ازاي اتعامل مع صاحبه كانت بنسبالي اكتر من اخت وكنت بحبها اكتر من نفسي صراحه واي حاجه بتعوزها بحبها بس ف نفس الوقت هي مكنتش بتديني الاهتمام اللي عايزاه أو تحسسني اني فرقالها حاولت كتير أنساها واتعامل عادي بس هي موجوده جوايا لسه ودايما ف بالي ف اعمل اي عشان أنساها أو تفكيري فيها يقل ؟؟!..
انتي قولتي جملة خطيرة جدا في كلامك وع ما اعتقد نمط علاقاتك مع الناس عميق شوية انتي قولتي انك بتحبيها اكتر من نفسك، طيب هو ده معقول؟ ليه تحبي حد اكتر من نفسك؟ ايه هو السبب وليه؟ بتحبيها مختلفناش حبيها زي ما انتي عايزاه، بس الفكرة هنا خطيرة ليه بالذات ... انك لو علاقاتك كلها بالشكل ده، او هتبقى بالشكل ده ف الموضوع هنا محتاج له وقفة .. انك بتدي اهتمام اوي وديما موجودة، وبتحبيها اكتر من نفسك مع انها اساسا مش بتعمل ليكي نفس المجهود اللي انتي بتعمليه. انا مقدرش اعتب عليها واقول ان هي كانت المفروض تعمل ده من باب التقدير او من المبحة لان بصراحه الموضوع ده لازم يجي كده من القلب للقلب. لكن هقولك انتي اللي غلطانه .. لانك كنتي لازم تعملي stop ليه ؟ علشان العلاقات هات وخد .. انتي بتدي اهتمام انا كمان هدي، انتي بتدي وقت انا كمان هدي، انتي هتبقى موجودة هبقى موجودة. لكن لو انا هبقى بعمل كل ده وانتي مش هتعملي يبقى فين العلاقة؟ كده انا بستنزف داخليا مش بعمل حاجه غير اني بدي وخلاص بدي وبس.! في الحقيقة برضه سؤال النسيان ده .. ده مش موجود او مش متاح .. يعني ايه برضه؟ احنا بشر مش هقولك على خلطة سحرية وبزرار واحد تعمل oFF لأ مش هتيجي كده ... طيب امال هتيجي ازاي؟ هتيجي بأنك تدركي الاول وتفهمي العلاقات الصحية لازم تبقى ازاي؟ وتعرفي ان ديه مش الحد المناسب اللي ينفع تكوني معاها، وانك تعرفي ان زي ما هتدي لازم تاخدي. اما بقى عن السلوكيات .. تبدأي تتعرفي على ناس جديدة، تنزلي نشاطات متكنش هي موجودة فيها، تبداي تعملي حياة ليكي .. وحتى لو عايزة تقعدي لوحدك اعملي نشاطات ليكي مع نفسك .. واحدة واحدة الموضوع هيقل تدريجا مع الوقت، بس الاهم لازم الاول تفهمي اكتر عن العلاقات، وتدركي انك كنتي في علاقة مكانتش صحية ليكي وده اهم جزء.
تم النشر السبت، ٢٤ يونيو ٢٠٢٣
أول حاجه كده و ديه أساس (الدنيا لا تقف على أحد) ... صحبتك أو كانت صاحبتك ياما ناس بتروح و بيجي بدالهم 10 أيوا بس ديه كانت best friend و كنت بعزها أوي و كان ليها مكانه خاصه إزاي هقدر أنساها ؟!!!! مين قالك انسيها؟ ولا واحد هيقولك انسيها كلو هيقولك اشغلي وقتك و أنا الصراحه كنت هقولك كده برضوا لكن من وجهة نظري تتعلمي من الحصل تعرفي إن مش شرط اللي بنعتبروا فى مكانة اكتر من مكانتوا هيفضل معانا طب أنا أعمل إيه ؟ ولا حاجه لو عايزة تعملي أوي و شايفه نفسك محتاجه إنك تنسيها و لو ليوم مفيش مشكلة لو المادية تسمح روحي أى مكان و أخرجي و رفهي عن نفسك بلاش خروجات من بيتك و اتفرجي على فيلم بلاش أفلام اقرأ كتب بلاش كتب قريبتك اللي بقالك مده مكلمتهاش رني عليها و اتفقوا على وقت تتقابلوا فيه أهم حاجه اللي تعمليه ميكنش حاجه كانت مشتركه بينك و بنها و حتى لو مشتركه لازم تفهمي نفسك إنها مبقتش صديقتي أو مبقتش الشخص اللي كنت بحبوا و خلاص الموضوع خلص وبس ده رأي الشخصي.....
تم النشر السبت، ٢٤ يونيو ٢٠٢٣
قدامك تلات حلول انا دائما بعمل كده بختار على حسب الموقف يا تبعدي عنها نهايئ يا توجهيها بكل حاجه يا تسامحيها بجد من جواكي وتعملي معاها زى اى شخص عادى
تم النشر السبت، ٢٤ يونيو ٢٠٢٣
هل هى مش مهتمه خااالص ولا مش مهتمه بابشكل اللى انتى عاوزاه ؟ ده يفرق كتيير اصلا
تم النشر الاثنين، ٢٦ يونيو ٢٠٢٣
حاولي تفكري فيها بطريقه مختلفه، وبعدين شوفي ادوارها معاكي اي ف الحياه.. وواحده واحده نفسك هي اللي تفوقك وتقولك بلاش هبل ودوري ع مصلحتك
تم النشر الاثنين، ٢٦ يونيو ٢٠٢٣
دايما في جملة كده بتقول لما تعمل حاجه متستناش مقابل.. و أنا بصراحه ضد الجملة دي إلا في حالة لو كنت بعمل خير ساعتها مش هستنى مقابل ، لكن أي حاجه تاني هستنى مقابل عادي جدا.. مينفعش ادي مشاعر و مستناش مقابل ادي اهتمام بدون مقابل ، ده اصلا شئ سئ طحن انك تفضل تدي بس من غير ما تجني حاجه من ورا إللي بتعمله ده.. أنا في ضهرك انهارده عشان لما احتاجك جنبي الاقيك.. أنا بعاملك باسلوب كويس عشان في المقابل ألاقي نفس المعامله.. إنما إني أعيش في المجمل بدي بس من غير ما استنى مقابل ده بالنسبالي غباء غير مبرر الحقيقه
تم النشر السبت، ٢٤ يونيو ٢٠٢٣
بصي انا شايفه من وجهة نظري انك تتصاحبي ع واحده تانيه تلاقي منها اهتمام وتحبيها اكتر من التانيه،تخرجو سوا وتقضو مع بعض اغلب الوقت
تم النشر السبت، ٢٤ يونيو ٢٠٢٣
كنت داخلة اكتب نفس الكلام بس هي اتخلت عندي وبقي عندها صاحبة تانية اما بشوف صورهم سوا والكلام اللي كاتبينه قلبي بيوجعني ومش قادرة اطلعها م تفكيري الاحساس وحش ربنا يعينا ونتخطي كل ده م غير اي اذي نفسي لينا
تم النشر السبت، ٢٤ يونيو ٢٠٢٣
حاولي انك تتجاهليها وكل اما تشوفيها افتكري إنها مش مدياكي اهتمام وحاولي انك تشغلي تفكيرك ف حاجه بتحبيهااا عشان متفكريش فيها وصاحبي غيرهاا
تم النشر السبت، ٢٤ يونيو ٢٠٢٣
لعرض السؤال في فدني اضغط هنا