انا كنت مدمن تامول وحشيش بقالى ١١سنه
من خمس سنين بطلت تامول بمساعدة دكتور نفسي
وبقالى اكتر من ١٠٠ يوم مبطل شرب حشيش ومش حاسس بمشاكل نفسيه
بس اصحابي كلهم بيشربوا ومش عارف اغيرهم علشان عشره قديمه وبقعد معاهم حاليا وهما بيشربوا بس مش مرتاح ومفيش استمتاع فى يومى بحس انى عايز اليوم يخلص وخلاص وده عاملى توتر
ومش عارف اعمل ايه علشان اجدد حياتي
افتكر إن سيدنا محمد قال المرء مع من أحب، لو فضلت معاهم هتروح لربنا معاهم وهيبقى مصيرك مصيرهم لأن غصب عنك برضوا ذي ما سيدنا محمد قال المرء على دين خليله ، الخليل الي هو الصاحب ، هتخليك معاهم هتبقى ذيهم مهما حاولت ، اشغل وقتك بالطاعات وشوق ناس صالحه هتلاقي حاجات حلوة كتير في يوم وافتكر أن ده اختبار من ربنا ، المهم صلاتك و تقرأ ولو صفحه من القرآن في يومك
تم النشر الخميس، ٢٢ فبراير ٢٠٢٤
اما ان تنصحهم وانت جالس معهم أو تبتعد عنهم لانك كده هترجع للإدمان
تم النشر الثلاثاء، ٢٠ فبراير ٢٠٢٤
حمدا لله على سلامتك، واتمنى لك الاستمرار على ذلك. للاسف اللي انت بتعمله مش صح! ده مش دورك ..! مش دورك انك تخليهم غصب عنهم يبطلوا، انت قررت تبطل علشان كده بطلت، هما لا، ف انت بترهق نفسك على الفاضي بل وهتجيب لنفسك كمان وضع مش كويس! تخيل انك تبقى مدمن شئ معين، وتجيبوا قدامك، هتقدر تستمر لحد امتى ومتاخدوش وهو قدامك! هتقدر تبعد عن جملة يا عم اشرب مش هيحصل حاجه كام مرة؟ هتقدر تبعد كام مرة لما حد يقولك ايه المشكلة يعني ما احنا كويسين اهو مفهياش حاجه لما تحاول تفك عن نفسك شوية؟ هتقدر تستحمل كام مرة تسمع كلام انت بتحاول من جواك انك متسمعوش.!!!! ليه تصاحب ناس مش شبهك..؟؟؟ ابعد وفورا .. مش دورك انك تبقى المنقذ .. ابعد انت مش المنقذ. اللي عايز ينقذ بينقذ نفسه لان القرار الاولي بيبقى نابع من جواه هو .. ابعد وشوف صحبة خير تعينك على الخير.
تم النشر الثلاثاء، ٢٠ فبراير ٢٠٢٤
انت بتساعد نفسك وضرورى تكمل انت اللى بدأته مع نفسك الاول ..واللى من اهم المؤثرات فيه انك تخرج من الدايرة اللى ممكن تسحبك تانى وان شاء الله لما تكون متعافى تماما هتقدر تساعدهم إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ
تم النشر الثلاثاء، ٢٠ فبراير ٢٠٢٤
اقعد معاهم ع كافيهات او مطعم او مكان عام عموما، انما لو اتجمعتو ف شقة حد فيكم، انت عارف لوحدك دا هيرجعك لايه، و١٠٠ يوم انجاز كبير جدا، عشان كدا لازم تحافظ ع دا.
تم النشر الثلاثاء، ٢٠ فبراير ٢٠٢٤
لو تمسكت بعلاقتك بيهم، مهما كنت قوي وعندك اصرار وعزيمة، هتضيع ال ١٠٠ يوم ع الفاضي
تم النشر الثلاثاء، ٢٠ فبراير ٢٠٢٤
ابعد عنهم النفس امار بسوء ولو مبعدتش ممكن ترجع تانى وادعى ربنا على العون والسبات
تم النشر الثلاثاء، ٢٠ فبراير ٢٠٢٤
اول حاجه الصاحب ساحب يعني ممكن ف اي وقت ترجع بسببهم انت اولاً حاول تصلح منهم تخليهم يبطلو زيك مره واتنين وتلاته حاول تغيرهم للاحسن ولو مستجابوش ف انت ابعد واحده واحده الانسان مش هيموت من الوحده بس الصحيه الصالحه هى الاحسن وانك لو بعدت عن حاجه هتضرك ف دينك ودنياك ربنا هيعوضك عنها خير دا غير انك كمام حتى لو م بتشرف ف انت قاعده معاهم بتدخن سلبيا
تم النشر الخميس، ٢٢ فبراير ٢٠٢٤
ابعد عنهم احسن لك ولله هارتاح مع الوقت وصلي وادعى
تم النشر الأربعاء، ٢١ فبراير ٢٠٢٤
الصاحب ساحب غير صحابك مهما عملت مش هتعرف تصلحهم انك لا تهدى من احببت ولكن الله يهدى من يشاء ربنا يهديهم ويهدى الجميع الي الطريق المستقيم
تم النشر الأربعاء، ٢١ فبراير ٢٠٢٤
مش هتلاقي حد عنده تجربه ان بطل مخدرات وفضل مع صحابه القدام ،، انا في نفس تجربتك وبتقطع وسعات كتير بيوحشوني جداا ،، وعشره عمر ووقفو معايا كتير في حياتي بس غصب عني لازم ابعد .. وبعد عنهم بعد معناه ،،، موضوع ان لما بعد عنهم تعبت علشان احساس الفراغ ،، ممكن تدور علي اي نشاط تشترك فيهم ومع الوقت هتجمع صحاب غيرهم زي الجيم ، تتعلم مزيكا ، تروح زماله المدمنين المجهولين بس خد راي الدكتور الاول ،، وبنا يثبتك ويثبتني
تم النشر الثلاثاء، ٢٠ فبراير ٢٠٢٤
شكرآ لحضرتكم انا عارف ان الابتعاد هوا الحل بس مش عارف ابعد لان عندي ٢٩سنه واحنا أصحاب من قبل الشرب كمان احنا بدأنا شرب معا بعض وانا مهندس وكلهم شهادات زى تقريبًا والوضع الاجتماعي متشابه وجربت اقعد فى البيت لقيت نفسيتي تعبت انا بشارك علشان اشوف لو حد مر بتجربتى من غير ما يبتعد عن اصحابه
تم النشر الثلاثاء، ٢٠ فبراير ٢٠٢٤
من خطوات التوبه الابتعاد عن من يشجعك على الذنب
تم النشر الثلاثاء، ٢٠ فبراير ٢٠٢٤
ابعد عنهم تقرب من ربنا وانشاء الله امورك هتبقي احسن
تم النشر الثلاثاء، ٢٠ فبراير ٢٠٢٤
ممكن متبقاش قريب منهم اوي وابعد عنهم واختلق الحجج عشان متقعدش معاهم وكمل ف انك متشربش وخاف من النار والتزم ف صلاتك وادعي ربنا يغفرلك اللي راح ويخلي الجاي حلو ان شاء الله واقرى اذكار الصباح والمساء والنوم وواظب على اي ذكر
تم النشر الثلاثاء، ٢٠ فبراير ٢٠٢٤
لعرض السؤال في فدني اضغط هنا