ديما حاسس بقلق وخوف من المشاكل لدرجة ان اتخنقت مع ناس قرايبي مع ان اعتبر محدش فينا غلب التاني ولكن برضو من ساعتها مرعوب ليل نهار خايف من دون سبب انا مكنتش كدا بس مش عارف اي الي حصلي يعني ليا اكتر من سنه في هلع وخوف وقلق وضربات قلب سريعه ارجو نصيحه او حل معتمد علشان اقسم بالله تعبت ليل نهار هلع وخوف وقلق وخفقان قلب
فى البداية كده .من الواضح أن حضرتك بتعانى من نوبات فزع (panic attack) ودى نوبات بتحدث احيانا بالاعراض اللى حضرتك ذكرتها زى الخوف والفزع زيادة ضربات القلب برودة فى الاطراف وضيق تنفس بس الأعراض ممكن تختلف من شخص لآخر حاول اول ما تحس بالموضوع ده تتجه لأى فعل ممكن يشتت انتباهك عنها وهتلاقيها بتختفى تدريجى زى ممكن مثلا تقوم بعمليات حسابيه أو تمسك مكعب ثلج أو أى فعل شبه ده المهم تشتت انتباهك ومع الوقت الموضوع هيضعف جدا وهتقدر تسيطر على الازمه وحاول تمارس رياضه وتنمى هوايتك ده هيفيدك كتير جدا المهم متقلقش فى ناس كتير بتعانى من الموضوع ده المهم تحاول تسيطر عليه وتعرف سببه سواء ده بيحصل لما بتتوتر ولا لما بتكون فى مواقف معينه. وتذكر دايما أن ربنا معاك في كل خطواتك وبيساعدك.وكون قوى وافتكر دايما انك هتقدر🌷
تم النشر السبت، ٢٢ يونيو ٢٠٢٤
شكرا لحضرتك على المشاركة بقالك اكتر من سنة في هلع وخوف وقلق ايه المواقف اللي بيزيد عندك فيها؟ وبتتعامل ازاي؟
تم النشر الأحد، ٢٣ يونيو ٢٠٢٤
السلام عليكم لما بييجي نوبات الخوف والهلعه دي ضروري نعرف سببها علشان نقدر نخفف منها او نتخلص منها خالص ايه السبب ايه الحاجه اللي حصلت ايه المشكله بما انك قلت ان هي قلق وخوف من المشاكل فايه المشكله اللي حصلت علشان نبقى خايفين من المشاكل هل قابلنا موقف مثلا ومعرفناش الشروط فيه؟ هل قابلنا موقف وحسينا ان اللي قدامنا كسب الجوله واحنا كان شكلنا وحش جدا واحنا مش حابين ده يتكرر تاني هل حصل مشكله واثرت عليها بشكل مايه وبقينا مش عارفين نصلح ده ايه اللي حصل يعني ايه اللي حصل وصل الموضوع ان احنا نبقى ما عندناش استعداد ان احنا نقابل اي مشكله او اي نقاش حد مثلا او اختلاف مره تانيه ضروري يجي تعرف ده علشان الموضوع يتحل تمام
تم النشر الثلاثاء، ٢٥ يونيو ٢٠٢٤
أنا مقدرة حجم الضغط والإزعاج اللي انت بتمر بيهم. الحالة دي (القلق والخوف المستمر) ممكن تكون صعبة جداً وتؤثر على حياتك اليومية بشكل كبير. هحاول أديك شوية نصائح ممكن تساعدك: التنفس العميق والاسترخاء: حاول تاخد شهيق عميق من الأنف وتعدي لحد 4 وبعدين تخرج النفس ببطء من الفم لمدة 4 مرات. التمرين دا ممكن يهدأ من ضربات قلبك ويخفف من التوتر. ممارسة الرياضة: حتى لو مجرد تمشية سريعة نص ساعة يوميًا. الرياضة بتساعد على إفراز هرمونات السعادة (الإندورفين) اللي بتقلل من القلق. الروتينية والجداول: حاول تنظم يومك وتعمل جدول لأن ده بيساعد في تقليل الشعور بعدم السيطرة. الحديث مع شخص تثق فيه: أحيانًا الفضفضة مع شخص تحبه ويفهمك ممكن تخفف من التوتر والقلق. البعد عن الكافيين: الكافيين ممكن يزيد من القلق والتوتر، فحاول تقلل من استهلاك القهوة والشاي والمشروبات الغازية. النوم الجيد: حاول تحصل على قسط كافي من النوم لأن عدم الراحة بيزيد من القلق والتوتر. إذا استمرت الأعراض بعد المحاولات دي، يمكن يكون من الأفضل تستشير طبيب نفسي أو مختص، لأن مرات بيكون القلق مرتبط بحالة طبية تحتاج تدخل مختص. وأهتم بنفسك، وإدي لنفسك وقت للتعافي.❤
تم النشر السبت، ٢٢ يونيو ٢٠٢٤
لعرض السؤال في فدني اضغط هنا