لا استطيع ان اقرر الشريك المناسب بين شخص احبه و شخص يحبني

Question

انا عندي 22 سنة العلاقة بيني و بين اهلي (أقارب امي و أقارب ابي ) كويسة و في تواصل علي طول عندي ابن خالي ولد وحيد و اكبر مني بسنتين من أقارب امي و بقي العائلة الجيل الجديد بنات و عندي ابن عمتي اكبر مني بشهرين و ده الولد الوحيد من سني و الباقي اصغر مني بأربع سنين فيما فوق انا من انا و صغيرة معجبة بابن عمتي اعجاب بين ولد و بنت و لكن عمري ما لمحت ولا صارحته و كان التعامل بنا محترم جدا و مكنش في أي تجاوزات و ابن خالي كان التعامل بينا محترم برضوا و لكن الفرق أن انا طول عمري بتعامل معاه علي أنه اخويا الكبير و بحترمه جدا من اربع سنين تقريبا ابن خالي اعترفلي أنه معجب بيا و قالي أنه مش طالب أننا تكلم هو بس عايز موفقتي علشان يجي يتقدم رسمي و لكن وقتها انا رفضته و عملته بلوك و قطعت تواصل علي الرغم أن وقتها كان قدامه اربع سنين لان كليته خمس سنين و بعدها بسنتين ابن عمتي اللي معجبه بيه اعترفلي برضوا و لكن معرضش أنه ياخد اي خطوة رسمي و لسة كان قدامه ست سنين كليه لان كليته سبع سنين و انا اخترت اتواصل مع ابن عمتي لاني كنت معجبه بيه و فرحت لم عرفت أنه معجب بيا برضوا فضلنا سنتين نتواصل و لكن من بداية تواصلنا كان مهمل بيكلني مرة في الأسبوع و مكنش مبين اي علامات من الاهتمام كان لم نتكلم كان يذكر العلاقة اللي بين المتجوزين و حاجات مينفعش يقولها في وضعنا مكنتش بتفاعل مع كلامه لا بالايجاب و لا بالسلب و اتكلمت معاه في نقطة إهماله دي كتير و كل مرة كان يقولي هتغير و ههتم و كان بيكون اسوء لدرجة أنه ممكن يكلمني مرة في الشهرين و المرة دي انا اللي بتواصل مش هو لحد ما قولتله هنبطل نتواصل و كل واحد يروح لحاله لاني معتش قادرة استحمل طريقته دي اكتر من كده بس هو رافض أننا ننفصل و بيحاول يرجع العلاقةو لكن ديما يقولي انتي حرة تكملي معايا أو تسبيني ده قرارك بصراحة تعبت من التناقض اللي فيه و علي الطرف التاني خالو كان كلمني و طلب اتواصل مع ابن خالي لأغراض تتعلق بالدراسة بحكم كليتي تخصصها شبيه لتخصصي فشلت البلوك علشان اشوف عايز اي اعتزرلي الاول و طلب اني معملش بلوك و فعلا معملتش و لكن كلامنا كان قليل لدرجة أن يعتبر مفيش كلام بيننا و لكن الاسبوع اللي فات طلب اني افكر في مشاعره و أنه طول الاربع سنين مقدرش يتخطاني و مستعد يغير في نفسه اي حاجة متعجبنيش بصراحة من تعاملي معاه قبل ما يعترفلي فهو كان شخص محترم و بيتهم جدا و قد كلامه و لكن مش عارفة اعمل اي خايفة اظلمه علي الرغم اني من اربع سنين و من سنتين و الاسبوع اللي فات وضحت ليه اني رفضاه و يشوف وحدة غيري و لكن هو متمسك جدا بيا و بيقولي انا مش هخسرك و هفضل وراكي لحد ما ترتاحيلي و تقدري تتقبلي مشاعري محتارة بين شخص بحبه مهمل و شخص بيحبني و لكن طول عمري شيفاه زي اخويا اسفة علي الإطالة و لكن ارجو المشورة

Accepted Answer

بصي خلينا متفقين إن الكلام بين الولد والبنت بدون رابط شرعي وبدون ضرورة وكمان من غير حدود حرام تمااما، حتى الخطوبة إتحددت بضوابط شرعية علشان تحافظ عليكي وعلى قلبك. إختاري إللي يدخل البيت من بابه ومتفتحيش باب أبدااا للكلام إنه يخرج برا حدود العلاقة العائلية. إبن عمتك طالما بيدخل في سكة مش كويسة في الكلام ف دا مش ناوي ع جواز ومجرد بيتسلي ويضيع وقت ف سطحي علاقتك بيه على قد ما تقدري "وياريت تتمنع خالص علشان تقدري تتجاوزي مشاعر الإعجاب وتشيليه من بالك" إبن خالك خلي الكلام بينكم على حدود الدراسة بس متسمحيش إن الكلام يمط ولو لمح عرفيه إن هو أهلك وعارفهم يجي يتقدم وقتها تصلي إستخارة وأهلك يشوفوا هل الشخص دا مناسب أو لاء ولو مش مناسب ومفيش نصيب ف دي حاجة واردة وخارج إيدينا كلنا.. أخر حاجة إنتي مش مطلوب منك تختاري حد أصلا، يعني بصي إنتي مترهقيش قلبك في إعجاب ومشاعر حب "مؤقتة" وتدوري علي نصيبك في الحب لإنه حتى لو إنتي قاعدة في بيتك مش بتتحركي منه هيجي لحد عندك نصيبك من غير ما تتعبي نفسك وتختاري وتدوري وترهقي قلبك ومشاعرك في علاقة ملهاش مسمى ومستقبلها مش باينله ملامح لإن الشخص إللي هتتجوزيه مكتوبلك من قبل ما تتولدي أصلا، وكمان زي ما بيقولوا مراية الحب عامية إنتي لوحدك مش هتقدري تختاري شريك حياتك إللي هتكملي معاه يعني بيبقى في عيوب إنتي مش بتكوني واخدة بالك منها ف بتحتاجي رأي أهلك في الشخص وغير كده الأهل عندهم خبرة كبيرة ونظرة للناس وهيقدروا يعرفوا الشخص دا مناسب ليكي من منظروات تانية الإعجاب وإنبهار البدايات مش هيخليكي تشوفيها، وغير كده الحب مش كفاية إنه يبني بيت ويعيشك سعيدة البيوت بتتأسس على أساس المودة والرحمة، لإن مش كل مشاعر حب بتكون فيها مودة ورحمة. أخر حاجة لو مترددة لسه كلمي والداتك في الحوار دا إن فلان عاوز يتقدم وأقوله إيه وحضرتك شايفة إيه كده يعني

Answer

خلاصة كلامك ده كله صلاة الاستخارة استخيري ربنا سبحانه وتعالى وربنا يختارلك الأصلح

Answer

انتى اولا حاولى تصلى صلاة استخارة وربنا هيدلك على الطريق الصحيح و هيختار الاحسن ليكى و اللى عارف انه الخير كله ليكى هيكون معاه هو وبس ثانيا من وجهة نظرى و من واقع قرائتى لكتب كتير و كلام علماء كتير فى علم النفس أنه الأفضل تتجوزى اللى بيحبك مش اللى انتى بتحبيه لانه اللى بيحبك هيهتم بيكى و يخاف عليكى و يحترمك و هيعمل كل اللى يقدر عليه علشان يشوفك مبسوطة و هيكون مستعد يضحى كتير علشان خاطر سعادتك ودا من الطبيعى مع مرور الوقت هيولد الحب فيكى ناحيته ، عكس الشخص التانى اللى انتى بتحبيه بس هو مش بيهتم بيكى ولا بيحبك فوق دا كله مش بيحترمك بالرغم من أنه مفيش اى علاقة رسمية بينكم ف ما بالك لما تتجوزوا غير كدا فكرى مستقبلا انتى اه بتحبيه بس هو يمكن مش بيحبك و بيتسلى بيكى مش اكتر بدليل أنه مش بيكلمك كتير وانتى اللى بتكلميه و بتديله الاهتمام كله ومفتحش معاكى سيرة الجواز نهائى ف كيف لشخص زى دا ممكن يكون اب صالح لابنك مستقبلا ودى نقطة مفكرتيش فيها ف انا شايف أنه الأصح خليكى مع اللى بيحبك مش اللى انتى بتحبيه ومع مرور الوقت لما تشوفى منه كل خير و احترام و تحسى بحبه الكبير ليكى من الطبيعى جدا انك هتحبيه و تبادليه نفس الحب و الاهتمام بس فى الاول و الاخر زى ما قولت لك فى البداية صلى صلاة استخارة لانه ربنا عالم الغيب و هو الوحيد اللى عارف لك الخير فين و مع مين بالضبط ولو ليكى خير مع اللى بيحبك كونى متأكدة أنه ربنا هيجمعكم سوا و لو ليكى خير مع اللى انتى بتحبيه ف ربنا هيجمعك بيه ف صلى صلاة استخارة و توكلى على ربنا

لا استطيع ان اقرر الشريك المناسب بين شخص احبه و شخص يحبني

اجتماعية

علاقات

سؤال من احد أعضاء فدني

تم النشر الجمعة، ١٢ أبريل ٢٠٢٤

3 إجابة

8 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك