بعاني من القلق المستمر والتوتر منذ كنت طفله صغيره ولما كبرت تزوجت وانجبت والان عندي 45 سنه ومازالت اعاني من نفس الاعراض ولكن أكثر من الاول وبيجيلي باتيك اتاك يوميا بجد تعبانه جدا وبخاف من سيره الموت علي العلم أن أمي نرجسيه وعلي خلاف دائم معها ارجو الرد
مرحبا بك النقطة الأولى والمهمة هي انه يجب عليكِ استشارة طبيب نفسي مختص والبدء في العلاج.. الأمر الثاني متعلق ب ايه اللي ممكن اعمله لما تجيلي النوبة ؟ - نوبة الهلع عبارة عن فكرة على مستوى اللاشعور انه فى تهديد او حادث مؤلم هايحصل يبدأ جسمك بيستجيب للفكرة دى وتبدأ تظهر الاعراض .. - هى فى الأصل فكرة يبقى لازم تحاربها بفكرة اقوى منها .. فكرة ايجابية وسعيدة .. تبعث فى نفسك الراحة والطمأنينة بمجرد تذكرها او التفكير فيها " ذكرى سعيدة ، موقف مبهج ، شخص بتحبه وبتطمئن ليه " - الفكرة كلها بتكمن فى انه تلهي عقلك عن التفكير فى الاعراض والحالة اللى انت فيها .. 1- تمرين التنفس ، تمرين التنفس مهم لإن التنفس السريع المتلاحق جزء من اعراض نوبة الهلع اللي بتزودها و بتكون جزء من الدايرة المفرغة بتاعتها ، خلي النفس من بقك حاول تاخد نفس عميق و عد لأربعه وانت بتاخد الشهيق و اربعة زيهم وانت بتطلع الزفير 2- فكر نفسك دايما ان دي نوبة هلع ، حالة مؤقتة و هتعدي ، انت كويس و مفيش حاجة عضوية مقلقة ولا في خطر علي حياتك ، الخوف من الموت أو من الازمة القلبية جزء من اعراض نوبة الهلع ، لما بنفكر نفسنا بالحقايق دي بنقلل حدة الخوف من النوبة و بنكسر الدايرة المفرغة بتاعتها 3- حاول تمارس وقت النوبة تمارين اليقظة ، تمارين اليقظة هي تمارين بتساعدنا اننا نفكر هنا ودلوقتي و نكون حاضرين بكل كياننا في اللحظة دي ، بتحس رجلك ع الارض و بتحس ملمس اللبس بتاعك و بتراقب النفس بتاعك و هو داخل وطالع و جسمك و هو بيشد ويسترخي ، ممكن تركز علي شئ ما زي عقارب الساعة و هي بتتحرك ، الانفصال عن الواقع جزء من اعراض نوبة الهلع و تمارين اليقظة بترجعنا للواقع تاني و بتربطنا بيه وبتقلل من حدة النوبة 4- مارس تمارين الاسترخاء ، العضلات المشدودة جدا او المرتخية تماما جزء من اعراض النوبة ، حاول تحس بعضلاتك و هي بتسترخي من اول صوابع ايدك مرورها بالكف و الذراع و عضلات الصدر والبطن والرجل ، شد مجموعة عضلاتك عدة ثواني و سيبها تسترخي و راقبها و ركز معاها ، لما تحس الاسترخاء في جسمك بشكل متوازن هتطمن و حدة الخوف هتقل 5- تخيل مكان بتحبه ، مكان هادي و لطيف و مفيهوش زحمة ولا ناس ، شط فاضي و رمل رجلك بتدوس فيه ، التخيل دا هيساعدك انك تتطمن و تسترخي و دا هيقاوم مشاعر الخوف والقلق اللي بتيجي مع النوبة مهم اننا نفضل فاكرين دايما ان اضطراب الهلع سببه نقص في موصل كيميائي في المخ وبالتالي تحتاج في الغالب لعلاج دوائي يعوض النقص دا ، اضطراب الهلع بيحتاج كمان لعلاج نفسي ، النوبات غالبا بتبتدي بعد موت او مرض حد عزيز او خوف من الفقد عموما او ضغوط نفسية معينة ، مهم جدا الكلام دا يتناقش في الجلسات عن طريق العلاج المعرفي السلوكي علشان نقدر نتعافي و نرجع لحياتنا الطبيعية من جديد كونك مريض بإضطراب الهلع لا يعني ابدا انك شخص ضعيف أو خواف و جبان ، اضطراب الهلع مرض في المخ له أسباب عضوية و چينية معروفة زي الضغط والسكر بالظبط. والأهم انه بيتعالج و بيخف و مش مكمل معاك للأبد. شفاكِ الله وعافاكِ 🌸
تم النشر الاثنين، ١٥ أبريل ٢٠٢٤
لا كدا ده عاوزه متخصص نفسي لان بانيك اتاك ده لوحدها بس صدمات نفسيه قويه. وباقي اعراضك تراكمات فلازم متخصص
تم النشر الأحد، ١٤ أبريل ٢٠٢٤
لعرض السؤال في فدني اضغط هنا