السلام عليكم، أنا عبدالرحمن عندي ١٩ سنه تشخيصي لحالتي النفسيه سيئه لأبعد درجه، حبيت بنت من وانا في تانيه ابتدائي حب لا يوصف بدأت أشتغل على نفسي وانمي مهارات من و انا ١٥ سنه عشان اتجوز البنت اللي حبيتها ومرضتش حتى إني اكلمها او اقولها لأنوا حرام، تعدي الأيام وأنا معنديش حد بثق فيه معتمد على نفسي وبس معنديش حتى حد احكيلوا عن حبي للبنت حاسس ان قلبي هيفرقع مفيش رد فعل لأي حاجه كل حاجه بتحصلي بتفضل موجوده جوايا مش بتطلع لحد.
بسبب كل اللي بيحصل حواليا كشاب مصري من اوضاع البلد لحاجات أخرى، بدأت اندمج في شغلي ومبعملش حاجه غير الشغل مسكت منصب في شغلي مكنتش احلم بيه ومبقتش سعيد حققت اهداف كنت بحلم بيها وزياده ومحستش بأي شعور فرح.
انا بشتغل بطريقه مش طبيعيه خايف اني محققش هدفي الكبير اني اتجوز البنت دي و خايف اكتر الاقي في يوم البنت دي بتتجوز حد غيري رغم كل تعبي دا، مبقتش حاسس بأي إنجاز بحققه و رغم كل اللي بيحصل دا مفيش ولا دمعه واحده بتنزل من عيني مش قادر اعيط ونفسي اعيط.
انا بقيت بسرح كتير والناس بتكلمني معظم ردودي تمام او اوكى مبقاش ليا نفس لأي شئ، عاوز حل بالله عليكوا + انا اقدر اخطب البنت بس مش معايا شقه واقدر اعيش في ايجار بس خايف يرفضوني ولو دا حصل كدا انا مليش اي هدف في الحياه بكل لانوا بسبب حبي ليها انا اشتغلت ووصلت للي وصلتله دا...
وعليكم السلام ورحمة الله وبركاته .. اهلا بيك يا عبد الرحمن .. اولا بشكل مبدئي ده مش حب يا عبد الرحمن، حب ازاي ومفيش اي علاقة تربط ما بين الاتنين، وكمان في 2 ابتدائي؟ ف ازاي بتحب حد ف 2 ابتدائي؟ من غير كمان ما يبقى فيه حاجه اساسا من ناحيتها! الحب بيتبني بالمواقف والعشرة، والسنيين .. وانتم اساسا متكلمتوش مع بعض! وسنك صغير علشان تقول اني بحب! انا اقدر اتفهم انك معجب بيها، منجذب ليها، لكن مش حب ابدا. وهتدرك كلامي ده بعدين. ولكن في الوقت الحالي ازاي نحل الموقف ده؟ مفيش قدامك حل انك تروح تتقدم، انت بتقول انك في منصب كويس، ف هل فيه دخل كويس وتقدر تجهز شقتك وتجيب دهب وتعمل خطوبة؟ احسبها وشوف، وعادي حتى لو شقة ايجار، اساسا صعب اوي اللي بيجيب تمليك خاصة في الاوضاع اللي احنا فيها. انت مش هتخسر حاجه لما تتقدم، ممكن تترفض اه، بس هتبقى عارف ع الاقل، بدل ما تفضل تعذب نفسك كمان عشرة عشرين سنة ف ليه تعمل كده؟ روح واتقدم لو جاهز حتى بشكل مبدأي في الاول. وربنا معاك ويوفقك
تم النشر الأحد، ٢٥ فبراير ٢٠٢٤
وعليكم السلام ...اد ايه انت مشاعرك جميلة وانت انسان جميل انت اجتهدت كتير ولازم تبدأ تحط مجهودك ده فى الاتجاه اللى انت بتعمل عشانه عشان طريقك فى الحياه يبدأ يبقى اوضح واريح ان شاء الله وتقدر تعمل اكتر من اللى عملته كمان ابدأ خد خطوة وخلى الواقع هو اللى يقولك الخطوة اللى بعد كده ...لان مهما كانت ترتيباتك فارادة ربنا وتدبيره مختلفة وافضل طبعا لان ربنا شايف اللى احنا مش شايفينه روح واتقدم ومتستناش اكتر من كده و قبل اى حاجة ضرورى تؤمن بان الاحتمالات كلها ممكن تحصل ...لما تكون انت مستعد للاحتمالات مش هتخاف من الصدمه ان شاء الله ..بالعكس هيكون مخك ونفسيتك مؤهلين يلاقوا حلول لو الامور اتأزمت اوى
تم النشر الأحد، ٢٥ فبراير ٢٠٢٤
ازيك ياعبدالرحمن يارب تكون بخير يارب ❤ قبل اي حاجه انت انسان محترم بجد ان انت مافكرتش انك تعصي الله في البنت لللي بتحبها ربنا يبارك فيك ويحقق مرادك يارب بص ياعبده الخوف دايما بيحجمنا ويوقفنا مكانّا عشان ماناخدش اي خطوه انت من كلامك عن حالتك الماديه وشغلك احسن بكتير من شباب تانيه في سنك مشكلتك بس انك خايف تترفض اتوكل على الله وكلم اهلها وخليك صريح ان انت بتحاول علي قد ماتقدر وانك عاوزها في الحلال ولو ربنا كاتب انكم تبقو لبعض مافيش حاجه هتمنعكم ان شاءلله المهم بس انك تاخد خطوه حتي لو اترفضت حاول مره واتنين انت لسه صغير وادعي ربنا انه يجمعك بيها في الحلال ولا قدر الله لو مالكش نصيب مش نهاية الدنيا ياعبده انت لسه العمر قدامك وهتشوف وتقابل ناس كتيره انا بقولك كده والله من واقع تجربه وعوض ربنا بعدها مافيش احسن منه كل اللي عليك بس انك تحاول خد. خطوه وربنا يعملك الخير انا هدعيلك من قلبي والله ربنا يجمعك بيها في الحلال يارب ياعبده❤🤲🏻
تم النشر الأربعاء، ٢٨ فبراير ٢٠٢٤
روح اخطبها اتوافق عليك خير متوافقش عليك يبقى نصيب وانتا عملت اللى علشان مترجعش تلوم نفسك على التقصير وأغلبية الناس فى موضوع الجواز الايام دي علشان الظروف اللى فيها البلد بيبقى فى تسهيلات غير الاول وعلى فكره القبول أو الرفض لقدر الله فى صالحك لانوا هيخف الضغط النفسى اللى عليك وكل شئ فى الاول والاخر قسمه ونصيب . أسأل الله لك التوفيق والقبول .
تم النشر الأربعاء، ٢٨ فبراير ٢٠٢٤
طب ولي مترحش وقولهم ان انا بحب بنتكم من وانا صغير وانا وصلت للمرحله دي و باذن الله انا ممكن اجيب شقه وممكن ابقى ف اجار وهما لو كويسين مش هيقولو لا بس قبل اي حاجه صالي صلا استخاره وبعدين توكل ع الله ♥
تم النشر الاثنين، ٢٦ فبراير ٢٠٢٤
ليه نظرة التشاؤم دي انت عندك شقه ايجار واكيد يعني هتحيل اللوازم التانيه. واكيد شاب ذو اخلاق ومن عائله كريمه. اتقدم علي بركه الله ولو اترفضت. متزعليش يبق انت كده عرفت عالاقل راسك من رجليك. ومتربكش حياتك بسر اب.
تم النشر الاثنين، ٢٦ فبراير ٢٠٢٤
توكل على الله و روح اخطبها وان شاء الله هتكون من نصيبك
تم النشر الاثنين، ٢٦ فبراير ٢٠٢٤
لعرض السؤال في فدني اضغط هنا