انا عندي كذا مشكله حتى مش عارفه ابدا منين انا في تالته ثانوي وطول السنين اللي فاتت كنت كويسه في الدراسه وبجيب درجات عاليه وبطلع من الأوائل السنه دي مش قادره اقعد على كتاب حرفيا كل ما اقول يلا هبدأ دلوقتي بفتح الكتب وبقعد ومش بعمل حاجه وكل المدرسين مضايقين مني لأنهم عارفيني من قبل كده
انا الحمد لله نوعا ما ذكيه فالأول مكنتش بحتاج اقعد اذاكر كتير كان بيكون كفايه اركز في الشرح واروح احل الواجب بتركيز ولو في امتحان اراجع حاجه بسيطه إنما السنه دي معنديش حتى طاقه اقعد اسمع المدرسين في الحصه
انا كده من اول السنه مش لسه دلوقتي كل اللي حواليا مشكلتهم انهم بدأو يتعبوا وحاسين انهم نسوا القديم وانا لسه يعتبر مبدأتش
انا علمي رياضه وكل اللي حواليا اهل وصحاب بيتعاملوا اني مهندسه خلاص وانا مرعوبه اصلا اهلي منفصلين من وانا صغيره جدا وعمر ما حسيت الموضوع اثر عليا السنه دي حاسه كأن كل حاجه لسه حاصله دلوقتي وماما معندهاش وعي وبتضايقني كتير وهي كمان ضغطاني وانا مش عارفه اعمل ايه ولا الاقيها منين ولا منين
عاوزه اقولك ان لسه الوقت في ايدك .. متخافيش من اللي فات المهم دلوقتي. هل انتي شايفة ان طبيعي ان يكون انفصال اهلك مكانش مأثر عليكي طول السنيين اللي فاتت، ويأثر عليكي بالذات السنة ديه؟ هل ممكن تعتقدي ان عقلك بيختلق مببرات علشان يفتعل مشاكل وخلاص تخليكي متذاكريش ؟ يعني (شماعة) بمعنى اصح .. فكري فيها كده ولكن بشكل موضوعي. انا مقدرة حالة الضغط اللي انتي فيها، وان الضغط ممكن يولد عندك الشعور بالخوف والتوتر .. وممكن يجي بالعكس ومتذاكريش. هما فقط بيتعاملوا معاكي كده كنوع هما متخيلنه انهم كده بيشجعوكي مش اكتر .. بس ده اسلوبهم. دلوقت علشان تتخلصي من الضغط ده اطلبي منهم انهم يحاولوا يخفووا شوية التعامل بالشكل ده، لان ده بيؤثر عليكي بالسلب .. وقولي لهم انك مقدرة تشجعيك ليهم وخوفهم عليكي وبالذات ماماتك .. حاولي لما تيجي تقولي لشخص حاجة قولي له حاجة كويسة هو فعلا بيعملها وقولي بعد كده اللي عايزاه باسلوب يقبله.
تم النشر الأربعاء، ٢٢ فبراير ٢٠٢٣
بصي هو المخ يحب الهيصه آوي وينشط كده ويقلب فقديم وجديد وقت التوتر.. فإنتي رتبي مخك معايا ورقه وقلم كده وبسم الله.. مشكله انفصال بابا وماما مشكله كبيره ومن حقي ألتفت ليها طبعا ومشاعري دي تشكر إنها بتنبهني إن في مشكله لو مخدتش بالي منها هتتراكم بس إحنا نقدر نروض المشاعر بالأولويه زي لما بيحصل حدث كبير يحزن جدا وقتها بنفصل بين إحساسنا وبين المسؤوليه والتصرف السليم.. فاكتبي المشكله عشان مخك يوقف ذكرها وانك هتأجلي حلها عشان في اولويه أكبر دلوقت وخاصا إنها يمكن تأجيلها ماما بتوترك وتضغطك نكتب كده الاسلوب ال بيزعلك وممكن فورقه مبهجة بجواب وشيكولاته تقوليلها أنا محتاجه منك تطمنيني ومقدره خوفك بس عشان خاطري طمنيني آكتر واهو تبقي حاولتي حتي لو مش استجابت تقبلي حببتي إن ده أسلوب حبها وخوفها حتي لو غلط فمش بالساهل نغير أسلوب حد كبير وعاده بقاله سنين بيمارسها آنتي شاطره ومدرسينك متحملين حاليا ومخك نضيف كل دي جمل محفزه جدا لنفسك وسند كده يقومك إنك قدها و تستحقيها وربنا كرمك بمدرسين يحبوكي وكرمك بسرعه الفهم وإن شاء الله يارب يباركلك فوقتك بس يلا قومي فكك من الفات خلاص وخلينا فدلوقتي ال فايدك دلوقتي فاستغليه يلا واعملي جدول وبلاش داء الكماليه دلوقتي وركزي علي مراجعات وتلخيصات وامتحانات كتير وواحدة واحدة والضعيفه فيه ترجعي للدرس نفسه و هتلحقي جدا جدا بس اقفلي الموبايل وأي مشتتات وهيئي حواليكي مكتبك وملازمك وبلاش تضخمي المنظر حواليكي واقعدي ساعه ونص تركيز وبعدين ريحي وافصلي برياضه وظبطي نومك واكلك و استعيني كتير بالدعاء وصلاتك واذكارك لو عملتي كل حاجه وسبتي دول يبقي فالهوا خدي بالك العيله كلها شايفاكي مهندسه علي عينا وراسنا العيله بس الاهم انتي تستحقي إيه وشايفه نفسك ف إيه وحابه إيه وبتحققي وتتعبي لنفسك حببتي فهونيها وتوكلي علي الله يلا 💜💜 متنسنيش في البيبسي والكيك😋
تم النشر الأربعاء، ٢٢ فبراير ٢٠٢٣
انتي مشكلتك الثانوية العامة بس ولا في مشاكل تانيه ماثرة عليكي؟
تم النشر الأربعاء، ٢٢ فبراير ٢٠٢٣
النفس بتميل للراحة اكتر و لما يكون الشخص طبيعته نشيط وذكى زيك كده . نفسه تقرر تدخل من المدخل الصح فتجيبله مبررات كتير واسباب عشان يحزن او يكسل او يقلل مجهود.( اعذار اعذار ) رغم انها حاجات كامت عاديه قبل كده ومحتملة عادى. اعتقد ده اللى حصل معاكى. انتى اذكى بقي من الحركة دى ..اقفى كده وقفه مع نفسك وقوليلها خلاص مش هضحك على نفسي بالاعذار دى تانى . وتوكلى على الله وابدأى باى حاجة من المذاكرة حتى لو قراءة فقط
تم النشر الخميس، ٢٣ فبراير ٢٠٢٣
اعرفي ان مش مهمتك في الحياه تحقيق احلام و امال الاخرين هم يفكروا زي ما يفكروا هما حرين المهم انتي عاوزه ايه انت مش مهمتك تحقيق احلامهم
تم النشر الاثنين، ٣ أبريل ٢٠٢٣
في ادويه لكده و امنه جدا ممكن تاخد حبه "اركاليون" قبل الفطار يوميا و لكن لا تأخذة اكتر من شهر افضل انك تبتدي تاخده قبل الامتحان باسبوع مثلا هيساعد علي التركيز و يحسن النفسيه بدرجه بسيطه .. راجع دكتور اولا طبعا
تم النشر الاثنين، ٣ أبريل ٢٠٢٣
لعرض السؤال في فدني اضغط هنا