عندي مشكلة بجد هو اني بعاني من الوسواس القهري فالدراسة و اي حد عنده وسواس عارف قد ايه ممكن يكون مزعج المشكلة اني عندي تبلد مشاعر برضو بتعالج منه ...علاج الوسواس الدوائي بيبلد المشاعر و العلاج المعرفي السلوكي تأثيره ضعيف مش عارفة اعمل ايه الدكتورة قالتلي الأهم دلوقتي ال ocdو المشاعر هنحاول نرجعها بس برضو مذاكرتي بتتاثر بالحالتين دول ورايا امتحان بعد اسبوع مش عارفة اعمل ايه حد عنده فكرة
السلام عليكم. طبعا اللي انت فيه ربنا يقدرك عليه ويعينك لانه بيحتاج جهد كبير انك تبدئي تعالجي حاجات نفسيه وفي نفس الوقت عندك دراسه وامتحانات بس خليني اقول لك انه لا يكلف الله نفسا الا وسعها يعني انت على قدر طاقتك هتقدري انك توجهي توجهي طاقه دي في الاتجاهات اللي موجوده فاللي اقدر اقوله لك انك لو شايفه انك يعني مش مديه جهدك كافي في اتجاه الحاجات اللي انت بتعالجيها وبتتعاملي فيها دي زود الجهد ولكن لو انت يعني بتبذري اقصى جهدك فما فيش حاجه تاني تقدري تعمليها ولا اي حاجه زياده ممكن تتعمل انه فعلا الموضوع بيحتاج استمرار في المتابعه وبيحتاج مدى مش قليل يعني مدى طويل شويه طبعا على حسب درجه حالتك وعلى حسب انت بتعاني من ده بقى لك قد ايه يعني عوامل كثير قوي بتاثر على الموضوع هياخذ قد ايه لحد ما تحسي بتحسن اللي انت مستنياه لانه اكيد في درجات من التحسن طالما انت متابعه وماشيه مظبوط على العلاج او على سواء العلاج الدوائي او العلاج السلوكي اكيد في تحسن بس ممكن تكوني انت من كتر ما انت تعبانه من الحاله كلها عموما من تاثيرها على دراستك وعلى حياتك فانت عايزه تخلصي منها بسرعه فلذلك مستعجله ما تخليش استعجالك ده يعني يصيبك باي نوع من الاحباط ولكن صبرا واستني نتائج هتظهر واحده واحده ومره واحده هتشوفي الصوره كامله بقت احسن باذن الله ربنا معاكي ويقويك.
تم النشر السبت، ٣ أغسطس ٢٠٢٤
يا حبيبة قلبي، أول حاجة لازم تعرفي إن اللي انتي فيه مش وحيد، وفيه كتير بيعانوا من نفس المشكلة. الوسواس القهري والشعور بالتبلد صعبين، خصوصًا مع ضغط الامتحانات. أول حاجة حاولي تتقبلي مشاعرك. هي مش هتكون دائمًا سهلة، بس حاولتِ تتسامحي مع نفسك. ممكن تخرجي المشاعر اللي جواكي أو تكتبيها في دفتر، لأنها ممكن تخفف عنك. بالنسبة للدراسة، جربي تقسمي وقتك إلى فترات قصيرة. يعني خدي 25 دقيقة تركيز و5 دقائق راحة، وده يعرف ب"تقنية بومودورو". كمان حاولي تراجعي المواد بطريقة ممتعة بالنسبة ليكي، ممكن تجيبي أصحباتك وتذاكروا سوا. وإذا حسيتِ إن الأفكار الوسواسية بترجع، حاولي تشغلي نفسك بحاجة تحبيها، زي قراءة كتاب أو ممارسة رياضة تخفف التوتر. لو لسه مش قادره تسيطري على الأمور، ممكن تحاولي تكلمي مع دكتورة تانية أو مختصة في العلاج النفسي برضو، لأن كل واحد له أسلوب يختلف. خلي عندك ثقة إنك هتعدي المرحلة دي، واتبعي خطوات صغيرة كل يوم. شدي حيلك وحاولي تبقي إيجابية. أنا معاك في كل خطوة!
تم النشر السبت، ٣ أغسطس ٢٠٢٤
هل أنت لا تريدين الدراسة أم أنت غير قادرة على الدراسة.
تم النشر السبت، ٣ أغسطس ٢٠٢٤
انا مش عارفة انتي بقالك قد ايه بتتابعي مع الدكتورة، ولكن هي كلامها صحيح الى حد كبير ، لازم تصبري شوية على المتابعة مع الدكتورة وعلى العلاج ، حتى لو له اثار جانبية ، لكن هي مرحلة مؤقتة وبعدها الامور هتتحسن ، وتاثير العلاج دلوقتي ممكن يبانلك انه تاثير ضعيف ، لكن زي نقطة المية مع مرور الوقت هتشوفي التحسن الكبير وهتخرجي من فترة العلاج افضل باذن الله. الافضل الاستمرار في المتابعة مع الدكتورة ، لو عندك اي سؤال ارجعي اساليها هي لانها اللى بتتابعك وادرى حد بظروفك وباحتياجك في الفترة دي. انصحك انك تحطي هدفك قصادك ، هدفك من الدراسة ، وبخطوات صغيرة يومية (Baby Steps) ، هتوصلي لهدفك باذن الله .. فكري في النهاردة فقط، قسمي المادة اللى عندك امتحان فيها الى اجزاء ، وكل يوم ركزي على الجزء المحدد فقط ، وزي ما الاجابة الاولى نصحتك ، طريقة البندورا في المذاكرة حلوة جدا (25 دقيقة مذاكرة و 5 دقايق راحة) ، او (50 دقيقة مذاكرة و 10 دقايق راحة) مش هتحسي بالوقت فيها وهتشجعك على التركيز اكتر وهتطلعي بنتيجة افضل. كمان ابعدي نفسك عن المشتتات وقت المذاكرة ، زي الانترنت او اشعارات الموبايل او اصوات التليفزيون .. عشان يكون تركيزك افضل خلال الوقت المخصص للمذاكرة. متفكريش في نتيجة الامتحان، فكري بس في ان عندك مهمة يومية تخلصيها، لان هدفك النجاح في المادة. واذا لسه مش عارفة تحققي الخطوات او النصايح دي ، ارجعي للدكتورة مرة تانية الاسبوع دا ، واطلبي منها النصيحة ، هتقدملك النصيحة الانسب لك. بالتوفيق
تم النشر السبت، ٣ أغسطس ٢٠٢٤
لعرض السؤال في فدني اضغط هنا