د.سمر رعب

جميله الصوره ومعبرة جدا وده يدل على قوة إدراكك وخيالك الواسع اللهم بارك 🌺 قبل أى حاجه لازم تعرف إن أكتر حد ناجح هو أكتر حد فشل لان كل نجاح قصاده فشل عشان كده بعد مابنذاكر لازم نحل امتحانات كتير وأسئلة لسنوات سابقة عشان نغلط فحلها ولما نوصل للامتحان الحقيقي نكون ادربنا على الحل الصح ونجاوب بسهولة ونوفر فالوقت ... بالظبط الحياة لما بنقع وننزل تحت أوى بنفتكر إننا انتهينا بس الحقيقية إننا بنتعلم عشان نبتدي صح (مش هقول بدون أخطاء تماما بس بأخطاء أقل نتيجة لخبرات الفشل السابقة) بنطلع أسرع وبثقة أكبر لأننا معانا خبرات سابقة . د.مصطفى محموظ (رحمه الله) فضل مريض ٣سنين وانقطع عن كلية الطب وزمايله اتخرجوا وهو مازال مريض وده كان التمن عشان يكون الدكتور مصطفى محمود ال علمه يُدّرس إلى الآن وأبحاثه لازلنا نستمتع بها وننبهر منها لوقتنا الحالى . كلامى مش كلام عشان تاخد طاقة إيجابية وتشحن وتحس انك هتهد الدنيا وبعد شوية تزهق وتنتكس تانى لكن ده معتقدات أسعى أنها تكون جزء من قيمك ومنظومتك الفكرية وانا واثقة فيك انك هتعرف تعمل ده إن شاءالله... وعشان الكلام مياخدناش وننسى الخطوات العملية ابحث عن قناة واعى، قناة نوفاب بالعربى عاليوتيوب بيعرضوا خطط علاجية وقصصة ملهمة للتعافى من الاباحيات، وده إجراء اجبارى وليس اختيارى لان بدون تعافى حرفيا حياتك هتنتهى بالتدريج وده ال انت فاهمه وعشان كده بتدور على مخرج دلوقتي !! رحلة تعافى موفقة وقريبا تنضم لفئة )wounded healer المعالج الجريح ال بيعلم الناس التعافي عشان هو اختبر نفس وجعهم قبل كده وقدر يخرج للنور وحابب يساعد ال لسه فالضلمة بيعانى .... بالتوفيق ياااارب 💪✌️

انا بعتذر عن كلماتى مقدما لأنها ممكن تكون مش ألطف حاجة بالنسبالك بس كده انتى ال بتعلقيه بيكى (بطريقة لاواعية عندك) مش عند قصد منك بس وجوده بيشبع جواكى مشاعر مش الحب ولكن الاهتمام ، خاصة انتى ذكرتى بيشجعك أيام الامتحان تحديدا لان ده ال لمس معاكى من جوه فعلا (فكرة وجود دعم واهتمام بصورة دائمة وغير مشروطه ) ودى فطرتنا كبشر نميل ونركن لمن يهتم بنا خاصه انه بدون مقابل أو شرط . آسفة مرة تانية بس احنا بنات نقدر نقفل الباب بطريقة مينفعش يتفتح تانى وبكل أدب واحترام لكن كونه فالنهاية بيقدر يتواصل ده معناه انك مقفلتيش الباب بلا رجعة ومواجهتيهوش بصورة مباشرة تقتل الأمل بداخله برده بلا رجعة ... اعتقد محتاجه تراجعى رؤيتك للحدوتة ككل وتشوفى الصورة الكاملة وتعكسي الأدوار بصدق وشفافية ... ربنا ينور قلبك ويرزقك الحكمة والبصيرة 🤲

وعليكم السلام ورحمة الله وبركاته ياجميلة 🌹 ال عندك ده اضطراب نفسي وليس تقلبات مزاجية أو مشاعر مؤلمة أدت لافكار سوداوية ، والاضطرابات النفسية تحتاج لتشخيص دقيق من قبل متخصص(طبيب نفسي أو معالج نفسي إكلينيكى ) بيحدد نوعية الاضطراب وهل يحتاج تدخل دوائى(نتيجة لتضرر وظائف الإدراك العقلية واختلال كيمياءالمخ ) أو هنكتفى بالعلاجات السلوكية زى العلاج الجدلي السلوكي أو العلاج المعرفي السلوكي وغيرها من العلاجات السلوكية حسب نوع الاضطراب . بناء على ماسبق هتكوني محتاجة يتم فحصك وتشخيصك بدقة للوصول للعلاج المناسب. اضطراب الشخصية الحدية حقيقي منتشر جدا بين جيلكم وسنكم ده ومن أشهر علاماته (زى مانتى شوفتي فالبحث) عمل cutting ومحاولات الانتحار بس ده عرض موجود فاضطرابات أخرى و لذا البحث عن الأعراض النفسية على الإنترنت مؤذى أكثر من كونه نافع . حقيقي حابة أحييكى إنك وسط كل الوجع ده بتدوري إزاى تطلعي من الضلمة ومش عاوزة تسيبى نفسك ضحية وتبقى نهايتك الانتحار ... عشان كده كونى على يقين طالما ربنا هداكى للبحث عن النور هييسرلك الوصول ليه بأسرع مماتتخيلى إن شاءالله ❤️

معذرة بس رد فعلك العنيف ده يدل على وجود مشاكل نفسية عميقة عندك تجاه الجنس الآخر فالمطلق . الجميع أشار ليكى ع ضرورة الاعتذار ورد فعلك وده حقيقي جدا وضرورى ولكن المشكلة الأصلية مش رد الفعل الذى لايتناسب مع الحدث فقط ولكنه يتضمن عنف وكأن الجنس الآخر والمشاعر العاطفية يتم ترجمتها لدى عقلك بكونها تهديد لأمانك وحمايتك ممايستوجب رد فعل سريع وعنيف معا .

شكرا ليكي أنك بتجاهدى نفسك و بتقاومى كل مابتقعى عشان تقومى من تانى ... ده فحد ذاته قوة تستحقى التقدير عليها 👏🌹 مبدئيا كده تكرار العادة السرية ده سلوك قهرى بسبب الضغط النفسي يعنى يندرج تحت المشاكل النفسية وليس نقص الإيمان أو اضطراب فى العقيدة ( بس ده مينفيش إنه حرام شرعا بس انا اقصد انه ذنب بيقع فيه الشخص المتدين والملتزم عادى لأننا لسنا معصومين ) زى بالظبط الإفراط فتناول الطعام أو الشوبنج أو استخدام الإنترنت لساعات طويلة جدا ، كل ده سلوكيات قهرية بنكررها بطريقة لاواعية لتخفيف الألم النفسي الاصلى ال بنعانى منه وتشتيت انتباه العقل عن اللحظة الراهنة ال بنحس فيها بالمعاناة النفسية. *قبل أى حاجه لازم تقبلى كونك عندك مشكلة سببت السلوك ده وتتعاطفى مع نفسك عشان تقدرى تقاومى الرغبة فى السلوك ده (العاده السريه ) وتمنعيه بالتدريج. *ابحثى جواكى عن المشاعر المؤلمة ال بسببها بتروحي للسلوك ده وحاولى تحليها مع نفسك أو مع شخص متخصص. *حددى المحفزات ال بتحركك ناحية السلوك وتجنبيها قدر الإمكان وكونى واعية جدا بيها . وفالنهاية أهم حاجه فرحلة التعافى اننا نتعلم ازاى نقوم بسرعة بعد مانقع وننتكس (لأننا لازم نقع دى فطرة ربنا فينا فكل بنى ادم خطاء وخير الخطائين التوابون ) فالنهاية

الشعور ال وصلنى من كلماتك هو الرفض وهو المسبب الأصلي للاكتئاب، فالاكتئاب هنا عرض لسبب أولى وهو رفض الواقع والاشخاص والاحداث وكأنك غضبانه من كل ماحولك ومفيش اختيارات تانية . لازم تقبلى الواقع فالاول وبعدين تبدأى تبحثى ايه الأسباب ال وصلتك لواقع مختلف عن ماكنتى تتمنى ، ايه الوسائل ال ممكن تساعدك تغيريه ، هل فى أخطاء من جانبك وصلتك للظروف الحالية ؟ الخلاصه بدل ماتقولى انا ليه هنا وايه ال بيحصلى ده...تقولى انا ايه ال وصلنى اكون هنا ، عشان الإجابات ديما بتكون عندنا من جوانا احنا مش عند الآخرين ولا الظروف !!!

الفصام مرض عقلى يحتاج تدخل دوائي واضطراب الشخصية الحدية اضطراب سلوكى ولايحتاج تدخل دوائى ولكن يتم من خلال تعلم مهارات سلوكية من خلال جلسات نفسية كلامية ...وشتان بينهما فى الأعراض !!! لذا فالبداية تحتاج تشخيص دقيق من متخصص وليس من البحث على الانترنت .

معذرة أيها السائل بداية السؤال مش ألطف حاجة الحقيقة... مفيش مشكلة فالدنيا بتتحل بطريقة سحرية وكأن حد هيبلغك وصفة وخطوات تنفذها فتنتهى المشكلة ... ودى أول خطوة فالعلاج والحل لمشكلتك!! التشخيص المبدئ لحضرتك انك بتعانى من الكمالية والسيطرة المفرطة وزى مابنقول عاوز كل حاجة بالمسطرة ومظبوطة بدون ولا غلطة ، مبتسمحش لنفسك تغلط ولالاى حد حواليك وده ال بيخليك طول الوقت عصبي ومضغوط بسبب انك عاوز تتحكم فكل حاجة عشان تكون مطمن انها فأحسن صورة ومظبوطة بالملى. كل ال حكيته فوق بيحتاج رحلة بحث بداخلك عن أسباب الكمالية والمثالية وجذورها جواك منذ الطفولة ...

قبل أن أجيبك أحبك أشكرك على صراحتك مع نفسك ومحاولتك للوصول لنسخة أفضل منك فى علاقتك بربنا ❤️ صورة الإله جوانا بتتشكل منذ الطفولة فأول ٧ سنين تحديدا من خلال صورة مصغرة للإله (فأعتقاد الطفل طبعا) وهو رب الأسرة أى الأب ... لو كان الأب غضوب وقاسي طول الوقت بيعتقد الطفل إن ربنا ال فالسماء قاسي وهيعاقبه على أقل غلطة بيعملها (تعالى الله عن ذلك ولكن تشبيه لما بيدور فى العقلية الطفولية ) وبالتالي لما يكبر شوية ويبدأ يصلى ويتواصل مع ربنا من خلال العبادات والاوامر الشرعية هتكون دى النظرة الخفية والعميقة بداخله تجاه ربنا بدون مايشعر وكأنها برمجة خفية بتحرك عقله ومشاعره وبتولد عدم الشعور بالراحه تجاه الخالق بصفة عامة . نصيحتي لكِ 🌹... ابحثى فى جوانب علاقتك بوالدك ورؤيتك الغير واعية له من داخل أعماقك ومن خلال سنوات طفولتك معاه ، وان شاءالله حاجات كتيرة هتنور جوه قلبك قبل عقلك ، وتوصلى لحقيقة بتضوى زى الشمس فى وسط السما ... ربنا خلقنا حبا وهو أرحم بينا من أمهاتنا(كما ورد فى الحديث الشريف ) ولم يجبرنا على عبادته ، وترك لنا حرية الاختيار لأنه عزوجل أراد لنا أن نعبده حبا له قبل أن نعبده خوفا منه 💚

تسلمى ياااارب ❤️ ربنا يثبتك ويردك إليه ردا جميلا 🤲

بصى حبيبتي خدى نفسك بالراحة وعوديها بالتدريج يعنى قولى لعقلك انا بتعلم اتواصل مع الناس من أول وجديد مش مجبرة على ده ( ده هيخلى جسمك ميتوترش من وجود أشخاص غريبين عليكى وهيخليكى هادية ومطمنة ورقيقة فانفعالاتك) وابدأى بالتدريج تتواصلي مع الاشخاص فى وجود أصدقاىك مثلا ال انتى بتطمنى فوجودهم ، ممكن كمان تروحى تصلى فمسجد الجامعة أو الحى ال انتى فيه وتتعرفى ع الموجودين معاكى بعد الصلاة ، وفى انشطة خيرية أو زيارات لدور الأيتام بس المهم فكل الأنشطة دى انها تتم بالتدريج ويكون معاكى حد انتى متعودة عليه من عيلتك أو أصحابك عشان لو اتوترتى يكونوا جمبك ويقدمولك دعم وان شاءالله مرة فمرة هتكسري حاجز الكسوف ده وتتواصلى وتعملى دايرة علاقات آمنة فيها حدود صحية بدون إفراط ولا تفريط 💐

وهو ده ال انا قصدته ... التعامل مع الولاد عقلك بيترجمه تهديد طالما مش من عيلتك فبالتالي بياخد اجراء عنيف وسريع لحمايتك ، عشان كده محتاجه تظبطى مهارات التواصل لأنك لازم هتتعرضى لمواقف فيها تواصل سواء فالدراسة ، فالسفر، فالعمل وطبيعى هتقابلى نوعيات سوية ونوعيات مضطربة فلازم تظبطى انفعالاتك و ردود أفعالك ... انتى لسه صغيرة وان شاءالله تكتسبى خبرات أكتر فالحياة وبالتوفيق يارب 🌹

اولا انا بتكلم من ناحية نفسية كمتخصصة ، ثانيا فى طرق للتعبير عن الرفض أكثر لطفا و احتراما من كده وأبسطها تسيبه وتمشى .، وقبل كل ده أصلا المفروض ان ميكونش فيه كلام بين الولاد والبنات خارج إطار الدراسة حسب الشرع بس فالنهاية كل حد له حرية المعتقد فى تطبيق الأحكام الشرعية . شكرا لحضرتك وحميتك (الغير مبررة) للرد على اجابتى 🙂