انا عندي مشكلة هي إن في واحد بيقعد بيتلزقلي ويتكلم زيادة ويعاكس ساعات والمشكلة انه قريبي (ابن عمي كمان) ف بنشوفهم كتير عند جدتي هو اصلا اكبر مني ب مثلا ٦، ٧ سنين كده وانا اصلا مش بكلم ولاد ولا بتنجان فالموضوع ده بقاله سنه تقريبا لغاية فترة قريبة كنت بتعامل عادي لغاية المرة الي فاتت مبقتش ببصله حتى وبتجنبه تماماا اجتنابا لاي تعامل زيادة المهم ان مامته واخواته (بنتين) هما كمان وانا بتكلم معاهم يقوموا حاشرين سيرته فاي حوار وانا بجد ببقى الي هو::: ممم ماشي..
المهم انه اخويا لما بيبقى موجود بيبعده عني خاالص ومامتي دايما بتحذرني قبل ما ننزل انه خلي بالك وابعدي عنه وكده وانا فاهمه وبقعد اقولها ده بيلزقلي وخلاص، المهم قدام بابا مبيطلعلوش نفس لكن دايما بيجر كلام، ممكن تفتكروا اني مثلا مأفورة او كده بس والله الكلام بجد وهو باين لاي حد وخصوصا انه بتاع الكلام ده كان بيعمل كده زماان مع بنت عمي التاني وكلنا عارفين وكانت في الاول بتهزر معاه وكده وبعدين بعدت وبقت مبتهزرش المهم يعني اني اصلا صغيرة اوي على الكلام ده كله وانا مش عارفه اعمل ايه ماما بتقولي متكلميهوش خالص وطنشي بس انا بعمل كده ومش نافع! لو سمحتوا افيدوني الحل معاه ايه ده
الامور اللى زى دى لازم موقف مباشر وبكل حزم مش نقعد نتعامل بشكل غير مباشر انتى اول ما تكونوا فى تجمع وهو يقرب تبعدى عنه بشكل ملحوظ وتقوليله انت المفروض اكبر منى وفاهم ان احنا مش صغيرين وميصحش نتلامس ولا نقرب بالشكل ده وحتى لو انت شايف ده عادى فانا بقولك اهو ان انا مبحبش كده وخلى القعدة لطيفه لحد ما نمشي . المرحلة اللى بعد كده ...تقولى الكلام ده قدام كل الكبار اللى موجودين وتقوليلهم انا بشهدكم انه بيضايقنى واتفضلوا اتصرفوا . المرحلة اللى بعدها ...لما يكون فى المكان ترفضى تتواجدى فى نفس المكان اصلا والقرار ده يكون واضح للكل. امشيهم مراحل كده لو واحده مجابتش نتيجة انقلى على اللى بعدها
تم النشر الأحد، ٩ يوليو ٢٠٢٣
أول حاجه احيكي على موقفك الثابت تجاه إبن عمك و وعيك بإن أد إيه الفعل ده خطأ تاني حاجه حاجه الحل هنا فى تلات حلول متوفرين بس قبلهم حابب أعرفك إن بنات عمك بيحاولي يخلوكي تشغلي تفكيرك بيه من ذكره فى وسط الكلام وكده فحذري منهم 1 الحل ده هيكون معتمد عليكي أنتي يعني أى ؟ يعني أنتي اللي هتكلمية و هتقوليلوا بشكل حازم ميقربش منك و إلا يتحمل العواقب 2 لو الحل الاولاني منفعش أو عملتي Skip هتروحي تقولي لعمتك على تصرفاته و تقولي بلاهجة مباشرة ليها فى آخر الكلام إن لو هو قرب مني بأي شكل من الأشكال هتقولي لوالدك 3 لو حتى مع كل اللي فات و لسا برضوا الدم منعدم خلاص عليكي و على والدك و قوليلوا الموضوع واحد اتنين تلاته و أنا قولت لعمتي و لسا برضوا و قولتلوا و لسا برضوا بيعمل كده و أنا مكنتش عايزا أقولك علشان ميحصلش مشكلة . وبس ده رأي الشخصي.
تم النشر السبت، ٨ يوليو ٢٠٢٣
عزيزتي، انا فاهمة مشكلتك تماما. الواد ده بيتصرف بطريقة مزعجة وغير محترمة. لازم تاخدي موقف حازم معاه عشان يبطل تصرفاته دي. أولا، لما يكلمك او يعاكسك، قوليله بهدوء ان سلوكه ده مش مقبول ولازم يبطله. لو مستمر، هدديه انك هتقولي لأهلك وهياخدوا موقف. ثانيا، لو برضه مستمر، قولي لأهلك وابوك على طول. متسكتيش على اللي بيحصل ده وسيبيهم يتصرفوا. هما ممكن يكلموا أهله ويحلوا المشكلة من جذورها. ثالثا، انتي لازم تبعدي عنه تماما. مترديش على كلامه ولا تسلمي عليه. اتجاهليه بشكل كامل. ده هيخليه يحس ان تصرفاته مش هتجيب نتيجة وممكن يوقف. رابعا، لو الموضوع استمر وبقى يزعجك اوي، قولي لأهلك انك مش عايزة تشوفيه تاني. ممكن تقللي لقاءاتك بأهل جدتك عشان تبعدي عنه.
تم النشر السبت، ٨ يوليو ٢٠٢٣
خليكي قوية كفايا و قولي ليه علي اللي انتي حساسه و أنه يشيل اللي في دماغه من نحيتك و كوني aggressive في الكلام جدا وقتها . حصل حاجه بعدها كلمي والديك
تم النشر السبت، ٨ يوليو ٢٠٢٣
لازم راجل يحرجه ويخليه يقف عند حده كلمي باباكي افضل
تم النشر الأحد، ٩ يوليو ٢٠٢٣
تكلمت مع والدك في الموضوع دة؟
تم النشر السبت، ٨ يوليو ٢٠٢٣
لعرض السؤال في فدني اضغط هنا