د:نهال منصور

اهلا وسهلا بيكي عزيزتي أنصحك بالرجوع الي بيتك والاتفاق مع الزوج في وضع حدود في المعامله بس بأسلوب هادئ علشان هما برده اهله وهيزعل عليهم وحاولي تتجنبي المعامله المباشره او الأكثر من اللازم معاهم ودايما قولي لزوجك انك مشغوله في منزلك ومذاكرتك وانزلي تحت بحدود وفي وجود زوجك افضل وحاولي متركذيش في الكلام السلبي اللي بيقولو متسمحيش ان حياتك تتقلب من كلمه حد وربنا يسعدك ويبعد عنك كل شر

اهلا وسهلا بيكي حبيبتي انتي ممتلئه بالمشاعر السلبيه والتراكمات وهو ده السبب في ضيق قلبك والإحساس اللي انتي حاسه بيه اولاً لازم تفرغي المشاعر السلبيه اللي جواكي وثانيا لازم تهتمي بنفسك اكتر وتقدريها ويبقي عندك حاجه بتعمليها لان مركزه مع زوجك ونسيه نفسك خالص ولازم تعرفي حاجه ان دايما في حاجات في حياتنا تحت سيطرتنا ودي نقدر نحسن فيها ونقدر نغيرها وحاجات تانيه خارجه عن سيطرتنا ودي بنحاول نتعايش معاها ممكن تدي لنفسك فرصه تفرغي مشاعرك السلبيه ممكن بالكتابه او بأستشاره أحد الاخصائيين وانا تحت امرك وبعدين ابدئ قيمي مشاعرك

السلام عليكم اهلا وسهلا بيكي حبيبتي اولاً احب اقولك ان بنت مجتهده جدا وطموحه لانك بتعملي وحبه يبقي ليكي عمل وكرير وانتي في سن صغير بجد برافو عليكي ثانيا اول حاجه علشان تثقي في نفسك لازم تتقبلي نفسك بكل حاجه فيها ببمميزاتها وبعيوبها تحبي نفسك يعني ايه تحبي نفسك يعني تعتبريها حد غالي عليكي جدا وجاي يشتكيلك من الوجع وانتي بطبطبي عليه وبتوسيه وبتحضنيه وبتحسسيه بالامان هو ده اللي عايزاكي تبدئ بيه مع نفسك ومتقلقيش الثقه بالنفس بتيجي بالتدريج ثانيا أنا عرفت انك معندكيش اصحاب ممكن تخالي مؤقتا الورقه والقلم هما أصحابك يعني اتعودي كل يوم بليل تكتبي كل مشاعرك السلبيه وبعدين قطعي الورقه اللي كتبتي فيها ده هيخليكي بالتدريج تقلقي من مشاعرك السلبيه ومهم كمان تكتبي كل يوم رساله داعمه لنفسك ذي مثلا أنا اقدر اتخطي الصعوبات أنا بحب نفسي وبتقبلها ذي ما هي بكل مميزاتها وعيوبها وتخطيهم قدامك وتقرأيها كل شويه ده هيزود ثقتك بنفسك بالتدريج واهم حاجه عايزاكي تعرفيها ان التغير لازم يكون من جواكي انتي وانه هياخد منك وقت فلازم تستمري ومتزهقيش بسرعه وانا واثقه ان شاء الله انك هتقدري تتغيري للصوره اللي نفسك تبقي فيها حبيبتي 🌹

أهلاً وسهلاً بيكي اولاً لازم تعرفي ان المشاكل اللي في البيت بسبب الأب والأخوات حاجه خرجه عن أردتك ولاسف الحاجات اللي خارجه عن ارادتنا مش بنقدر نغيرها لكن ممكن نتجنبها او نحاول ان نغير من انفسنا لكي يقل تأثيرها علينا مثلا انك تعرفي ان في ابتلاءات وده الابتلاء اللي يخصك وهتأجري عليه من الله ثانيا مهم جدا انك انتي تتغيري حاولي تقربي من نفسك اكتر وتفهميها وتسالي نفسك ايه اللي بتحبيه وايه اللي بتكرهيه ومهم كمان تحاولي تشغلي وقت ابحثي عن عمل حتي ولو من البيت وفرغي مشاعرك السلبيه دايما عن طريق الكتابه وممكن بعد كده تتخلصي من الورقه بالتقطيع علشان محدش يقراها ويعملك مشكله وحاولي تتجنبي المناقشات الحاده علي قد ما تقدري وكمان اتمرني علي تمرين التنفس ٤/٤/٦ بتاخدي شهيق أربع عدادات وتكتميه أربع عدادات وتطلعيه من فمك في ٦عدادات هيفرق معاكي كتير في تفريغ الطاقه السلبيه مع الوقت وان شاء الله تتحسن حالتك النفسيه بالتدريج 🌹

اهلا وسهلا بحضرتك انصح حضرتك تعطي نفسك شهر كمان مهله قبل التحديد إذا كنت هتكمل او لا في خلال الشهر ده تحدث معاها بصراحه ان كانت تريد ان تكمل معك حياتها او لا وابدء خد بالك لما بتبقى مع بعض ومعاكم العائله بتبقي سكته ولا بتتكلم لان في ناس طبعها قليله الكلام ومبتعرفش تعبر عن مشاعرها وصلي صلاه استخاره كذا مره ولو لكم نصيب ان شاء الله ربنا هيتم علي خير

اهلا وسهلا بيكي أنصحك ان تتركيهم مع بعض لانهم لما يكبرو غصب عنهم هينفصلو في المدرسه او الجامعه ان شاء الله المطلوب من حضرتك انك تقوي ثقتهم بنفسهم وتدعميهم وتشجعيهم ودايما تحاولي تتطوري من افكارهم

اهلا وسهلا بيكي اولاً لازم تعرفي ايه سبب الخوف الشديد ده اجلسي مع ابنك واتكلمي معاه ممكن يكون كان بيتفرج علي أفلام رعب في التليفزيون او علي الموبيل ولما تعرفي السبب هتقدري تلاقي حل لانك تفهميه ان ده تمثيل او توديه لاخصائي نفسي تخصص أطفال هيقدر يسعدك بس مهم جدا اولاً تتكلمي مع ابنك وتعرفي السبب وتحتويه وتطبطي عليه وعلي طول احضنيه

السلام عليكم اهلا وسهلا بيكي اولاً هذا الوضع اختبار من الله لكي وله علي صبرك وتحملك وتعلمك مسؤولية الحياه ونبذه صغيره عن الحياه الحقيقيه في العيشه لان الزواج مش بس تكاليف المنزل والفرش لا أشياء كثيره جدا وانا أنصحك ان تجلسي مع اهلك وخطيبك وتحطي النقط علي الحروف وتعرفي انتي عايزه ايه بالضبط لان لاسف التركمات النفسيه اللي عندك ممكن تحول الحب الي نفور وبعدين مشاكل لا حصر لها ثانيا كلام الناس عمره ما هيخلص لان ارضاء الآخرين غايه لا تدرك اهم حاجه دلوقتي تقاعدي مع نفسك لوحدك اولاً وتعيدي التفكير وحساباتك في حياتك من اول وجديد وساعاتها تقرري انتي عايزه تعملي ايه علشان يبقي القرار من عندك انتي مش من حد تاني وربنا يكتبلك الخير في حياتك ومستقبلك

السلام عليكم اهلا وسهلاً بحضرتك اول سنه جواز أنا بسميه مثل المشي علي حقل الغام لان بدايه الحياه الزوجيه بيحصل تصادمات في العادات والتقاليد المختلفه بين الزوجين وبنبدء نتعرف علي بعض فهم جدا نعرف ان الشجار ليس مشكله في بدايه الزواج المشكله الدائمة كيف ينتهي هذا الشجار وهل بينتج حل للخلافات ولا بينتج مشاكل اكتر لذا مهم جدا ان الزوجان يعملو علي حل جميع مشاكلهم من جوزرها ويتعلمو اكتساب المهارات في حل المشاكل وعدم تأجيل المشكله واهم شئ المصارحه بدون تجريح والاتفاق علي الاشتراك في أخذ القرارات وربنا يصلح الامور وتستقر حياتك ان شاءالله

اهلا وسهلا بيكي عزيزتي الاكتئاب عامل بالضبط زي الحجر الثقيل اللي محطوط فوق الرأس ويجعلك لا تستطيعين التحرك وحتي لو تحركتي تتحركين ببطئ لكن بعون الله واردته سوف تتغلبين عليه في اغلب حالات الاكتئاب الشديد اللي بتستمر لفترات بيبقي مهم العلاج الدوائي ولكني لا أفضله هقولك علي شويه حاجات ان شاء الله تفيدك بس لازم تعرفي حاجه مهمه انك لو مستعدتيش نفسك مش هتقدري تطلعي من اللي انتي فيه حتي لو رحتي لألف دكتور نفسي اول حاجه هنعملها النيه انك كل يوم الصبح تنوي اول ما تصحي من النوم انك هتغيري حايتك للأفضل وجنبي نفسك لانها تستأهل انها تتحب ولأنها هبه من الله وأمانه ولازم تحافظي عليها ثانيا اول ما تصحي من النوم تضحكي يمكن تكون حاجه بسيطه بس هي بتحفذ عقلك الباطن انك سعيده وبالتالي هيحاول يبعتلك احداث سعيده ثالث حاجه هتتكلمي مع نفسك لمده ٣ايام كلام إيجابي فقط وممنوع الكلام السلبي كلام إيجابي زي مثلا أنا جميله النهارده اليوم ممتعه هقدر اكمل هقدر ابقي احسن وعلشان تستمري جيبي اي برانات عندك او اي علبه وكل يوم لما تكملي لاخر كلام إيجابي حطي فيه اي مبلغ وآخر الثلاث ايام كفاءي نفسك باي حاجه بتحبيها مثلا شيكولاته هنعمل الثلاث حاجات دول مؤقتاً لحد ٣ايام علشان ماتزهقيش ولو احتاجتي اي مساعده أنا موجوده معاكي ابعتيلي في اي وقت وان شاءالله تقدري تتخطي الأزمه دي بالاراده والعزيمه والصبر ❤️

اهلا وسهلا بيكي اولاً احب أعرفك ان الزواج الشرعي يكون مكون من عده اركان هي الموده والرحمه والتعاطف والتفاهم والاحترام وايضاً لاكتمال الزواج الصحيح يجب ان يتم الأمور الجنسيه بين الزوج وزوجته لانها حدود الله وانتي الآن تخلفي شرع الله ثانيا العلاقه بين الرجل وزوجته مش مقرفه ولا حاجه ولا حرام لان ربنا محلل ده وانتي كده اللي بتخلفي أوامر الله فرجاء علشان اكتمال حياتك الزوجيه بطريقه صحيحه تفهمي مع زوجك وخصوصا انه باين انه رجل صبور ان تأتي الأمور بالتدريج ويجب ان تتمي زواجك بطريقه طبيعيه ووفقك الله في حياتك الزوجيه وشكرا جزيلا

اهلا وسهلا بيكي حبيبتي معنى انك خايفه يبقي بدايه الطريق الصحيح بس لازم تسمحي نفسك علي خطأك وان شاء الله ربنا غفور رحيم ومهم كمان تبدي تهتمي بنفسك وصحتك وتسمحي نفسك علي اخطائك بعدم تكررها مره اخري وتقربي من ربنا اكتر واهتمي بصحتك وان شاءالله ربنا هيقبل توبتك وهيستر عرضك ودايما خالي ربنا دايما قدامك في كل تصرفات حياتك

السلام عليكم اهلا وسهلا بيكي عزيزتي اواقات كتير بيبقي الأخوه متعصبين من سبب ما ويعتقد ان اخته يجب انت تتفهم عصبيته وتستحملها لذلك اطلب منك انك وقت عصبيه اخيكي ان تهدي ولا تتناقشي معاه كي لا يزيد من عصبيته وممكن لا قدر الله ان يتطور الأمر وحينما يكون هادئ عاتبيه بلطف ودون ان ترفعي صوتك في النقاش وحاولي ان تحسسيه انك بتحبيه وتقدريه وربنا يهديهولك ويبقي دايما سند ليكي وشكرا

اهلا وسهلا بيكي اولاً احب اقولك انك في سن المراهقه وبيحصل تغير في هرمونات الجسم وده طبيعي وهو سبب الشعور بالاكتئاب ولكن لا تستلمي للإحباط والتفكير في الانتحار لان ده حرام ثانيا لو احتاجتي تتكلمي مع حد مختص أنا معاكي استشاري صحه نفسيه هنتكلم مع بعض ونرتب افكارك ونخطط للمستقبل مع بعض وهسمعك وشكرا

السلام عليكم اهلا وسهلا بيكي اولاً احب اقولك الف مبروك علي نجاحك مهما كان المجموع مجرد اجتيازك سنه كامله تحت ضغط في المنزل وكمان مواد صعبه ده يعتبر إنجاز كبير ولازم تكفئ نفسك عليه حتي ولو مكفأه بسيطه ثانيا ارضي بقضاء الله وتقبلي الوضع وأبدي البحث عن ذاتك وعن حلم ممكن تحققيه في الكليه لان الثانويه العامه مش نهايه الطريق بل بالعكس هي محاطه في طريق حياتك ومش معني ان محطه طلعت وحشه يبقي باقي حياتك هتبقي وحشه ثالثا حطي عندك هدف جديد واسعي واجتهدي وانجحي وحربي لحد ما توصليلو واعملي مشروع من اول سنه جامعه مهما كانت اي جامعه دخلتيها وابني لنفسك مستقبل وكرير وساعدتها اهلك هيبقو سعداء بيكي رابعا ساعات كتير بيبقي في اختلاف في وجهات النظر بين الأهالي والأبناء علشان كده بيحصل مشاكل كتير بس مهما ان حصل هما اهلك ولازم تحترميهم وانتي اهتمي بنفسك وحبيها وتقدريها وتقبلي قضاء الله وقدره وربنا هيجبر بخاطرك وانا معاكي في اي وقت لو حبيتي تتكلمي وشكرا جزيلا

السلام عليكم اهلا وسهلا بيكي حبيبتي اولاً احب أعرفك ان مشاعر الخذلان اللي انتي حسيتي بيها دي طبيعيه لان الخيانه شيء صعب جدا ثانيا تعالي نشوف الموضوع من وجهه نظر تانيه شوفيه ان ربنا عايزك تقربي منه اقترب ومتعلقين غير بربنا فقط ولكن علاقه الزواج علاقه موده ورحمه وحب مش تعلق اللي المشاعر اللي انتي بتمري بيها دي لانك كنتي متعلقه بزوجك تعلق مرضي ولكن هو بشر ومعرض للخطأ ولكنه تعلم من خطأ سريعا وتاب علي خطأ وهو ليس له علاقه بموت الجنين لان الموت والحياه بيد الله فقط ثالثا مهم جدا انكم تبقو مع بعض في منزل واحد علشان ترجع تاني الالفه بينكم وهو كمان اخد درس عمره ما هينساه علي فكره وممكن يكون بيتعذب زيك واكتر استعيني بالصبر والصلاه وخالي قالبك متعلق بالله فقط وحبي نفسك اكتر وقدريها وفكري لو كان جوزك كمل في الخيانه ومقالكيش وبقدر الله كان الطفل اللي توفي ده أتولد مريض مثلا ربنا دايما بيسبب الأسباب لأننا لو علمنا الغيب لاخترنا الواقع ارضي بقضاء الله وربنا هيرضيكي رضا كبير جدا وربنا يريح قلبك لانك ماشاء الله نقيه وربنا يعوض عليكي بالخير والبركة يارب اللهم امين وشكرا جزيلا

السلام عليكم اهلا وسهلا بيكي اهم حاجه تعمليها انك تقربي من ربنا اكتر علشان يسمحك حاولي تحفظي القراءن واقرائي كتير كتب دينيه او كتب لتقدير الذات واهتمي بنفسك وسامحيها علي خطأها وربنا حليم ستار وقربي من ولدتك وصحبيها لاني شايفه انك لوحدك واشغلي دايما وقتك بحاجات مفيده ومهم كمان تهتمي بدرستك وتتفوقي فيها علي قد ما تقدري وتنسي تمام الأشياء السيئة اللي فاتت وان شاءالله تبقي زي الفل ومفيش اي حاجه وحشه وربنا يهديكي ويهدي جميع بنات المسلمين اللهم امين

السلام عليكم اهلا وسهلا بيكي عزيزتي القلق ده شئ طبيعي في كل البشر بس اهم حاجه ان احنا منخليش القلق والتوتر يوقف مسيره حياتنا اولاً لازم تفهمي ان ربنا قائلنا ان احنا نجتهد ونعمل اللي علينا والباقي علي الله نصيب كل واحد فينا بايد ربنا سبحانه وتعالى فمهم قوي تثقي بالله وبحكمه وكمان تثقي بنفسك وتعملي جدول وخطه زمنيه تظبطي فيها مذكرتك وكمان يبقي فيها وقت للراحه ووقت للترفيه علشان تقدري تحصلي اكتر وتجتهدي اكتر ومش لازم تروحي مصيف يمكن اهلك عندهم ظروف ممكن تنبسطي باشياء تانيه كتير مثل الخروج مع صحباتك او ممارسه رياضه بتحبيها او تعليم هوايه جديده واسأل الله لكي التوفيق والنجاح الدائم وشكرا لكي

السلام عليكم سيدي الفاضل حضرتك بتسأل هل سوف تأخذ اجر علي هذا الصبر نعم سوف تاخد اجر ولكن أجرك وثوابك هيزيد لما تحاول انك تصلح هذا الدمار الذي بداخلك من تجاه زوجتك انت تقول انها ليست من اختيارك ولكن لم تكن مثلا تحب سيده اخره وتزوجت زوجتك وتركتها .مشاعر الحب تولد حينما تتقبل الشخص الاخر .حاول ان تقرب من زوجتك وبدل ما ترى عيوبها ابحث عن مميزاتها . وتحدث معاها باستمرار وساعدها وطبط عليها من غير ما تنصحها لانها بتبقي اوقات كتير محتاجه تتكلم فقط ومش عايزه نصيحه وتربيه الاولاد أصبحت مسؤوليه شاقه جدا هذه الأيام وادعي ربنا دايما يجمع قلوبكم علي الورد والحب والرحمه وعامله دائما معامله حسنه لانك كمان قدوه لاولادك وهي ايضاً قدوه لاودها .وشكرا

السلام عليكم اهلا وسهلا بيكي دايما البنات قبل موعد الزواج بيحصلها رهبه وخوف وده طبيعي اولاً اتفقي مع خطيبك علي شكل حياتكم وانك مبتحبيش حد يدخل في حياتكم وانك بتحبي يبقي ليكي حياه مستقره يعني مثلا ناكل في بيتنا والحاجات دي وممكن نبقو تتجمعو عند بيت اهله يوم آخر الاسبوع علشان المذاكره وحاولي تشتغلي وانتي بتدرسي علشان ميبقاش عندك وقت فراغ ثانيا ابني حدود صحيه مع اللي حواليكي ومتحكيش اسرار بيتك لأي حد مهما ان كان قريب منك يعني اللي حاجه اللي متقدريش تعمليها اعتذري بشياكه من غير تجريح وان شاءالله ربنا يسعدك ويقدملك اللي فيه الخير والف مبروك مقدما

حبيبتي انتي شخصيه حساسه جدا ودي اعرض طبيعه لان تجربه الثانويه العامه صعبه وانتظار النتيجه بيخلق افكار كثيره سيئه بداخلك لكن لا تقلقي اولاً محتاجه تدوري علي حاجه بتحبيها تشغلي نفسك فيها مثل الرسم او القراءه او الرياضه او تتعلمي شئ جديده ده هيشغل وقت فتره وهيحسسك انك بتعملي حاجه مفيده ثانيا مهم جدا انك تبطلي تكلمي نفسك كلام سلبي لان ده بيزود عندك حاله اليأس ويقلل عندك الشغف ثالثا تحدسي مع نفسك بإيجابيه فقط وخالي عندك ثقه في ان الله سوف يختار لكي الأفضل واهم شئ ان تتقربي من الله اكثر واقرائي ورد من القراءن يوميا حتي ولو صفحه وان شاءالله سوف تفرحي بنتيجتك وربنا هيجبر بخاطرك وايضاً اكثري من الاستغفار

السلام عليكم من سمات سن المراهقه كل اللي حضرتك كاتبتيه ده وخصوصا الميل اكثر الي أصحابها . اهم شئ ولدتها تحاول تقرب منها اكثر وياريت تغير طريقه المعامله معاها وتسمعها ودايما تحضنها وتحسسها بالامان ووالدها كويس جدا انه قريب منها ده مهم جدا وهي انصدمت لما سابت أصحابها وبتحاول تكون صدقات جديده وده صعب لاسف في سن المراهقه لاني بسميه سن التمرد البنت بتحاول تعمل عكس كل اللي يتقالها قربو منها اكثر وتنقشو معاها واعرف ايه اللي مدايقها وصحبوها اكثر وان شاء الله هتبقي مرحله وتعدي 🌹

اهم حاجه حبيبتي انك تعرفي انك هتاخدي شويه وقت علشان تحسي بالتغير هقولك علي خطوات تمشي عليها وان شاء الله تقدري تتحسني اول حاجه لازم تتقبلي نفسك زي ما هيه بحلوها وبوحشها وتحبيها .تاني حاجه تجربي لمده اسبوع تكلمي نفسك كلام إيجابي وتده هيخليكي تشوفي نفسك مبشرا تاني ثالث حاجه انك تعرفي سبب المشاعر السلبيه دي جايه منين ولما تعرفي هتقدري تلاقي حل المشكله اللي عندك وحاولي تقربي من مامتك وتحضنيها هتحسي شويه بالحب والتقدير

احب اعرف اكتر عن المشكله اللي مرتي بيها واتسببت في كل المشكله دي

لازم نعرف تفاصيل اكتر علشان نجد الحل المناسب

لازم تفهمي ايه اصل المشكله وبدءت من امتي علشان تقدري تلاقي حل وكمان. لازم تفرغي الطاقه السلبيه والكبت

حبيبتي برافو عليكي كملي ولو احتاجني اي شيء جميعا هنا لمساعدك وفقك الله وبارك فيكي 🌹

لازم تحاولي الطفل الصغير لما بيتعلم المشي مش بيمشي كويس من اول مره ده بيفضل يحاول ويحاول بيقع كتير وساعات كمان بيعور نفسه بس في الخر بيوصل وساعتها مش بيبطل مشي حبو نفسكم يابنات والله هي تستاهل تتحب وتستاهل احسن حاجه في الدنيا

طول ما انتي عماله تقولي الوضع صعب عمر ما في حاجه هتتغير لكن لما تقولي لنفسك كل يوم أنا هقدر بعون ربنا واني اتغير ان شاء الله هتقدري يمكن ياخد وقت لكن والله اليأس والإحباط اول طريق الفشل لما تعتبري ان الاكتئاب ده مرض مميت ولازم تقومي علشان تتعالجي هتقومي غصب عنك حتي لو قمتي مره وقعتي مره لازم تفهمي ان جسمنا ده امانه عنده من ربنا مش ملك لينا

لا طبعا واجب ومنعه ربنا هيحسبك عليه

زوجك ندم علي فعلته وانتي حاولي تسمحي علشان تقدري تعيشي باقي حياتك في سلام وكل ما تحسي انك لسه زعلانه افتكري ان ربنا غفور رحيم حاولي تبنو علاقتكم من اول وجديد كانك بتشوفي جوزك لأول مره وحددو مشاعر الحب بينكم وحاولو تدور علي حاجات جديده تجدد مشاعركم مثل انكم تخرجو مع بعض وتفسحوا خروجه حلوه تحسسك بالتجديد والتفاهم وقوليلى احنا هنفتح صفحه جديده صفحه لسه بيضاء وينكتب سطورها سوا مع بعض وكل واحد فينا يحاول يعمل اللي يقدر عليه علشان ننجح العلاقه دي علشانا وعلشان اولادنا وربنا يسعدك ويريح قلبك ❤️

اهلا وسهلا بيكي حبيبتي معاكي في اي وقت