عندي مشكله اني بحب اهلي جدا بس مش بعرف ابينلهم دا ودايما بتعامل بعصبيه ع الرغم من أني بعامل الناس بره بمنتهي اللطف ويحاول اكسب رضاهم طول الوقت حتي لو دا بيرهقني وعصبيتي مخليه اهلي شايفني وحشه ومش بحبهم اعمل ايه
السلام عليكم ورحمه الله وبركاته يعني دي دي حاجه جميله دي مش مشكله المشكله مش انك بتحبيهم المشكله ان انت مش بتعرفي تعبري لهم. خلينا نشوف النقطه دي مهمه جدا هي بتبقى غصبا عن ظروف البيت كلها انه ما حدش عود الولاد في البيت يعني انتوا اكيد ما تعودتوش في البيت ان انتوا تعبروا لبعض عن الحب بطريقه معينه فكل واحد طبعا بيستخدم طريقته ممكن انت طريقتك انك تعبري بالكلام بس لانك مش شايفه في البيت انهم بيعبروا بالكلام فمش قادره تستخدمي معاهم نفس الطريقه لان هم ما بيستخدموهاش او ممكن هم يكونوا الطريقه دي بيوقفوا قدامها مستغربين مثلا فايا كان اختلاف الطرق ولكن انت محتاجه تكوني بشخصيتك فدلوقتي انت بتحبي تعبري بالكلام مثلا فبتحبي تقولي يا ماما انا بحبك طب علشان ازق الموضوع اعمل ايه انا ممكن ابقى في وسط الكلام كده، ماما انت عارفه انت عارفه ان انا عملت الموقف ده عشان انا بحبك، عادي جدا ممكن بقى وانا ايه وانا متعصبه عادي جدا متعصب قاصده، ده هيبقى ايه هيبقى تدريب بيبدأ يفك الجليد كده يعني يفك بقى الموضوع وتبقى ماما سمعت مني فعلا كلمه ان انا بحبها حتى لو في وسط موقف مش لطيف بعد كده بالتدريج هبدا يبقى عادي بالنسبه لي ان انا اطلع على لساني كلمه انا بحبك يا ماما او انت غاليه عندي يا ماما او انا مستغناش عنك انا جاية اسالك عشان خاطر انا ما بستغناش عنك لازم اطلع الكلمات دي في المواقف المختلفه لحد ما اتعود عليها وبعد كده يبقى ايه بابتسامه وانا رايحه صباح الخير يا ماما يا حبيبتي مثلا يعني. ثاني حاجه لو دي مش طريقتك فالطريقه اللي هي بتناسب الاشخاص اللي قدامنا دي بتكون احسن طريقه فدلوقتي ماما ايه اكثر حاجه بتحبها او ايه اكتر حاجه ماما بتقعد بقى تقول لنا ياه ده كويس ده انا يعني مبسوطه قوي ان انتوا عملتوا كده ان مثلا لما بنساعدها او لما بنجيب لها هديه حتى ولو بسيطه بدون مناسبه اشوف هي ماما بيوصل لها المشاعر وبيوصل لها الحب ازاي لما بشوف هي بيوصل لها ده ازاي الموضوع يبقى اسهل كتير. فانا مش محتاجه أدوخ نفسي هي ماما بتحب تحب لما حد بس خلاص انا لما احب اقول لماما انا بحبك انا اخش اساعدها في المطبخ انا لما احب اقول لبابا انا بحبك وانت مهم عندي قوي هاعمل له الكيكه اللي هو بيحبها بص انا عملت دي لك وممكن من غير ما اقول حاجه يعني ممكن من غير ما اقول اي حاجه وانا بقدم له الكيكه وهو يعرف ان انا باقول له ان انا بحبه لان هو بالنسبه له اللي بيعمل لك كيكه اللي انا بحبها يبقى هو بيحبني فهو هيستقبل اللي انت بتقوليه فحاولي كده تجربي تعملي الحاجات دي وان شاء الله همم تبقوا زي الفل مع بعض كلكم.
تم النشر الجمعة، ٢١ مارس ٢٠٢٥
جربي تعملي حاجة انتي مش متعودة عليها معاهم ادخلي المطبخ علي مامتك اديها حضن كدا أو بوسة أو هديه لذيذه بسيطة غير متوقعه عبري عن حبك ليهم بلغه حبهم هما بالحاجات اللي هما فعلا محتاجين يحسوها منك ومتتكسفيش من دا لو عندك اخوات اصغر منك حاولي لو مره في الاسبوع حتي تتفقوا ع يوم تخرجوا فيه مع بعض أو تلعبوا حتي في البيت مع بعض وتسمعيهم وتقربيهم منك ممكن الموضوع يبقي صعب عليكي في البداية ومستغرباه وممكن تكوني مكسوفة كمان من دا عادي جدا بتحصل بس مع الوقت هتتعودي وهما هيبقوا مبسوطين منك انك بتحاولي تبقي ألطف معاهم ودائما حاولي تفصلي بين مشاكلك وبين تعاملاتك مع الناس ❤️
تم النشر الأربعاء، ١٩ مارس ٢٠٢٥
عزيزتي، أشكرك على صراحتك في مشاركتنا مشاعرك. من الجميل أنك تحبين أهلك، لكن من المؤسف أن تعبري عن مشاعرك لهم بشكل قد يؤثر سلبًا على علاقتكم. إليك بعض النصائح العملية التي قد تساعدك: تحديد الوقت المناسب للتواصل : حاولي إيجاد لحظات هادئة للتحدث مع أهلك، حيث يمكنك التعبير عن مشاعرك دون ضغوط. التعبير عن الحب بطريقة ملموسة : يمكنك استخدام أفعال صغيرة لإظهار حبك، مثل مساعدتهم في الأعمال المنزلية أو كتابة رسائل صغيرة تعبرين فيها عن مشاعرك. مراقبة ردود أفعالك : حاولي الوعي بعصبيتك ومسببها، واعملي على تحسين ردود أفعالك عن طريق التفكير قبل الكلام. التواصل بصراحة : إذا كان هناك شيء يثير عصبيتك، حاولي التحدث عنه مع أهلك بشكل صادق وبأسلوب لطيف، فهذا قد يساعدهم على فهمك أكثر. طلب الدعم : لا تترددي في اللجوء إلى شخص تثقين به، سواء كان صديقًا أو معالجًا، لمساعدتك في تنظيم أفكارك ومشاعرك. تذكري أن العلاقات تحتاج إلى جهد من الطرفين، من المهم أن تعملي على التعبير عن محبتك لأهلك كما أن تقبلي شخصياتهم ونقاط ضعفهم. بإذن الله، ستحصلين على نتائج إيجابية.
تم النشر الأربعاء، ١٩ مارس ٢٠٢٥
حاولي تدوري جواكي عن السبب في تعاملك الجاف مع اهلك .. وحاولي واحدة واحدة تبيني مشاعرك الحقيقية عن طريق توقفي عصبية وردود فعل عنيفة .. وحاولي تبيني بالمواقف او بالهدايا مشاعرك .. لحد ماتقدري تعبرس عنها بالكلام
تم النشر الخميس، ٢٠ مارس ٢٠٢٥
حاولي تبيني انك بتحبيهم بافعالك وحاولي تهدي ومتخليش حاجة تعصبك وديما خليك عارفة ان البوح بالمشاعر اللي جواك مش عيب ولا حرام بالعكس انت لما بتبوحي بمشاعرك تجاه حد فالشخص ده بيفرح جدا فانت حاولي متعتبريش ان ده حاجة غلط وانك تتكسفي منها وعبري عن مشاعرك تجاههم وحاولي تتملكي اعصابك وتكوني هادية
تم النشر الخميس، ٢٠ مارس ٢٠٢٥
لعرض السؤال في فدني اضغط هنا