحبيها مثلا ف وقت الفجر كلو بيبقا نايم جربي تعملي فطار حلو لنفسك و تقعدي ف البلكونه تسمعي قرآن هتحسي ب راحه نفسيه ،جربي تتعلمي هوايه ذي الرسم ، و تصميم الملابس و الكروشيه او جربي تقرأي روايات و كتب و تسمعي بودكاست دا بردو هيحسن حياتك بشكل كبير صدقيني ،و حابه اقول إن مشكلتك كانت نفس مشكلتي بظبط و لكن الحمد لله خرجت منها عن طريق اني عملت كل الحاجات الي ذكرتها ، صدقيني هتحسن حياتك بشكل كبير اوي و هتخليكي مبسوطه.

السلام عليكم و رحمه اللّٰه و بركاته انا شايفه إن دا عشان لسه في بدايه الجواز بتفهمو طباع بعض ب شكل اكبر و اكيد كل واحد طباعو مختلفه عن التاني بس يستحسن تتفاهمو سوا و تتكلمو اكتر في الموضوع دا و إن ازاي تحلوه سوا ممكن تحطو ذي قاعده مبينكم ان اي مشكله تحصل مهما كانت لازم تتصالحوا اخر اليوم متناموش غير و انتو متصالحين و مهما كان مين غلطان حاولو تتفاهمو اكتر و تفهموا بعض بس أهم حاجه بلاش زعيق و غيرو خلي خناقتكوا مبينكم عشان حتى لو ربنا كرمكم ب أولاد ميتعبوش نفسياً من الخناقات و الزعيق اتفاهموا ب هدوء و متدخلوش حد في مشاكلكوا بردو مهما كان لإن الشخص دا ممكن يسخن حد فيكوا على التاني و الخناقات تكون كبيره و كتيره، و بالنسبه للتحوير و الف و الدوران ف كل دا قولها انك مش مرتاح لكدا و إن مينفعش تعمل كدا بس و انت بتتكلم متغلطهاش بشكل كبير عشان طبيعي هتدافع عن نفسها لاء اتفاهمو بشكل عادي و براحه محدش يغلط حد مجرد اعترافات مبينكوا من الي بيدايقكوا من بعض مش اكتر و حابه اعرفك ان دا طبيعي لإن الست او البنت مبتحبش تبان غلطانه قدام حد بالعكس بتحب تكون هي الصح حتى لو غلطانه ف حاجه و هي عارفه دا ف لازم تستحمل حاجه ذي كدا و خلي الصلح ييجي منكوا انتو الإتنين بس منك انت بشكل اكبر، و اتمنى لكم التوفيق .

السلام عليكم و رحمه اللّٰه و بركاته طالما حاسه انك مرتاحه مع الشخص الي اتقدملك جديد ليه موافقتيش عليه و وافقتي على شخص رفضك مسبقاً المفروض تفكري كويس انتي حابه تبقي مع مين صلي استخاره بينهم ، و توبي لربنا لإن دي مش كذبه بسيطه ، و انا شايفه انك تصارحي الإتنين بدل متعيشي على كدبه طول عمرك دا هيحسسك بالندم طول الوقت و يا ريت متخافيش من انهم لو رفضوكي ف متلاقيش عريس ذي مبتقولي و إن كذبتي ب حِجه صعب تلاقي عريس مناسب ، لو ليكي نصيب هيجيلك لحد عندك بس أهم حاجه بلاش تبني حياتك على كذبه عشان حتى تريحي ضميرك صارحيهم و أنا شايفه إن طالما الشخص الي معاكي في الشغل مش مديكي اهتمام و خناقات طول الوقت ف يستحسن انك تنفصلي عنو لإن المفروض مهما كان شخص بيحب الشغل المفروض يديكي وقت من يومو و يهتم بيكي بردو . و هوني على نفسك كلنا بنغلط بس في فرق بين الي بيعترف بالغلط و بيصلحو و الي بيسكت عليه حاولي تصلحي غلطك ب الإعتراف مهما كانت النتائج شكلها ايه و يا ريت تحطي اول أولوياتك انك بتعترفي بالذنب و الغلط عشان ربنا يغفرلك ساعتها ب إذن الله هيغفرلك و هتتحسن حياتك بشكل كبير . و اتمنى لكي التوفيق و الهدايه

السلام عليكم خليكي عندك يقين باللّٰه إن الي اختارهولك ربنا أحسن الخير فيما اختاره الله لكي مش ممكن كنتي تدخلي طب بس متقدريش على الدراسه مثلا و تجيبي درجات مش احسن حاجه و ممكن تخشي كليه زراعه بس تجيبي امتياز كل سنه و تبقي دكتوره ف الجامعه كمان و تلاقي بدل الشغل عشره صلي و احمدي ربنا على مجموعك كليه زراعه حلوه جداً مش وحشه أهم حاجه يبقا عندك ثقه ان طالما مدخلتيش طب يبقا مكنش فيها خير انك تدخليها متسبقيش الأحداث يمكن تعجبك جداً و تتعرفي على ناس جديده و كويسه يساعدوكي ف الدراسه كذا حد اعرفو بردو مجبش مجموع الكليه الي حاببها و لكن دخلو كليات دلوقتي واحده بتجيب امتياز ما شاء الله كل سنه و التانيه مكنش عندها صحاب بس لقت صُحبه صالحه ف الكليه الي دخلتها بسم اللّٰه الرحمن الرحيم وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ متخافيش الي عند ربنا طول عمرو احسن 🩷

و عليكم السلام و رحمه اللّٰه و بركاته طب ليه مفكرتيش تتعلقي ب ربنا بدل شخص ، مش حاسه ان التعلق بغير اللّٰه مذله ؟ طول منتي قاعده و بتفكري فيه هتدخليلو و دا مينفعش حتى لو رجعلك دي علاقه محرمه المفروض تتوبي عنها حاولي توفري الحب و الحنان و اسعاد الطرف الأخر مع الشخص الصح لما تكبري سنك دلوقتي مش مناسب بس خلاص حبيتيه و مشي الحال الحل انك تبعدي عنو و تقفلي كل الأبواب الي ممكن تخليكي تكلميه يعني لو قدرتي تغيري الخط هيكون افضل ليكي و تبلكيه من السوشيال بشكل عام الي بتعمليه دا ما هو إلا اهانه ليكي افهمي ان مش دا الشخص المناسب و ان عمرو مهيسعدك عشان هي علاقه محرمه و بردو هو عمرو مكان بيحبك هو بس مجرد شاب بيتسلى لإن لو بيحبك كان استنى تخلصي فتره تعليمك و اتقدملك لكن هو معملش كدا انا فاهمه الي حاسه بيه سننا متقارب و فاهمه و انك محتاجه تعوضي الحنان الي افتقدتيه من والدك بس بالطريقه دي مش هينفع انتظري الشخص الصح و ركزي دلوقتي في دراستك و لو فعلا الوضع واصل معاكي للتعلق راجعي مع دكتور نفسي هيساعدك انصحك ب انك تشغلي تفسك ب حاجات تانيه ذي الرياضه هيخليكي تنسي الشخص دا بشكل اسرع و اكيد التقرب من الله عز و جل هيساعدك بردو و اتمنى لكي التوفيق

السلام عليكم و رحمه اللّٰه و بركاته اقعد مع نفسك و فكر انت فعلا بتحبها ولا لاء و لو إني شايفه ان كل دي علامات على حبها فعلاً بس بردو لازم تقعد مع نفسك و تفكر دي الي حابب تكمل معاها حياتك ولا لاء و لو الإجابه اه مستني إيه ؟ صارحها بمشاعرك و هي هتفهمك خصوصاً انك بتقول انها بتحب النقاش بس طبعاً لما تصارحها بمشاعرها ف اقصد هنا انك تتقدملها لو اجبتك انها هي كمان بتبادلك نفس المشاعر طبعاً، لو مش قادر ع فكره الزواج ف أجل فكره انك تصارحها بمشاعرك عشان متدخلوش ف علاقه محرمه و أهم حاجه تكون معرفها ظروفك إزاي و إن مش شرط تكون قادر انك تجيبلها شقه في نفس المستوى الي هي فيه كون صريح معاها ف كل حاجه و في مشاعرك و هي اكيد هتفهمك و اتمنى لك التوفيق

و عليكم السلام و رحمه اللّٰه و بركاته بصي أنا مش هقول غير إني كنت زيك و يمكن اكتر كنت على طول بسمعها و حاطه هاند فري ف وداني ف كل مكان حتى بسمعها و بشغلها دايماً ونا رايحه دروس و ونا خارجه ف قررت اجرب حتى اسبوع منغيرها و أشوف الدنيا ماشيه ازاي طبعاً الشيطان بينلي ان الموضوع صعب و مش هقدر اسيبها و لكن الموضوع اسهل مما تتخيلي محتاج ثبات في البدايه عشان هتلاقي بقا حواليكي الدنيا بقا فيها اغاني اكتر و هكذا طبعا الشيطان هيلعب ف دماغك و يفهمك ان عادي كل الناس بتعمل كدا فيها ايه يعني و ان خلاص مجتش على اغاني و ان صعب تسيبيها و ازاي ف الأفراح و المنسابات هتعملي ايه و كلام من دا كتير خلي ف بالك ان و ما الحياه الدنيا إلا متاع الغرور و بس بجد و اللّٰه إن الأغاني دي اكبر حاجز يخليكي متحسيش ب لذه العبادات بجد الأغاني دي اكبر بلاء ابتلينا بيه لما تسيبيها هتبقي اكتر الناس فهماً لكلامي عشان انتي هتحسي بتغيير جذري فظيع و هتحسي انك مكنتيش عايشه طول الفتره اللي بتسمعي بيها اغاني و هتبقي بتصدعي كل متسمعي اغنيه هتبقي كل متسمعيها ف الشارع او ف مواصلات عايزه ب اسرع وقت تسمعي قرآن عشان تطهري سمعك بمعنى أصح استبدلي كل الأغاني ب قرآن و صلي و قولي اللهم اعني على ذكرك و شكرك و حسن عبادتك و إن شاء الله ربنا هيعينك بالنسبه للعاده ف بردو هتبطليها تلقائي مجرد متوقفي اغاني و تشغلي نفسك ب عباده ربنا و تنتظمي ف الصلاه إن الصلاه تنهى عن الفحشاء و المنكر و اتمنى لكي التوفيق و الهدايه

السلام عليكم و رحمه اللّٰه و بركاته كل الي انتي في دا طبيعي لإنك قاعده لدماغك بالأصح ذي مقولتي مبتعمليش حاجه غير على التليفون و منعزله ف كل التخيلات دي طبيعي دماغك تعملها لازم تشغلي نفسك ف اي حاجه مارسي هوايه او اتعلمي هوايه جديده دا هيخليكي فرحانه اكتر روحي مكان جديد جيم مثلا او سباحه مارسي رياضه بشكل عام ممكن دا يخليكي تتعرفي على اصحاب كويسين روحي حفظ قرآن او مكان تتعلمي منو لغه او حاجه جديده عموماً بالنسبه للمشاكل من ناحيه الأهل ف انا شايفه انك تصارحيهم بمشاعرك لو قدرتي بس طبعاً اختاري وقت مناسب يكونو هاديين في و صارحيهم براحه لو مقدرتيش ف اتعاملي معاهم كويس لإن مهما كان دول اهلك و ادعي ربنا إن يعاملوكي حلو و يقولو كلام يشجعك و نصيحه عن تجربه جربي تسمعي بودكاست قهوه بدون سكر حقيقي مفيد هتلاقي في إجابات للي بيحصلك انتي بس محتاجه تفهمي نفسك و تشغلي نفسك ب الي بتحبيه ساعتها مش هيحصل كل دا حتى لو مبقتيش قادره ف الهوايه اللي هتمارسيها هتخليكي تفصلي و تخليكي فرحانه و بردو مش لازم خروج او تعلم برا ممكن تتعلمي على التليفون او حتى تفكري انك تقفليه لمده يوم كامل و جربي مره حتى تصحي من بدري الفجر مثلا و تصلي و تقرأي الأذكار و تعملي فطار لنفسك و بعد متاكلي تقفي ف البلكونه ف الجو الحلو و تسمعي قرآن بعد متخلصي اقرأي روايه الروايات هتحسن من حالتك و يسلام لو كانت روايه دينيه هتندمجي معاها بشكل كبير و عن تجربه اخترعي اكله او مشروب مثلاً جربي ترسمي او تكتبي الي حاسه بيه نظمي جدول ليومك عشان تكوني عارفه هتعملي ايه ف يومك لما تصحي اشغلي نفسك بالإهتمام بالبشره و الجسم و اشتري منتجات حلوه و مناسبه كل دا بيغير من المود و هيخليكي متقعديش لدماغك بشكل كبير و اول متحسي إنك حابه تعيطي و مش قادره ف مفيش احسن من انك تصلي ركعتين لله تحكي همومك كلها و انك تقربي من الله عز و جل حقيقي راحه نفسيه حتى لو الدنيا اتقلبت من حولك ف هتكوني سعيده جربي حتى و لو يوم واحد تعملي كدا و اضمنلك انك هتحسي ب راحه نفسيه مش عاديه و اتمنى لكي التوفيق في حياتك

السلام عليكم و رحمه اللّٰه و بركاته أولًا مينفعش حتى لو في خناقه بينكم انك تقولي مش عيزاك و تعال خد حاجتك مهما كانت الخناقه واصله لفين كدا لما تتزوجو بإذن اللّٰه هتقوليلو طلقني ف كل خناقه؟ كدا هيحصل مشاكل كبيره جداً بينكم و انا اسفه اني بقولك كدا بس انتي غلطانه انك تقوليلو حاجه ذي كدا و هو اكيد ك راجل هيعز عليه نفسو و هيرد عليكي بالرد دا حتى لو كان بيحبك لو انتي لسه بتحبيه و عايزه تكملي معاه ف انا شايفه انك تصارحيه هو حابب يكمل ولا لاء بدل متتعشمي اكتر من كدا انو يرجع و ممكن ميرجعش الله أعلم بردو بس متقوليش انك كنتي بتراقبيه من اكونت تاني او اي حاجه من دي هو بس اعرفي حابب يكمل ولا لاء لو الإجابه ب اه ف انا شايفه انكو تكونو متفاهمين اكتر من كدا و انك تقوليلو يعذرك وقت متكوني متعصبه عشان مبتكونيش عارفه بتقولي ايه و هو نفس الكلام اعذريه وقت ميكون متعصب حطو قاعده مبينكم ان اي خناقه تحصل مهما كان مين غلطان متناموش منغير متتصالحو سوا و بلاش هزار او كلام من ناحيه مش عايزاك و هو بردو مينفعش يقولك كدا عشان ذي مقولتلك لو حصل نصيب بينكم و اتجوزتو ف المشاكل ممكن الكلام دا يوصل للطلاق لقدر اللّٰه لو هو جاوبك ب لاء ف كوني متصالحه و إن عادي حتى لو كنتي بتحبيه بس كوني حاطه فكره ف دماغك ان مش هاخدو طالما هو مش عايزني المفروض هو اللي يعوزني اكتر منا اعوزو و خلي عندك عزه نفس و متتكلميش معاه اكتر من كدا لو صارحك ب انو مش عايز يكمل و اتمنى لكي التوفيق ف حياتك

السلام عليكم و رحمه اللّٰه و بركاته أولاً كويس جداً إنك معترفه بالتقصير و عايزه ترجعي لربك بصي هديكي شويه نصائح التزمي عليها و هتكوني من المقربين من اللّٰه عز و جل ب إذن الله أولاً توبي توبه نصوحه و بالنسبه للصلاه ف طبيعي في البدايه يكون صعب و يكون في تفاوت في امرها لكن مع التعود هتبقا عندك ذي الشرب و الأكل صدقيني حاولي عشان تلتزمي اظبطي منبه لمعاد كل صلاه او نزلي برنامج يذكرك ب اوقات الصلاه جاهدي اسبوع بعدها خليه شهر بعدها شهرين و هكذا هتتعودي جداً بسم الله الرحمن الرحيم فَخَلَفَ مِنْ بَعْدِهِمْ خَلْفٌ أَضَاعُوا الصَّلاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا ۝ إِلَّا مَنْ تَابَ وَآمَنَ وَعَمِلَ صَالِحًا فَأُوْلَئِكَ يَدْخُلُونَ الْجَنَّةَ وَلا يُظْلَمُونَ شَيْئًا اقرأي قرآن و استمعي له و اقرأي آيات العذاب الي بيتلقاها مَن ترك الصلاه و ادعي ربنا يثبتك اسمعي بودكاست هيساعدك جداً انصحك ب بودكاست وعي رائع جداً و لو بتسمعي اغاني بموسيقى ف اعرفي إنها الحاجز بينك و بين قربك لربنا حقيقي و عن تجربه تركها دا بيغير الإنسان ١٨٠ درجه و بيخلي في سلام نفسي رهيب و هتحسي ب لذه العبادات و هتكوني عايزه تقربي من ربنا اكتر بجد بجد الأغاني اكتر سبب ممكن يخلي الإنسان بعيد عن ربنا الموضوع دا مش صعب نهائي بالعكس سهل و لكن الشيطان هو الي هيخليكي تحسي إن الموضوع صعب عشان هو مش عايزك تحسي ب لذه العبادات جربي حتى اسبوعين و اضمنلك هدوء و راحه رهيبه منغيرها و بالنسبه لحفظ القرآن يستحسن تروحي مكان يعلمك عشان تنتظمي بشكل أكبر و قراءه القرآن ف انصحك الأول تحددي شيخ معين حابه طريقه تلاوته للقرآن و انصحك ب ياسر الدوسري تلاوته رائعه و تاني حاجه في القراءه إنك تقرأي ورا الشيخ الي عجبتك تلاوتو عشان متغلطيش في التجويد و تقراي صح و كمان دا بردو بيساعدك في حفظ القرآن لإن السوره الي هتعيديها كتير بصوت القارئ هتتحفظ ف مخك بصوتو كمان و أهم حاجه الصُحبه الصالحه اللي تساعدك مثلا تتسابقوا مين هتسبح اكتر و تساعدوا بعض على اللبس الواسع و بردو تفكرو بعض بالصلاه و اتمنى لكي التوفيق و الهدايه 🩷

السلام عليكم و رحمه اللّٰه و بركاته اولاً حاول تستشير طبيب ذي م نصح بعض الزملاء و في حبه نصائح حاول على قد متقدر تعملها انتظم في صلاتك و حاول تغض بصرك و متحطش نفسك ف مواقف تخليك تتعامل مع نساء بشكل عام حاول تشغل نفسك ب اي حاجه تانيه عشان متفكرش ف كدا اقرأ كتب مثلا أو مارس هوايه معينه تبعد تفكيرك عن كدا او تعلم حاجه جديده بردو وقتها يكون معندكش وقت إنك تسيب نفسك لدماغك بمعنى أصح روح جيم مثلاً و مارس رياضه دا ممكن يشغل وقتك بشكل اكبر و مثلا لو ماشي ف الشارع او راكب مواصلات استمع للقرآن أو اقرأ اذكار أشغل نفسك بذكر ربنا ساعتها هتكون منغمس في الذكر و مش هتلاحظ النساء من حولك حتى اعمل كل دا في الفتره اللي المفروض تحاول تبني نفسك فيها عشان تتزوج شوف شغل مثلاً زياده على شغلك عشان تقدر وقتها تعمل فلوس تخليك تتزوج و تفتح بيت و دا اكيد هيكون أفضل ليك و اتمنى لك التوفيق و الهدايه.

و عليكم السلام و رحمه الله و بركاته اولاً مبروك النجاح و عادي مش شرط انك مجبتش مجموع كليتك فتُحبط خليك فاكر ان الخير دايماً فيما اختاره الله لك. من وجهه نظري شايفة إنك تخش كلية علوم أولى عشان دا كله هيبقى عبء زيادة على أهلك و هيبقى عبء نفسي عليك لو متفوقتش وهتحس بالذنب الكبير والتقصير ومين عالم يمكن ربنا يوفقك في كليه علوم وتجيب امتياز وتبقى دكتور في الجامعه أو حتى تلاقي شغل مناسب وطبعاً أفضل حاجه تعملها في الفتره دي إنك تتعلم حاجة جديدة تساعدك لو لا قدر الله ملقتش شغل زي تعلم برمجة اونلاين مثلاً و يُفضل طبعاً تصلي صلاه استخاره في الأمور دي و ربنا ساعتها هيوفقك فيما هو احلى ليك فتوكل على الله و استخيره و اتمنى لك التوفيق في حياتك

السلام عليكم و رحمه الله و بركاته اولاً انتي لسه ف سن صغير و ف اولى ثانوي يعني محتاجه تركزي في دراستك و مينفعش حاجه ذي دي تشغلك ابداً و براڤو على قرارك الصائب انك تعملي بلوك و تقوليلو كدا نصيحه مني ابعدي عن صديقتك دي عشان الصاحبه الي بجد هتشجعك على الي ميغضبش ربنا بالعكس لو هي صاحبه جدعه و بتحبك كانت هي اللي نصحتك لو لقتك بتكلمي ولد حتى لو كان قريبها اسمعي مني كلها علاقات محرمه و لعب بالمشاعر مش اكتر الكلام مش بفلوس حتى لو فضل يقول كلام كتير بردو متصدقهوش هو لو بيحبك بجد كان كتم مشاعرو تجاهك لحد ميجي الوقت الي يقدر يتقدملك في و مكنش هيرضى يخليكي تخوني ثقه أهلك و ربك لو قدرتي تغيري رقمك بحيث ميقدرش يزعجك تاني ف هيكون أحسن او حتى قولي لباباكي على حاجه ذي دي و وريلو الشات و انتي قولتي ايه و هو يتصرف معاه و هيخليه ميزعجكيش تاني و اتمنى لكي التوفيق.

و عليكم السلام و رحمه اللّٰه و بركاته نصيحه جربي اول اسبوع من الدروس و المذاكره و ف نفس الوقت تعلم لغه جديده لو حسيتي انك مقصره من ناحيه المذاكره ف وقفي دا لو حسيتي إن عادي و الموضوع مش مأثر ف كملي و من وجهه نظري خليها ف الترم التاني عشان تلحقي تتعودي على نظام ثانويه لأنو نظام مختلف تماماً عن إعدادي و عادي مفهاش حاجه لو اتعلمتي لغه جديده اعتقد انتو الدُفعه الي اتلغى عندها الفرنساوي ممكن تتعاملي كأنو متلغاش و تذاكريه او تاخدي لغه تانيه مكانو انصحك بالصيني لإن في شركات كتير بتطلب مترجمين صيني بسبب التعاملات بيننا و بين الصين في استيراد الأجهزه و تروحي مكان مخصص يعلمك هيكون أفضل طبعا عشان يبقا في مراجعه و حفظ و اسأل الله لكي التوفيق

اسأل اللّٰه لك الثبات و التوفيق

السلام عليكم و رحمة اللّٰه و بركاته خليكي حاطه ف بالك ان توتر الإمتحان مش هيفيد ب حاجه غير انك هتنسي معلومات بس ، ايه الي يوترك؟ دا بالعكس التقييمات و الحضور واخده ٧٠ ٪ يعني انتي حتى لو بعد الشر مجبتيش المجموع اللي عايزاه هتعدي ، منكرش إن كنت زيك عشان نظام ثانوي مختلف تماماً عن إعدادي اللي اتعودت عليه بس الحمد للّٰه عدت و كلنا عدينا ، الإمتحانات مش هتيجي صعبه بس أنت أهم حاجه تحلي كتير كل متحلي اكتر كل متضمني الإمتحان اكتر خلي ف بالك و انتي بتحلي ماده معينه ان هدفك دلوقتي تخلصي حل متفكريش ف امتحان او حتى اي ماده غير اللي قدامك الموضوع ده ساعدني جدا أقلل من توتري و إن شاء اللّٰه ينفع معاكي و بالتوفيق

بالتوفيق اتمنى لحضرتك النجاح في مجالك

بارك اللّٰه فيكِ يا دكتوره مي ، فعلاً الأفضل في الوقت ده تركزي في دراستك و متخليش الشيطان يلعب بعقلك لإنك لسه صغيرة و ممكن مشاعرك تتغير لما تكبري ، هو لو من نصيبك هيجيلك و يتقدملك متشغليش بالك ب كدا دلوقتِ عشان متفتحيش على نفسك أبواب كتيره ف سن غلط منها الدخول في علاقه محرمه او غيرو

السلام عليكم ، التقويم مبيضعفش من اللثه بس لازم يكون تحت اشراف طبيب شاطر و بتعمليه بعد الأشعه ب استشاره من كذا طبيب لإن في اطباء بتبقا عندها اراء مختلفه تماماً في الي يقول فك واحد و في يقول فكين ف يستحسن تستشيري كذا واحد و تكملي مع اللي مرتحالو انا ركبت فك واحد ٦ الف و الفكين كان ب ١٢ الف و كنت بقسطو كل جلسه بدفع و دلوقتي ركبت مثبت و بروح متابعه منغير مدفع ، و محصلش ضعف ف اللثه خالص

السلام عليكم و رحمة اللّٰه و بركاته مش همشي على رأيي الشخصي و لكن همشي مع حضرتك بالمنطق و الي المفروض يتعمل أكيد اطفالك محتاجينك جمبهم اكتر من كدا و بردو ف نفس الوقت مهنه ذي دي بتوفي احتياجتهم صعب تتساب ف يستحسن متتركش مهنتك غير لما تلاقي مهنه بديله و تسأل عنها و تكون متأكد إنها كويسه ذي مهنتك الأساسيه او احسن عشان متكونش خسرت مهنتك ، و الأفضل طبعاً قبل متاخد قرار مهم ذي دا تصلي استخاره و ربنا هيقدرلك الي فيه الخير

و عليكم السلام و رحمة اللّٰه و بركاته ، صلي استخاره في الأمور الي ذي دي و ربنا هيقدرلك الخير كلو ، و طالما هو انسان محترم و كويس ممكن يعجب اهلك غير إن الموضوع المفروض واقف عليكي انتي ، يعني لو عجبك الموضوع هيمشي و هتقدري تقنعيهم بس الأول استخيري ربنا و شوفي إذا كان مناسب ولا لاء ساعتها فكري في الخطوه الي بعد كدا ، بس لحد ميحصل ده حاولي متتواصليش معاه كتير عشان مفيش حاجه رسمية مبينكم و بالتوفيق

الشكر للّٰه ، ان شاء اللّٰه هتنجح في شغلك و تتحسن حياتك و متنساش إن أول خطوه في النجاح إنك تدعي ربنا و تقرب منو ، و بالتوفيق

الشكر للّٰه حبيبتي ، ربنا يصلح حالك و يوفقك في حياتك

السلام عليكم و رحمة اللّٰه و بركاته ، حاولي تشاركي في انشطه اجتماعيه ، ذي انك تروحي تمارسي هوايتك في مكان مع ناس عندها نفس هوايتك و اهتماماتك او اتعلمي في مكان حاجه جديده تفيدك وقتها دا هيخليكي مضطره تتكلمي و تتعاملي ف هتتعودي ع ده و شخصيتك هتتغير، و حبيت اعرفك إن مش لازم تكوني بتعرفي تتعاملي مع واحد عشان تكوني تمام ، لإن اصلا في الأصل مينفعش تتعاملي مع شباب حتى لو في نطاق زمايل ، المفروض تتعاملي بقدر الحاجه بس ذي مبتتعاملي مع الراجل بتاع السوبر ماركت أو سواق التاكسي مثلاً

السلام عليكم ، العلاقات المحرمه بتغضب ربنا انتبهي حبيبتي ،و من كلامك إنو بيهددك و مفيش حد بيحب حد بيهددوا ، دا غير لو بيحبك كان جيه و اتقدملك من بدري اتركيه ، فمن ترك شيئاً للّٰه عوضه اللّٰه بأفضل منه ،و تذكري ان النهايات التي بدايتها لا ترضي اللّٰه نهايتها لن ترضيكي ،و اتمنى لكي التوفيق و الهدايه

فعلاً، هو عمل حاجه حرام عصى ربه قبل ميخونك ف لو تاب لربه ف هو اتغير ، و يستحسن تصلي استخاره في الأمور الي ذي دي و تشوفي هترتاحي لإيه اكتر و ربنا هيقدرلك الي فيه الخير

السلام عليكم ، انا مقدره جداً إنك عايزه تصلحي مبينهم ، بس يُفضل المشاكل الزوجيه محدش يدخل فيها لإن غضب عنك هتلاقي نفسك بتقفي ف صف اخوكي منغير متحسي رغم إن ممكن يكون هو غلطان ، و وقتها ممكن تزيد المشكله اكتر ، ف يستحسن تخليهم يحلوها مع نفسهم هيكون افضل .

السلام عليكم و رحمة اللّٰه و بركاته ، يُفضل تصلي استخاره في الأمور الي ذي دي و ربنا هيقدرلك الي فيه الخير

و عليكم السلام و رحمه اللّٰه و بركاته ، يستحسن تشوفي الحكم الشرعي ف كدا ، اما بالنسبه للأراء ف أنا شايفه إن عندهم حق جداً ، مهما كان مدى ارتياحك للشخص ده ف افتكري إن هو جوز صحبتك و أنت ِ أكيد مش هتبقي سعيده ب فساد بيت صحبتك ، لو انتي شايفاه كويس ف اكيد غيرو كويسين كتير ، حاولي تحطي نفسك مكان صحبتك هيبقا إحساسها ايه و صحبتها اتجوزت جوزها و إن جوزها سابها ، هي ممكن تاخد صدمه كبيره كمان و تحاول تتعافى من ده فتره كبيره ، ف بلاش تدمري حياتها و تزعليها بالشكل ده اكيد هي متستاهلش.

يستحسن تصلي صلاه إستخاره تتركي الباقي على ربك لو كان في نصيب و حسيتي ب راحه من ناحيتو ف خلي جدتك تتواصل معاه و تفهمو إنك موافقه و طالما هو بيحبك ف هييجي وقتها يتقدملك ، و لو مفيش نصيب و لقيتي في عقبات بينكم ف ابعدي و ربنا يجعلك الي فيه الخير

ليس من واجبك ان تساعديه في ان يجتاز مشاكل حياته ، فهو ليس له اي لقب بالنسبه لك ليس زوجك و ليس اخوكِ ، اعلم انك تحبيه و لكن يجب ان تبتعدي ف هذه علاقه محرمه توبي لربك توبه نصوحه و ادعي ربك ان يعوضك بالأفضل ، و اذا كان هذا الفتى من نصيبك فسيأتيكي عاجلاً أم أجلاً ، هاداكي اللّٰه و هادانا اجمعين.

ربنا يوفقك بس متنساش أهم حاجه تقرب من ربنا اكتر و افتكر إن {وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكاً } ، و لما تاخد قرار تجاه اي حاجه صلي استخاره عشان ربنا يقدملك الي فيه الخير .

السلام عليكم و رحمة اللّٰه و بركاته ممكن مثلا لو هي عندك واتساب او غيرو مترديش ع الرسايل قللي معاها كلام و خروج قوليلها مش فاضيه مش لازم تقولي بذاكر قوليلها برتب مع ماما مثلاً او خارجين ف الدروس ممكن تغيري مواعيد دروسك ف مجاميع تانيه كوني صحاب جديده هتلاقي نفسك اتعاملتي معاهم اكتر منها تلقائي و هي مع الوقت هتبعد بنفسها مثلا هي فتحت مواضيع انتي اقفلي المواضيع و ردي ع قد السؤال هي ، و بكدا هتكوني بعدتي بهدوء و منغير متجرحي مشاعرها .

الشكر للّٰه حبيبتي لو محتاجه تحكي اي حاجه قوليها و هكون اول حد يسمعك ،اتمنى ليكي التوفيق💗

و عليكم السلام ، لو من الناحيه الطبيه ف يستحسن تاخدي ڤيتامينات ، بس انا شايفه إن ده بسبب التعب النفسي ، انا بعمل كدا وقت لما حس ب حزن و تعب نفسي ، يُفضل تشغلي نفسك في حاجه بتحبيها بجانب المذاكره عشان تفصلي بيها و تصحي عشانها ذي مثلا تقولي هخترع اكله جديده في الفطار ف ده هيخليكي متحمسه إنك تصحي عشان تجربي ، الموضوع ده بينفع معايا جدا جربيه إن شاء اللّٰه ينفع معاكي

السلام عليكم و رحمة اللّٰه و بركاته ، هو أولاً الأبراج مبتمثلش الشخصيات أبداً ، نصيحه مني صلي استخاره و ربنا هيقدملك الي في الخير

ايوا اكيد كل مننا في لحظه بيكون عايز حد جمبو ،و إن شاء اللّٰه تلاقي الحد دا بس لحد متلاقيه خليكي اتعاملي مع اي حد بنفس الطريقه الي بتتعاملي بيها و قربي من ربنا اكتر دا هيريحك جدااا و افتكري ان طالما ربنا بعد عنك ناس معينه ف اكيد كان وراهم شر ، هحكيلك حاجه حصلتلي شبه قصتك جاتلي فتره كنت عندي نفس المشكله جدا و زعلت لإن صحابي بعدو عني و موقفوش جمبي خالص ف لحظات كنت محتاجاهم فيها جدا مرت شهوور كتيره و الي حصل ان الي بعدو عني دول بقوا ذي متقولي كدا صحاب سوء بيكلمو ولاد و بيعملو مصايب ربنا يهديهم ونا وقتها قربت اكتر من ربنا و بقيت بلبس واسع و توبت من حاجات كتير كنت بعملها لما كنت صحبتهم ، وقتها فهمت ليه ربنا بعدني عنهم و فرحت جداً لإن لو كنت كملت معاهم كان زماني ذيهم و يمكن اكتر كمان ، ف لازم تفهمي ان ربنا هو الي عارف الخير فين و بيقدرهولك أهم حاجه الصبر و إن شاء اللّٰه ربنا هيعوضك 💗

أكيد لازم تكوني مع مامتك في مواقف ذي دي ،بس لما يكون الموضوع مش عارفه تذاكري او غيرو ف محتاجه تذاكري ف مكان برا و اكيد محتاجه تغيري جو ، ممكن بردو تاخدي والدتك معاكي ف مره تخليها تفك عن نفسها عشان متتعبش ، و ملكيش دعوه بكلام حد المهم راحتك النفسيه مهما تكلمو متهتميش عشان كل ده هيتعبك اكتر ،و اتمنى حياتك تتحسن و المشاكل تتحل 💙

هو فعلا ٦ شهور مش فتره صغيره ،هي كبيره انكوا تكتشفوا بعض ، لو حاسس إنك مش مرتاح و حاسس ب ان مش بتبادلك نفس المشاعر دا مع العلم إن ممكن تكون هي خجوله ف إنها توصف مشاعرها تجاه حد بردو بس لو هي باين من تصرفتها انها مفيش اي حاجه من ناحيتك خاالص ، و خايف انك تندم ،ف الأنفصال هو احسن حل ، متقلقش من ناحيه متلاقيش حد محترم ذيها تاني بالعكس في كتير الله أعلم نصيبك هيبقا مع مين أهم حاجه تختار حد كويس ب شهاده ناس كتيره ،و اتمنى لك التوفيق

يمكن مشكلتها ف فكره تنزلو لوحدكوا يعني جربت تقولها مثلا تجيب اختها او انت هتجيب اختك معاك يكون معاكو حد تالت يعني بمعنى اصح؟

استني ليوم ميلاده بس متهنئهوش استني شوفي هيحصل ايه يعدي اليوم دا بعدها خلي اخوكي يكلمو تاني ، المفروض الخطوه تيجي منو هو حتى لو يوم ميلاد و مستني تهنئيه و تتصالحو فلا هو طالما طول الوقت دا بيصدك و مش راضي يكلمك ف متكلمهوش بردو ،بالنسبه للبوست فذي م الأستاذه ياسمين توفيق قالت هو مستني يشوف هل هتقوليلو مالك و انتي تبدأي ولا لاء ف متبدأيش فعلا

السلام عليكم و رحمه اللّٰه و بركاته، متفكريش ف حاجه مجربتهاش ب نفسك ذي خوفك من مواد كليه و غيرو لو حابه التخصص هتنجحي فيه ب إذن الله بس يستحسن صلي استخاره و ربنا هيقدملك الي فيه الخير.

الشكر للّٰه 🩷

اشكرك على التحذير ولكن لا تقلقي هي مجرد تساؤلات لن اغامر بوضع تلك المواد على بعضها البعض ، لدي الكثير من الكريمات للبشره و هذه بعض المواد الداخله في تكوينها لذلك اردت فقط ان اسأل عن اضرارها و فوائدها

ماذا بالنسبه أيضا لماده السالسيلك اسيد ما اضرارها و فوائدها؟

ذكيه فقط اريد استفسار بسيط اي من هذه المواد يمكن ان تصنع كريم لعلاج الحبوب فعال و هل من الممكن و ضعهم سوياً ام سيسبب ضرراً ؟ ٢ مجم من ماده اريثروميسين و ١٢ مجم من فوسفات الكلينداميسين و ١٠ مجم من الكلينداميسين و ٠,٠٥ من ماده ايزوتريتينوين و ١ مجم جنتاميسين و ١٠ مجم ايودوكلور هيدروكسيكين و ١٠ مجم تلونافتات و ايضا ٠.٦١ بيتاميثازون

شكرا يا ذكيه

لو حاسه ان راحتك ف انك متكلمهوش ف خلاص متكلمهوش و عيشي حياتك وقتها هيحس انك مش مهتمه و هيسأل هو ، ممكن بيمارس معاكي الصمت العقابي بس أهم حاجه بينيلو ان عادي و مفيش حاجه و إنك عايشه حياتك ذي مهو عايش حياتو بظبط

شكراً لكي يا ذكيه🩷

الشكر للّٰه ، إن شاء الله تلاقي الزوجه الصالحه و ربنا يوفقك ف حياتك.

الشكر للّٰه 🩷

الشكر للّٰه💗💗

الشكر للّٰه ، اتمنى لكي السعاده في حياتك افتكري إن مَن ترك شيئاً لله عوضه الله بأفضل منه 💗

طب كويس انك بتصلي الحمد لله ، مشكله ذي تأخير الصلاه ممكن تحلها بردو بإنك تعود نفسك اظبط منبهات ع وقت الصلاه و استعيذ بالله من الشيطان الرجيم لو حسيت بالكسل و مره ف مره هتتعود بإذن الله

بصراحه انا شايفه ان حتى لو هو مريض شفاه الله و عافاه بس انتي مش هتقدري تقدميلو حاجه مش بإيدك حاجه ،لو مش حابه تجرحيه ب انك تسيبيه ف وقت ذي دا ف ممكن تقتصري معاه الكلام ع انك تعرفي هو اتحسن من المرض دا او لاء و لكن متفتحيش معاه مواضيع و تسألي عليه و تقوليلو مبتردش ليه و هكذا ، هو للأسف دي الحقيقه العلاقه دي غلط و عمرها هتكمل بطريقه كويسه لإن ربنا مش راضي عنها ، غير كدا انتو لسه بتدرسوا ف هو لو فعلا كلامو صح و هيخطبك ف بلاش ارتباط من دلوقتي هيأثر ع دراستك نفسها و كمان نفسيتك

متسهريش عادي نامي و اصحي ع منبه انا بعمل كدا ، الموضوع مش صعب ف البدايه هتحسي ب كدا لكن بعد كدا هتتعودي

صحبتك التالته اللي بتفكر توافق هل حكيتي ليها عن مشاعرك تجاه الشب ده أو إنك معجبه بي؟

لو قصدك منفعش انك تخرج من الحالة اللي وصلتلها ف طبيعي جداً يبقا الموضوع صعب ف البدايه و شبه مستحيل بس مع محاوله مستمره هتقدر تعمل دا و لو قصدك منفعش إنك تتواصل مع أهلك ف مش شرط تندمج بشده معاهم و تفتح حتى مواضيع هو برهم و بس عشان تكون عملت اللي عليك قدام ربنا

الشكر للّٰه ،و بإذن الله تقدر ترجع حياتك بشكل طبيعي تاني ربنا يوفقك

العفو 🫶

مش ممكن لما يقضي فتره سجنوا و ييجي يتقدم و يحكي اللي ف قلبو بجد و انو بيحبك و اللي حصل معاه دا ظلم اهلك يوافقوا عليه ؟ طالما هو مظلوم إن شاء الله ربنا هيعوضوا و يعرف ييجي يتقدم و اهلك يوافقوا و لو موافقوش حاولي تنسيه يعني متعلقيش نفسك بيه اوي عشان تقدري تنسيه بسرعه

ربنا معاكو يا اهل غزه النصر قريب بإذن الله اصبرو و اصروا ع تكملتكم ف ارضكم حتى لو ع حساب ارواحكم و بيوتكم انتو ف نعمه الموت شهيد دا أفضل حاجه و بإن الله اهل غزه اللي ماتو كلهم شهداء يبختكم ب حاجه ذي دي ربنا ينصركم ف كل صلاه بندعيلكم و حقيقي أحنا اسفين ع التقصير كلو من اداره الدوله الشعب ف مصر مستعد يضحي ب حياتو عشان نصر غزه ونا منهم و لكن المعبر مش مفتوحلنا و دي حاجه خارج ايدينا المشكله مش فينا ولا ف اي دوله عربيه المشكله في الحكام مفيش دوله راضيه تساعدنا عشان نحارب معاكو لأن اقتصادنا واقع و الدوله مش مستعده لحروب مع ذلك بنتمنى من كل قلبنا يفتحوا المعبر و نحارب عشان نحرركم اللهم النصر لكم و حسبي الله و نعم الوكيل في الصهاينه

حاول شويه تبعد عن السوشيال دا ف حد ذاتو بيأثر ف النفسيه و طبع البني ادم و مواقف ع السوشيال سواء موقف وحش او حلو دي متعتبرش مواقف تقدر انك تحكم بيها ع نفسك ابعد حبه و خليك ع ارض الواقع اكتر و اشترك ف حاجات برا السوشيال نمي موهبتك ف حته تانيه حقيقيه بجد مش تيك توك طالما انت فعلا موهوب هتلاقي نفسك تلقائي بتخش ف مشاكل و تاخد قرارات و تحلها و هتتلاشى فكره الخوف او عدم المواجهه من عندك تلقائي و اقعد و فكر مع نفسك ف اي موقف يحصل و خد قرارك حتى لو خناقه فكر قبل مترد هتتعود بعد كدا ف المواقف ترد بسرعه منغير خوف

انا بحاول اساعدك بس لكن اسفه جداً مبتعرفش ع شباب