انا في تانيه ثانوي علمي وناوي ادخل علمي علوم بأذن الله، بس دايما بواجه صعوبه اني مش بقدر اذاكر انا بفهم وبحفظ بسرعه جدا ومن صغري وانا بجيب درجات حلوه بس لما دخلت ثانوي وفي اوي سنه حسيت اني مش قادر اقعد اذاكر ساعه على بعضها بحس لما بقعد ع المكتب وابتدي اذاكر الاقيني عاوز انا واشرب واكل واعمل أي حاجة المهم مذاكرش ومؤخرا دا اثر على دروسي بشكل كبير مبقتش احضر دروس خالص وقليل جداً لما احضر درس، حطيت جدول وقولت همشي عليه برضو بلاقيني ضيعت نص اليوم لعب والنص التاني هروب من المذاكره وخايف بصراحه ابقا كده في تالته ومستقبلي يضيع، سمعت عن ناس حصلها كده بسبب حسد او مس بس انا ببصلها من الناحيه العلميه ان عندي ADHD جربت طرق مذاكره كتير زي البومودورو ومفيش فايده، لو حد مر او فاهم اللي انا بمر بيه دا ياريت يفيدني.
لو انت متشخص فعلا بيه وانت صغير ف تمام لكن لو انت من القرأه استنتجت ده ف مش ضروري لان ADHD بيظهر معاك من الطفوله لاكن انت قلت انك كنت كويس لحد ثانوي ف مش ضروري يكون عندك حاجه تانيه ان سن المراهقه بيكون معاه طاقه عاليا ومشتتات كتير ورغبه انك تجرب حجات كنير وتنطلق ده ف العادي اصلا ف لو انت مش بتفرغ طاقتك ف رياضه ونشاط اكيد هتقعد ع الكتاب تفكر ف اي حاجه تخلصك منه ف ممكن تجرب حاجه انك تلتزم بالرياضه والاكل الصحي وتقلل استخدام الفون وتعمل وقت ف اليوم تفرغ بيه عن نفسك ويوم ف الاسبوع تخرج فيه ووقت المذاكره تبعد عنك اي مشتتات والفون وتقعد ف مكان هادي تذاكر فيه ماده واحده مش مواد كتير وكتاب واحد مش كتب كتير وتذاكر بصوت عالي متذاكرش بصمت وحاول تذاكر عن طريق الشرح انك تشرح لحد وان بتذاكر عشان تقوي عندك الفهم والتركيز ف يكون النسيان اقل واستخدم خرايط ذهنيه لتلخيص كل جزء ولخص الاجزاء المهمه عل هيئه نقط بسيطه سهله الحفظ والفهم وعيد على نفس المعلومه الي حفظتها كتير عشان تساعدك على سهوله عمليه الحفظ والتخزين وقسم الماده اكتر من جزء وكل جزء تخلصه قوم واتحرك كل حاجه اشرب حاجه خمس دقايق وارجع تاني وبعد كل جزء كبير تخلصه كافئ نفسك بحاجه بتحبها تحفزك انك تكمل وبعد كل درس بتروحه ترجع تذاكر الدرس لانك لسه سامعه وتحل عليه الواجب وتبص على درس قديم من اول السنه عشان تذاكر الي فاتك ف نفس الوقت حاول تعمل النظام ده الترم ده عشان لو لقيت عليه نتيجه تكمل عليه ف ٣ثانوي وان شاءالله ربنا يكرمك
تم النشر الأحد، ١٢ مارس ٢٠٢٣
إنت شكلك عندك وعي كويس بأساليب المذاكره وسمعت فيديوهات كتير ف غالبا كده هتلجأ إن حد يقعد معاك صاحب دحيح حد من اخواتك أو مدرس أو مكتبه.. يعني أجواء مهيئه إنك مش تقوم وحواليك كل احتياجاتك ومسحوب منك أي مشتتات وجرب تشغل فيديوهات اليوتيوب مذاكره قصادك بس من غير إعلانات برضو شوف الاسئله هنا مليانه أفكار للمذاكرة
تم النشر السبت، ١١ مارس ٢٠٢٣
بص في نظام جميل اوي انك تحط stop watch جمبك فيها انك تذاكر 45 دقيقه وتاخد بريك 15 ساعه بحيث انك فالبريك تعمل الحاجه اللي بتحبها زي الاكل او اي حاجه تانيه بحيث اليوم يخلص ولو كررت الموضوع ده اقل حاجه 3 مرات فاليوم هتلاقي انك ذاكرت 135 دقيقه يعني ساعتين وربع ده اعتقد احسن من خمس ساعات وانت مشتت
تم النشر الثلاثاء، ١١ يوليو ٢٠٢٣
من الناحية العلمية متعملش اى اسقاط لاى مرض على نفسك لان التشخيص بيبقي ليه مراحل كتير غير الاعراض المشهورة. انت بتهرب بس او كنت بتعمل مجهود كبيير اوى فى اولى ثانوى ووصلت بشكل لاواعى انك خلاص مش قادر. محتاج تعمل اعادة تقييم لنفسك...تحل امتحان لوحدك فى كل مادة مع التايمر تظبطه على وقت محدد ...زى لجنة الامتحان. وتنسي خالص بقي شطارتك القديمة وتاخد التقييم الجديد من درجة الإمتحانات دى. وواظب على الصلاة والقرآن عشان تكون اهدى.
تم النشر الأحد، ٢٦ مارس ٢٠٢٣
لعرض السؤال في فدني اضغط هنا