السلام عليكم
كنت دخلت في علاقة غير رسمية مع حد بس أنا كنت شايفة إنه بيحبني اوي اوي، قبل ما نرتبط كان عندي على الفيس ولاد وبتكلم معاهم عادي (عارفة إن دا غلط بس علاقتي مع أهلي وحشة وبحاول أهرب منها)
المهم ساعة ما ارتبطنا مسحت الفيس وبعدت عنهم وفضلت معاه لحد ما في يوم كان بينا مشاكل فرحت فتحت الفيس اكتشفت إن حد كنت اعرفه (ولد ) والده توفى قلت مليش دعوة ومش هكلم حد، بعدها اتصالحنا تاني وحصل مشاكل تانية فقررنا نبعد بعدها فتحت الفيس تاني وكلمت الشخص دا وعزيته وبعدها مكلمتوش تاني ومبقاش ليا علاقة بيه بعدها بيومين رجعنا أنا والشخص اللي كنت مرتبطة بيه يوم وعرف كل حاجة (لأني عطيته الايميل ) وقالي أنا من طريق وانتي من طريق وقالي قد إيه أنا شخص وحش وفضل يدعي عليا
عارفة إني غلطانة غلط كبير ومتضايقة من نفسي اوي بس حاسة مش هعرف أبقى إنسان كويس وهو معاه حق الموضوع مأثر عليا جامد حاسة إني إنسان وحش وكنت مؤذية وخايفة أفضل كدا
السلام عليكم، خليني أسألك إيه الأخطاء اللي عاوزة تتعافي منها وحاسة إنك شخص وحش بسببها؟ إنك كنتِ بتكلمي ولاد وكنتِ في علاقة غير رسمية مع واحد؟ ولا الكلام اللي هو قاله لك بعد ما عرف إنك كلمتِ واحد تاني تعزيه؟ أنتِ بتحاسبي نفسك على إيه الأول؟ ** لو حاسة بالذنب ناحية كلامك مع الشباب وعلاقتك بالشخص ده فتمام هقول لك جميل إحساسك بالذنب والندم فخليه دافع إنك تتغيري للأفضل ومترجعيش تاني للطريق ده. خليه دافع يقربك من ربنا لكن أبدًا متغرقيش نفسك في إحساس الدونية واحتقار الذات واليأس من رحمة ربنا. توبي من قلبك واعزمي على عدم الرجوع للأخطاء دي وامنعي أي كلام مع الشباب وأي علاقات حرام وصلحي علاقتك بربنا وصلحي حياتك وطوري نفسك. اعتبري اللي فات دروس اتعلمتِ منها عشان تكوني شخص أفضل. ** أما بقى لو إحساسك بالذنب والدونية وإنك قد إيه شخص وحش بسبب الكلام اللي قاله لك الشخص ده يبقى انتِ غلطانة جدًا. الشخص ده أصلا ملوش حكم عليكِ، علاقتكم من الاساس غلط وما دام مش شرعية يبقى لا أنتِ لكِ حقوق عليه ولا هو له حقوق عليكِ. ما دام كلامك كان عادي وكانت مجرد تعزية فكبري واعتبري كلامك مع الولد التاني ده كان من ضمن أخطائك الأولى في الكلام مع الولاد عامة... نصيحة، مترجعيش للشاب ده حتى لو رجع يصالحك أو انتِ حسيتِ بالحنين له. حلك الوحيد، تستعيني بربنا وتقربي منه وتصلحي الأخطاء دي وتثقي إنك تستحقي تكوني أفضل شخص عشان نفسك مش عشان شخص تاني. بالتوفيق إن شاء الله.
تم النشر الأحد، ١٦ فبراير ٢٠٢٥
وعليكم السلام ورحمة الله وبركاته. عزيزتي، أشعر بمشاعرك الصادقة والصدمة التي تمرين بها نتيجة هذه التجربة. من المهم أن تتذكري أن الخطأ جزء من الإنسان، وأن التعلم منه هو ما يعزز من شخصيتنا. أولاً، ابدأي بالاعتراف بخطأك بدون ندم مفرط. التوبة إلى الله عز وجل والندم الصادق هما خطوات مهمة نحو التحسن. يمكنك الدعاء والاستغفار، وطلب المساعدة من الله، فهو رحيم وغفور. ثانياً، حاولي أن تتعلمي من هذه العلاقة. فكرّي في الأسباب التي أدت إلى وقوعك في هذه الأخطاء، وما الذي يمكنك تغييره في تصرفاتك وأفكارك. كوني صريحة مع نفسك بشأن ما مررت به، وابحثي عن الأسباب التي دفعتك للبحث عن الهروب من واقعتك. ثالثاً، قد يكون من المفيد أن تحاولي بناء شبكة دعم من الأصدقاء أو أفراد العائلة الذين يمكنهم دعمك في هذا الوقت. قد تكون هذه العلاقات أكثر إيجابية ويمكن أن تساعدك في تجاوز مشاعرك الحالية. وأخيرًا، اعملي على تعزيز ثقتك بنفسك من خلال الانخراط في أنشطة تهمك أو تساعدك على تطوير مهارات جديدة. ذكرى نفسك بأنك قادرة على التغيير ولديك القوة الداخلية لتحقيق ذلك. تذكري أن مرحلة التعافي تستغرق وقتًا، ومن المهم أن تتحلي بالصبر مع نفسك. أنت ليست شخص سيء بل إنسانة تسعى لتحسين نفسها. نأمل أن تجدي السلام الداخلي والثقة التي تبحثين عنها.
تم النشر الأحد، ١٦ فبراير ٢٠٢٥
لا هو مش صح طبعا، كل انسان فيه السيء والطيب، المتخبي والمكشوف ظاهر وباطن دي امور بتعدي وبنتعلم منها بس، مش نقف عليها، انت اتواصلتي مع شباب ماشي ده غلط حد ذاته، وقلتي تعملي بالواجب وتعزيه كأنه صديق، ماشي برضو تصرف جدع ع فكرة مش غلط، لكن الاصل ان البداية كانت ممنوعة، ع العموم هو حرام التواصل مع الشباب في غير الضرورة لدرء الفتنة، بس حطي ف بالك وخليكي عميقة وانتي بتحسبيها لما حد يكلمك من الولاد، يبقى دايما سؤالك هو عايز ايه ومباشر
تم النشر الاثنين، ١٧ فبراير ٢٠٢٥
ان كنتي انتي مؤذية مره فهو مؤذي اكتر منك اصلا اي علاقته بيك وايه الاعتبارات اللي بينكم خطيبك مثلا ده لو حتى خطيبك ميحقلوش يأخد الايميل او يكلمك من ورا اهلك.... باختصار العلاقة من الأول غير شرعية... وأنت غلطانه إنك كلمتي او كلمتي غيره وهو غلطان في حقك، وحق أهلك اللي محترمهمش وكان لازم يخطبك عشان بس يتكلم معاكي فمع امثال الشخص ده اللي مش بيتقي ربنا فيكي اكبر مكسب انك سيبتيه فمترجعيش تاني لوضع زي ده
تم النشر الأحد، ١٦ فبراير ٢٠٢٥
اهم حاجه نتقرب من ربنا ونستغفره كتير ربنا اكرم واحن مننا على نفسنا الحياه الحياة مش بتقف على حد اشغلى نفسك بحاجات تفيدك وتنفعك فى حياتك
تم النشر الأحد، ١٦ فبراير ٢٠٢٥
لما جيت انشر سؤال قالي (عفواً تم منعك عن نشر الأسئلة ولكن يمكنك ان تعلق) !! هو ليه ما ينفعش اسأل ايه الحل؟!
تم النشر الأحد، ١٦ فبراير ٢٠٢٥
لعرض السؤال في فدني اضغط هنا