انا اسلام في فرقه اولي اداره اعمال
انا كنت في 3ث علمي رياضه و كنت باخد درس عند دكتور في الكيمياء الدكتور دا كان عند كذا مساعده في الوقت دا كان ليا اصحابي الشباب كل واح فيهم مرتبط ببنت حبيت اعمل زيهم بس مع البنت اللي بحبها و دي كانت اكبر مني بسنتين و هي مساعده الدكتور في السنتر
كنت بحبها جدا و حبيت اعترفلها بكده و لما اعترفتها و دا اكيد بعد تلميحات مني ليها و هزار كان بينا بصفتي طالب عند اللي مشغلها و هي لما بحتاج حاجه في الماده كانت بتاخد دور الدكتور و تشرحهالي
المهم لما اعترفتلها تقبلت دا و قالت ان دا امر طبيعي بيحصل في السن دا و المشاعر مش في ايدنا و حبت انها تبعد
حاولت اني اتفاهم معاها و امنعها عن كده و فعلا حصل و انا اللي سبت الدكتور علشان افضل اشوفها في السنتر و انا مع باقي المدرسين مع العلم اني اصلا مكنتش منتظم اصلا في الدروس
انا حبيت اكلها كل يوم بحيث نقرب لبعض و دا حصل عن طريق اني قولتلها اننا نكون اصحاب و اخوات احسن و استغليت دي و بدات اكلمها كل يوم مش اقل من 6 ساعات متواصله سواء علي الواتس او فون و دا لمده 3 شهور لحد ما حبينا بعض جدا و فاتحتاها ف اني اتقدملها و هي مدتنيش رد و قالت برحتك
المهم انا كنت مديها كل يومي و حياتي كنت بساببها عايز انجح في كل حاجه في الدنيا علشان اقدر اسعدها و افرحها انتظمت في دروسي و مذكرتي بسببها طريقتي في التعامل مع الناس اتغيرت للاحسن بسببها طلعت مني الحلو اللي جوايا كلو لدرجه اني استغربت مني جدا و من الحاجات الحلوه و الانجازات اللي كنت بعملها
جيت فيوم اكلم اهلي علشان اتقدملها رسمي مع العلم ان و لدي و ولدتي منفصلين من 4 سنين و بينهم محاكم و كان في عذاب و كسره نفس في البيت بسبب كده و من صغري متربي علي العنف و الضرب و الاهانه دا ماثرش عليا غير خلاني عدواني و لما انعاملت معاها اتغيرت للاحسن مع العلم برضو اني اول علاقه ليا في حياتي مع بنت حرفيا متعاملتش مع اي انثي من و انا عندي 12 سنه حتي امي و اختي كانو بعيد عني برضو المهم بكلم ولدي اتقدم واقف و سال عليها و قال تمام خلص ثانويه و هنتقدم
جه فاجأني انه راح السنتر يقابلها من ورايا و اتعامل معاها وقال كويس جه بعدها باسبوع طردني من البيت و راحلها السنتر و اذاها و بوظ سمعتها في السنتر لدرجه انها سابت الشغل
هي بقي كلمتني و حكتلي و قالت لازم نسيب بعض انا رفضت بس كان للاسف دا حصل و يوما بكيت جدا لوحدي و من يومها و انا نفسيت باظبط و دا بسبب ان امي رفضت تتعامل معايا بسبب تعاملي مع ولدي و والدي طاردني و بسبب كده كنت ببات في الشارع علي الرصيف حرفيا و مكنش ليا اصحاب لان ولدي كان بيبعد صحابي عني
انا بقي طبعا مردضيتش احكيلها علي اللي بيحصل معايا غير اني انطردت من بيتي و بس بعدها بيومين كلمتني و قالت انها مش قادره تبعد عني و عايزه تبقي ديما في حياتي و انا في حياتها و قالت انا مش هاخدك بذنب ولدك و اتعاملنا تاني
كانت بتسال انا اي دنيتي مكنتش بقول غير اني عند واحد صحبي و دا مكنش حقيقي و المشكله الاكبر ان الموقف بتاع ولدي دا كان قبل امتحانات ثانويه باسبوع
و مش معايا ولا اكل ولا شرب ولا فلوس احضر درس واحد و ضغطي النفسي و عصبيتي زادو و دا خلاني ديما بزعق معاها و بسبب كده كانت اخر لما زهقت قالت كل واحد يروح لحالو انا وافقت علشان اشتري دماغي مع اني كنت بموت من حوايا عليها
هي طبعا كلمتني تاني ودبعدها بيوم قالت ممكن نرجع لحد ما انت تخلص امتحانات و بعد كده نسيب بعض تاني انا بصراحه رفضت لاني حسيتها بتجبي عليا و من ساعتها معدش في تعامل بينا ولا اي احتكاك غير للضروره
كنت مره تعبت و صوره نفسي و نزلت الصوره استوري هي بعتت و سالت و مره كلمتها في عيد ميلادها و عيدت عليها و كلمتها تاني في موضوع الجواز و كنت هتقدم لوحدي علشانها مع العلم ان بعد الانفصال دا جبت 51% ثانويه عامه و بسبب كده دخلت معهد و المعهد دا في نفس منطقه كليتها و انا اللي اختارته علشان اقدر اشوفها و الحمدلله علشان اقدر اتقدملها اشتغلت علي نفسي و استارت اب شركه مقاولات و تشطيبات
علشان اقدر اكفيها بس رفضت و من ساعه ما كلمتها و انا في دور اكتئاب و نفسي مقفوله عن كل حاجه و اتصدمت من طريقة كلامها لانها قالت اني بالنسه ليها طالب و مافيش بينا حاجه خلاص و بسبب كده ولا بشغل الشركه ولا ياكل و لا بنام عدل و دخلي في شهرين علي كده بس
انا مش عارف اعمل اي ولا عارف افهم هي عايزه اي و انا مش عايز اخسرها لاني حبيت روحها بدون اي مقابل
طالما الامور تسمح بانك تتقدملها روح ع طول وهى هتوافق ...والكلام اللى هى بتصدك بيه من باب الزعل من مواقف كتير ورايح وجاى فى كلامكم اللى مبيخلصش على الفاضي بدون خطوات حقيقية. لو وريتها انك راجل ومتمسك بيها رغم اى كلام هى بتقوله هتلاقيها نورت كده وبقت الامور زى الفل. هى خطوة واحده بس ...شوف حد من اهلها وكلكه وادخل البيت ع طووول من غير كلام كتير معاها.
تم النشر الخميس، ٢٠ أبريل ٢٠٢٣
الكلام في اي حاجه حصلت بينكم دا تماما وهتجاهل كم التجاوزات لانك عارفها كويس. والليىفات انت عارفة مويس وعارف غلطاتك المهم اللي جاي. انت: انا لازم أعمل اية طيب ..؟ صلي علي النبي يا اخويا. كُلنا حبينا واتحبينا بس هل دا سبب ان انا اوقف حياتي تماما لا اكل ولا شرب ولا اهتمام بدراسة ولا دا شغل، خلينا نتكلم بالعقل يا غالي ..! انت دلوقتي في مصلحتك لو انت لسا عايزها ؟ في مصلحتك تسيب شغلك وما تأكلش وا وا وا الخ لمجرد بس انك مش بتكلمها ! ولا مصلحتك ..؟ انك تشتغلل علي نفسك كورسات وشغل وتهتم بحياتك كلها، انت مش بتكلمها وتعبان بس انت في الاخر ممكن تكون معاها. شغل عقلك علشان يخدمك، نشف عقلك تموت حالك بإيدك انت الخاسر يا غالي. أخدم نفسك وارضى علشان تعرف تكمل لمصلحتك .
تم النشر الأربعاء، ١٩ أبريل ٢٠٢٣
شوف يا أخويا أنا كلامي هنا في الموقع ده رصاص ولكن انا طول ما بكلمك وانا مبتسم بالرغم إن فيه حاجات لا تجوز انتو الإتنين عملتوها زي كلامكم مع بعض وفيه أذى حصل لكم بسبب والدك ووالدتك ولكن كل ده مخليني مش قادر أتغاضى عن "انكم بتحبوا بعض". بس اعذرني واعتبرني زي اخوك الكبير "انت دَبْش" البنت جت تكلمك وتقولك هنفضل مع بعض لحد ما تخلص امتحانات! هي مش بتجبي عليك ولا حاجة هي بترجعلك بس بشياكة بس انت اندفعت. ولما انت كلمتها تاني متخلصتش من الدبش فهي قالتلك "انت كنت طالب" فانت خلاص بعدت!! انت مبتتعلمش يا ابني؟ انت مدرك ان جملة "انت كنت طالب" دي جملة ملهاش لازمة ولا معنى!! إيه هي مأدركتش انك كنت طالب ألا دلوقتي؟ كانت فاكراك رئيس جامعة؟ هي بتحاول تضايقك لأنها أصلاً متضايقه منك! شوف يا أخويا البنات بيقولوا شيء وهم يقصدوا العكس .. تقلق بس لو كلمتها من رقم او ايميل وعملتلك بلوك أكتر من مرة. فانت دلوقتي قدامك حلين يا تكلمها تاني وتحاول تصلح الدبش بتاعك وإنك عاوز تتقدملها حالاً يا إما تبعد وتسكت وتحط خيبتك في قلبك ومتتكلمش لأنك اللي بعدتها عنك. اعذرني بس مين فينا مدورش على حد يكون بيحبه ومتمسك بيه!! انت مدرك إن أبوك فضحها في شغلها وهي فضلت متمسكه بيك؟؟! انت معانا ولا مع الأسف يا أخويا!! البنت بتحبك
تم النشر الأربعاء، ١٩ أبريل ٢٠٢٣
هي بدأت لعبة، واعذرني في اللي هقوله، بس كله توضيح مش اكتر للمشكلة ... انت قولت في بداية كلامك ان كل اصحابك مرتبطين وانت كمان نفسك تكون كده، غاالبا كنت كنت برده هتدخل علاقة مع بنت حتى لو مكانتش نفس البنت. لان ده كان عندك تارجت من الاول .. لو افترضنا انك لسه اولى كلية يبقى 18 او 19 وهي 20 او 21 ... يعني لسه بتقولوا يا هادي .... في الدنيا هي تعتبر لسه مش في سن النضوج اوي ولا انت كمان، طبيعي انك تتشد لحد اه، لكن علاقتك بيها مش طبيعية شوية، مينفعش توقف حياتك كلها ع حاجه ولا شخص. يعني هي مش معاك دلوقت، هل ده معناه ان خلاص ... مفيش كلية ، مفيش شغل مفيش اي حاجه في الحياة؟ طيب هتمشي حياتك ازاي بعد كده؟ هل ديه هتبقى طريقة حياتك في كل حاجه مش هتكون في ايدك بعد كده؟ مينفعش ابدا انت كده هتكون كأنك حد ماسكك من دراعك. صدقني ديه مش هتكون اول ولا اخر مشكلة هتيجي في طريقك .. محتاج تتقبل كل ده الاول .. صعب بس مش مستحيل. ولكن علشان برده نبقى غطينا كل جوانب المشكلة .... اعمل محاولة لو جاهز الى حد ما ع خطوبة ... روح كلم والدها وانت كده يبقى جبت خر الموضوع. وتستنى وتشوف النتيجة ايا كانت ما عليك انك تتقبل الموضوع.
تم النشر الأربعاء، ١٩ أبريل ٢٠٢٣
انت تقريبًا عندك 18 سنة؟ وهي 20 سنة؟ انا مش عارفة اقول ايه بس خلينا ناخدها نقطة نقطة اولًا هل أهلها هيوافقوا يزوجوها لشخص اهله مش عايزينها واصغر منها بسنتين؟ مش جاهز ولا متخرج من الجامعة ولا حيلته جنيه واحد؟ يعني باختصار شديد واحد بيقدم وعود وهمية ... مش معروف تحقيقها هياخد اد ايه ثانيًا هي ازاي في البداية قالت لك انه دي مشاعر عادية بلا بلا بلا وقبلت بعد كده تتكلم معاك 6 ساعات، وبعدين تحبك والقصة دي كلها؟ الموضوع فيه ان، وهنا هسألك بصراحة هل انت كنت بتصرف عليها بصورة أو بأخرى؟ لإنه لو ده حقيقي فده من رأيي إجابة السؤال باختصار هي ليه ارتبطت بيك. أخيرًا واستحملني في النقطة دي انفصال والديك، وعلاقتك المتوترة بوالدتك واختك خلوك للأسف لما تفكر تحب تحب بنت أكبر منك بسنتين، فيها شوية نضج، وأمومة غائبة عنك في البيت، وده شيء للأسف هيكون أثره سلبي عليك على مدار عمرك. نصيحتي ليك ابعد عن البنت دي، ولو عرفت تزور معالج نفسي يساعدك على تخطي مشاكل أهل وانفصالهم وتأثير ده عليك رجاءً ما تتأخرش وقتها في فعل ده
تم النشر الأربعاء، ١٩ أبريل ٢٠٢٣
لعرض السؤال في فدني اضغط هنا