تعبت من كتر النقاشات مع اهلي الي من غير فائده تعبت من التوضيح والتبرير لأبسط الاشياء
مهما شرحت انو انا متضايقه من كذا ومهما اتكلمت معاهم بس بدون فائده علطول مشاكل علي اتفه الاشياء
بحس اني مينفعش ابقي مبسوطه يوم واحد
يوم بس
حتي لو كان يوم كويس لازم تحصل مشكله تنكد عليا
بحس انو مينفعش يوم بعدي كده من غير مشاكل
تعبت
من الضغوطات من كل ناحيه مش عارفه استعيد نفسي ولا اتعالح من صدمات الماضي
تعبت من الشك وعدم الثقه
من التشكيك فيها واني انسانه فاشله
تعبت من البربر والتوضيح للناس
تعبت من الناس والبشر
البشر هم اسوء شي في العالم
افتكري كويس انه هتتحاسبي لوحدك فمتخليش الضغط منهم يضيعك .. اعتزلي المؤذي ولكن علي حسب لان اهلك لو بباكي ومامتك لازم تحاولي توصلي معاهم لنقطه تواصل وتبريهم وتصبري عليهم وبرضو تقدري تحطي حدود لخصوصياتك وتنشغلي بنجاحك لو اعمامك و اخواتك فمش عليكي الا الصله والود وفحدود وجايز حياتك فيها تحكم منهم انا برضو مش شايفه الصوره كامله علي حسب سنك وامكانياتك لو تقدري تستقلي اعملي ده بس نصيحه بهدله الاهل اهون ساعات من بهدله الغريب ,,وبرضو علي حسب مش مقياس ابدا. بس مش حباكي تزعلي او تنصدمي اكتر واعرفي ان من اعظم الابتلاءات هي ابتلاء الاهل واصبري عليه ثوابه من عظمته واتعلقي بربنا وثقي فيه فقط هو السند ليكي وصحتك بعد كده فهونيها علي نفسك ادعي كتير ربنا يهدي الحال وحاولي تشوفي قصص تانيه لاهالي اصعب فتستشعري شويه فضلهم, مش مسأله مقارنه ولكن هي بتسمي بترقيق القلب عشان التفت للنعم اكتر من النقم
تم النشر الجمعة، ١٧ مارس ٢٠٢٣
طيب مش شايفة انك جاية على نفسك اوي يعني ايه اللي يجبرك انك توضحي وتشرحي وتبرري لكل الناس الحاجة اللي عملتيها ديه عملتيها ليه وازاي؟ الواحد لو فضل مركز مع كل حد في انه يشرح له انا عملت ليه الحاجة الفلانية وعملتها ازاي وليه عملتها هيتعب، ومش لازم الكل يبقى موافق اساسا على اللي انتي بتعمليه، مهما حاولتي تقنعي اللي حواليكي، مش لازم الكل يوافق ع حاجة فهماني! وممكن تقولي ايه هي صدمات الماضي اللي تعبتي منها؟
تم النشر السبت، ١٨ مارس ٢٠٢٣
طب ما احنا بشر واحنا كمان متعبين بشكل ما للى حوالينا ده شىء طبيعى جدا. اقولك بنتعب من الناس ليه بقي. لما يكونوا هما الاتجاه اللى احنا بنبصله فى كل حاجة فى حياتنا. انا بلبس الطقم اللى بحبه وباصص على الناس هيشوفوه ازاى.....( طب وانا بعمل ليه كده) انا بذاكر وانجح ...وانا عينى وقلبي متعلقين بكلمة برافو والسقفه منهم ...( طب وبردوا ليه كده) فى احتياج جوانا اسمه الاحتياج للظهور ( انى اكون متشتاف ) زى الاطفال كده ...يفضل يقول بصى يا ماما ..شوفينى وانا بتشقلب...شوفي باكل بالمعلقة لوحدى ازاى. كلنا بلا استثناء محتاجينه ....بس المشكلة لما الاحساس ده يتحول لفكرة انى عاوز موافقة اللى حواليا دايما على اللى بعمله واكون بتأثر جدااا لو ظهرت فى عينيهم مختلف والاختلاف هما وصفوه بوصف وحش. ده اللى بيخليكى مثلا بتميلى للتبرير المبالغ فيه. لو عاوزة تكونى مبسوطة...زودى ثقتك فى نفسك ...بانك تتقبلى كل اللى بتحبيه وتكرهيه ومتزعليش من اللى مختلفين معاكى. المشاكل ممكن تقررى تعديها....بنفسك ..بانك تقولى كلمة معلش لنفسك قبل ما حد يقولها. اوعى تكونى فاكرة ان اليوم الحلو عشان يتسمى حلو لازم يكون كله بدون ولا موقف وحش....ابدا اليوم الحلو هو اللى كان اغلبه حلو واقله وحش اليوم الحلو اللى انا عملت فيه او اتعمل معايا موقف واحد ع الاقل اعطانى شعور حلو. انتى تقدرى تستشعرى الحلو وتكبريه جواكى او تستشعرى الوحش وتركزى عليه اوى .. النتيجة هتكون حسب اللى انتى جبتيه تحت الميكرسكوب بتاعك . لو عندك مشاكل فى الماضى مش قادرة تتخطيها لوحدك استعينى بحد كبير وثقه او باخصائى نفسي...النهاردة بتاعك وبكرة بتاع ربنا ....وامبارح بتاع امبارح ميلزمش حد اصلا.
تم النشر السبت، ١٨ مارس ٢٠٢٣
أشعر بالأسف لمعرفتي بمدى تعبك وأنك تشعرين بالإحباط والتعب من الضغوطات التي تعانين منها. وأحيانًا يكون من الأفضل الابتعاد عن بعض الناس أو بعض العلاقات التي تسبب لك الضغوطات الزائدة، لذلك حاولي التركيز على الأمور التي تجلب لك الأمان والمزيد من الطاقة الإيجابية. لا تدعي هذه الأمور تؤثر بشكل سلبي على مزاجك وعلاقاتك القادمة ، حاولي ان تسطري لنفسك نقاط القوة الخاصة بك واستمري في بناء تلك الصفات. نصيحتي هي أن تجعلي اهتمامك على نفسك واحتياجاتك لأن الناس والعلاقات سوف تتغير بمرور الوقت، لذا حاولي التفكير في الطرق التي تستطيعين بها العثور على الراحة لنفسك واستعادة الطاقة الإيجابية والتفاؤل في الحياة.
تم النشر الجمعة، ١٧ مارس ٢٠٢٣
ممكن توضحيلي صدمات الماضي كانت عباره عن ايه وهل المشاكل دي معاكي بس ولا مع افراد الاسره كلها يعني اخواتك كمان بيعانوا منها؟
تم النشر السبت، ١٨ مارس ٢٠٢٣
لعرض السؤال في فدني اضغط هنا