السلام عليكم ورحمة الله وبركاته
أنا بنت عمري 22 سنه من تلات سنين جالي مرض مناعي مزمن وهو ال multipe sclerosis أى التصلب المتعدد أغلب الأمراض المناعيه وان كان غير ده فهى بتؤدي نفس الأداء خلل بالمناعه فتزداد فتهاجم الجسم أعصتب أو عظام أكيد فيه تنوع أحيانا تؤدي للإعاقه عافانا الله جميعًا وإيّاكم..
ف بدايه الموضوع أخفيت الموضوع ع جزء كبير م اللي حواليا ولكن للأسف اللي بيكرهوني عارفين وكلنا عارفين يبقوا مين نوعية الناس دي معروفه في كل عيلة جزء كبير م الباقيين صحابي وقرايبي وأغلبهم لأ م عارف فأنا الفترة دي حاسه اني لازم أخلي الموضوع عاادي مفيش حاجه وخصوصًا اني مقتنعه جدًا انه ابتلاء من ربنا وأن الله إذا أحبّ عبدًا ابتلاه وبل اني أحيانًا بتبسط لما بحس ان ربنا ابتلاني ع بيحبني او انه أرسل لي غقاب في الدنيا فيخفف عني في الآخرة والرضا أكبر نعمه تكاد تُذكر
ف حاليًا أنا في حيرة م أمري لي؟
لأنه أهشى حاجتين.. الأولى هى نظرة الناس بالعطف في الأمور اللي زي دي وخصوصا اللي بيحبونا مع ان في الغااالب النظرة دي اخنا م بنتقبلها أبدا حتى لو بيحبونا لأنهم للأسف بيبقوا مأفورين شويه عكسك هادي وراضي وكله فل فلو يتعاملوا زي امبارح وكأن شيئًا لم يكن هكون شاكرة ليهم والله
ثانيًا ان خبرك وظروفك يتعرفوا وسط ناس مش بتحبك وقتها أقل حاجه في دماغك وقت تعبك تقول بيقول عليا اي فلان دلوقتي فرحان ولا لو شافني هيبصلي ازاي وبردو نظرات مرفوضه مبنحبهاش وخصوصًا لو معاك حاجه شويه ظاهريه سايبه علامه معاك بسبب تأثير المرض عليك خسيت مثلا شويه أعصابك ضعفت وهكذا..
أنا في حيرة م أمري ومش عارفه أعمل اي
ممكن نصيحتكوا وشكرًا مقدمًا
يمكن انا معرفش حاجة عن المرض اللى ذكرتيه و يمكن انا مش هكون حاسة بيكى قوى يعنى زى ما قال المثل اللى ايده فى المياه مش زى اللى ايده فى النار و لكن يا حبيبتى انا عرفت من كلامك انك قوية الايمان و والله هذا خلانى اخبك حتى بدون ان اراكى و لكن يا جميلة من لديه هذا الايمان لا يأبه بالناس او بنظراتهم صح نظرات الرأفة صعبة و مؤلمة على النفس و لكن اطلبى منهم هذا اخبريهم ان هذا يؤلمك اكثر من المرض نفسه اطلعيهم على ما بقلبك فمن استجاب لكى فهم من يحبوكى بصدق و من لم يستجب فلا يهم فلينظروا بما يشئون و ليقولوا ما يريدوا ف الله معك و كل هذا فى ميزان حسناتك الخبيث يظل خبيثا فلا تهتمى لاحد و نظرة العطف ما هى الا حب و من يحب لن يجرح من يحبه و لو بنظرة فاسمعى منى و جربى ان تصارحيهم بهذا و كما قلتى الله يبتلى من يحب فيكفيكى حب الله هو يغنى عن كل هذا و الله يشفيكى و يحفظك و يحميكى اختى فانت قوية الايمان صبورة قوية و الله يثبك على هذا الايمان و بهذه القوة دائما و ابدا
تم النشر الاثنين، ٢٧ مايو ٢٠٢٤
وعليكم السلام ورحمه الله وبركاته. اولا الف سلامه عليك وان شاء الله ربنا يقدرك وتصبري على الابتلاء ده ابتلاء في الصحه حاجه ان شاء الله خالص وان شاء الله ربنا هيقدرك عليها وتكون دافع لك تكوني احسن ما تكونش عائق لك باذن الله. انا عارفه قد ايه النوع ده من المرض؟ بياثر على اكتر من حاجه بياثر على جسمك وبياثر على نفسيتك لانه الشده بتاعه الاعصاب بتعمل في نفس الوقت. اختلاف في المود في وقت بتكوني تمام وفي وقت ثاني بتكوني حاسه انك مراهقه جدا نفسيا بدون اي حاجه او تعبانه ومتضايقه. فانا خليني اقول لك انه اي نوع من انواع الامراض او اي حاله هي مزمنه خلاص وبنبقى عارفين ان دي حاله هتلازمنا طول حياتنا. بتحتاج خطوه مهمه جدا جدا وهي خطوه التقبل. خطوه التقبل هتبقى. مش مجرد انه تمام انا قبلت لا. التقبل انه انا ما عنديش مشكله ان ده جزء مني. فكره ان انا ما عنديش مشكله بتنتقل به لمرحله انه. هو لو حد جه حاول يشوفني غريبه انا اللي هستغربه هستغرب هو ليه شايفني غريبه لانه انا متشبعه بالتقبل. فانك تبدلي مجهود في النقطه دي هيخليك تختصري عن نفسك مجهود ثاني قدام كتير جدا. لو قلنا ان دلوقتي الشخص اتولد لقى انه شعره كيرلي وهو. باصص على نفسه شايف نفسه حلو الشعر الكيرلي هيبقى مختلف تماما عن شخص باصص لنفسه على ان الكيرلي ده مش احسن حاجه ودائما عاوز شعره يبقى لوز يبقى طول الوقت. لنفسه في المرايه ومتقبل جدا ان هو شعره اتولد به كيرلي فلما بيبص لحد ويلاقي حد بس بيقول له ايه ده انت مش عارف عامل كده ليه فهو اللي شعري مش فاهم ايه الحاجه اللي انت ملاحظها في شعرك هيبقى شبه مش متخيل هو ايه المختلف في شعره؟ غير الشخص التاني اللي لما اول ما اي حد يبص له اي حد بيبص له هو شخصيا بيبص لنفسه وبيبص للحاجه اللي هو لسه مش متقبلها في نفسه. اللي هو احنا دايما بنقول عليه كده كان على راسه بطحه. احنا بنقولها كده بالعاميه ولكن هو عدم التقبل هو ده بالظبط. بالتقبل بقى مش هيبقى فيه الحالتين اللي انت بتتكلمي عنهم في السؤال اللي انت محتاره ما بينهم انك هتبقي قصاد الناس اللي هم بيحبوك في نوع من الشفقه ودول برضو هيبقوا شايفينك فيكي حاجه مش طبيعيه يعني المفروض ان احنا نبص عليهم ونلاحظها او الناس اللي مش بتحبك وهتبقى بصله على ان دي نقطه ضعفه فيك وحاجه مخليه في عندك عيب برضو ساعتها مش هتشوفي ده زي ما هم هيشوفوه هتبقي في مرحله اللي هو سواء انتم او انتم مالكم يا جماعه بتعاملوني كده ليه؟ فالتقبل بيجي بتدريب وبالتدريج مش هتصحي في يوم وليله تلاقي نفسك متقبله ومتعايشه مع الموضوع تبداي واحده واحده بتعملي لنفسك روتين في حياتك الروتين ده بيكون متماشي مع الحاجه اللي هي مزمنه معاكي ليه لانك محترمه الحاجه اللي عندك انت متقبله ان في عندك حاجه هتخليك مثلا ما تقدريش تكوني ملتزمه بانك تعمليه جهد محدد كل يوم الصبح لانك مش ضامنه هتقومي كل يوم الصبح بانهي حاله عضليه تسمح لك بانهي نوع من الجهد ولذلك مش هتقدري مثلا تلتزمي وتقولي يا جماعه انا الصبح هنزل اجري معكم مثال يعني لكن هتبقي دايما عامله الروتين لنفسك انه وقت ما هيكون الموضوع مسموح معايا هنزل واجري معكم وده هيكون بكل اريحيه من جواك ومش انك زعلانه انك مش قادره تنزلي مش انك بتداري انك مش قادره تنزلي ومش انك بتدوري على مبرر تقولي غير انك عندك حاجه مدمنه مرض مزمن بيمنعك انك تنزلي كل يوم تجري لا عادي جدا هتقولي انا ظروفي. تسمح بكده فقط او انا ظروفي لا تسمح بده بكل بساطه ظروفي دي هي شيء المرتبط بحياتي لانه حياتنا مش المفترض انها تبقى كوبي من بعض ولا ظروفنا كلها زي بعض. فان شاء الله بتقبلك تلاقي نفسك عديتي النقطه دي بسلام وامان تكوني فخوره بنفسك انك رغم الشيء اللي موجود عندك اللي ممكن يمثل اعاقه الا انك هتقدري تتعايشي معاه وتتماشي معاه ويكون في رضا واضح على وشك وواضح على نظام حياتك وهيبقى العكس تماما ما حدش هيحس خالص انه فيك حاجه مزمنه وده مش هيظهر الا لما انت فعلا تكوني شايفه ان ما فيكيش حاجه خالص تمنعك انك تكوني انسانه عاديه. كلنا عاديين لان كلنا عندنا حاجات بتعمل لنا نوع من انواع الاعاقه وفي ناس بيكون الاعاقه دي مش جسديه بتكون ذهنيه ودول بيبقوا مش مرحومين اكتر بس برضو هي حاجه الانسان هو اللي يقدر يا اما يظهرها يا اما يخفيها يا اما يتماشى معها وحياته تبان عاديه.
تم النشر الاثنين، ٢٧ مايو ٢٠٢٤
حاولي تقولي للناس اللي انتي بتثقي فبهم زي مامتك او اختك ومين اللي تقدري تقولوليه عادي وتشاركيه من غير ما يعمل دراما ويعرف الناس اللي حواليكي والكلام يوصل اللي بيكرهوكي وتقولي للاشخاص اللي اكيد هتكوني محتاجة مساعدتهم زي يروح معاكي عند دكتور او محتاجه ماديا لو مفيش يبقي الافضل متقوليش وربنا معاكي ويحفظك . وناس اللي بيكرهوكي لو عرفوا حاولي تظهري قدام منهم انك راضية بقضاء الله واهتم بنفسك اكتر
تم النشر الاثنين، ٢٧ مايو ٢٠٢٤
زي ما العرب قالوا : الجرح ال ما زال جديد مع قوله لاباس يزيد محدش هيحس بيك الا نفسك ، فتقبلي الامر عادي وتعاملي بحسن نيه ومتحطيش نظرة الناس في راسك لأن ده هيتعبك ومع الوقت هيكون هاجس كبير كل نظرة هتحتاج لتفسير حتى لو مش مقصوده وده هينفر الناس منك ، تعاملي بسلامه صدر في سنن الترمذي قالوا من خير الناس قال كل مهموم القلب صدوق اللسان قالوا صدوق اللسان نعرفه فمن هو مهموم القلب قال هو التقي النقي الذي لا إثم فيه ولا غل ولا حسد
تم النشر الاثنين، ٢٧ مايو ٢٠٢٤
وعليكم السلام ورحمة الله وبركاته. أولًا، بدي أقولك أنك كتير شجاعة لمشاركة مشاعرك وتجربتك. التصلب المتعدد مرض مش سهل، وأكيد بيدخلك في تحديات نفسية واجتماعية كبيرة. خلينا نحكي عن النقاط اللي ذكرتيها: نظرة الناس بالعطف : مفهوم إنه شعورك تجاه الشفقة ممكن يضايقك، حتى لو جاي من ناس بتحبيهم. اللي بقدر أقوله هو إنك ممكن توضحي لهم إنك عايزة دعم طبيعي، مش شفقة مفرطة. ممكن تحاولي توضحي لهم كيف ممكن يساعدوك بطريقة اللي تناسبك وتريحك. نظرة الناس اللي ما بيحبوك : الناس اللي مش بيحبونا أو بنكرهونا دايمًا موجودين، وفي الغالب هيحاولوا يستغلوا أي فرصة ليأذونا نفسيًا. المهم ما تتركي لهم أي مجال يأثروا على معنوياتك. خلي ثقتك بنفسك وإيمانك أكبر من أي كلام ممكن يتقال. ومش شرط تشاركيهم بتفاصيل مرضك إذا مش هيفيد أو هيزيد من ضغوطك. إزاي تتعاملي؟ : تحديد من تشاركيه بمعلوماتك : شاركي تفصيل عن مرضك فقط مع الأشخاص اللي بيثقوا فيك وبيحبونك وبيدعموك بشكل إيجابي. مش لازم الكل يعرف كل شيء. وضع الحدود : حسني من قدرتك على وضع حدود صحية في علاقاتك. لما دور تعاطف أو مساعدة يزيد عن حده، إحكي لهم بوضوح وبأدب إنك عاوزة يتعاملوا معك بشكل طبيعي. البحث عن دعم نفسي ومهني : يمكن يفيد كتير إنك تتواصلي مع مختص نفسي يساعدك تتعاملي مع التحديات النفسية والاجتماعية الناتجة عن المرض. التواصل مع مجتمعات دعم : في مجتمعات وأشخاص بيمروا بنفس تجربتك وبيفهموا مشاكلك بشكل أحسن لأنهم عايشينها. حاولي تنضمي لمجموعات دعم على الإنترنت أو في مجتمعك المحلي. وفي النهاية، تذكري إنك مش لوحدك، وإننا كلنا بنكافح بشيء في حياتنا، ويمكن ربنا ابتلاك بهذا المرض لأنه عارف إنك قدها وقادرة تتغلبي عليه بإذن الله. خلي إيمانك قوي وربنا يكون معك دايمًا.
تم النشر الاثنين، ٢٧ مايو ٢٠٢٤
لعرض السؤال في فدني اضغط هنا