السلام عليكم
دلوقتي انا لما بكون عايز اشتري حاجةمن محل او بياع في الشارع مثلا فكهاني بتخيل اني هاقوله عايز ٢ كيلو وهو هايقولي خد ٢ونص بكذا وانا هاقوله هات إللي قولتلك عليه وهو هايعمل كدة بس بعصبية الاقي نفسي مش عايز اجيب حاجة واتخنق واتخيل اني هاقول لصاحبي تعالى أنزل نقعدعلى القهوة هايقولي لا خليها يوم تاني يعني بقعد اتوقع سيناريوهات وساعات كتيرر بتحصل بالظبط زي متوقعت وبركز كتيرر جدا مع الناس لو داخل مطعم ولاقيت اللي بينزل الاكل مش مرتاحله بتوقع إن هاتحصل مشكلة بيني وبينه وهانتعارك كمان شوية وبقعد اتخيل كل الردود اللي هايقولها وكمان إللي انا هارد عليه بيها وكمان بقعد بحلل شخصيةكل الناس في حياتي عشان كدة بخاف اطلب مت أي حد حاجة بقعد اقول لنفسي بلاش عشان هايحرجك الكلام ده مع عيلتي واصحابي و مع سواق ميكروباص حتى لو راكب اوبر وعايز اقوله وطي التكيف شوية اقول بلاش احسن يرد يقول كذا وانا ارد اقوله كذا ونتعارك مع ان موضوع تافه مش عارف اللي عندي ده مرض ولا خوف من المجتمع زيادة عن اللزوم
أعتقد أنك تعرضت لخبرة سيئة في الماضي نتيجة التعامل مع الناس ربما يكون تولد عنه رد فعل عنيف من أحدهم سبب لك هذا السلوك . والحل هو في التوكل على الله فيما هو قادم من الأحداث (فإذا غعزمت فتوكل على الله إن الله يحب المتوكلين) يعني عندما تكون مقدما على أمر تصرف بصورة طبيعية وفوض كل ما لا يمكنك التحكم فيه (مثل ردود أفعال الناس) لله سبحانه وتعالى فهو حسبك ونعم الوكيل
تم النشر الأربعاء، ١٩ يوليو ٢٠٢٣
انت مش واثق فى قدرتك على الثبات قدام المواقف الوحشة . زائد انك واخد وضع الدفاع ع طول بتوقعك ان هيكون فى هجوم . التحليل الزيادة اللى مبنى على الخوف ...بيخلى الواحد متحفز جدا ...وده هيخليك انت تكون السبب فى الموقف الوحش اصلا ...لانك مش بتكون شاييف نفسك اصلا ..بس بتكون بدأت الحاله اللى هتجيب الموقف الوحش. التوقعات الزيادة شىء غير مطلوب بالمره ....احنا ممكن نشوف كل الاحتمالات ونستعد ليها . يعنى مثلا . السواق ممكن يكلمنى وحش ...هعمل ايه ؟ ...الاول هبتسم واقوله صلى ع النبي يا اسطى الدنيا مش مستاهله يعنى ....ولو كمل زعيق ...هزعق بس مش هغلط فيه بردوا .
تم النشر الأربعاء، ١٩ يوليو ٢٠٢٣
طيب الموضوع ده بدا من امتى معاك بالظبط؟ وهل تفتكر ايه مثلا اللي حصل قبل الموضوع ده، مشكلة ما، مشاكل في طفولتك مثلا؟
تم النشر الأربعاء، ١٩ يوليو ٢٠٢٣
انك تكون واثق في نفسك وفي كلامك وتحاول تتمالك اعصابك وتكون هادئ في موقف عنيف او لو شخص احتد عليك بالكلام وبيحاول يخوفك انما في الاجواء العادية والتعامل الطبيعي ماتفكرش اصلا في رد الفعل او خايف من حد يحرجك اتصرف بشكل طبيعي وفي النهاية بنصحك ( وفر تفكيرك ونشاطك الذهني الذائد عن الحد في شيء نافع ومفيد) وشكرا واسف عالإطالة.
تم النشر الأربعاء، ١٩ يوليو ٢٠٢٣
وعليكم السلام ورحمة الله وبركاته ده من أعراض القلق العام لكن للأسف عندك بدرجة كبيرة وواضح من كلامك انك بتعاني والتفكير المفرط ده بيأثر علي حياتك لازم تتوجه إنك تروح لمختص عشان يحدد سبب التفكير المفرط ده وهل هو بسبب القلق العام او اضطراب تاني واتمني إنك تفكر في صحتك النفسية وتسعي إنك تغيرها للأفضل
تم النشر الجمعة، ٢١ يوليو ٢٠٢٣
بلاش تتخيل خش في الموقف حتي لو اتقالك نفس الكلام و لقيت حيطة سد احفظ السد شكله ايه علشان تعمل حسابك المرة الجاية ، انا مثلا لو راكب اوبر و التكييف عالي ليا طريقتي هكح كحتين كده و هقول للسواق و النبي وطي التكييف من فضلك علشان البرد مبهدلني معلش يا كابتن اصلي عندي انفلونزا و سمعت ان التكييف بينقل العدوي و كده ، ارمي الكورة في ملعبه احنا مصريين بنتعامل يا سيدي الفاضل .. كلنا بنلف علي كذا محل علشان نجيب الحاجه مبنجبش من اول محل و مش بنرضي باول سعر يعني اللي انت هتعمله عادي جدا .. بطل تخيلات و سيناريوهات وهمية و طبق علي ارض الواقع هتكتسب خبرة ، و قول لاء مش عايز و سيب البياع و امشي ،و اشتري من غيره ، و اتخانق مع صاحبك علي القهوة فعلا بس يكون في الحقيقية بلاش تتقوقع جوا نفسك علشان الطريقة دي مش صحية و بتربي رهاب اجتماعي انت في غني عنها ، راقب الناس اللي بيعملوا الحاجات اللي انت وقفت فيها بنجاح و اعرف سرهم و اعمل زيهم عادي مش عيب الانسان بيقلد غيره منذ بدء الخليقة .. و الانسان بيتعلم بالتجربة .. مش بيقولك التجربة خير برهان ، و اتعرف علي ناس جديدة شوف لك صاحب يسلك في الحديد هيعلمك حاجات كتير في فنون التعامل مع بشرية مصر العربية العظيمة ، كل تجربة مع ناس بلدنا هيه خبرة بتكتسبها ، قابل كل واحد باهتمام و اتعامل معاه كانك اتولدت علشان تقابله ، ابتسم بلاش الدخلة بتاعة الزعيق او الدخلة بتاعة يا شوية نصابين خصوثا مع البياعين علشان مش هتسلك ، لما تقول لحد عايز اشتري ابتسم و لما تقوله معلش بقي مش عايز ابتسم ، او زي ما بقول دايما انت بطل قصة حياتك.. يرضيك البطل يبقي متقوقع في نفسه و الفيلم صامت .و نفسي ..!!
تم النشر الأربعاء، ١٩ يوليو ٢٠٢٣
سلام عليكم اولا وصباح الورد والياسمين ثانياً مبدأياً كدة انت بترهق زهنك ومخك وتفكيرك في اللا شيء في ردود افعال الناس اللي انت في العموم والعادي بتتوقع منهم السيء ومنهم اهلك اللي حضرتك ذكرتهم من شوية كل واحد فينا في معاملاته اليومية بيتعامل بحسن نية وعلى اللي اتربي عليه في بيته وخصوصا ان معظم معاملاتنا طيبة وكلها خير وتقديم مساعدة ما او تقديم نصيحة او شيء من هذا القبيل فمن الطبيعي انك ماتتوقعش اي سوء او رد فعل سيء من اي شخص طالما المعاملات في نطاق الادب والاحترام اما لو حصل واتحطيت في موقف سيء ومحتاج منك تعامل خاص ايضا في نطاق الادب او الصمت والابتعاد في تلك الحالة لعدم تعرضك لسوء رد الفعل في الحالة دي كمان مش هاينفع تفكر في رد الفعل ايه لانك بتتحول لحالة من الخوف والرعب من الشخص دة ولما بيشوفك متلخبط وخايف بيحط عليك او بيزيد فيها وممكن توصل للسب او الضرب في بعض الاحيان عشان بس حس انك خايف ومتوتر فأنت ايضا اتعرضت للاهانة اذً الحل هو:-
تم النشر الأربعاء، ١٩ يوليو ٢٠٢٣
عندك حق الموضوع محتاج جراءة أكتر من كدة مشكلتي إني بفكر زيادة احسن البياع يزعل او السواق يزعل او اي شخص بتعامل معاه في اي حاجة بخاف اطلب منو حقي أحسن يزعل
تم النشر الأربعاء، ١٩ يوليو ٢٠٢٣
شكرا جدا لحضرتك فعلا ده اللي بيحصل معايا بالظبط بتوتر لما تحصل المشكلة وحتى الكلام اللي كنت بحضره بنساه في لحظة حتى لو الشخص اللي قدامي ده طفل عنده عشر سنوات مش بعرف أرد عليه حتى لو ابني نفسه بيحصل نفس الموضوع واتوتر ومعرفش أرد عليه مع العلم انا سني دلوقتي ٣٧ سنة ولسة بتوتر برده من المواجهة ولو اتدخل حد وقالي قولي ايه إللي حصل وانا هاجيبلك حقك بتوتر اكتر وابقى مش عايز حاجة غير أن الكابوس ده ينتهي وكل واحد يروح لحاله
تم النشر الأربعاء، ١٩ يوليو ٢٠٢٣
لعرض السؤال في فدني اضغط هنا