Yousef Refaat

وعليكم السلام ورحمة الله ربنا يثبتك يارب، إنت عملتي الصح وكل الشباب بيعملوا وقت كنوع من أنواع التسلية وطبعا ده حرام زي ما حضرتك عارفه ( نفسك إن لم تشغلها بالحق شغلتك بالباطل ) حبذا لو تتعلمي حاجه جديده برمجة لغة خياطة طبخ، آي حاجة تمليي بيها وقتك حاولي تحيطي نفسك بصحبة صالحة، عشان هما أكتر ناس هيقفوا جنبك ويساندوك لازم حضرتك تحذفي كل وسيلة ترجع للذنب ده تاني، تطبيق أو أرقام لازم بجد والله، وإلا للأسف الرجوع هيبقى مسألة وقت ربنا يوفقك ويثبتك

وعليكم السلام ورحمة الله وبركاتة هو فين المشكلة إنه معاه دبلوم صنايع بس؟ يعني هو: بيصلي محترم عيلته محترمة كويس جدا ماديا يعني ماشاءالله من وصفه هو إنسان كويس جدا، فمتخليش معايير المجتمع هي اللي تختار ليك ! نقطة إن حضرتك بتقرنيه مع اللي فات، ديه مقارنة بايظة من أولها ده، ليه ؟ الأول ده واحد بيسلي وقته، وبيكلمك بطريقة حرمها الإسلام الثاني ده راجل داخل الباب من بيته، بيطلب إيدك _ مفيش مقارنة اصلا والله نقطة فارق التعليم ملهاش علاقة، انت لما تقعدي معاه هتشوفي هو مناسب ليك ولا لاء بإذن الله ربنا يوفقك لما يحب ويرضى

وعليكم السلام ورحمة الله وبركاتة قناة ذا أمريكان إنجلش، هتلاقي فيها كل الكورسات اللي إنت محتاجها بإذن الله https://youtube.com/@zamericanenglish?si=D9s2wER5SRDP3fPH

بص يا صديقي مفيش مشكلة إنك تروح لدكتور بس..... بعد ما تقرب من ربنا الأول وتدعي كتييير وتخرج مثلا تتفسح أو تعمل حاجه بتحبها

وعليكم السلام ورحمة الله وبركاتة ليس عندي علم بنقطة التمريض العسكري، لكن نقطة السياحة بالنسبة لكونك بحمد الله تلبسين لباس شرعي، ف: أغلب الشركات يكون لها حد معين من اللبس لا تزيد عنه المرشدة. هناك بعض الشركات لا توظف المحجبات من الأساس. مجال السياحة به مخالفات شرعية كثيرة خلاف اللباس، فلو أمكانك أن تقومي ببحث قبل الدخول فيه وفقك الله لما يحب ويرضى

طليق حاليا جيد جدا، وأظن بعد التحديث القادم اللي اتكلم عنه أ. إبراهيم عادل هيكون بإذن الله أفضل وأكثر تطبيق متكامل لتعلم آي لغة أجنبية.

ممكن تستخدمي كانفا بسيط وسهل جدا، عشان قوالب جاهزة بتعدلي فيها زي ما انت عاوزة والنتائج حلوة جدا https://play.google.com/store/apps/details?id=com.canva.editor

وعليكم السلام ورحمة الله وبركاته مباااارك 💫💥 هو لسه محدش يعرف ده ممكن يدخلك ايه؛ لأن ده اللي بيحدده التنسيق لكن دلوقتي تقدري تبدأي في تعلم حاجات مفيدة فعلا، زي لغة جديدة مثلا، في حاجات كتير جدا، فابحثي على اليوتيوب وهتلاقي شرح وافي جدا بإذن الله وبالتوفيق

يا أخي ما دمت تفعل ما بوسعك، فلا تأخذ هذا الكلام على محمل الجِدّ، ولا ترد عليه أيضا حتى لا يزداد غضبه، بل انصت لكلامه في صمت ولا تأخذه على صدرك؛ لأنه سيحطمك.

الدافع لتعلم آي لغة هو الرغبة، فإذا لم يكن لديك رغبة لتعلم اللغة لن تتعلميها إلا لتجاوز الامتحانات على سبيل المثال، فإن كنت قد أعجبك الأسباني فاختاريه، وللعلم الأسباني أسهل الثلاثة، وعندما دخلت أختي الصف الأول الثانوي، واستشارتني رجحته لها، على الرغم أني كان معي اللغة الفرنسية في الثانوية، والآن في الكلية ألماني وتركي. ونقطة إضافية شرح اليوتيوب هو أفضل من جُل الكورسات والمدرسين الحقيقة، ولكن هو يحتاج إلى انضباط كبير. بالتوفيق

هو بلاء صعب جدا، ولكن تذكر إنه هياخد بإيدك في الجنة هيخفف عنك بإذن الله، وادعي كتييير وربنا يصبرك يارب

كون إن حضرتك معيدة فده يدل على إنك مجتهدة، فممكن تكون محتاجة تاخدي أجازة لفترة

بلا شك لينكدإن هو أفضل منصة يا صديقي هتلاقي ناس محترفين في كل المجالات، وكورسات كويسة جدا برضو، وهتعمل ليك حساب تقدر تستخدمه في بيع منتج أو كورس ليك ولسه في كلام كتير يتقال فيه، فافتح حساب ومش هتندم بإذن الله

أنا هجاوبك بواقع تجربتي، أنا كنت فضلت فترة كبيرة جدا بدخل السرير الساعة 9 أنام 2 مثلا، وكان برضو بسبب نفس الأسباب للأسف...لحد ما قرأت تغريدة تقريبا للدكتور عمر عبد الكافي أو راتب النابلسي مش فاكر بالضبط لكن كان محتواها إن لو مش نومك مظبوط أو بيجيلك أرق بعد ما تقول أذكار النوم، أفضل اذكر ربنا...سواء كان استغفر أو حوقلة أو....، أول ما طبقت كده بقيت بنام بشكل أسرع بكتير جدا جدا الحمدلله لكن كان العقبة بالنسبالي إني كنت ممكن اسرح وابطل ذكر، وادخل في دوامة التفكير تاني، فكان الحل إني جبت مسبحة 📿، كانت بتخليني فاكر دائما وربنا يوفقك

ثبتك الله يا صديقي اثبت على اللي إنت عليه ومتشيلش البلوك، وأبدأ املئ وقتك واحدة واحدة بأشياء مفيدة، شوف مجال عجبك وتحب تتعلمه جرافيك برمجة...، أو لغة مثلا لأن نفسك لو مشغلتهاش بحاجة مفيدة، هتفضل تفكر في حاجات مش كويسة وبالتوفيق يا صديقي

هون عليك، الدنيا دار بلاء والآخرة دار جزاء.... بص إنت شايف إنك عندك مشاكل كتيرة جدا، والمشاكل دي مفترعة من مشاكل أكبر أو ممكن نقول عليها الأصول، فإحنا لو ظبطنا الأصول دي، بشكل اوتوماتيكي حاجات كتير هتتصلح، ومع الصبر والدعاء هتلاقي كل المشاكل اتحلت بإذن الله، أول وأهم أصل وأساس في حياة المسلم، هو الصلاة، الصلاة يا صديقي أقل ما يقال هي مفتاح الدين والدنيا، فبدون الصلاة ستفشل في الدنيا، وستخسر الآخرة بكل تأكيد، وإنك تبدأ تدخل المسجد وتسمع ناس بتقرا وناس بتذكر ربنا وحلق علم مثلا.....ده لازم هيغير في لسانك وأسلوبك وطريقة كلامك..... ثم الصحبة الصالحة اللي هي بتتمركز في المسجد برضو الصحبة هما اللي هيساندوك ويدعموك ويقفوا جنبك ويعينوك بإذن الله..... والدعاء يا عبد الله الدعاء، وأحسن الظن بالله، ده أمر لازم والله، حتى لو حياتك سودة لازم تحسن الظن به، وإلا مش هتتغير، قال صلى الله عليه وسلم: يقول الله تعالى: أنا عند ظن عبدي بي فظن خيرا يأتيك الخير بإذن الله ويسر الله لك وأعانك وسددك وثبتك

هي في الحالة اللي إنت بتتكلم عنها مش حرام، إلا لو اللعبة نفسها فيها مخالفة شرعية، وأغلب الالعاب فيها مخالفات شرعية... ممكم تخلي أول ساعة تتعلم فيها حاجه أو تحفظ أو تقرأ قرآن ولو عملت كده كافئ نفسك والعب الساعة التانية وده عشان انت لسه واخد خطوة كبيرة ومسحت كل اللي كانوا على الموبايل، وبإذن الله بعد فترة هتستخصر الوقت ده في الألعاب وهتستغله في حاجة تانية بالتوفيق يا صديقي

الحل إن كل بني آدم خطَّاء، وخير الخطَّائين التَّوابون الحل إن لو لم تذنبوا لذهب الله بكم، وجاء بقوم يذنبون فيستغفرون فيغفر لهم أو كما قال صلى الله عليه وسلم وأنا فاهم طبعا إنك عاوز تتغير تبقى وأفضل من كده، لكن مادام إنت بتحاول فأنت على الطريق فلا تلتفت، وبإذن الله عاجلا غير أجل تصل، وحتى لو بقالك كتير فأحنا مطالبين بالسعي وليس النتيجة! وادعي كتير جدا ويسر لك وأعانك

يا أختي هو مادام مجاش ودخل البيت فمينفعش تتكلمي معاه خالص والله ومتخليش حوار هو متعلم وأنا مش متعلمة ده عقدة عندك، مش عشان التعليم فاشل بس، لأنك بكل سهولة ممكن تتعلمي تعليم احسن من تعليمه ب100 مرة وبشكل مجاني ومن جهة الواقع: أكثر من 90% من اللي أعرفهم اللي بيكلموا أو كانوا بيكلموا بنات، كل واحد فيهم على الأقل كان بيكلم 3 بنات في نفس الوقت! محدش فيهم اتجوز اللي بيكلمها، واللي حاولوا بجد واحداترفض من أهلها، وواحد أهله رفضوها، وواحد اتجوز فعلا بس اقسم بالله العظيم من أفشل الجوازات اللي شوفتها في حياتي %85 من الشباب اللي بتعمل كده هو حتى لو بقى عنده مقدرة أنه يتجوز...هو مش هيتجوز، اصل ليه اتعب دماغي وابقى مسؤول عن واحدة، وكل الهري ده، طب ما أنا بكلم 3/4 بنات وبخرج والدنيا حلوة الراجل بيخش الباب من بيته؛ لأنه حتى لو جاهل بالحكم الشرعي، فهو ميرضاش كده لأخته والبخل ده داء لا داوء له، من أكثر الصفات السيئة، واللي لو حتى الزوجة بتصبر على الراجل البخيل، فولاده بنسبة كبيرة جدا مبيستحملوش وادعي كتير واتعرفي على بنات صالحين هما بس مش هيبقوا سندك، لاء هما ممكن يرشحوك مثلا لاخواتهم قرايبهم وكده وربنا يرزقك زوج صالح يارب

ربنا يكرمك يارب...حابب ألفت انتباهك لحاجة بسيطة..مش هتاخد منك دقيقتين..وهو إنك تبحثي عن الحكم الشرعي، يعني هل يجوز إني اكلم ولد واقول إني ارتبط وكده ولا مينفعش؟ وهو ممكن يكون أمر غريب بالنسبالك بس مش هياخد منك حاجه.. وبالتوفيق يارب

آي بناء لازم يكون ليه أساس وعواميد وبعدين دور أول ويطلع عليه التاني والتالت وهكذا...اهو الإنسان كده بالضبط، لازم يكون ليه أساس وبعدين عواميد بعدين دور أول، فأول أساس في حياة آي شخص مسلم هي الصلاة بلا شك، ثم العواميد القرآن والأذكار وغيره..... فلازم يا أختي نضبط الأساس الأول عشان نقدر نبطل كل العادات السيئة أو الحرام، ونقدر نبدأ في عادات كويسة أو عبادات...وأنا أظن من كلامك إنك ممكن تجدي في نفسك شيء من كلمة (لازم)، لكن المريض لو راح لدكتور، الدكتور مش بيقوله خد الدواء الللي يعجبك! هو بيديله دواء محدد، ليه؟ لأنه عارف علاجة وإنك عاوزة تبطل اللي إنت بتعمليه، فدي حاجه مبشرة جدا وخير بإذن لله، والسؤال والاستشارة مش عيب خالص ولا في أي حاجه، اصل لو كل لما يبقى عندي مشكلة ميقولش لحد ...طب بعد 5سنين هيبقى عامل إزاي؟ - لو مبقاش اسواء فهو في أفضل الحالات زي ما هو عمده مشاكل كتير...وهو كان ممكن في نفس المدة دي يكون اتغير تماما،طب ليه نظلم نفسنا ونعمل كده! فلازم يا أختي تبحثي عن حد تستشيريه وتتباعي معاه...بنات صالحين مثلا، هيشدوكِ من كل ده، وهيبقوا معاك وبيشجعوكِ وواقفين جنبك، وفي آي مشكلة بالنسبالك هتلاقي ليها حل عندهم بإذن الله...بس هما مش بيجيبوا بالعصا السحرية، لازم هندور عليهم وممكن نتعب شوية في البحث عنهم، وطبعا بالدعاء ربنا هييسر لك وتلاقيهم بإذن الله، وربنا يوفقك لما يحب ويرضى

يا أختي هوني على نفسك دي دنيا ! ماشاءالله سيرتك عطرة، لكن ده قدر الله لك في الثانوية إنه يحصل معاك كده لحكمة منه سبحانه، وأظن الأمثلة أكثر من أن تحصى اللي إنت تعرفيهم كانوا شاطرين طول سنين الدراسة، وفي الثانوية حصل معاهم برضو كده، ليه؟ قدر وحكمة من الملك سبحانه... ووالله الحياة ما هتوقف على الثانوية، أنا عارف إن كلامي مهما كان حلو ومنمق إنت مش هتحسي بيه...لكن مش مشكلة....الثانوية لا بداية ولا نهاية حياتك،دي مجرد سنة دراسية، وكلٌ ميسر لما خلق له والتوفيق بالدعاء، فأكثري من الدعاء ويسر الله لك ووفقك لما يحب ويرضى

ChatGBT هو أفضل حل

طب هو يا أختي الكريمة بيتكلم معاك بصفته ايه؟ هو مادام مجاش ودخل البيت فمينفعش خالص والله وأنت حتى قولت بلسانك...(خصوصا إني اتعرضت لعلاقة سامة من فترة طويلة) طبعا هيجي في دماغك" بس ده مختلف ده بيصلي وبيصوم وبيتصدق...وبيقيم الليل كمان!" فتمام براحتك أنا مش هكلمك من جهة شرعية لأنها واضحة زي الشمس الحمدلله...لكن من جهة الواقع والمنطق: أكثر من 90% من اللي أعرفهم اللي بيكلموا أو كانوا بيكلموا، كل واحد فيهم على الأقل كان بيكلم 3 بنات في نفس الوقت! محدش فيهم اتجوز اللي بيكلمها، واللي حاولوا بجد واحداترفض من أهلها، وواحد أهله رفضوها، وواحد اتجوز فعلا بس اقسم بالله العظيم من أفشل الجوازات اللي شوفتها في حياتي %85 من الشباب اللي بتعمل كده هو حتى لو بقى عنده مقدرة أنه يتجوز...هو مش هيتجوز، اصل ليه اتعب دماغي وابقى مسؤول عن واحدة، وكل الهري ده، طب ما أنا بكلم 3/4 بنات وبخرج والدنيا حلوة الراجل بيخش الباب من بيته؛ لأنه حتى لو جاهل بالحكم الشرعي، فهو ميرضاش كده لأخته فهو إن كان قادر...فلازم يتقدم لو هو صادق ولو مش قادر، فمينفعش نتكلم خالص والله وربنا يرزقك زوج صالح يارب

يا أخي هذا من الشيطان لأنك توقفت عن هذا الضرر، وأصبحت صحتك جيدة بحمد الله...فهو يكره لك ذلك بالطبع، فلا تفكر في الأمر مرة أخرى، لقد مر على الأمر سنة ونصف! وحتى لو كان يوم ونصف، لا تجعل للشيطان عليك سلطان واستعن بالله ولا تعجز

دي حالة عامة بيدخل فيها اغلب الطلاب خاصة المجتهدين اللي أظنك منهم....فحاول بقدر الإمكان تبعد عنك آي مشتتات وأنت بتذاكر...والسنة مبنية على مذاكرة السنة كلها مش شهر واحد ربنا يوفقك

عاوز ألفت نظرك لنقطة مهمة جدا جدا يا أخي وهي إنك من غير صحبة صالحة هتقع ط، أنا عارف إنك ممكن تكون عندك ثقة دلوقتي، عشان ماشاءالله إيمانك عالي وكده...لكن صدقني الطريق طويييل ولن تثبت إلا بصحبة، قال الملك سبحانه:﴿واصبر نفسك مع الذين يدعون ربهم بالغداة والعشي يريدون وجهه ولا تعد عيناك عنهم.....﴾ [الكهف: ٢٨] عارف الكلام هنا موجة لمين؟ لخير الخلق كلهم، محمد صلى الله عليه وسلم، فمبالك بالغلابة اللي زي وزيك وقال سبحانه :﴿قل إنما أعظكم بواحدة أن تقوموا لله مثنى وفرادى ثم تتفكروا......﴾ [سبأ: ٤٦] فقدم المثنى على المفرد! ومعقل وجود الصحبة الصالحة بلا شك طبعا المسجد ومن النت ومن كل حتة هتلاقي بإذن لله بس ادعي ادعي كتييير وربنا يرزقنا وإياك الصحبة الصالحة

مقدرش احكم على حالتك، لكن على حد فهمي من كلامك فالشيوخ دول مشايخ سوء، لأن دي حالة ممكن اقول بيدخل فيها اكتر من60% من طلاب الثانوية العامة أيام الامتحانات! حتى أنا فاكر لمى كنت في الثانوية في الفترة اللي قبل الامتحانات كنت بذاكر عدد ساعات كبييير جدا بعد امتحان العربي مش هبالغ لو قولت بيقت بذاكر ربع عدد الساعات الللي كنت بذاكره بس الحمدلله في الآخر جبت نتيجة كويسة وكنت التاني على المدرسة؛ لأن الأمر معتمد على مجهودك طول السنة مش أيام الامتحانات بس وادعي كتيير

وعليكم السلام ورحمة الله وبركاته عشان نكون صرحاء ونبعد عن وهم التنمية البشرية...من أقوال مثل: قوم وكمل .....أنت قوي اوي....محدش يقدر يوقفك...وغيره كثير لازم نعترف إن إحنا ضعاف زي ما الملك سبحانه قال:"وخلق الإنسان ضعيفا" فموقف زي اللي حصل معاك ده موقف صعب بجد....ولكنه يهون بالله... ومش دروشة والله يا أختي، لكن أكبر سبب عشان تقدري تتخطي الأمر ده هو ربنا...ده يعني مثلا صلاة ودعاء كتير كتيير اوي...وفي أسباب مهمة تانية زي الانشغال بحاجة نافعة؛ لأن لو ما اشغلتيش قلبك وفكرك بحاجة كويسة....بشكل اوتوماتيكي هينشغل بحاجه مش كويسة ومحتوى د.عبدالرحمن ذاكر الهاشمي في الحل الحقيقي بإذن الله، مش ارميلك كلمتين إنت جامد إنت مفيش منك اتنين فتتحمس يومين وترجع زي الأول أو اسواء!

بص يا صديقي ركز في مذاكرتك وبعد الامتحانات ابقى فكر هتعمل ايه، بس حذاري حذاري من فكرة التحويل، مش عشان صنايع وحشة هو التعليم كله تعبان، لكن هتندم

هو سؤال معقد بعض الشيء لأنه ليس هنالك ضابط لذلك، فعلى سبيل المثال هناك أيام يكون لدي أفكار للكتابة تكفيي شهر.... وأيام أخرى تعجز كلماتي فيها أن تكمل السطر... ولكن من الحلول البسيطة لذلك هو ضبط توقيت لكتابة مقال أو جزء من رواية أو غيره... فإن هذا سيسهل عليك الصبر على الكتابة لأنك تعلم أنه بعد عدد من الدقائق ستتوقف، وفي الغالب عندما استخدم هذه الطريقة أستطيع أن اكمل ما بدأته

صراحة لا أخفي اندهاشي من سرعة بديهة أخيك ذي التسع سنوات، وأقول وبالله التوفيق: إن أخيك هذا أقطع بِأَنّه طفل ذكي، وهو لا يرى أحدًا في سنه خيرًا منه أو يفضله. والحل الفعال بإذن الله لهذه المشكلة هو إيجاد طفل آخر متقارب معه في السنّ، وحبّذا لو كان أصغر، وتهتمّين بهذا الطفل الآخر وتراعينه وتُمدحينه وتحاولين أن تُوفّري له كلّ ما يحبه الأطفال، ولكن هذا بالطبع إنْ كان هذا الطفل الآخر أو الجديد مطيعًا ونظيفًا وكريمًا ومهذبًا و...إلخ. و الحقيقة أنني أود أن تُشاركينا كيف سيكون سلوك أخيك بعد ثلاثة أشهر... إذا طبق هذا الحل أو غيره.

هذا للأسف تبلد مشاعر من كثرة المشاهدة تحتاج إلى أن تقطع تماما كل هذا المدخلات لتستعيد توازنك المشاعري. نقطة إضافية: هذا ربما ينعكس عليك في باقي حياتك، فلا تحزن في موطن الحزن، وربما تكون سعيد، وهذا اضطراب في المشاعر

بص هي إجابتي لن تكون كافية خالص لكن حاول تتعرف على صديق صالح، هتقدر تفضفض معاه بكل مشاكلك وهيحاول ياخد بإيدك الدعاء الدعاء الدعاء

من الأشياء التي ستساعدك على التوقف عن العجب والتوقف عن الذنب بإذن الله.... أن تتذكر ذنبك كلما شعرت بذلك

1- لا تكثر من اللوم لنفسك؛ لأن نتيجة ذلك ستكون سلبية 2- ابدأ بالقليل، ضع لنفسك ورد صفحة واحدة فقط كل يوم، وعندما يصبح ذلك أسهل عليك من شربة الماء، قم بتزويد الورد 3- ابحث عن صديق صالح 4- الدعاء

هذا رد فعل طبيعي، عندما بسبب أحد رسول الله ولا تغضب لذلك، فأقل أقل ما يقال أن الإيمان بات ضعيفا أو في الحضيض

صلي على النبي، هقولك شوية حاجات بناء على تجربتي الشخصية يمكن تفيدك 1- في فترة من الفترات البائسة كنت شايف الدنيا سودة زيك دلوقتي وعايش نظرية المظلومية والمؤامرة وغيره.....؛ وكل ده بسبب السوشيل ميديا، والحل الأفضل من وجهة نظري أنك تقفلهم كلهم لفترة وبعد فترة ممكن ترجع تفتحهم بس تكون حاطت حد للوقت، وفي حاجات ارجح إنك مترجعش تستدخمها تاني زي الفيس مثلا 2- التغيير بطيء اوي يا صديقي، يعني إنت عاوز تلتزم بالصلاة وعاوز تحفظ قرأن وعاوز تطبل عادات سيئة وعاوز تشتغل وعاوز تتجوز وعاوز عربية....كل ده جميل ويدل على إنك اللهم بارك عاوز تبقى إنسان كويس، لكن كل ده محتاج جهد كبير وصبر وتعلم وفقك الله لما يحب ويرضى

1-روح لميس وبلاش مستر 2-إنك مفهمتيش من المستر التاني؛ غالبا بسبب تعلقك بالمستر الأول 3- لما الدراسة تبدأ وتبدأ دروسك ومذاكرتك هتنسي بإذن الله 4- "نفسك إن لم تشغلها بالحق شغلتك بالباطل" _ الإمام الشافعي فاشغلي نفسك بحاجات مفيدة،ممكن تاخدي كورس أو دورة تقرأ كتاب، في حاجات كتيرة اوي اوي

هي ممكن تبقى إجابتي غريبة بالنسبة ليك شوية، لكن التركيز الشديد على إني اعرف اتكلم واتعامل في المواقف وفي جلسات العائلة و الاصدقاء...غالبا مش هيجيب نتيجة كويسة، بل بالعكس غالبا ممكن يحصل رد فعل غريب منك من كتر التركيز ، لكن إنك تحاولي تتعاملي بعفاوية من غير تكلف، مع الإلتزام طبعا بالاداب والكلام الجميل، أظن ممكن يبقى افضل، والأمر محتاج تدريب وهتلاقي نفسك بتتحسني بإذن الله

حاولي تعرفي في الأول طبيعة الشغل عامل ازاي و بالنسبة للمرتب فلو صرفت بس 15ج مواصلات في اليوم فده معناه إن حوالي20% هيطيروا في المواصلات، ولو هيبقى في أكل كمان فالنسبة هتبقى أكبر بكثير

بصراحة فكرة إن كل ما يحصل حاجة للشخص يجري يروح لأخصائي، فكرة مش احسن حاجة، لو الأمر بقاله فترة بسيطة فعادي وهتمر إن شاء الله ومش محتاجة كل التكبير والتهويل ده

يا صديقي انت خدت بالك إنك انهردا قرأت وبدأت في كورس! دي حاجة ممتازة جدا و دليل على إنك اللهم بارك عاوز تتغير فعلا، فحاجتين بساط ممكن يساعدوك: 1- دور على صحبة أو واحد بس حتى...هيعنوك جدا وهيكونوا سبب ثباتك بإذن الله بعد ربنا 2- التغيير بطيء جدا..فتحلى بالصبر وعليك بالدعاء

تعرف على صديق صالح هيشجعك وهيختصر عليك حاجات كتير جدا, وحاول تبدأ تتعلم رياضة، وحبذا لو كانت رياضة قتالية، وطبعا الدعاء الدعاء الدعاء