Abdulrahman Ahmed

ربنا يبارك فيكى ويرزقك حسن الفهم والحفظ وتخلصى ثانويتك على خير .. انتى بتقولى دلوقتى حاجتين عكس بعض منين عاوزة تظبطى نومك ومنين بتهربى من مشاكلك للنوم ؟ .. تظبيط النوم دا ، كأنة تمرين بتمرنى علية جسمك فابيتعود ..ثانوية بيكون فيها ارهاق عقلى كبير وحركة للدروس ومشاويرها خلى نومك ٨ ساعات مش ٦ .. او ٧ ساعات ونص بعد الظهر - لو عرفتى - تخطفى ساعة كمان .. ووقت ماتقومى من نومك ماتقميش للمذاكرة اربطى صحيانك انك هتقومى تصلى قيام ليل وشجعى نفسك بدا بنية ان ربنا يفتحها عليكى ويبارك ف يومك .. كفاية ضغط ثانوية ماتخليش كل حاجة فى يومك تتعمل علشانها .. ومشاكل البيت عندك ربنا يهدى سركم ويرزقكم سبل السلام .. حاولى تتجنبيها ومتتأثريش بيها مادام ملهاش حل فى ايديكى .. واهم حاجة تقدرى تنظمى وقتك بين دروسك ومذاكرتك عشان مافيش حاجة تتراكم وتحسي بالتقصير .. واملى يومك طول منتى راحة الدرس او راجعة او بتريحى من مذاكرتك شوية بذكر الله هتلاقى نفسيتك باذن الله مرتاحة وذهنك حاضر.. وربنا يوفقك ويكتبلك الخير

خلينا نتكلم بشكل عملي فى كام نقطة .. انتى لو رحتى قلتى لاهلك مش عايزة ابن خالتي بسبب الى كنت اعرفة قبل كدا .. محدش هيسمع كلامك ودا الى حصل.. ماقدرش الومك على انجذابك لشخص ما - بينك وبين نفسك - دى فطرة .. بس الومكً لان انتى الى فتحتى السكة للارتباط دا ودا حاجة غلط لازم تكونى متأكدة ومقتنعة .. فاحنا كدا من الاول غلط هنفترض مافيش ابن خالتك اصلا فكان لازم وقت مااشوف ان دا غلط اوقف الحكاية على كدا واقطع علاقتى بية واستغفر ربنا .. ظهر ابن خالتك ف الموضوع ودخل البيت من بابه واهلك وافقو وقريتو الفاتحة .. بالمناسبة - الف مبروك - حضرتك دلوقتى مابين نارين .. نار القلب وما يريد ونار الحاضر وعذابه .. متنطوحة بين اول حب وارتباط وبين المناسب والجاهز الى اصبح واقع فى حياتك دلوقتى .. خلينا متفقين ان انتى غلطتى من البداية فلازم ندفع تمن غلطنا .. ب إن قلبنا يتوجع شوية .. اعتبريها اعراض انسحاب وعودة للطريق الصح والشرعى .. زميلك وقت الجامعة اها ارتبط بيكى وحبيتو بعض وكذلك انتى .. ابن خالتك انتى ظالماة ومش مديه نفسك فرصة تتقبليه وتقربى منة مع انه بيحاول وشايلك فى عنيه .. انا عارف الاختيار صعب بس نصيحة هتتعبى شوية … اختارى الى دخل البيت دا راجل بجد وهيحافظ عليكى .. ماتتفرجيش على افلام رومانسية كتير وتعيشى الجو دا .. لازم تخلى قلبك ع جنب شوية وحكمى عقلك .. مش بقلك ان سهل عليكى بالعكس هتلاقية صعب ف الاول شوية بس ادى لنفسك فرصة قلبك يسمع الراجل ويشوفة .. واياكى تظلمية معاكى وتعاملية من مبدأ انك بتدورى ع زميلك فية وف شخصيتة .. فكك من زميلك واقفلى اى حاجة توصلك بية بجد .. استعينى بربنا وادعية يرزقك الخير ويقويكى ع الصح … معرفتيش تدى فرصة لابن خالتك ماتظلموش معاكى انفصلى عنة عادى بس قبليها تكونى قاطعة علاقتك بزميلك .. ادى لنفسك فرصة تموف اون وترتاحى شوية عشان ماتظلميش حد تانى معاكى ..

" ايدولوجيا غربية " بتحارب الدين والفطرة الصحيحة وكماله لمستنقع الفساد الاخلاقى الغربى وبتتصدر لينا على اساس انها حركة تنويرية وان هدفها دعم المرأة وهيا مثل السم فى العسل .. من ناحيه الى يشوفها هيقول " وااو " عاوزين يدعمو تعلم المرأة ودعم حقوقها ومقاومة ظلم المجتمع الذكورى المتعفن المهيمن عليها .. بس هيا ف اساسها فكرة هدم المجتمع والاسرة .. انتى حرة فى كل حاجة ماحدش ليه حكم.. حتى الدين الست حرة فى جسمها .. " الزنا " مباح انتى حرة .. الاجهاض متاح دا جسمك .. عاوزة تبقى سنجل مازر قشطة .. انتى زاى الراجل بالضبط فى الميراث والحقوق.. مافيش حاجة اسمها راجل ليه حكم او افضليه عليكى .. مافيش حاجة اسمها ابويا او اخويا ليه كلمة عليا او بيوجهنى .. جوزى دا مجرد صورة برا البيت انا حرة .. دا جسمى ف البس الى انا عوزاة .. الحجاب دا تخلف ورجعية .. يعنى اى اخفى شعرى وجمالى .. مافيش حاجة اسمها الدين واحكامة وشريعته .. انتى مخلوقة حرة الارادة والفعل .. للاسف احنا بنتأثر بالحركات دى بدون فكر .. وبناخد نص الصورة مش كله .. وطبعا مع قلة الوعى والدين بيكون بيئه خصبة ينمو فيها العفن دا .. ربنا يحفظ نساء المسلمين جميعا ..

بص يامدير .. انا لا خبير علاقات ولا متجوز فقشطة بندردش سوا .. خلينا نبدأ من الآخر … هو اى اصلا حب المراهقين ؟ اتنين بيشوفو بعض بيتشدو لبعض دا بيعجبو ستايلها شكلها طريقتها وهيا بيعجبها كلامه هيئتة وستايله بيكون اعجاب ف الاول لان الطبيعى الانجذاب فطرة فينا .. المراهق دا بيكون شايف الدنيا وردى وحلاوة البدايات حلوة ومع الوقت بيتعلقو ببعض وبيحبو بعض بس بيكون اساس العلاقة بينهم هش مبنى ع الامال والتطلعات وفى اكتر الاحوال كل واحد بيكون فترة ف حياة التانى ومايكملوش .. فدا مش مثال يضرب بيه المثل .. هو اى اصلا معنى الحب ؟ انا شايف ان مافيش حاجة اسمها كدا بس احنا بنختصر معانى المعزة والتعلق والانجذاب والتمنى فى كلمة الحب 🙂 .. الى تدور عليه المودة والرحمة .. الجواز مابيتبنيش ع الحب وخلاص .. وسواء انت او مراتك بالجواز بتكملو بعض وبتكونو لبعض كل حاجة وعلى حسب كل واحد بيعرف يأدى دورة او لا .. فحتة مش شايفة غيرك دى غريبة سيكا لان الطبيعى كدا .. مافيش حاجة اسمها مش مشروط يعنى تكون وحش ومطلع عينها وهيا تفضل حباك ! ازاى اقنعنى الزواج بيتبنى على اساس المودة والرحمة ( وجعلنا بينكم مودة ورحمة ) ودول معانيهم كتيير .. عاوزها تتعلق بيك وتقرب منها اكتر : اتقى ربنا فيها قبل اى شئ ، دلعها ، هاتلها هدية ، المعاملة الحسنة ، خليك حنين ، خاف عليها ، اهتم بادق تفاصيلها ، اسندها وادعمها ، عاملها كأنها بنتك ، علمها واتعلم منها ، شاركها اهتمامتها ، اسمعها ، اكلها بايداك … اعمل كدا وهيا حرفيا مش هتشوف غيرك وهتعمل عشانك اى حاجة وهيكون همها الاول رضاك وسعادتك .. بلاش نعيش فى مفهوم الحب الضيق الى هو انتى كل الكون وانا كذلك .. الحياة بعد كدا بروتينها بتقلب ملل شوية والحب بمفهومنا بيقل ..

تمام احنا ممكن نتكلم ف كام نقطة : انتى ليكى هدف ( كلية الطب ) دا واضح بالنسبالك وموقنة بية ١٠٠٪؜ وان انتى عاوزة دا لانك حابة دا ونفسك تحققية لنفسك انتي+ رغبة والديكِ … الهدف مطلوب ليه طريق للوصول .. الطريق دا الى هو المذاكرة والاجتهاد .. احنا هنا مشكلتنا تكمن فى " السعى " للهدف دا .. انتى مش حاسة انك بتعملى الى عليكى وزيادة عشان توصلى مع انك عارفة انك لازم تجتهدى اكتر من كدا .. تمام انا مش هفكرك بحاجات انتى اكيد عارفها من حبك للكلية ونظرتك ليها ومساعدتك للناس والنجاح المعنوى لما تحسى انك دكتورة اكيد كل دا عرفاة اكتر مننا .. وانا شايف انة مش حل - يعتبر حل مؤقت - لو قعدنا نحفز فيكى شدى حيلك وموتى نفسك مذاكرة وافتكرى البالطو الابيض واول كشف ليكى والكلام دا .. هو حلو بس لفترة قصيرة حلنا هنا اننا نشتغل ع الانظباط الذاتى .. افتكرى دايما ان اول عدو لنجاحك مزاجك .. زاى دلوقتى مالكيش نفس تذاكرى بس حاسة بالتقصير مهو كدا مش هنوصل لحاجة .. محتاجة انك تذاكرى سواء متقبلة او لا لان دا الصح اولا وان ليكى هدف ثانيا ..طبعا دا مابيجيش مرة واحدة لازم تعود .. ومحتاجين نعلى الارادة شويه .. هاتى ورقة واكتبى عليها بخط كبير - جايلك ياطب واحذرو مني يادكاترة العالم - وعلقيها ع المكتب عندك .. خلى هدفك قدامك دايما دا هيحفزك جدا وكل ماتركنى وتشوفيها هتفتكرى هدفك .. متبصيش للهدف ككل مرة واحدة عشان حقيقى يخض ! اى حد .. متقعديش تفكرى فيها كتيير دى كليه الطبببيب اعععهع ونا مش بعمل الى عليا فهيجيلك احباط حضرتك .. فهتحسى انو حمل تقيل فهنركن للاسف .. انتى قبل كلية الطب ليكى اهداف صغننة دى الى اشتغلى عليها الاول وحاجة ورا التانية لحد ماتوصلى .. يعنى عندى مادة هيا جزء من الطريق الى الهدف اذاكر واجتهد فيها وامتحن وانجح .. كدا هتوصلى .. متذاكريش عشرين ساعة ف اليوم ولا تسهرى طول الليل ولا تمشى ورا اسطوانة فيلم الثانوى التعبانة دى .. انتى نظمى وقتك ونظمى نومك وهتلاقى الدنيا ماشية من غير اى مشكله .. نقطة اخيرة ودا رأي الشخصى .. ماتربطيش نفسك وتتعلقى بحاجة - كلية الطب- وارد متوصلهاش احنا مش ضامنين حاجة .. فمتخليش عليكى عبأ وضغط وانتى بتذاكرى كفاية المواد .. انتى اعملى الى عليكى واجتهدى لنفسك وكله خير واهم حاجة الثقة فى الله وربنا يوفقك يادكتور

لا حول ولا قوة الا بالله العلى العظيم .. قدر الله وماشاء فعل .. الحمد لله اولا واخرا الله يكون فى عون حضرتك ويصبرك اكيد عارف انه قدر وان اللقى نصيب والفراق نصيب فالحمد لله على كل مكروه وافتكر دايما ان مع كل ضيق فرج " فان مع العسر يسرا - ان مع العسر يسرا " وصبر نفسك دايما "وعسى ان تكرهو شيئاً وهو خيرٌ لكم وعسى أن تحبوا شيئاً وهو شرٌ لكم" فاصبر على قضاء الله وسلم عارف اكيد شعور ان اللي قعدت تبنى فيه كل الفترة دى يروح مرة واحدة بس اكيد كان لكل دا مقدمات من فترة قبلها بفترة .. بس حضرتك كنت فين والمركب بتغرق .. اكيد حصل مشاكل وحاولت تحلها ومنفعش بسبب حضرتك ولا سببها وهل هي معاها حق ولا لا.. خليك صادق مع نفسك فكر تانى وتالت هل هي تستحق العيشه والمعاشرة ولا مجرد جوازكم كان ماشي بسبب البنات وخلاص حيران اكيد حضرتك فى انك عاوز ترجع ؟ وتلم شمل البيت حتى لو روابط العشرة دابت المهم البنات اكيد تايه دلوقتى ف الاول لسا الوضع جديد عليك بس واحدة واحدة هتتعايش اللي حصل حصل رابط على قلبك وفوض امرك لله .. كل حاجة بتبتدى كبيرة وبتصغر مع الوقت .. وربنا يعينك ويصبرك يارب 🤲

واحتمال كبير لدا تكونى حاسة انك تايهه وحياتك دى ع الفاضى ومالهاش طعم .. بس ثوانى محتاجين نفسر السؤال شوية ونبسط الدنيا .. مافيش حد مننا ماعندوش هدف .. احنا بشر والى بيحركنا المشاعر .. والناس بتحب تدور ع الى يسعدها فدا هدف والنجاح فدا هدف واى حاجة تخليك مبسوط ومرتاح نفسيا وماديا فدا هدف ..احنا بس محتاجين ندعبس فى نفسنا شوية ونشوف نفسنا نعمل اي .. محتاجين نتعامل نفسيا الاول مع نفسنا ونشوف حياتنا ماشية ازاى ونظرتنا ليها ازاى ..انشغالك بمشاكل الحياه والبيت مسبب احباط وركود وانعدام شغف باى حاجة .. الى هو يعنى - يارب نعدى يومنا على خير - مع الوقت اصبحنا زاى الآلات … متسبيش نفسك للشعور دا واستغلية انك تحددى هدف توصليلة عشان تكونى فخورة بنفسك .. محتاااجين شوية طاقة ايجابية لحياتنا .. دا البنزين الى بيحركنا .. مش هنعرف نكون متشأمين وكارهين حياتنا وعاوزين ننجح فيها .. اول واكبر هدف فى حياتنا هو دخول الجنة عشان كدا احنا مأمورين بالعبادة واتباع الدين للوصول للهدف دا فاصبح دا زاى البوصلة الى بتوجه صاحبها.. فاصبح الصلاه ٥ مرات والصيام والزكاه وسائل بستخدمها فى سبيل هدفى .. قيسي على كدا كل حاجة فى حياتنا .. حتى ع الحاجات البسيطة هدفى انى اشبع فمحتاج اكل مثلا .. وهكذا كدا المعادلة واضحة " هدف + سعى + فعل ومداومة " يدينا النتيجة والنجاح الى محتاجينه لازم تستشعرى النجاح الى ف حياتك سواء الى بتعملية يوميا او دراسيا او عمليا عشان نحس اننا بنعمل حاجة مفيدة وحياتنا مش فاضية .. بنك الاهداف من واحد للتانى بيختلف بس الرابط بين الجميع ان الكل بيسعى لحاجة يوصلها .. ولازم يكون ليكى طموح واهداف تخليكى تشتغلى عشانها فتحسى بالنجاح وانك بتعملى حاجة كويسة ليكى تخليكي مبسوطة من نفسك .. دا الأثر النفسي الى محتاجينة..وكل فترة دماغنا بتكبر فاهدافنا بتتغير .. وفى اهداف قصيرة واهداف طويلة المدى .. ممكن تبدأي باول حاجة انك تعرفى انتى بتحبى اى عندك شغف باية عندك هوايات اى نفسك تتعلميها .. دى بداية كويسة انك تسعى ورا حاجة .. انتى محتاجة تقعدى مع نفسك وتبدأى تحددى مثلا وليكن : انا عاوزة اخلص كليتى ، دا هدف ، عاوز ابدأ فى كورس انجلش مثلا ، دا هدف ، عاوز اتعلم سواقه ، دا هدف ، عاوزة اعمل اسرة وبيت واربى عيال وهكذا .. وافضل حاجة انك تقعدى وتحددى اكتر .. مثلا انا محتاجة دينا اصلى الفجر فى وقتها ، محتاجة ابدأ احفظ قراءن فحعمل خطة مثلا انى احفظ كل يوم ايتين ايتين واصلى بيهم مثلا وهكذا .. قيسى على كدا مثلا الدراسة والتطوير الذاتى واللغة والبرمجة والطبخ والشغل .. وهكذاا عشان نتجنب الاحباط لازم نقسم اهدافنا الكبيرة لخطوات صغيرة ونمشى واحدة واحدة عشان نوصل التخطيط مهم جدااا عشان تكملى ومايجيش احباط المزاج عدوك الاول وهنا مزاجنا حالتنا النفسية .. السعى اهم حاجة والتوفيق من ربنا دا قانون ربانى حاربى نفسك عشان يكون ليكى هدف بسيط واوصلليه .. خلى هدفك دايما انك ترضى عن نفسك وتتقبليها وطوريها .. احنا المسئولين عن حياتنا .. وافتكرى دايما لو مساعدتيش نفسك محدش هيقدر يساعدك .. الكلام ف الموضوع دا بشكل عام كبير وكتير .. انا حاولت اوفى شوية بالى ف دماغى .. واسف جدا ع الاطاله

اولا : تتقبلى عادى انك لسا فى ثانوية وان دى مش نهاية الدنيا مش عيب وخليها بداية جديدة ليكى .. انتى لسا بخير.. سيبك من كلام الناس ورائيهم دى حياتك .. ثانيا : شعور صعب اوى ان اكتر حد بتثقى فية وتحبية يقل معاكى ويخذلك .. بس شوفى الموضوع من الناحية التانية ان ربنا اراد يظهرلك حقيقة الناس دى دلوقتى عشان تتعلمى وتاخدى بالك فقولى الحمد لله وربنا يجبر قلبك ويسعدك .. ثالثا : تعبانة من ايه وحياتك متدمرة ليه بسبب ضغط الثانوية ولا مشاكل شخصية ولا مشاكل عائليه .. اى ما كان .. لازم نحاول نحتويها ومنخلهاش تأثر على حياتنا .. خدى بنصيحة حد كبير واحكيله براحتك .. رابعا : مافيش حاجة اسمها لا كنت بفهم ولا بعرف احل .. انتى ربنا رزقك كل الامكانيات الى تساعدك ورزقك العقل اجتهدى شوية وركزى وابعدى عن المشتتات هتلاقى نفسك باذن الله جاهزة لكل حاجة .. وربنا يرزقك الاجتهاد وحسن الفهم والحفظ

لا حول ولا قوة الا بالله العلى العظيم .. هيا الحل .. اذكرى الله بيها كتيرررررر ، وافتكرى ان ربنا يملك الحول والقوة فى تغيير الامور وارجاع حنان الاب واهتمامه …. حياتنا مليانة بالمواقف المؤلمة والصعبة بس كل موقف بيكون فى نور محتاجين نشوفة عشان يصبرنا على الابتلاء ومش هنفهم حكمتة غير قدام ، اولا : لازم تتقبلى انة اتجوز تانى وتالت وهذا حلاله بعيدا عن الطريقة والوقت ، ومادام الامر كذلك ماتحوليش تعملى راسك براس زوجتة وانك تتساوى بيها وتحاولى تاخدى انتباهه منها ، هيا ست البيت وزوجتة وام لابنه وشعور الزوجة غير الابنة اكيد - مابقلش ان دا صح - بس احنا عاوزين نتعامل على قد مانقدر .. ثانيا : زيدى فى برك لوالدك وقربى منه واضحكى فى وشة قوليلة كلمة حلوة هدية ف عيد ميلادة .. الاب فى الااخر اب وانتى بنته ولو قسى شوية استحمليه ..وافتكرى انك بتعاملى ربنا اولا واخرا وربنا امرنا بالبر ..يمكن دا يصحى مشاعر جواة وياخد باله ثالثا : انتى اكبر اخواتك .. ربنا حملك المسئوليه انك توجهيهم وتنصحيهم خليهم معاكى واجتهدى انك توعيهم وتعملو كدا سوا .. هونى عليهم وادعميهم نفسيا .. على قدر استطاعتك - وانا متأكد انك قايمة بالدور دا كويس - وافتكرى دايما حنيتك وتعبك فى الوقت الصعب جزاءهم على الله .. رابعا : حاولى تشوفى حد قريب من والدك وبيسمع كلامة وانتو بتعتبرو قريب منكم واتكلمى معاة جايز يأثر على والدك ويعرف يساعد باقل حاجة .. خامسا : انا عارف ان العطاء بدون مقابل صعب .. بس دا المطلوب دلوقتى .. وافتكرى دايما ربنا لم واسي سيدنا النبي " واصبر لحكم ربك فإنك بأعيننا " اى اصبر على أذاهم ولا تبالى بهم وتأكدي انكِ بعين الله ويرى كل ذلك .. وكلا سيحاسب بفعله .. فخليكى فايزة .. ولكِ الله اولا واخرا ..

ثانيه واحدة هو انتى بتصلى لمين الفجر وبتدعى مين ؟ ربنا .. ربنا الى خلقك واداكى نفسك امانة عندك وحرم عليكى الانتحار والى يعتبر من الكبائر !!… هيستجيبلك مثلا ؟ … وخايفة من السكينة ومش خايفة من ربنا ؟ .. موتى نفسك وانتحارتى هتقولى اى وقت السؤال ! يارب انا انتحرت عشان موقف ضايقنى وكنت بدعيك بكذا وكذا قبل ما اموت نفسي …! انتى مدركة الموضوع ماشي ازاى ! متخيلة حضرتك بعدين هيكتبلك الجنه وان رحمته واسعة ومش مشكله لو انتحرت واستسمحت … الله يفعل ما يشاء ويحاسب كيف ما شاء وليس لنا حكم على حكم الله .. لكن دا شيطان بيضحك على عقلك ! فوقى .. شيطان عاوز يوقعك ف الغلط ويعيشك السناريو دا ف دماغك .. انتحرى وربنا غفور رحيم .. اهو بنييم بيها عقلنا بالكلمتين دول .. لا حول ولا قوة الا بالله

وانعزالك دا خلاكى صديقة للسوشال ميديا 🙂 وبتضيعى من نفسك مناسبات وفرص 🙂 الهروب من المشكلة مش الحل يا استاذة … وانتى عارفة كدا ودا حاجة حلوة كدا ربع الحل خلص … حضرتك لازم تسائلى نفسك هو انا عاوز اتكلم واناقش عشان ابان انى انا موجودة وكدا والناس تعجب بشخصيتى ويعرفونى ولا عشان لازم اتغير واكون احسن ؟ اكيد لازم اتغير واكون احسن كدا الربع التانى خلص .. تلاته : هسأل نفسي هل انا شخصية انطوائيه مابحبش الاختلاط وانك تعملى صحاب جداد والتجمعات وكدا .. الواضح انة لاا بالعكس بتحبى التجمعات والكلام … كدا الربع التالت تمام … الربع الاخير بقى نعمل اي 👌 اولا ماحدش هيعرف يساعدك لو مساعدتيش نفسك ،، ثانيا الموضوع كله محتاج شوية جراءة وممارسه … حل عظيم لو دخلتى اتحاد طلبة ف الجامعة والحل السحرى لو نزلتى ف اجازتك اشتغلتى فى اى مجال بيتعامل مع عملاء بشكل مباشر زاى الصيدلية مثلا انا شخصيا فرقت معايا جدا من بعد الثانوى .. الكورسات الاوفلاين .. الدروس العلمية والشرعية .. متأفوريش الموضوع فى دماغك وتقعدى تفكرى ليل نهار.. التفكير هيوديكى لحتت مش حلوة زاى هو انا لية مش محبوبة هو انا لية ماليش صحاب هو انا لي وحيدة .. وهكذا .. فكك حضرتك من كل دا ، ادى للموضوع حجمة ومايزدش عن كدا مش لازم كل المواضيع الى تتفتح قدامى يكون ليا رأى وارد عليها اكيد فى حاجات مش ف اهتمامانا فهنفكنا منها… حاجات مالناش فيها خبرة مثلا هكذا مش كل الكلام بيبقى مناقاشات وادى رأي .. اتكلمى عادى من غير تصنع ولا انك تعملى حساب للكلام وافكر فية خمسين مرة قبل ما اقوله ، انتى مش فى مؤتمر علمى حضرتك ابدأي من البيت عندك واتكلمى مع مامتك واخواتك وعيلتك فكك من الكبار شوية شوفى حد ف سنك صاحبية .. الدماغ لما تبقى قريبة من بعض بتفرق جامد اسالى نفسك دايما اى المشكلة لو اتكلمت وقلت ماهو حضرتك مش هينفعً نفضل ساكتين ونرجع نقول مابتكلمش ليه .. اتكلمى لان انتى عاوزة تتكلمى محدش مستنيكى تغلطى ولا تقولى حاجة مش عجباه الناس اسهل من كدا حضرتك .. خليكى على اطلاع دائم ع الجديد حوليكى وخلي عندك معلومات عامة واقرأي وطورى نفسك للاحسن هتلاقى نفسك بتتكلمى وبتفتحى ف مواضيع عاوزين نطلع من حتة الجرأة المزيفة الى ع السوشال ميديا عموما وقوقعة الانغلاق الى حاشرين نفسنا فيها ، بنعرف نتكلم حلو اوى ع شاشة الموبايل .. بدليه بانك تكلمى الناس فون مثلا وتسمعى صوتهم .. اخرجى واحتكى بالناس ع ارض الواقع .. حبى نفسك زي ما انتي واسعى انك تشوفيها احسن .. احذرى انك تعامليها من مبدأ الضعف .. حاولى مرة واتنين وتلاته مش عيب 👌ومتهربيش تانى الثقة فى النفس اهم حاجة فى كل دا .. حضرتك لا ضعيفة ولا ينقصك شئ … اسف ع الاطاله وربنا يوفقك

هو انا مش متجوز والحمد لله بس هعلق من الباب العام .. كل واحد مننا بيدى ويستقبل مشاعر من غيره ، كل واحد فينا بيبقى لية طريقة بيعبر بيها عن حبة واهتمامه وطرق تواصله مع غيره .. اللي منا بيقول كلمة حلوة وحلانجى، واللي بيجيب هدايا ، وفي الجدع ، وفي اللي بيدي مشاعر وحنية ، واللي بيعبر عن حبه بالاهتمام ... دا اللي بيدي .. طب اللي بيستقبل .. بيختلف بردو من واحد بيحب الكلام وواحد بيحب الاهتمام واحد بيحب المشاعر .. وهكذا .. ثانيا : الراجل ممكن ميكنش عاطفي شوية زي الست ممكن عادي ميعرفش يقول كلام حلو ولا يجيب هدايا مثلا دايما وينسى مناسبات عادى ممكن يكون بخيل شوية فى المشاعر المرئية بس بيعوض دا اهتمام وجدعنة وسند ..ثالثا : المشاعر فى الحياة الزوجية مطلوبة اكيد بس مش هي اللي بتمشى الدنيا .. انتو بقى بتعودو بعض .. حضرتك جربي الحاجة الى بتحبيها عادى وحاولى معاه مرة واتنين عادى متزهقيش 😊 رابعا : لازم تجددو حياتكم ، غيرو روتين ، افتكسيلو اى حاجة جديدة ، خدى الخطوة وحاولى لازم .. خامسا : ظروف حياتنا صعبة والدنيا مقصرة مع كله ، ممكن التفكير واخده وبيفكر ف بكرا خليكى سند ليه.. وربنا يبارك فى حياتكم

يَقُولُ اللهُ فى الحديث القدسي : أَنَا عِنْدَ ظَنِّ عَبْدِي بِي، وَأَنَا مَعَهُ حِينَ يَذْكُرُنِي، إِنْ ذَكَرَنِي فِي نَفْسِهِ، ذَكَرْتُهُ فِي نَفْسِي، وَإِنْ ذَكَرَنِي فِي مَلَإٍ، ذَكَرْتُهُ فِي مَلَإٍ هُمْ خَيْرٌ مِنْهُمْ، وَإِنْ تَقَرَّبَ مِنِّي شِبْرًا، تَقَرَّبْتُ إِلَيْهِ ذِرَاعًا، وَإِنْ تَقَرَّبَ إِلَيَّ ذِرَاعًا، تَقَرَّبْتُ مِنْهُ بَاعًا، وَإِنْ أَتَانِي يَمْشِي أَتَيْتُهُ هَرْوَلَةً… انتى عودتى عقلك ع التفكير بالطريقة دى .. توقع الاسوء دايما .. هتحسى بسعادة اذاى ف حياتك ؟ .. محتاجين نعمل سوفت لعقلنا وننزل برنامج التفكير الايجابى وحسن الظن بالله .. ازاى .. بالايمان والسير فى ركاب الله .. طبيعى كلنا هنفكر فى بكرا وبعدين لكن متوقعين ومتأكدين انة خير .. عيشى يومك وبلاش الاوفر ثينكج دا .. حضرتك دا شيطان هدفة يخوفنا ويعيشنا فى رعب ناسيين ان كل حاجة بايد ربنا ..

مسلم عاصى .. يلزم التوبة .. ولو ذنب علية كفارة يُقضى ..كلنا بنخطئ " كل ابن ادم خطاء وخير الخطائين التوابون" .. افتكر دايما يتعاظم الذنب فى نظر الرب كلما تصاغر فى نظر العبد ، ويتصاغر فى نظر الرب كلما تعاظم فى نظر العبد …. ربنا يهديك ويهدينا ويهدى جميع المسلمين

فدنى برنامج كأنك قاعد ف سيشن او مع صحابك وبتقول مشكلتك وبتاخد رأى الناس فيها .. محتواه محدود شوية بس تتكلم براحتك واى حاجة بايده ينصحك هيعمل .. كورا برنامج محترم يغنيك عن السوشال ميديا وبيكون في اسئلة بردو بس بتبقى اغلبها بشكل عام وبيكون فى بوستات لمعلومات دينية واجتماعية واقتصادية وتاريخية .. محتواه اكبر وتقدر تدور على اهتماماتك وهواياتك واى حاجة بتدور عليها لو حابب بردو البرامج الى بنظام دا فى reddit

اولا : فى غلط عندنا فى مفهوم التربية الدينية عموما والمجتمعية لما اهلنا يجو ينصحونا بالذات " صلى عشان ربنا يكرمك "صلى عشان الى عاوزة يحصل "صلى عشان نفسيتك ترتاح "… وهكذا .. اصبحت االعبادة مرتبطة بالمصلحة.. عندى حاجة عاوز اعملها اصلى واصوم واتصدق ولما ماتحصلش ارجع اقول لية ..كما ف الآيه (ومن الناس من يعبد الله علي حرف فإن أصابه خير اطمأن به وإن أصابته فتنة انقلب على وجهه) .. اصبحت العبادة هي الى بتدور حول حياتنا .. مش حياتنا هي الى بتدور حول العبادة اللي هي أساس وجودنا .. بيتنسى دايما مبدأ انى مخلوق للعبادة فقط وان ربنا هو السيد والملك وانا عبد ارضى باى حاجة ربنا يرزقنى بيها .. النقطة التانية : يتغير الانسان بالعبادات اذا كانت العبادة حق العبادة ،ان يتحقق مفهوم التسليم لله وانك عبد وانك مأمور بالطاعه لله تحت اى ظرف .. ساعتها العبادة الصادقة مع حضور القلب ترتقي بالنفس الى درجات الاخلاص فتوصل لدرجة الخشوع .. وقتها أصلي واحس بالتغيير ( واستعينوا بالصبر والصلاة وإنها لكبيرة إلا على الخاشعين ) النقطة التالتة : احنا حاليا في زمن مادى كل حاجة بتتقاس بالمادة ، انت بيتم استغلالك من كل حد ، كل حاجة بتتقارن مع غيرك ، انت مفتوح على العالم حواليك فى كل حاجة، السوشال ميديا احد الاسباب الرئيسية للاكتئاب … احنا بشر والطبيعي اننا ضعفاء وطموحنا عالي وبنتأثر نفسيا وللاسف مش كلنا واصلين لدرجة الخشوع التام اللي تخلينا مهما يحصل حوالينا احنا منتأثرش او نتأثر ونقدر نرجع.. دي أسباب محتاجة تتعالج الاول نفسيا مش مجرد إني اقول صلي وهترتاح ! انا معنديش ملكه الشرح للأسف بس حاولت اقول اللي في دماغي واسف جدا ع الاطاله

هاجاوب على قدى يعنى.. كأنى بكلم اختى الصغيرة 😅 مش هقدر الومك ولا اعاتب فى حتة الاعجاب والانجذاب لشخص ماا.. طبيعتنا كلنا كدا .. بالبلدى كل واحد ولية الكراش بتاعه والقلب وما يريد مالناش حكم عليه حقيقى.. بس ! مش كل حاجة بنعوزها بنعملها قبل ماتمشى ع فلتر الشرع والعقل نيجى للفكرة نفسها .. قبل ماتحبى انك تتعرفى عليه فكرتي عاوزة تتعرفى علية ليه؟ تعارف وصحوبية ولا زواج .. افترضنا جمعكم نشاط سوا واتعرفتم ع بعض فكرتى بعد كدا إيه ؟ هتتكلمو وتتصاحبو ؟ شرعا حرام .. عاوزاه يشوفك ويفكر فيكى عشان انتى معجبة بيه وهو يشوفك يعجب بيكى ؟ ولا مثلا تتعرفى عليه مستقبلا عشان مشروع زواج ؟ ادعي ربنا بالى فى قلبك ويارب اذا كان خير يعرفكم ببعض .. واولا واخرا كل شئ نصيب

١- النية : ان يكون الحفظ لوجة الله تعالى ٢- عاوزين ربنا يساعدنا ونحفظ يبقى نداوم على الصلاة فى معادها والاذكار وذكر الله كثيرا من باب صدق النيه ٣- ( لا يكلف الله نفسا الا وسعها ) متحفظيش اكتر من قدرتك لمجرد انك عاوزة تخلصى .. خدى وقتك وبراحتك ٤- قسمى حفظك لايات كل يوم وخصصى وقت معين وافضل وقت بعد صلاة الفجر ٥- اسمعى الايات الى بتحفظيها من شيوخ تجويدهم مظبوط مثل الشيخ الحصرى وعبدالباسط رحمهم الله وكررى وراهم ٦- ابدأى بالسور السهله والقصيرة ٧- حاولى تفهمى الايات وهتحفظيها بسهوله ٨- اعرفى الفهرس لكل سورة يعنى اى القصص الى فيها وبتتكلم عن اى وتقسيمة السور ٩- ليكى يوم تراجعى فيه كل الى حفظتية ف الاسبوع كله ١٠- سمعى الى حفظتية سواء لاشخاص او ممكن برامج ع الموبايل هيساعدك كتير ١١- لو عرفتى تدخلى وسط ناس بتحفظ معاكى هيساعدك كتيير وهيشجعك ويخليكى تلتزمى ١٢- صلى بالى بتحفظية يوميا ١٣- كررية كتير وانتى ماشية ف الشارع وانتى بتعملى حاجة ف البيت وهكذا ١٤- الصبر وعدم اليأس لانك مش من اول ماتقولى عاوزة احفظ هتحفظى ربنا هيختبر صدق النية فطبيعى تلاقى صعوبة ف الاول ١٥-ربنا يرزقك حسن الفهم والحفظ وربنا يوفقك ويرزقك حفظة كتابة الكريم

اولا : شعور الحزن شعور عندنا كلنا بس طريقة التعبير عنه بتختلف من شخص للتانى يعنى مثلا حد ممكن يعيط ، حد مايتكلمش وياخد جنب ، حد ينام كتير ، حد مايبنش علية بس من جواه زعلان وهكذاا انتى ممكن يكون طريقة تعبيرك عن الحزن مش العياط وانتى تكونى شايفة بحكم ان معظم البنات بتعيط وقت حزنها فلازم تعيطى … ثانيا : انتى مريتى بتجربة من خمس شهور وواضح انها مأثرة عليكى ومادتيش نفسك فرصة تموف اون من التجربة واعتبرتى نفسك انك بخير ومش فارق معاكى بس بعد وقت لقيتى نفسك لسا فاكرة وبتحنى للذكريات … مش عيب اننا نمر بتجربة ونعيش حزنها مش التجاهل ودا التصريف السليم لاى موقف عدى علينا .. انتى مش هتعرفى من يوم وليله تقولى انا تمام وزي الفل وبردو مش عاوزين نعيش فى أثار التجربة الحزينة دا كتير لازم توازنى الامور وتخرجى واحدة واحدة .. طب نعمل اى عشان نعدى الفترة دى .. استعينى بالله اولا وادعى دايما ( اللهم انى اعوذ بك من الهم والحزن ) .. احكى وعبرى عن كل الى جواكى لحد تثقى فيه واظهرى ضعفك عادى قصاده مش عيب كلنا بنضعف وبنحتاج حد نسند عليه.. هاتى ورقة وقلم او على الموبايل واكتبى فيها كانك بتكلمى نفسك و شوفى هتوصلى لإيه .. لازم تشغلى وقتك وتزودى اهتماماتك اشغلى دماغك بحوارات من الآخر .. تكونى متأكدة يقينا ان كل دا خير وان عليكى الصبر

سؤال ذكى وجميل جدا .. بس لازم قلبها تحددى مفهومك عن النجاح شايفاه ازاي؟ مثلا تكونى ام وعندك بيت ، عندك بيزنس ناجح ، متفوقة فى دراسة ، عندك عربية ، بتتكلمى ٦ لغات … الخ انتى وعلى حسب نظرتك ليه طيب انا عشان انجح لازم اعمل حاجة عشان اقول نجحت .. يعنى محتاج هدف اشتغل عليه اوصله ، والناس بتختلف فى بنوك اهدافها .. والاهداف موجودة فى كل وقت ف حياتنا : مثلا.. الهدف الأساسى لينا اللى مخلوقين عشانة الجنة ( فمن زحزح عن النار وأدخل الجنة فقد فاز ) دا النجاح الاكبر الاهداف اليومية من صلاة ٥ مرات دا نجاح الدراسة وانك تعرفى تقرأي وتكتبى وتخشى الكلية الى تحبيها دا نجاح اقرأ ١٠٠ كتاب السنة دى وهكذا تمام يعنى احنا محتاجين اهداف عشان نوصلها وكل هدف لية طريقته … قيسى على كدا كل حاجة .. يجى بعد الهدف السعى والاجتهاد واكتساب المهارات اللازمة للهدف دا والصبر وقبلهم توفيق ربنا عشان توصلى .. دى كدا طريقة انى اقول انى نجحت مبسطة ومختصرة من تفاصيل كتيرررر الانضباط والصبر اهم حاجتين للنجاح عدو النجاح الاول المزاج مش كل هدف هختاره هعرف أوصله جايز معرفش .. عادى جدا حياتنا مش كلها ناجحة بس نعمل الى علينا اهم حاجة متقارنيش حياتك بحياة حد كل واحد لية صفحة بيرسم عليها حياته نقلل ذنوب على قد مانقدر لانها بتقلل البركة من حياتنا عموما

لية ؟ على اية ؟ اهدى شوية على نفسك وادى مساحة لنفسك .. الواضح من كلامك ان فى حمل كبير شيلاه ، طموح كبير بيحركك ، امال كبيرة من اهلك عليكى .. وانتى خايفة متوصليش لكل دا .. بس ع العكس تماما احنا عاوزين نستغل الخوف دا لصالحنا اكتر ناس بتنجح اكتر ناس بتخاف لانهم بيعملو كل حاجة ممكن تتعمل عشان ينجحو بس ساعات الخوف دا بيقلب ضد .. عادى انك تغلطى عادى انك تنسى عادى انك تحسى بتوهان بس على حسب هتعرفى تستغلى دا ويكون دافع انك تزيدى ف اجتهادك ولا تقعدى وتعيطي كأن ما باليد حيلة ملكيش دعوة بغيرك .. يغش مايغشش انتى مالك ، ليكى نصيب ورزق ربنا كاتبهولك المهم انك تهتمى انك تجتهدى وتعملى الى عليكى وفكك من اى حد اكيد جزاء الى اجتهد وتعب مش زاى الى غش .. انتى مش قادرة تذاكرى لان جواكى مرعوب من انك تفشلى ورافض الحفظ والفهم طب ماتجربى كدا واحدة واحدة واحنا هادين .. غيرى ستاذ واتنين و٣ لحد ماتلاقى الى تفهمى منه عادى الثانوية مش نهاية الدنيااا ومش صعبة والله احنا الى عملنها بعبع .. انتى محتاجة بس شوية ثقة ف نفسك وف امكانياتك وتقدرى تديرى رعبك وخوفك .. متنسيش قدرة ربنا على تغيير الامور ، استعينى بالله وتوكلى علية ، احنا لا نملك فى امرنا شئ.. وتأكدى ان كل الامر بيد الله .. انتى عليكى السعى والاجتهاد وهو عليه التوفيق ..

صلى ع النبى الاول ومشى الدنيا عشان الدنيا تمشي، الموضوع سهل باذن الله وكلنا عدينا بالقصة دى كفاية مذاكرة بنظام الثانوى الى هو ليل نهار مذاكرة والكلام دا .. استفيدى من المواد الى بتدرسيها واستمتعى بيها الماتريل اهم حاجة لو كلية عملية يكون معاكى محاضراتك وحاضرة للسكاشن ولو نظرية محاضراتك كلها اول بأول حضرتك هتذاكرى عادى وتفهمى وتحفظى زى اى مذاكرة، المعلومة مش عاوزة تثبت هنعمل اى مبدائيا مابنخفش من المادة ولازم نلمها كلها والكلام دا .. المواد بتكون متقسمة لشباتر مثلا بتبدأ واحدة واحدة وبنحول نربط الدنيا ببعض يابنعمل علامات استرشادية مثلا تفكرنا بالحاجة او خرايط ذهنية شوفى انتى بتثبتى المعلومة ازاى افضل طريقة لتثبيت المعلومة انك تشرحى لغيرك وغيرك يشرحلك جمعى كام واحدة من زميلاتك واعملو جروب مثلا وخدى المادة قسميها عليكم واتجمعو وكل واحدة تشرح للكل الى ذاكرتة والكل هيستفيد .. دحيحة الدفعة ربنا يبارك فيهم ساعات بيعملو ملخصات للمواد خليكى معاهم .. استمتعى بوقتك ف الجامعة واشتركى ف نشاطات وخشى فى مجالات بعيدة عن دراستك عادى وربنا يوفقك.

بداية ياصديقي سؤالك دا دليل على صدق نيتك وانك بتتحرى كل شيء فى سبيل انك تريح قلبك وتكون صادق مع ربك ، ربنا يقويك ويثبتك يا رب ..انت حاليا اعتبرها فترة علاج ادى لنفسك وقت .. جوهر الدين الإيمان .. والايمان معناة التصديق والتسليم حتى لو مشفتش .. طبيعى اختلاف الفكر يعملك لخبطة شوية فى الاول خصوصا ان الالحاد بيعتمد ع الجانب المادى .. يعنى انا لا ارى الله اذا الله غير موجود ربنا قال فى سورة البقرة ( آمَنَ الرَّسُولُ بِما أُنْـزِلَ إلَيْهِ مِن رَبِّهِ والمُؤْمِنُونَ كُلٌّ آمَنَ بِاللَّهِ ومَلائِكَتِهِ وكُتُبِهِ ورُسُلِهِ) احنا لا شفنا ربنا ولا الملائكة ولا الرسل دلوقتى بس مؤمنين بوجودهم .. يقينا وتسليما الحاجة الوحيدة الى شايفنها هي الكتاب .. عاوز قلبك يرتاح اقرأ وتدبر وتعمق فى القرآن الكريم هتلاقى نور بيشدك ويملاك مش هقولك صلى كتير ولا صوم ولا اذكار احنا محتاجين نشتغل ع قلبنا الاول ومش معنى كدا انك تمنعهم انت حاليا محتاج تتعلم العقيدة والتوحيد ولو صدقت النية هتلاقى شيوخ وعلماء كتير تقدر تسمع ليهم اصدق النية مع ربنا وربنا هيساعدك من حيث لا تعلم انت صح كمل 👊

اخر حاجة وانا اسف جدا انى طولت فى كلامى بس اتمنى تكونى احسن …..‏قيل لأحد الصالحين : ما سر السكينة التي تعتريك ؟ فقال قرأت ( يدبر الأمر) فتركت أمري لصاحب الأمر ، وقرأت ( إن مع العسر يسرا ) فأيقنت أن العسر زائل لا محالة ، وقرأت ( فما ظنكم برب العالمين ) فادركت أن الخير قادم لا محاله ..

واية الى يجبرك انك تكذبى اصلا ؟ لو اضطريتى انك تكدبى عشان تحافظى ع علاقتك بشخص هتفضلى تكدبى كتيير لحد مايجى وقت ومش هينفع الكدب .. طب على اي ؟ انا اسف يعنى بس لية الضغط النفسي والعصبى دا .. لية تفضلى مضغوطة ولازم تحورى الكلام وتفضلى خايفة من ردة فعل الشخص دا .. هو يايتقبلك زاى مانتى او تقللى تعامل معاة لكن متخليش حد يأثر عليكى بالشكل دا

بشكل كبير سيتم تقسيم سوريا على المدى البعيد .. ايران وروسيا مش هيخرجو من سوريا بالسهولة دى .. وامريكا مش هتسمح بقيام نظام معادى لاسرائيل على حدودها .. وتركيا ليها مصالح عشان حزب العمال الكردستانى .. من الآخر كل المؤشرات بتقول ان البلد بعد نظام الاسد رايحة لمصير مجهول .. مش هيسمحو بقيام دولة تحكم نفسها بنفسها ابدا او ارادة حرة .. التورتة بتتقسم والى بيدفع تمنها الشعب العربى السورى

موضوعك مقسوم لنقطتين : اولا : اكيد انتى ليكى نظام ف الدراسة معين انتى اكيد ذاكرتى بية قبل كدا وعارفة بتعرفى تحصلى المعلومة ازاى .. بتفهمى اكتر ما بتحفظى عادى جدا بس مش معنى كدا انك مش هتعرفى تحفظى خالص .. حاولى تفهمى الى هتحفظية وتعملى علامات ارشادية ، وتراجعى علية سواء بالتسميع او الكتابة اكتر من مرة لحد مايثبت ، والاهم من دا شيلى من دماغك نقطة انك بتفهمى ومش بتحفظى ..كلنا بنحفظ ونفهم بالاجتهاد والصبر ثانيا : والدتك نفسها تفرح بيكى بس طموحك انتى فين ..ماتعشيش بطموح مامتك وتنسي نفسك .. ماتعشيش فى ضغط اهلك وانك لازم ولازم .. خدى الموضوع بالتسلسل دا انا بجتهد عشان احقق نفسى وادخل الكلية الى انا عاوزاها واتفوق فيها وبعدين اهلى يفتخرو بيا وربنا يوفقك ويرزقك حسن الفهم والحفظ

لا حول ولا قوة الا بالله .. احنا الى قرينا السؤال تعبنا بس منه مابالك بالى عاشو .. هونى على نفسك شوية .. عارفين مهما حد قال كلام مش هيقدر يساعد بحاجة .. عزائي الوحيد انى اقلك قربى من ربنا وافتكرى ان دى دنيا شوية وهتخلص وان عيشتنا الحقيقية بعد كدا ، خلى دا الهدف قدامك ودا هيساعدك تستحملى شوية الى بيحصل 💔 مش هقلك قربى من اهلك ورجعى حلم الطب وحاولى تصلحى الى حوليكى مش هينفع اضغط عليكى لانك اكيد حاولتى كتير وما باليد حيله .. انتى حاليا فى كلية تجارة اجتهدى فيها وتفوقفى مش بقلك حبيها ، خلى بدايتك منها وحطى هدف قدامك انك تخلصى وتشتغلى فى مكان كويس ع الاقل تطلعى برا البيت دا شوية ، لازم يكون هدفك انك تخلصى من القصة دى سواء بالشغل او الجواز ، .. حاولى تقيمى الليل وتدعى ربنا دايما " ياحي ياقيوم برحمتك استغيث اصلح لى شأني كله ولا تكلنى الى نفسي طرفة عين ".. وافتكرى دايما ان دا امتحان ربنا ليكى وعليكى الصبر والاحتساب .. وربنا يوفقك ويعينك

عندى ٣ اسأله جاوبيهم بنفسك.. لية احساس عدم الثقة فى نفسك وفى قدرتك وفى شطارتك وجمالك؟ هل حلمك انك تكونى دكتورة من نفسك ولا من تأثير والدك عليكى؟ سؤال فلسفى شوية.. نظرتك للحياة انها سباق ولا كل واحد لية مسار حياته يمشى فيه -وخلى الاجابة بعيدة عن نظرة الاهل والمجتمع-

١- تعرفى ان احنا عايشين فى دنيا ماشية بنظام المتغيرات يعنى مافيش حاجة فيها ثابتة ولا مضمونة ..وولا كل حاجة بنحبها هنعملها وبنكرهها فمش هنعملها .. ٢- ماتممشيش فى حياتك العملية بمشاعرك اذا كنتى حابة او رافضة ..انا عارف انة موضوع مرهق جدا تنفيذة بس لازم يكون الالتزام هو الاساس ٣- لو هتعملى اى موضوع وانتى محبطة هتحسيه جبل .. حاولى تهونى الموضوع ع نفسك واحدة واحدة وحاجة ف حاجة لحد ماتتقبلية وتكونى متأكدة انك بتعملى المفيد ليكى حتى لو مش حباة ٤- استعينى بالله للتيسير لافضل امورك و اصبرى ٥- مافيش مانع انك في وسط موضعك دا تدورى على شغفك وتحاولى بس متقصريش فى موضوعك الاساسى

وانتى عاوزة عبادتك تكون سهلة ؟! مقاومتك لشهوات النفس تكون سهلة ؟! مكنش حد غلب .. الانسان بيعيش فى صراع دائم ما بين الغلط الى نفسه بتحبة وبين الصح الى ربنا قالنا عليه .. وبسبب كدا الناس بتبقى منازل في الجنة او النار بسبب اختلاف اعمالهم ودرجة ثباتهم .. انتي حاليا في انتكاسة وضلمة وبتدوري ع اي عود كبريت تولعيه عشان ينور شوية وهيطفى تاني .. لان الحل انك تخرجي من القوقعة دي كلها … الحل : ساعدى نفسك بنفسك لان محدش هيعرف يساعدك الا لو ساعدتي نفسك … لازم تعالجي المشكلة من جذورها وتحلي مشكلة الفراغ عموما اللي في حياتك والفراغ الايماني خاصة والخطوات بتتاخد واحدة واحدة مش فجأة ! الصلاة من غير قلب حاضر واستشعار بوجود ربنا كأنك بتعملي رياضة .. وافتكري دايما { إن الله لا يغير ما بقوم حتى يغيرو ما بأنفسهم } ..ربنا امرنا بالسعي في اي حاجة في حياتنا ..لازم ربنا يشوف انك عاوزة توصلي له فعلا حتى لو كنتي مش مبسوطة باللي بتعمليه.. بس تكوني متأكدة انك بتعملي الصح لوجه الله سبحانه وتعالى

من باب التجربة : ١- لازم تلتزمى مع دكتور تغذية وكونك هاتتبعى معه هيخليكى تلتزمى ..وكذلك الجيم ٢- لازم تقتنعى بالاكل ماتبقيش تاكلى اكل معين لمجرد انك عاوزة تنزلى وزن ٣- حاولى تغيرى اكلك من باب تغير اللايف ستايل.. اعتبرية باكدج ع بعضه ومن ضمن فوايده نزول الوزن غير الاكل الصحى والصحة الجسدية وهكذا ٤-متحرميش نفسك من الاكل كله .. قللى الكمية بس وزودى حركة ٥- هونى الامور ع نفسك لو بدأتي والنتيجة كانت مش عجباكى .. خدى الموضوع انك بتغيرى حياتك للاحسن وبتعودى نفسك ع نظام معين