انا عندي 18 سنه من وانا صغيره كنت بتعاير بنقط ضعفي اللي هي زي رفيعه وتخينه وكد حصلت كذا مره وانا صغيره بس لحد دلوقتي فكراها ومن فتره حصلت تاني بس المرادي مش مع اي حد لا دي حصلتلي من اعز واقرب صحبه ليا كنت بحبها اوي ومازلت حصل مشكله بينا جامده اوي وحد من اهلها عايرني بكده يعني بس من تلفونها يعني مش من تلفون تاني وهي كانت سامعه وعارفه دي من ضمن المشكله اتقالت علشان اتضايق وكد وانا مسكتش وقولت كلام وحش بردو ولما الكلمه دي اتقالت قولت مش هتكلم تاني وكبرت المشكله زياده عن حدها اوي علشان الكلمه دي بالذات أثرت فيا اوي ومش مصدقه انها جتلي منها هي بالذات المهم بعدنا عن بعض فتره كبيره اويي لحد ما من فتره اتصالحنا بس كل واحد ف حالو مش زي الاول خاااالص رجعنا اغراب وانا في الفتره دي قربت من صحاب تانيه كويسين بعرف اضحك من قلبي معاهم بس من كام يوم اتقالي نفس الكلمه ف انا مش عارفه اعمل اي انا مش عايزه اكرر الغلطه اللي غلطها في الاول تاني واخسرهم انا ما بصدق اعمل صحاب لاني انطوائيه شويه وصعب اعمل صحاب بسهوله تاني ف مكلمتهمش تاني علشان عايروني بالكلمه دي زي مع عملت ف صحبة عمري ولا اعديها بس انا مش بقدر انا من النوع اللي لما بسمع حد بيقول عليا حاجه زي كد بعيط طيبيعي كل البشر كد انا خايفه اخسر وف نفس الوقت خايفه اخسر كرامتي ونفسيتي اللي بتبقا زي الزفت من كده....... اسفه علي الرغي الكتير دا بس انا بجد تعبانه اوي💔
اول شئ انتي مراية نفسك بتعكس اللي جواكي للناس اللي حواليكي .. بمعنى ان الناس مرايتك بتوضحلك انتي بتحبي نفسك ولا لاء وبتشوفي فيها مميزات ولا عيوب وبس .. حبي نفسك وتقبليها زي ما هي واسئلي نفسك وجاوبي على الاسئلة .. ايه الحاجات الحلوة اللي فيكي واللي جواكي ؟ ايه مميزاتك؟ انتي شاطرة في ايه؟ ايه عيوبك ؟ ليه شيفاها عيوب ؟ ولو في امكانك التغيير تحبي تغيريها لايه؟ وليه عايزة تغيرها ؟ قيمي اهمية التغير من 1 الي 10 بالنسبالك؟ مين المسؤل عن التغيير؟ مين ممكن يساعدك ؟ هتكافئ نفسك بايه ؟ حاولي تشتغلي على زيادة ثقتك بنفسك ونصيحة بلاش توزني حياتك بميزان الناس لان ميزان الناس مش عادل.. حبي نفسك لنفسك وكوني نسخة أفضل منك لنفسك
تم النشر الاثنين، ٢٥ مارس ٢٠٢٤
بصي ابعتي رساله علي الواتس يابنات انا بتضايق من الموضوع دا بجد وانا بحبكم بس فعلا الموضوع دا بيأثر فيا ومش بحب الهزار فيه ف ممكن من فضلكوا محدش يتكلم فيه تاني نهائي لقيتي فيه تريقه واستهتار بالرساله قولي شكرا لزوقكوا واعملي بلوك فورا وانسيهم وربنا هيبعتلك الاحسن منهم وعتشتغلي علي نفسك اكتر وهتبقي احسن صدقيني اهم حاجة متخسريش سلامك النفسي
تم النشر الأحد، ٢٤ مارس ٢٠٢٤
اهلا بيكي يا جميل .. بصي ياريت تحاولي تعبري عن اي شئ بيضايقك .. لان كلمة هتتقال ليكي دلوقت، او حتى حد ممكن يقولك حاجه بعدين، ومثلا يكون قاصدها هزار ..ياريت تتكلمي وقتها. لان كل واحد المفروض يكون له حدود .. حتى ما اقرب الناس له ولو افترضنا انهم صحابك. قولي لهم انا مش بحب الهزار ده .. عبري عن اللي جواكي. علشان اللي قدامك كمان يعرف انك ليكي حدود معينة ومحدش يتخطاها.
تم النشر الأحد، ٢٤ مارس ٢٠٢٤
بكل بساطه تقولي لصحابك ( محدش بيختار جسمه ولا شكله دي خلقة ربنا وانا راضيه بجسمي جدا و مش مستنيه أسمع تعليق من حد عليه ومش مجال للهزار ولا بسمح بالنوع دا من الكلام ) خليكي واضحه ومعروف عنك إنك مش بتتقبلي نوع الكلام دا و وقتها مش هيتقال لا بهزار ولا بجد ولا وسط خناقة .. لازم تحطي حدود لنفسك محدش ينفع يعديها .
تم النشر الأحد، ٢٤ مارس ٢٠٢٤
ولو على الوحده جربى تقعدي مع نفسك وتدى نفسك وقت كل يوم تقرأى فى كتاب مثلا تسمعى بودكاست تتعلمي هوايه وهكذا بلاش كل وقت من حياتك تكونى مثلا معتمده انك مع حد فيه وعشان برده تتعودي انك عادى بتقعدي لوحدك وبتسلى نفسك وهتبقى مبسوطه كمان مش بس القاعده مع الناس اللى بتبسط وانا برده مش بقولك انعزلى بس اختارى الناس اللى فى حياتك كويس عشان دول ليهم دور فى حياتك من جميع الجوانب
تم النشر الأحد، ٢٤ مارس ٢٠٢٤
كده يا ستى يعتبر حذرتيها وعرفتيها انك مبتحبيش كده قولتلك كده تأتى لا بقى كده تقطعي علاقاتك بيها او تسطحيها متبقاش صاحبتك بقى مينفعش الصاحبه دى بتبقى حاجه تانيه فهمانى
تم النشر الأحد، ٢٤ مارس ٢٠٢٤
عمرك ما ترضى بأى حاجه عشان خايفه من الوحده متخليهاش تبقى نقطه ضعف عندك تخليكى عماله تحافظي على الناس حتى لو هما مش محافظين عليكى ومع ذالك هقولك اديهم فرصه بمعنى مثلا مثلا انتى مبتحبش حد يقولك انك رفيعه لو حد قالك كده قوليه لو سمحتى انا بضايق من الكلمه دى متقوليهاش ليا تانى ممكن تقولك مكنش قصدى دانا بهزر قولتلها هزاز ولا مش هزار متقوليش الكلمه دى تانى
تم النشر الأحد، ٢٤ مارس ٢٠٢٤
موضوع صحابك ده بقى لو هيبقى صحبتك بجد فأكيد هتبقى عارفاكى وعارفه الحاجات اللى بتضايقك والحاجات اللى بتفرحك وهكذا فلو اتقالك كلمه ضايقتك وهمة عارفين انها بتضايقك حتى لو على سبيل الهزار تبقى مينفعش تبقى صحبتك هل انتى ممكن تجرحى صاحبتك وتقوليها كلمه مش بتحبها لا فدي مينفعش تبقى صاحبه ولازم تخلى فى حدود لعلاقاتك وهما لو بيقدروا مشاعرك صدقينى مش هيقولوا كده
تم النشر الأحد، ٢٤ مارس ٢٠٢٤
موضوع انك رفيعه تخينه قصيره او طويله دى حاجه فيكى فمينفعش تبقى نقطه ضعف ليكى يا قمر عاوزاكى تتقبلى نفسك اى كانت وتحبى نفسك زى مانتى عشان محدش هيقدملك ده قبل ما انتى تقدمى ده لنفسك بعد كده لو الموضوع مسببلك مشكله او مثلا انتى رفيعه فعاوزه تتخنى عشان نفسك عادى بس المهم تكونى متقبله انك رفيعه وحلوه بس هتتخنى عشان تبقى حلوه اكتر بس انتى فى الأساس جميله
تم النشر الأحد، ٢٤ مارس ٢٠٢٤
بالنسبالنا ك أولاد بعيدا عن عالم البنات، التنمر بيزيد المحبة😂
تم النشر الاثنين، ٢٥ مارس ٢٠٢٤
لعرض السؤال في فدني اضغط هنا