مامتى ديما حاطانى ف مقارنة مع اى حد وديما شايفة انى انا الوحشة وان فلانة احسن منى وفلانة بتلبس احسن منى وفلانة بتجيب امتياز وفلانة اشتغلت مش عارفة اى ديما اجى اشترى لبس مثلا تقولى مبتعرفيش تلبسي وذوقك وحش ومش عارفة مين كانت لابسة مثلا دريس متعرفيش تلبسيه وانا لبسي عادى وكويس وبتبقا البنات كلها لابسين زيه بس هى مبتشوفش حد اصلا ولا بتطلع برة مقتصره ع المنطقة اللى احنا فيها وانا بفضل اقولها انا اللى بخرج وبروح الجامعة وبشوف البنات لابسين اى ومش شرط عشان حد لابس حاجة حلوة الناس كلها تلبس زيها كل واحد ليه ذوقه وانا بختار الحاجة اللى بتعجبنى وبرضو كل م اشترى حاجة تعمل كدا وديما محسسانى انى قليلة وان كذ احسن منى تفضل برضو تزعق وتقولى انتى مبخرجيش ولا عارفة حاجة وانطوائية وغبية وانا ببقا عارفة عادى حاجات كتير ومش لازم اقولها يعنى ومش شرط برضو اكون عارفة كل حاجة انا مبعرفش اتصرف معاها بس ديما اى موضوع من دا لازم ينتهى بخناقة ونتخاصم وانا بزعل وهى من النوع اللى مبيبطلش كلام وتعليق على كل حاجة ومبتسكتش وتعيد ف نفس المواضيع كل مرة وانا مش عارفة اتعامل ازاى وانا مبحبش اتقارن بحد لان كل واحد ليه شخصيته وقدراته وكل واحد مختلف عن التانى مش كل الناس زى بعضها
انتى جميلة ومميزة حاولى تطورى من نفسك وانجحي واستمري اكتر اقصر طريق يبعدك عن المشتتات و يارب تكوني بخير ومميزة وممتالقة وف افضل نسخة منك ومتمحيش لاي حد انه يهز ثقتك بنفسك ✌🏻 طبعا المشكلة الى بتقوليها دي صعبة وخصوصا لما تكوني مع الشخص ده ف مكان واحد ولكن ممكن نسيب المشكلة ونركز ونفكر وتشوفي من وجهة نظرك ايه الحلول الى ممكن تخليكي فى نقاشات اقل حدة مع مامتك لحد يقل تركيزها ف النوع ده من المشكلاات مامتك محتاجة ثيرابست عشان يشوف ايه الذاكرة الاليمة عندها الى بتوصلها للتعامل معاكي بالطريقة. دي عشان تتشافي ذاتيا وتكون طريقتها افضل ومريحة اكتر للي حواليها اتمنى اكون افدتك وشكرا لنضجك ووعيك لسعيك لحل المشكلة
تم النشر الأحد، ٢٨ أبريل ٢٠٢٤
لو مستنية نصيحة او طريقة تخلى ماما تغير طريقتها يبقى هتحسى ان المشكلة ملهاش حل لكن خلينى انبهك لنقطة مهمة جدا لما الام تفضل بتتكلم على نفس النقطة وبنفس الطريقة ومتقتنعش بكلامك...اعرفى ان كلامك معاها عموما قليل ..محتاجة انتى تبدأى تدى لماما مواضيع اخرى تتفاعل معاكى فيها وبالاخص الحاجات اللى تروحيلها وتعملى نفسك محتاره فيها وان هى الوحيدة اللى هتفيدك وتأكدى عليها انك هتاخدى برأيها ( حتى لو كده وكده ) احكيلها عن مواقف عدت عليكى فى يومك ...موقف فى المواصلات او حاجة قرأتيها او فكرة جاتلك .واسأليها كتييير الاهم بقى : متتفاعليش مع انتقادها ..اسمعيه وبس ...عارفه انك هتتأثرى وده طبيعى ان كلامها يزعلك ...بس لو لو زودتيه بجدال وكلام اكتر هيزعلك اكتر . اسمعى منها وقوليلها حاضر الحركة اللى تقلل من حدة انتقادها ونسبته تقل : انك تقولى انتى الكلام قبل ما هى تقوله يعنى مثلا : بصى يا ماما انا اشتريت ايه ..رغم انى عارفه انى طبعا على قدى ومش بعرف انقى اللبس اوى بس هو عجبنى واشتريته ( ببساطة هى مش هتلاقى حاجة تقولها فمش هتقول ) وانتى مش هتسمعى الكلام على لسانها فمش هيوجعك اوى تانى وخصوصا انه كلام اصلا متكرر ..انتى هتعملى ده حيلة وقائية بس واخيرا : صبرك عليها هو من ابواب البر ..ان شاء الله ثواب وفضل كبير وتيسير فى حياتك بسبب البر ده
تم النشر الثلاثاء، ٣٠ أبريل ٢٠٢٤
فيه حاجتين في كلامك:- اول حاجه ل اما والدتك بتعمل اسقاط عليكي بشكل لا ارادي، يعني انتي قولتي انها مش بتخرج ومش بتعمل اي حاجه وحياتها مقتصرة عليكم وبس وشغل البيت. وفي النفس قالت ليكي جملة الا وهي (انتى مبخرجيش ولا عارفة حاجة وانطوائية وغبية). الجملة ديه والدتك مش بتقولها ليكي، بتقولها لنفسها .. لانها هي اللي في الحياة ديه، ونفسها تطلع منها بشكل ما، وبتقول الكلام ده بشكل لا ارادي عليكي انتي. زي مثلا واحد يبقى كداب جدا، لكنه غير معترف بهذا، ويبقى قدامه صاحبه فيفضل يقوله انت كداب لصاحبه. مع انه هو مش الكداب .. ده بيعمل اسقاط عليه بشكل لا ارادي، بيجيب اللي فيه في غيره. ف والدتك بتعمل نفس الكلام معاكي. وده للاسف سلوك غير سوي، ف حاولي بدل ما تزعلي عليها تشفقي على حالتها. لان اكيد في اللي في حياتها اللي وصلها لكده. تاني حاجه وده استبعده شوية، ولكن هقوله ليكي على اي حال. بعض الاهالي بتتعامل مع ابنائها بنظرية التشجيع السلبي، يعني اقولك شوفي صاحبتك اشطر منك ازاي، علشان اخليكي تغيري منها وتبقى اشطر منها. هما بيبقوا عايزين ابنهم يبقى كويس ولكن بطريقة معاكسة غير الطريقة المعتادة اللي هو افضل ادعمك واقولك كلام حلو. ده اسلوب متبع كتير من الاهالي، وللاسف الاسلوب خطأ تماما، لانه نتيجته بتكون مش كويسة على ناس كتير. علشان كده ركزي في النية بتاعتها بدل الفعل. يعني نتيها خير ولكن فعلها سئ. ف ضعي تركيزك على نيتها وليس فعلها.
تم النشر الأحد، ٢٨ أبريل ٢٠٢٤
انا فاهمة اد ايه ده احساس بيوجع جدا بالذات لما المقارنة بتيجي من الأهل، اقعدي اتكلمي مع ممتك و فهميها ان ده بيدايقك و بيجرح مشاعرك و هي لو جربت نفس الاحساس هتتدايق و اطلبي منها ان هي تتفهم ده و تشجعك مش تقارنك بحد. في نفس الوقت خليكي واثقة من نفسك و متخليش ده يهدم من ثقتك في نفسك انتي جميلة زي ما انتي. ممكن تتكلمي مع حد كبير بتثقي فيه باباكي أو حد تاني، أو ممكن تستشيري حد أو أخصائي يساعدك على التعامل مع الموقف ده.
تم النشر الأحد، ٢٨ أبريل ٢٠٢٤
لعرض السؤال في فدني اضغط هنا