انا عندي مشكله ف رجلي اليمين مش اول مره انزل الموضوع ده هنا بس مش قادر اتقبل فكرة نظرة الناس ليا مش عارف اتعامل طبيعي ديما متوتر من نظرة الناس ومبروحش الجامعه بسبب كده ثقاي ف نفسي قليله اوي مش هقولك شكلي مبهدل وكده بالعكس انا بقصد اجيب لبس براند واحسن ساعه وكل حاجه مش افتخار خالص ده عشان حاسس بنقص ف جزء معين ف بحاول اعوض بحاجه تانيه ترجعلي ثقتي ف نفسي وبرضو مش عارف ف هل انا كده ضروري اروح ل دكتور نفسي ؟
أولاً: ربنا يشفيك ويعافيك يارب ويساعدك تتجاوز الشعور ده. ثانياً: أنت مش ناقص عشان تحس بكدة ﴿لقد خلقنا الإنسان فى أحسن تقويم﴾ الفكرة من الإختلاف هو إختبار عشان الناس اللي حواليك لما تشوفك اللي هيعاملك وحش ويشوفك قليل هيتحاسب واللي هيعاملك كويس وعادي زيك زيه ربنا هيديله حسنات والناس اللي بتتريق على اللي عندهم مشاكل فى جسمهم الحمدلله قلوا عن زمان عشان مجرد ما تقوله "أنت هتعترض على خلقة ربنا؟" هيسكت.. عشان مش أنت اللي فصلت شكلك وإمكانياتك قبل ما تتخلق أنت إتخلقت بشكل واسم وإمكانيات وشخصية كل دول مختارتهمش ودي الفكرة إن محدش إختار حاجة وبنبدأ نتأقلم على أساس كدة وإن شاء الله ربنا هيعوضك.. إذا أحب الله عبداً إبتلاه وربنا عظيم ويمكن متفهمش الحكمة من المشكلة اللي سببهالك فى رجلك دلوقتي بس المهم إن كل حاجة بتحصل لسبب أنت زي الفل طلاما مش بتعمل حاجة غلط يعني ما أنت دماغك مش أصغر من اللي حواليك وفى ناس غيرك برضو اتولدوا بأمراض تانية وعرفوا يحققوا إنجازات أنا مش بقارن أنا بقولك إن المشكلة اللي عندك مش عجز ومش حاجة تقلل ثقتك من نفسك أنت زيك زي الباقي محدش هيتحاسب بطريقة مختلفة كله هيتحاسب لوحده من غير تفرقة ربنا مش بيفرق بين حد غير فى التقوى ولا ربنا هيعاملك معاملة مختلفة عن غيرك.. كل حاجة فيها حكمة من الخالق ومتحبسش نفسك فالبيت بسبب كدة ومتستغربش لو الناس بصتلك يمكن بيدعولك يمكن متعجبين عشان مش بيشوفوا ناس زيك بتنزل وعندها ثقة عشان للأسف اللي زيك عنده نفس المشكلة يمكن أنت تشجع غيرك إنه يبقى عنده ثقة فى نفسه! انزل الجامعة وانزل الشارع ولا يهمك حد ولا نظرات حد عشان أنت برضو مش عارف نيتهم ايه وبيفكروا فى ايه ويا سيدي لو قلقان كدة كدة الناس اللي هتشوفك فالشارع دي مش هتفتكرك أو يمكن متشوفاكش تاني.. الموضوع سهل إنك تتجاوزه إن شاء الله وربنا معاك.
تم النشر السبت، ١ يوليو ٢٠٢٣
هو فى طرق كتير تتخطى بيها الموضوع ده لايف كوتش ممكن يساعدك ومش شرط تحتاج لطبيب نفسي لو حبيت انا ممكن اساعدك فى ده
تم النشر السبت، ١ يوليو ٢٠٢٣
أهلا بيك، أنا فاهمة مشكلتك تماما. أولا ما تقلقش من نظرة الناس، هما مش هيحكموا عليك أو يبصوا لك بنظرة مختلفة عشان مشكلة في رجلك. ده شيء طبيعي وممكن يحصل لأي حد. ثانيا، ما تخافش تروح الجامعة. ده مكانك وحقك وما تسمحش لأي حاجة تمنعك من الحضور. الناس هتحترمك أكتر لما تواجه مشاكلك بشجاعة. ثالثا، ما تعتمدش على المظهر واللبس الغالي عشان ترجع ثقتك في نفسك. الثقة جوه وتبقى من نجاحاتك وإنجازاتك. تعلم تقبل نفسك كما أنت. رابعا، ممكن تروح لدكتور نفسي يساعدك تتعامل مع مخاوفك وترجع ثقتك في نفسك. ده مش عيب وهيساعدك تتغلب على المشكلة. أتمنى أكون قدرت أفيدك وأعطيك نصائح مفيدة. ثق في نفسك وما تسمحش لأي حاجة تمنعك من حياتك الطبيعية. كلنا بنمر بتجارب صعبة بس المهم نتعلم منها ونطلع أقوى. تحياتي!
تم النشر الجمعة، ٣٠ يونيو ٢٠٢٣
أول حاجه أتمني ليك الشفاء العاجل تاني حاجه هقولك موجز فتره من حياتي أتمنى إنك تاخد منها العبره و تفيدك من سنة 2 اعدادي ل الترم الأول فى الصف الثاني الثانوي أربع سنين أو يزيد بكام شهر و أنا مكنتش بعرف أمشي فى الشارع بسبب إني كان عندي حبوب فى وشي لدرجة إني مكنتش بتكلم ولا بلبس لبس لافت للنظر ولا حتى بجتهد فى المذاكرة علشان ملفتش النظر و كنت بطلق لحيتي فى الفتره دي علشان أخفي جزء منها طب إزاي اتخطيت ده؟ روحت أنا و أخويا لدكتور جلدية و أنا هناك أنا أخويا الكبير هزر معايا و قالي أنت هتخش لدكتور مش بعيد يهزقك و يقولك يلا أمشي مقارنة بالناس اللي قاعدة دول أنا بصراحة مكنتش رافع راسي ولا بصيت عليهم حتى لكن لما أخويا قالي الكلمة دي أدركت فعلاً معني المثل اللي بيقول اللي يشوف ابتلاء الناس يهون عليه ابتلائه و شكرت ربنا و رضيت بشكلي و الحمدلله أنا بسبب الثقة اللي اكتسبتها فى نفسي بسبب الرضى فى ديه اكتشفت إن الناس مكنتش أصلا مهتمه بالحبوب اللي كانت فى وشي و كل ده كان فى نفسي و خيالي و فكري مش اكتر أنا عارف إنك ممكن تقول ده حب فى وشك و راح مع الوقت لكن المشكلة اللي فى رجلي تفرق لكن ولله و بقوهالك بكل ثقة رأيك فى نفسك هو اللي بيخلي الناس تحكم عليك اعتماداً على رأيك اللي أنت حطو على نفسك لو بدأت ووثقة فى نفسك و نزلت هتلاقي أيوا الناس هتستغرب فى الأول و مش بعيد تسمع همس عن كده لكن كل ده ما هيساوي لحظه فى يوم من الايام هتسأل فيه نفسك أنا ليه منزلتش و كنت خايف الناس تحكم عليا عن نفسي شايف إنك متروحش لأخصائي نفسي لأنك تقدر تبقى معالج نفسي لنفسك من خلال إنك تقنع نفسك إن مفيش حاجه و تبدأ و تنزل الجامعة و تحضر محضراتك و تخرج و متسبش حاجه تقصر عليك . وبس بعتذر لو طولت فى الموجز 😅.
تم النشر الجمعة، ٣٠ يونيو ٢٠٢٣
طالما ده بياثر ع حياتك اليوميه اه بس انا شايفه ان مفيش سبب لكده فيها اي عندك مشكله حاجه ربنا مقدرها يبقي خلاص والناس صدقني هتفضل تبص والبجاحه والوقاحه مش منك منهم لو فيك اي او حتي مفيكش حاجه هيوصلولك نفس الشعور قوم وعيش حياتك وخليهم اخر حاجه ف حساباتك لأنك مش هتسلم منهم ابدا
تم النشر الجمعة، ٣٠ يونيو ٢٠٢٣
الحقيقه انا عندي مشكله زيك بالظبط ولكن مش فرجلي ف شفايفي لاني مصابه من الولادة بالشفاه الارنبيه وفي نظري انا انها مسببالي تشوه بسيط ومش قادره احب شكلي بسببها وجت عليا فترة بتجنب التصوير بسبب اني بخاف شكلي يطلع وحش،ولازم تعرف حاجه ان محدش مطلوب منه يتقبلك او يحبك بنقصك غير انت طول م انت باصص لنفسك بنقص الناس كلها هتبصلك كده لان انت مراية نفسك لو انت حاسس ان انت مش هتقدر ع خطوة الثقة بالنفس ولازم تكون نابعه منك انت يبقى حاول ع اد ماتقدر تروح لاخصائي نفسي وان شاء الله تبقى كويس
تم النشر الجمعة، ٣٠ يونيو ٢٠٢٣
لعرض السؤال في فدني اضغط هنا