كيف نجد النور وسط الظلام ونتمكن من الخروج من دائرة الفتور والفراغ؟

Question

كل واحد فينا بيمر بفترات فتور فى حياته بيحصله upside down , بيحس فيها بمشاعر كتير منها الوحدة والاكتئاب والفراغ وعدم القدرة على إنجاز أي شيء وانه ما بيعملش حاجة ذات قيمة وتكون رغبته في الانعزال قوية جدا وبتصبح العبادة ثقيلة جدا .. وحرفيا الدنيا بتبقى ضلمة في عقلك ونفسك - نورك بيروح - وافضل تشبيه إنك بتكون زي اللي بيغرق لا قادر تطلع لفوق ولا قادر تسيب نفسك وخلاص ، وللأسف الفترات دي بتختلف من شخص للتاني باختلاف المواقف والوقت اللي بيكون فيه في الحالة دي ، إزاي نطلع برا ال cycle دي ونلاقي النور في وسط الضلمه دي ؟

Accepted Answer

فعلاً كلنا بنمر بالفترة دي من وقت للتاني حتى لو كنا ماشيين كويس جداً فجأة بنعطل ومابنبقاش فاهمين السبب أو ايه الحاجة الغلط اللي عملناها عشان ندخل ف الحالة دي بل يمكن بنقع ف الحفرة دي بعد فترة إلتزام مُعتبرة.. ************************************** ومن وجهة نظري وتجربتي الشخصية كبنت زي كل البنات بختبر تقلبات مزاجية كتير لكوننا بنمر بتغيرات هرمونية متكررة بطبيعة الحال ف بقيت بشوف ان الفترة دي هي فترة تعبير جسمي عن احتياجه للراحة .. بمعنى لو جسمي قادر يتكلم هيقولي أنا محتاج أرتاح شوية من الجري والإنتاجية والإنجاز والإلتزام بالقواعد الصارمة كل ده جميل بس ريحيني شوية يا شيخة عايز افصل نفسسسي أفصل وأرتاح شوية 😅 وبصراحة انا ف الأول ماكنتش بفهم ده بسرعة وكنت بفضل أفرك وأحاول أقوم بكل حاجة بالشكل الطبيعي المعتاد وأتجاهل مشاعري ، بس كنت بفشل كل مرة وبستسلم للراحة ف النهاية ، بس بعدين بقا فهمت الفولة وبقيت متصالحة مع الحالة دي وبسمي الأيام اللي بتحصل فيها أيام العشوائية الهادفة لأنها فعلاً هادفة عشان نقدر نفرغ الضغط ونشحن طاقتنا مش مجرد وقت هنضيعه وخلاص ف الكسل والاستمتاع ، و في الأيام دي بقعد أقول لنفسي فيها ايه لما أخرج عن القاعدة وفيها ايه لما أعيش يوم من غير ما عيني تبقى ملاحقة عقارب الساعة ، فيها ايه لما ييجي ف دماغي فكرة حلوة هتبسطني واقوم دلوقتي أنفذها مش أقول بعدين و لما أفضى و لما أخلص الشغل الفلاني ولما أحقق التارجت العلاني ، بقيت برحب جداً بمشاعر الضعف والركود والإعياء ف الأيام دي وبتسامح معاها جداً ومع طبيعتي البشرية ما أنا بردو مش آلة ده حتى الآلات أوقات بتعطل بسبب حِمل زائد أو سوء إستخدام! ف بقيت رحيمة بنفسي أكتر وبفضل أدلل فيها وأعترف بإنجازاتها ونجاحاتها مش بنكرها وبحاول أفكر نفسي بيها واقولها كلام حلو و يطمن من غير ذرة لوم أو إجبار و يادوب بلتزم بأبسط قدر من الضرورات اليومية خلال الأيام دي زي الصلاة والنظافة الشخصية وهكذا.. ، وكمان بحاول قدر الإمكان ماقضيش كل الوقت لوحدي وبنتهزها فرصة بحاول أعوض بيها إنشغالي عن أهلي وصحابي طول الفترة اللي فاتت وبجرب أشاركهم أي لحظات لطيفة حتى لو كنت out of mood بقول لنفسي أكيد هتنبسطي ولو شوية وهتغيري جو وهتحسي بالونس جربي مش هتخسري حاجة وفعلاً مش بندم وبضحك من قلبي معاهم وبفضفض عن اللي مضايقني إذا أمكن وبتخلص من معظم الطاقة السلبية اللي عندي . ************************* ودي كانت تجربتي والخطوات البسيطة اللي بعملها وبتفرق معايا أتمنى إنها تفيدك وتفرق معاك ولو بقدر بسيط 💌✨️

Answer

السلام عليكم أولا اعتقد أن كل إلي حضرتك فيه مر علي ناس كتير والمشكله أن بيبقا إحساس مش حلو خالص لما تكون عايز تعمل حاجه أو عايز تنجح ومش عارف وبرضوا مش عارف تعيش مجرد إنسان بائس في الحياه بس هل إحنا سألنا أنفسنا قبل كده ده بسبب اي ؟؟! أولا كده دي بتبقي وساوس من الشيطان وده عايز يحبطك ثانياً عقلك بيبقا مركب أن أنا مش قادر اعمل الحاجه دي فانت بتقول أنا بجد مش قادر ومش عارف واخره بس ده كلوا اصلا من عقل الباطن لإنسان ثالثاً وده الأهم أن ده اوقات بيكون بسبب كثره الذنوب الي إحنا بنعملها في حياتنا اليوميه يعني تعال مثلا نجرب نبطل ذنوب يوم كامل نصلي ونقرا الورد ومنشتمش ومننشرش اي حاجه وحشه زي اغاني او كده ومنزعقش لحد من الوالدين أو صوتنا يعلي عليهم ونستغفر ربنا وشوف بقا اليوم ده هيكون عامل إزاي حرفياً هتكون طول اليوم فرحان هتحس أن شغفك رجع تاني وانك حابب نفسك والدنيا نورت قدامك وبجد هتكون فرحان وفي الاخر برجوا من الله أن يوفقك وأن يزيل عنك كل هم وحزن

Answer

عشان تلاقي النور وسط الظلام وتخرج من دائرة الفتور والفراغ، لازم تبدأ بقبول اللحظات دي كجزء من حياتك. حاول تشوف الفترات دي كفرصة للراحة والنمو، وتجنب الضغط الزائد على نفسك. كمان حاول تعيد التواصل مع الأشياء اللي بتحبها، زي الهوايات أو الأنشطة اللي بتجلب لك السعادة. أهم حاجة إنك تظل على اتصال بالآخرين وتحافظ على روتين مرن يسمح لك بالتغيير والنمو الشخصي.. لما تلاقي نفسك في لحظات الزهق والفراغ ده ، افتكر انها مش نهاية الطريق، هذه اللحظات ليست نهاية الطريق، بالعكس دي بتكون بدايه جديده عشان تفهم نفسك،تعرف ان واحنا مدايقين بنطلع بأفضل أفكار، الفتور لا يعني ضعفك، بل هو دعوه عشان توقف، لإعادة ترتيب أولوياتك، وانك تشوف النور ف اماكن مكنتش بتشوفها قبل كده . قد يكون النور في لحظة هدوء أو في كلمة طيبة من شخص قريب. ثق أن الفترات الصعبة هي التي تصقلك وتمنحك القوة لتكون أفضل مما كنت عليه. وافتڪر النبي ﷺ لمّا اتأذي من أهل مكه والطائف، وضربوه بالحجاره وخذلوه، ف أشد لحظات حزنه واحتياجه لكلمه طيبه، اللهمَّ إليك أشكو ضَعْفَ قوَّتي، وقلةَ حيلتي، وهواني على الناسِ، يا أرحَمَ الراحمِينَ، أنت رَبُّ المستضعَفِينَ، وأنت ربِّي، إلى مَن تَكِلُني؟ إلى بعيدٍ يَتجهَّمُني، أو إلى عدوٍّ ملَّكْتَهُ أمري؟! إن لم يكُنْ بك غضَبٌ عليَّ فلا أُبالي، غيرَ أن عافيتَك هي أوسَعُ لي، أعُوذُ بنورِ وجهِك الذي أشرَقتْ له الظُّلماتُ، وصلَح عليه أمرُ الدُّنيا والآخرةِ، أن يَحِلَّ عليَّ غضَبُك، أو أن يَنزِلَ بي سخَطُك، لك العُتْبى حتى ترضى، ولا حولَ ولا قوَة إلا بالله " وأمرنا إن إحنا نقول الدعاء ده لما نمر بلحظات زي دي، وهنشوف كرم ربنا بعدها، واحنا بنقتدي برسول الله، ف متيأسش وصلِّ علي النبي ڪده وروق ❤ وبعدين يڪفيك إن حضرتك مسلم ومؤمن بالله والرسول، ده أڪبر إنجاز ف حياتك بجد ❤

كيف نجد النور وسط الظلام ونتمكن من الخروج من دائرة الفتور والفراغ؟

نفسية

شغف

منوع

تجارب

سؤال من Abdulrahman Ahmed

تم النشر الأربعاء، ٢٥ ديسمبر ٢٠٢٤

6 إجابة

17 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك