السلام عليكم، فكرة مشاركة الناس إنجازاتهم على السوشيال ميديا تحديدًا أحد الأسباب وراء شعور كتير من الناس نفس إحساسك، أنا لسه واقف مكاني والكل بيتقدم وبينجز وأنا لأ. وده للأسف بيسبب إحباط وممكن يدفعنا للتوقف عن السعي. ** ممكن قوي تكوني أنتِ في رحلة سعيك، يقابلك خبر عن فلانة حققت كذا أو فلان عمل كذا. فتفتكري إن المشكلة فيكِ، مع إن ممكن هم بادئين رحلة سعيهم نحو الهدف اللي نجحوا فيه بدري عنك، ممكن أنتِ هدفك مختلف فمحتاج خطوات أكتر أو طريق تاني أطول شوية، فتكوني أنتِ مثلا باقي لك خطوات فتوقفي ظنًا منك إنك مهما عملتِ أهو مش بتوصلي زي البقية. ** المقارنة أسوأ حاجة ممكن تعمليها وأقصر طريق للفشل. كل واحد فينا رحلته مختلفة عن البقية وأهدافه مختلفة وخطواته مختلفة. كل واحد فينا عنده مهارات وقدرات تختلف عن الغير. فالحل بالنسبة لك هو، توقفي مقارنة تمامًا وتتجاهلي أخبار الغير وإذا قابلتك بالصدفة فباركي لهم وارجعي ركزي على رحلتك أنتِ، المطلوب منك، تكتبي أهدافك واضحة وخطتك لها مكتوبة وواضحة وبخطوات محددة تتابعيها واحدة واحدة وتركزي على الطريق لحد الآخر. مهم جدًا كمان، تحتفلي بإنجازاتك مهما كانت صغيرة... أهدافك الكبيرة قسميها لأهداف أصغر وأصغر وكل محطة توصليها احتفلي بها وكافئ نفسك. ده هيعطيكِ شعور بالإنجاز ويحمسك أكثر للاستمرار. استعيني بالله وابدئي وارمي أي أفكار سلبية خلف ظهرك. بالتوفيق إن شاء الله.
لعرض الإجابة في فدني اضغط هنا