انا عندي مشكله انا بحب واحد من خمس سنين وطول الخمس سنين دول كنت بحس بحبه ليا بس هو مكنش بيبينلى اي حاجه لكن عنيه و مواقفه هي اللى كانت بتفضحه وكمان بحس انه بيغير عليا بس احنا مش بنتكلم خالص
وحبنا ده عباره عن تعامل بالنظرات بس عشان هو شخص محترم وعمره ما جه وكلمني ولا طلب مني رقم تليفوني حتى عشان هو محترم وعمره ما كلم بنت حتى
انا بقول كده عشان احنا جيران وهو قدامي طول الوقت بس انا معرفش كل حاجه عن حياته الشخصه غير معلومات بسيطة
وفي يوم كده كنت بكلم واحده صحبتي في الفون وهو شافني وفضل باصص عاليا كأنه غيران و بعد كده مشي راح شغله من غير ما يبصلي حتى ولا يعبرني وبعدها بكام يوم جت اخته اللى اصغر منه عندها 14سنه تقريباً وقالت لأختي انه اخوها خطب واحده تانيه واسمها حنين وجميله وإلخ.. إلخ
انا اول ماسمعت كده اتضايقت اووي عشان انا مش بحبه انا بعشقه بدمنه وعمري ما تخيلت انه يكون لحد تاني غيري وكل اما اشوفه الاقيه زعلان وبيسمع اغاني حزينه وباين على شكله ان ده مش شكل واحد مخطوب خالص
انا مصدقتش اللى اخته قالته ودلوقتي من كام شهر كده مامته جد ولمحت لماما انهم حابين يدخلوا عليتنا ويكونو فرد منها وكده بس ماما قالت لها انها مش بتفكر في جواز دلوقتي لما عيالها يتعلموا ويكملوا تعليمهم يبقى تجوزهم
اصل مامته مقالتش هي عاوزه مين بالظبط لابنها من عليتنا وكده اصل احنا 4 بنات اخوات وكده وانا دلوقتي ف أولى ثانوي ومن كام يوم بردو اخته قالت لأختي بردو إن اخوها مخطوب لواحده اسمها شمس واصلا هو باين عليه انه بيحبني انا ومش بيحب ولا مخطوب اصلا لأي واحده تاني دا انا قبل كده شوفته لابس دبله وكده وهو عشان عارف اني هشوف الدبله دي في ايده وهزعل وكده راح قال قدامي عشان يلمح لي ان الدبله دي مش بتاعته دي بتاعت اخوه الكبير وانه واخدها من وراه وكده وانها كمان واسعه عاليه
بس انا واثقه انه بيحبني حتى لما حكيت لصحابي وقلت لهم عليه قالوا لى انه بيحبك ولما شافوه وهو بيبص عليا وانا مش واخده بالي قالوا لي انه بيحبني ومهتم بيا و الحب باين عليه... ومن كام شهر احنا عزلنا و روحنا سكنا في بيت في نفس الشارع بس في اخره وهو عشان يشوفني كان بيجي من شغله من الشارع من ورا ناحية بيتي الجديد عشان يشوفني ودلوقتي انا هسيب المنطقه كلها عشان احنا هنعزل تاني
وانا خايفه انه يسيبني ويحب حد تاني غيري وخايفه بردو انه ميعرفش مكاني مع انه عارف مكان المدرسه بتاعي عشان هو وصلني عندها قبل كده بس مش عارفه بقى انا مش هقدر اعيش من غيره ولا حتى اني اشوفه مع غيري انا اللى مدايقني اني انا كنت اعرف اخباره كلها عشان احنا كنا جيران
ودلوقتي انا همشي ومش هعرف عنه حاجه
انا بس عاوزه اعرف هل الشخص ده بيحبني زي ما انا كمان بحبه وزي ما بيقوله عليه صحابي ولا لأ؟ وهل هو لو بيحبني هيجيلي زي ما جالي قبل كده عشان يشوفني لما وحشتوه وكده ولا مش هيجي ويقول خلاص ماهي مش نصيبي وخلاص مش عاوزها ولا هيفضل ورايا حتى لو رحت
وعاوزه اعرف بردو هي ليه اخته كانت بتعمل كده وليه قالت الكلام ده كله وعشان اي اما هو مش صح ؟
*للمعلومات *
هو مجاش مره وقالي انه بيحبني هو كان شخص تحسوا كده غامض في تصرفاته اوقات احس من حركاته انه بيحبني واوقات بحس انه لأ
واحنا بنحب بعض بالنظرات يعني مش بنتكلم خالص ولا حتى معاه رقم الفون بتاعي ولا انا بردو (عاوزه حد يرد عليا بسرعه عشان انا بجد في مأساه ومش عارفه اعمل اي)
السلام عليكم، أنتِ في أولى ثانوي زي ما قلت، يعني لسه صغيرة. خليني أقول لك إن المشاعر في الفترة دي من حياتنا بتبقى متطايرة وبتتغير واللي انتِ فيه ده تعلق من كثرة تفكيرك في الشخص ده. الحب حبيبتي مش بالنظرات والمشاغلات وكل الكلام اللي قلتِه ده. ممكن في الآخر يكون عقلك بيخيل لك نظراته واهتمامه ومشاعرك هتخليكِ تحللي كلام اخته أو والدته بالطريقة اللي نفسك إنها تكون. لو هو بيحبك وكان شخص ناضج فعلا مش هيشاغلك بنظرات... هيكون صريح وهيطلب من والدته إنها تفاتح والدتك إنه عاوز يرتبط بك وهينتظر لما تنتهي من دراستك مثلا. أما النظرات والكلام ده كله كلام فارغ لا تشغلي نفسك وتضيعي وقتك عليه. المطلوب منك دلوقتي، تهتمي بمذاكرتك ودراستك وتطوري نفسك عشان بعد كده تقدري تختاري صح في كل حاجة في حياتك سواء زواج أو غيره وكمان تفهمي يعني إيه زواج ومسؤولياته المطلوبة منك. لو الشخص ده كان من نصيبك فهيكون من نصيبك من غير ما تضيعي تفكيرك هل بيحبك ولا لأ ومن غير ما الشيطان يخليكِ تعصي ربنا بإنك مثلا تروحي تعترفي له أو تصاحبيه. دراستك هي أولويتك دلوقتي فركزي عليها. مين عارف، ممكن بعد فترة تنسيه ومشاعرك تتغير تمامًا... زي ما قلت مشاعرك لسه خضراء وبتمر بمرحلة طبيعية في حياة البنات. ربنا معك ويكتب لك الخير دايما.
تم النشر الأحد، ٥ يناير ٢٠٢٥
يا بابا انتي لسه صغيره إيه دخلك في الحب دلوقتي لسه بدري عليكي اوي، تاني حاجة ما دام مدخلش البيت عندكم يتقدملك او حتى حد من اخواتك يبقي متشغليش بالك ابدا لان الحب الأول مش بيتنسي لو اتجوزتي غيره لما تكبري هتفضلي فكراه خلي حبك للي شاريكي وبالحلال جالك مش شخص انتي مش متاكده هو بيحبك ولا لا ربنا يسعدك، وركزي في مستقبلك لو بتدرسي ثانوي عام بالتوفيق
تم النشر الثلاثاء، ٧ يناير ٢٠٢٥
لو بيحبك كدا يبقى اكيد مش شويه أمتار هيخلوه ميتقدمش، و كدا كدا اللي ربنا كاتب هيحصل و اكيد لو هو من نصيبك هيتجوزك اكيد، و لما يفكر يتجوز هيتقدملك
تم النشر الاثنين، ٦ يناير ٢٠٢٥
لعرض السؤال في فدني اضغط هنا