Fatema naggar

بسم الله وماذا يُجدي الشعور بالحب إذا لم يصل لهم ويدفيء أيامهم وينير الطريق أمامهم،تصور نفسك مكان أولادك وتخيل الطريقه التي كنت تتمني أن يعاملك بها والدك وساعتها ستري بوضوح كيف تستقطبهم وتدنيهم منك،الإبنه تستمد ثقتها بنفسها من أبوها لأنه أول رجل في حياتها وربما عانت من بعض التعنيف أو تمر بمرحله المراهقه فلو تغاضيت عن لومها لن تنشغل بك وبالتفكير في انها مظلومه وهناك مقوله "حافظ عليهم علي قيد الحياه حتي يبلغوا 25 سنه" يعني لا تنتقدهم او تعنفهم واحتضنهم وألن لهم جانبك، ولتبدأ بمشاركتهم بعض اهتماماتهم، وبعض الألعاب والمسابقات،ولا تتعجل النتيجه فالمسأله تحتاج الي صبر وطوله بال حتي تثبت لهم رغبتك الحقيقيه في إصلاح العلاقه معهم،وأخيرا أحُيي فيك أبوتك الصادقه وفقك الله لما يحب ويرضي

بسم الله ياريت يتم عرض ابنتك علي طبيب نفسي لإستبعاد أي مرض نفسي أولا الأمر الثاني ممكن يكون ده ميكانيزم دفاعي يعني بتشتت ذهنها عن ضغوط عندها فلو بتتعرض لمعامله جافه أو الدراسه بتكون عبء نفسي عليها،ففي الحاله دي يجب الوقوف علي نوع الضغوط ومحاوله علاجها والحد منها الأمر الثالث مساعدتها علي تفريغ تلك الطاقه في ممارسه الرياضه أو الكتابه أو الفنون بوجه عام والله الموفق

بسم الله شوفي احنا في حياتنا عايشين في اربع خانات تخيلي سهمين متقاطعين اول خانه علي اليمين اسمها مرحله الأداء بيكون فيها الانسان أداؤه عالي في كامل لياقته وطاقته ودي مش المفروض نقعد فيها والا بنروح لمرحله الإحتراق النفسي ودي احد الخانات الموجوده عندنا ودي مرحله يبقي فيها الإنسان طاقته وينخفض اداؤه أو ينعدم واضح انك ضغطتي علي نفسك جامد ومحتاجه تتعاملي معاها برفق وتراحم ساعتها هاتدخلي مرحله التشافي وتبدءي استردي طاقتك بهدوء فنصيحتي لكي اعملي توازن في حياتك وانتي بديتي بالجانب الروحي وغيري طاقه جسمك بالحركه ولو بسيطه وغذي عقلك بأفكار إيجابيه فيها حسن ظن بالله عز وجل ونفسيا عبري عن مشاعرك اول باول بنيه التخلص من أثرها والشفاء منها ارضي من نفسك بالقليل واشكريها عليه تمنحك ما تستطيعه وربنا معاكي

عزيزتي كل الي بيحصلك من أعراض جسديه ونفسيه ممكن يكون متوافق مع طبيعه الشخصيه الحساسه ودي شخصيه بتمثل من 15الي 20% من البشر ربنا خلقهم بطبيعه مختلفه عن غيرهم وهي حساسيه جهازهم العصبي بتكون خمس اضعاف غيرهم من الشخصيات الي غير حساسه وبيزيد الموضوع مع ذكاءك ونقاءك وحبك الخير والجمال للغير واستنكارك وعدم قدرتك علي فهم ليه ممكن بني آدم يأذي بني آدم زيه ويعنفه ويقسو عليه دي نقطه مهمه جدا لأن أي أذي بيحصل لك بيكون مضروب في خمسه فيعلم فيكي جامد ويخليكي غرقانه باستمرار في مشاعرك ومش قادره تتجاوزيها وبيكون جزء كبير من الحل في إحتواء الام بالذات والاب أو المسؤلين عنك والموقف زي ما فهمته من روايتك أن والدك مسافر وساب الحِمل والمسؤليه علي والدتك وفي رقبتها أربع صبيان تربيتهم بتكون في منتهي الصعوبه لأن طبيعه الولد بتكون أكثر عنفا ورغبه في السيطره وإثبات الذات عن طبيعه البنات الي غالبا بتتمتع بالهدوء والمسؤليه فوالدتك ماكانش عندها القدره علي المعامله اللطيفه والإحتواء الازم لشخصيتك الجميله في ظل انها لازم تكون حازمه وجامده طول الوقت وهي أكيد خايفه ومحتاجه والدك يدعمها في مسيره التربيه فكان الخال محل الوالد وكان ممكن يكون خال حنين وداعم ولكن للأسف خد صلاحيات من والدك ووالدتك خلته يسيطر علي حياتكم ويتعامل من مكان الخاءف علي مصلحتكم وجودك كبنت وحيده وسط المجتمع الذكوري المتسلط ده -وفي غياب إحتواء والدتك الي كان ممكن تتخذك صديقه وحبيبه لها وتتمتع بحنيتك ودعمك العاطفي ليها -فانتي مصدر تهديد كأنثى لازم يدفنوا معالم أنوثتها بأي طريقه ويجعلوها خاضعه وتحت التهديد دائما وكل ده منافي للعقل والدين ومتوافق مع العقليه الجامده المغلقه الي عايزه تكسر البنت عشان يسهل التحكم فيها دلوقتي حاله الفراغ العاطفي والتدمير المعنوي أدي بيكي لنتف رموشك وهدم نفسك بنفسك وكان سفرك مع والدك حل مثالي ليكي للخروج من البيئه الي مش بيتدعمك دلوقتي ارجو ١-إنك تفرغي مشاعرك في ورق ابيض وتقطعيه اكتبي جوابات لكل شخص أذاكي واكتبي الي انتي عاوزاه وقطعي الجواب أو إحرقيه ٢-تواصلي دائما مع والدك مش لازم تشتكي له ولكن احكي له احداث يومك اشركيه في احوالك النفسيه خدي رأيه في أي حاجه ولو تافهه دخلي والدك في حياتك بكل تفاصيلها وعلي قد ما تقدري ٣-النجاح والمذاكره هديتك انتي لنفسك مش لأي حد تاني إنتي تستحقي النجاح ومجتمعك بحاجه إليكي ولطبيعتك الإنسانيه النادره ٤-كل ما تيجي تنتفي رموشك اعملي حاجه تانيه بتحبيها قومي اتمشي في الاوضه ارسمي لوني اكتبي ٥-استخدمي خيالك الواسع في رسم اجمل صوره لكي ولمستقبلك اتخيلي انك بتحققي نفسك وبتستقلي وبتقدري تقفي علي رجليكي وانك مش محتاجه لحد تاني غير نفسك اتخيلي النجاح وخطواتك وشكلك ووضعك لما تشتغلي وتقبضي اول مرتب مش هااقدر ااقولك سامحي واغفري الي أذوكي ولكن حاولي تحطي نفسك مكان والدتك ربما ده يريحك شويه من ناحيتها ربنا يوفقك ويسعدك

عزيزتي بنتك عندها غضب عارم متحوش جواها وطريقه تعبيرها عنه مش متلاءمه مع سنها فهل في شيء ضاغط عليها لدرجه انها بتدمر اي شيء في حاله غضبها لأن لو الوضع المادي غير مستقر ممكن تشتغل ويكون عندها دخل ولو حتي عن طريق النت ، أرجو انك تصبري عليها وماتحرميهاش من عطفك وحنانك ودعاءك وافتحي الباب قدامها للصلح وماتحوليش تعاتبيها ولكن اغفري لها الي حصل وفي نفس الوقت تكلمي معاها لتعرفي بالضبط ايه المشكله عندها ،في احتياج عندها غير الفلوس بتعبر عنه بصراخ وغضب ، وفي نفس الوقت ياريت يكون في تحليل لهرمون الغده الدرقيه ونسبه السكر في الدم لان زياده الاول وانخفاض الثاني بيعمل عصبيه واحتداد في السلوك ، احيانا بيكون في اختلاف في وجهات النظر تصرف بيعتبره الامهات حكمه وتعتبره البنات ضعف فلو اتكلمتي معاها ووضحتي لها وجهه نظرك هايكون افضل لعلاقتكم ، الموضوع محتاج صبر عليها ومحاوله لتفهم ماوراء ثورتها ، وربنا يوفقك ويهديها ويلهمك الصواب

عزيزتي هجره اتعودتي دائما من نفسك القوه والانفتاح علي الحياه ووزعتي علي الي حواليكي من طاقتك وقوتك والبطارية في النهايه ممكن تفضي زي ما حاصل دلوقتي معاكي خاصه انك حرقتي بنزين كتير في علاقات استهلكتك تماما فحاليا عندك (burn out) أو أحتراق نفسي اول اعراضه فقدان الطاقه والشغف وانتي مش متعوده علي الحاجتين فأول حاجه ستوب واهدي وتقبلي الحاله الي بتمري بيها هي مسأله وقت تمتنعي فيه عن اي شيء سلبي يمتص طاقتك وحاولي تلجأ لله بالصلاه وتمارسي رياضه زي اليوجا والتأمل وإن شاء الله تعدي علي خير وتكملي طريق نجاحك مره أخري

عندك حق تحسي بالألم النفسي والمعاناه لأن الصوره الي إنتي بتعيشيها صوره شخص مرفوض من الي حواليه وده إحساس مرير خصوصا في مرحلتك وانتي في الجامعه، بس ممكن الصوره ماتكونش قاتمه بالشكل الي انتي متصوراه والخلافات موجوده بصوره مستمره بين الناس حتي داخل البيت الواحد لذلك باطلب منك ماتخديش الأمور بمحمل شخصي وتدي الموضوع اكبر من حجمه اعتبريها تجربه هاتقويك وتعلمك ونقي واحده او اتنين من البنات الي تتوسمي فيهم خير وابدأي كلميهم واتعاملي معاهم بطريقه طبيعيه وماتحكميش علي نفسك الحكم القاسي ده بالوحده الحياه أخذ وعطاء فحاولي تبصي للموضوع من زوايه مختلفه أوسع من الركن الضيق الي واقفه فيه لوحدك وجربي مره واتنين وعشره وربنا هاييسر لكي صديقه تفهمك وقيمها في الحياه تشبهك وافتكري ان علاقه واحده سليمه وصحيه ومتوازنه هاترجع لك ثقتك وتوازنك في حياتك ان شاء الله ربنا يوفقك ويشرح صدرك

ابنتي الحبيبه أنا سمعتك كويس وحاسه بألمك ومعاناتك وصوت زعلك بيرن في وداني بس سمعت حاجه تانيه غير المعاناه واللخبطه الي انتي حاساه بيهم ،حسيت إني قدام بنت قويه عندها حس عالي من العداله والقدره علي الحكم علي الأمور لأنك لما ذكرتي الصف الخامس قولتي ان السنه كانت جميله رغم عدم وجود مال، وده معناه إن عندك القدره تشوفي الجمال في أبسط الأشياء وكمان بتعرفي تتعاطفي مع أخوكي وهو متألم وبتعرض للضرب وبتقدري مجهود والدتك ووقوفها جنبك كل دي معاني جميله موجوده بداخلك بس معظم مشاكلنا بتيجي ان فيه مشاعر كتير سلبيه بتعدي علينا وبتدخل جوانا وتتراكم وتتخزن في مكان ضلمه وتتعبنا وتؤذينا فاطلب منك ياصغيرتي كل يوم تدوني وتكتبي في نوته أو كراسه ١- الشعور الي انتي حاساه تجاه الشخص الي انتي زعلانه منه وليكن أبوكي ٢-تفتكري ياتري هو عنده او بيحس تجاهك بإيه ،ياتري عنده مشاعر في قلبه زيك ،مشاعر تشبه مشاعرك ٣- افتكري الشعور بتاعك إنتي وحسي بيه لو له طعم هايكون إيه (حاجه مُرّه مثلا أو حاجه طعمها لاذع أو حاجه بتحرق في اللسان) إيه الطعم الي ممكن الشعور ده يخليكي حاساه بيه ٤-إيه الحاجه الي كان نفسك تكون عندك بوفره شديده علشان ماتشعريش بالشعور المؤلم ده (مثلا كان نفسي اكون قويه، متعلمه كويس، عندي دعم ،عندي ثقه،اهتمام ) ٥-مره تانيه حسي بطعم الشعور او الحاجه الحلوه الي لو توفرت عندكً ماكنتيش حسيت بالشعور المؤلم الي حسيت بيه قبل كده (طعم جميل، طعم زي العسل او السكر مثلا)حسي وعيشي الشعور باستفاضة وخليه يغمرك اتعودي كل يوم تكتبي مشاعرك بالطريقه دي لأن التعبير عن المشاعر وإخراجها بيخلي في قلبك امل وبتبتدي تدوري علي حلول لمشاكلك أهدي لوالدتك قوتك ورغبتك في تعويضها عن كل الي مر عليها ولو حتي بحنيتك عليها وتقديرها وربنا يوفقك ويسعدك

في حاجه اسمها النبؤه ذاتيه التحقيق يعني اعتقاد معين خاطيء تسعين لتحقيقه بشكل مباشر أو غير مباشر ،زي كلمه( فقريه) وكلمه (نحس) خلاص انتي بتمشي في تراك انك تثبتي وتحققي المعاني السيئه دي في حياتك فأرجو أنك تضعي حدود في علاقاتك بينك وبين كل من يوجه لكي كلمهُ مؤذيه تنال منك ودي تعتبر حاله دفاع عن النفس ليست مخالفه دينيه ولا صبرك عليها شيء ايجابي ارجوكي ضعي حد لهذه الكلمات ولا تسمحي لأحد بإلقائها عليكي فهي مثل التعويذه الشريره تهدم نفسيتك وتضلل مشاعرك ابدءي من جديد وابذلي المجهود الي تقدري عليه واطلبي التوفيق من ربنا وكل ماالفكره تجيلك انك مفيش حاجه بتكمل لكي يبيها تعدي ودخلي فكره تانيه وهي (وما توفيقي إلا بالله) وان عليك السعي وليس عليك ادراك النجاح ربنا يوفقك لكل خير

عارفه الفانوس السحري بيبقي حجمه صغير بس جواه مارد عظيم اول مابيطلع محدش يقدر يوقفه غير الي حك الفانوس بإيديه ،قصتك تشبه الحكايه دي وانتي صغيره كنتي هاديه وابتدي قلبك يمتليء بالغضب من تصرفات والدتك معاكي وعدم قدرتها علي ايصال حبها لكي ممكن تكون منهكه وتعبانه من ظروف الحياه فكانت بتيجي عليكي ومش بتصبر علي اي خطأ يصدر منك او تعديهولك واحنا صغيرين مش بيكون عندنا فهم لدوافع الاهل وكل حاجه بتدخل علي المشاعر علي طول وتأثر علي جهازنا العصبي وتتخزن في صوره ذكريات وصدمات مؤلمه بس لما الفانوس بيتحك في مرحله عمريه معينه بتحصل فيها تغيرات هرمونيه قويه جدا ممكن مارد الغضب يطلع ويسيطر وتعبري عن مشاعرك المكبوته بطريقه عنيفه مش كده وبس انتي عايزه تقولي انا كبرت وليا رأي وشخصيه محدش شايفني ولا مديني أمان واحترام او حب فلازم اسمعهم صوتي بالعناد وعدم الامتثال لرأيهم ومخالفتهم علي طول الخط وعشان ااقربلك الصوره اكتر تخيلي نفسك والدتك ووالدتك انتي تخيلي ان الطريقه الي مش بتحبي حد يعاملك بيها انتي اصبحتي بتعاملي بيها الناس اوصفي نفسك وانتي عنيفه وغاضبه ارسمي شكل بيعبر عنك وانتي بتعاندي تقبلي وسامحي الصوره الي شفتيها وتعاطفي معاها وبعدين هاتي كرسي قصادك وتخيلي والدتك قاعده عليه قوليلها كل الي في نفسك وبعدين قومي ااقعدي مكانها وردي كأنك هي واسمعيها وافتحي قلبك وتقبلي الي بتقوله وحاولي تتعاطفي اذا قدرتي معاها اكتبي اي حاجه بتخطر علي بالك في ورقه بيضا اي كلام حتي لو جارح نفسك تقوليه لها او لأي حد عبري بكل طاقتك وبعدين قطعي الورقه وحسبي بغضبك بينسحب وبيخلص معاها ولو استطعتي ممارسه الرياضه زي الجري مثلا او اليوجا ، والرسم والتلوين حتي لو انتي مش شاطره في الرسم عشان تخرجي انفعالاتك وتعبري عن نفسك فده هايساعدك برضه علي الورق وممكن تقطعيه بعد كده كنوع من تفريغ الغضب ايضا لو تقدري تعملي تحليل لمعرفه مستوي هرمون الغده الدرقيه لان ارتفاع الهرمون ده بيسبب العصبيه الشديده وكمان قياس معدل السكر في الدم لان انخفاض السكر وكذلك الحديد بينتج عنه العصبيه اهدأي واطمأني وحاولي تعملي الخطوات السابقه عشان فيها بعدها خطوات تانيه

واضح ياابنتي انه كان حب من طرف واحد والحقيقه انه تعلق مش حب ،انتي تعلقتي بيها وسددت عندك احتياج عاطفي وواضح انها كانت بتريحك وتفهمك اكتر من اصحابك الآخرين ولما الإنسان بيتعلق عاطفيا بيلغي الحدود مع الآخر ومش بيلاحظ اي تغير في المعامله ولو طفيف وبيغض الطرف عن حاجات صغيره بتحصل في النص لغايه مايحصل موقف كبير يبتدي يتساءل بعديه ليه عملت كدا ، بس الحقيقه ان كل حاجه لها عمر حتي العلاقات ،ومشاعرك الموجوعه هاتاخد فترتها وتعدي بإذن الله وبغض النظر عن سبب تصرفها معاكي فأرجو إنك تعالجي حكايه التعلق العاطفي لأنه ممكن يؤثر علي علاقاتك بشكل عام ،فتقبلي قضاء الله في هذه العلاقه وان ربنا صرفها عنك (وقنا واصرف عنا شر ما قضيت) لأن اكيد وجودها في حياتك كان هايضرك اكتر ما ينفعك

ممكن تسألي والدتك ووالدك مباشره ايه الي مزعلهم منك بالضبط لأن واضح ان فيه سوء تفاهم بينك وبينهم وقنوات الحوار والتواصل مقفوله فمهم جدا تفهمي ايه الي مزعلهم بالضبط وليه مفيش جو تواصل ومحبه ،كل شيء ياابنتي له سبب فتكلمي معاهم بوضوح وافهمي ليه مشاعرهم تجاهك مشحونه بالشكل ده وايه الي ممكن تعمليه عشان تصلحي العلاقه معاهم

ابنتي الحبيبه ربنا يطمن قلبك ويجبر خاطرك ويهبك من لدنه ذريه طيبه وينزل عليكي رحمته واستجابته كما رحم (عبده زكريا) عليه السلام اقطعي الشك باليقين وتوكلي علي الله وأجري تحليل دم حتي يطمئن قلبك وتذهب عنكي الحيره ،وربنا يبشرك بكل خير بإذنه وفضله

ابنتي الحبيبه الناس مختلفون عن بعضهم في السمات الشخصيه فهناك نمط اسمه(extrovert ) وهو نمط انبساطي طبيعته منفتحه يستمد طاقته وشحنه العاطفي من دوائره الاجتماعيه كالأصدقاء وهناك نمط اسمه(introvert ) يستمد طاقته وشحنه العاطفي من داخله وبالتالي يميل للإنعزال قليلا لأنه يشعر بالتوتر والصخب في وجود الحشود أو الضوضاء وهناك نمط يجمع بين الإثنين وهو (ambivert) وهو نمط ينفتح ويشحن مع الناس إلي حدما ثم ينسحب ويحب أن يخلو مع نفسه ويشعر بعدم الرغبه في الإنخراط مع الناس ثم وهكذا دواليك فما أطلبه منكي ابنتي الغاليه هو 1-أن تتعرفي علي نمط شخصيتك أولا حتي تحترمي رغبتك الداخليه وتتواءمي مع نفسك 2-تواصلي بهدوء مع أفكارك ومشاعرك وأفرغيها بأي طريقه وأي أسلوب علي ورقه بيضاء حتي تهدأي وتستطيعين التفكير بصفاء أكثر 3-والآن أنتي تخشين تقبل صداقات جديده حتي لا تتوجعين كما توجعتي في الماضي من علاقات سببت لكي الألم والمعاناه ولكن تأكدي أن نضج الشخصيه يحدث عن طريق الألم وليس الراحه والسهوله فانظري لما سبق من تجارب علي انها خبره أضافت لشخصيتكي وعلمتك الحياه ولا تخافي من تكوين صداقات جديده لأنك كلما اقتحمتي هذا الخوف شعرتي ان الموضوع عادي وانك شخص محبوب ومرغوب وطالما ان صيديقاتك القدامي يظهرون لكي الترحيب ويعاملونك بصوره حلوه فتعاملي معهم وتقبيلهم مره أخري ربما لا يتجنبوكي ولكن يكون هذا شعور ناتج عن فكرتك انتي 4-والآن إذا عبرت لكي خاطره من هذا النوع (لما بتشوفيهم بتتأثري) أعرضيها علي CCCC أول C هي catch امسكي الفكره ااقبضي عليها أول ما بتجيلك تاني C هي check افحصي الفكره هي صح والا غلط انتي مكبره الموضوع والا هو مدياه أكبر من حجمه تالت C هيchallenge اتحدي الفكره واثبتي عدم واقعيتها وعدم مناسبتها ليكي رابع C هي غيري الفكره (هما بيتجنبوني عشان يرضوا فلانه علي حسابي) لفكره تانيه زي مثلا ( هنا نفسهم يرجعوني للشله وخايفين من رد فعلي لأني ممكن ما أأقدرش أسامح صديقتي الي قاطعتها وفي نفس الوقت مش عايزين يخسروني) وكل فكره جديده عالجيها في ذهنك بهذه الطريق عشان تشوفي الأمور علي حقيقتها من غير تدخل مشاعرك وأحكامك وظنونك والعلاقات تحتاج لصبر وتقبل وتسامح ووضع حدود مع الآخرين فاقرأ عن هذا الموضوع وأنا واثقه في قدرتك علي تجاوز هذه المرحله بإذن الله

ابنتي الحبيبه اُُحييكي لشجاعتك في طلب المساعده، وأثق تماما في قدرتك علي تخطي هذا الوقت الحرج لأنك في مرحله عمريه تتغير فيها هرمونات الجسم والحاله النفسيه بدرجه كبيره ،يحتاج جسمك لمزيد من الراحه وساعات نوم عميق أكثر ، تشعرين فيها بإحتياج للقبول في مجتمع الأصدقاء والتفهم في مجتمع الأسره ،فأطلب منك أن تتعرفي علي هذه الأحتياجات حتي لا تظلمي نفسك عندما تشعرين بها، والآن سأطلب منك 1- أن تُعبري عن مشاعرك لوالدتك بطريقه واضحه وبصيغة (أنا أشعر بالتوتر عندما تضغطين عليّ في موضوع المذاكره (مثلا) حددي شعورك بالضبط وعبري عنه بهذه الصيغه ٢- لا تخجلي من عرض إحتياجك للحنيه والتفهم والمساعده من أسرتك فهو حقك عليهم وأعلم جيدا أن هذا يتطلب شجاعه كبيره ولكن إشراكهم في معاناتك سيتيح لهم فرصه لفهمك أكثر ويفتح الباب أمامهم لتطييب خاطرك ومساندتك بالتشجيع لأن غالبا هم يظنون أنهم يحمسوكي ويشجعوكي بالضغط عليكي ومقارنتك مع أخيكي ومدح ذكاءك حتي يذاكر هو أكثر وتشعرين بثقتهم فيكي فتكوني مسؤله أكثر ولكن تحول ذلك لضغط كبير عليكي كنتي تتحمليه سابقا ومع مرحلتك العمريه ل وضغط المناهج الدراسيه وكثرتها لا تستطيعي التحمل الآن 3- والآن علي ورقه بيضاء أكتبي نفسك تكوني إيه ، وازاي أوصل للحلم ده وفكري دائما في ان دي مرحله مؤقته هاتعدي بكل حاجه مؤلمه فيها وهاتوصلك للجامعه ان شاء الله وحطي في دماغك فكره ان الدرجه الوحشه مش نهايه العالم ، وكلام صاحبتك المؤذي يخصها هي فرجعيه لها تاني وردي عليها لما تقولك اكيد غشيتي وردي بوضوح ولا تسمحي لها أنها تقول كده مره تانيه (إحنا اتفقنا نعبر عن مشاعرنا وما نكتمهاش ) وما تسمحيش لها تشكك في نفسك أبدا 4- في حاجه اسمها متلازمه النصاب ودي بتيجي الواحد لمًا يبدء ينجح وتشككه في نفسه وفي نجاحه فالي بتحسي بيه طبيعي جدا ولكن باطلب منك تمدحي نفسك لما تعملي أبسط الأشياء حتي لو سرحتي شعرك تسريحه حلوه اتعودي تمدحي نفسك وهاتي كراسه أو نوته وكل يوم اكتبي فيها أي حاجه حلوه حصلت في اليوم ده ولو صغيره وقبل النوم اقريها واشكري ربنا سبحانه وتعالي 5- أنا واثقه إنك هاتنظمي وقتك وخدي نفسك بالراحه وبالهدوء وطبطبي عليها وكلميها وقوليلها انك كويسه وقويه وقادره تعملي كل حاجه مطلوبه منك فرتبي أفكارك وحطي جدول تقدري تمشي عليه من غير ما تضغطي علي نفسك واعتبري يوم المرواح لتيته وقت ترفيهه وصله للرحم فبتاخدي عليه ثواب واخيرا ياابنتي ارمي نفسك في حضن والدتك كل ما تشوفيها حتي تشعر بكي وتتقرب لكي وادعو الله لكي بالتوفيق والطمأنينه

حبيت املا فراغات انحذفت وانا باكتب زي ان منطقه الأداء مش بنقعد فيها عالطول احنا بنخرج ونرجع تاني قصدي ااقولك ان مستحيل الانسان يحافظ علي طاقته عاليه وفي القمه حتي لو طاقه ايجابيه

شوفي انتي اصلا عايزه ايه من العلاقات دي يعني عايزه روابط قويه والا علاقه زماله سطحيه لأن الي حصل معناه ان حدودك معاهم انتهكت حصل تعدي في العلاقه فاعملي لنفسك حدود واضحه وخليكي صريحه ماتخافيش تخسري حد فتيحي علي نفسك وتتراكم المشاعر السلبيه جواكي وكرسي في الكلوب وتخسري كله مره واحده قيمي الموضوع في علاقات الافضل اكون سطحيه يبقي نخليها سطحيه ،حاولي تكوني اكبر من الموضوع واتعاملي معاهم بثقه ورجعي العلاقه بس في مكانها الحقيقي ، كده هاتروحي بوعي ونضوج وهاتتعلمي الدرس الي الدنيا عايزاكي تفهميه فيه حاجات كتير تانيه بس الفكره نفسها الي مسيطره عليكي ادخلي عليها بفكره مفيش خساره ولا حاجه الموضوع سوء تفاهم ودرس هاتعلم منه واحد اتنين تلاته واندمج مع حدود انا الي ارسمها مع غيري وربنا يرشدك لكل خير

بصي للموضوع من بعيد كأنك مش طرف فيه والدأي قيمي الي حصل ببعض الموضوعيه دي نقطه

وبعدين تقبلي الحاله الي انتي فيها لأن ده محصول عمر كامل فمتتوقعيش انه هايايتحل في لحظه خدي نفسك بالراحه واعملي جدول مذاكره بسيط وداومي علي قد ما ربنا يقدرك والنتايج علي الله سبحانه وتعالي وهو كفيل انه يجبرك ويرضيكي

أحيانا انتي مضطره تتكلمي بقوه وقسوه وده بيتعبك لأنه ضد طبيعتك فعبري وردي بس بصيغه حازمه وتقولي انا حسيت بالضيق لما قولتي او عملتي كذا يعني رد فعل التصرف ده عليكي لازم تعبري اول باول باحترام ووضوح محدش هايدخل جواكي ويحس بجرحك لازم تتكلمي وتنقي الألفاظ الواضحه المهذبه

طبعا مالكيش ذنب في أي حاجه وحقك تاخدي حب وحنيه واحترام بس مامتك نفسيتها تعبانه جدا ومحدش حاسس بيها وبتنفس غضبها فيكي عشان عارفه انك طيبه وهاتستحمليها بس لازم تعبري لها ان الاسلوب ده بيتعبك ويتعب نفسيتك ويشغلك عن مذاكرتك ويدخلك في صراع وهمي معاها لازم توصلي لها كل ده بس برحمه انتي الوحيده الي ممكن تطبطب عليها وتحس بألمها اتكلمي معاها اوعي تيأسي وتأكدي ان رحمتك واشفاقك عليها له عند ربنا الأجر العظيم ومسيرها هاتفكر وتفهم وتقدر وربنا يهدي الأحوال

ماتيأسيش أو تاخدي منها موقف يمكن طلبتيه في وقت كانت مش مستعده فيه وزعلانه وحاسه بالوحده طولي بالك هي ماتقصدكيش انتي وبما انك تشبيهيها ومتعلقه بيها هاتكوني محل لإسقاط مشاعرها المحبطه عليكي طولي بالك وطاقه الحب الي عندك لو حاولتي تستخدميها لصالحك وطاقه التخيل ممكن تساعدك فكري فيها بنيه حلوه وتخيليها بتحضنك وتفاءلي بالحلو لأن الحساسيه في المشاعر بتأذي صاحبها لو مفرغش طاقه المشاعر اكتبي شكر لله وامتنان لأي ضوء إيجابي في حياتك حاولي تساعدي نفسك وأنا واثقه جدا فيكي

ياعزيزتي انتي محتاجه والدتك في حياتك وهي محتاجه لكي بس هي مش قادره تفهم مشاعرك لأن هي كمان مضغوطه وعشان كده بتدخل الناس في حياتكم بتبقي عايزه تستشير وتفهم بس هي سلكت الطريق الي هايبعدها عن الحلول ويزيد من حجم المشكله أرجو إنك تفتحي قلبك لوالدتك وهي اعتذرت لكي دليل احساسها بالخطأ الي ارتكبته في حقك روحي يابنتي وارمي نفسك في حضنها مستحيل تكون بتكرهك او تتمني تضايقك هي بتعجز عن فهمك فبتتضايق اكتر بس مش منك الأم فرصه في الحياه مش بتتعوض والي انكسر يتصلح روحي وافتحي قلبك ليها من غير اتهامات قوليي وعبري عن مشاعرك الخاصه بيكي وانهي الصراع ده لأن من أسباب مشكلتك الحاليه أحكي لها بتحسي بإيه لما تجيب سيرتك مع حد واطلبي دعمها وحنيتها هي في صفك مش ضدك فأرجوكي صغري حجم المشكله في رأسك واسمعي فيديوهات علي اليوتيوب عن الشخصيه الحساسه وحاولي تخلي مامتك تسمعها وتأكدي إن كل شيء بيعدي بس المهم نفهم الدرس الي الدنيا عايزانا نتعلمه ربنا يطمنك ويحقق كل احلامك

في اوقات الهدوء عبري عن مشاعرك لازم يوصلهم المك واحتسبي عند الله وربنا يوجد لكي فرجا قريبا مع الستر والعافيه

فالآن سيكون عليكي محاوله تقبل والتكيف مع هذا الوضع ،حاولي كتابه افكارك ومشاعرك وافراغها علي الورق، استعيني بالله والجأي بالدعاء لهما ان يهديهما اليكي ،لو في حد قريب منكم يقدر يتكلم معاهم حاولي تدخليه، تجنبي الرد عليهم او التفاعل معهم في حال غضبهم ومعاملتك بصوره سيءه ومارسي اي موهبه تحبيها حتي تسري عن نفسك ،ولكن ارجو منكي التعبير عن نفسك امامهم ،عبري عن شعورك بجمل واضحه انا زعلانه عشان حضرتك اعميتني (مثلا) وبعدين ادخلي حجرتك مثلا، لا تنتظري اي اجابه واستمري في التعبير بمنتهي الهدوء وبلغه مهذبه مهما كان سيفكر كل منهما في كلامك مهما بدا عليهما القسوه والتجاهل وادعو الله لكي براحه البال والسلامه من كل شر

عاده مشاكل العلاقات لا تحل الا بوجود اطراف العلاقه ولكن في حالتك يبدو ان مثل هذا الحل غير وارد

اعتبري ان دي حكمه الحياه فمن قلب الجحيم تولد الحكمه وبعد فتره وجع وألم شديد المشاعر بتتخدر وتهدا كأنها بتعيد برمجه نفسها اطمئني هذا يسمي التغيير بتنتقلي من مرحله لمرحله بعدها بتكوني اكثر نضجا وقدره علي الحكم علي الامور دلوقتي انتي في الجسر بين قبل التجربه وبعد التجربه ربنا يسعدك ويرزقك خير الصحبه الصالحه

حقك حضن دافي ومطمئن وءامن تأوي اليه روحك الحاءره ياابنتي واعتبري ان كل الدعم والمحبه وتأييدي هديه صغيره ليكي واشجعك بقوه علي التعبير عن مشاعرك بالرسم واكيد هاتخلقي الوان حلوه تخفف من وطأه مشاعرك وتعزز قيمتك بذاتك وايمانك بيها