صباح الخير.. حابب اقلك ان احساس وجعك وألمك ومشاعرك كلها حقيقية ومفهومة جدا.. وإنتي مش لوحدك في اللي بتحسي بيه، واضح إنك مريتي بكتير من التجارب الصعبة اللي خلتك تفقدي الثقة في نفسك وفي الناس، وده طبيعي بعد كل الأذى اللي عديتي بيه.. لكن اللي مش طبيعي هو إنك تفضلي في الدوامة دي من غير ما تاخدي خطوة للخروج منها.. بدايه من الصدمات اللي مريتي بيها واضح إنك تعرضتي لإساءات نفسية وجسدية أثرت عليكي اوى... أي شخص يمر بالحاجات دي لازم يحس بالخوف وفقدان الثقة والانعزال.. القلق والاكتئاب، النوم القليل، التفكير المستمر، وعدم القدرة على التركيز ، كلها أعراض اكتئاب وقلق شديدين.. العزلة والخوف من الناس انتي كنتي اجتماعية وعندك صحاب، لكن دلوقتي بقى عندك خوف من التعامل مع الناس، وده طبيعي بعد الأذى، لكن مهم تعالجيه عشان ترجعي لحياتك الطبيعية.. الفراغ والتشتت ،النسيان، والسرحان، والتدخين الكتير كلها مؤشرات على إنك حاسة بفراغ داخلي وضغط نفسي كبير.. شكك في نفسك، وإحساسك إنك غلط حتى لو ما عملتيش حاجة غلط، ده ناتج عن تأثيرات نفسية من الماضي معلمة فيكى... طب نعمل اي اول حاجة.. لازم تشوفي دكتور نفسي يساعدك في اللي بتمري بيه، لأن اللي عندك مش مجرد حزن عادي، ده اضطراب نفسي محتاج علاج ومساندة..ممكن تدوري على دكتور نفسي كويس،. وفيه جهات بتوفر استشارات نفسية على النت زاى هنا فى خبراء فدنى أو في جمعيات دعم نفسي.. تانى حاجة لازم ترجعي ثقتك في نفسك خطوة خطوة انتي مش ضعيفة، انتي قوية لأنك عديتي كل ده ولسه بتحاولي... هاتى ورقة وقلم واكتبى حاجات حلوة فيكى وفكرى كتير لحد ماتلاقى.. ماتلوميش نفسك على حاجة مش ذنبك، وما تكرهيش نفسك بسبب اللي مريتي بيه... ابدأي تعيشي حتى لو بالتدريج.. مش لازم فجأة تكوني اجتماعية تاني، لكن ابدأي تخرجي من البيت حتى لو لمشاوير بسيطة... حاولي تعملي حاجات بتحبيها أو تكتشفي حاجة جديدة ممكن تكون مصدر سعادة ليكي... قللي العزلة تدريجيا، حتى لو بكلام بسيط مع حد تثقي فيه.. لازم تحاولي تقللي التفكير السلبي...لما يجيلك تفكير سلبي أو وساوس عن نفسك، قولي لنفسك: "دي أفكار مش حقيقية، وده مجرد تأثير الماضي".. لو حسيتي إنك بتضيعي وقتك في السرحان والتفكير السيئ، اشغلي نفسك بأي حاجة حتى لو كانت بسيطة زي تلوين، كتابة، أو حتى مشاهدة حاجة مفيدة او فيلم او اى نشاط تشتتى بيه ذهنك.. لازم تتأكدى ان السجاير والكحول مش حل، بالعكس هي بتديكِ إحساس مزيف بالراحة وبتخليكِ أسوأ على المدى البعيد حاولي تقللي منها تدريجيا، واستبدليها بحاجات تانية تخفف التوتر.. فوقى لنفسك ومتسبهاش تضيع منك.. عاوز اقلك حاجة انتى مش المشكلة، انتي النتيجة لكل اللي مريتي بيه، وده مش ذنبك. اللي سببلك الاذى مش هو اللي هيحدد حياتك، انتي اللي تقدري تقرري إنك تقومي تاني. الحياة مش دايمًا عادلة، بس دايما فيها فرصة إننا نبدأ من جديد.. ماتستسلميش، لأنك تستحقي تكوني بخير، ولو حد قالك غير كده، هو الغلط مش انت.. انتى مش لوحدك، فيه ناس ممكن تساعدك، بس أهم حد لازم يساعدك هو إنتي. أول خطوة هي إنك تؤمني إنك تقدري، والباقي هييجي مع الوقت... لازم تواحهى خوفك متهربيش منة وتوبى واستغفرى الله اول حاجة.. اهتمى بنومك بأكلك بشربك بجسمك بضحكك بسعادتك .. عيشى حياتك بالى تحبية.. وعافرى مع نفسك
شكرا لحضرتك جدا
تم النشر الخميس، ٣٠ يناير ٢٠٢٥
يبقى الافضل زاى ماقالت دكتور مي.. احنا نمنع مدخل الشيطان من البداية لاسباب كتير منها ان نفسنا مش سوية وملناش تحكم مطلق عليها وعلى مشاعرنا.. كتر الكلام والقرب حتى لو كان بحسن نية ،الشيطان هيدور على اى مدخل يقدر يدخل منة بينكم ويجركم لحالة انتو مكنتوش عاملين حسابكم عليها من الاول + ان انتو ثانوية فدا عامل ضغط نفسي كبير لكل فرد منكم ،الخوف من ان كل واحد ياخد التانى ملجأ ليه عشان يحكى معاه ويخفف عنه وبحكم طبيعتنا البشرية والتعاطف وعدم قدرتنا ع التحكم بمشاعرنا تقربو من بعض جدا بطريقة ماترضيش ربنا فيصبح الموضوع حرام واحنا عاوزين توفيق ربنا اولا واخرا..
تم النشر الخميس، ٣٠ يناير ٢٠٢٥
هو انا بصراحه يا دكتور عبد الرحمن هو احنا بنتكلم في اطار كلام محدود جدا بس خايفه ان هو يتعلق بيا في يوم مثلا او كده او خايفه اصلا ان هو يكون متعلق فلازم بصراحه يعني لازم نحط حدود من دلوقتي وشكرا لحضرتك برده كلامك كله صح
تم النشر الأربعاء، ٢٩ يناير ٢٠٢٥
بصراحه عندك حق في كل كلمه قلتيها و شكرا يا دكتوره مي انتي عندك حق لازم الباب يتقفل من اوله احسن من كل حاجه تطلع بلا حدود يعني كده الحدود مش دائم كلام منطقي برده وكمان هو ممكن يكون حرام اصلا ان انتي تكلمي ولد بدون علم حد من البيت وكده
تم النشر الأربعاء، ٢٩ يناير ٢٠٢٥
شكرًا أستاذ عبد الرحمن... حابة أضيف بس للبنوتة إنه حتى لو الكلام في حدود الدراسة وباحترام فهو في الغالب بياخد منحى آخر مع الوقت سواء من ناحية البنت أو الولد ومش ضامن أبدًا تفضل الحدود موجودة... لذا رأيي بلاش من الأول.. نقفل الباب اللي ممكن الشيطان يدخل منه ولو على الكلام في الدراسة أكيد هتلاقي بنات تتكلمي معاهم.
تم النشر الأربعاء، ٢٩ يناير ٢٠٢٥
من الواضح أن العلاقة بينكم في حدود الكلام العادي والدراسة، ودا فى حد ذاته مش حرام أو غلط طالما أنه لا يتجاوز الحدود الأخلاقية والدينية.. لكن إذا كان التواصل مخليكى غير مرتاحة أو مسبب ليكى أي نوع من الشكوك، فالاحسن أنك تحطي حدود واضحة وتحددي هدف الكلام، خاصة لو الولد تعبان او بيمر بظرف..من الممكن دعمه بشكل لطيف ولكن بدون تعلق زيادة.. واسأالى نفسك: التواصل بيقربني من ربنا ولا بيبعدني؟ هل حسيتى بمشاعر غير مرغوبة أو تعلق غير صحي؟ هل لو أهلك عندهم علم هتحسي بعدم الراحة ولا عادى؟ إذا كان كل شيء في إطار طبيعي ومحترم، فمتقلقيش.. ولكن إن كنتي تشعري بأنك بدأتي تتعلّقي بيه أو أن الكلام بنكم بدأ ياخذ منحى غير مريح، فمن الأفضل تقليل التواصل ووضع حدود واضحة...
تم النشر الأربعاء، ٢٩ يناير ٢٠٢٥
بس عايزه دكتور نفساني هو اللي يرد عليا هو انا في تالته ثانوي فكنت عايزه حضرتك يعني هو انا بكلم شخص وكده بس بتكلم معاه عادي ما فيش اي حاجه هو كده حرام ولا ولا بس الشخص ده علي النت وكده يعني احنا اصلا محتوى كلامنا كله عامله ايه وكده وكمان لو في حاجه في الدراسه بنتكلم فيها وبس كده ما فيش اكتر من كده هو كده حرام اني اكلم الشخص ده ولا كده انا اذنبت وكده ممكن حضرتك بس ترد عليا اني كده صح ولا غلط بس الولد حاليا تعبان ومش عارفه اعمل ايه
تم النشر الأربعاء، ٢٩ يناير ٢٠٢٥
لعرض الإجابة في فدني اضغط هنا