رنا ..

احسن حاجة كانت انك تقسم المرتب ع كذا قسم .. وياريت تحطه ف شنطه كده وتقسم الشنطه لكذا قسم حتى لو الفواصل بورق يعنى وهنفرض مثلا مرتبك ٣٠٠٠ عشان تفهم التقسيمه بس مش اكتر ١- مبلغ للفواتير للكهربا والغاز والمية (وليكن ٧٠٠) ٢- طلع صدقة مهما كانت بسيطة اى مبلغ يطلع من ذمتك بالنية دي ويكون ثابت لكل شهر وانت ومقدرتك ومتبخلش وتقول ما انا بطلع الزكاة وده مهم جدا جدا جدا والله بركة مش عادية ومش كلام وخلاص ومن غيرها هتحس ان الفلوس بتطير فى اماكن مش عارف فين والتجربة خير دليل .(وليكن ٥٠ج) ٣-خلى فى مبلغ للتحويش (وليكن ٥٠٠ج) ٤- خلى فيه مبلغ صغير احتياطى لو اتزنقت ف مصاريف البيت العادية تاخد منه عشان متروحش ع المبلغ بتاع التحويش علطول (وليكن ٢٠٠ج) ٥- مصاريف الأكل والشرب(وليكن ١٥٠٠) ودي تتقسم ع ٤ خانات لاربع اسابيع وياريت تجيب ورقه وتتنيها زى المحفظه كده ..وهتكتب ع الورقه الاسبوع الاول ..الاسبوع التاني ..الاسبوع التالت ..الاسبوع الرابع وفى كل واحده هتحط ربع المبلغ المحدد للاكل والشرب (١٥٠٠÷٤= ٣٧٥)...والصرف يتحسب بالاسبوع يعنى وتعمل حسابك فى كذا حاجة ... •الاسبوع تحسبه من يوم ١ ل٧ وتراعي الشهور اللى ٣١ يوم • تعمل حساب فلوس اللحوم وتحسب هتاكل فى الاسبوع كام مرة • تعمل حساب الحاجات زى فواتير النت والتليفون الارضي •تعمل حساب الزيوت والصابون والمناديل بتاعت الشهر •ممنوع خالص تاخد من فلوس اسبوع لسه مجاش للاسبوع الحالى لو اتزنقت تاخد من المبلغ الاحتياطي ولو زنقت اكتر تاخد من التحويش لكن مش من الاسابيع الجاية حاول تراعي كل ده اثناء الصرف والاكل يتجاب اليوم بيومه عادى بلاش حكاية خزين الشهر والكلام ده من وجهي نظري كده احسن ..وطبعا كل واحد وحسب فلوسه ومصاريفه وعاوز يحوش قد ايه وعاوز يصرف ف ايه ممكن تكتر التقسيمات عادي انا قولت الحاجات الاساسية بس ... وادعي بالبركة كل لما تفتح الشنطة وربنا يباركلنا جميعا .

مريض الفصام مختلف عن اللي قولتيه واعتقد إنك طبيعية ..ولكن تعانى من عصبية وضغط نفسي وده اللى مسببلك ده ،محتاجة تعرفي تتعاملى مع نفسك أولا وتهديها عشان تقدرى تتعاملي مع الناس بشكل افضل ومحتاجة بردو تحطى الاشخاص فى مكانها الصح .. مامتك وباباكى أول ناس يتحطوا ف اولوياتك بحسن المعاملة وده حقهم عليكى وان كنتى متعصبة ..فاهمة انك متعصبة ولكن العصبية مش مبرر ولازم تفهمى ايه الاخلاق اللى المفروض تتخلصي منها بحيث تبقى بارة (ده مش سهل ومحتاج مجهود كبير بس لازم تهذبي نفسك غير كده هتبقى تعيسة بجد فى الدنيا ولا قدر الله فى الآخرة ) وشوفى هل فعلا انتى بنفس العصبية والعدوانية وكل ده مع صحباتك ولا اهل بيتك بس بتكوني كده! واول خطوة فده انك تتخلصي من العصبية وتحطى الامور والاشخاص في مكانها الصح ومش اى حاجة تعصبك..ذاكري كويس واهتمى بده لان قلقك من الامتحانات هو اللى بيضغطك وبيخلى تصرفاتك تسوء! فاحنا محتاجين نهتم بالجانب النفسي اول حاجة وتابعي "عبد الرحمن ذاكر الهاشمي " ع اليوتيوب هيفهمك نفسك وازاى تتعاملى معاها ومع الناس وهكذا ... ويأتى الجانب الدينى بقا عشان تكونى هادية شوية وتتقبلي تسمعي بقى حقوق الوالدين وواجب الابناء والعكس وثواب وعقاب كل حاجة .. وبعدين الجانب العملى بقا تهتمى بمذاكرتك ونفسك وصحتك وتحسني من اكلك وتغيري روتين حياتك ككل وتتأملى الطبيعة السما والشمس وصوت العصافير يوميا وهكذا وهبعتلك لينك لإجابة هنا فيها تفاصيل ازاى تهدي من عصبيتك بالظبط .. لو اشتغلتى ع ال٣ جوانب دي بجد هتتغيري بإذن الله بس انتى لازم تعملى حاجة وتخرجى من عقلك انك ضحية سواء لمرض او حتى لسوء معاملة مامتك او غيره وحطى ف بالك انك مسؤلة عن تصرفاتك انتى خلاص كبرتي وبلغتى و لازم تصلحي من نفسك مش تسيبيها تضيع لاي سبب! ربنا يصلح لك نفسك يا رب https://www.fedni.net/q/59595738?answer=66057b4e219b5e00027cf560

هل عندك سمنه فى نص جسمك اللى فوق ؟وشك حاسه انه تخن ؟ .. عندك حب شباب وبيظهرلك بقع وكدمات فى جسمك ؟عندك تعب وارهاق عام؟ اتكسرتي (عظمك) قبل كده؟حاسه ان شعر وشك زاد؟

انا شايفة انك طبيعيه ومش محتاجة لاي حاجة نفسية بس محتاجه تغيري من حياتك لان حياتك اللى انتي عايشاها واضح انك مش راضيه عنها وتعبانه فيها ...انتى محتاجة تكوني في البيئة اللى تحبي انك تكوني زيها .. يعنى محتاجة تشجيع بإنك تشوفي حواليكى ناس بتعمل اللى انتى عايزة توصليله .. مش هقولك صحبة( مع انه ده أكتر حل يساعد) لان الصحبة الصالحة المشجعة مش ديما بنلاقيها لكن دورى وحطى نفسك ف الاماكن المتوقع تلاقي فيها اللى عايزاه يعنى مثلا عاوزة تكوني كويسة ف دينك انزلى دروس واماكن تحفيظ القرآن واسألى ع جروب واعرفى الاماكن القريبة منك وسهلى الدنيا ع نفسك وحاولى تخلي الحاجات قريبة منك وسهله عليكي وخدي من كل الناس الحلو وبس واعملى نفسك مش شايفة اي وحش منهم بجد ومش لازم تاخدي حد منهم كصاحبة ليكي لو ملقيتيش حد وارتاحتيله عادي روحي واتعلمى هناك وخلاص وفى البيت دوري ع دروس اونلاين وتابعي شيوخ وخلى فونك مليااان ف كل حته بالفيديوهات دي وبكل اهتمامتك .. مثلا عاوزة جسمك يبقى حلو روحي جيم نسائى بس كويس يعني ميكونش بيرغوا وبيتكلموا وهزار وبس لا يكون فى فعلا مجهود مبذول ونتايج حقيقية وطبعا بيئة فرفوشه وحاباها عشان متمليش وبالمثل ف البيت فيديوهات لمدربين وتتعلمى التمرين ده بيتعمل ازاي وهكذا ! حطى احلامك قدام عينيك طول الوقت عشان ده هيخلى عقلك الباطنى طول الوقت يشجعك طالما مش لاقيه مشجع ف حياتك ..اوقات الحزن اللى بتحسي بيها جايز تكون بسبب انك مش حاسة انك بتعملى حاجة مفيدة ف حياتك ولان زى ما قال الرسول عليه الصلاة والسلام نعمتان مغبون فيهما كثير من الناس الصحة والفراغ ..الفراغ ده لو مش هتستغليه بما يرضي الله وباللي يحسسك انك بتتقدمي هياخدك لسابع أرض وهى كده النفس إذا لم تشغلك بالحق شغلتك بالباطل فكده كده هتتشغلى ف حاجة فانتي اختاري ! حددي احلامك وقسميها شوفى مين اللى ليه الاولويه ومين ممكن يجي بعدها وادى كل حاجة حقها ! حياة الولا حاجة دي مدمرة لكل حاجة ف حياتك دينك و نفسيتك وصحتك وعلاقاتك كل حاجة بالمعنى الحرفي وممكن اقولك ع جدول يومي بردو لو حبيتي قوليلى بحيث تدي كل حاجه حقها ف يومك عشان لما تتسألي "عن عمره فيما أفناه " تلاقي اجابه للسؤال..الإنسان عبارة عن عدد من الأنفاس وبعدها هيموت وهيتحاسب على كل ثانية من عمره لو مجددتيش نيتك ف كل حاجة بتعمليها هيضيع معظم عمرك هباءا منثورا !حتى النوم (تلت عمرك او اكتر !) ممكن تاخدي نيه انك بتنامى عشان ترتاحي وتقدرى تأدي واجباتك وبالتالى تاخدي أجر عليه بدل ما تبقى ٨ساعات من غير زيادة ولا حسنات! .. اختارى تعيشي الحياة اللى نفسك فيها وتتعبى شوية أه بدل ما تعيشي تعيسة ومش بتتحركي! ومع الوقت صحتك مش هتساعدك زي دلوقتي فأغتنمي شبابك ! ... هبعتلك لينك ممكن يوجهك شوية بانك ازاي تتغيري وتبقى انسان مختلف وحاولى تطبقى فيه واحده واحده وبالراحة و باللى يناسب حياتك ..ربنا يعينك ويوفقك وينور طريقك🌸✨ https://justpaste.it/dccy3

كتبتى مشكلة طويلة عريضة ومحاولات للخروج منها بدراسة عقيدة وفقة وما إلى ذلك وولا مرة فكرتي إنك مريضة ؟! وفعلا معاناتك دي مش هينهيها تعلمك عن علم معين ولا قراءة الأدلة ولا أى حاجة من دي وحتى لو كانت مقنعة لكل الناس هتيجى عندك وعقلك هيرفض يصدقها ليه؟ لإنه للاسف فى مشكلة حقيقية محتاجة لعلاج من طبيب نفسي هي دي الحالة الوحيدة اللى هتخلي حياتك تتغير وتتحسن شوية وع فكرة انا حاسة انه مش مجرد وسواس قهرى لا ده احتمال معاه حاجة تانية جايز تبقى بارانويا .. متتردديش إنك تزوري طبيب نفسي واهلك اكيد لاحظوا عليكي ده والمفروض يكون فى دافع من اهل البيت بردو لانك ممكن متصدقيش إنك محتاجة علاج ولا تصدقى الدكتور لو روحتي وقالك عندك مشكلة بس الحاجة اللى هتحسي فيها بتحسن ولو بسيط مع الاستمرار هو العلاج ..اعتبريني بكدب عليكى عادي بس التجربة مش هتخسرك حاجة بالعكس مش يمكن تكسبك؟ مش يمكن كدبي عليكي ده يريح عقلك شوية ؟ .. ربنا يعينك ويقويكى وتبقى كويسة وزى الفل يارب .

أيه هي مشكلتك مع شعرك بالتحديد؟ عشان بيتساقط وعندك فراغات ولا عشان طوله ولا نعومته؟

وعليكم السلام ورحمة الله بركاته ، المشكلة ليست تافهة خصوصا لما تقول إن الموضوع ممكن يتم ايصاله فى ١٠ دقائق ويستغرق الأمر معك ٦ ساعات فبالتأكيد ليست تافهة ... أولا * ركزززز وأنت تقرأ ولا تتشتت*...معرفة سبب ما تعانى منه لا يمكن الجزم به بعد ما قولت مشكلتك فقط خصوصا انك مقولتش كم عمرك ومن أمتى بتعاني من المشكلة دي وهل فى مشاكل قد تدفع لكثرة الثرثرة زي المشاكل الاجتماعية او حياتك الخاصة اللى ممكن الثرثرة تكون مجرد وسيلة للهروب منها ! ففكر هل فى امور معينة بتحب تتكلم فيها كتير او مواقف معينه تدفعك لده ؟ ...وكمان فكر فى هوايات معينة ممكن تخرج طاقتك فيها بدل ما تخرجها فى كثرة الكلام ..وقد تكون تعانى من مشكلة نفسية وفى حاجات كثير ممكن فرط النشاط وتشتت الأنتباه أو الهوس وده الشخص بيتكلم فيه بصوت عالي وبسرعة وبيتكلم فى موضوع وقبل ما يوصل الفكرة يدخل على موضوع تاني وهكذا وتشخصيك ده اللى هتعرفه بزيارة الطبيب النفسي إن شاء الله .... فى بعض النصائح اللى ممكن تقلل قليلا من حده الأمر إنك قبل ما تتكلم١* فكر إنت عاوز تقول إيه بالظبط يعنى خلاصة الموضوع و٢*خذ نفس عميق قبل الكلام و٣* تكلم ببطئ و٤* أفصل بين كل جملة وجملة واسكت ثواني و٥*أبعد عن أي دوشة حواليك بحيث تعرف تفكر فى هدوء و٦* ركز إن تسمع أكثر ما تتكلم وممكن تعمل حيلة بسيطة بإنك تشرب ميه وتخلى الميه فى بوءك شوية بحيث إنك متعرفش تتكلم فترة وتجبر عقلك إنه يدرك إني ممكن بؤى ميتكلمش واستخدم ودني فقط مرة مع مرة زود المدة قبل ما تبلع الميه لحد ما تهدأ شوية ....وانصحك ب عدم القراءة كتير عن مشكلتك عشان متتوهمش حاجات عندك وتبدأ تسقط الكلام اللى بتقرؤه على نفسك وهى فى الأصل مش موجودة وتدخل فى دوامة الوسوسة ..كثير من الناس اللي شايفة ان عندها مشكلة تخجل من الافصاح عنها او طلب المساعدة من المختصين ولو كانت القراءة هي الحل كان كل الناس عرفت تحل كل مشاكلها بالقراءة فقط وشراء الكتب! حتى الطبيب النفسي اللى بيعالج ويساعد الناس هو لو حس انه عنده مشكلة نفسية معينة رغم انه درس الطب النفسي وقرأ عنه وعرف طريقة العلاج إلا إنه بيلجأ لطبيب نفسي آخر أو زميله عشان يساعده ! فطالما انك غير قادر على التركيز فى موضوع معين فلا تتردد فى زيارة عيادة متخصصة إن كنت جاد في رغبتك لان لو كان فى مشكلة حقيقية فلن تتمكن من علاج نفسك بنفسك من بعض النصائح البسيطة اللى ممكن نقدمها لك .

أسمعى الشعراوي مفيش أمتع ولا أدق من كده شرحة تحفة والله العظيم ف كل حرف هتقرأيه هتحسي بأعجاز ودقه غير عادية ومش هتزهقي منه خالص وبالعكس احيانا هيضحكك ... وممكن تسمعي معاه د.أحمد عبد المنعم بردو لانه بيربط جدا بين تفسير القرآن وتطبيقه وأثره على حياتك وتهذيب نفسك

مشكلة كبيرة ومدمرة لحياة صاحبها ومؤذية جدا لمن حوله فهي مش مشكلة تافهة او متدخلش الدماغ يعني.. •١ اول واهم حاجة هى الدعاء بالحاح على قد ما الموضوع مبوظ حياتك على قد ما تلح ف الدعاء والافضل تخصص يوميا وقت محدد للدعاء وليكن الساعه ٣ الفجر وممكن تدخل البلكونه وتبص للسما وانت بتدعى بيكون أفضل كتير واعمل منبه لده •٢تأمل (أو ما يسمى بالميديتيشن) افضل وقت الصبح بدري عند الشروق شوف الشجر والسماء والشمس الهادية واتنفس بعمق واسمع العصافير ده بيخلى نفسيتك ف مكان تاني خااااالص لانه بيفرز واحد من هرمونات السعادة "السيروتونين" (انصح بمشاهدة حلقة السعادة للدكتور كريم علي) واقرأ التعليقات بعد م تخلصه هتلاقى تلخيص للفيديو بحيث متنساش اللى سمعته •٣ أبعد عن القعدات او المواضيع او الاشخاص اللي عارف إنها بتعصبك بقدر المستطاع •٤ ألزم وصايا النبي صلى الله عليه وسلم عند الغضب :- خليك عارف إن الصبر بالتصبر والحلم بالتحلم (يعني مَثِّل إنك هادي ومش بتتعصب لحد م تبقى فعلا كده ) وأعرف كمان إن الصفتين دول بيحبهم الله "الحلم والإناة" وإن اللى بيُحرم الرفق بيحرم الخير كله فحاول متغضبش من الأول لان ده اسهل من إنك تغضب وبعدين تكتم غيظك ثانيا عند الغضب استعذ بالله من الشيطان الرجيم واذكر الله كثيرا وامسك لسانك واسكت حتى لو هتحط ايدك ع بؤك وتساعد نفسك انك متتكلمش بالطريقة دي اعملها توضأ عند الغضب ودي نقطة مهمة جدا لو كنت واقف اقعد ولو لسه غضبان استلقي (نام) •٥ سيب المكان كله واخرج خالص منه • ٦حاول تخلى لنفسك رياضة معينة فيها مجهود بدني قوي وليكن البوكسينج تخرج طاقتك فيه او الجيم والعبه على فترات منتظمه ممكن يساعدك شوية •٧ لو فى مشكلة معينة مسببالك ضغط تخلص منها بقدر المستطاع ممكن تكون فى مشكلة ضاغطاك بقالها سنين تكون هى السبب الرئيسي فلو معرفتش تتخلص منها حاول تلاقى طرق تخليك تتعامل معاها بشكل افضل •٨ كلم نفسك بشكل ايجابي عند الغضب يعنى قول لنفسك "اهدى اهدى متتعصبش امسك لسانك وده اختبار ولازم اسيطر علي نفسي وهكذا " •٩ انصحك بمشاهدة سلسلة " وعي حلقة الغضب " واقرأ واسمع كتير عن الغضب والسيطرة عليه وفضل الهدوء وكظم الغيظ •١٠ درب نفسك ع الصبر بوجه عام ده بيساعد فى التحكم ف النفس وعلى سيرة الصبر لازم تعرف ان دي رحلة طويلة ممكن تاخد منك سنين حتى فلازم تصبر على نفسك وع النتايج وخد قرار بعدم التراجع •١١ ممكن تعمل لنفسك تحدي يومي واسبوعي وشهرى انك لو غضبت خلال الفترة دي هتصدق بمقدار كذا (حدد مبلغ من البداية مش ع حسب الحالة المادية وقتها🙂) يعنى لو اتعصبت شوية صغيرين هتصدق مثلا ب٥ج لو شتمت هتصدق ب١٠ج لو بهدلت الدنيا خالص هتصدق مثلا ب٢٠ج في الاول خليها يومي وبعد م تبقى احسن خليها اسبوعي يعنى تحاسب نفسك ع مدار الاسبوع والصدقه تطلع اخر الاسبوع ع بعضها حسب عدد المرات هتتضاعف وبعد م تبقى احسن خالص خليها شهريا ...واعمل لنفسك مكافأة يعنى فلوسك مش هتشترى بيها حاجة بتحبها الا بحساب يعنى لو نجحت ف التحدي هتاخد مثلا ١٠ج وتشيلها ع جنب وتحوشها لحد م توصل للمبلغ اللى محتاجه عشان تشترى بيها حاجة بتحبها لكن هتبطل تشترى عمال ع بطال زى الاول يعنى بمجرد م تحتاج الحاجة يعني وبالعكس بالنسبة للعقاب يطلع ع هيئة صدقات ، الفلوس بتربي شوية خصوصا لما تبقى شقيان بيها وتلاقى نفسك بتدفع مبلغ وقدره أظن لسانك هيسكت من الصدمة :) ... لو ف حالة انك مش بتاخد فلوس خالص سواء من اهلك او مش بتشتغل (مش بخل ها😁) خليها ركعتين وعدد كذا من الاستغفار مثلا الف مرة لو اتعصبت ، والمكافأة مثلا ماتش كورة او اى حاجة بتحبها •١٢ ممكن تستعين بطبيب نفسي يساعدك شوية حتي لو بأدوية لحد ما تجتاز المشكلة دي واظن انه افضل م تفضل كده بس طبعا ده بجانب كل اللى قولناه فوق ربنا يصلح لك نفسك ويعينك عليها وإيانا

انت بتعانى من الوسواس القهري بمعنى ان فكرة بتيجى ف دماغك ومش بترضى تسيبك الا لما تنفذها وليه صور كتير منها الوسوسة ف العقيدة زى م قولت وربنا يعافينا واياكم ومنها الوسوسة فى الوضوء والصلاة زي ما قولت بردو وفي انواع تانية غيرهم .. المهم ان الوسواس خصوصا فى الوضوء والصلاة ناس كتير اوى بتعانى منه ولكن ليه حلول إن شاء الله .. فأولا أفضل طريقة لعلاج الافكار دي هي إنك تحقرها وتعمل حاجة عكسها يعنى لما الفكرة تيجي ف دماغك تقولك اثناء الوضوء مثلا انت نسيت تغسل شعرك تقول لنفسك انا عايزه مش مغسول وبالعند كمان مش هغسله ولا هعيده تانى🙂 ولما الفكرة تبدأ تيجى ف الاول خالص قولها "اقفي انا مش هسمع كلامك" لازم تكلم افكارك بالطريقة دي ومتنفذش اللى بتقوله افكارك .. من الحاجات الكويسة بردو فى الوضوء هات براد الشاي مثلا واملاه ميه واتوضى بيه احسن من الحنفية واول م تغسل ايدك قول بصوت انا غسلت ايدي وعند المضمضة قول انا كده مضمضت وهكذا ..فكرة البراد عشان تقول لنفسك ان الميه قليله ومفيش غيرها هتوضى بيها ومش هملاه تانى وهتحاول تحافظ ع شوية المية فمش هتعيد الوضوء تانى ...ثانيا حاول تقرأ او تسمع فى الفقه واعرف ايه الواجب من المستحب بحيث تسهل جدا ع نفسك وتاخد بالواجب فقط لحد م تقدر ع السنن والمستحب لما الوسواس يخف وفى قاعده بتقول ان الشك مش بيغلب اليقين بمعنى لو شكيت ف صلاتك كملها وان شاء الله صحيحه لو شكيت فى وضوءك كمله وإن شاء الله صحيح طالما مش متأكد١٠٠٪ يبقى تكمل الحاجة مش تعيدها وبإذن الله صحيحة وحاجة كمان إنك طالما خلصت الحاجة متعيدهاش يعنى مش بعد م تخلص صلاة تفضل تشك انا نسيت كذا ونسيت كذا ..لو نسيت اثناء الصلاة صلى السهو عادى وانصحك جدا جدا جدا بسماع شرح كتاب الفقه الميسر للشيخ علاء حامد وحتى لو مش عايز تسمع الدورة كلها نقى ما يتعلق بمشكلتك لكن الدورة كلها خطيرة وبتريح الواحد جدا فى الامور اللى زى دي .... ثالثا لو روحت لطبيب نفسي هيساعدك بإذن الله كثير فى تخطى ده وتعمل اللى قولناه فوق..ولو صعب ففى دوا اسمه "بروزاك " حبة واحده يوميا بعد الاكل لمدة شهر وبعدين حبيتين يوميا لمدة شهرين وبعدين نرجع لحبة واحده يوميا لمدة ٦ شهور وبعدين حبة واحدة يوم أه ويوم لأ لمدة شهر كمان وبعدين توقف ..هو كورس العلاج بتاعه لازم يبقى بالتدريج كده سواء فى البداية او فى النهاية مينفعش تاخده فجأة او توقفه فجأة وبردو انصحك بالطبيب النفسي هيساعدك بطرق عمليه اكتر بإذن الله.. اخيرا كل تعبك ده هتاخد أجر عليه بإذن الله واحتسب ده عند ربنا عشان كمان الشيطان ميدخلكش من باب إن العذاب اللى انا فيه ده مش قادر عليه وهبطل صلاة خالص زى م حصل معاك ، رمضان فرصة حلوة للالتزام وربنا يشفيك ويعافيك ويأجرك

هو ده مش وسواس قهري الوسواس حاجة تانية مختلفة ... ده تردد وعدم القدرة ع اتخاذ القرارات .. خلى القرارات فى حاجات صغيرة اكتر من الشراء وكبريها شوية شوية ..وممكن تتفرجي ع فيديوهات خاصة بالمشكلة دي وتفهمي سببها وحلولها

https://www.facebook.com/groups/346333732064627/?ref=share&mibextid=NSMWBT https://www.facebook.com/share/39m5ZQ311qY1CNsZ/?mibextid=qi2Omg دي صفحات وجروبات اتفرجي ع الفيديوهات اكتر لانها بتعلم وممكن تكتبى ع اليوتيوب تعليم الخط الديواني للمبتدئين وتبحثي انتى بنفسك والقناة اللى ترتاحيلها تابعيها وع فكرة الاونلاين بيعلم جدا جدا مش ضروري كورس طالما كده

أولا لازم تعرف عموما فقة اليوم والليلة يعنى ايه أقل القليل اللى مطلوب منك بحيث تكون اديت حق اليوم ده عليك بأقل القليل! .. لازم يكون فى توازن مينفعش تخلى حاجة واحده تاخد اليوم كله على حساب باقى الحاجات وكل واحد حسب استطاعته بردو .. يعنى على سبيل المثال هقولك خطة كويسة ممكن تمشي عليها ١ الصلاة على وقتها .. ٢ السنن زى ١ سنة الفجر .. ٢ صلى الضحى( لان فى كل سلامى_ كل عظمة فى ايدك ورجلك _ عليهم صدقة وصلاة الضحى مجزئة عن جميع الصدقات المطلوبه منك على سلامياتك فكده تكون اديت حق الله وشكره على نعمه وفضله ) كأنك بتاخد نفسك من زحمة الدنيا وسط المدرسة او الكلية او الشغل وبتقول يارب انا الدنيا مشغلتنيش عن ذكرك ...٣ ورد القرآن وليكن صفحة فى اليوم مع قراءة تفسيرها يبقى كويس جدا وابقى كتر على قدر استطاعتك ووقتك وحط فى بالك القليل الدائم أفضل من الكثير ومتقطع اللي مش قادر عليه ..٤ ركعة الوتر والافضل تكون قبل النوم ولو خوفت تنسى او تكسل فممكن بعد العشاء..٥ أذكار الصباح والمساء ٣ القراءة العامة والخاصة .. ** القراءة العامة تكون عن ٣ حاجات تقرأ او تسمع حاجة عن الله وحاجة متعلقة بنفسك وحاجة متعلقة بالاخرين ..عن الله يعنى ممكن تقرأ حاجات عن صفات الله مثلا او اي حاجة عن علاقتك بالله .. وحاجة عن نفسك مثلا مهارة معينة عندك ممكن تقرأ عنها ازاى تنميها او تشوف مثلا صفة معينة عندك ولتكن الكسل حتى وتقرا ازاى تتخلص منه مثلا او اى حاجة ليها علاقة بيك ..وحاجة عن الناس زى مثلا ازاى تتصرف مع شخص غضبان وتهدأه او تقرا عن بر الوالدين وهكذا وده كل ده يكون فى حدود ربع او نص ساعه ايام الانشغال ٥ او ١٠ دقائق عن كل واحدة ف ال٣ حاجات كفاية (يعنى متقعدش اليوم كله بتقرأ عن دول وتسيب الباقى خلى بالك كويس جدا من النقطة دي لانها بتكون وسيلة من وسائل الهروب من المذاكرة او الشغل المطلوب على فكرة ) ** القراءة الخاصة وهى دي المذاكرة او شغلك او المجال اللى تم استخلافك فيه (انت اتخلقت عشان تعبد الله وتعمر الأرض وتعمير الأرض فى عمرك ده بيكون بمذاكرتك وبعدين شغلك إن شاء الله ) والمذاكرة او الشغل هى اللى المفروض النصيب الأكبر من وقت اليوم فيها ٤ الرياضة (لانك بتأدي حق جسمك عليك ) واضعف الايمان تكون ٥ دقائق بس جرى او تنطيط فى المكان او لو يوم صعب جدا جدا وهلكان فيه ومش قادر تمشي ارفع رجلك لفوق ونام على ظهرك لان الوضع ده بيحمي من دوالى الرجل خصوصا للنساء وكأنك بتقول لجسمك أنا مش ناسيك مهما كنت تعبان ده فى حالة الجيم او لعب الكورة او أى رياضة حقيقية هتكون صعبة عليك.. ٥ الترويح عن النفس بس بشرط الترويح ميكونش بيهدم اللى بنبنيه بمعنى متروحش مع شلة صحاب وحشين وتقعد معاهم وتاخد ذنوب وتقول انا برفه عن نفسي ! يعنى نقى أي حاجة فيها ترفيه ونفس الوقت أقل ضررا كل النقط اللى فاتت المفروض متاخدش في يومك كله ٣ او ٤ ساعات والباقى يكون فى القراءة الخاصة( المذاكرة او الشغل ) والنوم والأكل والحاجات الاساسية .. ثانيا بقى نظم اللى قولته فى دماغك او جدول براحتك ..واعمل جدول للمذاكرة وليكن جدول من دلوقتي لحد رمضان تلم فيه جزء كويس من المتراكم وجدول تانى من اول رمضان لاخره تلم فيه الجزء الباقي وتراجع وخليك عارف المنهج هيتلم بالاجبار تجبر نفسك على ده وتحارب رغبتك انك مش عايز تذاكر بس تقعد على الكتاب وتتمشى شوية وتقعد شوية وتغير مكانك شوية المهم تتصرف بحيث انك تذاااكر وده أجره عظيييم ده اسمه جهاد ومن أعظم انواع الجهاد هو جهاد النفس واعرف ان المذاكرة وطلب العلم طريق من طرق الجنة** "من سلك طريقاً يطلب فيه علماً سلك الله به طريقاً من طرق الجنة، وإن الملائكة لتضع أجنحتها لطالب العلم رضاً بما يصنع، وإن العالم ليستغفر له من في السموات ومن في الأرض، والحيتان في جوف الماء، وإن فضل العالم على العابد كفضل القمر ليلة البدر على سائر الكواكب، وإن العلماء ورثة الأنبياء، وإن الأنبياء لم يورثوا ديناراً ولا درهماً إنما ورثوا العلم، فمن أخذه أخذ بحظ وافر"** فدى عبادة عظيمة وخصوصا لما تجاهد نفسك ورغبتك وتعبك وتكمل مذاكرة رغم كل ده وتنفع بعلمك ده نفسك والناس .. استعن بالله وربنا يوفقك وينفع بيك يارب

أكتر حاجة تقرب الإنسان لله هي الصلاة والدعاء والاستغفار .. صلي الفروض على وقتها (أحب الأعمال إلى الله الصلاة على وقتها) ولكن الفرق بقى إنك تصلي براحة وببطء وتأني أكتر وفى مكان هادئ وحاولى تفضي نفسك ف وقت الصلاة بحيث متفكريش ف حاجة واقفلى ع نفسك الأوضة وصلى بصوت تسمعيه انتى ..ثم النوافل النوافل النوافل لو صليتيها بنفس الطريقة اللى فوق خلال يومين ولا حاجة هتحسي براحة فى قلبك وسلام نفسي ملحوظ وهتحسي إنك صدرك منشرح وهادية وبتعاملى كل اللى حواليكي بلطف وصبر أكتر ، مرة اختى قالتلي عارفة يا رنا أنا سمعت فى الإذاعة حديث أنا عارفاه من زمان بس مكنش بيلفت نظرى أوي إلا المرادي لما تأملته... "من عادى لي وليا فقد آذنته بالحرب ، وما تقرب إلي عبدي بشيء أحب إلي مما افترضت عليه ، وما يزال عبدي يتقرب إلي بالنوافل حتى أحبه ، فإذا أحببته كنت سمعه الذي يسمع به ، وبصره الذي يبصر به ، ويده التي يبطش بها ، ورجله التي يمشي بها ، وإن سألني لأعطينه ، ولئن استعاذني لأعيذنه"... يعنى اولياء الله لو حد آذاهم ربنا هيحاربهم وهينجي أولياءه منهم... طب مين الاولياء دول ؟ "ألا إن أولياء الله لا خوف عليهم ولا هم يحزنون * الذين آمنوا وكانوا يتقون" ربنا وصفهم بصفتين الإيمان والتقوى ... طب ازاى الإنسان يتقرب لله ؟ أول حاجة بالفرائض زى الحديث م قال عشان كده قولتلك الفروض ال٥ أولا وبعد كده النوافل طب ولو عملت كده؟ ربنا هيحبك ولو حبك هيكون معاكي ف أدق تفاصيلك ..اي حاجة هتسمعيها هتلاقى نفسك بتتقى الله فيها وبتفكرى هل اللى بسمعه ده هيرضي الله؟ هل اللى بشوفه يحبه ربنا؟ هل اللى بتعمله إيدي واللى رجلى بتمشي إليه حاجة لله؟ ومش بس كده لو حبك دعائك هيكون مستجاب ولما تخافى هيطمنك ويثبت قلبك ! قد إيه الحديث ده جميييل ياااه لو الإنسان يكون بالشكل ده! هيبقى إيه اللى ناقصه فى الدنيا أصلا! ..... تاني حاجة هي الدعاء " اكتر حاجة بتخلي عندك يقين وثقة فى الله مهما كانت الإسباب حواليكي بتقولك مستحيل! أكتر حاجة تبعد عنك اليأس فى أي حاجة ف حياتك ! عارفة يعنى لما تفضفضي وتشكي وكل اللى فى قلبك تقوليه لحد بترتاحي صح؟ طب تخيلى إن الحد ده سامعك ومهتم لأمرك فى كل وقت حرفيا ومش بس كده ده كمان بينزلك فى اكتر وقت الاحزان بتتجمع فيه وهو بالليل والناس نايمة و كل لما تشتكى أكتر كل لما يساعدك اكتر ويحققلك اللى إنتي عايزاه معقول نسيبه ونتلهى فى حاجة تانية ! _ ولله المثل الأعلى _ " ينزل الله إلى السماء الدنيا كل ليلة حين يمضي ثلث الليل الأول، فيقول: أنا الملك، أنا الملك، من ذا الذي يدعوني فأستجيب له، من ذا الذي يسألني فأعطيه، من ذا الذي يستغفرني فأغفر له. فلا يزال كذلك حتى يضيء الفجر" ... أما الأستغفار معجزة من معجزات الدنيا، كثرة الاستغفار عبارة عن باب من الفتوحات والأرزاق وتفريج الكروب بشكل مذهل إنتي نفسك مش هتصدقيه ! مشاكل بتبقى معقدة بقالها سنيين وبتتحل فجأة بطريقة عمرك ما فكرتى فيها اصلا رغم إنك فكرتى ف ألف مخرج! سحر بجد سحر .. "فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاءَ عَلَيْكُمْ مِدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا" كل ده من الاستغفار بس! ... لو عملتى ال٣ حاجات دي روحك هترقى لمكان تانى خالص هتتخلصي من كل حاجة نفسية كانت مضايقاكى بشكل فوري وهتحسي بإنشراح وسكينة وتقبل للناس وحسن معاملة ليهم فجأة بعد م كنتى مش بتستحملى كلمة من حد ! وجربي واحكمي ولو لقيتى إني بأڤور ف كلامي تعالي وقوليلى إني كدابة😅 .. شكرا لسؤالك لانه خلانى أقول الكلام ده وأفكر بيه نفسي قبل أى حد ...يارب يارب يارب ربنا يحبك ويحبني ويجعلك وايانا ممن يسمعون القول فيتبعون أحسنه 🤲

بالنسبة للصلاة والصيام وقضاءهم ..الصلاة : لو طهرتي قبل خروج وقت الصلاة لازم تصلي الصلاة دي واللى قبلها لو ينفع تتجمع يعنى لو طهرتي قبل المغرب يبقى عليكي العصر وكمان الضهر لازم يتصلوا ..ولو طهرتي قبل الفجر يبقى عليكي صلاة العشاء وكمان المغرب ولو طهرتي قبل شروق الشمس يبقى عليكي الفجر فقط ..ولو طهرتي بعد الشروق وقبل الضهر يعنى فمش عليكي صلاة فاتت وصلى الضهر لما يأذن عادي وكل الصلوات وقت الحيض نفسه مش بتعوضيها .. أما صيام رمضان فبتفطرى رمضان فى ايام الحيض ولكن بتحسبي كام يوم ولازم تعوضيهم بعد رمضان والله أعلم

كثرة الحل والمراجعة للدروس وللحل بردو يعنى الفكرة مش إنك تحل كتب كتير قد م الفكرة إنك تراجع الدروس وتحل المصادر المهمة للحل وليكن جميع مذكرات المدرس+ ملخص الامتحان مثلا او اللي عندك + جميع الامتحانات السابقة اللى تقدر توصلها دور أول وثاني لو عملت كده هتبقى فعلا "بارع" ... السر ف الحل والمراجعة مش انك تجيب اصعب مصدر وتفضل تضيع وقتك فيه ومتحلش إلا هو ! انا فاكرة كان ع ايامي في كتاب طلع جديد وقتها اسمه الوسام جبته ف الفيزيا وكان صعب بشكل يعقد وافضل سهرانه احل فيه وازعل ع نفسي انى قد ايه مستوايا ضعيف ومش عارفة احل الا بطلوع الروح😂 فروحت ركنته واخدت قرار انى مش هفتحه تانى وهركز ع كل المذكرات اللى عندي وكتاب المدرسة ودليل التقويم وكتاب الامتحان عشان كنت برتاحله واسئلة السنين السابقة وكنت بجيب امتحانات من ١٩٩٥ وحاجات كده 😅 فالفكرة ف الحل والمراجعة (تراجع الدرس من اوله لاخره وتقفل الكتاب وتسمع ع نفسك شفوي كل حاجة نظرى ولو معادلات يبقى طبعا كتابة وكذلك المسائل والقوانين والكلمات لو لغة تانيه ده بالكتابة والباقى الافضل يبقى شفوي بصوت تسمعه عشان تنجز ) وتراجع المسائل والاسئلة وتحلها من أول وجديد من نفس المصادر اللى قولناها فوق حتى لو خلصتها لازم تراجعها تاني حتى لو السؤال اتكرر ١٠٠ مرة +المعادلات بتاعت الكمياء انا كنت براجعها كلها من اولها لاخرها كل اسبوع وده لان المدرس بتاعي كان بيعمل امتحان كل حصة فيه كام سؤال نظرى عشان يضمن اننا ذاكرناه والباقي كل المعادلات من اول المنهج لحد م وصلنا.. لحد م جيت اخر السنة المعادلات دي كانت اسهل حاجة بالنسبالى وحفظتها بالحرف والنقطة... حاول متحلش حاجة ملهاش اجابة الا لما تحس انك متمكن واى حاجة لو حسيت انك شاكك فيها ولو شك بسيط جمع الاسئلة ع بعض وعلم عليها ولما تروح الدرس اسأل المدرس عليهم ولو هو مشغول او الاسئلة كتير قسمها عليه وع العيال الشاطرة اللى معاك ف الدروس اسألهم.. انا كنت بعمل كده ولانى كنت شاطرة بردو كان فى ناس كتير معرفهاش حتي بتيجى وتسألنى وكنت بجاوبها وباخد خبرة بردو والحمدلله الكيميا والفيزيا فل مارك وجبت ٩٩ ٪ 😁

ممكن تكوني شخصية حابة تعمل كذا حاجة ف نفس الوقت وابقى كويسة ف كذا وكذا وكذا وكلها مجالات ملهاش علاقة ببعض بس بترضي جواكي فكرة إن دي حياتي المتوازنه اللى حاسة اني هكون سعيدة وليا قيمة كده فبتيجي عليكي فترة تحبي فيها مثلا التدريس وبالفعل تبدأى ف الموضوع وف نص الطريق تجيلك فكرة تانيه إنك عاوزة تتعلمي الخياطة وبالفعل تاخدي كورس مثلا وتبدأى وف النص فكرة تالته وتتبعيها وهكذا ولما نبص ع الواقع هنلاقيكي اخدتي حته من كل مجال ومقدرتيش تتقنى ولا واحد بالشكل اللى يرضيكي لانك بتعمليهم مع بعض وخطوات كبيرة ومتقطعة مش بتستمر فممكن تحسي بزعل انى مش مميزة ف ولا مجال ومش قادرة احقق ف حاجة معينة من التقدم اللى انا عايزاه وبتتغلبى ع حزنك ده بعد فترة بفكرة جديدة واهتمام جديد وهكذا ! .. قد يكون ده جزء من "وهم الكمال" اللي مصاحبه الطموح عادي فلو انتى شايفة انك كده قوليلى عشان اكمل

نسبة الحمل دي عرفتيها ازاي هل سبق لكي الزواج وبناءا ع ده عرفتي ؟ ولا هل عندك عيب خلقى ومفيش رحم من أصله وده حالة نادرة جدا يعني !ممكن يكون رحم غير مكتمل او مشوه وده ممكن يتم فيه الحمل ولكن بصعوبة عن الطبيعي لكن يظل مش مستحيل .. النسبة بتتحدد أكتر بعد الزواج وبفحوصات كتييرة والنسبة بردو مش بتكون اكيدة .. قد يكون عندك مشكلة ولكن ممكن يتم الحمل باساليب متعددة كتير والطب تطور جدا فى المجال ده ..وما ذلك على الله بعزيز ! .. فمتأسيش ولا تفترضي أحتمالات من دلوقتي وربنا بيرزق من يشاء ، كمان تظل المصارحة أفضل عشان ميحصلش مشاكل وتعلق انتي في غنى عنه وفي النهاية كل شئ نصيب .

علاقة الأهل مختلفة شوية عن الباقي .. لان الأهل يظل ليهم حقوق علينا زى البر للوالدين وصلة الرحم زى الأخوات والاقارب .. العطاء عشان فعلا يسعدك خليه دائما من باب الإحسان بمعنى أنا بعمله عشان المقابل يبقى من عند ربنا وأخد أجر عليه واحس من جوايا انى عملت خير وده تلقائى هيسعدك ..انما فى جانب تانى بيسعد زى ان اللى قدامك يفرح او يكون ممتن ليكي وده الجانب اللى ممكن يجيلنا منه المشاكل وهو ده الجانب اللى عاوزين نغير منه شوية ...علاقتك مع اهلك تحديدا الاب والأم فمن البر انك تقدمي راحتهم ع راحتك انا عارفة انه ده صعب اوي بجد وطول الوقت محتاج مجهود جباار وضبط نفس يعني وعشان كده اجر البار بوالديه عظيم وباب من أبواب الجنة كل لما الحاجة بتكون تقيلة كل لما أجرها يكون أكبر وخليكي فاهمه ان ده فى ميزان الله سبحانه وتعالى مش في ميزان البشر ...و إن أحب الاعمال إلى الله بعد الصلاة على وقتها هو بر الوالدين وبعدهم الجهاد فى سبيل الله ! متخيلة يعنى ايه البر يتقدم ع الجهاد فى سبيل الله! تخيلى انك بتتقربي لربنا بأحب الأعمال إليه فيا ترى أجرك عند ربنا هيكون قد إيه! وخلى بالك ده مش ف الاخرة بس ده كمان ف الدنيا وسبب من اسباب تفريج الكربات ورضى ربنا وانه يبعد عنك الشقاء " وبار بوالدتي ولم يجعلنى جبارا شقيا" فلو على والديكي فحاولى تعملى الشئ فقط لإن ربنا هيحبك لو عملتيه وانسي ردود افعالهم السيئة لانى انا عاملاها لله وهم مش هيعيشوا اكتر من اللى عاشوه ومش هتفضلى متحملة ده طول عمرك فاللى باقى من عمرهم هحاول اجاهد بكل قوتى عشان اكسب رضاهم فى الدنيا ..طب لو اخواتك او اى حد من صله الرحم ؟ ف على حسب لو مش هتقدرى تشيلى من جواكي حته انى بعمل ده عشان مقابل منهم فبلاش تعمليه لو تقيل عليكي اوي لكن لو تقدرى فمتبخليش ومتخليش الشيطان يفسد عليكى الخير اللى هتعمليه بس بشرط انك تقللى سقف توقعاتك بمعنى متتوقعيش انهم هيكونوا معاكى زي ما بتتمنى وانهم هيفتكروا اللى انتى بتعمليه ويبقى كله خااالص لوجه الله ومن باب الصدقة فقط لو لقيتى نفسك تطيق ده وانه خلاص مش فارقه رد فعلهم فعلا فتوكلى ع الله واحتسبيها لله انما لو مش قادرة فبلاش احسن يجيب كره او مشاكل وقلته ف الحالة دي افضل طالما هو مش فرض عليكي .. طيب لو حد تانى غريب؟ فلا خلاص انا هشيل من ع نفسي العبئ طالما مضايقنى وهعمل باللى اقدر عليه نفسيا قبل ماديا لان العطاء ده بقى يإذيني وهعطى بالقدر المعقول مش علطول وربنا هيجازينى ع قدر تحملى ويهدى قلبي لما يحبه ويرضيني بيه

عضلة المثانة الضعيفة هل ده تشخيص من طبيب قالك عليه ولا ده توقع منك ؟ المشكلة مش واضحة كويس هل هو سبب نفسي فقط ولا نفسي وعضوي وده بيتحدد بناءا ع رد الأطباء اللي كشفوا عليكي .. لو سبب عضوي ففى تمارين اسمها "كيجل" ابحثى عنها ع النت ممكن تساعدك شوية ف المشكلة لو ضعف ف العضلات وطبعا بجانب العلاج اللى وصفه الاطباء..وهل فى مشكلة اثناء النوم انتى بتقولي من سن ٤ سنين وده يعتبر سن لسه الطفل بيتعلم فيه ومش بيقدر يسيطر ع نفسه اثناء النوم وده كله طبيعى لحد سن ٦ سنوات وده ليه ادوية او جهاز بيرن اول ما تنزل اول كام نقطة عشان تصحى تروحي الحمام ..و قللي شرب المية قبل النوم ب كذا ساعة وامنعى القهوة والكافيين عموما والحاجات المشطشطة لانه بيزود الدنيا .. وكمان ممكن تعملى تحليل ADH ممكن يكون سبب لو كنتى بتعاني من دخول الحمام كتير اوى اكتر من الطبيعي ومش بتقدرى تستحملي ممكن الهرمون ده يكون قليل وهو السبب .. السبب النفسي مهم جدا جدا ف الأمر ده وضروري الذهاب لطبيب نفسي لان المشكلة حقيقية تستدعى لكده مش رفاهية وممكن لو اهلك مش متفاهمين وخايفة منهم ورفضوا الطبيب النفسي روحي اكشفى ف مستشفى الطلبة التابعة لمدرستك او كليتك وتروحي لوحدك لو تطلب الامر ..وخليكي عارفة ان المشكلة ممكن تتحسن بالعلاج النفسي والطبي إن شاء الله وده اختبار من ربنا ليكي وهتأجري عليه لو صبرتي وأحسنتي الصبر وأخدتي بالاسباب فمتيأسيش من نفسك أبدا

فرق معايا فى الموضوع ده جملة قالها الدكتور عبد الرحمن ذاكر الهاشمي وانصحك بمتابعته "الناس ليست آلهه" خايفة من الشخص اللي قدامك ليه؟ هو مش أحسن منك ! هو زيه زيك بالظبط ! لو شوفتيه ف الشارع ولا هيكلمك ولا يقدر يعملك أي حاجة فخايفة منه ليه! متديش حد أكبر من حجمه ولا اي حاجة عموما ! مفيش إنسان احسن من التاني في أي حاجة الا "بالتقوى" وده اللي قاله الرسول عليه الصلاة والسلام فأنتي زيك زي الدكتور اللى بيمتحنك وانتى وهو عايشين تحت السماء وربنا فوقك وفوقه فمتخافيش من حد إلا ربنا سبحانه وتعالى .. لو أدركتي ده كويس هيفرق معاكي جدا جدا وعن تجربة

أخد المنومات بدون أرشاد الطبيب خطر .. وكذلك المسكنات ... مفهمتش المشكلة كويس هل المشكلة وسواس قهري ولا أرق ولا صداع ؟

لازم تعرفي السبب ف التغير ده هل هي صحبة سيئة؟ او بيئة معينة مكانتش بتشجع ع الصلاة ولا مهتمه بيها حتى ؟ .. هل فى برنامج معين متابعاه هو السبب ؟ ... لو عرفتى سبب المشكلة هيساعدك جدا ده اولا .. ثانيا بالنسبة للصلاة ركزي ع الفروض ال٥ وحطي ف عقلك لما تسمعي الاذان ان انتى مش عندك اوبشن تختارى ياترى اصلى ولا انا مكسله فمش هصلى لا تقولى لنفسك انا مضطرة اقوم اصلا لان ده فرض مش حاجة فيها يا أه يا لا ! ..ف الاول هيبقى صعب معاكى بعدين هيبقى عادة واسهل كتير من الاول .. كمان اعرفي مكانة الصلاة ف الاسلام واقرأى عنها .. يعنى دي مش مجرد عبادة ده ركن من اركان الاسلام عشان تبقى ضمن المسلمين لازم تصلى غير كده مش هتبقى ف الملة دي وابحثي واتأكدي عن حكم تارك الصلاة فانتى متخيلة عظمة الذنب! لازم تفهمى بردو ان اللى مش بيصلى بنص القرآن ليهم ٣ أوديه فى جهنم وادي سقر وده للى مش بيركعها "كل نفس بما كسبت رهينة إلا أصحاب اليمين في جنات يتساؤلون عن المجرمين ما سلككم في سقر قالوا لم نك من المصلين "! دول القرآن قال عليهم مجرمين !! وادي الغي ده للى بيقطع ف الصلاة وبيصلى منين م يحب ويقطع منين م يحب واتبع هواه يعني حسب مزاجه ! "فَخَلَفَ مِن بَعدِهِم خَلفٌ أَضاعُوا الصَّلاةَ وَاتَّبَعُوا الشَّهَواتِ فَسَوفَ يَلقَونَ غَيًّا" ووادي الويل وده للى بيأخر الصلاة عن موعدها يعنى اصلا بيصلى اه بس بيأخرها! "فَوَيلٌ لِلمُصَلّينَ الَّذينَ هُم عَن صَلاتِهِم ساهونَ" اتقال عليهم مصلين بس ف النهاية فين؟! واعرفي كمان من غير الصلاة صحيفتك لو مليانه اعماال صالحة وبر واحسان وصدقات و..و.. مش هيتبص فيها لو مش بتصلى! ..اول عمل بيتبص عليه هو الصلاة لو موجوده هيتشاف كل البر والاحسان بتاعك طب لو مش موجودة؟ خلاص الباقى ده مش هيتشاف!! .. فضياع الفروض ال٥ بالمعنى الحرفي ضياع الآخرة ! ... لما تعرفى مكانة الصلاة وأهمية الفروض ال٥ هتدي لها اهتمام كبير وهتقاومى نفسك وكسلك وشيطانك وهتخرجى من عقلك حته اصلى ولا لا مكسلة دلوقتى هصلى بعدين او هبدأ من بكرة والكلام ده ... كمان ساعدي نفسك يعنى اتكلمى بصوت عالى وانفضي عن عقلك فكرة انى مكسلة دلوقتى يعنى بصوت عالى قولى لأ انا هقوم حالا وقومى بالفعل ..كمان خليكي ع جنب ف الاوضه فارشه طول الوقت المصليه متشليهاش وحطى جنبها الاسدال وكل حاجة عشان متديش لنفسك فرصة للكسل وكل حاجه مفروشة كمان وجاهزة مش فاضل الا الوضوء! وحبذا كل لما تدخلى الحمام تتوضي بحيث تكونى على طهارة معظم اليوم فده ميكونش دافع للكسل بردو .. وطبعا ادعي ربنا وخليكى شديدة مع نفسك وصادقة ووالله ربنا هيعينك .. ربنا يقويكي ويتقبل منا ومنك🤍

المشكلة ف الخوف ..مانعك حتي من الاحساس بالحزن لما حد يموت ... بتخافى من الحزن

اكشفي طالما الحقيقة مختلط بالخيال فالوضع كده محتاج بجدية لطبيب ..روحي لدكتور نفسية وعصبية

لو والدتك حصل لها شئ اكيد هتندمي ع إنك مروحتيش تشوفيها وضميرك هيعذبك طول عمرك... قطع الأرحام ذنب كبير .. أركني الخلاف وصلي الرحم

لسه في وقت الحمدلله ومتأجليش السنة ولا حاجة الوقت كافي يعني إن شاء الله

متكلميش حد مفيش بينكم علاقة رسمية ولي أمرك عارف بيها والعلاقة كلها ف النور يعني

ارجع للطبيب النفسي قد يزود لك الجرعة أو ينصح بعلاج آخر