مشكله مع حماتي

Question

كنت عاوزه اخد رأي حد اكبر مني ف الحاجه ديه لاني مش هينفع اقولها لأمي عشان مش عايزها اضايقها وازعلها عليا انا متزوجه من سنتين ف مكان بعيد جدا عن اهلي ف بيت عيله وربنا رزقني بأبني يوسف من ساعه ما اتجوزت وانا قولت اني هعامل والدته زي امي وانا عشان متربيه ف عيله فيجب جو الدفا ده وكنت فاكره اني هلاقيه هنا بس ملقتش ده خالص وكنت باعملها بما يرضي الله ويضحك وبهزر معاهم مع أن هما ملهومش ف الهزار الحكايه بدأت من ساعه ما لاقيت أن كل كلمه بصفة نيه بقولها بتقعد تترجمها هما بمعرفتهم مبيفكروش أن فعلا ال قدامهم نيته كويسه وطبعا انا كنت بطلع كل يوم عشان بقا اساعدها وكده لقيتها بتقولي لا انا مبحبش حد بعملي حاجه انا مبحبش عمايل حد انا بعمل بنفسي فكلمتها متقلقيش والله هعمل زي ما انتي عايزه بس ارتاحي شويه فصممت ع رأيها وطريقتها خلتني مع الوقت مبقتش اطلع زي الاول بقيت بطلع ٣ ايام ف الاسبوع بس بسبب طريقتها وكمان أن كل كلمه لازم اعمل عليها كنترول وانا مبعرفش اقعد مع حد مش واخده معاه راحتي المهم جيت لما حملت قولتلها وبفرحها انا حامل قالتلي لا طبعا انتي لسه متجوزه ملحقتش ده انتي مكملتيش شهر استني ع نفسك شويه فبعد ما كنت فرحانه اضايقت اوي واتكسرت فرحتي المهم ف الشهر الرابع عرفت أنه ولد ف جيت اقولها فقالتلي مايمكن بنت وانتوا مش شايفنها عدل اصلا السونار مبيبينش صح فزعلت اوي وملامح وشي اتغيرت من بعد الفرحه وراحت قالتلي عارفه جارتنا كانت طول حملها تقول انها حامل ف ولد لحد اما ربنا كبسها ولما ولدت جابت بنت فبصتلها كده كان هاين عليا اعيط اوي روحت قولتلها والله الفكره مش ف النوع ايه الفكره أنه يبقي بصحه كويسه وخلاص وانا أبقا اسعد واحده لو ربنا رزقني ببنت اصلا وروحت نازله ومن ساعتها مبقتش اطلع غير كل اسبوع مره كده .. واتعب واروح لدكاتره وميهونش عليها تطمن عليا وتزعل عشان أنا مقولتلهاش المهم كان جوزي متفق قبل الولاده مع امي اني أولد ف القاهره عندها عشان تراعيني فجت مامته وبباه ف الشهر التامن قالوله هي مش هتولد غير هنا ومامتها تبقا تجيلها هما أصروا عليه اوي وطلع يقولي قولتله انا عاوزه أولد عند امي هي ال هتراعيني لكن مامتك مش هتسأل فيا والله حرام عليك أبقا ف الدنيا هنا لوحدي وكمان ف ولادتي المهم مامته صممت وقالتله لو ولدت هناك مش هترجع ع البيت لا هي ولا ابنها وفضلت اعيط لأسابيع بسببها وعشان خاطر زوجي وميعارضش أبوه وأمه رضيت امي وقولتلها معلش ياامي خليني أولد هنا ولما شافتني عيني وارمه من العياط قالتلي مالك بصتلها وسكت قولتلها الحمدلله وبباه قالي مش لازم تولدي هناك اصلا المفروض تولدي ف بيتك وبعدين ام زوجك ماهي امك برضو وهتشيلك ومراته اخوه قولتله انا عاوزه امي قالي يعني انتي كده قصدك أن ديه مش امك يعني امال ايه فرضيت وولدت هنا عشان كانوا هيعملوا مشكله كبيره معاه المهم قبل معاد ولادتي مسحت الشقه كلها وغسلت السجاد عشان امي كانت جايه اليوم ال بعده عشان ولادتي تاني يوم فراحت حماتي قالي انتي بتمسحي ليه امال هما هييجوا يعملوا ايه قولتلها امي انا ال اعملها مش هي ال تعملي والحمدلله ربنا مديني صحه اعمل لنفسي مينفعش اتعب امي كفايه هتقعد بيا وهي تعبانه الحمدلله ولدت ع خير وبعد اما امي مشيت بعد ولادتي بأسبوع ونص حماتي نزلت تشوف ابني فالست غصب عنها ف اول ولاده ليها بتبقي خايفه ع ابنها اوي من اي حاجه ومن اي حد فكانت المفروض تفهم ده فكانت عايزه واحده معاها فوق قولتلها ماشي بس حست اني مضايقه المهم خدته فوق وبعدين نزلته وقالتلي كان عطشان فشربته مايه قولتلها ازاي يعني مينفعش يشرب اي حاجه غير اللبن بتاع أمه وبس بعد اذنك ياماما متشربيهوش تاني جت بعدها بيوم جوزي طلعه فوق بعد ربع ساعه كده سمعته بيضرخ جامد فاتصلت بجوزى بسرعه اطلع شوفه والنبي شكله بيعيط راح طالع واخده ومنزله من ساعتها وهما قطعونا خالص والولد مكملش حتي الشهر وهي منزلتليش ولا مره تشوفني عامله ايه ولا بأكل ولا لأ ولا اي اهتمام زي ما كانوا قايلين وانا كنت فضلت لحد الاربعين وانا تعبانه جدا من العمليه والجرح ملتئمش كويس وبسبب البنج الكلي كمان من ساعه ما ولدت مهانش عليها تطمن عليا بتنزل بس عشان تشوف يوسف وتنزل المهم فضلوا لحد اما يوسف تم ال٦ شهور مش بيكلموني لا انا ولا زوجي وكل ده عشان افتكروا أنه لما طلع خد الواد أنه كده انا بلوي دراعهم بالعيل وان جوزي ماشي ورايا .. بعد المده ديه طلعتلهم لما لقيت جوزي تعبان جدا بسبب كده مع انهم هما ال غلطانين معايا ف كل حاجه حتي ف سوء ظنهم طلعتلها بيوسف وقولتلها هو حضرتك زعلانه ليه من جوزي قالتلي انتوا خدتوا الواد ع أساس انكوا بتلوو دراعنا وانتي خدتي جمب فقولت براحتك بقا قولتلها اولا انا لا قصدي كده ولا اي حاجه وفهمتها وقولتلها انا كنت تعبانه جدا وحتي منزلتليش تشوفيني ولا تسألي زي ما قولتي قولتلها ع العموم انا طلعت عشان جوزي تعبان انكوا واخدين منه جمب وهو معلش حاجه خلص الموضوع ده جه موضوع تاني اكبر روحت عند امي بعد الولاده ب٣ شهور كده المهم رجعت البيت بعدها بكام يوم نزلت وانا ماشيه لقيت عند بتاع الجواهري دبله عجبتني فقولتله ينفع ابيع اللي معايا واخد ديه قالي هحسب المهم طلع فرق الف ونص قولتله ماشي رجعت البيت قولت لجوزي قالي براحتك لو عايزه تغيرها ماشي عشان بتاعتي كلها فصوص ومعظمها وقع فبقي شكلها وحش فقالي بصي عشان مش معايا فلوس فخدي الخاتم التاني وادفعي الفرق قالته وصحيح هو قالي أن ده عيار ١٨ مش ٢١ وأنه كمان مش لازوردي فسوف الفاتوره كده لحسن تكون الست نصبت عليكوا فقالي طب هاتيهم كده وانا اطلع لابويه المهم جيت ادور عليهم ف العلبه ملقتش الاسوره والخاتم بتاعها فقولتله قالي طب دورى عليهم ع ما أنزل قلبت عليهم الشقه قبل ماينزل فكل حته حتي الزباله مفيش نزل سألني وقلتله قعد يدور معايا ملقناش حاجه بعدها مسحت الشقه 3 مرات من كل حته ومن تحت كل حاجه وبرضو ملقتش قعدت اعيط كتيير اوي وخوفت من رد فعله وقعد يقول انتي مهمله والمفروض تحافظي ع حاجتك مع اني والله محلصش حاجه كده مني قبل كد

Accepted Answer

طاقتك هتهدر لو بقيتي بالشكل ده ومش هتعرفي ولا تركزي مع ابنك او زوجك. ف انتي حاولي تهدي وتركزي ع بيتك وابنك وزوجك، اما حماتك حاولي تعرفي شخصيتها كويس .. اتكلمي مع زوجك واعرفي منه هي بتحب ايه .. او تعملي ايه علشان ترضيها .. وتكسبيها علشان الحياة بينكم تبقى احسن .. علشان لو فضلتي تركزي في اللي بتقوله او اللي بتسمعيه من بره انتي كده مش هتبقى في احسن حال ولا مع زوجك ولا مع ابنك. ف انتي حاولي تهدي كده اولا .. وكبري دماغك من كل اللي بتسمعيه علشان تعرفي تعيشي وتهتمي بنفسك وبيبتك. وحاولي مرة كمان تعرفي مفاتيح وشخصية حماتك وازاي تتعاملي معاها منن زوجك ومن خلال برده معاشرتك ليها.

Answer

جميل طبعا انك طموحاتك كان ليها شكل اسري جميل ومليان ود وحب بين البيت. اامشكلة انك فكرتى فى تفاصيل ورسمتيها فى خيالك ...رغم انك متعرفيش الاطراف الاخرى هيناسبهم التفاصيل دى ولا لا . مش معنى ان تفاصيلهم وطريقتهم مختلفة ان لازم يكونوا وحشين. شخصيتك حساسه اوى لاى حاجة تطلع عكس التوقعات ...حاولى تبطلى توقعات لتصرفات الاخرين ...لان توقعاتك مش مبنيه على شخصياتهم دى كلها من وحى خيالك. ربنا يباركلك فى ابنك وانتى شخصية مبادرة بالخير واستمرى فى ده واعمليه لوجه الله وربنا هيمن عليكى بمواقف احلى من اللى وجعتك بكتير.... حتى لو اهل زوجك قصدهم حاجة وحشه فده ممكن تكون الحاجة المره اللى قصاد ان زوجك حنين وكويس معاكى...

Answer

حضرتك واضح من كلامك ان زوجك كويس معاك وان المشاكل جاية لكم من برة تحديدا من ناحية مامته وباباه حضرتك محتاجه تهدي اعصابك شويه وتتقبلي بعض الامور ال مش هتعرفي تغيريها حاليا - ولكن ربما تتغير فيما بعد ان شاء الله الله اعلم- اولا لازم تركزي اهتمامك على بيتك ونفسك وزوجك وابنك وتهتمي بلجوانب دي كويس ومن كلامك واضح ان الامور ماشيه نوعا ما في الناحيه دي ثانيا علاقة زوجك بأهله مسؤوليته هو ملكيش انت تدخل فيها ولا تروحي تقوليلها اصل زوجي صعبان عليه عشان انتوا مقاطعينه ولا انتو ليه مش بتكلموه ولا اي حاجه هو كابن ليهم يعرف ازاي يراضيهم ويودهم ويحل خلافاته معاهم ويبين لهم ليه اخد الولد ونزل وووووو فده تتعلميه في حياتك بعد كده علاقة زوجك بأهله مسؤوليته هو .وهو بيعرف يحافظ على علاقته بيهم او يخسرها انت متتدخليش ابدا في النقطه دي ثالثا بالنسبه لموضوع ولادتك لوحدك هو فعلا شئ يضايق ولك حق تزعلي ولكن في امور في حياتنا لما بتتحول لأمر واقع بيكون لازم نواجهها ونحاول نخرج منها بأقل الخسائر الممكنه ايوة بعد الولاده الام بتكون تعبانه ومحتاجه ال يراعيها ويساعدها ولكن في بنات كتير جدا جدا جدا ربنا قدر انها تولد في الغربه وتشيل نفسها وبيتها وعيالها وربنا بيعين ويساعد والحمد لله مامتك جت وقعدت معاك عشر ايام اكيد افضل من لو مكنتش جت اصلا رابعا بعد فترة من العشرة بينك وبين زوجك هتلاقوا نفسكم بتعرفوا تتعاملوا افضل وتحطوا حدود لبيتكم وحياتكم بشكل اكثر خصوصية وكده يعني ان شاء الله البيبي الجاي او ال بعده كده بإذن الله هتلاقي قرار ولادتك فين ده هيبقى مسؤوليتك انت وزوجك فقط ومحدش هيفرض عليكم حاجه ان شاء الله خامسا حاولي تفهمي شخصية حماتك عشان تعرفي تتعاملي معاها كويس .أغلب ظني وحسب ما حسيت من سؤالك انك غالبا اول زوجة ابن ودي بتبقى زي اول طفل بيتولد في الاسره كده بيكون الشخص معندهوش خبرة وبيحاول يحط كل الحاجات الحلوة فيه ويعلمه كل الحاجات الصح ويديه خلاصة التجارب وووو وبيجي في الاطفال ال بعد كده بيكون هدي شويه وعرف يتعامل مع طبيعه كل مرحله بالشكل ال يناسبها انا مثلا اول مولودة عندي كنت بتكلم بالفصحى معاها واجيب لها العاب منتسوري واحفظها قران وهي لسه مكملتش سنتين ولما كبرت شويه كنت بحاول ازرع فيها حاجات كتير عشان تتجنب اخطائي وتتجنب صعوبات حياتيه معينه ولكن بعد كده عرفت ان ده كان حماس البدايات وان اول طفل بتحاولي تزرعي فيه كل حاجه حلوة ولكن الزمن بيربي والمجتمع بيربي وكل سن له تجاربه وخبراته وطريقة استجابته للنصيحه ( انا طولت في النقطة دي شوية معلش) نرجع لحماتك واضح انها عاوزة تنصحك وتفيدك ولكن ممكن تكون مش حنينه شويه او جافه شويه في التعبير عن الفرحه او مش بتعرف تعبر عن السعاده وتشارك ال قدامها ففرحته لما بتقوليلها انا حامل معرفتش تفرح معاك الاول وبعدين تنصحك بان الحمل لو اتأخر شويه بيكون له فوائد مثلا انك تاخدي على زوجك وتتعودوا على بعض وتعيشوا شويه من غير مسؤوليات وكده لما بتقوليلها حامل في ولد معرفتش تشاركك الفرحه برضه واخدت اتجاه النصيحه انك متتعشميش اوي انه ولد عشان في ناس بتتعشم وبتضايق لما يطلع النوع مختلف خي واضح انها عندها مشكله بس في طريقه توجيه النصيحه وعندها مشكله تانيه ان مشاعرها ربما تكون مكبوتة او جافه شويه بدليل انها زعلت لما رحت للدكتور ومقولتيش ممكن كانت عاوزة تنصحك بحاجه تعمليها مثلا تكون مرت بنفس التعب وعارفه علاجها كده يعني حتى لما اخدتوا الولد تجنبتكم وسابتكم براحتكم هي شايفه انها سايباك براحتك ومش عاوزة تثقل عليك وامت تقريبا بتحبي العيله واللمه والاجتماع وكده اتوقع مع الوقت والعشرة هتكتشفي ان حماتك متقصدش تضايقك ولكن طبعها كده طبعها ان مشاعرها مكبوته مش بتعرف تطلعها وال زيها بيعاني على فكرة وطبعها انها بتنصح وتوجه بطريقه تبان مزعجه ولكنها متقصدش سادسا سوء الظن طبعا حاجه تضايق واوقات بتتحطي في مواقف لو قلتي الكلمه هتتفهمي غلط ولو مقلتيش نفس الكلمه برضه هتتفهمي غلط ولكن كل ده هيجي وهتفهميه مع الوقت والعشرة والمواقف هتعرفي هي بتاخد الامور ازاي هل هي قلوقه جدا فبتتجنبي تقولي ال يقلقها هل هي بتبالغ فبتحاولي تقولي المواضيع بشكل مبتذل عشان لما تبالغ فيه ميبانش ضخم كده يعني اسابعا ادعي كثير كثير بالدعاء ده ( اللهم ارزقني القدرة والشجاعه على تغيير ما يمكن تغيره والصبر على تحمل ما لا يمكن تغييره والحكمة في التفريق بينهما) ( اللهم دبر لي فإني لا أحسن التدبير ) ( يا حي يا قيوم برحمتك استغيث اصلح لي شاني كله ولا تكلني الى نفسي طرفه عين) واحرصي على اذكار الصباح والمساء واصبري واعرفي انها مسألة وقت وكله بيتعدل ويتغير ثامنا موضوع الذهب اكيد لك حق تتضايقي وتزعلي ولكن حاولي تدوري تاني وترددي الدعاء ده ( اللهم يا جامع الناس ليوم لا ريب فيه رد علي ضالتي )

مشكله مع حماتي

اجتماعية

دينية

علاقات

سؤال من احد أعضاء فدني

تم النشر الأربعاء، ٢٨ ديسمبر ٢٠٢٢

3 إجابة

7 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك