انا تعبت من نفسي مبقتش حتي عارف اعبر عن اللي جوايا يعني بكتب الكلام دا بالعافية، مبصليش رغم اني كل فترة احاول ابدا اصلي وانتظم بس عارف اني كلها يومين وهسيب الصلاة تاني كأني برش عطر علي زبالة ورغم كدا بحاول بردو بس مفيش، وافضل عايش ضميري بيقتلني بسبب الموضوع دا وبرضو مبصليش. بتوتر من اي تعامل جدي مع الناس اخري هزار كدا وخلاص، مبزاكرش وفاشل دراسيا. مدمن اباحية. عايش اعاتب نفسي واكره نفسي كل يوم. ١٦ سنة وحاسس اني هموت من الضغط اللي بحطه علي نفسي وكل فترة بحاول اروح الچيم والعب رياضة واشغل نفسي في اي حاجه عشان مفكرش بس بقعد بعد فترة وبرجع اقعد في اوضتي طول اليوم دماغي تاكلني من التفكير اني كل حياتي غلط في غلط وعارف الحل بس مبقدرش انفذه، نفسي انتحر بس عارف ان مصيري هيبقي جهنم فبخاف، عارف انكم هتدوني "حلول" بس مفيش جدوي معدتش قادر احاول حتي.. اسف لو كلامي مش منظم ياريت تعذروني
التفكير ف الانتحار وسيلة للهروب وعشان بيتكرر الفترة دي على السوشيال ميديا ف بنفتكر انه حل .. لكن للاسف ده مش حل لان بعد الانتحار هنواجهه حياتنا الحقيقية الازلية اللي مفيش فيها انتحار ولا هروب .. انت واعمالك وزي ما زرعت هنا هتحصد هناك .. فبالتالي سيبك من حوار الانتحار ده مش حل. دلوقتي احنا عايشين كام سنة ف العالم ده .. انت عيشت منهم 16 سنة .. محدش عارف باقيلك كام .. لكن الأكيد انهم مش كتير (مقارنة بحياتنا ف الاخرة اللي ملهاش نهاية). انت حددت مشاكلك وعارف ايه اللي مأخرك حلو.. قدامك طريقين إما تفضل عارف عادي ومكمل وهيكمل معاك الاحساس بالذنب والافكار السلبية ومش هتلاقي في حاجه ف حياتك كامله ولا انت عارف تعمل حاجه مفيده ولا حتى ضامن أي حاجه كويسه ف الآخرة. وإما تاخد وقفه مع نفسك وتلجأ لمتخصص يساعدك وتكون راجل وقد القرار ده وتكمل فيه .. هتتعب شوية وتقع شويه وترجع تقف وتكمل عادي .. وبعد كام سنة من دلوقتي هتقول الحمد لله اني اخدت القرار ده على الاقل احاول اضمن آخرتي. الطريق الأول انت عارفه كويس ولو مش عارف أخرته مكنتش كتبت سؤالك. الطريق التاني هحاول أمدلك كام ايد تساعدك وانت وشطارتك شوف اذا كنت هتعرف تتشعلق ف حاجه منهم .. 1- ارمي التليفون وامسك تليفون بزراير على قد المكالمات وشكراً انت مش محتاج اكتر من كده من الموبايل .. واجبر نفسك على الصلاة زي ما بتجبرها انك تلبس وتدفى لما تكون سقعان .. التليفون بقى اديه لحد من أهلك وحلفه يخفيه عنك لحد ما حياتك تتظبط وتنجح ف دراستك. 2- ابعد عن صحابك وصاحب ناس محترمة خايفة على دنيتها وآخرتها وعايزين يبقوا رجاله وليهم لازمة وقيمة ف الحياة. 3- اقعد ف المسجد على قد ما تقدر .. خلي المسجد بيتك الاول مش التاني حتى .. اهرب من الدنيا لما متقدرش تحكم نفسك وروح للي خلقك ف بيته حتى لو هتقعد تتفرج ع اللي ف المسجد من غير ما تعمل حاجة .. أعظم الرجال قلوبهم مُعلقة بالمساجد. 4- لقيت نفسك مش عارف تعمل حاجه من ده وأضعف من إنك تسيطر على نفسك وتتحكم فيها يبقى تستعين بحد متخصص. - تقدر تزور أقرب مستشفى حكومي فيها كشف نفسي واسمع كلام الدكتور وانتظم معاه. - مش عايز تكشف ولا تروح لدكتور؟ في فريق اسمه واعي .. على أي منصة سوشيال ميديا هتلاقيهم موجودين ابعتلهم هيساعدوك. اخر حاجه .. انت لسه صغير لسه مش عارف الدنيا فيها ايه ولا انت نفسك وراك مسؤوليات ايه .. والدنيا فيها اشكال وانواع واصناف كتير من الناس وانت اللي بتختار عايز تبقى ايه وفين .. فكر ف نفسك كمان 10 سنين وتخيل انك المفروض 26 سنة تفتكر بمستواك الدراسي الحالي هتكون قدرت تتخرج من كلية كويسه وتكون اشتغلت؟ طب تفتكر انك هتعرف تتجوز وتفتح بيت وتجيب اطفال وتكون مسؤول عنهم وانت مش عارف تكون مسؤول عن نفسك؟ طب تفتكر اصلا ربنا هيوفقك ف حياتك وانت مفيش تواصل بينك وبينه؟ فكر ف الاسئلة دي ولو مش هتعمل اي حاجه منها ف على الاقل متقفلش باب الصلاة لو بتعمل كل ذنوب الدنيا عشان ف يوم من الايام الدنيا هتوريك ان دي الباب الوحيد العدل في حياتك ومينفعش يتقفل ابدا.
تم النشر الخميس، ٨ ديسمبر ٢٠٢٢
اسمع يا ضنايا يومك فل الاول ... لو فضلت تلف كتير في الدايرة دي هيجيلك اكتئاب ومهتخرجشي منه فانت يحبيبي صلي مهما كانت الظروف حتى لو سطر وسطر المهم متسبشي الصلاه والعلاقة الي ربطاك بالله ادعيه كتير اووووي قاوم نفسك وخلي عندك اراده قوية وأوجد لنفسك هدف ودافع يخليك تكمل حياتك وتشجعك تكمل الي بدأته الرياضة والقراءة أو ممارسة الهوايات شئ اساسي وضروري فربما يوفقك ويعينك يارب وبلاش النظرة السوده ديه قوم كده وفرفش يا واااااد
تم النشر السبت، ١٠ ديسمبر ٢٠٢٢
ربنا سبحانه بيقول اى * قل يا عبادى الذين أسرفوا على أنفسهم لا تقنطوا من رحمة الله * .. مهما كانت حياتك متقنطش من نفسك ومن رحمة ربك بيك .. انت بتبطل تصلي علشان دايما متوقع انك هتبطل ف بيحصل كده خلي عندك ثقة ف نفسك وف ربنا وانوى انك تعمل الحاجة وتحافظ عليها
تم النشر الخميس، ٨ ديسمبر ٢٠٢٢
ازيك .. أتمنى انك تكون بخير قبل ما اقولك أي حاجه .. لو تقدر انك تروح لمختص نفسي يبقى افضل طبعا. ولكن خلينا نتكلم شوية في الاول في النقاط اللي ذكرتها. ليه سؤالك ملوش إجابة في الاول، ولا شايف انك مش هتقدر تنفذ الحلول اللي قولت أننا هنذكرها؟ بالنسبة للاباحية ممكن تقرأ الإجابات ديه .. https://fedni.net/q/61042885/إدمان-مشاهدة-الأفلام-الإباحيه هتساعدك كتير إن شاء الله. بالنسبة بقى لحياتك، ايه اللي وصلك لكل ده، ليه بتقسو على نفسك كده؟ وليه شايف أن كده خلاص؟ لسه مخلصتش على فكرة، انت عندك ١٦ سنة ، متخيل! انت لسه حياتك في ايدك. كتير جدا بتحصل مشاكل في الفترة ديه بالذات للشباب، وده طبيعي خاصةً في فترة المراهقة. لكن اللي مش عادي أنك تفتكر أن خلاص الحكاية خلصت بالشكل ده؟ انت ليه بتخلصها بدري كده، وايه السبب اصلا؟ ايه اللي حصل علشان توصل لكل ده؟ لكن قبل ده كله .. مهما كان اللي حصل أو حتى اللي ممكن يحصل .. انت تستاهل لسه فرص تانيه، مش معنى أنك بتقع يبقي خلاص هتستسلم وهتفضل تقع، لأ .. كلنا بنقع وبنقوم. كلنا لازم نقع ونقوم .. علشان هي ديه الحياة ليست على وتيرة واحدة، يعني مش ماشية بالمسطرة. ادي لنفسك فرصة .. ربنا عمره ما يهقفل باب توبة ف وش حد.
تم النشر الثلاثاء، ١٣ ديسمبر ٢٠٢٢
الصلاة مش مجرد رتين او شي ممكن الابتعاد عنه شرتطها الوحيد الطهارة اسمع النداء فقط ادخل اتوضي وإنسي الدنيا بالفيها اغسل كل اطرفك وطهرها روح الجامة كل ما يكون الوقت مناسب الجامع كله طاقة ايجابية مفيدة لعقلك وجسمك واهم شئ القران والذكر ده علاج كل الي انتا بتشتكي منه وشوف ايات الذكر في القران ربنا وعد فيها بالرضا والاطمئنان والسلام
تم النشر الثلاثاء، ١٣ ديسمبر ٢٠٢٢
السلام عليكم ورحمه الله وبركاته واولا اريد ان اقول ان هذه الرساله وصلتني بفضل الله واوصلك رسالتي بفضل الله وفضل من الله عليك ان تصلك رسالتي واقول لك في الاول وفي الاخر ان كل هذا من الشيطان ... والثاني وعدم وجود الصحبه الصالحه حتى وان كان الاب والام على علاقه جيده معك ام لا .....حسنا اول شيء عليه واهم شيء هو ركعتين التوبه ركعتين التوبه هذه سوف تمحو الذنوب من قلبك بالمعدل البطئ انه كل يوم بعد صلاه العشاء وتبدا بالصلاه التوبه ستقول لي ولكني لا اصلي الصلاه المفروضه واقول لك نعم صلى التوبه هي ركعتين بتوضئك وضوئك للصلاه وتقوم فيهما لربيك ستأله الهدى تذلل وتبكي افعل هذا الموضوع لمده شهر كامل وهي عباره عن انك تصفى قلبك وبعد ذلك سوف تقرا ايات من كتاب ربك عن التوبه والاستغفار واخر شيء وانا اوصيه به وهو سماع فيديوهات للشيخ *_محمد الغليظ_* وسماع برنامج ﴿وعي﴾ تستسمع من برنامج حلقه ﴿المسلسلات الاباحيه﴾ و﴿حلقه الصلاه ﴾و﴿حلقه الاغاني﴾ اريد منك ان تخبرني عليك انت بعدها جيد ام لا وتسمع تلك المقاطع دينيه التي لا تتجاوز ان دقيقتان ....إذا الاول الاقتراب من الصحابه الصالحه والصلاه التوبه القران الاستفاده من وقتك على اليوتيوب
تم النشر الجمعة، ٩ ديسمبر ٢٠٢٢
ان الله يحب التوابين ويحب المتطهرين توبة وطهارة ( خطوة بسيطة ومش حاجة صعبة التنفيذ ) التزم بده اولا عملت خطأ او ذنب او عندك احساس انك وحش ١. استغفر ربنا ٢. قوم اتوضى او اغتسل اغتسال كامل #صدقة تطهركم لما تبقي بتعمل اللى فوق دول زود عليهم ٣. صدقة تطلعها بعد كل ذنب ( الصدقة مش لازم تكون فلوس ...عمل خير ...صلة رحم...ابتسامه فى وش شخص ...جبران خاطر بكلمة طيبة ) خطوة خطوة عشان متحسيش ان الموضوع تقيل خلينا اخواتك هنا ونتابع سوا ...كل ما تستمر على خطوة تعالى اسأل على اللى بعدها...ومش هنسيبك. اكتر حاجة بتساعد هى الصحبه. انت مش لوحدك ...اتفقنا؟
تم النشر الخميس، ٨ ديسمبر ٢٠٢٢
صوته جميل جدا ، بالنسبة الفيديوهات ، ف قبل م تروح تتفرج فكر نفسك انك ممكن تموت على دا وساعتها هتفول لربنا اي ، حاول تبعد عن التلفون شوية والهي نفسك ف مذاكرتك وافتخر حلمك وحطه قدامك اكتبه ف مكان تواجدك ، وانت مع القران والصلاة نفسيتك هتبقى احسن ، واقرا كل يوم ورد من القرآن ،
تم النشر الأربعاء، ١٤ ديسمبر ٢٠٢٢
اول حاجة عشان تصلي لازم تكون جاهز دايما للصلاة ، تكون متوضي دايما ، تبقى عارف مواعيد الصلاة وقبلها على حسب بُعد المسجد عنك تحدد ميعاد تنزل فيه ، يعني لو المسجد قريب منك تنزلي قبلها بخمس دقايق او شئ من دا ، بس لازم تكون متوضي دايما عشان متكسلش ، اهم شئ دا ، واسمع قران بصوت بتحبه ، ف عبد الرحمن مسعد
تم النشر الأربعاء، ١٤ ديسمبر ٢٠٢٢
حصلت ابتلاءات شديده جدا... لأن فعلا مينفعش حد يسلك الطريق لربنا وهو متسخ بلوثات الذنوب والشهوات... اللي يرجع لربنا لازم يكون نضيف.. ودا اللي حصل... نزلت الإبتلاءات شديده وبعضها لا تطيقه الجبال.. تحملت، عافرت، كملت،....... وصلت
تم النشر الخميس، ٨ ديسمبر ٢٠٢٢
اللي حصل اني جات فتره كرهت نفسي من كتر الذنوب والمعاصي.. حسيت اني لازم انقل نفسي لبيئه نقيه.. حطيت نفسي وسط الملتزمبن بدأت اسمع كلام خطب ودروس.. قربت من ربنا.. دعيته بإلحاح وتضرع وبكاء انه يفرج عني اللي انا فيه... بعد كده جات الابتلاءات وكأنها جات عشان تطهرني من اللي فات وتهيئني لحياه أجمل... تابع
تم النشر الخميس، ٨ ديسمبر ٢٠٢٢
ابتداءا عايز أقلك إني قربت أكمل 37 سنه وانا حاليا متزوج متلزم الى حد كبير ولله الحمد ملتحي..عندي 3اطفال ماليين عليا الدنيا..المهم عايز أقلك موضوع الاستقرار والالتزام اللي انا فيه دلوقني مجاش من فراغ..أنا مريت بظروف أصعب من اللي انت بتحكيها وعملت كبائر لا يمكن تتخيلها..اللي حصل بقى..تابع في التعليق الجاي
تم النشر الخميس، ٨ ديسمبر ٢٠٢٢
حاول تقرب من ربنا وأغلب شيطانك وكل شىء هيبقى تمام
تم النشر الأربعاء، ١٤ ديسمبر ٢٠٢٢
وكرر كل ما ترجع للذنب رسول الله صلّى الله عليه وسلم هو الي قال. كدة حتي ان تملل انت من الذنب ولا يمل الله من المغفرة انه هو الغفور الرحيم
تم النشر الثلاثاء، ١٣ ديسمبر ٢٠٢٢
اعمل الذنب وتوب عنه واستغفر بنيه الابتعاد
تم النشر الثلاثاء، ١٣ ديسمبر ٢٠٢٢
قليل جدا من الشباب الي مختلف عنك لا وكمان في شباب من سنك دخلت دائرة الدخان ولم تخرج منها وهو ذنب ايضا كبير انتا كل الموضوع محتاج حاجة تخرج فيها طاقتك وتفكيرك حاجة ليها مستقبل مناسب لاي شب يحقق من خلاله النجاح يعني مثلا انتا راجل العب رياضة ولياقة في انواع كتير من الرياضات فيها لياقة بدنيه وعقليه أيضا
تم النشر الثلاثاء، ١٣ ديسمبر ٢٠٢٢
بداية احب اقولك ان الشيطان عاوز يوقعك في اليأس دايما لكن لو انت فكرت شوية هتلاقي ان كان في الاف الناس واقعين في خطية زيك بالظبط لكن بردة لو تأملت شوية هتلاقي ربنا دايما مستنيك ودايما فاتح باب التوبة اوعي اليأس ينسيك ان وراك ربنا مادد ايدة مستنيك ترجع وفي اي لحظة فاتح باب رحمتة ربنا يكون معاك
تم النشر السبت، ١٠ ديسمبر ٢٠٢٢
متسبش الصلاه نهائي... ترك الصلاه هو سبب العقوبات اللي انت فيها... خليك قوي.. خليك راجل.. اهزم نفسك واهزم شيطانك
تم النشر الخميس، ٨ ديسمبر ٢٠٢٢
حاسس بكسل أو بنشاط... صلي..
تم النشر الخميس، ٨ ديسمبر ٢٠٢٢
صلي على أي وضع.... حاسس بخشوع أو مش حاسس.. صلي
تم النشر الخميس، ٨ ديسمبر ٢٠٢٢
وحاجه صغيره بقولهالك... صلي..
تم النشر الخميس، ٨ ديسمبر ٢٠٢٢
لعرض السؤال في فدني اضغط هنا