زاد 🤎

قرب من ربنا ،ارجعله من تاني متخافش هيقبلك والله وهيحبك اكتر و اكتر ربنا غفور رحيم بيقبلنا وبيفتحلنا بابه أول ما بنرجع ليه ،قوله يارب سامحني ،قربني منك ،خليني شخص جديد تحبه و ترضاه ،يارب أنا آسف أن علقت قلبي بحد غيرك ،اسف يارب أن صاحبت بنت وحبيبها رغم إنها لسه مبقتش حلالي على سنة الله ورسوله ، بس يارب خلاص قلبي اتعلق وبيوجعني أوي ف غيابها ، يارب أرزقني بيها ف الحلال لو هي خير ليا ،ولو هي مش خير ليا أو أنا مش خير ليها..شيلها من قلبي يارب واملى قلبي بحُبك وأرزقني الزوجة الصالحة الجملية التقية النقية الحافظة لكتابك والعارفة بدينك .افضل أدعي كده ووالله العظيم يا إما ربنا هيرزقك بيها يا اما مره واحدة كده ومتعرفش ازاي هتلاقيها اتشالت من قلبك وبقيت حاسس أنك إنسان جديد. وكمان عشان قلبك ميوجعكش اكتر امسح أي صور أو أي حاجة ليكم مع بعض أو أي تفكرك بيها.ده قلبك انت وأنت المسؤول أنك تحافظ عليه.هتكون صعبة ف البداية لكن ربنا هيقويك . اتعرف على شباب صالحة كده تقربك من ربنا روحوا صلوا ف المسجد مع بعض ،حفظوا قرآن اتعلموا دينكم اكتر اكتسب مهارة أو أتعلم لغة يعني اشغل وقتك.افتح كده يوتيوب واكتب "بودكاست وعي". وتلاقي ٣ شباب هتحس أنهم صحابك كده ما شاء الله عليهم بيتكلموا ف حاجات تطمن القلب بيتكلموا ف الدين والدنيا ،تحس أنهم بيكلموك انت شخصيا والله والله والله حياتك هتتغير مليار ف المية أول ما تسمعهم إن شاء الله هياخدا بإيدك للنور. ونصيحة مني متصاحبش بنات تاني.افتح سورة النور وأقرأ الآية ٣٠ كده وهات تفسيرها . واكتب ليه العلاقة بين الولد والبنت خارج الزواج حرام.افتكر دايما أن البداية المترضيش ربنا نهايتها مش بترضي صاحبها وده ال حصل معاك.. لكن معاك دلوقتي فرصة تقرب من ربنا وكل حاجه تبقى جميلة. وأعرف دايما أن الهتطوله ف الحرام عمرك ما هتطوله ف الحلال أبدا. وتأكد أن من ترك شيئا لله عوضه الله خيرا منه. وف النهاية.."عُد إلى الله ولو أذنبت مليون مره." وتذكر أن من اقترب من الله أقترب منه كل شيء جميل ومن أبتعد عنه يشقى في الدنيا والآخرة.

صدقيني كل مشاكلك هتتحل لما تقربي من ربنا ،هتحسي إنك مرتاحة ومتطمنة أوي بجد والله الناس ال هقولك عليها دي كانو السبب في أي حاجة حلوة ف حياتي وساعدني تتخطى أي مشكلة.بفضل الله ثم بفضلهم بقيت قريبة من ربنا أو على الأقل بحاول أكون مسلمة صالحة يحبها الله ورسوله ،بسمعهم على اليوتيوب.الشيخ/(محمد الغليظ ،علاء حامد ،حازم شومان ،د/هالة سمير). بودكاست "وعي ".و بودكاست "إيه المشكلة" والله والله يا جميلة ما هتندمي لحظة أنك سمعتيهم ،ناس بسيطة وجميلة ومثقفة دينيا ًو دنيويا ً .هتحسي كأنهم صحبة ليكي وحرفيا كلامهم مريح للقلب وبيضحكوا ويهزروا برضه مش ناس متشددة وكده ، يعني اكتر حاجة بحبها ف يومي أما مثلاً أجيب أي وجبة خفيفة كده ولا مشروب وابعد مثلاً أسمع حلقة من بودكاست وعي وأصلا ال ف البودكاست دول شباب ف هتحسي أن فاهمين دماغك جدا وواقعيين .اساميهم.. المهندس (احمد عامر شريف علي ،حازم الصديق) بجد ما شاء الله اللهم بارك يعني أنا بكتبلك دلوقتي وانا بجد من جوايا فرحانة إنك هتتعرفي على الناس دي وإن حياتك بعون الله هتتغير للاحسن من وقت ما تسمعيلهم إن شاء الله. أنسي كل الفات وبدأي من جديد. والسلام على قلبِك حتى يهدأ ويطمئِن 🤎 🌿.