Yassminnn

الكدب غير مقبول بس خلينا واقعيين ونفهم ان اكيد السبب ورا الكدبة دي انها كانت خايفة تسيبها لما تعرف انها ساكنة في منطقة شعبية مع ان دي حاجة متعيبش حد ابدا ومينفعش تحكم عليها للسبب دا وأعتقد لو خدت عيلتك بعربية لغاية باب البيت دا هيبقي حل مناسب ومش هيحصل مشاكل بالنسبة لحوار خالتها وبنت خالتها هي اكيد ملهاش اي علاقة بيهم واللي يحكمك هو سلوك البنت دي لو هي محترمة وكويسه يبقي مينفعش تاخدها بذنب الباقي بس برضو الجواز بيبقي تداخل عيلتين ولو انت مش قادر تتقبل سلوكهم وشايف انها ممكن تسمع منهم وتتأثر بيهم وبالتالي هيأثر علي علاقتكم يبقي محتاج تفكر كويس وتشوف مدي تأثيرهم في حياتك وممكن تتقبل دا ولا ولا عشان متظلمش البنت معاك وفي الاخر تمنعها تشوف اهلها، ممكن تتكلم مع والدها او حد كبير في العيلة وتحكيله مخاوفك دي بشكل صريح واهم حاجة تفكر كويس قبل ما تاخد قرار عشان البنت ملهاش ذنب في كل دا وفي الاخر هي لو من نصيبك هتلاقي ربنا بييسر الأمور

ما يمكن مش دا السبب وفي حاجة تانية ضايقته منك مع ان بصراحة دا شغل عيال صغيرة ويوضحلك ان الشخص دا مش ناضج سواء كان زعله بسبب المسلسل ( سبب غير منطقي ابدا ) أو سواء كان سبب تاني في الحالتين هو قرر يبعد وميواجهش ويقول انا متضايق من كذا عشان واحد اتنين تلاتة وحتة انه بيضيف بنات دا يوضحلك قد ايه هو شخص غير مسئول وسلوكه غير سوي لانه مش محترم وجودك مع ان الراجل المحترم سواء مرتبط او لا المفروض يحترم نفسه اولا ويغض بصره ومعلش اللي بتحكي فيه دا ميدلش انه متدين وبيجاهد ابدا هو بيحاول يقنعك بده، من وجهة نظري سيبيه يبعد براحته أنتي مغلطتيش في حاجة ومتقعديش تجري وراه لان دا هيحسسه انه مرغوب فيه وبالتالي هيبعد اكتر سيبيه ولو اتكلم مترديش عليه وشيليه من دماغك ومتتعلقيش بيه خصوصا ان علاقتكم مش رسمية وهو لو عايزك بجد هيجي يقعد مع اهلك تاني ولو دا محصلش احمدي ربنا لأنه اكيد مش خير ليكي

اولا طريقة التفكير غير الناضجة غير مرتبطة ابدا بنوع معين لان دي صفة تخص الإنسان ملوش علاقة بأنه راجل أو ست وبتبقي بسبب حاجات كتير قلة خبرة وسن صغير أو نتيجة البيئة اللي كان عايش فيها ثانيا معتقدش ان المفروض تبقي فكرتك عن البنات متاخدة من بوستات فيسبوك نسبة صحتها لا تتعدي ١% وهي غير واقعية تماما انت عارف الناس في السوشيال ميديا بيحاولوا يوصلوا للاكستريم عشان يجذبوا الناس اكتر وزي ما قلت انت لما بتتحط في مواقف واقعية مع اخواتك عادي بتعرف تتصرف والدنيا لذيذة ولو مثلا التصرفات الغير مسؤولة أو التفكير الغير ناضج دا طالع من حد انت تعرفه شخصيا يبقي لازم تعرف الصورة كاملة لان ممكن يبقي حكمك علي عدم نضج الشخص دا حكم غلط وسطحي

هو اكيد كان معجب بيكي جدا زي ما بتقولي وشاف فيكي صفات ومميزات حلوة جدا والكلام دا ينطبق علي اهلك برضو اكيد شاف فيهم مميزات ودا خلاه ميسبش الفرصة تضيع من ايده بسهولة لكن انتي شوفتيه علي اساس انه تمسك في حين أنه ممكن يكون شايفك فرصة مناسبة ومش هيلاقي زيها تاني ودا كان باين جدا من استعجاله خاف تسيبيه لو لاحظتي عيوبه، مفيش حد بيتمسك بحد اول مرة يشوفه كدة مش منطقي خصوصا ان مفيش بينكم اي حب ولا كنتوا تعرفوا بعض حتي، انتي قلتي انه تاجر وارد جدا انه كان داخل الجوازة دي كأنها صفقة ولاقي ان هو الكسبان في الأول بس بعدين حس بتردد لما لاقي ان موضوع خالك ممكن يأثر عليه (معتقدش انه ممكن يأثر عليه اصلا) وقال خلاص طالما انا مش كسبان ١٠٠% يبقي بلاش وطلع اكتر حد جبان في الدنيا لأنه خاف يواجه ويبقي راجل ومن الواضح انه كان استغلالي حتي لو ملحقتيش تاخدي بالك بس كان هيبان بعدين دا غير عيوب تانية كانت لسه هتبان، بجد احمدي ربنا انه مشي ربنا دايما بيكتب الخير لينا، وموضوع خالك دا استخدميه كاختبار لما يجي يتقدملك حد تاني عشان تعرفي الراجل بجد من الجبان

معلش بس هو اكيد مكنتوش بتتكلموا بنية سليمة أو بطريقة علمية لسبب ما واكيد كنتي عارفة ان دي هتبقي النتيجة وانتي بإرادتك اتكلمتي في الموضوع دا وكل دا حرام، لازم تعفي نفسك يا حبيبتي ويبقي عندك حياء ومتسمحيش لحد غريب يتكلم معاكي كدة، استغفري وتوبي وابعدي عن الشخص دا واحفظي نفسك محدش ضامن امتى ستر ربنا يترفع عنه، وبالنسبة لسؤالك اغتسلي اضمن عشان تضمني الطهارة وصلي ركعتين بنية التوبة

اولا انتي مش فاشلة ابدا انتي عايزة تجتهدي وتحسني من نفسك ودا مستحيل يطلع من واحدة فاشلة بصي يا قلبي انا عايزة اقولك اني في الأول كنت فاكراكي في آخر العشرينات مثلا وحاسة انك تايهة وكدة وكنت هاجي اقولك لسه بدري بس اتفاجئت انك لسه صغنونة اوي ومفيش داعي ابدا انك تشيلي الهم دا كله وتبقي عايزة تنجزي كل حاجة في الدنيا وخصوصا انك لسه في تانية اعدادي يعني حتي مش شهادة انتي لسه طفلة لازم تهدي علي نفسك شوية اولا انتي مش مطالب منك غير انك تجتهدي في دراستك والنتيجة دي مش بتاعتنا خالص طب ازاي هتجتهدي انتي اكتر واحدة ممكن تساعدي نفسك لان انتي عارفة فين نقط ضعفك وايه المواد اللي انتي مش شاطرة فيها اوي يعني ممكن تكثفي الدراسة في المواد الصعبة اكتر من المواد السهلة ولو في حاجات انتي مش فاهمها دوري علي اليوتيوب هتلاقي بدل المدرس الف وحلي تدريبات كتير بس في نفس الوقت لازم تنامي ٨ ساعات وياريت تنامي بدري انتي لسه في مرحلة نمو وتخصصي كام ساعة في يومك تعملي فيهم حاجة انتي بتحبيها ومثلا تخلي يوم الجمعة فاضي من كل اسبوع وحاولي تستغني عن الحاجات اللي بتضيع وقتك علي الفاضي حتي المدرسة لو مش بتستفادي اقعدي ذاكري احسن في البيت ولو في درس مش مهم متروحيهوش وطبعا متنسيش الصلاة والقرآن والدعاء العبادات دي هي اللي هتقويكي وتخليكي توصلي لهدفك

يا استاذي الفاضل انت بتقول انها اتجوزت يعني مجرد التفكير فيها عيب وحرام واكيد مترضهاش علي حد من أهلك واوعي شيطانك يهيألك انها لسه بتحبك لان دا مجرد وهم بتحاول تقنع نفسك بيه هي اتجوزت بمحض إرادتها واكيد سعيدة في زواجها واوعي تحاول تتواصل معاها لان دا هيفتح باب مش هتعرف تقفله وانت عارف دا ممكن يوصلك لكبيرة من الكبائر والعياذ بالله، اتمنالها الخير وافتكر انها ست متجوزة ومش من صفات المؤمن ان ينظر لما احله الله لاخيه المؤمن، استغفر كتير كل ما تيجي في بالك واكيد ربنا شايلك الاحسن، الإنسان دايما بيفتكر ان الحاجة اللي مستحيل يحصل عليها هي أحسن حاجة في الدنيا ودا مجرد وهم، انا مثلا لو منعتك تاكل نوع معين من الاكل هتفضل طول عمرك بتفكر فيه وبتحارب عشان توصله ومجرد ما هتوصل هتكمل حياتك عادي جدا وهتلاقي أنه مكانش فيه اي حاجة مميزة واكل زي اي اكل، بس دي طبيعة الإنسان أنت دلوقتي بتفكر قد ايه كنت هتبقي سعيد لو العلاقة دي كملت بس في الحقيقة انت متعرفش حكمة ربنا في أنه يبعدك عنها، ارضي بقضاء ربنا وادعيه يخرجها من قلبك ويرزقك بالزوجة الصالحة وركز علي نفسك وعلي شغلك

الفطرة الطبيعية للرجل انه ينجذب للنساء بس عن طريق مشاهدة اشياء تتعارض مع فطرتك الطبيعية باستمرار اكيد هتتأثر وبمجرد الامتناع عن مشاهدة هذه الأشياء باذن الله ترجع لفطرتك الطبيعية لكن اختلف معاك في جزئية ان ميوله غير طبيعية من يوم ما كان طفل دا اكيد توهم أو بتحاول تثبت لنفسك ان دي طبيعتك ربنا خلقنا بفطرتنا السليمة وكل ما الإنسان بيكبر ممكن تتغير الفطرة دي بسبب عوامل الحياة لكن الأطفال بيبقوا أكثر اتصافا بالفطرة السليمة دا غير عدم ادراكهم لهذا الموضوع اصلا مينفعش تيجي تصف طفل بأن ميوله غير سليمة اصلا جملة غير منطقية

اولا مينفعش تاخدي حاجة من غير استشارة الدكتور ممكن تكون الحكة دي بسبب جفاف المنطقة وانك مش بترطبيها كويس يوميا أو بتستخدمي طريقة غير مناسبة لازالة الشعر ودا اكيد هيعمل حبوب وحبوب تحت الجلد كمان وجفاف شديد ولازم بعد تعرض المنطقة دي للماية تتجفف كويس جدا عشان متسببش التهابات وغيري هدومك باستمرار وفي البيت حاولي ملابسك تبقي قطن وخفيفة علي قد ما تقدري عشان متكتمش المنطقة وكمان ممكن تستخدمي غسول مناسب مرة أو مرتين بالكتير في الأسبوع عشان تطرد أي بكتيريا ضارة وابعدي عن المنتجات اللي فيها روايح قوية وان شاء الله تلاحظي تحسن بس لو ملقتيش اي نتيجة لازم تروحي تستشيري دكتور متخصص

وانتي بتصدقيه ازاي في كل مرة بيجي يقولك دي اخر مرة كان المفروض تاخدي معاه موقف قوي من اول مرة، الخيانة من أصعب الحاجات اللي في الدنيا خصوصا لما تبقي بتحبيه وواثقة فيه ويجي هو يكسر الثقة دي بدل المرة ألف خليكي متيقنة أنه مش هيتغير الا لما هو يعوز يتغير من جواه، لازم تبعدي شوية عشان تعرفي تتخطي وتسامحي ودا هيحتاج منك مجهود كبير لأن اللي مريتي بيه حاجة مش سهلة ابدا والأهم انك تتأكدي أنه مش هيعمل كدة تاني عشان تقدري تسامحيه وتنسي اللي فات ولو عندك المقدرة تتابعي مع معالج نفسي اكيد هيبقي احسن

عليكي بالترطيب ثم الترطيب لازم يبقي عندك روتين للعناية ببشرتك في الشتا أو حتي في الصيف اهم حاجة اعرفي نوع بشرتك وبناءا علي دا هتعرفي تعالجيها بس غالبا هي جافة أو مختلطة فانتي محتاجة تعرفي ايه هي المنتجات المناسبة لبشرتك هتجيبي غسول خفيف مناسب وممكن تونر أو تستبدليه بماية ورد والأهم من دا كله الترطيب لازم ترطبي بشرتك اكتر من مرة في اليوم وكمان مرطب للشفايف ودا لازم يبقي روتينك اليومي وفي الاسبوع ممكن تستخدمي مقشرات خفيفة زي القهوة عشان تشيلي اي جلد ميت

وقت الامتحان لازم تبقي واثق من نفسك وتتأكد انك خلاص عملت اللي عليك وذاكرت ودلوقتي وقت انك تطبق مذاكرتك وزي ما انت بتقول انت ما شاء الله متفوق ومفيش حاجة تخاف منها حاول تطمن نفسك وتقرأ قرآن قبل ما تحل عشان تهدي واتنفس براحة وافتكر كل الامتحانات اللي عدت عليك قبل كدة وكنت متوتر فيها بس في الاخر عديتها ونجحت بتفوق

متفقديش الأمل مهما حصل توبي وارجعي لربنا دايما في كل مرة وقعتي في الفخ دا قومي بسرعة وصلي ركعتين بنية التوبة وخلي العبادة دي متلازمة بالذنب دا لغاية ما تبقي اخر مرة بأذن الله وطبعا حاولي تشغلي وقتك ومتقعديش لوحدك وركزي في دراستك

قبل اي حاجة دا مش دورك دا دور اللي جابوها للحياة بس انا مقدرة انك عايزة تساعديها ممكن تحاولي تقربي منها وتعرفي ايه الطريق المناسب اللي تدخليلها منه عشان تسمعك لو هي مثلا بتحب حاجة معينة أو عندها اهتمامات شاركيها دا وخليكي هادية معاها حتي لو جو البيت عصبي وعامليها كانسانة كبيرة مش كطفلة صغيرة لازم تسمع كلامك بالعافية هي ممكن تبقى محتاجة اهتمام بس مش عارفة تعبر عنه ازاي اهم حاجة صاحبيها قبل ما توجهيها، روحي احضنيها في مرة بشكل عشوائي جدا من غير ما تقولي اي حاجة او قوليلها انا بحبك أو جيبيلها شوكلاته وواحدة واحدة لما تقربي منها ابدأي كلميها براحة وعرفيها الصح من الغلط وان العصبية سلوك وحش جدا خليكي قدوة ليها عشان تقرب منك وتعوز تبقي شبهك

الحمدلله محافظة علي علاقتي بربنا بس انا اعتقد ان دا ملوش علاقة بالدين وليه علاقة اكتر بالجانب النفسي او الجسدي وكمان انا سمعت علماء دين كبار بيقولوا انهم بيعانوا منه عشان كدة معتقدش انه ليه علاقة بمقدار التدين

محدش هيعرف انتي مين متقلقيش

الاخضرار دا حصل بسبب قلة الترطيب أو ان الشعر سميك ومش مناسب لاستخدام الشفرة، احسن حل هيبقي الفتلة ممكن تتعلميها من اليوتيوب سهلة جدا وابعدي عن الشمع أو السويت للوش عشان هيدمره

محتاج تثق في نفسك اكتر وتتأكد انك كفاية وانك تستحق كل اللي بتتمناه، مفيش فينا حد مثالي ولا حتي قريب من المثالية، ادراكك ان عندك عيوب ومحتاج تعالجها دي حاجة كويسة جدا بس مش هتوقف حياتك عشان تعالجها، كلنا عندنا عيوب حتي شريكة حياتك هيبقي عندها عيوب واحنا كبشر المفروض ندور علي اللي يتقبل عيوبنا قبل مميزاتنا ولو الشخص دا متقبلناش زي ما احنا يبقي ميستاهلناش، متفهمة خوفك من التوقعات الكتير اوي اللي ممكن البنت تتوقعها في البداية، بس دا كله بيعتمد علي اختيارك لان مش كل البنات زي بعض اختار بنت تفهمك وتقدرك زي ما انت كدة

متخافيش من الجواز لان كل واحد ليه تجربته الخاصة كل ما عليكي انك تختاري صح وتتعلمي من تجربة بابا وماما عشان متكرريهاش تاني واشتغلي علي نفسك كويس لو لسه بتدرسي ولو خلصتي دوري علي شغل عشان تلهي نفسك فيه بعيدا عن ضغوطات البيت و سامحيهم علي تقصيرهم معاكي انتي متعرفيش كم الحاجات اللي اضطروا يمروا بيها هما في يوم من الايام كانوا أطفال وعندهم احلام بس الحياة جت عليهم

علي حسب نوع الهزار اكيد وسن الاطفال

حاولي تسامحي اللي أذاكي وتشيلي كل الكره اللي في قلبك تجاههم عشان تعرفي تعيشي وتشوفي حياتك وعشان صحتك ومش معني انك هتسامحي انهم مش هيتحاسبوا لا ربنا مش بيستهون في حق عبد من عباده حتي لو انتي سامحتي هو مش هيسامحهم

متربطيش نفسك بيهم لو هما مش بيعملوا اي مظهر من مظاهر الاحتفال بالعيد اعملي انتي واخواتك انزلوا مع بعض صلوا العيد أو لو عادي تنزلي مع صحابك أو حتي لو ملقتيش حد انزلي لوحدك واخرجي واتبسطي اعملي الأنشطة اللي بتحبيها صدقيني الإنسان يقدر يسعد نفسه بنفسه من غير ما يستني حاجة من حد

اعملي بلوك ومترديش عليه ولو حاول يبتزك اوعي تخافي منه وخليكي واثقة من نفسك لان اللي بيبتز حد دا شخص ضعيف ومش بيعمل حاجة في الاخر

انتي ١٦ سنة يا قلبي فكك من الحوارات دي

على حسب مستوى التأخر اللغوي عنده هل بيصدر اي نوع من الأصوات ولا لا زي ماا بااا هل بيحاول يقلد كلامك ولا لا هل بيحاول يقول الحاجات اللي هو عايزها حتي لو بأصوات غير مفهومة ولا بيعتمد على الإشارة لو بيعمل الحاجات دي مفيش داعي للقلق بالنسبة لعمره لكن لو وصل سنتين ومفيش أي تقدم هتحتاج تقيم ابنك عند أخصائي تخاطب

انتي عارفة نقطة ضعفك فين لازم تبدأي تشتغلي عليها ممكن تبدأي من الصفر مع مدرسين علي اليوتيوب مثلا وتستغلي وقتك كويس