اليأس و الاحباط تعبوني بجد حاسه اني كل مابدأ يومي احس ان اقل حاجه و اقول مجهود بعمله بيأذيني اووي و بيتعب جسدي بطريقه وحشه اوي تعبت من اني احكي لكل اللي حوليه اني فيا حاجه غلط و حاجه مش طبيعيه حاسه بحاله حزن شديده و رغبه في الموت بس مش عاوزه انتحر مش عاوزه اغضب ربنا و اخسر الاخره
كل اللي بعاني منه حاليا مش مشاكل حياتي لا بالعكس انا قادره اتحمل لكن اللي مش قادره اتحمله بجد هو كل ماقوم اعمل مجهود احس بارهاق مستمر و احس بتعب نفسي كبير اوووي حاسه اني بضغط على نفسي و اهلي بيضغطوا عليه جامد اوي تعبوني اوي بجد من مسئوليات اللي بيكلفوني بيها ترتيب البيت و اشيل اخويا الرضيع ساعات بحس انهم بيستخدموني لمصلحتهم و بس محدش عالم بجد تعبي و اني مبقتش قادره اتحرك او اعمل اي حاجه حاسه بالم نفسي وجسدي بقيت منهكه اوووي اووووي بجد و بتمنى الموت ... ارجو المساعده و الحل لمشكلتي بجد
مقدره مشاعرك دي واحساسك الصعب بس انتي محتاجه تفرغي مشاعرك دي كلها اكتبيها كل حاجه انتي حاسه بيه حتى المواقف الي بتضايقك اكتبيها لانك محتاجه تفرغي مشاعرك دي على طول وكمان طول منتي مضغوطه من تجارب ومشاعر وافكار سلبيه هتنسي مش هتقدري تركزي وهتحسي بوجع ف جسمك ويارب يكون ليكي صديقه مقربه تحكيلها ع طول عشان تحسي بالمسانده والدعم من اشخاص مقربين ..ف اتكلمي معاهم وعبري عن مشاعرك دي وكل التفاصيل الي جواكي حتى لو عارفه انهم هيواجهوها بشكل سلبي وانتي اكيد تستاهلي حياه حلوه وسعيده وانك تحققي الي نفسك فيه وخليكي متأكده ان لسه في كتير محققتيهوش ولسه هتحققيه وان الفتره دي من حياتك مجرد فاصل وهترجعي اقوى وهتقدري تبقي احسن هتلاقي طاقتك اكتر وصبرك موجود وفي امال واحلام بتحققيها بس اديلها شويه وقت وثقه ف ربنا ثم كفائتك وانجازاتك ومجهودك وانك هتبقي شخص تاني ف المستقبل شخص ناجح في مجاله وسعيده جدا على المستوى النفسي وعلاقاتك بالي حوليكي افضل بس انتي حاولي متقفيش ومتيأسيش وواجهي مشاعرك دي واي حد يقلل منك اتناقشي معاه وعرفيه ان كلامه مؤذي بس طبعا تختاري الاسلوب الي هتتكلمي بيه مع مامتك وبباكي غير اسلوب مع صحابك وتحفظي الحدود الطبيعي تكون موجوده مع الكبار في الكلام ..وان ان شاءالله هتكوني افضل كمان متتعامليش مع اخوكي الرضيع انه سبب ف استغلالك ده تدريب صغير ليكي ازاي تكوني ام حنونه ومسؤله ونعمه كبيره من ربنا انه يرزوقك بأخ يحرك جواكي مشاعر الامومه ف وقت بدري قبل متكوني ام فعلا اخلقي العالم الخاص بيكم يعني هتلاقيه بيحب كل حاجه منك بيحبك تلعبيه تهتمي بيه تنيميه تأكليه عشان هو لامس مشاعرك وحاسس بيكي جدا اكتر من اي حد ربنا يخليكم لبعض دايما يارب
تم النشر الأحد، ٢٩ يناير ٢٠٢٣
اليأس من نفسك ولا من الواقع اللى انتى فيه ؟ الاحباط من الحاضر ولا من مستقبل مش شايفاه ؟ انك تكونى اقل مجهود بيتعبك ممكن يكون فى سبب عضوى ويخليكى كده ....ممكن نطمن ونعمل تحاليل بسيطة نتأكد ان مفيش مشكلة وبعدها ننتقل للمرحلة النفسية. الحزن الشديد واحساسك بانه مفيش حاجة تستاهل انك تعيشي ف الدنيا ...ده فى الغالب بسبب اننا مركزين على اللى ناقص مننا ومش شايفين قيمة اللى فى ايدينا . ممكن نعمل تمرين صغير كده كل يوم ...نعد على الاقل ٥ حاجات ربنا انعم علينا بيهم وناقصنين عند ناس تانيه . ونستمر طول اليوم نقول الحمدلله على كل حاجة فيهم اكتر من مره. ياريت كمان تتعرضى للشمس فى وقت اللى قبل الضهر...تقفى فى البلكونه او تكونى فى الشارع ...الشمس مفعولها رائع سبحان الله فى انها تدى للجسم شحنة سعادة .
تم النشر الأحد، ٢٩ يناير ٢٠٢٣
ياريت لو فيه تفاصيل عن مشكلتك .. يعني ايه اللي حصل خلاكي وصلتي للمرحلة ديه؟ وليه حاسه بكل الاحاسيس ديه؟ حكاية ان اهلك بيقولوا ليكي على حاجات تعمليها .. هو الموضوع مش استغلال .. هو الموضوع مشاركة يعني مثلا بابا بيشتغل علشان يجيب فلوس، وماما بتعمل مثلا شغل في البيت وانتي مثلا تساعديها .. الموضوع مشاركة .. وكل واحد عليه واجبات يعملها .. مش زي ما انتي فاهمة.
تم النشر السبت، ٢٨ يناير ٢٠٢٣
لعرض السؤال في فدني اضغط هنا