السلام عليكم، التسويف هو مهرب من عقلك لما بيحس بالضغط والمسؤولية والمهام الكتبير المطلوبة منه. انتِ محددة بعض الأسباب اللي ممكن تكون السبب وراء إحساسك ده... ليه مفكرتيش تتعاملي مع الأسباب دي أو على الأقل اللي متقدريش تتخلصي منها تتأقلمي معها. والدك مثلا.. رغم كل عيوبه قلتِ إنه مش وحش بالكامل. هل جربتِ تتكلمي معه؟ الأهل ساعات كتير مش بيعرفوا يتواصلوا مع أولادهم وبيفتكروا إنهم قايمين بواجبهم وده نتيجة تربيتهم بطريقة معينة. جربي تتكلمي معه وتقولي له إنك مش بتدلعي وكلامه بيأثر عليكِ وإنك محتاجة دعمه ولو هو مدعمكيش مين هيقدم لك الدعم. حاولي مش هتخسري حاجة... والله لقيتِ مفيش فايدة خلاص تعاملي معه بالبر وخلاص وتجاوزي الكلام السلبي وركزي على نفسك. تفكيرنا في تبريرات وشماعات للوضع اللي احنا فيه مش هيفيد بحاجة ومش هيخرجنا منه. احنا دورنا إيه؟ هل نفضل واقفين مكاننا ونقول بسبب كذا وكذا وأنا مش قادر أعمل حاجة وأغير؟ لأ طبعا... أنتِ قادرة تخرجي نفسك من الوضع أيا كان... الدراسة مش محتاجة ضغط على نفسك. انتِ بتدرسي ليه أصلا؟ هل سألتِ نفسك؟ هدفكِ إيه من التعليم؟ هدفك إيه كل يوم لما بتصحي وتروحي الدروس أو تحاولي تذاكري؟ هل تفكيرك وقلقك على الدراسة خلاكِ مقصرة في علاقتك بربنا؟ باقي جوانب حياتك عاملة فيها إيه؟ بتنجزي في حاجات تانية؟ هواياتك؟ بتتعلمي حاجات جديدة كل يوم؟ بتسجلي نعم ربنا؟ بتستمعي بيومك؟ حياتك مش دراسة بس وقلق على نتيجة الثانوية العامة. جميل جدًا إحساسك ناحية والدتك ورغبتك إنك تفرحيها وتعوضيها عن تعبها... بس هل فكرتِ إنك حولتِ الإحساس الجميل ده لضغط وإلزام وجبل على قلبك؟ والدتكِ يهمها إيه أكتر من إنك تكوني ناجحة بس سعيدة وبصحة كويسة؟ وازني بين الأمور حبيبتي... صحيح الثانوية العامة سنة مهمة لكن مصيرك مش واقف عليها صدقيني. أنتِ قادرة تنجحي مهما كانت نتيجتك أو كليتك بعد كده... قادرة تفرحي والدتكِ إن شاء الله بنجاحك مهما كانت الكلية اللي هتدخليها. المهم تكوني عارفة هدفك ومحددة معنى النجاح بالنسبة لك. الأعراض اللي ذكرتِها في الآخر دي أعراض طبيعية جدًا من الضغط اللي سببتِه لنفسك. *** خدي فاصل كم يوم رتبي مشاعرك وأفكارك واكتبي كل اللي قالقك وشاغلك وكل اللي حابة تنجزيه في حياتك. هترجعي بعدها إن شاء الله أنشط بس بعقلية مرتبة فاهمة كويس هدفها من الحياة وتوصل له إزاي. بالتوفيق يا رب.
العفو، إن شاء الله أكيد هتقدري تخرجي أقوى من الوضع الحالي وتأكدي إن مهما كان الظرف اللي ربنا بيضعنا فيه بيكون عارف إننا قادرين عليه (لا يكلف الله نفسًا إلا وسعها)... وافتكري دايما إن عادي ييجي علينا وقت نحس إننا عاوزين نرتاح شوية لما الضغوط بتزيد وعادي لما نضعف شوية أو نتشتت أو حتى نقع، بنرجع نقف ونحاول مرة ورا مرة... الهزيمة إننا نبطل نقف ونواصل... ربنا يوفقك ويكتب لك الخير دايمًا.
تم النشر الاثنين، ٢٠ يناير ٢٠٢٥
شكرا لحضرتك جدا حاسه ان كل حاجه وضحت او عرفت انا هعمل اي...انا فعلا اقلمت نفسي مع كل حاجه سلبيه ف حياتي و ببص للنعم اللي ربنا مدهالي بس مع زياده المشاكل ف البيت معاهم و ضغطهم عليا الفتره دي تحديدا ده خلاني افكر بسلبيه .بس بعون الله هخرج من كل ده و فعلا انا قادره اغير اي حاجه مش عجباني ف حياتي و قادره انجز و تحقق حاجه بعون وتوفيق الله
تم النشر الأحد، ١٩ يناير ٢٠٢٥
تمام، خلاص ما دام شايفة مفيش فائدة من الكلام مع والدك، تأقلمي... للأسف أهالي كتير بيتعاملوا بطريقة النقد على اعتبار إن كده يعني بيشجعوا ولادهم لكن ميعرفوش إن بتجيب نتيجة عكسية... انتِ محتاجة تقعدي مع نفسك وتغيري أي كلام سلبي سمعتِه أو بتسمعيه سواء منه أو من غيره أو حتى من نفسك... بصي فكرة إنجاز حاجة في الحياة دي متخليهاش ضاغط لكِ، يعني هتلاقي على السوشيال ميديا كله بيقول أنا عملت وعملت وبصوا إنجازاتي فده يخليكِ تحسي إن أنا معملتش حاجة في حياتي... كل حاجة وكل خطوة بنتقدمها في حياتنا مهما كانت صغيرة فهي إنجاز... زي ما قلت لكِ أنتِ محتاجة تقعدي مع نفسك وتكتبي كل مشاعرك ومخاوفك دي وتبدأي تقيمي الوضع... متقوليش ملكيش حياة، طول ما فيكِ أنفاس وربنا مادد بعمرك يبقى لكِ حياة ولكِ هدف حتى لو متلخطبة ومش قادرة تحدديه... الحياة مش شرط في مكان معين كنتِ عايشة فيه وعشان نقلتِ خلاص مبقاش فيه حياة ومش شرط بالصحاب والعلاقات برا... حياتك ممكن مليانة حتى وانتِ جوا البيت... مش مهم إنك بتاخدي خطوات وترجعي أو توقفي، المهم إن كل ما تقفي أو تقعي ترجعي تكملي... أنا عارفة إنها فترة صعبة من حياتك بس مش هي النهاية ومش معنى إنك بتتحركي بصعوبة إنك مش هتقدري... متفكريش في الوضع المادي ولا أي ظروف تانية... ركزي على نفسك دلوقتي... كل ما تقاومي حاجة كل ما هتتمسك بكِ أكتر، كل ما فكرة الوضع المادي مضايقاكِ وبتقاوميها كل ما هتفضل مستمرة ومش هتلاقي مخرج من الوضع... ممكن تشوفي الفيديو ده وغيره من فيديوهات د. أسماء، https://www.youtube.com/watch?v=8xO-FS0IJKs&t=538s&ab_channel=dr_AsmaaElkady إن شاء الله تساعدك بنصائحها تلاقي الحل لمشاكلك... وانتظري كمان نصائح الخبراء هنا... بالتوفيق إن شاء الله.
تم النشر الأحد، ١٩ يناير ٢٠٢٥
دايما بشوف حلول للتسويف و ازاي اخرج نفسي من اي اثر سلبي بس كل مره و مع كل طريقه اخد اول خطوتين و مكملش
تم النشر الأحد، ١٩ يناير ٢٠٢٥
تقريبا اكتر حاجه سببتي الضغط ده الحاله الماديه اللي انا مشركاهم فيها بكل تفاصيلها الموضوع ده تاعبني جدا بجد ..من اول م السنه بدات و هو مأثر عليا ...ايا كان اللي عندي او بعاني من اي مش هامنني حاليا انا بس عايزه احل مشكلتي مع المذاكره و اذاكر فعلا و مفضلش اسوف كدا اي حاجه تانيه مش مهمه
تم النشر الأحد، ١٩ يناير ٢٠٢٥
وعليكم السلام..والدي مش الشخصيه اللي اقدر اتكلم معاها خالص ف حاجه زي دي ..الموضوع مكنش مهم بالنسبالي بسمع كلامو من ونا صغيره عمري م اديتو اهتمام او سبتو يأثر عليا (او غالبا ده اللي انا فكراه).انا مع حضرتك جدا و بحاول اني مبررش و اشتغل اخرج من ده او اغير اي حاجه بس كل طرقي م بتكمل و مفيش انجاز و ده اللي محيرني طب العيب فين كدا ؟.. الدراسه عمرها م كانت اولويه بالنسبالي للاسف وفعلا انا م عندي السبب اللي يخليني اذاكر معنديش هدف ولا كليه نفسي فيها حاولت احط هدف اكتر من خمسين مره و بردو مفيش الحاجه ال تديني باور ..ف حاطه هدف اني اجيب مجموع علشان امي و حقيقي انا نفسي اعمل حاجه و انجز حاحه مهمه ف حياتي ..بالنسبه ل باقي جوانب حياتي انا معنديش حياه اصلا يعتبر لاننا ناقلين من محافظه ل محافظه تانيه بعيده عن اهلي و اصحابي حاولت اكون صحاب جديد مفيش ..بعد فتره انا اللي ببعدهم عني ..والدي شديد معايا مانعني م الخروج مش بنزل غير لو ل درس ونا م بروح غير درس واحد يعني ده اليوم الوحيد ال انزل فيه ممنوع اقابل صحابي و اخرج معاهم حتى لو مكان قريب و لمده قصيره ف بالتالي معنديش ناس كتير ف حياتي و الوحيدين القريبين مني بعيد عني
تم النشر الأحد، ١٩ يناير ٢٠٢٥
لعرض الإجابة في فدني اضغط هنا