السلام عليكم انا عندي ١٥ سنه في اولي ثانوي دائما وانا صغيره لحد مكبرت اهلي كانو بيشوفوني زاكيه جدا وكمان بيشوفو اني احسن من اخويا في الدراسه لحد موصل هو لي اولي اعدادي جاب ملحق اخويا مش شاطر اوي يعني بس الحمد لله اجتهد وعدي منو ساعتها انا كنت في تالته اعدادي بس دايما كنت حاسه اني مش زي ما اهلي مفكرين اني مش شاطره وكل الدراجات دي بتيجي معايا بالغش مع اني مكنتش بغش كتير بس دايما من كتر ماهما كانو واثقين فيا انا كنت طول الوقت عايشه حياتي خايفه لأخذلهم خايفه اكون مش قد الثقه دي بعد واكبر مخاوفي اني اجيب ملحق بنام وبصحي تعبانه بسبب الحوار ده مش عارفه اعيش حياتي طبيعي غير لما النتيجه تطلع عشان اخلص من الأفكار دي والمشكله أن محدش كان حاسس بالحوار ده مهما حكيت ليهم عن مشاكلي هما مش بيدو اهتمام انتي لو زاكرتي هتبقي شاطره مانتي لو بتزاكري هتبقي شاطره الي بيزاكر مش احسن منك احنا بندفع نفس الفلوس الي هما بيدفعوها ليه متبقيش زيهم رغم انهم كانو شايفني شاطره بس ده دائما كان ردهم لما لقولهم الي حاسه بيه بعد مدخلت ثانوي الحمدلله بدأت اسمع كلام الناس أن قد اي دي سنه رخمه وصعبه اوي وبدأت في دوامه أن هيحصل اي لو مجبتش مجموع كويس في تالته مع أن لسه في اولي بس افكار بقي طب هيحصل اي لو جبت ملحق وكسرت ثقه اهلي في اولي ولسه لحد دلوقتي جوه الدوامه دي ده غير اني طول اليوم بقيت في الشارع معنديش وقت لنفسي مش بعمل حاجه غير اني انزل ارجع اعمل الواجب انام اصحي انزل وهكذا حتي مفيش يوم واحد في الاسبوع مفيهوش نزول انا لسه في الاول بس تعبت جدا بقيت مجهده جدا حتي لو عرفت افضي نفسي عشان ازاكر ماما تاخدني نروح لي تيته ولو قولتلها ورايا مذاكره تحصل مشكله مش بتسبني ارتاح لحد مدخلنا دوامه الشوامل في الدروس في كل الشوامل الحمدلله كنت بجيب درجات كويسه بس بيني وبين نفسي مش راضيه عن الدرجه حاسه انها جت بالغش مش بالمجهود بتاعي حاسه اني لو اشتغلت بمجهودي هبقي فاشله ودي بصت صاحبتي ليه أن انا فاشله هي مش بتقول كدا في وشي بس كل تصرفاتها تدل علي كدا لما احل حاجه بمجهودي وتطلع صح تقعد تقولي اكيد هبدتيها او غشتيها طبعا وانا مش برد عليها خالص مع أن انا مش بغش كتير ولله من يوم كان في امتحان انجليزي وانا شاطره في الانجليزي بعد كدا مكنش في غش خالص في الامتحان ده وانا قولت حتي لو فيه هثق في نفسي بعد كدا جه تسليم الداراجات جبت ٣٧ من ٦٠ انا مش متعوده علي النظام والامتحان كان طويل بس محدش صدقني ماما قعدت تقولي انتي هتبقي فاشله الي قفل احسن منك في اي وكلام يخلي البني ادم عاجز عن الكلام وقالتلي أنها هتقول لي بابا فا اتخانقنا انا وهي و ضربتني وحلفت انها هتقول لي بابا ييحب الموبيل مشكلت ماما انها مش بتعرف تتفاهم خالص حاولت اتكلم معاها كذا مره بس باردو علي طول متخانقين علي طول بتعاملني بطريقه وحشه جدا انا بحاول اتهرب منها بحاول اتهرب من البيت بس باردو دائما في مشاكل محدش بيحس اني بني ادم بيتوتر عندي مشاكل في التوتر ممكن يكون امتحان عادي بس انا ببقي علي طول متوتره علي طول عندي سبب لي التوتر وتوتر لدرجه اني بحس قلبي ممكن يقف بجد انا نفسيتي وحشه جدا ومش عارفه اعمل اي مش لاقيه حد اتكلم معاه مش لاقيه حد اشتركوا عندي صحاب بس مش هاخد الرد الي انا عايزاه ولا اهبي هيعرفو يفدوني
وعليكم السلام ورحمة الله وبركاته... هل طريقة ماما معاكي كده في اي شئ يخص حاجه مهمه زي المذاكرة مثلا؟ لو ديه طريقتها ف انتي مش لوحدك كده مع ماما، ديه طريقة اغلب الاهالي عموما مع اولادهم. بيحفزوهم ولكن بطريقة معاكسة... يعني تقولك انتي غيرك ده احسن منك انتي في ايه؟ ديه فلانه جابت كذا ايه ينقصك انتي علشان تجيبي زيها؟ ديه طريقتهم ف انهم يحفزوا اللي قدامهم، لانها عايزاكي احسن حد ف الدنيا. الحل هنا انك تركزي ع نيتها، نيتها كويسة .. عايزاكي تكوني اشطر حد. منحاولش نركز ع الفعل ديما .. المهم هنا .. نطلع من كلام ماما شوية ونيجي عندك حاولي انك تبعدي عن الغش علشان مش بس حرام .. ما هو انتي ممكن يجي عليكي وقت ومتعرفيش تغشي مش كده؟ طيب ليه يبقى فيه اعتماد ع الغش من اساسه؟ حتى لو كان بنسبة 1% حتى .. ليه اساسا نعتمد عليه؟ علشان خايفة تجيبي درجة مش كويسة؟ طيب وايه يعني ما هو علشان تعرفي انتي فين .. مستواكي واصل لحد فين هنا. وده كويس اننا نعرف المشكلة واصله معانا لفين علشان نقدر نحلها. اما نكتم عليها ده مش كويس. واحنا مش ف امتحانات اخر السنة .. ف متخافيش اوي للدرجة ديه. اعملي اللي عليكي وطالما عملتي اللي عليكي متقلقيش من حاجه، وكل اللي يجيبه ربنا كويس.
تم النشر السبت، ٢١ أكتوبر ٢٠٢٣
ابنتي الحبيبه اُُحييكي لشجاعتك في طلب المساعده، وأثق تماما في قدرتك علي تخطي هذا الوقت الحرج لأنك في مرحله عمريه تتغير فيها هرمونات الجسم والحاله النفسيه بدرجه كبيره ،يحتاج جسمك لمزيد من الراحه وساعات نوم عميق أكثر ، تشعرين فيها بإحتياج للقبول في مجتمع الأصدقاء والتفهم في مجتمع الأسره ،فأطلب منك أن تتعرفي علي هذه الأحتياجات حتي لا تظلمي نفسك عندما تشعرين بها، والآن سأطلب منك 1- أن تُعبري عن مشاعرك لوالدتك بطريقه واضحه وبصيغة (أنا أشعر بالتوتر عندما تضغطين عليّ في موضوع المذاكره (مثلا) حددي شعورك بالضبط وعبري عنه بهذه الصيغه ٢- لا تخجلي من عرض إحتياجك للحنيه والتفهم والمساعده من أسرتك فهو حقك عليهم وأعلم جيدا أن هذا يتطلب شجاعه كبيره ولكن إشراكهم في معاناتك سيتيح لهم فرصه لفهمك أكثر ويفتح الباب أمامهم لتطييب خاطرك ومساندتك بالتشجيع لأن غالبا هم يظنون أنهم يحمسوكي ويشجعوكي بالضغط عليكي ومقارنتك مع أخيكي ومدح ذكاءك حتي يذاكر هو أكثر وتشعرين بثقتهم فيكي فتكوني مسؤله أكثر ولكن تحول ذلك لضغط كبير عليكي كنتي تتحمليه سابقا ومع مرحلتك العمريه ل وضغط المناهج الدراسيه وكثرتها لا تستطيعي التحمل الآن 3- والآن علي ورقه بيضاء أكتبي نفسك تكوني إيه ، وازاي أوصل للحلم ده وفكري دائما في ان دي مرحله مؤقته هاتعدي بكل حاجه مؤلمه فيها وهاتوصلك للجامعه ان شاء الله وحطي في دماغك فكره ان الدرجه الوحشه مش نهايه العالم ، وكلام صاحبتك المؤذي يخصها هي فرجعيه لها تاني وردي عليها لما تقولك اكيد غشيتي وردي بوضوح ولا تسمحي لها أنها تقول كده مره تانيه (إحنا اتفقنا نعبر عن مشاعرنا وما نكتمهاش ) وما تسمحيش لها تشكك في نفسك أبدا 4- في حاجه اسمها متلازمه النصاب ودي بتيجي الواحد لمًا يبدء ينجح وتشككه في نفسه وفي نجاحه فالي بتحسي بيه طبيعي جدا ولكن باطلب منك تمدحي نفسك لما تعملي أبسط الأشياء حتي لو سرحتي شعرك تسريحه حلوه اتعودي تمدحي نفسك وهاتي كراسه أو نوته وكل يوم اكتبي فيها أي حاجه حلوه حصلت في اليوم ده ولو صغيره وقبل النوم اقريها واشكري ربنا سبحانه وتعالي 5- أنا واثقه إنك هاتنظمي وقتك وخدي نفسك بالراحه وبالهدوء وطبطبي عليها وكلميها وقوليلها انك كويسه وقويه وقادره تعملي كل حاجه مطلوبه منك فرتبي أفكارك وحطي جدول تقدري تمشي عليه من غير ما تضغطي علي نفسك واعتبري يوم المرواح لتيته وقت ترفيهه وصله للرحم فبتاخدي عليه ثواب واخيرا ياابنتي ارمي نفسك في حضن والدتك كل ما تشوفيها حتي تشعر بكي وتتقرب لكي وادعو الله لكي بالتوفيق والطمأنينه
تم النشر الأحد، ٢٢ أكتوبر ٢٠٢٣
طالما انتى بتعملى اللي عليكي وتتعبي سيبيها علي الله محدش بياخد رزق حد او درجات حد متسيبيش حد يلعب في دماغك لمجرد كلام سلبي بيقوله طول ما انت بتحب تسمع وتركز في الكلام السلبي عمرك ما هتبقي ايجابي ده جايب درجة اعلي او اقل انا مالي بيه انا ليا دعوه بنفسي بس ده كله تدبير من ربنا وكل واحد عقله وحياته مختلفه عن غيره حياتك كلها مش هتقف علي ثانوية او علي شهادة ورقية دى كلها مش معايير للنجاح في الحياة او الراحة النفسية طالما انت بتعمل حاجه بتحبها وواثق من نفسك فيها اتعب واجتهد وما توفيقك الا بالله
تم النشر الاثنين، ٢٣ أكتوبر ٢٠٢٣
طيب انتي متوترة دايما وده طبيعي ف سنك طبيعي جدا ده أول شيء تعرفيه،كتير مننا كانوا كده زيك بإختلاف المشكلات انا كنت زيك كده يوم من الأيام ف نفس سنك ،حلك الوحيد اللي ملكيش غيره هو الدعاء لله أنه يصلح حالك وهو كفيل بأن يغير حالك من حال لحال أفضل كتير ويطمن قلبك ،انتي مدية الأمور اكبر من حجمها احنا بنتعلم ليه؟؟ عشان نجيب درجات عالية ترضي الأهل ؟؟ولا عشان (نتعلم)عشان نعرف اكتر عشان نتقدم؟؟ ناقصك تعرفي انتي بتتعلمي ليه ، وإنك مينفعش تغشي عشان تجيبي درجة عالية ف ترضي أهلك أو تظهري بشكل أفضل قصاد نفسك وقصاد الناس ،اتعلمي عشانك انتي وبس عشان العلم نور،انجحي ليكي اولاا وفخر الأهل هييجي لوحده كده كده ،لكن العذاب اللي انتي عايشاه ده ملوش لازمة صدقيني ،لما تحسي بتوتر اتنفسي بعمق لمدة دقيقة وقولي "لا إله إلا الله " ده يفكرك إن مفيش خوف من حاجة إلا من الله وانك بالله اقوى كتير مما تظنين،نفعت معايا وعن تجربة وهتنفع إن شاء الله معاكي بس اهدي وهوني على نفسك ،انك تجيبي ٣٧ من ٦٠ في امتحان ده مش وحش انتي قدرتي تقطعي شوط كبير وعديتي فوق نص الدرجة ب ٧ درجات لمجهودك وده عظيم ،اجتهدي وحطي أملك في ربنا وذاكري كويس وشوية شوية هتتحسني وهتفتخري بحالك ،كلامي مش تصبير ليكي انتي قوية جدا إنك تتحملي كل ده جواكي رغم صغر سنك ف مش محتاجة حد يصبرك وربنا يجزيكي خير على صبرك ،بالنسبة لنظام الثانوي هو نظام مختلف عن الإعدادية وهتاخدي شوية على م تتعودي عليه ومش لوحدك في ده كلكم كده بس الشاطر بجد اللي بيعرف يتأقلم بسرعة ،تعمليها ازاي؟؟ حاولي واغلطي كتير واغلطي اكتر بس اوعي تبطلي تحاولي متقارنيش نفسك بحد ولا تخلي حد يقارنك بغيرك وقارني نفسك النهارده بنفسك امبارح واغلطي متخافيش وافتكري أن اللي بينجح هو اللي بيتقبل أنه يخطئ والخطا جائز اوي عنده ،وان اللي بيفشل هو الشخص اللي خايف دايما يحاول وخايف لو حاول يفشل ولو حاول وفشل يعجز ،اوعي تكوني من النوع ده طول م بتعملي اللي عليكي توكلي على الله واغلطي ميهمكيش،بالنسبة لوالديك فهما بشر بيغلطوا وبيصيبوا عادي وجايز جدا يغلطوا ف تعليمك ويجوا عليكي ساعات وميعرفوش يفهموكي،انتي حاولي تغيري عن نفسك ومتهربيش بكل أدب واحترام وضحي نقاط بتزعلك منهم ووضحي موقفك منها وعرفيهم إنك بتحاولي عشان نفسك وعشانهم وإنك دخلتي في نظام جديد ومع ضغط الدروس والارهاق الوضع بيكون صعب عليكي واطلبي منهم يعينوكي على ده مش بس بالفلوس كمان بالنصيحة والدعم المعنوي ،افتكري دايما لما تتوتري تقولي لا إله إلا الله بعد نفس عميق وزفير يخرج كل التوتر ده برة قلبك واهدي وهوني على نفسك وربنا يوفقك .
تم النشر السبت، ٢١ أكتوبر ٢٠٢٣
معرفش بس هو علي طول عندي شعور اني فاشله ومش هنجح مع أن اهلي واثقين فيا اوي بس انا مش واثقه في نفسي خايفه اخذلهم خايفه بعد كل ده مدخلش الي انا عايزاه من كتر الخوف بقي في توتر زياده في حياتي لدرجه اني مش عارفه اعيش صحابي شايفني فاشله محدش بيقولي كدا بس طريقتهم اني عمري ماهبقي زكيه عمري ما هكون زيهم في مستوي زكائهم غير اني علي طول سرحانه علي طول مش مركزه مش عايزه أخذل اهلي أو نفسي
تم النشر الأحد، ٢٢ أكتوبر ٢٠٢٣
انتي لي حاسه الاحساس ده
تم النشر الأحد، ٢٢ أكتوبر ٢٠٢٣
عاوزه اقولك ان معظمنا مرينا بالموضوع ده وحتى لو اهلك مش مستنين منك حاجه انتى طبيعى تكونى متوتره لان تالته ثانوى تحديد مصير دا لوحده بيقلق ويوتر فالمهم انك تحاربى وتذاكرى عشان نفسك اولا وثانيا عشان خاطر اهلك اللى انتى بالنسبالهم ثمره مستنيين حصادها يفرحو بيها وصدقينى شهادتك الحلوه هى سلاحك ف الحياه وعكازك اللى هتسندى بيه ضد ظروف الدنيا فالمذاكره والاهتمام يستاهلو صدقينى وبصى دايما ع نص الكبايه المليان وبلاش الشيطان يكرهك ف طباع اهلك ولا ظروفك لان كلنا كنا كده وانتى لما تبقى ام هتبقى كده بردو والله دى طبيعه الحياه فركزى ف دراستك ويارب يكرمك من فضله بإذن الله
تم النشر الأحد، ٢٢ أكتوبر ٢٠٢٣
لو مسمعتهاش... هتندمى كتير بعد كده... أعرف رجال لما كأنو أطفال والوالد يقول زاكر واهتم كان بيستهزأ بكلام أبوه وينزل يضيع وقت فى اى حاجه... دلوقتي لما شاف حاله وحال أخواته بقى مش عاجبه حاله ودايما يرددها ليه أبويا ماخدتيش بالقوة وقعدنى على مكتبى أشوف مستقبلى.... متخيله... كل أفعال ماما خوف عليكى على فكرة أمى توفاها الله وأنا كملت هى مستفدتش من مذاكرتى فى حاجه... كذلك أنا هتوفى وابنى هيواجه الحياه لوحده هو مش هيذاكرلى.... افهمى الغرض من أللى بتعمله هترتاحى.. ربنا يهدى الحال يارب
تم النشر الأحد، ٢٢ أكتوبر ٢٠٢٣
لعرض السؤال في فدني اضغط هنا