Nada Yousef

العلاج النفسي ما هو إلا علاج للأمراض النفسية والعلقية يعني حاجة جواكي لكن السحر أو الحسد أو المس أو كل الكلام دا محتاج رقية شرعية وعلاج بالقرآن علم النفس ميقدرش يساعدك فيه ف أنصحك تداومي ع سورة البقرة والأذكار والرقية الشرعية كل يوم والصلاة والنوافل كتري منها، ولو متاح راقي مضمون جدا جدا "راقي مش دجال" ف ياحبذا ودا إللي محتاجاه أساسا

إنتي بجد أيه جابرك إنك تعيشي في الوضع دا؟ ضيعتي 4 سنين من عمرك معاه!! صدقيني إنتي بتأذي نفسك بوجودك في العلاقة دي أساسا شخص نرجسي ومؤذي وبيهز ثقتك في نفسك بتضحي بنفسك تحت مسمى الحب؟ إهربي يا بنتي وعيشي حياتك وشيله منها لإنك متستاهليش تحطي نفسك في كفة الوحشة وإنك المؤذية وتتأذي علشان مجرد مشاعر لما تبعدي عنه ومع الوقت هتدركي إنها كانت وهم..

بصي مبدئيا صلي أستخارة تاني حاجة لازم تكوني مقتنعة تماما إن علاقتك بيه قبل كده كانت حرام ودي لا جدال فيها، وإن علاقتك بيه لو بقى خطيبك وحصل نصيب لازم تكون مربوطة بحدود ودا شرع ربنا إللي أمرنا بيه علشان نحافظ على نفسنا وقلبنا من إنه يتكسر.. تالت حاجة ديما بيكون في مشاكل بين أي إتنين في علاقة ما لو هي داخلة في منحنى حلال، الشيطان من الٱخر بيدخل يولعها في الناحيتين، حتى ديما تسمعي إن أي إتنين كتب كتابهم قرب أو فرحهم يحصل بيهم خناق على حاجات تافهة وعبيطة. أهم حاجة لازم تكوني صادقة مع نفسك عن حقيقة مشاعرك، يعني هل هي مجرد إعجاب؟ تعلق؟ تعود؟ ولازم تكوني مقتنعة إن النصيب والقدر هو إللي بيحدد مسار حياتنا والناس إللي خير لينا إنها تكون موجودة أو تمشي، ف صلي إستخارة وأشجعك تبعدي لحد ما يجي يتقدم ويدخل البيت من بابه وتطلبي من ربنا يسامحكم على علاقتكم إللي مكانتش ترضيه ويكتبلكم الخير. وديما كرري دعاء "اللهم إختر لي ولا تخيرني" و"لا إله إلا أنت سبحانك إني كنت من الظالمين"

أعتقد أجاباتي هتبقى محتلفة شوية لإني مش من أنصار حجة غياب حنان الأهل، ليه غياب حنان الأهل مش سبب؟ لإن الأجيال قبلنا كتيير منهم كبروا من غير ما يعدوا بفترات الأرتباط والكلام وكان يمكن أهلهم أكتر في القسوة من الموجودة في أهلنا في الجيل الموجود دلوقتي ولكن المشكلة كلها في التساهل في النقطة دي وإن أغلب الجيل إتحطله من التليفزيون والسوشيال ميديا والروايات فكرة إن وإيه المشكلة في إني أدور ع الحب وأجرب وإن أهلي شداد ومش بيدوني حنان كفاية إني أكون شخص سوي، وكمان المشكلة إن أغلب الجيل هش جدا نفسيا والقرآن والدين بقت حاجة قليلة الأنتشار وبقى في تساهل كبيير جدا في أبسط أحكام الدين من ناحية إجتناب الحرام والإقبال على الحلال أعتقد كون الموضوع بقى متاح بشكل أسهل خلاه ينتشر أكتر.

إللي أنا إن شايفاه لااازم دكتور نفسي دي أعراض وسواس قهري، محتاجة دكتور يساعدك فيها ضروري بجد

العلاقة طلاما بقت مؤذية ف مش هتفيدني كل ذكراياتها الجميلة وعمري إللي كان فيها طلاما الشخص مبقاش نفس الشخص وإنت حاولتي تكلميها وتعاتبي ومجابش نتيجة يبقى أسحب نفسي كده والكلام على قد السلام زيها زي أي حد...

لو البيت إللي عايشة فيه عمري كله بيولع وأنا جواه مش هقول لاء دا فيه ذكريات عمري كلها وأفضل وأتحرق معاه، بس هطلع براه علشان أعيش وأكمل حياتي واشوف بيت جديد. وانا مش بتكلم عن البيت..

بصي لما بنبدأ نتعامل مع علاقتنا باللي حوالينا بإننا نبدأ ندور على طريقة معينة يعاملنا الطرف التاني بيها ونبدأ ندور على تقصيرات أو كسور مفيش أسهل من إننا نلاقيها ونبدأ نحس بالوحدة معاهم إحنا ك بشر بنختلف من شخص للتاني في طريقتنا في التعامل مع مشاعرنا والتعبير عن حبنا للي حوالينا يعني مثلا أنا لغة الحب عندي المشاركة إني أفضل أشارك أي حاجة إيجابية للحد القريب مني ومبقدرش أشارك السلبي عكسي صاحبتي إللي لغة الحب عندها ف إنها بتحب تسمع وإنها تحكي مشكلة حاصلة معاهت للحد إللي هي بتحبه، حصل بينا خلاف إني ليه مش بثق فيها ومش بشاركها الحاجات إللي بتدايقني وأن هي ليه مش بتتعامل معايا بالطريقة الفلانية، وبعد فترة من الفتور والتعب من الطرفين جالنا لحظة إدراك إن هي كده، دا الشخص ودي الطريقة إللي بيقدر يعبر بيها عن مشاعره. هو ممكن يكون بيعبر عن حبه ليكي بطريقة تانية إنتي مش واخدة بالك منها، زي إنه بيشتغل ويجيبلك طلباتك مثلا، بيعمل حاجات صغيرة أوي إنتي ممكن مش واخدة بالك منها بس بالنسبة ليه هي دي الطريقة إللي يقدر يعبر بيها. حاولي إتكلمي معاه بالراحة ويا فلان أنا بحس كذا وكذا وكذا وطلعي كل حاجة والعتاب والكلام بيفرق فعلا بدل ما تكوني شايلة منه وحاولي حطي إتفاق إنه يحاول علشانك مثلا. بصي على مميزاته والحاجات الكويسة إللي بيعملها بردو ،لإن إحنا بشر، طبيعي يبقى في حاجات حلوة وحاجات وحشة فينا.

ممكن تلبس جواندي من إللي هو الطبي دا زي إللي بيستخدموه دكاترة الأسنان وإنت شغال ولما تخلص تخلعه وكده إيديك مش هيكون وصلها حاجة إن شاء الله

عادة من الهوايات الجميلة إللي برشحها هي القراءة بالذات لو مجالات مختلفة زي كتب علمية، دينية، وأوقات أقل، روايات كنوع من أنواع التسلية والهروب من الواقع شوية في هذه الحالة بنبدأ ندور على موهبة أو هواية منجذبين ليها، كتابة ،رسم، ديزاين وهكذا بقى وأبدأ أشتغل عليها وأتعلم فيها أكتر ممكن تكون هواية بس معنديش الموهبة، ف هنا برجح إن الواحد يتعلم عن الهواية دي ويطورها عن طريق فيديوز وكورسات من يوتيوب، أخد أفكار من بنترست أو من ناس عملت زيها إشغل وقت الفراغ بإنك تتعلم حاجة جديدة، دراسة جديدة، شغل جديد، إسمع بودكساتات بتبقى حلوة جدا، إكتسب حاجة دينية جديدة، زي زود ذكر، صلي نوافل، وقت الفراغ إقرأ أو تدبر قرآن، أحاديث، إقرأ أو إسمع عن سنن وسيرة الرسول والصحابة، هكذا بقى الحاجات دي ممكن تعملها برا البيت كنوع من التغير وفي البيت عادي ف دا هيخليك تخرج عادي تروح مكان عام لوحدك هكذا يعني

الأمر متباين بين شخص وأخر ويتوقفك عليك وعلى حالتك ومدى تأثير قلة النوم أو زيادته عليك. فلو أحضرنا عددا من الأشخاص وطلبنا منهم أن يناموا نفس عدد الساعات بفرض إنهم 8 ساعات ستجد أحدهم نام وإستيقظ نشطا ويستطيع إنجاز مهاهمه اليومية بشكل مثالي، وأخر يشعر بالخمول ويريد نوم المزيد "مع إن نفس الشخص قد ينام ساعات أقل ويكون نشيط" وكل شخص تجد له حالة مختلفة لو غيرنا عدد الساعات ل 6 أو أي عدد أخر ستجد ذاك الذي سيكون نشيطا والأخر الذي سيكون خاملا. بالنسبة لك جرب أكثر من نظام حتى تستقر. مثلا أنا ليس لي وقت محدد للنوم، لكن لا أتأخر في النوم عن 12 مساء وأستيقظ للفجر أصلي وإن لم أشعر أنني قادرة على التركيز أمنح نفسي ساعة ونصف أو ساعتين لا أكثر انامهم لأستيقظ مركزة ولا أركز إن نمت أقل أو أكثر من 8 ساعات ولا يفارقني الصداع طيلة اليوم . عندي صديقة لا تنام إلا بعد صلاة الفجر وتستيقظ على صلاة الظهر. صديقة أخرى تنام أقل من 5 ساعات يوميا ونجدها نشيطة ماشاء الله وتنجز أكثر من تلك المرة التي تنام فيها 7 ساعات مثلا. الفكرة كلها ليست في قاعدة علمية ثابتة، لكنها في شخصيتك وقدرات تحملك وقدرات عقلك، جرب أن تنام يوما 6 ساعات، ويوم أخر أكثر، جرب ما كان يفعله الرسول أنا ينام بعد العشاء ويستيقظ قبل الفجر ويأخذ قيلولة وقت الظهر، جرب أكثر من طريقة حتى تستقر على شئ ينسابك وسر عليه، وإستعن بالله.

كإنك بتتكلمي عني بجد.. أنا كنت نفس الحال جدا وإللي هو ممكن أوقف حياتي أسابيع علشان كلمة أترمت في وسط كلام "حتى لو مش مقصودة" بس بدأت أشتغل على نفسي لما أدركت حاجات كتييير إتعملتها مع الوقت والتجارب القاسية وشخصيتي إللي يمكن لو مكانتش كده مكنتش هتعلم دروس كتير جدا كده نبدأ نقطة نقطة أول حل وهو إللي لو حليته مشاكلك كلها إتحلت دوري علي مميزاتك وإخلقي من عيوبك مميزات وحبي نفسك بدون شروط، يعني مثلا إنت شخص بيتأثر بالكلام ف إبدأي إدي لنفسك كلام إيجابي إللي هو ع فكرة أنا ذكية جدا وعندي قدرات حلوة مينفعش تتضيع مني، عندك هواية أبدأي إستغليها وطلعي فيها طاقتك السلبية يعني مثلا أنا لما بكون مضغوطة بتخيل الضغط أو الحاجة إللي مزعلاني إنها شخصية وأكتبها في قصة وأقتل الشخصية دي في القصة كنوع من أنواع إني قتلت الطاقة السلبية، أعرف صاحبة ليا بترسم ف بتطلع في الرسم طاقتها السلبية هكذا بقى إكتشفتي هواية حتى لو تجيبي خرز وتعملي بيه أساور وحاجات، أو تجيبي كروشية وتتعلميه هكذا بقى. بالنسبة للمشاكل اللي مش بتقدري تحليها ف أنا كذالك بس بمشي بقاعدة قرأتها في كتاب وبتساعد جدااااا علشان نحل أي مشكلة قدامنا 3 خطوات ١- نعرف إيه المشكلة ٢- ندور ع سببها ٣- نبدأ نحط حلول مثلا دماغي مصدع هي دي المشكلة، أبدأ أشوف سبب أنا ليه دماغي مصدع؟ أه دا أنا منمتش كويس إمبارح، طيب عندي حلول إيه؟ ممكن أدخل أنام شوية ،أو أشرب قهوة أو شاي، أخد مسكن قيسي دا ع حياتك كلها هتلاقيها بتنجح كتييير، ولما تأزم معاكي في الحلول خدي رأي حد تاني يفكر معاكي. نمشي بنفس القاعدة في باقي مشكلتك إنتي بتقولي دلوقتي إنك حاسة أنك مبقيتيش متفوقة كفاية في نظرك وقولتي سببين ١- الموبايل ٢- الحزن وشعور إنك مش بتعملي مجهود كفاية مشكلة الموبايل جيلنا كله عايشها بجد، عادة لما بكون في فترة محتاجة فيها المذاكرة أكتر ومش عارفة أكونترول نفسي بمسح إنستا وفيس من الموبايل، ممكن أفتح فيس من جوجل كنوع من إني بقلل إستخدام بس، لما تحسي بقى إنه وهو جمبك وإنتي تذاكري إقفليه وحطيه في أوضة تانية أو حطيه في الدولاب ولو موجود معاكي لاب شغليه ع فيديوز Study with me أو شغليه ع قرآن من غير مؤثرات يعني مثلا عندك علي جابر، وكذا حد جديد صوتهم حلو جداا ولو عاوزة تسمعيه بالصدى عادي بس بتحسيه مريح من غيره اكتر، لو بتذاكري من الموبايل إقفلي النوتفكيشن لأي أبلكيشن بيشتتك وذاكري منه. إحساس إنك مش بتعلمي كفاية بقى ،بصراحة مش قادرة أتعامل معاه بس بتجاهله تمام وبقوم أعمل حتى لو حاجة صغيرة جدااا بس بحاول وبعمل ع قد الوقت وع قد طاقتي وربنا كريم لما يلاقيكي بتسعي هيساعدك وهيكرمك ف ديما قومي وذاكري "قليل دائم خير من كثير متقطع" وقال رسول الله : أحب الأعمال إلى الله أدومها وإن قل. بصي قاعدة مهمه جدا جدا جدا جدا "من لم يكن لنفسك نورًا، لن تسعفه كل أنوار المدينة" لو مقدرتيش تحبي نفسك وتكوني رحيمة بيها وتعاتبي نفسك وقت الغلط وتساعدي نفسك محدش هيقدر يعمل دا ،التغير لازم يبدأ من جواكي إنتي.. أخر حاجة لو مكنش ليكي فايدة مكنش ربنا خلقك ومكنتيش هتبقي موجودة أصلا، وجوده ليه لازمة، وليكي أهمية، بس دورك وفايدتك مش هتلاقيها وأنتي واقفة مكانك تعيطي ع الماضي وواقفة في الحاضر مش بتتحركي علشان خايفة المستقبل يكون أوحش من الماضي، إنتي قومي وفوقي لنفسك ودوري علي حاجة تلاقي فيها نفسك، حطي لنفسك هدف ينور قدامك لما تقعي تفتكري أن إنتي دلوقتي عندك فرصة تكوني عند حلمك دا في المستقبل وقاعدة تضعيها ف تقومي من الأخر محدش ينفعك غيرك، وإللي بيقول كلمه تدايقك بينساها، بجد بينسي وبيعدي اليوم ويتحسل في حياته وينسى ومحدش بيحس بيكي غيرك والله، محدش دايم لحد والرحلة فردية ولازم تتعلمي تعيشها لوحدك وتكوني مصدر كل حاجة ل نفسك "ما ميمنعش انك هيجي اوقااات كتيييير تحتاجي حد يساعدك وينورلك الطريق بس الفكرة فإنه مش هيقدر يساعد لو أنتي مش بتعرفي تعملي دا" ربنا يريحك ويوفقك، وشيدي حيلك لسه عندك وقت تكوني حد جديد، قربي من ربنا جاامد لإن دا سبب وجودنا ♥️

بصي أنتي مش مجبرة تقنعي نفسك بحد أساسا لو مفيش القبول والإكتفاء يبقى مش دا الشخص المناسب بالنسبة ليكي "حتى لو هو حد مثالي" في الأول وفي الأخر صلي إستخارة وإقعدي مع نفسك إسألي نفسك كام سؤال متحاوبيش عليهم غير ب أه أو لاء أنا مكتفية بيه؟ هل أنا هقدر أكمل حياتي معاه بعد كده وأتقبله؟ هل حبه كفاية يخليني أحبه؟ هل أنا متقبلاه أصلا؟ هل شخصيته مناسبة ل شخصيتي ؟ متقبلة العيوب قبل المميزات؟ هل متقبلاه من البداية بس أخر فترة لما الحوار بدأ ياخد مجرى رسمي بدأت أحس بكده؟ ولا لما بدأت أتعمق في شخصيته؟ وأخر حاجة صلي إستخارة ودا مهم جدااا ليه بقى؟ لإن الشيطان لما بناخد خطوة لناحية حلال بيبدأ يدخلنا في دومات وديما تسمعي إن قبل فرح أي إتنين أو مناسبة ليهم بيبدأ الخناق والمشاكل ع حاجات عبيطة ف وارد تكون وساوس شيطان ف إنتي في الإستخارة بتستشيري إللي أدرى بكل حاجة وديما إدعي اللهم أختر لي ولا تخيرني وتكوني متيقنة إن ربنا هييسر لك الخير الدعاء دا جميل جدا بجد

حاسة إني هطول في الكلام شويتين بس عندي كلام كتير في النقطة دي أول حاجة الغلطات دي كلها بقت ماضي متقدريش ترجعي تغيري فيه حاجة ودلوقتي إنتي متحكمة في الحاضر إللي إنت عايشة فيه وقدامك طريقين أول واحد إنك تقفي مكانك تبكي على الأطلال والندم ياكلك وتضيعي من عمرك في إنك واقفة على الماضي تاني طريق إنك تاخدي خطوة إنك تكوني نسخة أحسن من نفسك وتشتغلي ع نفسك دنيا ودين وتحسني مستقبلك. كلنا ك بشر بنغلط وبيجي علينا وقت بنبقى مغيبين ونمشي نعك ولما نفوق نقول إيه الهبل إللي عملناه دا ودا طبيعي فينا كلنا دي فطرة بس ربنا قال إن خير الخاطئين التوابون ف طالما توبتي معني كده إنك بدأتي صفحة جديدة مع ربنا يعني الماضي دا إتمسح إن شاء الله. أهم نقطة أنا حد الحقيقة بيفكر كتير، أوفر ،في الماضي والمستقبل والحاضر، والغلطة إللي بعملها بقف جمبها أجلد ذاتي إني إزااي أعمل كده وربنا هيعاقبني أو أكون متشائمة إني مذاكرتش بشكل مثالي ف ربنا هيعاقبني ومش هحل كويس في الإمتحان، لحد ما قريت جملة فرقت معايا جدااا "حسن الظن بالله ينجينا" في فرق عظييم بين حد بيقعد يتشائم وإن ربنا مش هيوفقني وربنا مش هيكرمني ربنا مش هيسامحني وفرق بين عبد تاني يقول ياعم دا ربنا كريم هيرزقني ربنا عفو فهيعفوا عني ربنا رحيم ف هيرحمني ربنا جبار ف هيجبرني، أنا مذاكرتش كويس بس ربنا كريم إن شاء الله يوفقني هكذا بقى لما بدأت أتعامل مع نفسي بإني أحسن الظن بربنا مش بلاقي غير إني راضية وإنه خير غلطت غلطة لاء خير أكيد وراها حكمة من ربنا ولو مغلطاهاش مكنش هيحصل كذا وأقدار ربنا كلها خييير، ف إنتي إنسى الماضي وإخرجي منه بصفحة جديدة نضيفة وأبدأي حسني علاقتك ربنا وأهلك، إقطعي علاقتك مع الناس إللي كانوا رابطينك بطريق مش كويس سواء صحاب أو غيره، مثلا إعملي أكونتات جديدة بصي التغير عامة بداية كويسة واتعلمي من غلطاتك إنك متكررهاش عادي وإستغفري كتيير وحوقلي وسبحي الذكر عامة جميل جدا ومريح وإقرأي ورد وإحفظي وإسمعي قرآن أي طريق ناحية ربنا هيبقى مريح وهيبقى صح من غير ما تفكري وجاهدي نفسك كتييير إنك متحنيش ولا ترجعي في لحظة ضعف لحاجة من ماضيكي وخليكي عارفة إن هيكون في إختبارات لصدق نيتك في التوبة والشيطان هيكون قوي علشان يخليكي ترجعي أو تعيشي تعيسةوحزينة ومتخليهوش ينجح ومتنسيش"إن الله يغفر الذنوب جميعا" مهما عملتي ربنا تواب رحيم وغفور كريم ♥️ ربنا يريح قلبك يارب

بصي خلينا متفقين إن الكلام بين الولد والبنت بدون رابط شرعي وبدون ضرورة وكمان من غير حدود حرام تمااما، حتى الخطوبة إتحددت بضوابط شرعية علشان تحافظ عليكي وعلى قلبك. إختاري إللي يدخل البيت من بابه ومتفتحيش باب أبدااا للكلام إنه يخرج برا حدود العلاقة العائلية. إبن عمتك طالما بيدخل في سكة مش كويسة في الكلام ف دا مش ناوي ع جواز ومجرد بيتسلي ويضيع وقت ف سطحي علاقتك بيه على قد ما تقدري "وياريت تتمنع خالص علشان تقدري تتجاوزي مشاعر الإعجاب وتشيليه من بالك" إبن خالك خلي الكلام بينكم على حدود الدراسة بس متسمحيش إن الكلام يمط ولو لمح عرفيه إن هو أهلك وعارفهم يجي يتقدم وقتها تصلي إستخارة وأهلك يشوفوا هل الشخص دا مناسب أو لاء ولو مش مناسب ومفيش نصيب ف دي حاجة واردة وخارج إيدينا كلنا.. أخر حاجة إنتي مش مطلوب منك تختاري حد أصلا، يعني بصي إنتي مترهقيش قلبك في إعجاب ومشاعر حب "مؤقتة" وتدوري علي نصيبك في الحب لإنه حتى لو إنتي قاعدة في بيتك مش بتتحركي منه هيجي لحد عندك نصيبك من غير ما تتعبي نفسك وتختاري وتدوري وترهقي قلبك ومشاعرك في علاقة ملهاش مسمى ومستقبلها مش باينله ملامح لإن الشخص إللي هتتجوزيه مكتوبلك من قبل ما تتولدي أصلا، وكمان زي ما بيقولوا مراية الحب عامية إنتي لوحدك مش هتقدري تختاري شريك حياتك إللي هتكملي معاه يعني بيبقى في عيوب إنتي مش بتكوني واخدة بالك منها ف بتحتاجي رأي أهلك في الشخص وغير كده الأهل عندهم خبرة كبيرة ونظرة للناس وهيقدروا يعرفوا الشخص دا مناسب ليكي من منظروات تانية الإعجاب وإنبهار البدايات مش هيخليكي تشوفيها، وغير كده الحب مش كفاية إنه يبني بيت ويعيشك سعيدة البيوت بتتأسس على أساس المودة والرحمة، لإن مش كل مشاعر حب بتكون فيها مودة ورحمة. أخر حاجة لو مترددة لسه كلمي والداتك في الحوار دا إن فلان عاوز يتقدم وأقوله إيه وحضرتك شايفة إيه كده يعني

مبدئيا إذا محبتيش نفسك متستنيش من حد يحبك ولازم لازم لازم تحطي قدام عينك ديما جملة " رضا الناس غاية لا تدرك " إللي بيسعي ورا رضا الناس وإنه يسكتهم وميسمعش إنتقاداتهم بيخسر نفسه واللي علشان يرجعها بيدفع كتير أوي والرجوع لنفسه ميبقاش سهل خالص. الحل إيه ؟ مفيهاش غير إنك تحبي نفسك، حبي شكلك أسلوبك تفكيرك، ديما راجعي نفسك أنا عملت كذا، كذا دا حلال ويرضي ربنا؟ أه ؟ يبقى أي حد في الدنيا رأيه مش مهم. طب الحاجة دي حرام ومترضيش ربنا؟ أه؟ يبقى أبطل الحاجة دي، غير كده رأي الناس أخد منه إللي يعجبني وإللي ميعجبنيش أكبر دماغي منه طالما مش بعمل عيب ولا حرام، وكلامه لو ع حاجة مش من إختياري ولكنها قدر ربنا كتبه ليا ف بردوا كلامه ملوش لازمة لأن ربنا إختار لي خير وبس.. مشاكلك هيتحل 80٪ منها لما تتعملي تحبي نفسك وتثقي فيها وتقدريها، ولما كلام الناس ميفرقش..

طيب إنت عارف إيه سبب إنك عاوز نتحر؟؟ عارف المشكلة فين يعني؟؟

هو في رمضان مش كل الشياطين بتتسلسل، المردة الكبيرة بس لكن الجن والشياطين الأضعف موجودة عادي داومي على الأذاكر وإرقي نفسك بالرقية الشرعية كل يوم حتى لو مفيش أذى ف ببقى بحصن نفسي والرقية الشرعية مش مقترنة بس بالسحر والمس والحسد ربنا يعافينا لكن لو شوية صداع بترقي نفسك بيهدى عادي وهي سنة عن الرسول، جيبي ازازة ماية وإقرأي عليها قرآن ورشيها في الزوايا إللي عند الحيطة في البيت "يعني مكان محدش يدوس عليها فيه" واشربي منها وديما ديما ديما اقرأي سورة البقرة أو شغليها في البيت بس حاولي تكون ورد ليكي وأذكري ربنا طول الوقت لو لقيتي بعد ما تقربي ل ربنا وتحصني نفسك لسه بتشوفي الحاجات دي وبتعاني من نفس الحاجات روحي ل دكتور نفسي والنصايح دي مش بس تحصين دا كمان علاج معنوي جاامد "ألا بذكر الله تطمئن القلوب"

مريت بفترة زي كده بالضبط ولدرجة إني مش عاوزة أخرج من أوضتي وإني لما بنزل من البيت وأشوف ناس أحس بخنقة وأفضل أعيط، الصلاة كنت بجبر نفسي أصلي لدرجة إني من كتر ما أنا معنديش طاقة كنت بفضل أتتاوب وأنا بصلي وأعيط وأصدع ومحسش بيها، حلقة القرآن سبتها لإني مش طايقة أشوف نااس حاسة بإني عندي طاقة سلبية تكفي بلد بحالها، وحد نصحني إني أرقي نفسي وإن الرقية مش شرط علشان حسد وإنها بتكون حاجة مريحة كده سبحان الله وبتريح، وأرقي نفسي يومين مرتاحة وبعدها أتعب تاني وحاولت أداوم عليها مدة ولحد الأن بحاول أخليها روتين وجزء من الأسبوع عالأقل أرقي نفسي مرة في الأسبوع أو كل مرة أحس إني مش كويسة. خلصت من مشاعري دي والمشكلة؟ لاء ،ولكن مقارنة بحالي في البداية في تحسن كبييييير. الرقية مش حل وحيد لازم تحطي إيدك على سبب الزعل وتبدأي تعالجيه، زي مثلا علاقة مرهقة بتاخد طاقتك كلها إبدأي أفصلي منها وحطي حدود لنفسيتك ونقط على الحروف، أفكار سلبية إتعاملي معاها إنها وساوس من الشيطان اللي عاوزك ديما في أسوء حال وعاوزك تعييسة، في مشاكل كتييير هتتحل لما تحطي نفسك أولوية وتحطي لها حدود بينها وبين أي حاجة مؤذيه. وأخر حاجة إفتكري ديما إن "ألا بذكر الله تطمئن القلوب" مهما توهتي إرجعي وجاهدي نفسك،وأحب الأعمال إلى الله أدومها وإن قل، وديما حسن الظن بالله بينجي.. أتمنالك تكوني كويسة وأحسن