عندي مشكلة بقالها سنة من شهر ١١ سنة ٢٠٢٢ ومعايا لحد دلوقتي انا عندي ٣٨ سنة في بوزشن معين وعمري مابصيت لسني ومتزوج وعندي بنت في وقت المشكلة المهم هي خاصه بشغلي اني كنت اشتغلت في شركة كبيره و الحمد لله كنت بتحارب ولما ربنا وفقني ومديري فهم تفكيري بقا ليا صوت مسوع لحد ما جيت في يوم وبنت اتعينت معانا في الشركة في نفس القسم واول حاجه اتصدمت فيها انها متزوجه تاني حاجه انا بشتغل في حاجه اسمها قسم الدعم وهي عندها ٢٩ سنه وحلوة وانا شكلي عادي اتاري جاية علي بوزشن اعلي ومكنش فارق معايا لحد ما جت هيا في يوم بتقولي انا هعتمد عليك عشان تعمل الحاجات الفلانيه قولت ارجع لمديري بلغته قالي مدام جابو حد خلاص اعمل شغلك الخاص بيك فقط فجات بتسالني ها قولت انتي هتعملي ١٢٣ قالت لي هو انا الي قررت من دماغك انا اشتغل ايه ومشتغلش ايه ولحد ما بكتب المشكلة وانا مدايق علي نفسي وبقيت بحس اني اقل منها وبقيت انتقد نفسي اني مشتغلتش ع نفسي من صغري و اني ابقي شاطر زي ماكنت شايف نفسي من صغري القي نفسي اقل من ناس وبقيت زعلان علي سني الكبير المشكلة وصلت لشعري بقي يقع و جسمي خس وكل يوم لمدة سنة وانا بفكر انا ليه كده وليه قليل علاقتي باهلي مبقتش احسن حاجه و بزوجتي وبنتي بقت هشه رغم ان مديري كرمني بس حتي وانا بتكرم كنت حاسس اني ميت لي ميت بقيت كل ماشوف البنت دي بتجاهلها لحد مابقي حاجه تلقائيه اشوفها اودي وشي الناحيه التانية انا بقالي سنة مدايق علي نفسي وبقيت مدايق من اني سني كبير و مش شاطر او طورت من نفسي لدرجة اني فكرت اقدم استقالتي من الشغل كلمت دكتورة نفسيه قالت لي OCD الي عندك و سالت حد life coaching قالي الي انت فيه زي كتف القانوني في الكورة و اخيرا صاحبي قالي دي صدمة حضاريه عشان كان نفسك تبقي زيها .
انا مدايق وحزين بضحك واكني مبضحكش باكل ومش حاسس اني باكل .
انصحوني اعمل ايه وشكرا.
صباح الفوقان بقى ....قدام شوية كده هتحمد ربنا على اللحظة دى فى حياتك هى بتهد الحيل ايوه ..كأنك بقالك فترة كفيف وفجأة فتحت ....بس هى حاجة حلوه انك ربنا يبعتلك علامة كبيرة عشان تقف وتقيم حياتك من اول وجديد وتشيل وتحط وتروق وتنضف وتشترى جديد . بتحصل وهتحصل تانى ..اوعى تفكرها اول واخر مره ...بس المره الاولى بتبقى تقيلة شوية واللى بعدها خلاص بتبقى مصحصح وعارف اللى بيحصل وعارف هتتعامل ازاى . تعالى الاول اقولك ان النجاح انك كل ما توصل لحاجة تشوف غيرها وتروح توصل وهكذا .. شوف كام حد عمل مشروع ناجح وبدأ بعد سن التقاعد اصلا . هنيجى احنا نأسف واحنا لسه فى عز شبابنا ...اوعى تحط مقاييس غلط تحبطك ( كل يوم ربنا بيردلك فيه روحك تقدر تبدأ فيه من جديد - سواء صححت اللى فات او بدأت حاجة من الصفر اصلا ) انا شايفه ان وقت الحزن اخد وقته وبزيادة قوم انفض عن نفسك الحزن يا راجل شمر ايدك وقوم روق الكركبه اعمل بشكل محترم كده لنفسك SWOT analysis للوضع الحالى حط لنفسك هدف جديد وحط خطواته وابدأ حالا . حرر نفسك من المشاعر الغضب اللى انت راميها على البنت ......شوف وجود البنت دى صح ...ربنا بعتها سبب عشان حالك يتجه لاتجاه تانى ( اكيد فيه الخير ليك ) والمهم بقى انسى بقى موضوع ( بعد ما شاب ودوه الكتاب) احنا فى عصر المهارات ...الشاطر هو اللى يشتغل على نفسه فى اى وقت . ومع تغير الظروف المستمر .
تم النشر السبت، ٢٨ أكتوبر ٢٠٢٣
في نقطتين لازم تبقى عارف وفاهم ان ربنا خلق الناس متفاوتين( ۚ وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِّيَتَّخِذَ بَعْضُهُم بَعْضًا سُخْرِيًّا)، فبالتالي مش عيب او غلط فالشغل ان حد مسؤول عنك او منصبه أعلى يطلب منك مهام معينة ده لا يقلل منك في شيء. ثانيا كويس جدا انك وقفت مع نفسك وخدت بالك ان بقالك فترة مبطورش من نفسك وكأنك رضيت بحالك، فالوقفة دي استغلها صح في انك تحط لنفسك اهداف جديدة وتطور من نفسك مهنيا وعلميا عشان منصبك يعلى. ولازم تكون عارف ان السن مش أساس في التفوق والنجاح ممكن الانسان يكون صغير لكن عنده علم او خبرة كويسة تؤهله لمنصب كويس لكن لفت نظري انك قولت انك كنت بتتحارب وأثبت نفسك، فليه كنت بتتحارب ومن مين؟ ثانيا ليه اول صدمة لما عرفت ان البنت متجوزة؟ ايه الصدمة فده؟
تم النشر الأحد، ٢٩ أكتوبر ٢٠٢٣
طول م انت بتبص لغيرك مش بتستفاد حاجه بدل م انت زعلان انك مش زيها اشتغل على نفسك وابق احسن منها عمر م كانت الشطارة بالسن الشطارة باللي بيفكر صح ويبدأ صح واي المشكله لما تطور من نفسك وأنت في سنك دلوقتي انت كبرت ؟ واصلا لي تسيب شغلك وتزعل من وحده اعلى منك ربنا عطاك قدره وعطاها قدره انت انسان وغير كامل الكمال لله وحده انت عايز تبق شاطر اشتغل على دا ومتقلش لحد نهائي ولا اي بني آدم واصدمهم بالنتيجه واسحقهم دا كان بالنسبه لشغلك دلوقتي انت عندك زوجه وبنت لي بقى تحرمهم من معاملتك معاهم انت بتقول العلاقه بقت هشه خليك مع امرأه وحده وخليك اب حنين واهتم بعيلتك وانت شاغل بالك لي بوحده غير زوجتك وكمية الزعل دا انت ا مركز اوي على حتة انها طلعت متجوزه يبق بتخرب بيتك لو بتفكر فيها اكتر من عيلتك مراتك وبنتك امانه معاك وملهمش سند ولا امان مع غيرك وانت كل حاجه ليهم وال مقدرتش تعمله ساعد بنتك في تعليمها وخليها تعمله وتبق شاطره في لكن متسبش علاقتك مع بنتك ومراتك هشه ابدا انت من الأساس مينفعش تبص لغيرها ولازم تغض البصر واكيد انت مش متضايق بسبب الشغل وبس يمكن انت شايفها احلى من مراتك وللأسف لو دا صح ف ابعد وحب مراتك اكتر وحب عيلتك اكتر واديهم حنان اكتر وزياده واقعد معاهم كتير واتكلم بنفس كدا وحسسهم بيك وقرب من ربنا وادعيله يبعد ويشيل من قلبك اي حاجه مضيقاك وان شاء الله تلاقي حل
تم النشر السبت، ٢٨ أكتوبر ٢٠٢٣
حضرتك مشكلتك عدم الرضا الرضا كنز انت في مستوى كويس جدا ودائما انظر الي الموضوع من ناحية الإيجابية ربنا وفقك وحصلت علي مكانه كويس جدا وعندك أولاد ربنا يبارك فيهم عندك زوجه بتحبك عندك وعندك .... موش حرام عليك دا كله ميستهيلش الحمد لله منك ، انا مقدر انك نفسك توصل الي مكانه احسن من كده انظر الموضوع من الشكل تاني انك تطور من نفسك أطمح في المزيد.وان الله لا يضيع اجر من احسن عملا 🌸
تم النشر الأحد، ٢٩ أكتوبر ٢٠٢٣
للأسف فى بلدنا ديه سهل جدا شعورك ده الناس كلها تعيشه حرفيا كل يوم فى شتى المجالات.... حالك زى حال شباب كتير عنده مقومات وزى الفل بس للأسف المعايير أللى بيتم التقييم بيها مبقتش منطقيه ولا مرضيه وبالنسبه للناس الطبيعيه... الوسايط... نوع جنسك... ابن مين فى البلد... واسمحلى اقولك بس أنا فى الكليه كانت الدكتور أللى بتقيم المشروع كانت بتحب الشباب أللى يعرف يخلص لها مصالح 🤣🤣...المركز الأول فى المشروووع من نصيب اللى دفع وكلف آكتر🤣🤣 بصرف النظر عن الفكرة وهكذا .... هتفضل مركز على أللى مضايقك مش هتعمل حاجه وهتفضل واقف فى مكانك خسارة.... هيجى وقتك تأنى بس محتاجين منقفش عند المشكلة ولا كأننا شايفنها.... مش عشان المعايير اختلفت عند الناس أللى حولينا يبقى إحنا وحشين.... فى وقت هتلآقى ربنا جند ليك حد يكون له نفس معاييرك ويكون سبب فى إنك تعلى وتتقدر صح... إنت قدها ربنا يقويك 💪
تم النشر الأحد، ٢٩ أكتوبر ٢٠٢٣
لعرض السؤال في فدني اضغط هنا