طيب خلينا نتفق على كم نقطة عشان تعرفي تشوفي طريقك كويس وقبل ما تضعي أي خطط، أولًا، إحساس بالذنب والتقصير والخنقة، كل ده مش هيقدم ولا هينفعك بحاجة وبالعكس هيخليكِ مقيدة وعاجزة عن إنك تشوفي المخرج. ثانيًا، إحساس الضغط والخوف والتوتر وإن الدروس تراكمت عليّ، ده كمان مش هينفعك بحاجة... التوتر هيفقدك تركيزك ويشتتك والضغط هيزود الخنقة اللي عندك وكمان هيتسبب في إن عقلك يتهرب من المسؤولية اللي عليه. لأن ده الطبيعي وعقلنا مبرمج على حمايتنا وجعلنا دائمًا في حالة أمان وبالنسبة له المسؤولية والمذاكرة ده تعب وجهد بدون مكافأة قريبة فيعتبر دي حالة محتاجة حماية منها فبيدفعك للتسويف. الحل إيه؟ الحل إنك تهدي خالص، وتقعدي مع نفسك كده جلسة ساعة أو اتنين زي ما يناسبك... اعملي مشروب بتحبيه أو أعشاب تساعدك على الاسترخاء... هاتي ورقة وقلم وفرغي كل أفكارك وكل مخاوفك وكل الأسباب اللي مخلياكِ مش قادرة تزاكري وكل الأسباب اللي لازم تذاكري وتنجحي عشانها. الكتابة هتفيدكِ هنا بحاجتين، أول حاجة تفرغي عقلك وتوترك وثاني حاجة إنك تعيدي ترتيب أفكارك وتتخلصي من أي فكرة سلبية هتوقفك وتركزي مع أي فكرة إيجابية هتنفعك. بعد ما فرغتِ أفكارك ومخاوفك تبدأي تبرمجي عقلك ونفسك، أنا ليه محتاجة أخرج من الحالة دي وإيه الحلول والخطوات اللي ممكن آخدها عشان أخرج منها، هل حياتي ومستقبلي لا يستحق إني أكون حازمة أكتر مع نفسي؟ هل أنا للدرجة دي شايفة نفسي ضعيفة أو لا أستحق مستقبل كويس أصنعه بنجاحي؟ جاوبي على نفسك وكلميها بإيجابية لأن ده هيفرق كتير. بالنسبة لنقطة تراكم المواد، لو فضلتِ باصة على الجبل اللي وراكِ هتفضلي مخنوقة وحاسة بالعجز لكن لو أخدت من الجبل ده حبة حبة مع الوقت هينقص... خدي خطوات بسيطة أفضل من وقوفك مكانك. كل خطوة هتاخديها هتقربك من الهدف وكل إنجاز ولو بسيط هيحمسك تبذلي أكتر. ومهم جدًا طريقة كلامك مع نفسكِ لأن عقلك الباطن بينفذ اللي انتي عاوزاه، هتقولي له أنا فاشلة وكل حاجة تراكمت عليّ وأنا مش هقدر هيقولك تمام أنتِ زي ما قلتِ. وبلاش تقسي على نفسكِ لكن في نفس الوقت يكون فيه درجة من الحزم معها، خليكِ مرنة. أهم حاجة بقى وأهم من كل اللي فات، تجددي نيتك من الدراسة وإن يكون تفوقك لوجه الله وإنك تحافظي على صلاتك وأذكارك، إذا أنتِ مسلمة قومي صلي أول ما تسمعي الآذان، المواظبة على الصلاة مش بس هتساعدك تقربي من ربنا كمان هترتب لك وقتك ومواعيدك وهتخليك منظمة أكتر. لو ظبطتِ جدول مذاكرتكِ ومهامك مع مواعيد الصلاة وما بينها هيفرق كتير معك وعن تجربة. أرجو إني أكون قدرت أفيدك، وممكن كمان تبحثي في شريط البحث في فدني هتلاقي أسئلة كتير شبيهة لسؤالك ممكن تفيدك قراءة النصائح فيها. بالتوفيق إن شاء الله.
العفو، سعيدة إني قدرت أفيدك. ربنا يوفقك وينفعكِ بكِ 💚 💚
تم النشر الأربعاء، ٢ أكتوبر ٢٠٢٤
بجد شكرا جدا إستفدت من حضرتك كتيير🤍✨
تم النشر الأربعاء، ٢ أكتوبر ٢٠٢٤
لعرض الإجابة في فدني اضغط هنا