TOYOU .lll

السلام عليكم (كل بني آدم خطاء وخير الخطائين التوابون) مفيش حد فينا معندوش ذنوب صدقينى كل واحد فينا عنده مصايب وبلاوى لولا ستر ربنا مكناش هنعرف حتى نبص لنفسنا ف المرايا ربنا اكيد هيسامحك لانك نويتي التوبه وانتى حاليا بتحاولى تحلى المشكله ستر ربنا ليكى مستمر لحد الآن لأن ربنا عاوز يديكي فرصه جديده للتغيير متضيعهاش لأن الله اعلم هيحصل ستر تانى لو غلطى ولا لاء ف أظهرى لربنا انك فعلا شاكره لستره عليكى ومتكرريش الفعل ده تانى بالنسبه لموضوع الخوف والتهديد غالبا الموضوع ده بيستمر للناس الى بتعمل ذنوب العباد او اى ذنب فيه ناس شاهده عليه ، حابه اعرف ليه عملتى كده هل وانتى بتكلمى الولد بتكونى بتحبيه ولا مجرد عاوزه تحسي بالشهوه معاه ؟ وكمان إن شاءالله خير واتمنى الموضوع يعدى على خير عدا وقت كبير اكيد هو مش هيعمل حاجه ادعى ربنا يستر عليكى دايما ويبعده عنك احساسك بالخوف ده بسبب انك خايفه تتفضحي ف اى وقت طبعا شعور مخيف جدا لكن انتى موضحتيش الشخص ده من نفس المنطقه بتاعتك يعنى هيعرف أهلك ولا كان ايه بالظبط لكن عموما قدام زى ما بتقولى عدا 10 شهور ومفيش حاجه يبقي إن شاءالله خير واحساسك بتأنيب الضمير ده حاجه كويسه لانك فوقتى من الذنب الكبير ده وناويه تتغيرى وطبعا مفيش احسن من الايام دى للرجوع لربنا والدعاء فيها

اكيد جواك مشاعر كتير متلغبطه عشان كده بتطلع فى صورة عدم تركيز وتشتت وده طبيعي عشان نعالج الموضوع لازم نعالج السبب وهو المشاعر المتراكمه جواك زى الخوف من المستقبل والاحساس بالفشل وغيرها حاول تفهم نفسك حاجه صدقنى هتنفعك اننا مش لازم نكون معانا احسن كليه ولا احسن حاجه عموما بس نقدر من الى احنا عليه نكون احسن منهم كلهم صدقنى ناس كتير ناجحه وهما ولا دكاتره ولا مهندسين ف شوف انت ف ايه واشتغل عليه يعنى اتعلم لغه بالذات الانجليزى مش متخيل هينفعك قد ايه وفرص الشغل هتكون اكتر وادعي كتير ربنا يرزقك من غير ما تتعب نفسك فى التدوير حتى فى أماكن كذب زى السوشيال ميديا مليانه نصابين وحوادث والله فعلا دول ناس كذابه لأن الشغل بيكون ف الحقيقه غير كده ابعد نفسك نصيحه بقولهالك قبل ما يحصل حاجه , كمان بالنسبه لتحفيظ القران هل انت هتعمل كده بسبب الفلوس اما تطوعاً من لعمل كده لان ده هيفرق كتير

حبيبتي المطلقه مش حاجه عيب ولا حتى قليله لكن النظره ليها فى المجتمع من بعض الناس بتكون غريبه معرفش ليه الغباء ده لكن للاسف كده حتى النظره للراجل المطلق ممكن تكون غريبه لكن ده بيحصل من الناس الغير سويه والمريضه فقط ركزى ، لو حد عاقل وناضج هيكون عارف ان المطلق والمطلقه زى اى حد كان ليه تجربه بالحلال ومتوفقش فيها كام حد بيكلم فى الحرام ولكن لسه مخدش موقف رسمي ف بيقولوا عليه أنه عادى قدام مش مطلق مع إن هو عمل الانيل من كده الناس دول مهما عملنا مش هنعجبهم والله وهما ملهموش غير الكلام عاوزه اقولك مثلا الست الى بتعيب فيكى عشان مطلقه هى نفسها الست الى هتلاقيها اه لسه متجوزه ولكن طافحه المرار حرفيا مع جوزها ومش عاوزه تاخد الخطوه بتاعتك عشان الناس كلهم والله يبنتى عاوزين ياخدوا خطوة الطلاق بس قدامك بيقولوا لا ازاى انتى اتطلقتى الحياه كده والله اعلم الناس بتحب تظهر المثاليه ومن جواهم يتمنوا ياخدوا موقف ويعملوا زيك شوفى كام واحده لو خدت خطوه زيك واتطلقت من الحد الخاين والى مش كويس بدل ما تخلف منه وتجيب لينا عيال مش سويه شوفى العالم هيكون احسن ازاى بس فى ناس بتجبر نفسها عشان ميتقالش عليها انها مطلقه شوفتى. الغباء وصل لفين ؟ حاولى تلاقي ليكى شغل ضرورى أو يكون ليكى حاجه تعتمدى عليها بالنسبه للزوج اتمنى ربنا يرزقك بحد كويس ويعوضك صدقينى كل حاجه ف ايد ربنا احنا ندعى بس وإن شاءالله ربنا يعوضك وادعي كتير اوى اوى احنا ف احسن الايام للدعاء وانا هدعيلك وإن شاءالله ربنا يرزقك ويعوضك خير

المشاكل بتتحل مسألة الرياضه وانك مش كويس فيها مشكله بتقابل ناس كتير جدا من اكتر المواد المعقده بالنسبه لناس كتير حتى انا ابسط معادله بحس انى مش عاوزه وفى فرق بين مش عاوزه ومش عارفه انا بقيت معقده بسببها بس عادي انا بشتغل على حجات تانيه وكده كده كان مجالى ملوش علاقه بالرياضه اوى لاني كنت ادبي معرفش بحكي قصه حياتي ليه لكن المهم إن الرياضه مش مقياس على انك هتقدر تكون اب كويس أو لاء ، كمان بالنسبه انك مشتغلتش قبل كده طبيعي لان سنك لسه صغير واكيد الفرصة مكتوبالك بس ف وقت معين عشان تكون اب كويس لازم تحاول تتعلم حجات كتير زى الصبر وانك تكون سوي نفسياً متستخدمش العنف وتكون حنين وغيرها من الحجات الى اكيد لو ربنا شافها فيك هيرزقك بالأطفال، كمان يعنى ايه جملة انا خايف يكون عندي وسواس قهري وهما يلقطوا منك الموضوع ده ؟ شوف هو فعلا فى نسبه أن الوسواس القهري يكون وراثي بس إن شاءالله ده ميحصلش ولازم تحاول تعالج نفسك منه وإن شاءالله كل حاجه تعدي على خير ، كمان كل حاجه مختلفه لما بنتحط فيها بس اكيد هنلاقي ليها حل الحياه مش دايما مثاليه اكيد سعات هتحس بالعجز وتحس انك مش احسن اب ولا حتى احسن زوج بس كمان لازم تحاول تصلح المشاكل وركز فى امتحانات الثانويه العامه عشان تحكي لعيالك فى المستقبل انت عملت ايه فيها لأن صدقنى انت ف سنه مهمه وابعد خالص حوار العيله دى عن دماغك

شريف جابر 😂 بعيداً عن الموضوع لو افترضنا اننا عملنا سيرش مثلا عن اضرار الشاي هتلاقي كمية مقالات قد ايه الشاى ده مضر وخطر على صحة الإنسان ولو عملنا سيرش تاني عن فوائد الشاي هنلاقي بردو كمية مقالات قد ايه الشاي ده ليه فوائد كتير لدرجه ان فى علماء قالو أنه بيقلل خطر السرطان مع أننا لو بحثنا هنلاقي أنه خطر على الإنسان بردو ، الى عاوزه أقوله أن كل حاجه فى حياتنا فى ناس بتؤمن بيها وناس لاء وكل واحد لو اختار الطريق هيلاقي بدل السبب مليون يكمل فيه لو عاوزه تصدقي كلام شريف هتلاقي كميه ناس زيو وممكن يقنعوكى لأنهم بيتعاملوا مع الناس الى معندهمش ايمان قوى أو معلوماتهم قليله جدا فى الدين عن طريق دس السم ف العسل ويقولوا احنا بنفهمكوا الحقيقه وقال ايه الكون عمل نفسه بنفسه وإن الإنسان بعد ما يموت هيكون اتبخر وكلام عبيط كده والحقيقة أن هما بيعتمدوا على الاسأله الصعبه الى قليل لو حد عرف يجاوبها لان معظمنا موصلش للمرحله دى من الايمان زى أسئلة فعلا ممكن تخلينا نقول أنهم صح ولكن الحقيقه ان مش معنى أننا فشلنا ف الاجابه على سؤال معين يبقى معناه أن ده محصلش مش معنى إن فى معجزه معينه مش عارفين نستوعب حدوثها انها محصلتش وليه روحتي بعيد فى المعجزات هو المعجزات مش حواليكي ف كل مكان ولا ايه ؟ ازاى السماء ثابته ازاى كل حاجه بمقدار محدد مبتزدش أو تنقص ازاى اساسا كل حاجه ف جسمنا بتشتغل بالنظام ده ازاى الكون اتعمل ؟ ولو نفترض إن والعياذ بالله مفيش إله طب مين عمل الكوكب ؟ هو عمل نفسه بنفسه ؟ ده شىء مضحك جدا بصراحه المعجزات مقياس لايمان الإنسان زى معجزه شق صدر النبي ومعجزة الإسراء والمعراج وغيرها كل دى مقاييس لاختبار الإنسان ولو انت مش مؤمن بمعجزات قليله جدا بالنسبة المعجزات إلى حوالينا والى لسه هتحصل حضرتك مسلمه على اى أساس راجعى نفسك وربنا يهديكي وبلاش تتابعي الراجل ده لو عايزه تفضلي مسلمه 🤷🏻‍♀️

الى انتى فيه ده ابتلاء محتاج صبر كبير جدا خصوصا لما الاذى يكون من اقرب حد ليكى لكن صدقينى مش دايما الحياه بتكون زى ما احنا عايزين أنا عارفه أن مامتك صعبه فى التعامل وده باين من كلامك بس صدقينى إن شاءالله ربنا هيحلها يعنى مثلا هل لما بترفض عريس هل انتى بتقنعى باباكى أو اخواتك يحاولوا يغيروا رأيها ولا بتستسلمي لرأيها وخلاص ؟ لأن لو انتى حاولتى بكل الطرق ف اقناعها وفشلتى وعملتى كل الى تقدرى عليه لازم تدخلى حد فى الموضوع زى باباكي أو حد من اخواتك أو خالتك مثلا او اى حد يقدر يقنعها بالذات باباكي انا عارفه انك عانيتى معاها كتير بس صبرك ده عمره ما بيضيع عند ربنا احسن والحجات الى اتمنيتى تلاقيها ف مامتك ومحصلش نصيب إن شاءالله ربنا يكرمك ببنت تعوضيها عن اى حاجه حصلتلك وصدقينى ربنا هيكرمك بحد كويس يمكن العريس ده مكانش خير ليكي مثلا بس بردو حاولى تكلمى باباكي وتاخدى موقف بس باحترام عشان حتى متدايقش منك يعنى قوليلها انك مش حابه كده وعرفي والدك وإن شاءالله كل حاجه هتتحل أو حاولى تكلمى إخواتك

السلام عليكم اتمنى تكون بخير طبيعي جدا تزعل خد وقتك فى الزعل فراق الأب مش هين اكيد ، لكن على الاقل نقدر نخلينا حنينين مع نفسنا اكتر اكيد انت اتمنيت لو قعدت معاه اكتر وده طبيعي بس صدقني مفيش حاجه فى الدنيا بتحصل منغير سبب ابدا عدم وجودك ف اللحظه دى اكيد تخفيف عنك لانها هتكون اصعب لما يتوفى وانت جمبه يمكن ربنا عايز يخفف عنك اكيد هو عارف انك كنت بتشتغل وبتعمل الى عليك وانك كنت بعيد عنه ف مكان بعيد ده مكانش بمزاجك وده كان بحكم شغلك وده حاجه اكيد متزعلش ابوك منك اكيد الأب والام مفيش حاجه تعوضهم لكن لازم نحاول نتعايش مع الحقيقه الموت اصعب حقيقه فى الدنيا والاصعب انك تفضل قلقان من موت حد لدرجه انك متستمتعش بالحياه معاه من كتر مانت قلقان من وسواس الموت اكيد انت عارف ان تعبك والدك ده كان صعب عليه وأن ربنا ارحم بكتير من انه يسيبه يتألم عشان كده هو ف مكان احسن واكيد هتشوفه فى يوم بس خليك إنسان كويس واكيد ابوك هيكون عارف ب ده من أعظم الحجات الى الانسان يبسيها أنه يسيب ولد صالح يدعو له ادعيله كتير اوى اوى ولو عرفت تطلع ليه زكا اعمل كده وحاول تواسي مامتك وتقعد معاها على قد ما تقدر حتى تكون عملت كل حاجه تقدر عليها عشان بعد الشر لو حصل حاجه متقولش لنفسك ياريتنى قعدت معاها اكتر لاء لازم تعمل كل حاجه تقدر عليها وزى ما قولتلك تقدر عليها يعنى وانت بتشتغل اكيد مش هتعرف تقعد معاها ف دى حاجه مش هتقدر لكن تقدر تكلمها وتطمنها كل يوم وهكذا وتقدر تكون انسان كويس عشان هى تاخد حسانات هى ووالدك من تربيتهم ليك ، بالنسبه لموضوع اخواتك اه شىء محزن لو هما مبيسألوش عليك بس يمكن عندهم حجات منعاهم انت متعرفهاش طبعاً ده مش عذر ولكن نحاول نحسن الظن بالى حوالينا وكفايه اكيد سؤال مامتك عليك متعتمدش على سؤال حد حاول تكون قدام ربنا وقدام نفسك حد كويس وإن شاءالله خير

متفهمه جدا مشاعرك وجودك جمب شخص ومساعدتك ليه وانك تكونى جمبها ف ظروف كتير وبالرغم من افعالك الكويسه معاها إلا انها اختارت نكران الجميل وانها تكون شخص سىء عند الخصام دى حاجه اكيد هيجي اليوم وتندم عليها ربنا يهديها وإن شاءالله تستوعب أن هى غلطت ف حقك وتحاول تتوب عن الفعل وتعرف قد ايه انتى كنتى حد كويس وهى غلطانه ف حقك ، كمان عاوزه اقولك أن مشاعرك دى طبيعيه جدا متستغربيش نفسك بالعكس اى حد يبعد عننا بعد ما يكون صاحبنا وعزيز علينا طبيعي أننا نزعل وجدا كمان متتمنيش ليها الشر ابدا خليكى كويسه احسن منها حتى قدام ربنا وقدام نفسك تكونى عملتى الى عليك وحفظتى اسرارها حتى لو هى معملتش كده بس على الاقل تحاولى تتقبلى انها خلاص مشيت وان عياطك وزعلك عليها مش هيرجعها وإن شاءالله ربنا بجبر بخاطرك ويعوضك بخير بتفكرينى بنفسي ف فتره من الفترات افتكرت أنها نهاية الدنيا لما واحده عزيزه عليا مشيت الحقيقه ان جه بدالها واحده كويسه جدا جدا والحياه كده ربنا بيشيل عننا اى حد مش خير لينا وإن شاءالله ربنا يعوضك خير

يعنى ايه مش مقبول من الجنس الآخر ؟ ايه خلاك تقول كده ؟ هل حاولت تتقدم واترفضت مثلا ولا ايه بالظبط ؟ ثم بالنسبه لموضوع التمنى بالموت ف هو حرام وانت اكيد عارف بص كل واحد فينا ربنا كاتبلو كل حد هيدخل حياته امتى وازاى وتأخير البنت الى هتكون مراتك ده مش معناه عيب منك ابدا احنا فى أيام كويسه جدا للدعاء مش متخيل قد ايه الدعاء لى شهر رمضان بجد بيعمل المعجزات واعتقد انك انسان عارف ربنا كويس وفاهم قد ايه الدعاء وخصوصا فى الوقت ده قادر يغير كل حاجه وعموما الدعاء بيغير الاقدار ادعي ربنا يعجل من زواجك ويرزقك بنت الحلال الى تكون من نصيبك وتكون خير عليك سعات الواحد بيمر بتجارب زى الحب من طرف واحد كلنا اكيد اتعرضنا لكده بس ده مش معناه أن الجنس التانى رفضنا ولا معنى انك شوفت نوعيه من البنات بتنجذب لمواصفات معينه مش فيك مثلا يبقي انت كده خلاص راحت عليك اكيد لاء ربنا إن شاءالله يرزقك بحد كويس بس لازم انت كمان تكون كويس عشان ربنا يتأكد انك تستاهل بنت كويسه لازم تكون حد كويس مبتتفرجش على النوعيه دى من الفيديوهات أو الحجات الغريبه الى بتشدك للحرام خليك كويس ربنا يرزقك حد كويس وبقولك تانى ادعي كتير

الخيال حاجه ساعات بنحتاجه ف حياتنا عشان نقدر نتخيل اهدافنا وأحلامنا ونتشجع على فعل المهام بتاعتنا زى اننا نتخيل شكل الجنه وده يدينا حافظ أننا نصلى ونقرب من ربنا ، أو نتخيل شكلنا واحنا دخلنا كليه احلامنا ف نفرح ونبدأ نذاكر ونجتهد فى اللحظات دى بيكون الخيال بشكل إيجابي لكن لما ابدأ اتخيل ويكون الخيال عباره عن يومى كله ده هيتحول لمرض فعلا المتلازمه دي بتختلف من شخص لتانى وده على حسب المستويات يعنى فى ناس ممكن تقعد نص ساعه وناس تفضل تتخيل بالساعات وأنها حققت حجات واتجوزت وهى لسه اصلا محقفتش حاجه بيحاولوا يخرجوا من هموم الدنيا عن طريق التخيلات دى هل هى مضره ولا لاء ؟ اكيد اه لانك فعلا بتكون عايش ف وهم ف اكيد ده حاجه هتستنفذ مشاعرك بشكل كبير ، ازاى تبطلها ؟ تبعد عن اى حاجه بتخليك تعملها تبطل تقعد لوحدك ف الاوضه تبطل تسمع اغانى حزينه أو رومانسيه تخليك تتخيل نفسك ويا سلام لو بتتفرج على افلام أو مسلسلات ده انت كده بتقول للمتلازمه تعالى دلوقتى وتفضل بقا تتخيل نفسك وانت متجوز البطله وهى متعرفش انك عايش اصلا عموماً حاول تبطل تتفرج على الحجات دى فعلا فعلا هى السبب والله

براحتك عموماً قدام ده هيريحك يمكن قعدتك مع نفسك هتخليكى تراجعي نفسك وتفهمى حجات كتير عن نفسك لكن أهلك ليهم حق أنهم يطمنوا عليكى على الاقل يطمنوا لأن مش طبيعي تختفي عنهم كده لكن فعلا اى انسان بيحتاج فتره يقعد ويبعد عن اى حد وده حاجه بتحصل ولكن لازم نعرف اهلنا أو نتكلم معاهم ونطمنهم

بتتسحري كويس طب ؟ أو بتنامى كويس ؟ واكلك مفيد ولا بتاكلى اكل مضر مثلا ؟ وكمان لازم تكشفي عشان تعرفي ايه السبب ف كل ده وربنا يشفيكى يارب

ربنا معاك ويهديك ويعينك على المشكله حاول تقرب لربنا اكتر فى رمضان حاول تبعد عن اى حاجه بتشجعك على الفعل ده سواء مشاهد او اى حاجه بتديك مشاعر أو حاجه تخليك تعمل كده بالنسبه لموضوع ازاى تساعد نفسك تبطل الفعل ده هسأل سؤال هل ممكن تعمل الفعل ده قدام الناس ؟ اكيد لا طب ازاى بتعمل كده قدام ربنا اكيد حاجه زى دى المفروض تخليك مكسوف تعمل كده تانى حاول تفكر دايما نفسك أن ربنا شايفك لان ساعات الإنسان بيعمل ذنوب وبيكون عارف ان مفيش انسان شايفه وبينسي ان ربنا شايفه حاول تقعد وسط ناس وتبطل تقعد لوحدك ف الاوضه إلا وانت داخل تنام بس لان القعده لوحدك اكتر وقت الشيطان بيهيألك فيه انك تقدر تعمل اى حاجه فيها معصيه

هل الموضوع ده بسبب الماضي بتاعك ولا لاء يعنى مثلا انت زمان لما كنت بتقول رأيك قدام أهلك كانو بياخدوا ويدوا معاك ف الكلام ولا بيقاطعوك ويسكتوك اصل الانسان بطبعو بيحب الكلام ولو بقا وصل للحاله بتاعتك اكيد فى حاجه سببت ده زى انك ممكن تكون مش واثق من نفسك ومبتحبش نفسك وشايف ان اى كلام هتقوله الناس هتاخد عنك فكره عامله ازاى وده مينفعش انت تقول إلى انت عايزه براحتك اهم حاجه ميكونش بيجرح حد اما رأى الناس ف اكيد عارف انه ميهمناش وبالنسبه للنقاش مش اى حد بيعرف يتناقش لان ساعات بنكون معندناش طاقه نثبت للى قدامنا وجهة نظرنا أما بقا موضوع انك تعبر يمكن تكون اتربيت ف مكان وسط اهل مبيعرفوش يعبروا بالكلام لكن طريقه التعبير كانت بالافعال زى أن مامتك تصالحك بأكله بتحبها او باباك يجبلك حاجه بتحبها منغير ما يتكلموا معاك ف كلام ويعبروا بيه عن مشاعرهم تجاهك عموما الحاجات دى مبتجيش مره واحده انت لازم تعرف انت ليه وصلت للمرحله دى ازاى تحل مشكله منغير ما تحل السبب

ربنا معاكى شدى حيلك لسه وقت ادعى ربنا كتير ويوفقك ويصلح حالك ويبعدك عن اى معصيه أو أذى ليكى عموما موضوع الاباحيه ده وهم كبير فعلا كل حاجه بتكون فيها مش حقيقيه هدفهم بس شد انتباه حد كبير من الناس للغلط طبعا ف بجد كفايه عليكى الكام يوم الى عملتي فيهم كده وتوبى لربنا وحاولى متقعديش لوحدك خالص بجد وابعدى اى حاجه بتخليكى محتاجه تشوفى الكلام ده او اى حاجه بتديلك مشاعر وهميه زى الافلام والمسلسلات والاغاني بوستات الحب والحجات الوهميه ولو بتحبي حد أو مرتبطه ابعدى احسن الحجات دى بتخليكى مش قادره تبعدى لانك بتكونى عايزه اى حاجه تحسسك انك مبسوطه ف ابعدى عن اى حاجه زى كده وموضوع شخصيتك ده كويس ونعمه من ربنا يديمها عليكى انك حتى لو اذنبتى ف متمسكه ف القران والصلاه دى حاجه كويسه ابحثى عن عذاب مشاهدى الاباحيه معتقدش هتقدرى تستحملى العذاب ده خوفى بيه نفسك وربنا يوفقك

المدرس ده الى طلع الدكتور والمهندس وكل الكليات الى ببقدسوها دى ومهووسين بيها ناس كتير وعندهم تفكير زى ان لو انت مش فى الكليات دى يبقى انت مستوى أقل عموما الناس دى هتقابليها كتير بس لازم يكون فى حدود فى الهزار يعنى تحاولى تقوليلهم انك مش حابه التريقه وبعدين مش كل الى دخلوا كليات قمه شغالين وحياتهم كويسه المقارنه عموما حاجه مش كويسه خالص قارنى نفسك بنفسك عشان تعرفى تطورى من نفسك وسيبك منهم المحاميين بيقولوا عليهم حراميه ونصابين والتجار بيقولوا عليهم غشاشين وبيكدبوا على الزبون والمحاسبين بيقولوا عليهم حراميه حتى عامل النظافه الى بيساعدنا بيتريقوا عليه وبيتجنبوه ولو قعدنا نحكى فى موضوع اختلاف اراء الناس على المهن مش هنخلص صدقينى وفالاخر دول بشر لا يقدروا ينفعوكى ولا يضروكى الا بإرادة ربنا ف هما لا يقدروا الا على الكلام ( بتوع كلام) طب بذمتك دى ناس نزعل منهم ؟ اعتقد نزعل عليهم أفضل

انا معرفش ايه ظروفك بس اكيد انتى بتعانى صدقينى الانتحار مش حل لان فعلا انتى كده بتتعبي نفسك ف الدنيا والآخرة وده كلام ربنا لان المنتحر كافر ، كمان ليه انتى لسه عايشه مثلا لحد الان ؟ الاجابه ببساطه لان ربنا كاتبلك حياه معينه بناس جديده بظروف مختلفه الناس الى ربنا قرر أنهم يسيبوا الدنيا حتى وهما لسه صغيرين ويبان لينا أنهم كان ليهم مستقبل الحقيقه ان ربنا اكتفى بحياتهم ف الدنيا لكن انا وانتى وغيرنا ناس لسه عايشه لسه ربنا مكتفاش بحياتنا لسه انتى ليكى قصه ربنا لوحده عارفها انتى مش واثقه ف ربنا ولا ايه ؟ انا اتمنى انك تشيلى الفكره دى من دماغك وانك تستغفرى وتدعى ربنا يعوضك خير وحياتك تتحسن وانا كمان هدعيلك ربنا معاكى ويوفقك 🤍

انا اسفه ليكى وربنا يكون فى عونك بس فعلا ده ابتلاء فقد الاب حتى لو هو لسه عايش ده شىء مؤلم وإن شاءالله ربنا هيعوضك ويرزقك بزوج صالح واولاد صالحين يعوضوكى عن اى فقد ولكن انا حاسه بشعور الخذلان وتراكم المشاعر جواكى انا فعلا مقدره ده بس حقيقي اتمنى انك تستوعبي فكرة ان الناس مش دايما الفكره الصح فى اللجوء ليهم وقت التعب والحزن ساعات ممكن يكونوا وسيله خطر واذى اكتر لينا انا عاوزه اقولك انك اتعودى متثقيش ف حد أو متستنيش من حد يعوض فقد الاب عندك عشان ممكن يكون الشخص غلط احيانا كتير ناس بتعانى من فقد الاب وبالفطره بتكون محتاجه الحنان فتبدأ تدور عليه مع ناس غلط ومؤذيه وعلاقات محرمه وغيرها اتمنى متوصليش للمرحله دى ومتستنيش حد يساعدك عشان مش دايما الناس مصدر امان ادعى لربنا يبعد عنك اى شىء صعب ويجبر بخاطرك ويعوضك خير ، وكمان انتى قولتى انك حاسه انك مش من المجتمع بالعكس انتى مهمه ف المجتمع وجودك لحد الان اكيد ليه سبب هتدخلى حياه ناس وناس هتدخل حياتك متتوقعيش أن الحياه انتهت وان الحياه فرصها خلصت وممكن مامتك تكون هى العوض ليكى ف قربي منها اكتر وربنا يوفقك ويعوضك خير 🤍

البنت الاولى الى قالتلك انت زى اخويا عملتلك تروما جالك شعور أن الموضوع ده ممكن يحصلك تانى من خطيبتك ودلع مامتها ليها خلاك شاكك اكتر ، عموماً انت بتقول مامتها مدلعاها وكلام تانى واضح انك بتعانى من مشاكل ف التفاهم معاها أو انكوا مش شبه بعض وف وسط الكلام قلت انك بتحبها يعنى الحب هو الحاجه الوحيده الى مصبراك عليها بس الحقيقه ان الجواز مش مبنى على الحب التفاهم حاجه اساسيه كمان ف بلاش تظلمها معاك لو انت بتشك ف اى تصرف منها وبعدين مش هتقدر تغير فيها لان هى اساسا اتربت على فكره أن عادى تصاحب ونيتها ممكن تكون كوبسه بس مش هتتقبل تحكماتك فيها ف استغل فتره الخطوبه قبل ما يحصل جواز وانت لسه مش عارف تتأكد

الحقيقه لو قولتلك انسيه يبقى بكذب عليكى تعلقك الكبير بالإنسان ده مش هيختفى ف يوم وليله ولكن تقدرى تتقبلى الموضوع وان خلاص هو مع شخص تانى الحمدلله أن محدش يعرف أو ان محصلش بينكوا كلام ف كان ساعتها الجرح هيكون اكبر ومؤلم اكتر ، عموما الحب من طرف واحد ده شىء مؤلم جدا بس اكيد ربنا يعرف عن الإنسان حجات اكتر منك لو كان قدامك انسان مناسب ومثالى ف ممكن يكون مش كده بس انتى متعرفيش حاولى تبعدى نفسك عن اى حاجه بتفكرك بيه لو بتراقبيه أو هو عندك مثلا على الانستغرام ف اعملى بلوك أو حاولى تمنعى نفسك انك تشوفى صورته أو تدخلى الأكونت بتاعو حقيقي الموضوع ده هيرجعك لنقطه الصفر عموما ف الحالات الى زى دى الى هى الحب من طرف واحد بتكون مش بتحبي الشخص بتحبي الشخصيه الى رسماها ف خيالك المهم حاولى تبعدى عن اى حاجه تفكر بيه وابعدى عن الاغانى الحزينه والكلام الى بيخلى الإنسان عاوز ينهار اكتر هى بتتعب الأعصاب ومؤذيه هتتعبي ف الاول وبعدين هتختفى زى ما كنتى بتدعى ربنا يجمعك معاه ادعى ربنا انك تنسيه ويهون عليكى

بتراقبي الناس بشخصياتهم المعموله ف دماغك اكيد ، لما بتراقبي حد وتلاقيه ناجح ف كل حاجه ده عقلك اوهملك ده ولكن منعرفش الماضي بتاع الشخص ده او ايه الظروف يعنى مش كل الناس نستحق نقارن نفسنا بيها لان احنا بنكون شايفينهم بطريقه صغيره جدا زي انك عينك تشوف من فتحه صغيره حاجه معينه مش قادره تشوف كل الحقيقه لو قربتى منهم هتقولى ايه ده ازاى انا كنت شيفاهم حاجه كبيره تستحق المقارنه ، معنديش فكره ايه سبب مقارنتك بالناس هل هو عدم ثقه بالنفس ولا تعود بسبب الاهل ف بقيتى بتقارنى نفسك أو أن وقت فراغك كبير ف بتشغلى وقتك بمراقبة الناس هما بيتقدموا ف حياتهم وانتى لسه ف مكانك محدش مهتم بيكى عليا اسفه لو كلامى قاسي ولكن دى الحقيقه هما هيهتموا وينبهروا لما تكونى ناجحه اشغلى نفسك وكمان بلاش اى اكونت فيك بتراقبي بيه الناس او حتى بلاش تستخدمى التليفون كتير

انا متأسفه ليكى بالنيابه عن افعال والدتك معاكى الحقيقه كل الكلام مش كافى بس فعلا مش كل الامهات كويسه ف التعامل حتى لو مامتك بتحبك بس طريقتها مش صح انا معنديش الخلفيه عن السبب ف كره والدتك عن البنات وسر غضبها منك بشكل مستمر لمجرد انك بنت هل ده بسبب انها كانت بتتعامل بطريقه قاسيه لأنها بنت ف اتكون عندها عقده ولا عشان الناس الى حواليها قالولها كلام مش كويس عشان اول خلفتها بنات ف كل الأحوال ده مش مبرر ابدا لتعاملها القاسي وانها دخلت جواكى احساس بإنك عبء ع المجتمع وأن وجودك ف حد ذاتو شىء غريب ومكانش ينفع مع أن مفيش حد مخلوق بلا سبب وكلنا لينا سبب عايشين عشانه والحياه عمرها ما تستمر بالرجال فقط معرفش ازاى لسه فى ناس بتفكر كده عموماً انا عاوزه اقولك ان مش ذنبك خالص انك اتولدتى مع ام بتفكر بالطريقه دى كل حاجه كانت بتعملها كانت بتعملها بطريقه غلط لما سمعت كلام الناس فى موضوع ان البنت تساعد مامتها بدل ما تقولك تساعديها كانت بتجبرك انك تعملى حجات مش لازم تعمليها لما اخواتك يكونوا نوعا ما كبار ولسه مش عارفين ينضفوا وراهم وبتحملك المسؤوليه بدل ما تعلمهم انهم لازم ينضفوا وراهم ده غلط ومصيبه كمان ده غير كلام كتير جارح وقاسي هى مش مدركه خطورته عليكى وتأثيره ، بالنسبه لوالدك هو كمان اسلوبه ف الكلام مش زى الاحساس الى جواه هو خايف عليكي بس قالك كلام جارح يمكن غظب عنو أو من ورا قلبو وطبعا عدم رغبه البنت ف الجواز لا تعنى انها مش بنت او حتى سلوكها مش كويس ابدا بس المهم أن لازم كل حد ياخد قرار زى عدم رغبته ف الجواز لازم يكون ليه سبب ، السبب بتاعك هو انك اتعقدتى من الجواز فاكره ان الجواز موضوع مرعب وقد ايه الراجل هيعاملك بطريقه قاسيه وكلامه جارح بتشوفى اسرتك فيه والحقيقه دى غلط ربنا يعوضك خير بزوج كويس لازم توسعى تفكيرك وتخليه ناضج اكتر من كده مش لازم اهلنا يعرفونا كل حاجه دلوقتى ممكن تسألى عن اى حاجه زى موضوع النظافه الشخصيه الى مامتك بتزعقلك فيه مش مهم دورى بنفسك متسأليش صحابك ابدا اسألى اليوتيوب او اسألى هنا وموضوع الجواز بيعتمد على الاختيار الصح لو حد حبك مش هيقولك كلام يدايق مش هيضطر يتجوز عليكى تلاته ولا يفضل أمه عليكى بالسوء ولا حتى يشغلك خدامه كل حاجه هتكون تمام مش لازم تكون العيله بتاعتنا هى نفس العيله الى هنكونها ف المستقبل مش يمكن تاخدى موضوع افكار والدتك حافز ليكى لتكوين اطفال وتعليمهم كل حاجه كان نفس حد يعلمهالك تحبيهم زى الحب الى كان نفسك تتحبيه من والدتك سامحى والدتك ومتركزيش ف كلامها وادعى كتير ربنا يغير تفكيرها وادعى حياتك تتحسن الدعاء بغير الأقدار ربنا يوفقك

ساعات الكلام الى بنواسى بيه ناس عندهم مشاكلك بيبقى قليل جدا بس الكلام هو الحاجه الوحيده الى اقدر اساعدك بيها هى والدعاء ليكى ، عاوزه اقولك ان انا حاسه بيكى الخناقات بتسبب تعب نفسي حتى لو احنا مش طرف ف الخناقه يعنى لو فى خناقه بين اتنين ف البيت حتى لو انا مش من ضمن الخناقه احساس الصداع والخنقه بيجيلى الخناق اساسا من الحجات المزعجه والى بتتعب النفسيه جدا اصبرى وحاولى تسامحى ابوكى وامك على كل حاجه عملوها سامحى والدك على ظنه فيكى السوء انك سارقتى أو حتى مقارنه والدتك ليكى خلاص لازم تسامحيهم حتى لو مش هتقدرى تنسى اى موقف وحش ليهم زى ما بتقولى هما كبروا واكيد وجودك معاهم دلوقتى هيفرق مش يمكن تكونى انتى احلى حاجه ف البيت أو حتى الحاجه الكويسه من اخواتك هونى عليهم انتى بتقولى اخواتك تاعبينهم ومشاكل وهكذا لكن حاولى تكونى الحاجه الكويسه فيهم مش شرط عشان اخواتك سلوكهم ف التعامل غلط تحملى نفسك المسؤوليه بالعكس ده مش ذنبك وإن شاءالله ربنا يكرمك ف المستقبل ويعوضك خير 🤍

اكيد عندك مشاكل نفسيه ليها علاقه بالعلاقات زمان ممكن تكون محلتهاش واتراكمت جواك لحد ما بقا عندك سد بينك وبين الناس خايف وقلقان ومش عارف تتعامل يمكن انت مش فاهم ليه بس اكيد فى سبب انت لوحدك عارفه اكيد فى علاقه واحده على الأقل لسه مأثره عليك حتى لو كانت من أهلك مثلا انت لسه متعافتش عموما ده ميقللش منك وسعات الوحده بتكون كويسه بس دايما لاننا محتاجين نتعامل مع بعض عشان الحياه تستمر هو يبان كلام تقليدى بس فعلا دى الحقيقه لما بنتعب بتروح لإنسان لما تتعلم بتروح لإنسان لما بتعوز تعمل اى حاجه هيكون فى انسان معاك لازم تتعامل معاه ف موضوع الانعزال ده لازم يتغير زى ما قولتلك حاول تفتش جواك كده تقعد مع نفسك تفكر وتسأل نفسك هو انت طول عمرك مبتعرفش تتعامل مع الناس ولا فى فتره معينه وليه وايه السبب ايه العلاقه الى اذتك اتعافى منها الاول هترتاح بدل ما تكون لسه جواك ومش لازم تبقى الولد الجامد الى عندو صحاب مش عارف عددهم بس على الاقل حاول بصراحه انا فكره الصحاب بحس انها مش بيترتب ليها يعنى هى بتيجى فجأه لو قاعد ف مكان حواليك ناس الكلام هيجر بعضو لحد ما تبقوا صحاب بعدين تاخدو ارقام بعض ممكن تسأل الى حواليك اسأله زى هو انت بتلعب كوره أو انت من زمان ف المكان ده افتح معاه كلام والموضوع هيكون سهل إن شاءالله ربنا هيكرمك بصحبه صالحه كويسه

الميكب حرام فعلا إلا لو كان لزوجك وانا فاهمه نيتك وانك قصدك تدارى اى عيب مش عشان تتزينى ولكن حاولى تعالجي المشاكل الى ف بشرتك زى الهالات والحبوب وغيرها من مشاكل تانيه بالعكس أنا بشوف أن الميكب بيزيد من المشكله يعنى لازم تعالجي مشاكلك الاول فاهمه ربنا يهديكى يارب ، تانى حاجه بالنسبه لموضوع البيرفيوم والنظافه كلمتين مينفعوش يكونوا ف جمله واحده ايه الفايده من أن واحده تحط بيرفيوم وهى اصلا مبتهتماش بنفسها ولا ريحتها الكلام مش عليكي ولكن بتكلم على فكره أن البيرفيوم عمره ما كان حل لمشكله النظافه بالنسبه لموضوع الريحه ايه فكرتك عن ريحتك تكون مش حلوه لو بنتكلم عن العرق فى مزيلات عرق كويسه واسعارها كمان كويسه لو هنتكلم عن نظافه الفم هنتكلم عن فرشه ومعجون أسنان شىء أساسي ولو حابه ممكن كمان نحط غسول فم ولو هنتكلم عن الريحه فى حجات كتير هنهتم بيها اعملى سيرش على اليوتيوب عن ناس بتتكلم ف الموضوع ده البيرفيوم ملهوش علاقه بالنظافه ابدا

ربنا معاك ويرزقك بس السفر برا اكيد مش حل دايما صح لان الفكره انك معندكش شىء تشتغل فيه ف هيحصل نفس الحاجه برا جرب تشتغل بالكليه الى انت فيها أو حتى افتح سايبر المشروع ده حلو جدا بس محتاج وقت كبير حاول تنظم فلوسك وتشوف ايه الاولويات وايه الحجات إلى مش مهمه وإن شاءالله ربنا هيكرمك

بيشرب قصدك مخدرات ؟ لو كده ف اكيد لا وغير كده حاولى تقولى انك مش عوزاه بطريقه متجرحش مشاعره أو تخلى حد من أهلك يكلمو بطريقه كويسه بردو ومعرفش الشعور متبادل ولا لا بس فكره الإدمان دى لوحدها مش حلوه

ابعد عن الاولى حتى لو زعلت شويه مش مهم احسن ليها بكتير اعتقد انك متشتت عاطفياً حتى مش قادر تعرف انت بتحب مين بصراحه مش فاهمه ليه بتعملوا كده

ربنا يرزقه ويجمعكوا بالخير كل حاجه هتفرج وتتحل إن شاءالله حاولى تكونى لطيفه معاه فى الكلام يمكن كام جواه تراكمات ولما اتخانق كلمك بأسلوب وحش معلش استحمليه انتى اكتر واحده عارفه ظروفه معلش إن شاءالله هتفرج وعلفكرا لو هو حد كويس وانتى متأكده من كده تماما مش لازم تجيبي كل حاجه جيبي اولويات بس وبعد الجواز هيعوضك اكيد 🤎

سعات الإنسان مش بيكون مدرك لقساوة الماضي بتاعو والظروف الى ربنا حاطه فيها الى بسببها هيفهم حجات كتير فى الدنيا وهو لسه صغير وهيدرك قيمة نفسه ويفهم معنى الحياه انت قولت أن حصل ليك شىء مش كويس عن طريق حد تعرفه وتقريبا كنت صغير وغير مدرك طب انت ملكش ذنب فى الموضوع ده وانت مش مسؤول عن حاجه مكنتش عارف اتعملت ازاى وليه وانا عاوزه افهمك ده لان انا كمان حصل معايا شىء مش لطيف أو اتعلمت حاجه معينه وانا كنت تقريبا فى تانيه ابتدائي عن طريق حد من قرايبي وعشت نفس المعاناه ولحد الان بزعل لما بفتكر بس بقول لنفسي انى مليش اى ذنب انا اتحطيت مع ناس مريضه خلتنى اعمل كده ف مش لازم أحبط نفسي انا مكتتش واعيه تماما ومش اى مشاكل تجيلك تختار انك تنهى حياتك وده مش تقليل من المشاكل بتاعتك ولكن اشمعنا ربنا بيقبض روح ناس كتير حوالينا ف مختلف الاعمار وانت لحد الان عايش ؟ مش يمكن ربنا مستنى منك حاجه كل واحد فينا ليه دور فى المجتمع كلنا بنكمل بعض هيجى يوم تدرك انك مهم ده لو كنت فاكر انك مش مهم دى مشكلتك بس الحقيقه اكيد انت مهم اكيد ناس هتدخل حياتك وتحتاجك متستعجلش فى الحكم على حياتك ثم كل شىء مكتوب واحنا بنفذ أوامر ربنا وفى ناس كتير جدا حصل معاها حجات مش لطيفه وهى صغيره والحمدلله أن محدش يعرف حاجه وربنا ستر عليك متحكيش لحد متحكيش لحد ابدا ابدا متفضفضش لحد خااالص بجد المشكله دى بالذات متحكيهاش غير مثلا لو محدش يعرف هويتك فاهم عموما متلومش نفسك وسامح نفسك على كلامك اتجاه نفسك وكويس انك قريب من ربنا ربنا يديم القرب ده ربنا يفرحك ويسعدك ومتزعلش لو ابوك بعيد عنك ملكش نصيب فى حنيه الاب محدش بياخد كل حاجه فى ناس عندها أهل كويسه جدا بس عندهم مشاكل فى الصحاب وناس عندها مشاكل مع الاهل وقدرت تكون عيله كويسه لو شايف عدم وجود والدك حاجه ادايقك واكيد ليك حق بس خلى ده حافز ليك انك مش هتكون زيو فى المستقبل وان ربنا يكرمك بعيله وزوجه وأطفال تكون ليهم الاب انت تعوضهم وهما يعوضوك انت لسه ف بدايه الطريق كل يوم بتصحى ربنا مستنى منك الجديد انت بطل قصتك متخليش حاجه تحبطك 🫶🏻

طب بلاش بلاش بلاش فكره تطبيقات الشات والكلام ده بالله عليكي دى بتكون تفكير من الشيطان وتطبيقات الشات دى والله اول خطوه من خطوات الزنا ربنا يبعدك عنها ويحميكى ولكن انتى حاليا محتاجه لحب وعندك فراغ عاطفي بسبب زوجك ف من الفطره الطبيعه الإنسان بيحتاج للحب ف هتبدأى تدورى على اى حد يسمعك وبحكم ان الستات بتحب الراجل الي بيسمعها ف ممكن حد يوهمك انو بيحبك حضرتك متزوجه لحد الان مينفعش تكلمى حد ابدا ابدا ده مش حل حاولى تحلى مشاكلك بعيد عن العوامل الخارجيه زى انك تكلمى حد حليها بنفسك طب افرض معرفتيش والله لازم تطلقي منه احسن من انك تقللي من نفسك معاه لكن بجد اتمنى ان موضوع الشات ده تنسيه وقربي من ربنا اكتر وربنا يوفقك

يعنى حضرتك ارتبط بيها وهى لبسها وطريقه حياتها سواء فى النزول وغيره مش عجباك وبتخليك تغير وانت ارتبط بيها وعاوز تغيرها ؟ هل هى بتنزل من البلكونه مثلا ؟ اعتقد انها بتنزل من البيت عادى قدام والدها و والدتها أو حتى اخواتها ممكن يكون لبسها مش احسن حاجه بس انت داخل ف علاقه مع حد هيتعبلك اعصابك انا مش بعاتب عليك انا بس عاوزه اقولك أن الحب مش كفايه للاسف عكس ما ممكن تكون فاكر يعنى ممكن تكون بتحبها وجدا كمان ماشي بس هل ده كل شىء معتقدش انتو شبه بعض ف التفكير ده باين من كلامك وطريقه نزولها وهكذا وانا عارفه انك خايف عليها بس انت لسه متبقاش ليها حاجه عشان تتحكم فيها فاهم ؟ ف اكيد هى طول عمرها بتنزل وبتلبس وهكذا فجأه حد يتخانق معاها ف اكيد هتفضلوا طول الوقت مش فاهمين دماغ بعض لأن انتوا اساسا داخلين العلاقه لمجرد شويه مشاعر واعجاب ملهاش علاقه هى حد مناسب ولا لاء ، وانت اهو بتقول انا اديت مشاعرى وطاقتى ف العلاقه دى تخيل تدى مشاعرك فى علاقه اكبر مشكله فيها انك قبلت فولو لبنات غيرها طب بلاش كده انت حاسس بالذنب انك مرتبط بيها منغير راسميات ما تسيبها لحد ما تكلم أهلك ؟ مانت لو شايف انها هتستناك الفتره دى يبقا هى تستاهل تكون مراتك ، طب هقولك على حاجه معرفش انت شايف طريقتى غريبه ولا لاء بس انا بتكلم بعقلانيه انت قولت جمله شدتنى بصراحه وهى أنها مكانتش موافقه على فكره الارتباط والواضح انها عارفه انو حرام بس الواحد ضعيف بقا قدام مشاعرو ف اتضطرت ترتبط بيك رغم شعورها بأن الارتباط حرام وانت عارف انها كانت شايفه انه حرام تخيل تعرف أن انسان مش حابب يدخل ف علاقه عشان شايف انها حرام تقوم تشده للفكره دى وطبعا هى اكيد ايمانها أضعف من أنها تتمسك بالفكره وتسيبك من الاخر انت ذات نفسك بتقول الدراسه جايه ف من تخميني انك لسه فى الدروس هل تتوقع حد لسه بينزل دروس يشيل مسؤوليه علاقه ؟ سألتك كذا سؤال جاوبهم بينك وبين نفسك هتلاقيك بتقول انا مش قد التجربه دى ياما ناس حبيناهم بس هما مش مناسبين معتقدش هتقدر تاخد خطوه وانت علاقتكوا لو النت فصل تكون انتهت !

السلام عليكم اتمنى تكونى بخير ، اعتقد ان فى مشاكل كتير حصلت فى حياتك متحلتش أو تم اهمالها وتراكمت داخلك وانتى افتكرتى انك نستيها والحقيقه انها لسه جواكى ف عقلك لازم تدركى فكره أن الإنسان ضعيف جدا قدام أمور الحياه وان لولا وجود ربنا كان الإنسان لا شىء تايه ومفيش حلول عشان تدركى فكره أن ربنا هو إلى بيحصل المشاكل وبيدبرها اعتقد ده هيخفف شويه عشان متشليش مسؤوليه التفكير ف مشاكل ربنا اساسا هو الى هيتولاها ولينا أننا نصبر وندعى ، كمان مفيش اى مشكله لو حكيتى لحد على حاجه هو مفهماش وده شىء طبيعي جدا لان مش كل الناس قادره تفهم الشعور بالظبط ممكن عشان مجربتش الحجات إلى انتى مريتى بيها حتى الدكاتره النفسيين مش دايما بيفهمونا 100٪ ولا انتى هتقدرى تفهمى نفسك بشكل كامل حبيبتى احنا بشر رأينا وطباعنا بتتغير يعنى ممكن تكونى فاكره نفسي بتحبي حجات معينه بعدها بفتره تلاقي نفسك بتكرهيها مش مهم نفهم نفسنا بشكل كامل لازم نحاول نتعامل معاها كويس اعتقد لازم تقعدى تكتبي كل مشاكلك فى الماضي وتحاولى تحليها تراكم المشاكل والصدمات الإنسان بيظن انو اتنسي والحقيقه هو لسه موجود معانا وبيظهر لنا بنتعصب أو بيحصل رد فعل قوى فى حياتنا بنكتشف أننا لسه متعلجناش متراكميش مشاكلك وحاول تحليها والإنسان بيقعد سنين كتير جدا جدا يفكر هو عايز ايه كل مرحله ف حياتنا حجات فينا بتتغير فى فترات حياتى كنت احب الاغانى بعدها بقيت بكرها بعدين بقيت اسمعها تانى بحس انى بحب الحب وسعات تانيه بحس انى بكره الولاد عمتا وبتعصب منهم سعات بكون قريبه من ربنا سعات غظب عنى ببعد وغيره وغيره من حجات تانيه متضاده فى حياتى ف ده شىء طبيعي محدش عارف يحدد هو حابب ايه مفيش مشكله اهم حاجه عالجي الحجات الي فاكره انك نستيها صدقيني هى لسه جواكى 🤍

لا طبعا الموضوع مش سخيف بصي شىء طبيعى عدم الالتزام ف الاول اكيد مش كل حاجه بتمشي بمثاليه يوم عملتى حجات كتير ويوم قليل ويوم معملتيش خالص مش مشكله ادينا بنتعلم بصراحه انا الطريقه الي وصلتلها ف التنظيم هى الكتابه بكتب كل يوم الحجات إلى هعملها وجمب كل حاجه مربع كده ولما بخلصها بكتب ف المربع ده علامه صح فاهمه. ؟ وكمان بحب اشوف فيديوهات على اليوتيوب لناس بتعمل ايه ف يومها وبتعمل منهم شويه ابدأ ازاى وانظم ازاى بس بحاول اقلل من التليفون عشان اقدر اخلص الحجات الي مخططاها واهم حاجه مبحطش حجات كتير عشان ف الآخر مبقدرش اعملها بحط الاولويات الاول وبصراحه طريقه الكتابه حلوه معايا اتمنى تفيدك🤍

انا عارفه أن الموضوع صعب انا حاسه بيكى اكيد مش سهل اقولك حبي نفسك ف هتحبيها الموضوع بياخد وقت ومحتاجه تعرفي نفسك اصلا انا ممكن أسألك سؤال هو لو انتى شوفتى بنت صغيره اهلها بيتريقوا على شكلها وكل حاجه فيها وهى صداقتهم ونفسيتها تعبت ومبقاش عندها ثقه هل هتكرهيها انتى كمان وتتريقي عليها زيهم ولا هتقفي جمبها وتواسيها ؟ اكيد هتواسيها وتقفي جمبها مش كده ؟ طيب ما ده نفس الشىء الي بيحصل معاكى تماما حاولى تشوفي نفسك بنظره بعيده كأنك بتطلعي علي حد هتلاقي انك اكيد مش هتحبي الي عملوه فيكي واكيد بدل ما تحسي انك زيهم مش حابه شكلك هتحسي انك لازمه تقفي جمب نفسك وتواسيها لأن انتى اكتر حد محتاج يحب نفسو المفروض بدل ما تسألي نفسك انتى ازاى تحبي نفسك اسألي نفسك ليه ممكن متحبيش نفسك ايه السبب الي هيوقفك عن ده انتى عارفه كويس انك لو عندك صديقه حصلها زى ما حصلك وكل حاجه كانت ملهاش تدخل فيها وعاشت نفس قصه حياتك اكيد هتقفي جمبها طب اشمعنا مع نفسك مش بتعملي كده انا كنت ف فتره زيك بس سألت نفسي أن انا مستاهلش ده ليه هما عايشين طبيعي وانا حتى ابسط حاجه وهى انى اقف اشوف نفسي قدام المرايه بقت شىء صعب عليا كل ده عشان ناس هما مش فارق معاهم مشاعرى طب كلامهم يفرق معايا ليه فى ناس بأشكال كتير ممكن نشوفهم جمال ورغم كده مش واثقين ف نفسهم لأنهم صدقوا كده اعرفي نفسك حبيها واسيها هى محتجاكى 🤍

الخطوبه اكتر فتره مهمه فى العلاقه وبيتكشف فيها حجات قدامنا ك نوع من التحذير من ربنا لينا عشان نكون واعيين اكتر وفاهمين حقيقه الموضوع الواضح أن خطيبك بيحبك ولكن الحب مش الشىء الوحيد للاسف فى الجواز العائله ليها تأثير كبير جدا في الجوازه للاسف وقدام هما بيعملوا معاكى كده فى فترة الخطوبه ما بالك بالجواز ؟ معلش لو كلامى غريب او مش متوقع والمفروض اقولك استحملى ولكن فعلا دى انذارات من ربنا لعدم اكمال الجوازه لأن انتى هتعيشي شايله فكرة أنه ممكن يتخانق مع اهلو بسببك مثلا او هكذا ف راجعى نفسك وابعدى عن العلاقه السامه دى ربنا يوفقك

ربنا يوفقك اعملى إلى عليكى والباقي علي ربنا سعات بنتصور أن المذاكره فيها حجات كتير والحقيقه ان المذاكره ابسط من كده تماما اهم حاجه تذاكرى بطريقه تفيدك لأن كل واحد بيذاكر بطريقه تريحو لسه ف بداية المشوار قدامك كتير متقلقيش كل حاجه هتكون سهله إن شاءالله الثانوى والتعليم مش اخر الدنيا في حجات كتير هتفيدنا حاولى تهدى وتهدى افكارك وعقلك لازم يفهم أن السنه هتعدى زى بقيت السنين قولى كلام ايجابي لنفسك اقنعى عقلك هتبطلي تفكير لسه ف بداية المشوار وإن شاءالله خير 🤍

اعتقد ان هذا الشخص مش خير ليكى يمكن يكون فى اشارات عموما فتره الاعجاب بحد دى بنمر بيها كلنا ولكن مش دايما بنبقى شايفين الحقيقه يمكن انتى مش حباه هو انتى حابه حد تانى على أنه هو يعنى يمكن يكون قدامك مرسوم بصوره معينه انتى إلى رسماها وهو عكس كده ف لازم تعرفي هل هو يستاهل اصلا التفكير فيه ولا لا ودايما ادعى ربنا انه لو حد مش خير ليكى يبعدو عنك وفعلا هتلاقي ربنا بيكشفلك حجات ولو حصل وكان حد كويس ف بردو ربنا هيخليه يجيلك ويطلبك من أهلك حاولى تبطلي تفكير فيه عشان متتعبيش اعصابك وإن شاءالله كل الى نفسك ايه هيحصل 🤍

الدكاتره اكتر ناس هتفيدك ف الموضوع ده ولكن الان فى كريمات كتير بتقلل لحد ما تشيل خالص الندبات مش كل حاجه محتاجه ليزر وممكن الدكتور يقولك ليزر ولا لا على حسب الندبه الي عندك لكن الدكتور اكتر حد هيفيدك ممكن تسأليه بس لكن متقلقيش انتى بيها أو منغيرها جميله متغيريش حاجه ف نفسك عشان حد أبدا ولو هتعالجيهم يبقا عشان نفسك موضوع أن حد يسألك عليهم وتدايقي ده لان انتى شيفاها حاجه تدايق لكن لما تحبيها مش هيهمك السؤال عموما ربنا يوفقك وإن شاءالله الدكتور يفيدك اكتر ويريحك بالتوفيق 💖

يمكن كان عندك تجارب سيئه فى الماضي فى موضوع العلاقات أو كمان صدمات نفسيه من الماضي لكن لازم تقعدى تراجعى كل علاقتك وتحاولى تحللي هل العيب كان منك ولا منهم وتحاولى تشوفى يمكن تطمنى شويه وعاوزه اقولك أن مش كل العلاقات نفس النهايه حتى لو تخيلنا ده ف لا مش كلهم وشىء عادى جدا انا بمر ب ده كمان لما بدخل علاقه بفضل اتخيل ان الشخص ده هيأذينى وهكذا ف نحاول نقلل من التفكير ومنتغرمش ف البدايات بتاعت اى علاقه ونحاول نركز مع الشخص عشان نقدر نحدد مش يمكن تصرفاته هى السبب ف تفكيرنا الزايد

اطمن 🤍 اول حاجه انا مصدقاك انك مش مثلى ولا عندك الميول ولكن انا فاهمه كلامك لان شوفت حالات كتير كده اول حاجه انا عارفه ان الموضوع غريب انك تشوف افلام اباحيه وترجع تصلى الموضوع غريب بالنسبالك يمكن بتكون حاسس انك مثلا مكسوف تصلى بعد ده ولكن الصلاه لازم تكون حاجه ف يومك حتى لو بتعمل الكبائر ف دى اول حاجه هتشفعلك وده طبعا لاننا اول حاجه هنتحاسب فيها ف القبر ، بالنسبه لموضوع حبك لمشاهده الفيديوهات المثليه اول حاجه الإنسان فطرته الطبيعيه انو دايما بيجيلو فضول ناحيه الشىء الغريب او الخطأ بيبقى عندو فضول يعرف ويشوف وممكن يدمن مشاهدته ف انت لازم تكون عارف ان فى ناس كتير اتحطت فى الموضوع ده جالها فضول ف مره شافت فيديو ف أنشدت وادمنت بس المفروض تفوق وتقف عند الموضوع ده بالنسبه لموضوع الشهوه عمتا الشهوه دى حاجه طبيعيه فينا ك بشر مش بس ناحيه الاشياء الجنسيه و العلاقات ولكن الشهوه فى حجات كتير حوالينا زى الاكل مبنعرفش نقاوم نفسنا ويجيبنا شهوه ناحيه الاكل او شهوه ناحيه المال والسلطه مثلا فى جمله لازمه تكون فاهمها وهى ان الشهوه وسيله مش غايه يعنى ايه؟ يعنى مثلا الشهوه ناحيه الاكل لازم تكون عندنا ولازم نحس بالجوع عشان نقدر ناكل ونعيش ف هى ساعتها هتكون وسيله عشان ناكل ونعيش ولكن مش غايه نفضل ناكل وندمن الاكل لحد ما نموت والشهوه الجنسيه ربنا خالقها فينا عشان تكون وسيله للزواج والانجاب مش غايه ابدا ف نقوم نستخدمها ك إدمان اتمنى تكون فهمت ايه الفرق بين وسيله وغايه ، زى ما قولتلك الإنسان طبعو بيحب الفضول زى مثلا قصه سيدنا ادم عليه السلام اكيد سمعت عنها لما ربنا كان باعت تحذير لسيدنا ادم وقال ليه انه مسموح ليه بأى شىء ف الجنه معدا الشجره دى لانها محرمه عليه وده طبعا كان اختبار من ربنا ليه تخيل سيدنا ادم بالرغم من انه عايش ف الجنه ولكن كان بس بيفكر يا ترى الشجره دى ليه محرمه ولكن كان بيحاول يبعد الافكار لحد ما الشيطان عرف يقنع سيدنا ادم انه يأكل من الشجره وفعلا عمل كده وده يعلمنا أن حتى الانبياء ف الآخر بشر زينا عندهم فضول رغم حجات كتير حواليهم بس لازم نتحكم ف الفضول لأن اوقات كتير الفضول هيكون بيسبب لينا مشاكل ومش لازم نكون عارفين كل حاجه حوالينا ، وانا فكرتك بالقصه عشان اقولك متلومش نفسك على ذنوبك واعرف ان حتى الانبياء معرضين للخطأ وتبقى التوبه الى الله هى الملجىء الوحيد ف حافظ على صلاتك حتى لو قبلها شوفت حاجه محرمه وبلاش فكره الانتحار المنتحر مطرود من رحمه الله ف ربنا وصفه بالكافر ف انت هتحب تكون فشلت دنيا واخره ؟ وانا هنا بقولك انك فشلت ف الدنيا عشان مش قادر تبطل الحاجه دى وكمان حاول تبعد عنها طب بص هو انا ممكن اسأل سؤال ؟ هل انت ممكن تشوف الافلام الاباحيه دى وسط اهلك وصحابك ؟ لاء صح ؟ يبقا انت كل ما تحس انك عاوز تتفرج عليها حاول تقعد وسط حد عشان تمنع نفسك حاول تهرب منها لحد ما تتعود على البعد عنها انت اقوى من كده صدقنى متخليش الشيطان يأثر عليك رغم أن الشيطان اول حد هيقول أنه ملوش اى دعوه وانك انت السبب يوم القيامه الشيطان حرفيا هيشيلك المسؤوليه ف بلاش تعيش شهواتك متحكمه فيك تُب ف شبابك قبل ما الوقت يفوت حاول تعمل اى حاجه بلاش تمسك تليفونك خالص وامسح اى حاجه تخليك تشوفهم وبالنسبه لموضوع انك حاسس بالعار اهنيك على الشعور ده لان ده معناه انك جواك حد كويس وعاوز يتوب عكس ناس تانيه وصلوا لآخر الطريق ومعندهمش مشكله مع المثليه خليك رحيم مع نفسك مين ف الدنيا مبيغلطش متتكسفش من ربنا ده هو الي خلقك وسايبك عايش كل يوم مستنى منك تتوب بلاش يكون ربنا عنده امل انك تتوب وانت تضيع امل ربنا فيك وتعصيه ومتحكيش لحد ابدا ابدا ابدا ابدا استر علي نفسك يعنى احنا كده كده مش عارفينك بس بتكلم عن الناس الي حواليك مثلا عشان محدش يفضحك أو كده خليه بينك وبين نفسك انت بينك وبين ربنا ثقه بلاش تضيعها 🤍

خطوه كويسه منك انك تدورى على حلول لمشكلتك اول حاجه كويس انك لازم تدركى حاجه مهمه وانك هتخسي وتنزلى من وزنك عشان صحتك مش عشانهم كل واحد ليه عيب او حاجه هتدايقو لو حد علق عليها بأى كلمه حاولى تواسي نفسك وتتقبلي عيوبك لانك لو كرهتى نفسك مش هتعرفي تنزلى من وزنك متيأسيش يحبيبتي لو جربتى فى يوم تخسي وف اخر اليوم بوظتى الدايت أو لو قعدتى اسبوع تخسي وملقتيش نتيجه حاولى تهدى على نفسك وتتقبلي فكره أن كل حاجه محتاجه تعب زى ما وزنك زاد على فترات اكيد وزنك هيقل علي فترات متخليش حد يحبطك عارفه لو سمعتى كلامهم واتأثرتى بيه وصدقتيه ودخلتى الاوضه تعيطي وكلتى اكتر واكتر هل ده هيحل المشكله ؟ متعالجيش مشاكلك بلأكل حبيبتي انتى كده بتتهربى من مشاكلك النفسيه حاولى تواجههى نفسك وتتقبليها بالنسبه لموضوع الرياضه لو مش بتحبيها انزلى امشي كل يوم من نص ساعه لساعه او اكتر امزلى وخدى معاكى ازازة مايه عشان الجو الحر بس صدقيني هتفرق معاكى جدا بالنسبه لموضوع الفلوس مفيش مشكله مش لازم جيم وبالنسبه للاكل الصحي عادى كلى نفس الاكل بس قللي الكميه متاكليش عيش ولا سكر يعنى لو البطاطس بتتقلى حطيها ف الفرن اى حاجه هتتعرض لزيت استبدليها بفرن ومتاكليش بليل ونامى بدرى الأحيان بليل انا حاسه بيكى والله السهر بيخلي الواحد ياكل التلاجه كلها ف لازم لازم تنامى بدرى على معده فاضيه أو اكله خفيفه حتى ربنا معاكى انا فخوره فيكي يا جميله هتقدرى انتى قدها 🤍

اشكرك علي كلامك وانك بتحاولى تلاقي حل دى حاجه جميله منك ومبسوطه انك بتحاولى تغيرى من الحجات الي بتمرى بيها اعتقد فى اشارات كتير ربنا بعتهالك بس يمكن انتى مفهيمتهاش يمكن الظروف دى المفروض تقربي من ربنا اكتر والمفروض تحبي نفسك انا استغربت انك بتلومى نفسك وبتكرهيها مع انك متستاهليش الكره ابدا كل الي حكتيه انتى ملكيش ذنب فيه نهائي فكرة انك بتكرهى الحيوانات دى ممكن تكون حاجه من اوائل مشاكل كبيره انصحك تحاولى تحبي نفسك وتؤمنى أن فى مستقبل جميل ينتظرك انا عارفه أن ممكن كلامى يكون كلام من الي اى حد بيصير حد بيه ولكن فعلا لو حبيتي نفسك وعرفتى قيمتها مش هيفرق معاكى كلامهم يمكن رزقك مش ف أهلك مش كل الناس اهلهم كويسين معاهم حاولى تعملي. الي تقدرى عليه على ما ربنا يعوضك بحد ف المستقبل تكونى معاه اسره سويه وتحققي فيها كل الاحلام إلى كان نفسك تعيشيها اوعى تأذى حد ابدا لمجرد انك عاوزه تحسسي إلى قدامك بنفس معاناتك عارفه انك معملتيش كده بس بفكرك أن ده هيكون حاجه خطيره انا معاكى ف اى وقت واتمنى تكونى دايما كويسه وبخير ربنا معاكى ويعوضك خير يارب🤍

شفاها الله وعفاها وربنا يطمنكوا عليها متقلقيش حاولى تسألي حد متخصص وممكن تخليها تتعزل عشان متعديش الي حواليها يعنى ليها اكلها الخاص وهكذا ربنا يشفيها ف اسرع وقت 🤍

تالته ثانوى دى مشاكلها كتير ضغوطات وهكذا ربنا يوفقك يارب وتبقى احسن حاجه في الدنيا متقلقش خالص كل مشكله وليها حل حاول متتحمسش ف البدايات عشان متحسش انك فقدت شغفك اخر السنه حاول تبدأ وتشد على نفسك بالتدريج بالنسبه لسؤالك يمكن الحل الكتير هو الحاجه الى هتطمنك وتأكدلك أن المعلومه لسه فاكرها عادى وطبيعي جدا انك تنسى معلومه مع المتابعه هتعرف ازاى تذاكر صح نصيحه لو انت حاسس ان نظام مذاكرتك غلط حاول تعدله يمكن ده السبب ف أنك بتنسى مثلا ويمكن بتذاكر صح بس دى حاجه طبيعيه متقلقش حاول تبحث عن اليوتيوب عن نظام تالته ثانوى وتعرف معلومات اكتر بالتوفيق.

ربنا يصلح الحال وترجعوا احسن من الاول لكن يا حبيبتي خليكي حنينه فى الكلام فعلا فى حجات الواحد مش بيحب يحكيها لاقرب الناس ليه يمكن مش عاوز يشيلك الهم أو يمكن يكون من النوع الي مش بيحب اصلا يحكى ولازم تحترمى ده عشان ميحسش انك بتقلي عليه بالنسبه لموضوع انك قولتيلو كلام جارح ف لازم تعالجي المشكله دى بجد لانك كده هتكونى بتجرحي فيه بعد اى خناقه وافتكرى أننا لما بندايق ونتعصب بنقعد مع نفسنا نهدا شويه مش نجرح فى إلي حوالينا انا معرفش التفاصيل ومش عاوزه اعرف اى حاجه لكن لو انتى هتفضلي تجرحي فيه ابعدى عنه لحد ما تعالجي مشاكلك

السلام عليكم اتمنى حضرتك تكونى بخير وربنا يوفقك وتعدى الازمات دى بأسرع وقت لكن متنسيش أن مفيش اى دكتور فى العالم يقدر يعالجك بدون ما تكونى انتى بتساعدى نفسك فى العلاج الان فى دكاتره نفسيين كتير جدا على السوشيال ميديا ممكن تكتبي على اليوتيوب مثلا اى مشكله محتاجه تعالجيها أو تسمع كلام حد وتعملي بيه العلاج مش هيكون فى يوم واحد بالعكس هيكون بالتدريج متيأسيش ابدا لو حسيتى انو مر فتره ومفيش حاجه اتغيرت الصبر جميل وإن شاءالله ربنا هيكرمك وهيعالج اى مشاكل عندك طبعا مش محتاجه اقولك انك تقربي من ربنا أياً كان ديانتك ايه مسيحيه أو مسلمه حاولى تقربي من ربنا اكتر وممكن تكتبي المشاكل الي عندك عن طريق البرنامج هنا ولو مش عاوزه حد يعرفك هويتك ضيفي ميزة مجهول واحنا هنحاول نساعدك انا واى حد فى البرنامج والله المستعان

طب ما طبيعي يخونك يحبيبتي هو انتى مراتو مثلا ؟ مانتى مجرد بنت بتكلمو معلش لو كلامى يدايق بس احسن من انى اوهمك واقولك تعالي نفكر نتصرف ازاى فى موضوع الشك ده طب ما نتكلم بصراحه ونقول إن يمكن دى إشارات من ربنا عشان تبعدى عنه ربنا يهديكى ويبعد عنك اى اذى 🤍

وعليكم السلام ورحمه الله وبركاته ، غالباً انتى جواكى تراكمات كبيره جدا ناتجه عن مشاكل نفسيه معالجتهاش زمان لحد ما اتكرامت جواكى وخلتك مش قادره تكملى حياتك بشكل طبيعي سعات الإنسان بيتعرض لصدمات نفسيه كتير خذلان من الصحاب مشاكل من الأهل البعد عن ربنا ارتكاب ذنوب مثلا وده شىء طبيعي أن اى حد يكون ارتكب ذنب فى حياتو المهم ممكن من كتر مانتى بتراكمى المشاكل النفسيه جواكى بدون ما تعالجيها اتراكمت جواكى لحد ما خلتك حاسه انك مش قادره تعيشي حياتك بشكل طبيعي وبنسبه كبيره ممكن تكون مش فاكره المشاكل دى لانك راكمتيها من زمان مثلا وده ينقلنا لحاجه تانيه وهى انك مش عارفه نفسك اعتقد انى مراهقه ف لسه كل حاجه فيكى تتغير فى شخصيتك وهكذا والموضوع مش بس للناس المراهقه كمان فى ناس كبيره مش قادره تعرف نفسها ، خليكى رحيمه مع نفسك اكتر يعنى عادى لو حد سألك ايه اكتر لون بتحبيه حسيتى نفسك مش عارفه لو حد سألك ايه هوايتك معرفتيش لو حد خيرك بين حاجتين حسيتى انك مش عارفه تحددى كل واحد فينا مر بالتجربه دى الطبيعي الإنسان بيتغير تفكيرو مره يحب حاجه ومره يكرها اقعدى مع نفسك كتير اسألى نفسك أسأله زى ايه اكتر حجات بتحبيها اسأله تعرفك عن نفسك عشان تقدرى تعالجى مشاكلك النفسيه مفيش مشكله لو نزلتى مع صحابك وحسيتي انك مدايقه كل انسان بيمر بمرحله مش بيكون طايق حتى نفسو حرفيا حاولى تتقبلي كل مراحلك النفسيه اهم حاجه اعرفي نفسك انا مش دكتوره نفسيه ف الي هيفيدك دكاتره نفسيين على اليوتيوب اتكلموا فى موضوع التراكمات النفسيه أو ازاى اعرف نفسي كويس بالتوفيق ربنا يريح بالك 🤍