السلام عليكم
انا شاب ٢٥ سنة شغال مهندس وبحكم المجال وانه ملوش فرص عمل محترمة غير في المدن الكبرى...ربنا أراد أن رزقي يكون في محافظة تانية بعيد عن اهلي والكلام ده مش من فترة بعيدة (شهر ٦ اللي فات)
بعد ما اشتغلت بشهرين والدي تعب واتشخص بسرطان كبد درجة تالتة وفضل في عذاب ومعاناة لحد ما توفاه الله في فبراير
من ساعة وفاته وانا حالتي النفسية في الحضيض ودايما بأنب نفسي اني مقعدتش معاه وقت أطول ولا لحقت اشبع منه غير أنه كان مفروض طالع معاش في أبريل وكان بيحلم باليوم ده عشان يستريح شوية في الدنيا وأشيل انا عنه شوية وافرحه واجبله اللي نفسه فيه زي ما فرحني كتير لكن ربنا أراد له راحة أبدية بإذن الله
والدتي الله يديها الصحة برضه ماقصرتش معاه لحظة وعملت المستحيل معاه
دلوقتي انا غير حزني على وفاته...انا بقيت خايف على امي جدا ومبتمناش اعيش يوم وفاتها وان ربنا يجعل يومي قبل يومها لان انا مليش غيرهم في الدنيا سند وداعم مع ان عندي اخين بس انا الكبير وعمر ما حد منهم جه سألني قالي حتى عامل ايه كأن الدور ده المفروض انا بس اللي اقوم بيه سؤالي هو : هل دي تعتبر أنانية مني اني ادعي ربنا دايما اموت قبلها...انا معنديش حد أغلى منها وابويا لما مات اتكسرت بطريقة مكنتش متخيلها...ومش حقدر اتخيل هي لما هي تموت انا ممكن يحصلي ايه
مع الأسف مفيش بني ادم خلقه ربنا ممكن يعوضني عنهم ولو ب ١ في المية
ربنا يرحم والدك ويغفرله ويجازيه خير على تربيته فيك. ويطول في عمر طنت ويجازيها خير. في دعاء للنبي بيقول لَا يَتَمَنَّيَنَّ أَحَدُكُمُ الْمَوْتَ لِضُرٍّ نَزَلَ بِهِ، فَإِنْ كَانَ لَا بُدَّ مُتَمَنِّيًا فَلْيَقُلْ: اللهُمَّ أَحْيِنِي مَا كَانَتِ الْحَيَاةُ خَيْرًا لِي، وَتَوَفَّنِي إِذَا كَانَتِ الْوَفَاةُ خَيْرًا لِي. الدعاء ده بيهدي جدا. انا مقدره اللي بتتكلم فيه انا فقدت بابا في شهر ١ واختي الصغيره من ٥سنين وبعد كل فقد بيبقى في وجع غير محتمل الا بربط ربنا ع قلوبنا. حضرتك اولا ماتحسش بالذنب انت كنت بتشتغل ومش مهمل معاه. رغبه الموت قبل الحبايب دي بتجيلنا كلنا خصوصا أهلنا لان الحياه صعبه من غير وجودهم. بس ربنا مأمرناش بكده. ربنا أمرنا نكمل ونفهم ان التعلق بالله بس واننا جايين نختبر في أنفسنا وعلاقتنا بكل اللي يحيطنا ونعرف ان كلنا مراحل في الحياه خصوصا ان الحمدلله احنا لا نفني كلنا هنتقابل تاني وهنجتمع بيهم في الجنه بإذن الله. بما ان حضرتك بتحب ماما كده يبقى تتمنى انك تفضل جنبها لاخر يوم في عمرها تكرمها وتبرها. وبرده محدش عارف هيمشي قبل مين. وربنا يصبرك ع فراق بابا اعمله خير كتير ع قد ماتقدر وادعيله❤️
تم النشر الاثنين، ١٧ مارس ٢٠٢٥
السلام عليكم اتمنى تكون بخير طبيعي جدا تزعل خد وقتك فى الزعل فراق الأب مش هين اكيد ، لكن على الاقل نقدر نخلينا حنينين مع نفسنا اكتر اكيد انت اتمنيت لو قعدت معاه اكتر وده طبيعي بس صدقني مفيش حاجه فى الدنيا بتحصل منغير سبب ابدا عدم وجودك ف اللحظه دى اكيد تخفيف عنك لانها هتكون اصعب لما يتوفى وانت جمبه يمكن ربنا عايز يخفف عنك اكيد هو عارف انك كنت بتشتغل وبتعمل الى عليك وانك كنت بعيد عنه ف مكان بعيد ده مكانش بمزاجك وده كان بحكم شغلك وده حاجه اكيد متزعلش ابوك منك اكيد الأب والام مفيش حاجه تعوضهم لكن لازم نحاول نتعايش مع الحقيقه الموت اصعب حقيقه فى الدنيا والاصعب انك تفضل قلقان من موت حد لدرجه انك متستمتعش بالحياه معاه من كتر مانت قلقان من وسواس الموت اكيد انت عارف ان تعبك والدك ده كان صعب عليه وأن ربنا ارحم بكتير من انه يسيبه يتألم عشان كده هو ف مكان احسن واكيد هتشوفه فى يوم بس خليك إنسان كويس واكيد ابوك هيكون عارف ب ده من أعظم الحجات الى الانسان يبسيها أنه يسيب ولد صالح يدعو له ادعيله كتير اوى اوى ولو عرفت تطلع ليه زكا اعمل كده وحاول تواسي مامتك وتقعد معاها على قد ما تقدر حتى تكون عملت كل حاجه تقدر عليها عشان بعد الشر لو حصل حاجه متقولش لنفسك ياريتنى قعدت معاها اكتر لاء لازم تعمل كل حاجه تقدر عليها وزى ما قولتلك تقدر عليها يعنى وانت بتشتغل اكيد مش هتعرف تقعد معاها ف دى حاجه مش هتقدر لكن تقدر تكلمها وتطمنها كل يوم وهكذا وتقدر تكون انسان كويس عشان هى تاخد حسانات هى ووالدك من تربيتهم ليك ، بالنسبه لموضوع اخواتك اه شىء محزن لو هما مبيسألوش عليك بس يمكن عندهم حجات منعاهم انت متعرفهاش طبعاً ده مش عذر ولكن نحاول نحسن الظن بالى حوالينا وكفايه اكيد سؤال مامتك عليك متعتمدش على سؤال حد حاول تكون قدام ربنا وقدام نفسك حد كويس وإن شاءالله خير
تم النشر الاثنين، ١٧ مارس ٢٠٢٥
رحمه الله والدك .. بس انا عايز اقولك حاجة كأخ .. متنساش يا صديقى إن حياتنا دى ماهى الا اختبار واهلنا واحبابنا هما اختبار لينا وتعلقنا برضه امتحان من ربنا عشان يشوف هل احنا صادقين فى إيماننا به ولا بنحب خلقه اكتر منه .. عايز اقولك يا صديقى إن تعلقك بأهلك وخوفك من فقدانهم لن يداويه أو يجعل قلبك يطمئن الا اذا احببت الله أكثر منهم .. اجعل تعلقك بالله اكبر من اى مخلوق .. استغيث به واختلى به وادعوه واستودعهم عنده .. صدقنى سيكفيك ويزيد .. لا اراك الله مكروه فى عزيز لديك .. دمت اخى العزيز
تم النشر الاثنين، ١٧ مارس ٢٠٢٥
وعليكم السلام ورحمة الله وبركاته، أخي العزيز، أقدر مشاعرك العميقة وفقدانك الكبير لوالدك، فهو تجربة قاسية جداً ولا يمكن لأي شخص أن يشعر بها ما لم يجربها بنفسه. الشعور بالحزن والقلق على والدتك أمر طبيعي جداً بعد تلك التجربة المؤلمة. من المهم أن نفهم أن مشاعر الخوف من الفقدان أو القلق على الأحباء لا تعني أنك أناني. بل هي علامة على الحب العميق ورغبتك في توفير الحماية والدعم لأحبائك. يظل خائفاً من الخسارة، وهذا أمر مشروع، لكن دعني أذكرك بأن الموت واحد من الحقائق الحياتية التي لا نستطيع التحكم بها، وإنما يجب أن نعيش الحياة بحسن نية ونسعى لإعطاء من نحب كل ما نقدر عليه. في تلك الظروف الصعبة، قد يكون من المفيد أن تحاول التواصل مع والدتك بشكل منتظم. قدم لها الدعم، واقضِ وقتًا معها وشاركها أفكارك ومشاعرك. بدلاً من التفكير في الفقدان، حاول التركيز على الأوقات الجيدة التي يمكنك قضاءها معًا. كذلك، يمكنك التفكير في استشارة مختص نفسي إذا شعرت أن حزنك يزداد أو يؤثر أكثر من اللازم على حياتك اليومية. الدعم المهني يمكن أن يكون له تأثير كبير على الصحة النفسية. وأخيرًا، تذكر دوماً أن الله هو العزيز الحكيم، ونسأله أن يرزقكم الصبر والقوة. حماكم الله ورزقكم الفرح والسلام.
تم النشر الاثنين، ١٧ مارس ٢٠٢٥
ربنا يرحمه
تم النشر الاثنين، ١٧ مارس ٢٠٢٥
صديقي الغالي ، انا نفس فكرة تخوفك دي ويمكن اكتر بكتير ، بس البلاء لما بينزل بيتزل معاه لطف ربنا متشيلش هم البلاء من دلوقتي ربك كريم ادعي لوالدك لوالدتك انما متدعيش ع نفسك بالموت الا خوفا من فتنه او خوفا من النار غير كدا لاي سبب متدعيش ع نفسك بيه
تم النشر الخميس، ٢٠ مارس ٢٠٢٥
اللهم اغفر له ورحمه واسكنه فسيح جناتك يارب العالمين ❤
تم النشر الاثنين، ١٧ مارس ٢٠٢٥
الله يعينك
تم النشر الاثنين، ١٧ مارس ٢٠٢٥
ربنا يرحم باباك وبلغه الفردوس من الجنة اللهم آمين وربنا مايحرمكش من مامتك ومايحرمهاش منك
تم النشر الاثنين، ١٧ مارس ٢٠٢٥
لعرض السؤال في فدني اضغط هنا