انا مشكلتي تبان تافهه او غريبه بس مسببه ليا مشاكل في سمعتي انا بنت جميله شويه والولاد يعني بتفضل تبصلي وكده وانا مكنتش بهتم ولا ابص لحد ما حصل موقف خلاني افقد الثقه في نفسي خالص وفي شكلي يعني ومبقتش حاسه اني جميله خالص وتعرضت للتنمر من صحابي ف بقيت اول ما بخرج لازم ابص للولاد اشوفهم بيبصولي ولا لا عشان اعرف شكلي حلو ولا لا ف فيه ولاد خدت عني فكرة اني مش كويسه واني عاوزه اكلمهم مع اني غير كده انا عمري ما هفكر هكلم ولد ولبسي محترم اوي مش بلبس بناطيل ولا بحط ميكب بس مشكلتي اني ببص وانا مش ببص للولاد بس عامة وببص للبنات برضو عادي والستات بس دول بيبتسمولي انما الولاد بيخدوا عني فكرة اني مش كويسه وكمان بحب اخرج واتمشي في الشوارع عشان الولاد وبصاتهم بتحسسني اني جميله وبترجعلي ثقتي في نفسي انا عارفه انه اللي بقوله ده حرام وحاجه مريضه بس والله عملي مشكلة والدليل علي كده ان فيه واحده صحبتي هي جارتنا يعني اخوها بيحكلها عني بيقولها اني محترمه وهاديه وكل الولاد تتمني تكلمني بس المشكلة انها بتبص للولاد وبتبين انها مهمته بجد محدش يستخف بمشكلتي وفيه ولاد بتحسسني اني ملقيش قيمه لما ابص او تستغرب لما ابص بس الموضوع اطور معايا لدرجة اني ببص للرجاله كبيرة اوي
مشكلة حضرتك مش تافهه دي مشكلة بسيطة اي شخص بيحب يبان جميل بغض النظر عن اذا كان ولد او بنت كله بيحاول يظهر ويكون الأجمل دي فطرة في اي شخص بس كده حضرتك تماديتي في النظر لدرجة ان انتي بقيتي تحبي تشوفي نفسك في عيون كل الناس انصحك تجملي روحك من الداخل بالقرب من ربناومتطوليش النظر في عيون الناس لانه بيشكل اسلوب تهديد ممكن حد يظن انك تعرفيه او عايزه تأذيه او توصل بشكل وحش التزمي وقربي من ربنا وغض البصر يحميكي من كل الكلام ده لابد من غض البصر مش عاوز اهول عليكي الأمور واقولك ان العين تزني وزنها النظر بس لازم تقري كتير وثقفي نفسك من زاوية لغة الجسد علشان تقدري تعملي كنترول على نفسك في نظراتك ومتوصليش لحد نظرة غير مرغوبة وحاولي متستخدميش عيون الناس كمرايا ليك الا لما تتقني لغة العيون لأنها اهم تواصل في اوقات معينة تطلب منك المراقبة في وظيفتك زي مثلا اذا كنتي مشرفة على عمال أو وانتي في الشارع او مواصلة اذا حد حاسة انه بينظر ليكي نظرات مش طبيعية من الطبيعي اننا نراقب نظرات الشخص للاحتراص منه وكمان من الطبيعي مراقبة طريق واحنا ماشين لتفادي الاصطدام بشخص ورؤية المكان واحنا ماشين فين رايحين فين كده لازم تقري كتير عن كتب تفهمك وتشرحلك لغة العيون علشان إذا كنتي تحبي التواصل مع الناس بالشكل الطبيعي الي كل الناس ممكن تتقبله وكمان الجمال ما بيكونش في المظهر او إعجاب الناس بيكي جمالك وثقتك في نفسك بتذيد اكتر لما تتجملي بدينك واخلاقك وغض بصرك ثقي تماما واعرفي ان ربنا بيدي كل شخص جزء من الجمال بغض النظر اذا كان الجمال شكل او روح طيبة او جوهر نظيف خلي جمالك جوهري اكتر لان الشخص العاقل الي بيحب يختار شريك حياة بيختاره في الوقت والزمن ده يختار الشخص الجميل في صفاته كم من جميل لكن جوهره غير نظيف ومعدنه غير نقي الجمال الحقيقي في الأخلاق انما الأمم الأخلاق ما بقيت تجملي بأخلاقك وساعتها بس هتقدرى تميزي الجمال وتعرفي ان في ناس جميلة والجمال انواع جوهري يعني شخص نقي ونظيف من قلبه او ظاهري يعني شخص جميل من الخارج فقط مهتم بمظهره او شكله الخارجي اكتر ما بيهتم بجماله الداخلي اقري كتير علشان ان بتكوني شخصيتك والعقل النضج والوعي بيكون بناء على درجة ثقافة الشخص ومعلومات الي اكتسابها الي آخره وفي ختام الإجابة عن سؤالك انتي شخصية محترمة وجميلة ومفكيش اي شئ مش كويس بس نرجوا الاهتمام بالتثقف والقراءة وأولهم قراءة الكتب الدينية ثم الكتب العلمية والتثقيفية بأنواعها علشان بكده يساعدك كتير تطوري من نفسك وتوصلي لاي شخص الصورة الي انتي عايزها بشكل مناسب سواء بكلام أو بلغة جسد وتبقى عارفه انتي عايزه إيه بالظبط من خلال النظرة او الكلمة وشكرا
تم النشر الخميس، ٩ مايو ٢٠٢٤
بصى لما يكون الشخص جميل ومميز هو مش محتاج يورى للعالم قد اى هو كدا ...لان هو بطبيعته كدا مميز مش محتاج يبهر حد..بيكون عنده البساطة ف كل شىء . فانت كدا كدا حلوة ولبسك جميل ومحترم فمين الولاد او الستات او البنات اللى نظرتهم هى اللى هتخليك حلوة ؟؟ أنت تقدرى تكون ماشية ولا تبصى شمال ولا يمين ولا وراكِ قابلنى حد تعرفيه ي اهلا وسهلا..فكرة نظراتك ليهم بجد فعلاا هيفهموك غلط ..فالحل جواكِ إن تاخدى قرار صارم إنك هتكون إنت ومحدش يفرقلك وتحسى بقيمتك ...فكون ان انت جميلة فانت مش محتاجه تبينى دا لان انت كدا اصلا جميلة ..اشغلى نفسك بالحاجات اللى تفيدك مذاكرتك حياتك اهلك طورى من نفسك عززى من ثقتك وروحك كون انك تقولى الكلام دا فانت انسانه واعية ومحترمة فعلا ... فالحل فى ايدك ...وربنا ينور عقلك وقلبك 🤍
تم النشر الجمعة، ١٠ مايو ٢٠٢٤
بصى قبل ما تطلعى من البيت تسالى مامتك و لو ليكى اخوات بابكى مثلا عن أن لبسك مظبوط ولا لا مش لازم تقوليلهم أنا شكلى حلو هاتيها بطريقه اى أن لبسك من وره مش مظبوط حاسه مثلا أن الطرحه مش مظبوطه رجلك مثلا باين أساليهم الاسئله دى و حاولى ع قد ما تقدر كل ما تشوف نفسك ف المرايه امدحي نفسك و شكرى ف نفسك ع قد اى انتى جميلة حتا لو مكونتيش بتهتمى بنفسك بس برضه لسه شكلك حلو و لما تنزل البسى نضاره شمس سوده حتا لو غصب عنك عينك راحت ناحيه الاولاد محدش فيهم ياخد باله و وحده وحده هتتحسنى و غير كدا هقولك ع حاجه حتا لو كلام صحابك بياثر فيكى اوعى تبينيلهم انك متاثره علشان لو خدو بالهم هيزيدو اللى بيعملوه لازم تبينيلهم قد اى انتى لبسك محتشم و ان جسمك غالى عليكى اوى و انك مش بتسمحى لحد يعرف تفصيل شكل جسمك دى حاجه كويسه فيكى
تم النشر الخميس، ٩ مايو ٢٠٢٤
الموضوع يمكن يبان تقيل وصعب لكن أي حاجه بالتدريب بتتحسن ، الحل في شقين شق معرفي وشق سلوكي ، الاول حلي الموقف اللي هز ثقتك بنفسك ودا الجزء المعرفي ، اشغلي نفسك طوريها واحضري دورات مفيده مثلا ونتدرب علي أننا نبص في الأرض أو في مستوي نظرنا مش في وجوه الناس ودا مهم جدا كسلوك بديل
تم النشر الخميس، ٩ مايو ٢٠٢٤
بسيطة عودي نفسك تمشي تبصي ف الأرض . دماغك ماتترفعش ممكن اول مرة تبقى بتجبري نفسك وتقولي لا لا مش هرفع راسي عشان ما اضطرش ابص ع حد ، بس بعد كده هتلاقي نفسك اتعودتي ، يعني الحل عندك 100% مثلا لو هتعدي ف شارع وفيه ولاد بصي ف الأرض وأفضلي ف سرك قولي لا إله إلا الله لغايه ما تعدي من الشارع أو تطلعي بيتكم ، وربنا يعينك و تخلصي من العادة دي خالص بإذن الله
تم النشر الخميس، ٩ مايو ٢٠٢٤
لعرض السؤال في فدني اضغط هنا