أنا طالبة كنت فى ثانويه عامه الحمد لله جبت 82 احب اقول انى كنت طالبه مش بتحب الدراسه ولا عندها حلم ومكنتش اعرف يعنى ايه دخول كليه طب أو هندسه يعنى ايه كليه اصلا
مرت سنين التعليم عليا وانا مش مهتمه بس طول الفترة دى كنت بعانى من المقارنات وان فى احسن منى مكنتش بشوف نفسى ومكنتش بفكر فى نفسى من كتر مانا بشوف بس أن الناس دى والطلاب دى هما احسن واشطر منى وانا فاشله
فضلت عايشه في الوهم دا أنى طالبه فاشله ومش شاطره دا اثر بشكل سلبى على شخصيتى وبقيت شخص منعزل ووحيده فى حزنى والمى ولا عندى أصحاب ولا اصدقاء لانهم كانوا بيعاملونى مش كويس
بقيت مش بشارك أحزانى أو افراحى لأى حد مش بقول لحد ايه إلى بحس بيه شخص عايش فى صندوق مغلق لانه عارف أنه لو فتحته مش هيلاقى حد يرحب بيه وخايف من أنه يستهزئ من أحزانه والمه وشعور دا فعلا الشخص اللي فضل عايش بداخلى
لحد ماجت 3 ثانوي بدأت أدرك وافهم المدرسه والمنافسه روح العلم بدأت فيا حسيت انى حييت من تانى بدأت اذاكر وادرس وافكر فى نفسى بس لانى فعلا بدأ يكون عندى حلم بس قسمت السنه لأن اخويا قسمها ودخل هندسه فقال لى اقسمى واللي شجعنى على ده أهلى لانهم بردوا كانوا شايفيني مش هقدر عليها
احب اقول دا كان اسوأ شعور أشعر بيه أنه اقرب الناس ليك مش واثقين فيك ملقيتش الدعم ولا من صديق ولا من أهل مع إني أنا بحبهم أهلى وهما كويسين بس مكنش حد فاهمنى ولا عارفي دفنت كل الالم والحزن بداخلى قلت خلاص هعوض كل اللي فات وابدأ السنه بجد وهذاكر لانى حبيت اكون دكتورة اسنان
والله حتى أهلى كانوا شاهدين على تعبى خلال السنه دى اعتمدت على نفسى بالكامل بس كنت باخد دروس سناتر وانزل عادى كنت حسيت بفرق كبير لانى كنت بحاوب مع مدرسينى وبقيت متفوقه معاهم وبجيب درجات حلوه
فى اللحظات دى كنت بقول طب ما أنا حلوه اه شاطره عن باقى زملاء إلى كانوا بيتريقوا عليا يعنى أنا إنسانة اهو وشاطرة بصيت لنفسى بمنظور تانى انى شخص ناجح وقادر يحقق نجاح وأنه مش فاشل زى ما كانوا فاكرين
المهم رغم دا كلوا مجبتش مجموع حلو كان سنه 2023 كنت واخده فيها اربع مواد 89 فيهم زعلت وبدأ يراودنى شعور الفشل انى أنا فعلا الإنسان الفاشل اللي بيقولوا عليه وانا مستحيل اكون شخص ناجح وطبعا ضغط اهلى من ناحيه تانى انى مجبتش مجموع حلو
المهم قالولى السنه التانيه دى هى تحديد المصير اخر فرصه يا إما تكونى بنتنا فعلا أو مش هنعترف بيكى وتكونى وحده عاديه
تصدقوا الكلام دا كان زى السكين فى قلبى كان صعب اوى مكنش حد حاسس بيا كنت شخص صامت لا يقوم برده فعل لحد ماجت السنه التانيه فى كل مرة بقوى نفسى بنفسى وبقول لاء هقدر أنا قدها
نسيت كل الكلام السلبى علشان فعلاً كان عندى حلم مش علشان حد لاء علشان نفسى برغم من كدا كنت مبسوطه من نفسى انى بحارب علشان حلم وانى بقيت زى باقى الناس بيحلموا اخدت السنه التانيه وهى 2024 جد بس قررت انى انعزل عن الناس كلها وافر وقتى واخد السنه دى فى البيت اونلاين اخدت مع اجمل مدرسين
احب اقول انى اول مرة اكتشف عالم النت والموبايل وان اخد مع مدرسين اونلاين فعلا السنه دى حسيت بحاجات كتير جدا وانى مكنتش عايشه في العالم كان عالم الاونلاين عالم تانى لقيت طلاب زيي بيعانوا من حاجات كنت بعانيها السنه الى فاتت وأنها كانت حاجات عاديه بيحس بيها اى طالب ثانويه عامه مش زى مانا كنت فاكره انى طالبه فاشله عشت فعلاً معاهم ومدرسينى اللي مكنتش بحس أن الماده تقيله معاهم والنصائح الجميله طول السنه معاهم
بدأت نفسيتى تتحسن وثقتى فى نفسى تزيد اكتر لأن كنت بعيده عن كلام الناس السلبى وجو المقارنات الى كان بيحبطنى اكتر تعلمت كتير فعلاً فى السنه دى وتغير تفكيرى تمام عن حجات كتير جدا مكنتش عارفها لانى للاسف كنت عايشه فى قريه جوها مكنش احسن حاجه المهم اكيد رغم الضغوط النفسية من المدرسين والأهل كنت مستمرة وكنت بيجب درجات حلوه فى المواد رغم أن بعض الأحيان كنت بفكر انى بردوا فاشله لأن فى ناس جابت مجموع فى سنه واحده وان المعظم الطلاب فى دفعتى واخدينها سنه واحده وانا واخدها سنتين
فكنت بقول لنفسى انى شخص ضعيف مش زى باقى الطلاب دى شاطرة واخدها سنه واحده رغم كل التشويش دا فى عقلى الا كنت بفكر بحاجه واحده بس انى اكون دكتورة اسنان فعلا والله درست بكل طاقتى وبدعى ربنا كتير وكملت لحدما ظهرت النتيجه ... 82% ....
طبعا فى السنه دى كانت غريبه رغم الغش إلى كنت محاطه بيه فى اللجنه رفضت ابدا ما اغش كلمه وكنت بطلع اخر واحده فى اللجنه بعد ماكلوا غش لانى كنت عامله حساب ربنا فى كل حاجه رغم انى كنت مقهوره جدا من الى بيحصل كدا هيعلى التنسيق عليا بس رغم كدا كنت بقول وواسى نفسى بأن الله لايضيع أجر من أحسن عملا
واكيد ربنا مش هيساوينى بيهم لانى رفضت حاجه من الصعب حد يرفضها لانى واثقه فى ربنا جدا وكنت سلمت مستقبلى كله لله وحده وتوكلت على الله فى إجاباتى رغم أنها كانت امتحانات معقده وصعبه بس فعلا قلت أنا عملت إلى عليا ومقصرتش فيها السنه والحمد لله كانوا أهلى شاهدين عليا طبعا دا غير انهيارى لما سمعت النتيجه زعلت اكيد لانى كنت عايزه افرح أعلى على الأقل إلى حصل فى السنه دى من أخطاء فى الامتحانات وزياده الدرجات حصلت لخبطه كتير جدا حسيت انها اشاره من ربنا إن مش عايزينى اكون فى المكان دا وعايزنى اكون فى مكان تانى المهم
ماما كانت عايزه تدخلنى صيدله خاص بس احنا مش من الناس الغنيه دى حالتنا الماديه الحمدلله علي قدها المهم بابا رفض وشاف انى ادخل كليه تمريض بابا كان بالنسباله كليه تمريض افضل بكتير لأنها شغل وظيفه حكوميه مكنش بيبص على المكانة الاجتماعيه اهم حاجه هى انك تتوظف وتاخد مرتب مضمون ماما كانت رافضه تمامما دخلولى لكليه تمريض زى اى حد بيفكر أنها كليه مش كويسه
وانا الصراحه بردوا كنت شايفه كده بس طبعا الظروف غللابه وحصلت مشاكل كتير جدا بس الحمد لله وافقت ورضينا بالهم والهم مارضى بينا بسبب طبعا الزياده الى حصلت فى الدرجات كليه تمريض بقيت أعلى منى بكتير جدا اخدت 84٪ كلنا طبعا اصدمنا وعانينا بجد الفترة دى حتى تمريض مش راضيه بيا بس كان ديما فى صوت بداخلى بيقولى دا كله بأمر الله وإرادته وربنا اختار ليك الطريق دا حسيت كل الى بيحصل دا تدبير من عند ربنا ودا فعلاً إلى مكتوبلى المهم كاننا حطيين فى الرغبات كليه تمريض وبعدها معهد فنى صحى ومعهد فنى تمريض بنفس الترتيب
فسبحان الله ربنا اختار ليا معهد فنى تمريض برغم أن كان قدامى كليه علوم بس انا كنت ماشيه ورى حلمى وبس انى اكون دكتورة بشرى فاملقتش غير كليه التمريض هى الأقرب لده مكنش فىبالى معهد بقا وسمعه ومكانه اهم حاجه اكون فى الحاجه الى بحبها مشيت ورأى إلى بحبه رغم أن الطريق طويل
طبعا من كليه طب البشرى إلى معهد فنى تمريض دا كان صعب علي وعلى العائله تقبله بسهوله حسيت انى بجرى فى بحر ولا ليه بدايه ولا ليه نهاية لانى سلمت امرى لله وحده سبت كل حاجه لله فطبعا أهلى الحمد لله حببونى فى المجال وقالولى انك مابعتيش عن حلمك كتير مهى تمريض زى بظبط طبيب بشرى لانى كان نفسى فى طب بشرى بردوا وبحب غرف جراجه مع الدكاترة جو دا انا بحبوا جدا واساعد المرضى فقالولي شدى حيلك فى المعهد وادخل. كليه تمريض من المعهد واتحققى حلمك
بس انا منهارة دلوقتى حاسه انى مش هقدر اكمل لأن كل مره بقول أن خسرت حلمى ومش هقدر اكمل حتى كليه تمريض هى بقيت حلمى التانى مش قادره اكمله مع تنمر الناس وخاصه ان التنمر دا يجيى من اقرب الناس لييك فى صراع قوى بداخلى مابين الحزن واليأس ومابين الاستمرار حاسه بفشل انى ماشيه فى طريق مش عارفه آخره فين تعبت من كلام الناس انى فى معهد تمريض وانى ملحقتش الكليه بداء تفكير الفشل يراودنى تانى حتى آخر الترم دا بسبب الحزن وافتكر حلمى اللي ضاع وانى أنا فى ايه مدرستش كويس بتألم كل يوم بداخلى طاقتى الايجابيه مش لقيها شغفى انى اكمل راح وفكرة انى فى معهد صعبه اوى عليا حتى مش لاقيه حد أقوله عن حزنى والمى بعيش دا كله لوحدى لانى اتعودت اخبى أحزانى اتعودت انى اضحك رغم أن قلبى مكسور مش عارفه أكمل ازاى
بس الحمد لله لقيت الفرصه هنا اتكلم واقول كل حاجه من زمان أنا مخبياها حاسه بيها أسفه اتكلمت كتير طولت اوى بس دا فعلا الكلام الى كان المنى وعايزه اقوله .... شكرا
السلام عليكم ورحمه الله وبركاته. انا اول حاجه هقولها لك ان كل اللي انت حاسه بيه وخصوصا خصوصا في بعد ما دخلتي التعليم العالي انت بتفكريني بنفسي بالضبط. بس يعني مش هقول لك ان انا كنت شخص في الاول ما عندوش حلم حلم انا كان عندي الحلم من زمان وكنت دايما متفوقه وبجيب درجات حلوه جدا ولكن شقه القدر واا يعني نفس الاماره بالسوء خلتني في حاجات كده يعني ما كنت فيها احسن حاجه في ايام الثانوي النتيجه ان انا الحلم اللي كنت بحلمه ان انا ادخل. كليه طب او صيدله ما جاش ومظبطتش خالص ربنا ان انا ادخل كليه علوم. انا قضيت اول الترم في كليه علوم مش قادره اقول لك ان هي كانت وقتها كان في حاجه اسمها اكتئاب زي دلوقتي كتير قوي بيتقال بسهوله ولكن فعلا انا كنت همم طول اليوم رايحه جايه بعيط وزعلانه وكل بيقول لي خلاص واا دي كلها حلوه مش وحشه وما تفضليش زعلانه من نفسك وما كنتش بعرف اعبر برضه وقتها عن قد ايه انا موجوعه قد ايه انا زعلانه. بس بعد ما طبعا عديت كل ده شفت انه قد ايه كان اختيار ربنا ليا من الاختيارات الجميله جدا جدا ان كل الظروف اللي حصلت دي علمتني كثير قوي قوي ولما بدات افوق. واركز بقى مع الكليه واشوف انه لا الكليه اتعلمنا حاجات كثير جدا جدا حلوه الكليه فيها حاجات يعني ما بيدخلوش في تفاصيلها بتقعد طب انا ليا مكاني وده مكان حلو وفي وسط الكليه وفي وسط سنين الكليه اتعلمت مهارات تانيه كتير ودخلت في انشطه كتير وطلعت شخصيتي احلى منها كنت بتمنى كمان فخليني اقول لك انه اللي انت فيه ده وان تحول الاحداث عن ما احنا بنبقى نفسنا فيه او بنحلم بيه بتبقى حته بتوجع بس من اهم الحاجات اللي لازم تعمليها عشان ما تبقيش بقى زيي وتقضي وقت كبير كده بتعيطي بس طول الدراسه انك لازم تقولي انا دلوقتي مش مبسوطه بالمكان ده بس انا عايزه احاول اكون مبسوطه باللي انا فيه واعرف ازاي استفيد منه. تقولي ده بصوت عالي وايه المشكله طيب هتقوليه وهتلاقي نفسك انك عينك بتدمع وبتعيطي ومش عايزه الناس تقعد تقول لك انت تفضلي تعيطي مش مهم خالص على فكره عبري بكل الطرق اللي انت عايزاها طب هل الواحد لما ما يوصلش للي هو كان قاعد بيسعى عليه واللي هو كان بيحلم بيه يزعل من نفسه قوي كده يقرر ان هو يوصل نفسه بالفاشل اللي عمره ما ينجح ودي اصلا خرافه هو الناجح اكيد في يوم من الايام فشل والا ما كناش سميناه ناجح يعني اكيد في يوم من الايام كان تحت فلما طلع فوق والندى نجح لكن ما فيش حد بنقول برافو الناجح نجح ايه ده ما فيش حاجه اسمها كده صح كل حد فينا بيكون في مستوى قليل معلوماته قليله ولما بيزود معلوماته ويزودها بطريقه مميزه قوي بنقول ده نجح وبقى في مكان عاليه لما بيكون درجاته مش احسن حاجه وبدا يحسن من نفسه على درجاته بنقول ان هو ناجح ما بتكون مهاراته قليله وزود مهاراته بنقول ان هو ناجح يبقى ما فيش مشكله ايا كان احنا مكاننا فين دلوقتي كل ما هنزود عليه معناها ان احنا نجحنا فانا دلوقتي واقفه فين انا دلوقتي واقفه في
تم النشر الجمعة، ٣١ يناير ٢٠٢٥
عزيزتي، أولا أحب أن أهنئك على شجاعتك وجرأتك في التعبير عن مشاعرك وتجاربك. إن ما تمرين به ليس بالأمر السهل، وفهم حالتك يحتاج إلى تعاطف واحترام. أنتِ الآن في مرحلة من حياتك تتطلب منك المزيد من القوة والثبات. من الواضح أنك قد واجهت العديد من التحديات، ولكن لا تنسي أن كل تجربة، سواء كانت جيدة أو سيئة، تسهم في تشكيل شخصيتك وتقوية إرادتك. من المهم أن تدركي أن النجاح ليس مرتبطًا فقط بالدرجات أو بالمؤسسات التعليمية بل يتعلق أيضًا بالحقائق الشخصية، والتطور، والعزيمة. بخصوص شعورك بالفشل، حاولي أن تتذكري أن لكل شخص طريقته الخاصة في النجاح. المقارنات مع الآخرين يمكن أن تؤدي إلى شعور باليأس، لكن كل واحد منا لديه قصته الفريدة. اراقبي كيف تقدمت خلال السنتين الماضيتين، وما حققتيه من إنجازات وتطورات. أما بخصوص الدراسة في معهد التمريض، فهو خطوة جيدة نحو تحقيق حلمك في المجال الطبي، وإذا كانت لديك الرغبة في استكمال التعليم للوصول إلى تخصص الطب البشري، فهذا هدف يمكنك تحقيقه إذا كنتِ ملتزمة ومصممة على ذلك. ومن خلال التمريض، يمكنك أيضًا اكتساب المهارات والمعرفة التي ستساعدك في مسيرتك المقبلة. لا تترددي في طلب الدعم من أشخاص تحبينهم أو من معلماتك أو مستشارين نفسيين، فهم يمكن أن يقدموا لك الدعم والمساعدة في التغلب على الصعوبات النفسية والعاطفية. والنقطة الأهم هي أن تعملي على بناء ثقتك بنفسك، تذكري أن الفشل ليس نهاية الطريق، بل هو جزء من عملية التعلم والنمو. كافحي من أجل أهدافك ولا تفقدي الأمل. إن شاء الله، ستحصلين على ما ترغب به. أنا هنا إذا احتجت للتحدث أو لطلب المزيد من النصائح.
تم النشر الجمعة، ٣١ يناير ٢٠٢٥
فعلا صعب جدا بس إن شاءالله تحقق حلمك وانت قدها
تم النشر الاثنين، ٣ فبراير ٢٠٢٥
متحطيش في نفسك كله ده هيعدي ولو ربنا كتبلك حاجه هتشوفيها غصب عن الكل
تم النشر السبت، ١ فبراير ٢٠٢٥
نفس مشكلتي بالضبط ونفس احساسك مريت بيه واكتر وانعزلت وعملت اعاده تعليم وبدأت من الصفر عشان اكون مهندس ولسه مكمل الطريق مع ان سني كبير بس لسه بحاول احقق حلمي ووقفت كل حاجه في حياتي عشان ادخل هندسه وحاليا شغال مساح بس ليه مبقتش مهندس وبعمل معادله كليه هندسه حاليا عشان ادخل هندسه شبرا وسني ٣١ شعور الفشل حاجه مدمره خصوصا لما تكون انسان حساس جدا
تم النشر الأحد، ٢ فبراير ٢٠٢٥
انتي كويسه ونضيفه
تم النشر الأحد، ٢ فبراير ٢٠٢٥
شفاكي الله
تم النشر السبت، ١ فبراير ٢٠٢٥
هقولك علي حاجة انا بعملها دايما خدي من ودن وطلعي من ودن كبري مخك من اللي حواليكي ركزي في المعهد علشان تدخلي كليه تمريض منه ناس كتير بتعمل كدة كبري مخك متفكريش كتير اشغلي بالك في اي حاجة تاني جنب الدراسة شغل مثلا في شغل اون لاين هاتي برفانات بناتي وبيعيها في المعهد فكري في مشروع من البيت جنب المعهد متفكريش في القديم في مثل بيقول القديم عليه الرديم القديم دا خلص احنا قدامنا مستقبل نفكر ليه نفكر هنعمل ايه انتي قويه وهتبقي اقوي واقوي والدنيا هتحاولك تهدك بس اهم حاجة متقوليش انا تعبت لا احنا مش بنتعب من الحروب طول ما احنا قريبين من ربنا
تم النشر الجمعة، ٣١ يناير ٢٠٢٥
عايز اقولك ان انا قريت تخاطيف بس عايز اقولك انتي بطلة وقويه جدا جدا دا انا ممريتش بنص دا بس بقاوح مع الدنيا ومش ساكت
تم النشر الجمعة، ٣١ يناير ٢٠٢٥
حضرتك تعرف شئ عن الموضوع دا
تم النشر الاثنين، ٣ فبراير ٢٠٢٥
لعرض السؤال في فدني اضغط هنا