فى البداية كده.انتى بنوته مميزه جدا ولازم تحبى ده لأن ببساطه غير انك جميله مهما كبرتى مش هيظهر عليكى سنك فهتفضلى مميزه بين جيلك. بالنسبه لوالدتك فكتير من الأمهات بيعتقدوا أن أولادهم مش هيقدروا يعملوا الحاجه بإتقان فلازم احنا نقنعهم بده وده هيحصل لما تقنعيها بانك تقدرى تعملى حاجات وتحاولى تشاركها فيها لحد ما هى تشوف بنفسها انك تقدرى بعد كده هتقدر تعتمد عليكى بس الموضوع هياخد وقت شويه فخليكى صبورة أما عنك انتى فحبى نفسك ،شكلك،ملامحك لانك مميزه .وحاولى انك تقوى ثقتك بنفسك لأن ده اللى هيخليكى تحبيها اكتشف مع نفسك ايه الحاجات اللى لما بتعمليها بتحسى بإنجاز فيها واشتغلى عليها اكتبى دايما كل اللى جواكى واللى حاسه بيه ده هيفرق معاكى جدا مارسى رياضه بتحبيها لأنها هتساعدك جدا أن ثقتك فى نفسك تكون اقوى وهتغير من تفكيرك وهتتخلصى من الأفكار السلبية. لو ليكى صديقه مقربه أو لايف كوتش اتكلمى باستمرار معاهم وشاركيهم افكارك لأن الدعم النفسى مهم جدا. وافتكرى دايما انك مميزه وان من حق نفسك عليكى انك تثقى فيها وتحبيها لأنها تستحق ده وتذكرى دايما أن ربنا معاكى فى كل خطواتك وبيساعدك وانك مميزه وهتقدرى 🌷
تم النشر الأربعاء، ٢٤ يوليو ٢٠٢٤
0 تعليق
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك