محتاجه دكتور نفسي يساعدني
انا بنت عندي 23سنة انا مش شخصية اجتماعية وعندي صحاب كتير بقالي 5 سنين عندي خوف مش طبيعي من الناس او اني اتعامل معاهم لاني اتأذيت كتير جداً جداً ودايما بفكر ف غيري ازاي يكون مبسوط وعمري ما فكرت في نفسي
اتعرضت للتحرش والاهانة وضرب كتير جداً من والدي وحاليا انا اوضتي هي ملجأي الوحيد بعيط طول الوقت واضحك لما حد يكلمني ف البيت ولا كأني كنت منهارة وصلت لدرجة ان اي حد بيقولي كلمة وحشة انا بنهار وبصرخ وبقيت بنام ساعتين او تلاتة ف يومين بس بقيت بخس بطريفة ملحوظة جداً
ودايما عندي عدم تركيز وعدم ثقة ف كل الناس واوقات بشك ف نفسي ان عملت حاجه وانا مبكنش عملتها غير النسيان والسرحان طول الوقت والسجاير الكتير اللي بقيت بشربها واوقات كحوليات انا حتى طفولتي كانت سيئة انا بقعد بالشهور ف البيت محدش بيشوفني خالص وبنزل للضرورة فقط انا نفسي اكون انسانة طبيعية واتخطى كل حاجه وحشه حصلت لي ومؤثرة فيا لحد دلوقتي من صحاب واهل نفسي أتخطى اتمنى حد يساعدني
صباح الخير.. حابب اقلك ان احساس وجعك وألمك ومشاعرك كلها حقيقية ومفهومة جدا.. وإنتي مش لوحدك في اللي بتحسي بيه، واضح إنك مريتي بكتير من التجارب الصعبة اللي خلتك تفقدي الثقة في نفسك وفي الناس، وده طبيعي بعد كل الأذى اللي عديتي بيه.. لكن اللي مش طبيعي هو إنك تفضلي في الدوامة دي من غير ما تاخدي خطوة للخروج منها.. بدايه من الصدمات اللي مريتي بيها واضح إنك تعرضتي لإساءات نفسية وجسدية أثرت عليكي اوى... أي شخص يمر بالحاجات دي لازم يحس بالخوف وفقدان الثقة والانعزال.. القلق والاكتئاب، النوم القليل، التفكير المستمر، وعدم القدرة على التركيز ، كلها أعراض اكتئاب وقلق شديدين.. العزلة والخوف من الناس انتي كنتي اجتماعية وعندك صحاب، لكن دلوقتي بقى عندك خوف من التعامل مع الناس، وده طبيعي بعد الأذى، لكن مهم تعالجيه عشان ترجعي لحياتك الطبيعية.. الفراغ والتشتت ،النسيان، والسرحان، والتدخين الكتير كلها مؤشرات على إنك حاسة بفراغ داخلي وضغط نفسي كبير.. شكك في نفسك، وإحساسك إنك غلط حتى لو ما عملتيش حاجة غلط، ده ناتج عن تأثيرات نفسية من الماضي معلمة فيكى... طب نعمل اي اول حاجة.. لازم تشوفي دكتور نفسي يساعدك في اللي بتمري بيه، لأن اللي عندك مش مجرد حزن عادي، ده اضطراب نفسي محتاج علاج ومساندة..ممكن تدوري على دكتور نفسي كويس،. وفيه جهات بتوفر استشارات نفسية على النت زاى هنا فى خبراء فدنى أو في جمعيات دعم نفسي.. تانى حاجة لازم ترجعي ثقتك في نفسك خطوة خطوة انتي مش ضعيفة، انتي قوية لأنك عديتي كل ده ولسه بتحاولي... هاتى ورقة وقلم واكتبى حاجات حلوة فيكى وفكرى كتير لحد ماتلاقى.. ماتلوميش نفسك على حاجة مش ذنبك، وما تكرهيش نفسك بسبب اللي مريتي بيه... ابدأي تعيشي حتى لو بالتدريج.. مش لازم فجأة تكوني اجتماعية تاني، لكن ابدأي تخرجي من البيت حتى لو لمشاوير بسيطة... حاولي تعملي حاجات بتحبيها أو تكتشفي حاجة جديدة ممكن تكون مصدر سعادة ليكي... قللي العزلة تدريجيا، حتى لو بكلام بسيط مع حد تثقي فيه.. لازم تحاولي تقللي التفكير السلبي...لما يجيلك تفكير سلبي أو وساوس عن نفسك، قولي لنفسك: "دي أفكار مش حقيقية، وده مجرد تأثير الماضي".. لو حسيتي إنك بتضيعي وقتك في السرحان والتفكير السيئ، اشغلي نفسك بأي حاجة حتى لو كانت بسيطة زي تلوين، كتابة، أو حتى مشاهدة حاجة مفيدة او فيلم او اى نشاط تشتتى بيه ذهنك.. لازم تتأكدى ان السجاير والكحول مش حل، بالعكس هي بتديكِ إحساس مزيف بالراحة وبتخليكِ أسوأ على المدى البعيد حاولي تقللي منها تدريجيا، واستبدليها بحاجات تانية تخفف التوتر.. فوقى لنفسك ومتسبهاش تضيع منك.. عاوز اقلك حاجة انتى مش المشكلة، انتي النتيجة لكل اللي مريتي بيه، وده مش ذنبك. اللي سببلك الاذى مش هو اللي هيحدد حياتك، انتي اللي تقدري تقرري إنك تقومي تاني. الحياة مش دايمًا عادلة، بس دايما فيها فرصة إننا نبدأ من جديد.. ماتستسلميش، لأنك تستحقي تكوني بخير، ولو حد قالك غير كده، هو الغلط مش انت.. انتى مش لوحدك، فيه ناس ممكن تساعدك، بس أهم حد لازم يساعدك هو إنتي. أول خطوة هي إنك تؤمني إنك تقدري، والباقي هييجي مع الوقت... لازم تواحهى خوفك متهربيش منة وتوبى واستغفرى الله اول حاجة.. اهتمى بنومك بأكلك بشربك بجسمك بضحكك بسعادتك .. عيشى حياتك بالى تحبية.. وعافرى مع نفسك
تم النشر الأربعاء، ٢٩ يناير ٢٠٢٥
عزيزتي، أشعر بمعاناتك وأتفهم ما تشعرين به من قلق وتوتر نتيجة التجارب الصعبة التي مررتِ بها. إن فقدان الثقة في الآخرين والخوف من المجتمع يمكن أن يكونان نتائج طبيعية للتجارب القاسية، مثل التحرش والإهانات، والأذى الجسدي والنفسي. من المهم أن تدركي أنك ليست وحدك، وأن هناك أمل في التعافي والتغيير. أولاً، أوصي بشدة بالتوجه إلى طبيب نفسي مختص. العلاج النفسي يمكن أن يساعدك في التعامل مع مشاعرك وكسر الأنماط السلبية التي تؤثر على حياتك. قد تجدين في العلاج فرصة للتعبير عن مشاعرك، وفهم نفسك بشكل أفضل، وتعلم أدوات جديدة للتعامل مع القلق والخوف. ثانياً، من المهم أيضا أن تقومي بإيجاد نشاطات تساعدك في إعادة بناء ثقتك بنفسك وتجعلك تشعرين بالتواصل مع الآخرين بشكل آمن. يمكنك البدء بأنشطة بسيطة، مثل الكتابة عن مشاعرك، أو ممارسة هوايات تحبينها، أو الخروج للتواصل مع الطبيعة. تذكري دائماً أن الشفاء يستغرق وقتًا، لكن بوجود الدعم المناسب والعناية بنفسك يمكنكِ الوصول إلى حالة أكثر استقرارًا وراحة. لا تترددي في السعي للمساعدة التي تحتاجين إليها. لك أطيب التمنيات بالتعافي والتحسن.
تم النشر الأربعاء، ٢٩ يناير ٢٠٢٥
انتي نيتك صافية وواضح انك بتعاني فعلا وبتعيشي الألم أختنا اكيد في أمل ومشكلتك بسيطة والماضي راح وانتي دلوقتي تستاهلي حياة أفضل أبوكي الظالم النرجسي هو سبب مشاكلك والحل والعلاج موجود البيئة أذى نفسي وجسدي من نرجسي تحرش للأسف الإهانة والضرب فقدان الحنان من مصدر الحنان عدم الحصول على الإحترام الكافي عدم وجود الأمان في الطفولة طفولة عذاب المشكلة العزلة خوف من الناس وعدم ثقة تفكير في اسعاد الغير ونسيان النفس عدم رحمة النفس التوتر الشعور بالذنب عدم الراحة وكره النفس بكاء طوال الوقت والضحك مع الناس انهيار وصراخ عند ابسط كلمة وحشة الخسسان عدم تركيز شك في النفس السلوك قلة النوم إدمان التدخين أو الكحول الأفكار أنا انسانة وحشة أنا مدمنة وسيئة محدش هيتقبلني ليه أبوي كدا وباقي البنات ابوهم طيب انا مخلوقة عشان اتعذب انا مستحقش الحب ولا أستحق حاجة الحل يا أخت خذي نفس عميق واعرفي اننا دلوقتي غير زمان دلوقتي اي حاجة سهل نوصل لحلها عن طريق التلفون الماضي راح ووالدك راح بس لسة ذكرياته في مخك لسة كلماته وتعابير وجهه الغاضبة وضرباته وصفعاته وشتائمه والمشاهد العنيفة لسة في مخك وانتي بريئة من أفعال هذا القبيح انتي انولدتي على الفطرة ملكيش أي ذنب بس هو اللي فيه العقد النفسية ........... باختصار الوالد شخصية نرجسية عنده عقدة نقص فبيعوض النقص اللي جواه بأنه يزعق ويضرب عشان يثبت قوته وجيتي انتي ضحية عايزك دلوقتي تبصي حواليكي • هل دلوقتي الوضع مستاهل زعل وهو بقا ماضي؟ •انتي تستحقي حياة أفضل .............. أول خطوة وأصعب خطوة في حل أي مشكلة هي التقبل تقبل كل اللي حصل من يوم ولادتك فالصدمات بتدي خبرات .............. مشكلتك باختصار انه خلاكي تاخذي فكرة سلبية عن نفسك وانك تستاهلي الضرب والشتم فاللي هنشتغل عليه ببساطة انك تقييمي فكرتك عن نفسك من جديد بصي لإيجابياتك •انتي رغم اكتئابك بتبتسمي في وش الناس •انتي انسانة ذوق مش عايزة حد يزعل ويذوق اللي انتي شربتيه •انتي صابرة واستحملتي ايام ميستحملهاش رجالة كبار •انتي جاية بتدوري على الحل ومش عاجبك الحال السئ •في غيرك بيتعرضوا للأذى فبينتقموا إنهم يأذوا اللي حواليهم بس انتي لا قفلتي على نفسك ومأذيتيش حد ده اللي انا استنتجته فما بالك باللي جواكي انتي من خير ............. تاني حاجة لازم تهتمي بنفسك وترفهي نفسك وتعطفي على نفسك اخرجي خروجة حلوة كدا بس متهتميش للناس ونظراتهم فده وهم في البداية لأن لكي مدة مخرجتيش ............ قوي علاقتك بعائلتك فهم مصدر الإحترام والأمان ............ لازم تفضفضي زي ما كتبتي هنا عالبرنامج اكتبي أكثر طلعي اللي جواكي ............ ابني عادات صحية زي الرياضة النوم الكتابة القراءة وغيرها...... وشوفي حياتك ومستقبلك ........... أخيرا أهم حاجة هي انك تقولي يارب بصدق ادعي ربنا موجود وشاهد على كل اللي حصل وبإذن الله هيكتب لك الجنة بالعذاب اللي انتي شفتيه ده طريق التعافي وفي نصه اعراض انسحابية خصوصا بسبب الكحول والدخان لكن اصبري واوعي تفقدي الأمل يا أخت اوعي تفقدي الأمل ربنا يصلح حالك ويسعدك يارب قومي وغيري حياتك والقادم أفضل
تم النشر الخميس، ٣٠ يناير ٢٠٢٥
السلام عليكم ورحمه الله وبركاته. طبعا كل اللي انت حاسه بيه دلوقتي هو عباره عن تراكمات تراكمات لقيت تراكمات لكل الحاجات اللي انت تاذيتي فيها ممكن تكون في وقتها كانت ممكن تعدي بتصرف بسيط قدامها فنبقى عالجنا الموضوع لكن لما بتتسامل حاجه ما بتتعالجش في وقتها او ما بيتاخ لازم اول حاجه تتعمل ان احنا نطلعها بره يعني اللي عمال يزيد جوه ده ويبوظ الدنيا زايده لازم نطلع لازم نعبر عنه لازم نقول انا اتاذيت بالشكل ده طيب هقول عشان خاطر الناس اللي قالوني هيغيروا حاجه خالص مش ده هدفنا اصلا احنا هدفنا الاساسي ان احنا نطلع اللي عندنا ده لبره علشان نبدا نساعد نفسنا نشوف هو ده كان عباره عن ايه ونقدر نعدله ازاي او نحطه قصاده وايه زي ما بنعمل على الميزان كده نقدر نعدل كفتين الميزان قصاد بعض على قد الاذى نبدا نحط حاجات هي تكون الدواء للاذى ده. طيب اثر الاذى ده يروح على طول فجاه كانه ما حصلش طبعا لا يعني انا ممكن افضل مش حابه اتعامل مع الناس اللاذوني ايوه طبعا المهم ايه هنا في الموضوع المهم ان الاذى اللي جوايا ده يخلص عشان ما افضلش طول الوقت منتظره ان انا انفجر في اي موقف جديد بيحصل سواء له علاقه بالاشخاص اللي اذوني او منوش علاقه. دي مهمه جدا محتاجه.دش قصادها رد فعل يداويها زي ممكن يبقى عندي جرح صغير كده لو انا معلكتوش بالطريقه الصح وسبته يتعرض للالتهابات والميكروبات هيتحول الجرح الصغير ده المشكله كبيره جدا ممكن اوصل لان انا يبقى عندي تسمم في الدم حاجه صغيره لو ما اتاخدش قدامها الاجراء صح هو ده اللي بيحصل هو ده اللي بيحصل مع اي حد ممكن يعدي عليه موقف كان مؤلم وفي وقتها ما تعملش حاجه قصاد القلم ده. بنعمل احنا ايه بقى بعد ما يعدي كل الوقت ده والحاجه دي عماله تتفاقم وتكبر او تتحول لاسوء.
تم النشر الخميس، ٣٠ يناير ٢٠٢٥
اول ما ييجي معاكي فلوس طلعيها صدقة عشان لا تجيبي سجاير ولا كحول تاني قبل ما تدخلي في مرحلة الادمان.. عن تجربة الصدقة بتفك العقد وبتحل الدنيا والله
تم النشر السبت، ١ فبراير ٢٠٢٥
حاولي تذكري الله وتبداي تخرجي وتصلي كتير وتخرجي مع اصحابك وواجهي ابوكي خليكي شجاعه وخليكي مكبره دماغك يكش يولع اي حاجه اهم حاجه أنا
تم النشر الأربعاء، ٢٩ يناير ٢٠٢٥
لما بحس بالعجز في حياتي. بدعي
تم النشر الأربعاء، ٢٩ يناير ٢٠٢٥
ربنا ياخد بيدك ويسمع منك... يارب الفرج من عندك
تم النشر الأربعاء، ٢٩ يناير ٢٠٢٥
لعرض السؤال في فدني اضغط هنا