Mohamed Adel

يبقى تعلق مرضى لو الشخص علطول ٢٤ ساعة بتفكري فيه و بسيناريوهات في دماغك و بتفتحي تراقبيه كل شوية سوشيال و هكذا كدا ساعتها هو في مشكلة و السبب زي ما بيتقال دايما. التعلق بالأشخاص من الخارج بسبب الحاجة لتغيير شعور من الداخل فانتي عندك فراغ او فقد مشاعر معينة محستيش بيها من و انتي صغيرة فبتعوضي الشعور ده من اي حد بتشوفيه بس ده مش الحل، الحل اي حد بتحسي ناحيته بتعلق مبالغ فيه ابعدي لانك علشان تخليه هو كمان يعجب بيكي انتي بتبذلي مجهود و طاقة كبيرة و على الفاضي ابعدي و حاولي تملي مشاعرك اللي نقصاكي بطريقة تانية

لو معندوش نية جواز بيعلقك بيه ليه ، بصي يا ست الكل أعرف واحد صاحبي مكنش حيلته حاجة خالص بس كان معجب بواحدة راح البيت لابوها كلمه بشكل رسمي على خطوبة و علشان يبقى أهلها عارفين لحد ما كون نفسه و اتجوزها فهو الراجل لما بيحب بيبقى خايف ان اللي بيحبها تروح منه او تكون لغيره بيبقى بيعمل المستحيل علشان تكون ليه لكن هو عمل ايه؟؟ ، انتي لو جالك عريس دلوقتي هو ميقدرش يقول حاجة هو مخدش اي خطوة اصلا، فهو لو بيحبك بجد على الاقل هيكلم اهلك و يعرفهم ظروفه او يقول معاد معين للخطوبة او حتى قراية فاتحة

بجانب أن العلاقة دي لا ترضي الله، انت عايز ترجع تفتح في موضوع انتهى من سنة لييه فرضا هي قدرت تتخطى الموضوع و اتنسي خلاص و انت اهلك كدا كدا رافضين و الموضوع خلص بعد سنة ارجع اكلمها تاني أو اكلم والدتها علشان تشرحلها ايه ان انت كنت حابب تكمل بس اهلك رافضين!! ما طالما مش هتاخد الخطوة و تتجوزها فعلا خلاص امشي و اقفل الباب خالص بقي و انساه و هي كمان هتنساه

سؤال حلو اوي و كلنا كان عندنا المشكلة دي بس بشكل نظري كلامك صح لكن الموضوع على ارض الواقع مختلف خالص انتي ممكن تخططي لحاجة كتير جدا و مجهزة الخطة و اول ما تبدأي يقابلك مشكلة معينة تغير كل اللي انتي خططيله فانا ممكن افكر و ادرس الحاجة اة بس مش بشكل عميق اوي لدرجة تخليني اني مبداش اصلا لان و انا ماشي في الموضوع في عوامل خارجية كتير هتأثر معايا و ببقى طبعا متقبل ده و يبقى عندي مرونة ازاي اتعامل مع المواقف دي و انا ماشي و تاني حاجة بتخافي تبقى غلط ، طب ما تبقى غلط ما كلنا بنغلط و كل الناس في بدايتها ياما غلطت و بهدلت الدنيا و ياما خسروا فلوس في تجارب بس كل تجربة بيبقى فيها استفادة طبعا و كل ما بنغلط بنتعلم فخدي الموضوع ببساطة انتي لسه مجربتيش علشان تحكمي و زي ما بيتقال الخوف قبل التجربة عجز و تجربة كل واحد مختلفة عن التاني فجربي انتي بنفسك اكيد ده احسن بعد فترة لما يبقي جربتي حاجات كتير و فهمتي نفسك اكتر أحسن من انك واقفة مكانك خايفة تاخدي اي خطوة و تالت حاجة بحس الموضوع طويل عن الوقت اللي محدداه بصي ده اسلوب عموما بيخليكي مع الوقت لو محققتش التارجت بتاعك فهتبطلي او هيجيلك إحباط عموما ده مش احسن حاجة الصح اني بكون عادة معينة و استمر عليها و النتيجة هتيجي مع الوقت بس انا مركز اني محافظ على حاجات معينة بعملها يوميا اكيد بعد شهر أو ٣ شهور او سنة هيبقي في فرق كبير جداا عن بدايتي و لو عايزة تحطي هدف يبقى هدف يومي و يكون منطقي لكن متحطيش هدف اني بعد شهر أو ٢ هكون وصلت لكذا لان ده مش شرط يحصل فهتحسي انك خططتي غلط فممكن تبطلي خالص

هو الموضوع منتهي اصلا بس خلينا نتفق إن انتي عندك فضول بس تعرفي هو ليه عمل كدا و هل المشكلة كانت مني ولا لا او عايزة تعرفي الأسباب و الدوافع بتاعته مش اكتر لكن فرضا كلمتيه و قالك اي سبب هل هتقتنعي و هترجعيله ؟؟ اتوقع الإجابة ١٠٠ ٪ لا، لانه محترمش اي حاجة بينكوا اصلا و هرب و هو نفسه لو حب يرجع تاني المفروض يلاقي منك صد و انك معززة نفسك و انتي اللي مش عايزة ترجعي لانه حتى مكنش عنده الجرأة يوضح و يمشي بشياكة و لو اجاباتك آه اتمنى تراجعي نفسك و حساباتك تاني.

اولا لازم نتفق في حرمانية العلاقة دي من الأول و انتي اكيد عارفة كدا، ثانيا دي هتبقي علاقة صعبة اوي و الله انتي عارفة يعني ايه حد يكدب في الحاجات ال basic الشكل او السن او الوظيفة مثلا طب ده تقدري تثقي فيه ازاي قدام مثلا ده بالكذب اللي كذبه ده كله واثقة منين ان ٥ او ٦ شهور هينزل فعلا ما يمكن كدبة برضو و لو نزل هياخد خطوة ولا بيكدب برضو تقعدي كل حاجة تسألي نفسك السؤال ده هيبقي في انعدام ثقة رهيب ده هو مش واثق في نفسه هتثقي فيه انتي ازاي، طب هو كدب في السن و الشكل ليه مالهم يعني شكله فيه ايه غلط طب و سنه كبير اوي يعني ولا ايه و كمان كدب في الحياة اللي قعد يوهمك بيها هتتعبي اوي بجد لان الكدب اصلا في حاجات زي دي لا تغتفر و بعدين كدبه في ده اصلا هو كدا غير متصالح مع نفسه و غير راضي عن حياته و شكله دي حاجات هتبرز اوي في شخصيته حتى بعد الجواز

عن تجربة لازم يبقى في روتين ليومك تمشي عليه و بشكل عام علشان الواحد يبقى شخص متزن لازم يبقى متزن من ٣ حاجات روح و نفس و جسد فاحنا بنشتغل على التلاتة، من ناحية روحانية الصلاة و الصوم و الورد و الدعاء و اذكار الصباح و المساء و الصلاة الإبراهيمية و النوافل اشتغلي عليهم تدريجي في يومك لانه هيفرق جدااا و من ناحية الجسد روتين للبشرة و تمرين و نظام غذائي و نفسي هشتغل عليها كورسات في مجالي او تدريبات أو حاجات تطوعية او اقرا كتب و أطور نفسي في اللغة و غيره و طبعا اطور علاقتي بأهلي و اصحابي و ازود دايرة معارفي يبقى انا بحاول اوفق بين ال ٣ حاجات دول و مش لازم نفس اللي انا كاتبه انا بفكر معاكي بس بصوت عالي لكن اعملي الروتين اللي يناسبك انتي لأهدافك انتي بس كدا و في كتاب اسمه أربعون لأحمد الشقيري جميل جدا ممكن تقريه

ده قرارك و هو قرار صح جدا، عن تجربة شخصية من حوالي ٤ سنين كنت بكلم واحدة كان كلام عادي يعني و زميلة دراسة و هي قالتلي قرارها ده بالظبط زيك كدا قالتلي احنا كدا في علاقة محرمة و مش هينفع نتكلم تاني انا احترمت رأيها جدا و مكلمتهاش من وقتها بس وقفت انا وقفة مع نفسي برضو هو اللي كنت بعمله ده غلط ليه اصلا ده كان مجرد كلام عادي فبدأت ادور انا كمان و ابحث يعني و من وقتها مكلمتش بنات تاني إلا في حدود شغل او دراسة بس فده قرارك و انتي بتعاملي ربنا في الأول و الاخر بس قبل ما تمسحي أرقام او تقطعي الصلة عرفيه السبب لعله يتوب او انتي تبقي سبب في توبته برضو و ربنا يوفقك

و انت بألف خير و سلامة ♥️ و ربنا يتقبل منا صالح الأعمال و يرزقنا الخير و البركة

أولا الحمد لله اننا داخلين على رمضان و كل سنة و انت طيب مفيش أحسن من كدا فرصة بص خليك صادق مع ربنا و ابعد عن كل الحاجات اللي ممكن تثيرك من سوشيال او مواقع و في طريقة ممكن تغير بيها ip address بتاع الواي فاي يمنعك من اي موقع من دول مش هيفتح معاك و ابعد عن كل القرف ده و نزل تطبيق واعي و كل ما تضعف اسمع فيديو او بودكاست صغير بخصوص الموضوع ده يفكرك بهدفك الاساسي انك عايز تبطل فعلا و انك خايف من عقاب ربنا و كرهت حياتك و قلة ثقتك بنفسك و الأعراض الكتير بتاعتها انت اكيد عارف هي أثرت عليك سلبي في حاجات قد ايه و افتكر انك عاهدت ربنا على ده و اعمل اي حاجة بقي غير انك تنعزل مع نفسك يعني رمضان في حاجات كتير تتعمل كويسة و الناس هتشجعك عليها و طبعا هتصلي التراويح و تصوم و تقرا قرآن و تدعي كل ده يساعدك إن شاء الله. و من ناحية علمية برضو ان في حاجة اسمها الناصية او prefrontal Cortex في مقدمة الرأس مسئولة عن اتخاذ القرارات و الإبداع و مع العادة دي او الإدمان بشكل عام بتضعف و بتضطرب فكانك مش عارف تسيطر عليها و من جانب اخر الدوبامين اللي بيجيلك من العادة او المحرمات عموما عالي و قوي و انت ناصيتك ضعيفة فبتلجئ للفعل ده طب الحل ايه اني احاول اشوف حاجات تانية مفيدة تديلي دوبامين كويس و اشتغل اني ازاي اطور و احسن من الجزء ده في الدماغ فبعد كدا تقدر تاخد قرارتك بشكل صح و تحس انك قادر تتحكم و تقول لا انا مش هعمل كدا و تقدر ساعتها تسيطر على قراراتك.

قبل الحل و العلاج اسألي نفسك السؤال ده شايفة نفسك تستاهل منك تعذبيها و تبهدليها البهدلة دي علشان واحد ايا يكن هو مين؟ انتي حاطة نفسك في حرب و انتي الخسران الوحيد هو يبنتي مش شايفك ولا شايف المعاناه اللي انتي فيها دي هو من بدري شايف حياته و بينبسط و حياته مكملة عادي انتي اللي حياتك وقفت بسببه الدنيا فيها ناس كتير كويسة و هو كان اختيار غلط خلاص مبهدلش نفسي كدا الحل أولا أمسحي اي صلة تربطك بيه أرقام او سوشيال امسحيه من حياتك كلها اعملي delete لكل الذكريات و لا كأنك قابلتيه في حياتك و تتوجهي انك تقربي من ربنا بالدعاء ان ربنا يصبرك بقي و يطلعه من دماغك خالص و ادعي باللي نفسك فيه كله و الصلاة طبعا و ركعتين قيام ليل و تالت حاجة اشتغلي نفسك شغل او مذاكرة اي حاجة تطوري نفسك و شوفى ناس و املي يومك بعد فترة لو جيتي تفتكري السيرة دي تاني و الله هتلاقي نفسك عادي جدا ولا في مشاعر ولا هو بقي فارقلك اصلا انتي علشان موقفة حياتك عليه عندك الاحاسيس دي و لانه كان بيملي فجوة فقدان الاب لكن هو من منظور بعيد هو عادي جدا و فيه احسن منه مليون مرة و ربنا هيعوضك انتي لسه صغيرة جدا و افتكري ان هو فعلا محبكيش من البداية ممكن حب اهتمامك بيه او اي سبب لكن محبكيش لشخصك و كلامي عارف انه هيوجعك و شديد شوية بس علشان لازم تفوقي اني اوصل نفسي للمشاكل الجسدية و النفسية دي كلها علشان حد يبقى لازم أقف واقفة مع نفسي و اعيد حساباتي هو الاولوية لمين قبلي؟ انا بحط الاولويه لنفسي و اي حد تحتي مش العكس

بصي هي مشكلة كبيرة إن أغلبية الأهالي ميعرفوش يعبروا عن حبهم او اهتمامهم او خوفهم على عيالهم تحسي في جفاف كدا ده ممكن يخليكي تفهميهم غلط او تحسي انهم مش بيحبوكي ولا انتي فارقة معاهم و حاجات كتير الشيطان يخليها تسيطر عليكي ولكن الحقيقة مش كدا خالص اولا خليكي على يقين ان اهلك بيحبوكي و خايفين عليكي و على مستقبلك بس ممكن معرفوش يوصلوا ده ثانيا ركزي في مذاكرتك دي أهم حاجة و انتي في ٣ ث و سنة مهمة بالنسبالك و لما ينادوا عليكي لو حاجات ضرورية روحلهم طبعا لو حاجات و طلبات بتلهيكي كتير و عندك اخوات عرفيهم انك بتذاكري و عندك امتحانات ممكن حد من اخواتك يعملها هو و يساعدك انا بالنسبالي مثلا في ٣ ث اتفقت معاهم محدش يشغلني عن مذاكرتي و كانوا يطلبوا من اخواتي اي حاجة و هما لما كانوا في ٣ ث كانوا بيطلبوا مني انا و هكذا بنشيل بعض و ان شاء الله تجيبي مجموع كويس و تدخلي الكلية اللي نفسك فيها

اولا ربنا يرحم والدك و يرزقه فسيح جناته، ثانيا القلق هيستنزف منك كتير اوي انتي الحمد لله مامتك لسه عايشة و ربنا يخليهالك ليه افضل افكر طول الوقت في فقدها و هي الحمد لله عايشة و وسطكوا انا عارف ده بسبب وفاة والدك في سن صغير أثر عليك و خلاكي مش حاسه بالأمان بس انتي دلوقتي الحمد لله ربنا كارمك و مامتك بخير استمتعي باللحظات و بيومك مع الناس اللي بتحبيهم متخليش التوتر يسرق عمرك و تندمي قدام أن انتي مستمتعيش بحياتك مع ناس هما جنبك دلوقتي و المستقبل كدا كدا بايد ربنا متشغليش بالك بحاجة و خلي عندك يقين و الخناقات في البيت حتى لو انتي أصغر واحدة عادي تكلمي اخواتك تقوليلهم مامتكوا كبرت و مبقتش مستحملة زي الاول خفوا شوية و يصالحوها انتي كدا مش بتعلميهم الادب يعني خالص ولا دا حاجة غلط و صلى قيام ليل و ادعي ربنا بكل اللي في نفسك و ان شاء الله القلق ده هيروح

ازاي عايز تكون صحاب و الناس تحبك و انت اصلا مش حابب نفسك ولا شكلك؟ شوف مشاكلك ايه واحدة واحدة و حلها مش عاجبك حاجة في شكلك غيرها مش عاجبك جسمك ظبطه مش عجباك شخصيتك غيرها دي حاجة مكتسبة و بتطور مع الوقت كل حاجة ممكن تتغير بس اشتغل على نفسك و حبها أولا على اي وضع دي نفسك كدا كدا لازم تبقى حاببها حتى لو مش احسن حاجة هو مش حب مشروط هحب نفسي في حالات معينة و بشكل معين انت لازم تبقى حاببها كدا ايا يكن وضعها ايه بس تسعى لتغيرها و بعدين مش فاهم يعني ايه بنات مبيحبوش ولاد و الوان و بتشوف الموضوع ده كتير فين هو احنا في شيكاغو

بص مبدأيا انا كنت ساكن في منطقة شعبية و قعدت سنين و عمري ما عملت خناقة او شتمت ولا اتشتمت من حد فنجيب الموضوع من الأول ايه اللي هيولد مشكلة او خناقة اصلا ما كل واحد في حاله و ماشية و بنتعامل مع الناس و بالعقل و كله بالطريقة و بالكلمة الحلوة ده ساعات ياخي بيبقى في خناقات كتير ممكن تحصل و هو واحد جاية في دماغه يتخانق معاك تقوله كلمتين حلوين و لسانك الحلو يخليه يلين و يقولك حصل خير يا صاحبي و يبوسك كمان و يمشي متراضي 😂 مش ضعف منك ولا خوف خالص بس طريقة تعامل شوف اللي قدامك و اتعامل على حسب عقليته خده على قد عقله هتلاقيه زي الطفل و قلبه ابيض لكن هتخشوا انتوا الاتنين ب attitude مين اجمد و مين أقوى و شتايم انت بتفتح على نفسك سكة كنت ممكن تخلصها بكلمتين اصلا و لكن مبقولكش تبقى ضعيف ولا جبان يعني شباب مثلا بيعاكسوا بنت او حاجة كدا دخلت تحل لقيت الموضوع مش جاي كلام ما انت مش هتسيبها و تمشي ده موقف بتتعامل فيه بقي لان رجولتك بتحركك وقتها او لو حد من اهل بيتك بيتعرض لاذي ولازم تدافع عنه دي حاجات لازم لكن مش ماشي على الفاضي و المليان تتعارك مع طوب الأرض بتبدأ كلام و حل ودي ده أول حاجة لانك مش بتسعي للخناقة في المقام الأول انت بتحاول تتجنبها بس لو اضطريت ليها تسد

باين من كلامك حبك اوى و شغفك للكروشيه و ده يخليكي تبدعي فيه بس انا دايما بشوف النقل من مكان لمكان او الشيفت كارير عموما محتاج دراسة شوية بمعنى احنا هننقل خلاص و واخدين القرار لان دي الحاجة اللي بنحبها بس التوقيت و تظبيط الشغل هبص من كذا زاوية الالتزامات اللي عليا دلوقتي مش عليكي مثلا اي التزامات و لا اقساط ولا حاجة و مجال انتي خبرة فيه و ليكي عملاء اتوكلي على الله علطول لكن لو كنتي لسه مبتدئة الكلام كان هيبقي مختلف لا انا ابدا بصفحة أعرض عليها شغلي و اتعرف و اكسب عملاء و لما صفحتي تكبر و الموضوع يخش في الجد اسيب الشغل ساعتها و انا مطمن اني رايح على حاجة واضحة مجريتش ورا شغفي و خلاص من غير خطوات مدروسة لكن انتي ال case بتاعتك مش كدا و ربنا يكرمك و يوفقك في قرارك ده

ربنا يرحمها و يغفرلها، بصي أنا عارف انتي بتتكلمي في إيه كويس و اغلبنا حصله كدا لان دي سنة الحياة و كلنا هنموت و ده قدر ربنا و احنا مؤمنين و موحدين بالله و مؤمنين بالقدر خيره و شره لكن ده انا مقدرش اسيطر عليه أو اغيره ده مكتوب لكن اقدر اغير رد فعلي أنا اني ابقى شخص قوي و مسئول حصلي موقف صعب هقرالها قرآن و ادعيلها لكن مخليش الموضوع يسيطر على حياتي لان الحياة مش كدا انا ليا أصدقاء كتير منهم والدتهم توفت في آخر شهر أو شهرين قبل امتحان ٣ ث و في كليات قمة دلوقتي لان رد فعلهم انا عايز اخلي والدتي تبقى فخورة بيا حتى و هي متوفية و مش موجودة هنا رد فعلهم كان حافز زيادة ليهم و في كتير بيحصلهم حالات وفاة او اهاليهم في المستشفى أمراض خطيرة او عمليات ممكن ياخد اجازة من الشغل اسبوع طب و بعد الأسبوع؟! بيرجع يكمل اللي بدأه لانه احساسه بالالتزام و المسئولية أكبر فمن رأيي اقرأي قرآن ليها و ادعيلها و ادعي ربنا يثبتك و يقويكي و خلي ده يبقى حافز ليكي انك توصلي لحاجة كويسة و تقدير عالي يخلي اهلك فخورين بيكي و متخذلهمش لأنهم حاطين آمال كبيرة عليكي مش علشان تشتغلي و تساعدي ماديا الأهالي نفسهم يشوفوا ابنهم او بنتهم كويسين و بس حتى لو لا قدر الله مجبتيش أعلى حاجة هيفضلوا فخورين بيكي يكفي إنك بتحاولي و ربنا يوفقك يا رب

حاجة كمان لو كنت سمعت أن مركز التدريب في الجيش كان ٣ شهور في عدد كبير جدا قدر يبطل في المدة دي بعد إدمان سنين طب إزاي؟ لو شوفت اليوم ماشي ازاي مش هتلاقي حاجة مختلفة عن أي حاجة حد هيقولهالك هو يومه بياكل و يشرب و ينام بدري و يتدرب و معاه ناس تشجعه على الصلاة و معهوش موبايل بس كدا فلما تسأل اي حد ابطل ازاي هيقولك اعمل عادات مفيدة و اتمرن و صلى و قرب من ربنا ما هي فعلا دي الحلول بس الحاجة اللي فرقته عنك هو الموبايل هو معهوش موبايل فشهوته اطفت شوية لكن انت معاك هو قدر يكمل ل 90 لانه مانع خالص لكن انت ممكن بعد خمس أيام التزام تمسك الموبايل تشوف reel ولا TikTok شهوتك زادت حبة حبة مبقتش قادر و مش عارف ابطل او رحت مكان ما و مغضتش بصرك ده الفرق هو شال البنزين خالص لكن انت حاطط البنزين جنب النار فمتصعبهاش عليك اقفل المواقع او السوشيال دي نقطة مهمة جداااا لو معملتش جدا انت بتصعبها على نفسك امنع الحاجات دي و هتبطل 100٪ لان دي فعلا كانت من تجارب حقيقية

مفيش حل قدامك غير انك هتفضل تجاهد نفسك و تحاول و بس لاخر يوم في عمرك دي قضية بالنسبالك بتجاهد نفسك انك تبطلها و اوعي الشيطان يخشلك من ناحية خلاص ما انت بتحاول بقالك سنين مش عارف اتعود بقي و بطل تحاول فتنسي انه ذنب و تألف الموضوع. لا مش كدا خالص انت مكمل و بتحاول و بتنتكس او بيبقى في زلات بس احسن من الاول و كل ما تغلط مثلا عاهد ربنا تعمل قدامها طاعة مع كل غلطة هتقوم تقرأ قرآن و تعمل قصادها خير مع الوقت إن شاء الله ربنا يتوب عليك منها بس متيأسش.

طب بص يا صاحبي انت ممكن شوفت كدا فعلا ماشي بس في اللي انت بتقوله ده يقع تحت المغالطات المنطقية تعميم كل من جزء انت شوفت كدا مرة اتنين تلاتة يعم 10 من أصل كام بقي ، في كتير محترمين و على الفطرة عادي يعني مثال تاني كل البنات اللي بترقص على تيك توك ده يخليني اقول ان البنات كلها كدا!؟ لا طبعا في بنات كتير اوي لسه متدينين و بيخافوا ربنا و مبيكلموش ولاد اصلا إلا في اضيق الحدود فهو عموما انت في الدنيا دي بتشوف كل حاجة بس مش بتعمم وضع دي حاجة غلط جدا

انا مش دكتور نفساني و مش مكدب كلامك بس مش فاهم اخر جملة بجد طب شوفتوا فين على أرض الواقع و أماكن عامة ولا على نت يعني

هناخده درس و نتعلم منه بس أهم حاجة الموضوع ده ميوصلناش لدرجة انعدام الثقة في الناس بشكل عام او احاسيس كره هو موقف يضايق و حقك طبعا بس مش عايز الموضوع يتطور معاكي لان زي ما في الحلو في الوحش برضو و في صحاب كتير جدعان و بيقفوا مع صحابهم و يساندوهم ، ربنا يرزقك بيهم و يريح بالك

اولا انا معرفش انتي متأكدة اوي ليه انها سرقتك بس اياكي و الظلم عموما بقول ده ليكي و الله علشان متاخديش ذنب شخص قد يكون برئ و خاصة انها أنكرت هحط احتمال ١ ٪ انها ممكن تكون هي الصح و صادقة فعلا، ثانيا دي واحدة كانت صاحبتك لو قولتلك افتكري ليها اي حاجة كويسة مفيش خالص؟!! هي ممكن مكنش معاها تجيب هدية فرضا بس هل كانت فاكرة عيد ميلادك طب حتى لو كل سنة و انتي طيبة تليفون ولا واتس ، في اهتمام من اي نوع اي موقف كويس عملته معاكي ما مش شرط حاجة مادية، فكري مع نفسك طب كدا لاي حاجة حلوة ليها حتى لو معنوية او بتساعدك و واقفة معاكي في اي موقف صعب لو مفيش خالص يبقى اختياراتك كانت غلط و متلوميش نفسك بقي و اديكي اتعلمتي و حاولي بعد كدا اي علاقة صداقة عموما خلي الموضوع رايح جاي طرفين بيستفيدوا من بعض و بيتطورا نفس الاهتمامات او الفكر و غيره متديش كل حاجة لشخص مش مهتم و مبيديش حاجة و دي اول حاجه هتتقال لو عاتبتيه هيقولك انا مطلبتش منك حاجة انتي عملتي كل حاجة بمزاجك

انتظمي على قيام الليل و ادعي ربنا علطول يبعد عنه الأفكار دي و سانديه في المشكلة اللي هو فيها انتي ملجأه الوحيد حاولي تغيريه و ان شاء الله ربنا يتوب عليه و يسعدكوا

و سؤالي ده علشان باين من كلامك انه شخص انتي بتشوفيه face to face لانك مدياله بلوك من كل حتة فمفيش طريقة تواصل و ده على الرغم من انك بتحبيه جدا و كان حب عمرك فده معناه انه هو اللي اذاكي فانتي قررتي تنسيه و تعملي بلوك و تصرفه ده المفروض ناتج من اذى انتي اللي سببتهوله بس عموما ربنا يريح بالك و يرزقك العوض و تقدري تتخطى الموضوع

هسألك سؤال هو مش هجوم ليكي خالص بس كاستفسار هو مفيش حد هيعمل الحركة بتاعته دي غير انه حبك اوووي و انتي جرحتيه جامد بطريقة ما فتحول شعوره لانتقام لو مكنش كدا يبقى هو مجنون و شخص مش سوي و انتي خسارة فيه و الله انك شخص بيسعي و يحاول يساعد حد و يعمل معاكي كدا فاللي زي ده لما تتجاهليه هتضايقيه اكتر لما تحسسيه انه مش فارق معاكي خاطب ولا اتجوز ولا ايا يكن هيبقي انتي اللي كسرتيه ساعتها مش هو اللي كسرك حتى لو مش ده احساسك الداخلي بس حسسيه بكدا

الشواذ دول ناس بيفضلوا علاقة من نوع النوع اتنين رجالة مثلا و الدياثة واحد مش بيغير على أهل بيته فالاتنين ميعتبرش حاجة منهم بس هو يعتبر شخص مريض و تفكيره الجنسي مش متزن و مش ماشي بالنهج الصح لان مفيش اي حاجة دينية بتوضح الأحكام و العلاقة الشرعية الصحيحة فيها الأسلوب ده نهائي و دي حاجة تغضب ربنا

هو ده مش تفكير الرجال ولا عمره هيبقي تفكير رجال ده تفكير شخص مريض مش اكتر في الأغلب هو قبل ما يتزوج كان بيتفرج على أنماط كتير من أفلام إباحية منافية للمبادئ و القيم و الفطرة فكانت بتديله دوبامين عالى و مبقاش يستمتع غير كدا و اللي بيعمله ده اسمه مازوخية و مليون في المية هو باين في شخصيته لان الراجل عموما في العلاقة هو نتاج لفكره اصلا هو فكر ذكوري ولا انثوي هو حاليا تفكير انثوي و اكيد باين في شخصيته في الحياة الاجتماعية و الزوجية و المهنية لكن الراجل اللي بجد عمره ما يفكر كدا لان تفكيره كراجل بيدفعه انه يقود و يسيطر في اي في حياته و في العلاقة و يبقى متحكم مش عكس كده خاااالص و هو محتاج علاج و العلاقة الزوجية اة بالاتفاق و نشوف بنحب ايه و منحبش ايه بس مش كدااا بتبقي في حاجات تانية مش محتاج اوضحها و ربنا يبعدكوا عن الحرام و يهديه و يرجع بعقله و اكيد طبعا انتي مينفعش تستجيبي أفكاره دي

كنت نفس المشكلة دي عادي جداا علشان الشرح بيقول الكونسيبت لكن الأسئلة فيها افكار متنوعة شوف اسئلة كتير و اتدرب عليها

و الله كلامك مظبوط و فعلا حتى لو هو منجذب، دينيا هي علاقة غير شرعية لا ترضي الله و هو لو منجذب فعلا يدخل البيت من بابه ليا واحد صاحبي أعجب بواحدة راح البيت لابوها يكلمه علطول و يمشي في خطوات رسمية فعززي نفسك و حطي ضوابط و ربنا يكتبلك الخير

يعني انتي حبيتي واحد و هو كان عنده حبيبة قديمة رجعلها و هو كان يعرفك وقتها بس مكنش شايفك و استبن او حبك مضمون بالنسباله رجع لحبيبته و لما لقى مفيش نصيب و سابها قال يرجعلك تاني بقي انتي اللي موجودة علطول مدياله الاهتمام، طب تضمني منين أن هو اللي سابها مش هي اللي سابته و هو لسه بيحبها و بيموف اون بيكي ده واحد و ماذا لو شاءت الاقدار و هي رجعت كلمته تاني ندمانة عايزة ترجع و قلبه رجع رفرف تاني ، حب يرجع تاني تعملي ايه ساعتها طب بالنسبة للشخص اللي انتي اتعرفتي عليه بعده و حبيتيه و هو اتعلق بيها مفكرتيش في مشاعره لما تسيبه و ترجعي لواحد كان سابك اصلا علشان يرجع لواحدة انا مش عارف بجد بتعملوا في قلوبكوا كدا ليه و بتلحقوا تحبوا و تخشوا العلاقات دي بسرعة كدا ازاي

نيجي لأول نقطة خايفة و حاسة ان الناس بتتكلم عليكي آه عادي كلنا الناس بتتكلم علينا و الله لو مش قدامنا في ضهرنا مفيش حد الناس بتتفق عليه حتى الناجح و الواثق في نفسه بيتكلموا عليه برضو فدى مش هتقدرى تمنعيها حتى الرسل في ناس كذبوهم و تعرضوا للاذي في دعوتهم و نقطة تعرضك للتنمر دي ناس مش متربية و الله ده شئ لا يعيبك خالص و المشكلة مش فيكي فيهم هما، هما اللي ناس معقدة و متربوش صح لا دينيا ولا اجتماعيا حاولي تتخطى و نروح لتالت نقطة بقي بخاف و مش واثقة في نفسي دي حاجات في الأول و الأخر مكتسبة اشتغلي على نفسك حبيها و طوريها هتلاقي مع الوقت ثقتك بتزيد و مش تخافي محدش بيتولد واثق من نفسه كله بيتعلم و بيكتسبها مع الوقت

انا مستغرب ان ممكن بنت تسأل السؤال ده بنبقي مفضوحين جدا يعني، بيبان من طريقته معاكي و كلامه و اسلوبه و بيحاول يتكلم معاكي كتير و هتلاقيه مهتم بس كدا

في فرق بين الالتزام و الحرمان انتي عايزة تخسي ده الهدف و في مليون طريقة تحققي بيها الهدف ده من غير ما تكدري نفسك لانك لو مش مبسوطة ما ده اكيد هيأثر عليكي نفسيا و بالتالي مش هتخسي برضو فانتي تشوفي طرق تحبيها او تتقبليها و تلتزمي بيها لان الالتزام اهم حاجة و الاستمرارية ، يعني عادي حاولي توصلي لهدفك بطرق تانية اكيد في دكاترة تغذية شاطرين عندهم بدائل لكل اكل معين انتي مثلا بتحبيه يقولك بديل تاني مكانه يساعدك في هدفك تكوني بتحبيه برضو و لو نفسك في حاجة متحرميش نفسك منها بس خلي في اعتدال و تحكم في الكميات و كدا و خليه ليوم فري او ايام محددة في الأسبوع مش يوميا و اتحركي او انزلي جيم لو مش حابة الجيم في بدائل برضو اعملي كارديو او تمارين من البيت كل حاجه ليها بديل متحرميش نفسك اوي و تغذبيها خلي الموضوع يبقى مسلي او الرحلة لطيفة شوية بس التزام و استمرارية و آخر حاجة انتي بتعملي ده لنفسك في الأول و الاخر مش مهم الناس بيقولوا تخينة ولا لا مش قصتهم ولا رأيهم يشغلك انتي بتعملي حاجة لنفسك و لصحتك و علشان انتي حابة كدا مش علشان النااس

بصي مش عايز اقولك اكيد التعبير خانها او انها قالتها بطريقة مش شيك و كدا لان عموما في حياتك كلها ممكن تبقى شاطرة جدااا و كفاءة و هتتعرضي للرفض ده لازم كدا كدا بيحصل و في اللي هيرفض بطريقة شيك و في اللي هتبقي طريقته محرجة ففي كل الحالات دي حاجة هتتعرضي ليها في حياتك كتير اوي و هي قالتلك مش محتاجين حد دلوقتي عندنا بديل خلاص السبب واضح و مش نهاية الكون هشوف نشاط غيره او مكان غيره و كدا بس تقبلي ان الرفض عموما مش معناه اني وحش او اخاف أشارك بعد كدا لا خالص بشوف مميزات و عيوب الموضوع ببساطة خالص بشوف المشاكل فين و احلها و اروح اشوف نشاط غيره خدي الموضوع ببساطة

هو ممكن عادي حد يحصله كدا فترة في حياته بس عموما علشان حد يجاوبك على سؤال زي ده هو اكيد محتاج تفاصيل اكتر الإحساس ده عندك بقاله اد ايه اسبوع ولا شهر ولا شهور كتير و انتي اول مرة حستيه من امتي و الوضع في البيت عموما مستقر ولا في مشاكل معينة أثرت عليكي و خليتك تحسي بكدا و أهم حاجة فيهم علاقتك بربنا عاملة ازاي بتصلي وكله تمام ولا بعيدة و عموما ممكن يبقى فترة المراهقة بس و تعديها تلاقي الدنيا تمام بس نرجع و نقول الدين و الدعاء هو الحل لكل حاجة هو اللي بيضيع الحزن و القلق و التوتر و الاكتئاب و بجانب الدين اشغلي وقتك بحاجة مفيدة تحسسك بذاتك و تحسي ان يومك مهم و ان شاء الله الإحساس اللي عندك ده يروح

لا إله إلا الله، ساعات كتير مبفهمش تفكير الأهالي الصراحة يعني الحمد لله انتوا بتحبوا بعض و متجوزين من ١٠ سنين و بينكوا عشره كبيرة و في الأول و الاخر ده اختبار من ربنا ليكوا و ربنا بيقول و يجعل من يشاء عقيما انه عليم قدير، فالقرار في الأول و الاخر ليكوا انتوا و شايف انهم المفروض يتقبلوا الوضع و يحترموا قراركم و انتوا مش بتعملوا حاجة غلط و حاولي تقنعيهم تاني واحدة واحدة لأنهم اهلك و تتكلمي معاهم و تعرفيهم اد ايه الموضوع هيفرق معاكي و انك مفتقدة لاحساس الأمومة و هما إن شاء الله مع الوقت هيتقبلوا الوضع

مساء الخير، و الله انا زيك بالظبط لسه متخرج من هندسة و عمال اخبط يمين و شمال انترفيوهات اد كدا و internships و كورسات و لسه ملقتش حاجة مناسبة. و المرتبات مش احسن حاجة بس هنعمل ايه يا صاحبي ادينا بنسعي و نحاول و الحمد لله ربنا كرمك بشغل اوعى تسيبه غير لما تلاقي غيره و أفضل ابعت ال CV بتاعك و متمشيش غير لما تلاقي فرصة أفضل علشان متقعدش في البيت، قعدة البيت وحشة و لو ناوي تعمل ماجستير ربنا يكرمك و يوفقك بس انا وجهة نظري يا تعمله بجانب الشغل او اي مصدر دخل ليك او تاخد مسار أكاديمي و تبقى معيد مثلا و ربنا يكرمك و يكرمني

ربنا يشفيكي و تبقى كويسة إن شاء الله بس مش فاهم ليه اعتبرتي ان ان حالتك نفسية مش جسدية رحتي لدكاترة قالوا انك كويسة و مفيكيش حاجة ؟

ألف سلامة عليك و الحمد لله انك كويس دلوقتي و متقلقش لسه معاك وقت انت اعمل خطة كدا تحاول بيها تشوف اللي فاتك و هتتعب شوية دلوقتي و اول ما المراجعات تبدأ كل ده بيتظبط و هتتعود على الأسئلة و هتلاقيها بتتكرر و الدنيا هتبقي كويسة إن شاء الله

احنا بشر و لازم بيجي علينا فترات كتير مش بنبقي في أحسن حالاتنا او زي ما بيقولوا ال peak point فده شئ طبيعي بس لما تتخنقي حاولي تعرفي أو تفهمي نفسك شوية بتحبي ايه يخرجك من المود ده و يجدد طاقتك علشان نرجع تاني للي بدأناه و نستمر و بالنسبة لثانوية عامة اعملي اللي عليكي و متقلقيش و متفكريش في نتيجة ربنا هيحطك في الطريق الصح و مش عايز اصدمك يعني ان حالة التوهان و إحساس اني محققتش حاجة دي بيفضل مستمر حتى بعد ثانوي يعني عادي لان تفكيرنا بيتغير كل فتره و أهم حاجة طبعا ارجعي ظبطي علاقتك مع ربنا و ادعي كتير و ان شاء الله تحققي اللي نفسك فيه

طب لو هو الموضوع مش مجرد مرة و خلاص و كل مرة بتتجمعوا بيحصل تجاهل ليكي و كأنك مش موجودة طب ليه استمر في علاقة صداقة بالمنظر ده هو الواحد ناقص يعني ده الصحاب اللي بيهونوا على بعض شوية يقدروا بعض و يحكوا لبعض و كدا اهو بننبسط و نستفيد من خبرات بعض او يشاركونا رحلة الحياة لو مش كدا مكملة لييه؟؟ ابعدي و شوفى غيرهم طبعا و ولا تضايقي نفسك خالص

مصطلح متوحدة و معقدة ده كبير اوي على اللي بتقوليه ده أمر طبيعي جداا يعني و كلنا و احنا صغيرين كنا كدا و لما بحس الناس مش شبهي او بيعملوا حركات اوفر كنت بسيبهم و مش بصاحبهم عادي ممكن يبقى عندي صاحب واحد و بس طالما فاهمني و دماغه شبهي انا تمام و بعدين انا متأكد انتي اكيد بتتكلمي كتير و بترغي بس مع قرايبك او اخواتك او مامتك ايا يكن حد بتحسي انك متطمنة و مبسوطة بالكلام معاه فمتركزيش مع كلامهم تجاهليه

انتي مش غلطانة و متلوميش نفسك خالص على طيبتك و انك شخص مخلص و معطاء بس في ناس كتير مش بتقدر ده و بتأذينا مهما كنا كويسين معاهم بس انا شايف انه درس ليكي أن بعد كدا حاولي تخلي في اتزان في اي علاقة يبقى في مردود، رايحة جاية مش اتجاه واحد و ده علشان مش عايز مشاعر الكره تتملك منك او نوصل لدرجة اني مسلمش على شخص أو مش طايق اسمع اسمه مثلا لان الدنيا ابسط من كدا و عايزين نمشي من الدنيا دي لا كارهين حد ولا مكروهين من حد

ولا تعب ولا حاجة ربنا يوفقك و يكتبلك الخير

انا هحاول احلل الموضوع حسب كلامك من وجهة نظري بما انه مديرك هو شخص متحفظ برستيج بيخاف على منظره جداا قدام الناس و طموح شوية و بيحب شغله فهو بحكم ان انتوا مع بعض و في تواصل علطول مع الوقت اتعود على طريقتك و اسلوبك و حصل الإعجاب ده بس هو في الأغلب كانت مشكلته حاجة من اتنين رقم واحد حاسس ان لسه عنده أهداف و حاجات كتير يعملها اهم عنده من الجواز الفترة دي او هو مقرر مثلا يتجوز على سن معين مش شاغله دلوقتي فهو معجب بيكي بس مش عايز يربطك لانه مش ناوي ياخد الخطوة دلوقتي و رقم اتنين انه خايف يقولك و تكوني مش بتبادلي نفس المشاعر او حتى لو بتبادليه يحصل رفض لاي سبب كان هو خايف يترفض بحكم انه المدير و حاسس إنك لو رفضتيه مش هيعرف يتعامل معاكي زي الاول و هيحصل فجوة كبيرة او ان شكله مش هيبقي حلو لو اتعرف في المكان انه اترفض فممكن حاول يجيبها بطريقة غير مباشرة انه يقول لحد مش شايفها من زاوية تانية بس نيجي لنقطة انتي مشيتي بيسأل عليكي مشيتي ليه؟؟ ده شئ أساسي ده مديرك ده هو أول شخص اصلا المفروض يهتم و يسأل ده لو معملش كدا ينحط عليه علامات استفهام بس عمل ريأكت و خلاص و مفتحش كلام دي رسالة ان الموضوع بالنسباله ميت و بقي عادي خلاص ده لو واحد غريب ياستي هسأله اكتر من كدا مشيت ليه و هتعمل ايه و هتروح فين و حصل حاجة ضايقتك ولا حاجة بحكم العشره حتى مش هكتفي بريأكت و خاصة ان المشكله لو كانت في السبب التاني انه خايف يترفض و ميعرفش يتعاملك معاكي زي الاول خلاص انتهت انتي مشيتي هخاف من ايه بقي ما هقولك اللي جوايا و بس كدا فانا شايف اعملي استخارة تاني و كملي مع يحيى و ان شاء الله يبقى هو العوض و ربنا يكتبلك الخير 🙏

السلام عليكم، بص هي مشكلة النسيان و الحفظ بقيت منتشرة عند الناس كلها ده عادي بس رأيي ابعد انك تاخد أدوية او اي حاجة كعلاج طبي قبل ما تحاول تظبط يومك الأول تدريجيا علشان تتأكد من المشكلة و واصلة لانهي درجة لأن تقريبآ كلنا اصلا حياتنا مش صحية كفاية و ده بيأثر طبعا انت جرب تاخد كفايتك نوم و تدرب او تنزل جيم و تشوف زي جيمز اللي تخص ال memory و شوف الأكلات اللي بتزود و تحسن الذاكرة شوف الحلول دي كلها الأول لقيت الموضوع لسه مستمر و نسيان كبير أو مرضى توجه ساعتها لدكتور و شخص حالتك لكن في كتير مننا لما بيعيش الحياة الصحية بتنعكس على حاجات كتير فجرب الأول تظبط روتينك

لا انا مش حضرتك خالص انا لسه ٢٤ سنة و انتي زي اختي و بكلمك بتفكير شاب، أنا مش عارف درجة التعلق كانت واصلة لفين بينكوا شات ٢٤ ساعة و في مواضيع عادية و لا مواضيع حب و إعجاب و كلام من ده و الموضوع كان مجرد شات بس ولا خروجات، بس ايا يكن اقطعي الشك باليقين و خليكي انتي الشخص الدايركت هو رجع يكلمك اسأليه و اعرفي آخره ايه قوليله ايه فكرك بيا دلوقتي تاني بعد ٥ شهور راجع تكلمني تاني بصفتك ايه احنا علاقتنا دي إيه او انا بالنسبالك ايه إحنا بقالنا مثلا فترة x بنتكلم و آخرتها اعرفي من حبة اسئلة كدا هو بيتسلي و لا ممكن الشخص اللي ياخد خطوة قدام لقيتيه بيتسلي خلاص معلش دوسي على قلبك شوية و انسيه و اقطعي كل صلة تربطك بيه و انتي اصلا المفروض غلطتي من الاول انك دخلتي في علاقة او شات مع حد و عارفه ان ده اصلا حاجة مترضيش ربنا افتكري انتي حاجة كبيرة و غالية مينفعش تحطي نفسك في حتة ان حد لما بيجيله مزاج يكلمك ملوش مزاج يطنشك لو هو مش حاسس بقيمتك روحي للي يقدرك صح و معلش تعالي على قلبك شوية و لما تقطعي كل صلة بيه الوقت هينسيكى كل حاجه و يحيى انتي مش هتظلميه ولا حاجة خدي فترة خطوبة و شوفى و كل حاجة هتبان يمكن ترتاحي معاه اصلا و تحسي بقبول و ربنا ييسرلك و يكتبلك الخير

بصي يا أسماء انا غير مؤهل إني اتكلم في الدين و وارد إن اسئلة زي دي تيجي في دماغي او دماغك بيحصل بس الأسئلة دي شائعة و اتقالت كتير على مدار سنين و اجابتها مش هينفع تبقى كتابة لان الموضوع يطول شرحه و لكن لما يجي في دماغك اسئلة من دي شوفي اليوتيوب و شوفى مثلا دكتور ذاكر نايك او غيره اتكلم في مواضيع من دي كتير ابحثي هتلاقي الإجابة متحاوليش تفكري بنفسك وقت كتير و انتي مش على علم كفاية على الاجابه علشان الشيطان ميسيطرش على تفكيرك و تدخلي في اتجاه مش كويس

آمين يارب

تقريبا كلنا كدا نفس المشكلة دي عندي و علطول حاسس ان الوقت بيجري و أني محققتش حاجة و انك عمال تجرب حاجات كتير و مبتكملش او مش مرتاح ولا مبسوط فيها بس لو جينا نشوف الموضوع ده ليه منتشر في جيلنا كله يعني في الأغلب بسبب التطور و السرعة اللي بقينا فيها هتلاقي أغلبية زمايلنا اللي خطب و اللي اتجوز و اللي خلف و اللي ضربت معاه في حاجة او بيزنس و بقى معاه فلوس أو اشتغل قبلك و بمرتب أكبر من اللي بتاخذه او اللي اتشهرت من التيك توك و من ده كتير فالناس مبقتش زي زمان ياكل و يشرب و ينام و يبقى موظف حكومي بيروح ٣ العصر و خلاص فعلشان كدا اوعى تحط نفسك في المقارنة مع غيرك و اسع و اجتهد طبعا و رزقك كدا كدا جاي بس اعمل اللي عليك خليك مبسوط بحياتك و بس و حاسس بالنعم اللي ربنا كارمنا بيها و اتعودنا عليها و بقينا عايزين اكتر انا على فكرة مش بقولك انت الكلام ده انا بقوله لنفسي برضو انا لسه داخل على ٢٥سنة و النقطة دي شغلتني كتير اوي

قرار زي ده فكري فيه بالعقل و واحدة واحدة كدا مع نفسك لان محدش هيعرف يقرر حاجة زي دي غيرك و قرارك انتي اللي هتتحملي مسئوليه بس هفكر معاكي بصوت عالي حد جاي يتقدم و بيحبك و شاري و ابن حلال و من عيلة كويسة و سألته عنه كويس و شخص محترم و متدين و مقتدر ماليا لو فيه الصفات دي انتي مش موضحة اوي بس لو الصفات دي فيه اتوكلي على الله لان ده اللي بيصون و يكفي انه بيحبك يعني دايما زي ما بيتقال خد اللي بيحبك و متاخدش اللي بتحبه هو لو بيحبك انتي مع الوقت هتحبيه، نجيب للجانب التاني هو شخص انتي عارفاه بس بقالكوا خمس شهور مش بتتكلموا انا معرفش السبب بس هو قدملك ايه وعدك مثلا بالجواز بس لسه بيجهز نفسه او شقته؟! هو ايه اللي قدمه لك علشان يبقى شاريكي و لو شاريكي و الدنيا كانت تمام قعد ٥ شهور مش بتتكلموا ليه ولا هو مثلا كل فتره بعيدة تيجي في باله تتكلموا شوية و خلاص و هل لما هتفضلي معاه فترة و تيجي بعد مدة تقولي اتجوزني يقولك الموضوع مش في دماغي انتي زي اختي انا موعدتكيش بحاجة انا كشاب بقولك رأيي دايما خليكي مع الدوغري بتاع الفعل مش اللي بيتسلي او مش واضح و او مشكلته مادية ما يجي يكلم والدك و تاخده سنة أو اتنين خطوبة مثلا دي وجهة نظري و ربنا يكتبلك الخير

لا إله إلا الله، بسم الله الرحمن الرحيم و من آياته أن خلق لكم من أنفسكم أزواجا لتسكنوا إليها و جعل بينكم مودة و رحمة إن في ذلك لآيات لقوم يتفكرون، الجواز ده المفروض سكينة و دعم من الطرفين لبعض و خوف على بعض ازاي مراتي تبقى تعبانة و ميبقاش في منى إهتمام كفاية و اطمئنان عليها و احسسها ان اهم حاجة عندي انها تبقى كويسة و بس لكن غير كدا دي علاقة لو استمرت على المدى البعيد تبقى جحيم، ما هو حتى لو اختارها علشان شكل بس ما وارد يحصل لأي بني آدم اي حاجة لقدر الله حادثة او تشوه أو حتى حبوب في الوش يبهدله، خلاص كدا يعني مفيش سبب تاني للعلاقة!!؟ انت واخد بني آدمة مش جماد ممكن احد اسباب اختيارك الشكل ماشي بس في معايير تانية نسبها و دينها و...، أنا شايف انه اختبار من ربنا و ربنا بيكشفه ليها في بداية حياتها و ربنا يشفيها و تقوم بألف سلامة

بص يا صاحبي، أنا من سنك على فكرة و مهندس برضو و أنا متأكد انك اكيد معندكش حتة الكسل لانك متفوق في دراستك و تقديراتك كبيرة بس و اهو دخلت هندسة بس انت كنت داخل بمنطق مضى عقد المذاكرة مع أن ده بداية المذاكرة اللي بجد اصلا مفيش جوه جيتار و جو الأفلام ده انت عارف بس ممكن ده سببه يا انت دخلت هندسة علشان المجموع بس لكن انت حابب حاجة تانية او ممكن دخلت قسم غير اللي انت حابه بس أيا يكن انت قربت تتخرج لازم ترتب أولوياتك صح ركز انك تتخرج بس على خير ولما تطلع اعمل اللي انت عايزه و خد الكورسات او الحاجات التانية اللي بتبذل فيها طاقتك دلوقتي احنا مش هنسيب الكون بكرة يعني معانا وقت كتير بس صلى ركعتين كدا و ركز في امتحاناتك و ان شاء الله هتعدي على خير

"وأن ليس للإنسان إلا ما سعى و أن سعيه سوف يرى" ، دايما اعملي اللي عليكي بزيادة هاتي آخرك فيها و سيبي النتيجة على ربنا، الخوف و القلق مش بيحل حاجة بيدمر حياتنا بس، هل انتي راضية عن مستواكي و انتي نايمة و مش عايزة تبذلي مجهود اكيد لا فانسي اللي فات ابدأي من دلوقتي تبذلي كل طاقتك و بس متفكريش في نتيجة يا رب النتيجة تبقى كويسة طبعا بس لو لا قدر الله محصلش هتبصي و تقولي لا انا عملت كل حاجه و بزيادة يبقى ربنا مش هيضيع مجهودي و بعد عني الكلية دي مثلا لانها مش افضل حاجة ليا الخير في حاجة تانيه فهو ده الكونسيبت اللي المفروض نمشي بيه بنعمل اللي علينا و نسعى لكن محدش عارف هيروح فين في كلية او شغل بس ببقى واثق ان ربنا مش هيضيع تعبي و مش هلوم نفسي ساعتها ولا هتضايق لاني تعبت فعلا فاهماني و ربنا يوفقك

كل حاجة حسب الاتفاق طبعا بس في الأغلب و المتعارف عليه بيبقى على العروسة

بص يا صديقي الانشغال طول الوقت و تفريغ طاقتك في جيم و الكلام المتعارف عليه ده بيقلل بشكل كبير ولكن لا يجزم انك هتبطل لكن هتقلل معاك المعدل ، مبدأيا ابعد كل البعد عن انك تاخد حاجة تقلل هرمون الذكورة انت بتحاول تحل مشكلة مش تخلق مشاكل، حل الموضوع ده من رأيي ديني صرف لازم تصلي و تدعي باستمرار و تقرأ قرآن و تحاول تغض البصر و تبعد عن السوشيال او على الاقل تحجمها لأنها السبب اللي بيخلي شهوتك تكبر و يبدأ الشيطان يسيطر عليك بصة فبصة لحد ما تعمل كدا و اخر حاجة اوعي تكره نفسك حاول و كمل معافرة في الموضوع ده لاخر دقيقة في حياتك و أفضل حاول، يكفي محاولاتك في التقرب من الله و البعد عن المعصية و اوعى الشيطان يسيطر عليك و تفتكر انك عمرك ما هتبطل فتتمادى و يقنعك ان خلاص انت حاولت كتير و الموضوع مستحيل و ربنا يتوب عليك منها

وجهة نظري لاني بتعلم لغة برضو و جربت التطبيقات دي كلها ممكن تدخلي Voice و تحددي gender بنات بس علشان تبعدي عن أي شبهة او في طرق كتير دلوقتي في بودكاست لكل الانجلش ليفلز او فيديوهات افلام ممكن تعملي منها shadowing كل ده هيفرق كتير في اللغة معاكي و في تطبيقات Ai كتير دلوقتي او chat gpt ممكن تكلميه انجلش طول اليوم براحتك و إن شاء الله توصلي للمستوى اللي نفسك فيه

ربنا يشفيه يا رب، انا مش دكتور بس مفيش قلق خالص جالي من ٤ سنين بيبقى بسبب اكل الشارع و كدا و الحمد لله اسبوعين او تلاتة و كنت خفيت منه