عندي مشكله حقيقيه مع مشاعر الوحده مش بس كلام ، عانيت مع الوحده في فتره طويله فاضطريت اغير نفسي وابدأ ادور علي اصحاب ولكن حاسس ان الموضوع صعب ومش عارف الاقي فين اصحاب حاولت اختلط بكذا مجتمع مختلف ولكن لسه معنديش صحاب حقيقيين
نزلت الجيم ودورت فالشغل ونزلت النادي ، وحاولت ادور علي السوشيال ميديا بس لسه مش عارف الاقي اللي شبهي ومش بحب النوع اللي بيختفي فجأه ده عارف انت الشخص اللي بيسموه soulmate ده اللي انا بدور عليه ومش بلاقيه يعني المفروض اكيد يكون في شخص بيمثلي comfort zone احكيله فأي وقت بس مش عارف بصراحه الاقي فين
لو عندك تجربه ازاي اقدر الاقي اصحاب حقيقيين (كويسين) مش عاوز حد وحش ولا عاوز يتضحك عليا
ياريت تقولي
معنديش مشكله لو بيننا مسافات بس كانو اصحاب كويسين
مفيش وصفه معينه نصنع بيها أصدقاء حقيقين ولا مكان معين بنلاقي فيه الأصدقاء الحقيقين.. لكن الحياه كبيرة ومسيرك هتقابل صديق يشبهلك بس وقتها لازم تختاره بحذر.. إشترك في هوايات أو تخصص بتحبه أو كورس لحاجه نفسك تتعلمها أو مهتم بيها أو انزل المسجد بإستمرار وإتعرف على الناس وإعمل علاقات وارد شخص منهم يكون هو دا صديقك اللي مش هيفارقك محدش عارف صديق العمر بيظهر منين لكنه هيظهرلك فجأه ومش بالضروري أول ما تشوفه تقول هو دا .. لا بالعكس هيكون شخص عادي جدا زي أي معرفه عابره في البدايه أو زماله أو صداقه سطحيه .. المهم إنك متيأسش و متحطش الأمر في تفكيرك وإدعي ربنا بالصديق الصالح
تم النشر الخميس، ٢٨ مارس ٢٠٢٤
مفيش طريقة اننا نقابل أصدقاء الصحاب بكنسبهم لما نقبلهم ويقفو معاك فى مواقف كتير كلمة صديق كلمة ليها معنى كبير مش مجرد واحد تحكى معا وخلاص لا الصديق يبقا معاك على الوحشة قبل الحلوة ومسيرك هتقابل أصدقاء بس مش معنى انك محتاج صديق انك تصاحب اى حد لان الصاحب ساحب لازم ننقى ولازم تتعرض لتجارب ومواقف مع الحلو والوحش لحد متلاقي الصديق إلى بحق وحقيق
تم النشر الأحد، ٣١ مارس ٢٠٢٤
مش عاوز حد وحش ولا عاوز حد يضحك عليا ...! طيب افرض قولنا ليك على حلول .. وفجأة لقيت ناس وحشة هتعمل ايه؟ جملة مش عايز حد وحش .. يعني مش عايز تتألم، طيب وهل فيه صح من غير ما نمر بالخطأ؟ اكيد لأ .. انت لازم تمر بالخطأ .. محدش فينا بيكون عايز يغلط، الا لو عارف الخطأ وجحد به، وديه في امور معينه. ولكن محدش عايز يعيش تجربة الالم، او انه يلاقي شخص توكسيك اكيد. بس انت ممكن تقع في كل الكلام ده وانت بتدور على الحلو .. وده طبيعي .. جدا. اعمل علاقات علشان تعرف تلاقي الشخص الكويس، وومفيش فعلا وصفة سحرية تلاقي بيها صديق العمر .. بس اختلط على قد ما تقدر، ممكن تنزل تطوع مثلا، هتعمل علاقات وهتتعرفي على ناس. وممكن تلاقيه بدون ما تدور، ويمكن تدور في كل حته وتلاقيه في مكان لا يمكن أن تتخيله. هي كده ساعات بتكون غريبة، بس في نفس الوقت متيأسش من انك تدور.
تم النشر الخميس، ٢٨ مارس ٢٠٢٤
انا كنت كده، ف سجلت صحاب سوشيال من حاجة اسمها الشير وفعلا لقيت صحاب بس مكنش نفس الشعور انك تصاحب شخص تقضي حياتك معاه، بعدها اتنقلت لمدرسة جديدة ومحاولتش اتكلم مع حد، انا حاولت اخلي شخصيتي تخليهم يحبوا يتكلموا معايا من غير م اطلب بشكل مباشر وفيه ناس كتير دلوقتي بيحبوني، اكيد هتلاقي بس هي مسأاة وقت
تم النشر الأحد، ٣١ مارس ٢٠٢٤
ادعي ربنا انه يرزقك بالصحبة الصالحة ربنا قريب الدعوات والأحلام تتحقق بالدعاء
تم النشر السبت، ٣٠ مارس ٢٠٢٤
لعرض السؤال في فدني اضغط هنا