انا السنه الجايه هكون تالته ثانوي. انا مستوايا متوسط يعني مش عالي لدرجة اطلع من الاوائل أو وحش اني أشيل مواد مثلا .....
هل انا هقدر اجيب مجموع في تالته ولا عشان مش مستوايا مكانشي ممتاز اوي زي اللي كانوا بيذاكروا من اول ما دخلوا الثانوي.. وهل فعلا امتحانات الثانوية صعبه ... انا فعلا مع اني لسه في تانيه اهو بس بفكر في تالته بطريقة اوڤر وخايفه اوي منها مجبشي مجموع أو ادخل كلية مش حباها.. .. ممكن كل واحد يقول تجربته أو عنده حل .!؟
٣ث أسوأ سنه هتمر عليكي فى الدراسه سواء جبتى المجموع ال عايزاه او لا فخدي الامور ببساطه ومتصعبيهاش على نفسك واهم حاجه تكون العلاقه مع ربنا كويسه وسيبى الامور لوقتها وشيلى اي قلق او خوف او توتر من دماغك لانه بيعمل مصايب ف الامتحانات خصوصا
تم النشر الأربعاء، ١٢ أبريل ٢٠٢٣
هتقدري ان شاءالله طالما عندك هدف وطموح نفسك توصليله هتتعبي وتحققيه وتوصلي لنتيجه متوقعتيهاش ابدا ربنا يوفقك تركزي بس ان مع لدايه الدروس تذاكري درس بدرس وتحفظيه وتحلي عليه كتير وكل متعدي فتره ف المنهج تاخدي درس قديم مع درس جديد بحيث تكون ذاكرتي وراجعتي طول السنه اهم حاجه عزيمه وطاقه وان شاءالله هتوصلي
تم النشر الثلاثاء، ١١ أبريل ٢٠٢٣
٣ ثانوي رحله جميله وفيها ايام كتير حلوة وبغض النظر عن المجموع او اي شيء ..لازم الواحد يخوض التحدي عشان يبقى انسان كويس ويقدر يفيد نفسه ويفيد المجتمع . هتحتاجي تكوني مسؤوله عن نفسك تنظمي وقتك تتحكمي في اعصابك تصبري تذاكري وتحلي كتير تحمدي ربنا عاللي انتي فيه وتقدري نعمة انك بتتعلمي وغيرك مش لاقي فرصه محتاجة تهدي وتسيبي كل حاجة تمشي ببساطه اسعي وربنا هيجيبلك كل اللي بتحبيه
تم النشر الثلاثاء، ١١ أبريل ٢٠٢٣
بتفكريني بنفسي .. دخلت تالته ثانوي وادائي كان اقل من المتوسط ، دا بسبب اني بضيع وقتي على السوشيال ميديا وحاجات ملهاش لازمة لغاية ما فيوم تحديدا بعد ما عد اول شهر في الثانوي اهلي دورو ورايا ولاقو اني مش واخد بالي من مصلحتي فأخدوا مني الفون ، ومن هنا بدأت الرحله. حرفيا بدأت اذاكر كتير ودا لان مكنش في سبب تاني يشغلني عن المذاكرة .. بدأت اذاكر كتير اوي و اروح دروسي واعمل كل المطلوب مني ، في الاول كان الموضوع صعب جدا عشان دماغي مكنتش مستوعبه اللي بذاكره ، بعدين الموضوع بقا افضل وبدأت ذاكرتي تتحسن وافتكر المعلومات بسهوله واحل اكتر وكدا ، الدنيا مكنتش وردي في وردي ، طبعا ان الواحد يذاكر اكتر من ٦ ساعات لغاية ١٠ ساعات دي حاجة صعبه ، خصوصا اوقات الواحد بيتعب جسديا ... و ي سلام لو حد رخم احبطني ..كنت بتعب نفسيا ، بس اهو الحمد لله عدت على خير بمجموع حلو جدا ٩٥٪ ودخلت كلية تمريض والدنيا مشيت ♥️
تم النشر الثلاثاء، ١١ أبريل ٢٠٢٣
انا في تالته حقوق وعارف الي بتفكري فيه ده كويس بس خدي يالنصيحه خليكي في الي انتي فيه وسيبي بكره لبكره متشليش هم مش واقته ولعلمك انا في تالته مكنتش بذاكر انا كنت بفهم اسمع الشرح كتير وبدأت المذاكره قبل الامتحانات بشهر بس كان عندي خلفيه عن المنهج وجبت77هو مش المجموع الواو بس انا مكنتش عاوز اكتر من كده اصلا عشان ادخل الكليه الي انا عاوزه فانصيحتي ليكي تفائلو خير تاجدوه وسيبي بكره لربنا خليكي في انهارده واعملي الي عليكي وربنا هيكرمك في بكره
تم النشر الثلاثاء، ١١ أبريل ٢٠٢٣
أولاً ، أود أن أقول لك أنه ليس من الضروري أن تكون من الأوائل لتكون ناجحًا في الثانوية العامة. أنت قادر على تحسين مستواك بالعمل الجاد والمثابرة. بمساعدة المعلمين والدروس الخصوصية، يمكنك تحسين فهمك للمواد وطريقة حل الأسئلة. ثانياً ، فلا تقلق كثيرًا بشأن صعوبة امتحانات الثانوية العامة. الأمر يتوقف على كيفية إعدادك للامتحانات ومستواك الحالي. يمكنك تحسين مستواك والاستعداد بشكل جيد للامتحانات من خلال إنشاء خطة أسبوعية من الدروس الخصوصية والتنظيم الجيد لوقت الدراسة والمذاكرة. وأخيرًا ، ابحث عن الدعم العاطفي والمعنوي من الأصدقاء والعائلة. يمكنهم توفير الدعم اللازم والتشجيع لك لتحسين مستواك ويمكنك أيضًا البحث عن مجموعات دراسية للتواصل مع زملائك الذين يحتاجون إلى الدعم نفسه. أخيرًا ، كن متحمسًا ومصممًا للنجاح، وقدم قصارى جهدك في الدراسة والاستعداد للامتحانات. وبالتوفيق لك في تطوير مهاراتك الأكاديمية وتحقيق أهدافك في الثانوية العامة.
تم النشر الثلاثاء، ١١ أبريل ٢٠٢٣
احلي سنة هتمري بيها ف حياتك حتي اللحظات الوحشة والحزينة فيها هتحبيها وهتفتقدي الضغط والصحيان بدري والسهر والنوم القليل هي مش صعبة ومش سهلة زيها زي اي سنة هتقولي هاخد المادة كلها مرة واحدة وكبيرة وهفتكر كل ده ازاي هتعرفي ده وقت المراجعات وف الامتحانات هتلاقي ان المادة صغيرة وانك فاكرة اقل حاجة فيها والامتحانات هتعدي بسرعة وهتحبيها برضو كل اللي عليكي تذاكري اول باول وبالله عليكي متاجليش حاجة ومتغبيش م امتحان حتي لو مش مذاكرة واظبي ع الصلاة وقيام الليل والدعاء الكتير وخليكي فاكرة ان احنا بنتسال ع السعي مش النتيجة احنا بنسعي والنتيجة دي بتاعت ربنا وقولي الحمدلله انا ذاكرت وطلعت عيني وجبت مجموع قليل وشيلت مادة بس دخلت المعهد العالي للتعاون الزراعي وباخد المواد العلمية والتجارب وف فرصة اني ابقيدكتورة تحاليل وتغذية وربنا اكرمني ومبسوطة فيه فانتي احمدي ربنا ع اي حاجة وافتكري ان ربنا هيختارلك الخير واللي شايفك هتبقي ناجحة فيه وهيفيدك بعدين ولو لا قدر الله جبتي مجموع قليل اوعي تزعلي وتعيطي بالعكس احمدي ربنا وصلي ركعتين شكر وخليكي مبسوطة انك سعيتي وعملتي اللي عليكي وربنا يوفقك يجميلة ويكرمك باللي تتمنيه ويكون خير ليكي واسفة لو طولت عليكي
تم النشر الأربعاء، ١٢ أبريل ٢٠٢٣
لعرض السؤال في فدني اضغط هنا