انا متضايقه من نفسي اووي حاسه اني معنديش الوعي الكامل واني دايما بحس بنقص واني عاوزه اغير نفسي للاحسن ومش عارفه اوصل للاحساس ده جوايا ومش متقبله عيوبي ولا عارفه اغيرها وتفكيري في اي حاجه بيكون غلط وجهه نظري فيها مش صح مش عارفه اعمل اي وكتومه مبعرفش اتكلم مع حد
السلام عليكم ورحمه الله وبركاته أنا قريت معظم تعليقاتك على الاجابات اللي فاتت انك بتتكلمي في انك مش بتقدري تكملي لوحدك وحتى لو حاولتي رجعتي نفسك شويه بترجعي توقفي ثاني وما عندكيش ثقه كافيه ده معناه انك محتاجه حد يكون داعم ليكي لحد ما تقدري توصلي للوعي يعني اللي هنقول ان هو يقدر يخليك تكملي لوحدك وازاي تقدري يبقى عندك همه ذاتيه انت بتشتغلي عليها لوحدك فانصحك انك يا اما تشوفي من اللي حواليك حد ثقه يكون عنده وعي كبير فتقولي له انا محتاجه انك تساعدني وتفضلي معاه ويمشي معاكي خطوه خطوه او تلقي لايف كوتش يقدر يمشي معك برضو الخطوات دي خطوه خطوه ويساعدك بتدريبات ومهارات تقدري تكوني بيها وصله لثقتك بنفسك وتقدري انت تشجعي نفسك وتقدري تشوفي النقط اللي انت عايزه تمشي فيها وتحطي لها خطوات وتعمليها كمان إن شاء الله.
تم النشر الأحد، ١٦ مارس ٢٠٢٥
إنك تبقى عايزة تغيري نفسك للأحسن دي حاجة جميلة. لو تقدري تروحي ل لايف كوتش... ما تتردديش لو الموضوع دا مش متاح هقولك على طريقة باستخدمها وحرفيا مفيدة جدا، هي الكتابة أو الكلام أيهما أسهل... اكتبي وواجهي نفسك، اكتبي عيوبك وازاي تصلحيها وخليكي صريحة مع نفسك، اكتبي ايه اللي عايزة تغيريه وازاي تغيريه وليه مش قادرة تغيريه واكتبي الخطوات وابدئي خطوة بخطوة
تم النشر السبت، ١٥ مارس ٢٠٢٥
السلام عليكم، جميل جدًا إن عندك وعي بفكرة التغيير للأفضل ومحاولة إنك تكوني أفضل نسخة منك لكن المشكلة هنا عدم ثقتك إنك قادرة على إحداث التغيير ده وكمان إن نفَسِك مش طويل. معنى إنك بتبدأي ومش بتكملي أو بترجعي كما كنتِ إنك حسيتِ باليأس واستعجلتِ النتائج ولما ما شفتيش التغيير اللي أنتِ عاوزاه وقفتِ عشان حسيتِ مفيش فائدة أو إنك مهما عملتِ مش هتغيري. ** اقعدي مع نفسك، ضروري تعملي خلوة مع النفس، اختاري مكان هادئ، ابعدي عن أي مشتتات وهاتي قلم وأوراق وابدأي فرغي كل مشاعرك وأفكارك. اكتبي كل اللي مضايقك في نفسك وكل اللي انتِ شايفاها عيوب ونفسك تغيريها. امسكي كل عيب أو مشكلة وفكري في الأسباب اللي مخلياكِ شايفة إنها عيب ومشكلة وليه لازم تغيريها، اكتبي كل الأسباب دي. لما تفهمي نفسك وأسبابك ودوافعك لتغيير العيوب والمشاكل اللي شايفاها في نفسك الصورة هتبقى واضحة أكتر لكِ، مش هتبقي ماشية بتخبُط في الطريق وعمالة تحاولي تصلحي من ناحية وبعدين تتشتتي مع ناحية تانية وبتحاولي من غير خطة واضحة. تفريغ العقل، اللي هتعمليه على الورق هيوضح الصورة لكِ، هيخلي عقلك يشتغل ويطلع أفكار لتحقيق التغيير اللي انتِ عاوزاه. ** فيه كم نقطة مهمة تعرفيها وأنتِ بتنفذي خططك، اليأس من النفس وعدم تقبلها والانتقاص منها، كل دي عوامل مش بتخليكِ تكملي، لأنك يا إما شايفة إنك مش قادرة يا إما مش حابة نفسك فمستسلمة لضياعها ومش فارقة معك، ابدأي تقبلي إننا بشر وكلنا فينا عيوب، وإن حياتنا كلها في تغيير مستمر. التغيير عاوز نفس طويل، مش بيحصل في يوم وليلة، العادات السيئة بتاخد وقت عشان تترسخ فبالتالي هتاخد وقت عشان تزيليها وتبني مكانها عادة جيدة... تعلمي الصبر واعملي حسابك إنك هتنتظري عشان تشوفي نتائج ترضي عنها. حبك لنفسك وكلامك الإيجابي معها بيفرق، إنك تحسسيها إنها تستحق تكون أفضل وإنها فعلا مش أقل من كل اللي وصلوا... عقلك الباطن بيسمع كلامك وينفذ، هتقولي له إنك فاشلة هينجحك في الفشل، فاختاري الكلام اللي تقوليه لنفسك وخصصي وقت تكلمي نفسك إيجابيًا كل يوم. أهم من كل اللي سبق، مفيش تغيير إلا بالاستعانة بالله سبحانه وتعالى، هو وحده يقدر يمدنا بالقوة عشان نتغير وكل ما كنا صادقين ودعيناه بصدق وألحينا في الدعاء وسألناه العون فأكيد هيعطينا القوة والطاقة.. خصصي ورد يومي لذكر (لا حول ولا قوة إلا بالله) قوليه كتير ومن قلبك وأنتِ فاهمة معناه وموقنة به، وإن لا حول ولا تغيير من حال إلا حال ولا قوة على هذا التغيير إلا بالله سبحانه وتعالى. ابدأي من النهاردة واستعيني بالله ولا تيأسي ومهما كان عدد المرات اللي بتقعي فيها ارجعي واقفي تاني مش مشكلة.. كل مرة بتقعي بتتعملي فيها درس ينفعك ويدفعك في الخطوات اللي بعد الوقعة. بالتوفيق إن شاء الله.
تم النشر الأحد، ١٦ مارس ٢٠٢٥
عزيزتي، أقدر تمامًا مشاعرك وما تمرين به. الشعور بعدم الرضا عن النفس أمر شائع، وأنت في بداية مهمة رائعة تتمثل في السعي نحو تحسين نفسك. دعيني أشارك معك بعض النصائح العملية التي قد تساعدك في هذا الصدد: تقبل الذات : أول خطوة للقيام بتغيير إيجابي تبدأ بتقبل نفسك بما فيها من عيوب. اعلمي أن كل شخص لديه جوانب يمكن تحسينها، والمهم هو التركيز على النمو بدلاً من النقد الذاتي. تحديد الأهداف : حددي ما هي الجوانب التي ترغبين في تغييرها وكوني محددة. يمكنك البدء بتحديد هدف أو هدفين واقعيين وقابليْن للقياس. الوعي الذاتي : ابدئي بتدوين أفكارك ومشاعرك. هذا سيساعدك في التعرف على أنماط التفكير السلبية وتحديها. يمكنك استخدام أسلوب "التسجيل اليومي" لتدوين تجاربك وتأملاتك. التعلم والتطوير : ابحثي عن موارد تساعدك على تطوير نفسك، مثل الكتب، الدورات التدريبية، والمحاضرات. تعليم نفسك مهارات جديدة قد يساعد في تعزيز ثقتك بنفسك. التحدث مع الآخرين : حاولي الانفتاح على الآخرين. يمكنك البدء بأشخاص مقربين أو حتى مجموعات دعم. التحدث عن مشاعرك يمكن أن يكون عونًا كبيرًا. الاستشارة : إذا شعرت بأن الأمور فوق طاقتك، لا تترددي في استشارة متخصص نفسي الذي يمكنه تقديم الدعم والإرشاد. تذكري أن التغيير يستغرق وقتًا وصبرًا، وكوني لطيفة مع نفسك خلال هذه الرحلة. صدقيني، الطريق إلى تحسين الذات هو رحلة جميلة، الأهم هو أن تأخذي الخطوات الصغيرة بثقة.
تم النشر السبت، ١٥ مارس ٢٠٢٥
لعرض السؤال في فدني اضغط هنا